Ke Aolama

Kahakaha kolohe ʻia aku nei kekahi ala piʻi kuahiwi o Kauaʻi.

ʻO ia aʻela kekahi poʻo nūhou o kēia lā, ka lā 28 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

E hoʻokomo ʻia ʻo Taylor Swift ma ka Hale o nā Haku Mele Kaulana i kēia makahiki. A ʻo ia ana ka lua o ka mea ʻōpio loa i kona wā e hoʻokomo ʻia ai ma ka moʻolelo o ia hale. He 36 ona makahiki. ʻO Stevie Wonder ka ʻōpio loa i kona wā i hoʻokomo ʻia ai i ka makahiki 1983, he 33 wale nō ona makahiki. ʻO nā haku mele ʻē aʻe e hoʻokomo ʻia aku i ka wā like me Swift, ʻo Alanis Morissette, ʻo Kenny Loggins, a me ʻelua lālā o ka hui ʻo Kiss, ʻo ia hoʻi, ʻo Paul Stanley lāua ʻo Gene Simmons. E mālama ʻia ana ka ʻaha hāʻawi makana i ka lā 11 o Iune ma Nū Ioka.

Kahakaha kolohe aku nei kekahi ma ke ala piʻi kuahiwi i Nounou ma Kauaʻi. ʻO ka mea i kahakaha ʻia, ʻo ka hōʻailona kawakika, ka hōʻailona hoʻi o Kelemānia i ke au iā Adolf Hitler. Ua hōʻinoʻino ʻia kekahi papa noho, nā kumu lāʻau a me nā pōhaku. ʻO ia hana kūʻē i ka poʻe Sema, he mea ia e ʻike ʻia ana ma Kauaʻi ma ka wā i hala iho nei. Hōʻike aʻela ʻo Uriel Chrugin, ma ʻOkakopa a me Nowemapa o ka makahiki nei i hala, kahakaha kolohe ʻia kona kalaka kūʻai mea ʻai ma Kapaʻa i ka ʻōlelo kūʻē Sema. A ua loaʻa pono ihola ke kolohe. Koe aku kona hoʻopaʻi ʻia.

Eia mai kā kākou ʻōlelo noʻeau,

ʻAʻohe hua o ka maiʻa i ka lā hoʻokahi.

He pane aku kēia i ka mea ahonui ʻole.

E pāpā ʻia ana paha ke kelepona hele ma nā kula aupuni o Hawaiʻi nei.

ʻO ia aʻela kekahi poʻo nūhou o kēia lā, ka lā 26 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua pii aʻela ka waiwai ʻiʻo o ke kula a ʻoi aku i ka $5,000 o ka ʻauneki. I kēia lā, he $5,071.96 o ka ʻauneki kula. A ʻo ka ʻoi loa ia ma ka moʻolelo o ka honua nei. I ka makahiki 2025, ua piʻi ka waiwai ʻiʻo he 64 pākeneka. A i kēia makahiki nei, piʻi aʻe nei he 17 pākeneka.

ʻO ka mākaukau ma ka makemakika, ka ʻike helu hoʻi, ua lilo i mea nui no kēia kau ʻaha ʻōlelo, ʻoiai, he pono ʻoihana ia no kēia hope aku. Hōʻike aʻe nei nā luna hoʻonaʻauao, ʻo ka hoʻimaikaʻi ʻana i ka hopena ʻike helu, aia nō i ka noke ʻana i ke kākoʻo ma ka lumi papa, ka paʻa o ke kālā kūmau a me ka lawa kūpono o nā mea e pono ai ke ola, ka noʻonoʻo a me ka naʻau o ka haumāna. Ma kekahi hōʻike a ke Keʻena Hoʻonaʻauao, ʻo ka mākaukau ʻike helu o ka haumāna papa ʻewalu o kēlā makahiki aku nei, he 35 wale nō pākeneka.

Ma ka Hale o nā Lunamakaʻāinana o Hawaiʻi nei, aia kahi pila e pāpā ana i ke kelepona hele ma nā kula aupuni. ʻO ka Pila Hale 1559 nō ia, a e pāpā ana ia, ʻaʻole e hoʻohana ʻia ke kelepona hele a me ia mea aku, ia mea aku, ma ka lumi papa i mea e hoʻomaikaʻi ai i kahi aʻo, i mea e hoʻomalu ai i ka noʻonoʻo a me ka naʻau o ka haumāna a i mea hoʻi e hoʻomaikaʻi ai i ka hopena hoʻonaʻauao o ka haumāna a puni ʻo Hawaʻi. ʻO ka mea ʻāpiki, ua mahae nā kumu kula aupuni. He mau manaʻo nō. ʻO kekahi, ʻo ka pāpā loa ʻana, ʻo kekahi, ʻo ka ʻae ʻana, a ʻo kekahi, ʻo ke kau palena ʻana i ka hoʻohana ʻana. He kumu waiwai ke kelepona hele ma ka papa, pēlā ka manaʻo o kekahi poʻe kumu. A ʻo kekahi poʻe kumu, he mea hoʻoluhi hewa wale nō ia.

Eia mai kā kākou ʻōlelo noʻeau,

Nā keiki a Kalaihaohia.

He ʻōlelo kēia no ka poʻe ʻālunu.

E lilo ana paha ka pili waiwai i mea kū i ke kānāwai ma Hawaiʻi nei.

ʻO ia aʻela kekahi poʻo nūhou o kēia lā, ka lā 22 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

ʻĀkoakoa aku nei nā kānaka he nui ma ke Kapikala i ka Pōʻakolu nei, ka lā hoʻi i wehe ʻia ai ka ʻAha ʻŌlelo, i mea e hoʻolalelale ai i nā luna kau kānāwai e kākoʻo i kā lākou mau papahana, e laʻa ka hana e pono ai nā keiki a me nā ʻohana ʻōpiopio, ka poʻe mahi ʻai, ka hoʻomalu ʻana i ka poʻe eʻe moku e noho nei ma ʻaneʻi, ka hoʻonaʻauao, kahi noho emi o ka uku hoʻolimalima a kumu kūʻai paha, ka hoʻolaha ākea ʻana i ka hana ʻino a ka puʻu laehaokela niu a me kekahi mau mea nui hou aku. ʻO kekahi pilikia, e hopohopo ana nā luna o ka Hale Lunamakaʻāinana me ka ʻAha Kenekoa i ke emi iho paha o ke kālā pekelala. Ua nui loa ke kālā o ka waihona kālā o ke aupuni o Hawaiʻi i hoʻolilo ʻia aʻela ma muli o ke pani ʻia o ke aupuni pekelala he kanahā kūmākolu lā.

He hui hou ke aupuni o Hawaiʻi nei nāna e hana i ala e holo ai ka pili waiwai ma Hawaiʻi nei. He iwakālua kūmāhā mau kānaka o ia hui, he mau luna kau kānāwai, he mau mākaʻi, he mau waha ʻōlelo ʻoihana pili waiwai nō hoʻi, a he mau luna no kekahi mau keʻena aupuni. A he noiʻi nō hoʻi kā lākou i ka nui o ke kālā e hoʻolilo ʻia aku, nā pōmaikaʻi a me nā kānāwai o nā mokuʻāina ʻē aʻe, a e waiho aku i hōʻike i mua o ka ʻAha ʻŌlelo ke hiki aku i ka hopena o kēia makahiki. A ʻo kekahi mea e kūkākūkā ʻia, ʻo ka pono a me ka ʻole o ka pili waiwai ʻana ma nā moku e holo ana ma Hawaiʻi nei a ma ka ʻāina e kūkulu hou ʻia ai ke Kahua Pāʻani ʻo Aloha. I kēlā me kēia makahiki ma kēia pae ʻāina nei a puni, he $700 miliona kālā a ka 800 miliona paha kālā e holo ana ma nā wahi pili waiwai kū ʻole i ke kānāwai. A he mea maʻa mau ma nā wahi pili waiwai ke kūʻai lāʻau ʻona, ka pōā a me nā ʻano kalaima like ʻole.

Eia mai kā kākou ʻōlelo noʻeau,

No Hilina paha, ke huikau ala ka ʻōlelo.

He ʻōlelo kēia no ke kanaka i huikau.

ʻAʻole i pau ka hie o ʻĀina ʻŌmaʻomaʻo.

ʻO ia aʻela kekahi poʻo nūhou o kēia lā, ka lā 21 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma ka Hālāwai Kūlana Waiwai Honua ma Kuikilana, hōʻike aʻela ka Pelekikena Donald Trump, ʻaʻole ma ka ikaika e lilo ai ʻo ʻĀina ʻŌmaʻomaʻo iā ʻAmelika Hui Pū ʻIa. ʻAʻole naʻe i pau kona makemake e lilo aku ʻo ʻĀina ʻŌmaʻomaʻo ma lalo o kona malu. A he manaʻo ko Trump e hoʻomaka koke ke kūkākūkā ʻana i wahi e paʻa ai ia ʻāina iā ʻAmelika. Ua hōʻike nā luna o Kenemaka a me ʻĀina ʻŌmaʻomaʻo i mau ala e nui ai ʻo ʻAmelika Hui Pū ma ʻĀina ʻŌmaʻomaʻo me ka lilo ʻole aku i nā lima wīkani o ia aupuni kāʻili wale.

E hoʻohalahala ana ke Kiaʻāina Josh Green i ke Kuhina Ola Kino o ʻAmelika Hui Pū ʻIa, iā Robert F. Kennedy ʻŌpio, no kona hoʻolaha hewa ʻana i ka ʻike e pili ana i ka lāʻau koʻokoʻo e pale aku ai i nā maʻi like ʻole. Ma muli ia o ka māhuahua loa ʻana o nā kānaka i loaʻa i ka maʻi ʻulāliʻi ma Kalolaina Hema. Ma laila, mai ka Pōʻalima i hala iho nei, he kanawalu kūmāwalu mau kānaka hou i loaʻa i ka maʻi ʻulāliʻi. A ʻo ka nui loa ma ia mokuʻāina, he 640 a ʻoi. Ma ʻAmelika Hui Pū ʻIa, he ʻumi kūmālua mahina, ma hope kekahi o kekahi, e lele ana ua maʻi lā a laha. Ma Hawaiʻi nei, aia nō kekahi poʻe kānaka e kūʻē ana i ke ʻō ʻana aku i ke keiki i ka lāʻau koʻokoʻo i mea e komo ai i ke kula aupuni a e kūʻē ana nō hoʻi i pila hou ma ka ʻaha ʻōlelo e kāpae ana i ka hōʻole i ke ʻō lāʻau koʻokoʻo ma muli o ka hoʻomana. E mālama ʻia ana kahi hālāwai hōʻeuʻeu ma ke Kapikala i kēia lā.

Eia mai kā kākou ʻōlelo noʻeau.

Moe lāpuʻu i ke anu o Puʻupā.

He ʻōlelo kēia no ke kanaka e moe pupuʻu ana. A he ʻōlelo hoʻohenehene nō hoʻi kēia i ke kanaka puni hiamoe.

He mākaʻi kūmau ana ko kekahi mau kula kiʻekiʻe o Oʻahu nei.

ʻO ia aʻela kekahi poʻo nūhou o kēia lā, ka lā 16 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

Aia ʻo ʻOnipaʻa i kēia lā. E hoʻomaka ke kaʻi huakaʻi ma Maunaʻala i ka hola 9:30 o ke kakahiaka. A ma ʻIolani Hale, he mau Hawaiʻi Alakaʻi ke haʻi ʻōlelo ana, ʻo Emma Koa, ʻo Imaikalani Winchester, ʻo Lanakila Mangauil, ʻo Healani Sonoda-Pale a me Kaniela Ing. A he mau puʻukani ana nō hoʻi kekahi, ʻo Pohaku, ʻo Sudden rush, ʻo Maka Gallinger, ʻo Skippy Ioane, ʻo Mel Amina, a me Analu ʻAina.

E alu like ana ka ʻOihana Mākaʻi o Honolulu me ke Keʻena Hoʻonaʻauao o Hawaiʻi ma ka lawelawe ʻana i polokalamu kahi e hana ai ka mākaʻi ma kekahi mau kahua kula kiʻekiʻe o Oʻahu nei. He polokalamu ia e launa pū ai ka mākaʻi me ka haumāna, e aʻo ai i ka haumāna, a e palekana ai ke kula. A ʻo ka pahuhopu, ʻo ka hoʻomaikaʻi i ka pilina o ka mākaʻi me ka haumāna. ʻAʻole no ka hoʻopololei ʻana. ʻO ka makamua nō kēia o ia ʻano polokalamu ma Oʻahu nei. He lōʻihi nō kona lawelawe ʻia ʻana ma Kauaʻi, Maui, a me Hawaiʻi Moku. Ma Oʻahu nei, e mālama ʻia ana ma nā kula kiʻekiʻe o Waiʻanae, Kapolei, a me Kaimukī.

Ma Kaleponi a me Hawaiʻi nei, e ʻolohani hou ana paha nā kahu maʻi o Kaiser Permanente a pēlā pū me nā limahana ʻoihana olakino. ʻO ka nui o lākou, ma kahi o ke 31,000. ʻO ka lua ana ia o ka manawa ma loko o nā mahina ʻehā. Ma ka mahina ʻo ʻOkakopa i hala aku nei, ua ʻolohani nō lākou. A laila, hoʻomaka hou ke kūkākūkā ʻana, ʻaʻole naʻe i loaʻa kahi ʻaelike ma ia hope mai. A no laila i holo ai ka manaʻo o ka ʻahahui kahu maʻi a ʻoihana olakino e haʻalele hou i ka hana i ka lā 26 o Ianuali me ka maopopo ʻole o ka lā e hoʻi hou ai.

Eia mai kā kākou ʻōlelo noʻeau,

ʻAʻohe kolopā nāna e une.

He ʻōlelo kēia no ke kanaka lae paʻa.

Hala akula kekahi kumu hula i ke ala hoʻi ʻole mai.

ʻO ia aʻela kekahi poʻo nūhou o kēia lā, ka lā 14 o Ianuali, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.

Moe iho nei Kumu Hula Nālani Kanakaʻole-Zane ma Hilo i ka lā 3 o Ianuali nei. He kumu ʻo ia no Hālau o Kekuhi, a he luna loiloi ʻo ia no ka Hoʻokūkū Hula ʻo ka Merrie Monarch no nā makahiki he nui. ʻO Kumu Hula Nālani ka muli loa a ʻAnakē Edith Kanakaʻole, ka mea nāna i hoʻokumu iā Hālau o Kekuhi. A hoʻomaka ihola ʻo ia i ke aʻo ʻana mai i ka hula i ka piha ʻana o nā makahiki ʻekolu iā ia ma lalo o kona kupunahine, o Mary Kekuewa Kanaele Fujii a ma hope mai ma lalo o kona makuahine. A i ka piha ʻana o nā makahiki he 14, hoʻomaka ihola ʻo ia i ke aʻo ʻana aku i ka hula. ʻO lāua me kona kaikuaʻana, me Kumu Hula Pualani Kanakaʻole Kanahele, ua kau i ka hano hāweo he mau manawa no ko lāua ʻike ma ka hula.

Ua ʻāpono ihola nā luna aupuni o Hawaiʻi, ʻo ke koloa maʻi i loaʻa aku nei ma Nowemapa, ua make i ka palū manu. I ka lā 26 o Nowemapa o ka makahiki i hala iho nei i loaʻa ai ua koloa lā ma Kahi Palekana Holoholona ma Hanalei i Kauaʻi a i loko nō o nā hola he 24, ua make ihola. E kali ana ke Keʻena ʻĀina a Waiwai Pili ʻĀina ʻo ka loaʻa mai o ka hōʻike no ke kumu i make ai ua manu lā, a ʻakahi nō a loaʻa, ʻo ka palū manu nō. ʻAkahi a hoʻomaka ka wā e leleaoa mai a leleaoa aku ai nā manu.

Eia mai kā kākou ʻōlelo noʻeau,

Ua ʻailolo.

He ʻōlelo ia no ke kanaka loea ma kekahi hana.

E loaʻa mai paha kekahi mea e emi ai a e pau ai paha ka puʻu laehaokela niu ma Hawaiʻi nei.

ʻO ia aʻela kekahi poʻo nūhou o kēia lā, ka lā 12 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma ke Kulanui o Hawaiʻi ma Mānoa, aia nō kekahi haumāna lae ʻula ke noiʻi aku nei i ka maikaʻi a me ka maikaʻi ʻole paha o ka mea hoʻomaʻi e make ai ka puʻu laehaokela niu. ʻO Kristen Gaines ka inoa o ia haumāna lae ʻula. A ʻo ka mea hoʻomaʻi āna e hoʻohana nei, ua kapa ʻia ʻo ka OrNV, a ua loaʻa mua iā Kauka Alois Huger i nā makahiki 1960. A ma muli o ia mea hoʻomaʻi i emi loa ai ka pilikia o Kāmoa i ka puʻu laehaokela niu.  Ua paʻapū ihola ʻo Oʻahu nei i ua puʻu lā. Akā, he mea pono ke noiʻi ʻia aku ka mea hoʻomaʻi, ʻoiai, ʻaʻole i akāka ka hopena o nā mea kolo ʻōiwi o Hawaiʻi nei, he make nō hoʻi paha i ua mea hoʻomaʻi lā, ʻaʻole paha.

He manaʻo ko ka Lunamakaʻāinana David Tarnas, e kau ma ka pāloka kahi nīnau no ka lilo ʻana o ka pakalōlō i mea kū i ke kānāwai, ʻo ia hoʻi, e hiki i ke kanaka makua ke puhi pakalōlō. ʻO Tarnas ka luna hoʻomalu o ke Kōmike Hoʻokolokolo me Kuleana Hawaiʻi o ka Hale o nā Lunamakaʻāinana, he lōʻihi loa kona paipai ʻana i ka hoʻolilo ʻana i ka pakalōlō i mea kū i ke kānāwai. Mai ʻāpono ʻia ka Bila Kenekoa 2487 e ka ʻAha Kenekoa piha i ka makahiki 2024, akā, ma hope, ua kāpae ʻia. ʻO ka Bila Kenekoa 2487, he pila ia e pau ai ke ʻano kalaima o ka pakalōlō. ʻO kekahi pilikia, he kūʻē kūpaʻa ka ʻOihana Mākaʻi o Honolulu a me ke Keʻena Loio Hoʻokolokolo o Honolulu.

Eia mai kā kākou ʻōlelo noʻeau,

ʻO Ulumaheihei wale nō, iā ia ʻo loko, iā ia ʻo waho.

He ʻōlelo kēia no ke kanaka ʻike i nā mea a pau.

E wikiwiki paha ke kūkulu a me ka hoʻoponopono ʻia ʻana o nā hale kula o Hawaiʻi nei.

ʻO ia aʻela kekahi poʻo nūhouo kēia lā, ka lā 9 o Ianuali, he Pōʻalima. Welina e nā makamaka, ʻo Ke Aolama kēia a penei ka nūhou.

He nui loa ka hana a me ke kālā e pono ai ka hoʻoponopono ʻana i nā hale a me nā lumi o nā kula aupuni o Hawaiʻi nei. A pēlā pū me ke kūkulu ʻana i mau wahi hou. No ke Keʻena Kahua Kula Hawaiʻi ia kuleana. A holo ihola ka manaʻo o ia keʻena e hoʻohana i lako polokalamu no ka lawelawe ʻana aku i ka hana me ka ʻōlelo pū ʻana aʻe, he mea ia e pōkole loa ai ka manawa o ka hoʻolālā ʻana a e hoʻēmi ai i ke kālā e hoʻolilo ʻia. ʻO Akamai ka inoa o ua lako polokalamu lā, a wahi a nā luna o ke Keʻena Kahua Kula, e pōkole ka manawa hoʻolālā he 60 pākeneka a emi mai paha. A ʻo ka nui o ke kālā e mālama ʻia, he 15 pākeneka a emi mai. He mea nui nō ia, ʻoiai, ʻo ka nui o nā hale ma lalo o ka malu o ke Keʻena Kahua Kula, he 21 miliona kapuaʻi kuea ka nui, he 4,500 mau hale. A ʻo ka hapanui loa, ua ʻāluʻa a kahiko hoʻi. Ma kekahi noiʻi i hana ʻia ma ka makahiki 2017, ua ʻikea, he 500 a ʻoi o ia mau hale, ua pau ka pono. A ʻo ka nui o ke kālā e pono ai, he $1.3 biliona, ke lawelawe ʻia aku ka hana ma ke ʻano maʻa mau. Akā, ma o ia polokalamu hou e emi loa ai ke kālā a me ka manawa hoʻolālā.

Kī aku nei kekahi mau mākaʻi o Maui i kekahi kanaka i ka pū i ka pō Pōʻahā nei. Ma muli o ka hoʻoweliweli ʻana o ia kanaka, hiki akula nā mākaʻi i ke ala ʻo Kuʻikahi ma Wailuku. ʻAʻole i hoʻokō ia kanaka i nā kauoha a ka mākaʻi, a ma hope mai, kī akula ke kanaka i kāna pū, a ʻo ka hoʻomaka ihola nō ia o nā mākaʻi e kī pū iā ia. A ua kū nō ia kanaka i ka pōkā. ʻAʻole naʻe i hōʻike ʻia ke ʻano o ka ʻeha o ua kanaka lā. Aia nō ke hoʻokolokolo ʻia aku nei.

Eia mai kā kākou ʻōlelo noʻeau,

Hele a kahu ka ʻena.

ʻO ia hoʻi, ua hele a huhū loa.

ʻĀpono ʻia ka Pila 9.

ʻO ia aʻela kekahi poʻo nūhou o kēia lā, ka lā 17 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Koho pāloka aku nei ka ʻAha Kūkā o Maui ma ka Pila 9 i ka Pōʻakahi nei a ʻāpono ʻia aku nei. He ʻelima luna ʻaha kūkā i kākoʻo. ʻO ia ʻo Keani Rawlins-Fernandez, ʻo Shane Sinenci, ʻo Gabe Johnson, ʻo Tamara Paltin a me Nohelani Uʻu-Hodgins. A ʻekolu i hōʻole, ʻo Alice Lee, ka luna hoʻomalu, ʻo Yuki Lei Sugimura, ka hope luna hoʻomalu a me Tom Cook. A ma hope mai, pūlima aku nei ka Meia Richard Bissen. ʻO ka nui o nā wahi noho hoʻolimalima hoʻomahana wā pōkole, he 6,208. No nā wahi noho hoʻolimalima ma Maui Komohana, he ʻekolu makahiki e hoʻokō ʻia ai ka hoʻololi ʻana. A no nā wahi ma Maui Hema, he ʻelima makahiki. ʻO ka mea ʻāpiki, he 4,519 o nā wahi noho he 6,208, e helu ʻia paha ma loko o ka ʻāpana hōkele hou a inā pēlā, e ʻae ʻia ko lākou hoʻohana ʻia ʻana ma ke ʻano he wahi noho hoʻolimalima hoʻomahana wā pōkole.

Ua lele ihola kekahi wahine i ka pali a hāʻule ihola he kanakolu kapuaʻi. E piʻi ana ia wahine me kāna kāne ma ke Ala Wēkiu o nā Koʻolau ma ka Pōʻakahi nei. I ka hāʻule ʻana o ka wahine, iho ihola ke kāne a loaʻa kona kōkoʻolua a ma laila lāua i kali ai ʻo ka hiki ʻana mai o ke kōkua. Ma muli o ka nihinihi o ka ʻāina, ka ʻino, a me ka pōʻeleʻele, ʻaʻole i hiki ke loaʻa lāua i ka poʻe kinai ahi, kāpae ʻia ihola ka huli ʻana i ke kulu ʻana o ke aumoe. A hoʻomaka hou i ke kakahiaka o ka Pōʻalua. Ma mua o ka hola 11:00, ua loaʻa maila lāua i nā kānaka kinai ahi.

Eia mai kā kākou ʻōlelo noʻeau,

Leʻaleʻa ka ʻōlelo i ka pohu aku o loko.

ʻO ia hoʻi, kūkahekahe nō ke māʻona ka ʻōpū.

He kōmike hana politika hou ko Hawaiʻi nei.

ʻO ia aʻela kekahi poʻo nūhou o kēia lā, ka lā 15 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻAkahi a hoʻokumu ʻia ʻo HOKU PAC a hoʻomaka ihola i ka lawelawe ʻana i ka hana e lilo ai ka poʻe māhū a me ka poʻe LGBTQIA+ a me ko lākou mau hoa kākoʻo i mau luna kālaiʻāina ma Hawaiʻi nei. ʻO HOKU PAC, he kōmike hana politika a ʻo Michael Golojuch ʻŌpio kona pelekikana a ʻo kona mea nō hoʻi ia nāna i hoʻokumu. Wahi a Golojuch, no ka pono o nā kaiāulu o Hawaiʻi nei, he mea nui nā luna koho ʻia e ʻike ʻia ai nā ʻano o kākou a pau, a na lākou hoʻi e kūpaʻa ma hope o nā kānaka a pau, pau pū me ko kākou ʻohana māhū me LGBTQIA+. A ʻo HOKU PAC ka mea e kō ai ia manaʻo.

He mau heihei kai mālama ʻia iho nei ma ka hopena pule nei. ʻO ka Heihei Mile Mele a Kalākaua kai mālama ʻia ma ka Pōʻaono nei. He 3,404 mau kānaka i komo. Na Sinclaire Johnson i ʻāhaʻi aku i ka lanakila, a ʻo kona manawa holo, he 4 minuke 21.66 kekona. A i ka Lāpule nei, ʻelua heihei i mālama ʻia i ka wā hoʻokahi. ʻO ka Heihei Start To Park 10K, he 10,812 mau kānaka i komo. ʻO Edwin Kurgat ke kāne ʻoi. A ʻo Annika Reiss ka wahine ʻoi. A ma ka Heihei Malakona o Honolulu, ʻo ke kāne mua i hiki aku i ka pahuhopu, ʻo Tsegay Weldibanos, no Eritrea, he 2 hola, 13 minuke a he 38 kekona. A ʻo ka wahine mua, o Calli Hauger-Thackery, no ʻEnelani, he 2 hola, 30 minuke a he 43 kekona.

Eia mai kā kākou ʻōlelo noʻeau,

ʻŌhiʻa noho malu.

He ʻōlelo kēia no ke kanaka nohea.