E hoʻihoʻi ʻia ana kahi puʻu kālā ʻauhau i ko Hawaiʻi.
ʻO ia aʻela kekahi poʻo nūhou o kēia lā, ka lā ʻehiku o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
I ka Pōʻalua nei, hoʻomaka iho nei kahi polokalamu e kāhaʻu ai ke kalaima ma Waikīkī. ʻO ka inoa o ua polokalamu lā, ʻo ia hoʻi, ʻo Waikīkī, he Wahi Palekana a Maluhia. ʻO ia ke koi a ka kaiāulu o laila ma hope mai o kekahi mau kalaima ʻino loa. Na ke kūlanakauhale o Honolulu i hoʻokaʻawale he $250,000 a ʻoi aku a emi mai paha. A he $90,000 mai ke Kahua ʻo Paul Kosasa. ʻO nā palena o ia polokalamu, mai ke Awa Kū Moku Liʻiliʻi o ke Ala Wai a i ke Alanui ʻo Kaimana Hila a pili aku i ke Alanui ʻo Ala Wai. A aia nō hoʻi ma loko o ia mau palena ke Kia Hoʻomanaʻo Mokuʻāina ʻo Lēʻahi, ke Kahua Hōʻikeʻike Holoholona Laka ʻOle o Honolulu a me ka Pāka ʻo Kapiʻolani.
E hoʻihoʻi ʻia ana kahi ʻauhau i ko Hawaiʻi nei. A e hoʻomaka ana i kēia Pōʻakahi aʻe. ʻO ka nui o ke kālā e hoʻihoʻi ʻia ana, he $300, inā ʻo kou uku hana makahiki, he $100,000 a emi mai. A no ka paʻa male, he $200,000, a e lilo he $300 pākahi. A e lilo nō hoʻi he $300 i kēlā me kēia ʻaiʻai. A inā ʻoi aku kou uku hana makahiki i ka $100,000, he $100 ka mea e hoʻihoʻi ʻia. A he $200,000 no ka paʻa male.
Eia mai kā kākou ʻōlelo noʻeau,
Ua laʻi ka nohona i ke alo pali.
ʻO ia hoʻi, ua maluhia loa.
Ke Aolama 
Ma hope o ke kau ʻana o nā ʻohu ma uka, ma kai, ma ‘o a ma ʻaneʻi, ʻōnohi ʻula i ka lani. Penei ka nūhou mai Beretania aku.
I nehinei, ma hope koke o nā hola o ka ua nui, hiki ke ʻōlelo ʻia penei, ʻōnohi ʻula i ka lani. ʻOia hoʻi, kekahi hōʻailona kūpaianaha hoʻi i ʻike ʻia ma luna o ka Hale Mōʻī ma Lādana nei. ʻAkahi nō a ʻike ʻia ka nūhou kaumaha mai ka Hale Mōʻī, ke hiamoe loa aku nei ka mōʻī o Beretania , ʻoia hoʻi ʻo Elizabeth ʻElua.
No laila, e hoʻoipo ana ka lani me Niolopua.
LikeLike