Ua loaʻa ke kino kupapaʻu ma Kauaʻi.
ʻO ia aʻela kekahi poʻo nūhou o kēia lā, ka lā 18 o ka mahina ʻo ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua loaʻa mai nei kekahi kino kupapaʻu i kekahi mau kānaka ma Kauaʻi i ka Lāpule nei. A manaʻo ihola ka mākaʻi o laila, ʻo ia ke kino o kekahi wahine i nalowale aku ma kēia mahina nei. ʻO Joddielynn Taylor ka inoa o ua wahine lā a ʻo ka lā ʻeono o ʻOkakopa kona lā hope loa i ʻike ʻia ai. Ma Poʻipū i loaʻa mai ai ke kino, a ua pilau loa. ʻAʻole i maopopo ke kumu o Taylor i make ai.
Ua eo ihola ʻo Hawaiʻi iā Nevada ma ka helu ʻai he 34 i ka 17 ma Nevada. Wahi a Todd Graham, ke kumu aʻo o Hawaiʻi, ʻaʻole hiki ke lanakila inā lilo aku ka pōpō i ka hoa paio, he ʻeono manawa. Ua ʻapo lilo ʻia ka pōpō a Hawaiʻi he ʻehā manawa, a he ʻelua manawa i pahemo ai ka pōpō. ʻO ka mea minamina, ma hope o ka hapahā ʻelua, he 20 ʻai a Nevada a he 17 a Hawaiʻi.
Ma ka pāʻani pōpō paʻipaʻi, lanakila aku nei nā Wāhine Ānuenue ma luna o Cal State Bakersfield ma loko o nā pāʻani ʻekolu wale nō. He 10 hoʻopio a Amber Igiede a he 10 nō hoʻi a Brooke Van Sickle. A i kēia manawa, ʻo Hawaiʻi ka helu ʻekahi ma ka ʻAhahui Komohana Nui, ʻoiai, ua eo ʻo Kāna Palapala iā UC Davis i ka Pōʻaono nei.
Eia mai kā kākou ʻōlelo noʻeau,
ʻEha i ka ʻeha lima ʻole a ke aloha.
ʻO ia hoʻi, ua hoʻohihi kekahi i kekahi.
Ke Aolama 
mahalo a nui loa.
LikeLike