He pila hou no ka pono o nā mea hoʻonaʻauao o nā kula aupuni o Hawaiʻi nei.
ʻO ia aʻela kekahi poʻo nūhou o kēia lā, ka lā 13 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.
He pila hou ko ka Hale o nā Lunamakaʻāinana o Hawaiʻi nei no ka pono o nā kumu kula aupuni. ʻO ka Pila Hale 1811 ia. Ma ia pila, e hoʻokumu ʻia ka Polokalamu Hoʻokaʻa ʻAiʻē Hele Kulanui. A ma ia polokalamu, e hoʻokaʻawale ʻia ke kālā no ka uku ʻana i nā ʻaiʻē hele kulanui o nā kumu kula aupuni laikini ʻia, nā kumu kūkākūkā, a me nā kahu puke o nā kula aupuni a me nā kula hoʻāmana. ʻO ka mea nui, e hana ana ma ke ʻano he manawa piha, a ʻāpono ʻia ka hōʻaiʻē haumāna. E lana ana ka manaʻo o nā luna kau kānāwai, ma muli o ka pila, e hoʻomaikaʻi ʻia ka hoʻohei ʻana i nā kumu hou a e emi mai nā kumu haʻalele i ka ʻoihana hoʻonaʻauao. Ma ka pila, ke ʻāpono ʻia ke kanaka hoʻonaʻauao, e hoʻokaʻa ʻia he $20,000 ʻaiʻē a emi mai paha, ma hope o ka hana manawa piha a ia kanaka hoʻonaʻauao ma ke kula aupuni, he ʻelima makahiki ma hope kekahi o kekahi. A e hoʻokaʻa ʻia he $25,000 hou ke hana ia kanaka he ʻelua makahiki hou.
Aia nō kekahi Hawaiʻi ma ka Hoʻokūkū Hana Leʻaleʻa Hoʻoilo o ka Honua. ʻO Madison Laʻakea Te-Lan Hall Chock kona inoa. A i ka Pōʻakolu nei, mai lilo mai ka mekala kula iā lāua me kāna kāne ma ka Holo Hau Hulahula. ʻO ko lāua hulahula ʻana, ua hemolele i ka mālie, he 224.39 a lāua ʻai. A ʻo lāua nei nō ke poʻokela ma waena o nā moho a pau i hula ma mua, he ʻehiku paha ʻai a ʻoi. Akā, ʻo Palani ka mea i holo hau hulahula ma hope mai, ʻo ia ʻo Laurence Fournier Beaudry lāua ʻo Guillaume Cizeron, ua ʻoi aku lāua iā Chock mā. He 225.82 ʻai a Beaudry mā a lilo ai ka mekala kula iā lāua. A lilo ka mekala waikālā iā Chock mā. A ʻo Piper Gilles lāua ʻo Paul Poirier o Kanakā nā mea i lilo aku ai ka mekala keleawe.
Eia mai kā kākou ʻōlelo noʻeau,
Pau kuhihewa i ka nani o ʻAipō.
He ʻōlelo kēia ke ʻike maka i ke ʻano o kekahi mea, he kanaka, he wahi, a he mea ʻē aʻe paha.
Ke Aolama 