Author: keaolama

Hiki akula ka maʻi palū ma Hawaiʻi moku.

ʻO ia aʻela kekahi poʻo nūhou o kēia lā, ka lā 10 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I kēia lā, hōʻike aʻela ke Keʻena Ola o Hawaiʻi, ua loaʻa aku nei ka mea hoʻomaʻi palū manu H5 ma ka wai moka o ka Hale Hoʻomaʻemaʻe Wai Moka o Hilo ma ka mokupuni ʻo Hawaiʻi. ʻO ka manawa mua kēia o ka loaʻa o ka palū manu ma kekahi mokupuni ma waho o Oʻahu nei. ʻO kahi mea i maopopo ʻole, inā ʻo ka H5N1 ia. ʻO ka H5N1 ka mea hoʻomaʻi ʻino loa o ia palū. Ke paipai ʻia aʻela ka lehulehu e kāhea aku i ke Keʻena Mahiʻai o Hawaiʻi ke ʻike aku i ka maʻi ʻano ʻē o nā manu, ka holoholona hānai, a me nā manu makanahele a me nā holoholona ʻāhiu paha. Eia mai ka helu kelepona o ia keʻena, 808-483-7102. A ma waho o nā hola hana a me nā lā nui, e kāhea aku i ka helu 808-837-8092.

Kūkala ʻia aʻela nā moho Makana Heisman i ka Pōʻakahi nei. A he keiki no Hawaiʻi kekahi o lākou moho. ʻO ia ka ʻalihikūlele o ʻOlekona, ʻo Dillon Gabriel hoʻi. Mai ke Kula Kiʻekiʻe o Mililani i puka mai ai ʻo Gabriel. Ma kēia kikina nei, he 3,558 āna ʻīā i nou ai, he 28 āna ʻai holo i nou ai, a he ʻehiku āna ʻai holo i holo ai. Eia nā moho Heisman ʻē aʻe, ʻo Travis Hunter o Kololako, ʻo Ashton Jeanty o Boise Mokuʻāina, a ʻo Cam Ward o Miami. Iā wai lā e lilo ai ka makana? I kēia Pōʻaono e ʻike ʻia ai.

Eia mai kā kākou ʻōlelo noʻeau,

Haoʻe nā ʻale o Hōpoe i ka ʻino.

ʻO ia hoʻi, ke hele nei kekahi a huhū.

Hopohopo ana kekahi o loaʻa auaneʻi nā manu ʻōiwi i ka palū manu.

ʻO ia aʻela kekahi poʻo nūhou o kēia lā, ka lā 9 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua loaʻa aku nō kekahi mau manu ma ʻOʻahu nei i ka palū manu. A ʻo kekahi pilikia, ʻakahi nō a loaʻa kekahi manu makanahele i ia maʻi. ʻAʻole paha e lele aʻe ka palū manu i ke kanaka, akā, ke hopohopo nei o loaʻa auaneʻi nā manu ʻōiwi i ua maʻi lā. He mau kumu e emi nei nā manu ʻōiwi o Hawaiʻi nei, a eia kā, ua hiki mai kekahi mea hou. I kēia manawa, he 712 ʻalae ʻula, he 1,500 paha aeʻo, a he 673 paha koloa maoli. Makaʻu nō hoʻi o lele aku ka maʻi a ma nā mokupuni ʻē aʻe.

ʻO ke kanalima kēia o nā makahiki i hana hoʻomākeʻaka ai ʻo Frank De Lima. A e mālama ana ʻo ia i ʻaha hoʻomākeʻaka ma ka Blue Note Hawaiʻi ma Waikīkī. Aia ana ma ka lā 15 o Kēkēmapa, a ma ka hola 1:00 o ke awakea e hoʻomaka ai. He $35 o ke kikiki, a he $45 o ke kikiki uku kaulele, a he pono nō hoʻi ke hoʻolilo aku he $10 ma ka mea inu a ma ka mea ʻai paha.

Mālama ʻia aku nei ka heihei maratona o Honolulu i ka lā i nehinei. ʻO Cynthia Limo ka inoa moho o nā wāhine. ʻO kona manawa holo, he 2 hola, 31 minuke a he 14 kekona. No Kenia ʻo Limo a ʻo kēlā makahiki aku nei kona makamua i holo ai ma nei maratona, a nāna nō hoʻi i kāʻili i ka inoa moho wahine o ia makahiki. No nā kāne, ʻo Yemane Hailesellasie o Eritrea ka inoa moho a ʻo kona manawa holo, he 2 hola, 11 minuke a he 59 kekona. Lilo aku nei he $25,000 i ia mau lanakila ʻelua.

Eia mai kā kākou ʻōlelo noʻeau,

ʻAu ana ka Lae o Maunauna i ka ʻino.

He ʻōlelo kēia no ke kanaka wiwo ʻole e kūpaʻa ana ke hiki mai nā ʻīnea like ʻole.

Ua eo ʻo Hawaiʻi ma ka puni mua o ka hoʻokūkū inoa moho pōpō paʻipaʻi.

ʻO ia aʻela kekahi poʻo nūhou o kēia lā, ka 6 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hai iho nei i loio ka ʻohana o ka wahine i nalowale mai ka lā 11 mai o Nowemapa. ʻO Hannah Kobayashi ka inoa o ua wahine lā. No Oʻahu mai ʻo Kobayashi, akā, neʻe aku nei i Maui. A haʻalele ihola iā Maui i ka lā 8 o Nowemapa, a hele akula no ke Kūlanakauhale o nā ʻĀnela me ka manaʻo, e lele aku i Nū Ioka, ʻaʻole naʻe ʻo ia i kau aku ma luna o ia mokulele. ʻO kona makuakāne, ʻo Ryan Kobayashi, hele aku nei ʻo ia i laila e ʻimi aku ai i kāna kaikamahine, a ma ka lā 24 o Nowemapa, ma hope o kekahi mau pule ʻelua, lawe ihola ka makuakāne i kona ola ponoʻī. He mau mea kai lohe ʻia no Kobayashi, ʻaʻole naʻe i hiki i ka ʻohana ke hōʻoia. Ua ʻōlelo ka luna mākaʻi o ke Kūlanakauhale o nā ʻĀnela, hele wale aku nei ʻo Kobayashi no Mekiko.

Aloha nō. Hāʻule pahū ihola ka manaʻo, e lilo ka inoa moho pōpō paʻipaʻi o ke ao nei i nā Wāhine Ānuenue. I ka ʻauinalā o nehinei, hiu aʻela ʻo Tekeka Kalikiano a kāʻili kū i ka lanakila ma loko o nā pāʻani ʻekolu wale nō. Ma ka moʻolelo o nā Wāhine Ānuenue, ʻo ka manawa mua ia i suipa ʻia ai lākou ma ka puni mua mai ka makahiki 1997.

Ma ka hoʻokūkū inoa moho pōpō paʻipaʻi o ka Māhele II o ka ʻAhahui ʻĀlapa Kulanui o ʻAmelika, na kekahi kulanui o Hawaiʻi ka luku wale. I nehinei, ma ka puni mua o ia hoʻokūkū, lanakila aku nei ʻo Chaminade ma luna o Stanislaus Mokuʻāina ma loko o nā pāʻani ʻekolu wale nō. I kēia lā, e kūʻē aku ana ʻo Chaminade iā Kapalakiko Mokuʻāina.

Eia mai kā kākou ʻōlelo noʻeau,

ʻAi nō i kalo moʻa.

ʻO ia hoʻi, ua pau ka hana, a he wā hoʻonanea kēia.

Ua hānau hua kekahi o nā mōlī kahiko loa.

ʻO ia aʻela kekahi poʻo nūhou o kēia lā, ka lā 4 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Kūkala aʻela ke Keʻena Loio o ʻAmelika Hui Pū ʻIa ma Hawaiʻi, ʻaʻole i maopopo ke kumu i make ai ʻo Michael J. Miske ʻŌpio. Ua lawe paha ʻo Miske i kona ola, a na haʻi paha i lawe, a i kekahi mea paha ʻo ia i make ai, ʻaʻole i mōakāka. Aia nō ke noiʻi ʻia aʻela. Ua loaʻa ke kino make o Miske ma kona keʻena paʻahao i ka Lāpule nei.

 Ua hānau ʻo Wisdom i hua ma ka mokupuni ʻo Midway. He mōlī ʻo Wisdom, a ʻo ka mea kupanaha, he 74 ona makahiki a ʻoi iki a emi iki paha. ʻO ia ka manu kahiko loa i kalapu hao ʻia. Ua kalapu hao ʻia ʻo Wisdom i Kēkēmapa o ka makahiki 1956 ma hope o kona hānau hua ʻana. ʻO ka mōlī, ʻaʻole hānau hua i kēlā me kēia makahiki, a ke hānau hua mai, he hoʻokahi wale nō hua. He manaʻo ko kekahi poʻe kālaimeaola, he 60 hua a Wisdom i hānau ai a emi mai paha, a ma waena o ia mau hua, he 30 a ʻoi paha i kiko a ola.

ʻO Lois Manin ke poʻo ʻālapa kūikawā o ke Kulanui o Hawaiʻi a i ka Pōʻakahi nei, kona lā mua hoʻi e lawelawe ana i ka hana, hoʻolōʻihi iho nei ʻo ia i ka palapala ʻaelike a Timmy Chang, no laila, e holo ana nō ia a pau ke kikina 2026.

Eia mai kā kākou ʻōlelo noʻeau,

Akāka wale ʻo Haleakalā.

He ʻōlelo kēia no kekahi mea i ahuwale.

Kū kilakila ana nā Wāhine Ānuenue.

ʻO ia aʻela kekahi poʻo nūhou o kēia lā, ka lā 2 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua hāʻawi manawaleʻa ʻo Priscilla Chan lāua ʻo Mark Zuckerberg he $626,000 no ke kōkua ʻana i ka hui Permanently Affordable Living Hawaiʻi ma ke kūʻai aku i ʻelima mau hale ma Kauaʻi. ʻO ka hale wale nō ke kūʻai ʻia. ʻO ka ʻāina e kū ana ka hale, no ia hui nō, ʻaʻole e lilo aku. Akā, e hoʻolimalima manawa pau ʻole ʻia. ʻO ka palena loaʻa makahiki e ʻae ʻia ai ke kūʻai ʻana o ke kanaka hoʻokahi, he $74,320, ʻo ia ka palena haʻahaʻa, a ʻo ka palena kiʻekiʻe, he 111,480. A no ka ʻohana, ʻehā lālā, mai ka $106,160 a i ka $159,240.

Ua loaʻa aku nei ke kino make o Michael J. Miske ʻŌpio ma kona keʻena paʻahao ma ke Kikowaena Hoʻopaʻahao Pekelala ma Honolulu nei i ka Lāpule nei. Ma laila ʻo ia e noho ana mai kona manawa i hopu ʻia ai i ka makahiki 2020. ʻO lā 30 o Ianuali ka lā e kau ai kona hoʻopaʻi. Loaʻa ʻē naʻe ʻo ia i kekahi hopena. ʻAʻole i hōʻike ʻia ke kumu o Miske i make ai. Akā, wahi a ke keʻena o ka Meia Rick Blangiardi, e hoʻomaopopo ʻia mai ana nō i loko o kahi wā pōkole.

Paʻa ihola ka hui a nā Wāhine Ānuenue e kūʻē ana ma ka puni mua o ka Hoʻokūkū Inoa Moho o ka ʻAhahui ʻĀlapa o nā Kulanui o ʻAmelika. ʻO Tekeka Kalikiano nō ka hoa paio, a i ka hola 2:00 nō o kēia Pōʻahā ka ulele ʻana.

I ka Pōʻaono nei, lilo mai nei ka inoa moho pōpō paʻipaʻi o ka ʻAhahui Komohana Nui iā Hawaiʻi ma ka lanakila ʻana aku ma luna o Cal Poly. A ʻo ka lima ia o ka inoa moho ʻahahui i lilo iā Hawaiʻi ma hope kekahi o kekahi. A kau aʻe nei kekahi o nā Wāhine Ānuenue i ka hano hāweo. ʻO ia ʻo Tayli Ikenaga. ʻO ia ka mea pāʻani ʻoi o ka Hoʻokūkū Inoa Moho Pōpō Paʻipaʻi o ka ʻAhahui Komohana Nui.

Eia mai kā kākou ʻōlelo noʻeau,

He kumu kukui i heʻe ka pīlali.

He ʻōlelo kēia no ke kanaka lālāwai.

ʻO nā Wāhine Ānuenue ka ʻoi.

ʻO ia aʻela kekahi poʻo nūhou o kēia lā, ka lā 27 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ke kū ʻo Donald Trump i ka moku, he manaʻo kona e kau ke kuke waiwai ma nā waiwai e komo mai ana mai Mekiko a me Kanakā. Inā pēlā, e piʻi auaneʻi paha ke kumu kūʻai o ka pea, ka ʻōhelopapa a me kekahi mau mea hou aku, a e pōkole loa nō hoʻi paha ia mau mea a puni ʻo ʻAmelika. Ua ʻōlelo ʻo Trump i ka Pōʻakahi nei, ma ka lā mua o kona lawelawe ʻana i ka hana ma kona ʻano ʻo ia ka pelekikena, e kau ke kuke waiwai he 25% ma nā hua hana a pau e komo mai ana i loko o ʻAmelika Hui Pū ʻIa mai Mekiko a me Kanakā. A ʻo kona kumu e hana ai pēlā, i mea e emi ai ke komo ʻana mai o ka lāʻau kū ʻole i ke kānāwai a me ke komo ʻana mai o nā kānaka o nā ʻāina ʻē.

Kau aʻe nei kekahi mau Wāhine Ānuenue pāʻani pōpō paʻipaʻi ʻekolu i ka hano hāweo ma ka ʻAhahui Komohana Nui. ʻO ka Mea Pāʻani ʻOi o ka Makahiki, ʻo Caylen Alexander nō. Ma ka Māhele I o ka ʻAhahui ʻĀlapa o nā Kulanui o ʻAmelika, ʻo Alexander ka ʻoi ma ka hoʻopio. He 566 ka nui. ʻO ka Mea Hānai ʻOi o ka Makahiki, ʻo Kate Lang. Ma nā kikina ʻekolu i hala iho nei, ʻo ka lua kēia o ka makahiki i lilo ai ia hanohano iā ia. He 1,195 āna hānai, a ʻo ia ka nui loa ma ka ʻAhahui Komohana Nui. A ma ka moʻolelo o ke Kulanui o Hawaiʻi, ʻo Lang ka helu ʻekolu ma ka loaʻa ʻana o nā hānai he 4,000 a me nā ʻali he 1,000 ma ka wā e pāʻani ana no ke Kulanui o Hawaiʻi. ʻO ka Libero ʻOi o ka Makahiki, ʻo Tayli Ikenaga nō. Ma ka ʻAhahui Komohana Nui, ʻo Ikenaga ka helu ʻelua ma ka ʻali, he 454. A ma ka moʻolelo o ke Kulanui o Hawaiʻi no ka huina pau o nā ʻali a Ikenaga, ʻo ia ka helu ʻelima, he 1,320 ʻali.

Eia mai kā kākou ʻōlelo noʻeau,

Keha kaʻakepa ka ʻōlelo i Hīhīmanu.

He ʻōlelo kēia no ke kanaka kaena mau.

ʻAʻole paha e kūkulu ʻia he kauhale hou ma Hawaiʻi Komohana.

ʻO ia aʻela kekahi poʻo nūhou o kēia lā, ka lā 25 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hōʻole iho nei ka ʻAha Kūkā o Hawaiʻi Moku i ka hoʻolōʻihi ʻana i ka wā e kūkulu ʻia ai kekahi kauhale ma Hawaiʻi Komohana. Ma Hōlualoa e kūkulu ʻia ai a he 450 wahi noho, a ʻo ka nui o ia ʻāina, he 69 ʻeka. Ua noi ka hui nāna ke kūkulu ʻana i ka hoʻolōʻihi ʻana he 10 makahiki hou. A ma Iune o kēia makahiki nei, hōʻole ihola kekahi kōmike o ka ʻAha Kūkā. A ma ka Pōʻakolu nei, aia i mua o ka ʻAha Kūkā piha. A hōʻole hou ʻia iho nei. ʻO kekahi kumu, aia ia kauhale e kūkulu ʻia ma ke kāʻei hālana. A ʻo kekahi kumu, ʻaʻole i lawa nā mea e pono ai ka noho ʻana o nā kānaka ma ia wahi i kēia manawa, a inā he 450 wahi noho hou e kūkulu ʻia, e loʻohia loa auaneʻi nā alanui, nā kahua wai moka, nā haukapila a pēlā aku. A ʻo kekahi kumu, he nui nā wahi pana o ia ʻāina. Hoʻokahi wale nō luna ʻAha Kūkā i kākoʻo i ka hoʻolōʻihi ʻana, ʻo ia ka luna ʻAha Kūkā o Kona Hema, ʻo Michelle Galimba, me ka ʻōlelo pū ʻana, ʻo kahi noho, he wahi noho nō ia, a ke kūkulu pono ʻia me ka noʻeau, e kanahaʻi nā pilikia.

He wahi hou ko ke Kalana ʻo Maui e kanu ʻia ai ka ʻōpala o ke ahi o Lāhainā. Kūkala aʻela nā luna kalana i ka lā 18 o Nowemapa, he ʻaelike kūikawā kā lākou no ke kūʻai ʻana mai he 79 ʻeka ʻāina e pili ana i ka Waihona ʻŌpala o Maui Waena. E uku ke kalana i $4 miliona. A he 49 o ia mau ʻeka 79, he hiki ke hoʻohana koke ʻia, a he 30 ʻeka, e lilo mai i ke kalana ke kō ka hana e lawelawe ʻia nei ma laila.

Eia mai kā kākou ʻōlelo noʻeau,

ʻAʻohe mea ʻimi a ka maka.

ʻOia hoʻi, ua loaʻa nō i ke kanaka nā mea a pau i makemake ʻia.

Ke māhuahua aʻela nā pū lapu.

ʻO ia aʻela kekahi poʻo nūhou o kēia lā, ka lā 22 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Aia nō nā mākaʻi o Honolulu nei ke koi aʻela i mau kānāwai kū i ka loʻaʻā i mea e ʻūlōlohi ai ka hana ʻia ʻana aku o ia mea he pū lapu, he pū hoʻi i hana wale ʻia e ke kanaka. ʻAʻohe helu o ka pū, a no laila, ʻaʻole hiki ke hoʻokolo ʻia. A i kēia makahiki nei a hiki i ka lā 31 o ʻOkakopa, ua kāʻili ʻia iho nei he 88 o ia ʻano pū. Ua māhuahua loa nō a ʻoi aku i nā pū lapu i loaʻa i ka makahiki 2023. He 52 wale nō i loaʻa ma ia makahiki holoʻokoʻa. He kānāwai pū lapu ko Hawaiʻi nei, a ua kau i ka makahiki 2020. E pāpā ana ua kānāwai lā, ʻo ke kanaka i laikini ʻole ʻia ma ka hana pū, ʻaʻole hiki ke loaʻa ka pū lapu iā ia, a ʻaʻole hiki ke kūʻai a ke hana paha i pū lapu me ka mīkini paʻi kohu paʻa, a ʻaʻole nō hoʻi hiki ke loaʻa pākahi nā māhele a ma kekahi ʻano paha.

Ma Kahului, ua paʻa ihola nā huila hope o kekahi kaʻa lawe ʻōhua ma ke kālua i ka Pōʻakolu nei. E holo ana ke kaʻa lawe ʻōhua ma ke Alanui ʻo Lono. Ua hāloko nō ka wai ma ia alanui a no laila, ʻaʻole i ʻike ʻia ke kālua. ʻO ka mea nui, ua pakele nā ʻōhua a pau a me ka mea kalaiwa. He wahi mea iki wale nō ia akā, ma hope mai, ua hele a nui, he 15 kapuaʻi i ke 30 kapuaʻi, a he 5 kapuaʻi ka hohonu.

I ka Pōʻahā nei, hōʻikeʻike mua ʻia iho nei ke kiʻi ʻoniʻoni ʻo Moana 2. ʻO ʻAuliʻi Cravalho ʻo ia nō ʻo Moana, a ʻo Dwayne Johnson, ʻo ia nō ʻo Maui. A e hoʻomaka ka hoʻolele ʻia ʻana ma nā hale kiʻi ʻoniʻoni i ka lā 27 o Nowemapa. Ma ka moʻolelo, ua hala nā makahiki ʻekolu, a he loea ʻo Moana ma ka hoʻokele ʻana.

Eia mai kā kākou ʻōlelo noʻeau,

He pūheʻe miki.

ʻO ia hoʻi, he piko pau ʻiole, he kanaka ʻaihue hoʻi.

E kāpae ana ʻo Meadow Gold Dairies Hawaiʻi i kekahi mau māhele hana.

ʻO ia aʻela kekahi poʻo nūhou o kēia lā, ka lā 20 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

E hoʻokuʻu ana ka hui ʻo Meadow Gold Dairies Hawaiʻi i nā limahana he 99. ʻO ke kumu, e hoʻopau ʻia ana ka hoʻāhu ʻana a me ka hoʻomalele ʻana. E hana pū ana ʻo Meadow Gold me kekahi mau hui ʻelua, a na ia mau hui ka hoʻāhu a me ka hoʻomalele. ʻO Foodservice Alliance kekahi hui, a nāna e lawelawe i ka hoʻāhu ʻana a me ka hoʻomalele ʻana no ke kūʻai liʻiliʻi ʻana, nā kula a me nā mea i hoʻopaʻahau ʻia. A ʻo Pacific Provisions Hawaiʻi kekahi hui, a nāna ka hoʻomalele ʻana no nā lawelawe mea ʻai.

Kau aʻe nei kekahi mau Wāhine Ānuenue i ka hano hāweo ma ka pāʻani pōpō paʻipaʻi. ʻO ka mua, ʻo Kate Lang. ʻO ia ka Mea Hānai ʻOi o ka ʻAhahui Komohana Nui o ka Pule. I ka pule nei, he 11.67 āna hānai o ka pāʻani ma nā hoʻokūkū me Ke Kaha Loa a me Kāna Kieko. ʻO ka lima ia o ka manawa i lilo ai ia makana iā Lang i kēia kikina nei, a ʻo ka 16 ia ma kona wā ma ke Kula Nui o Hawaiʻi. Ma ka moʻolelo o ke Kulanui o Hawaiʻi ma Mānoa, ʻo Lang ka helu ʻekolu ma ka hānai, he 4,346 ka nui. A ma ka ʻAhahui Komohana Nui, ʻo ia ka helu ʻekahi ma ka hānai i kēia kikina, he 1,116. ʻO Tayli Ikenaga ka lua o ka Wahine Ānuenue i hoʻoheno ʻia. ʻO ia ka Mea Pāʻani Kūpale ʻOi o ka Pule. He libero ʻo Ikenaga, a ma ka pule nei i hala, he 35 āna ʻali ma loko o nā pāʻani ʻeono. ʻO ka lua ia o ka manawa i lilo ai ia makana iā Ikenaga i kēia kikina nei. A ma ka ʻali ʻana, ʻo ia ka helu ʻelua ma ka ʻAhahui Komohana Nui, he 422.

Eia mai kā kākou ʻōlelo noʻeau,

I moe au i Kanikū, i waenakonu o ka ʻino.

E hōʻike ana kēia i kou wā i pilikia ai.

He polokalamu hou ko ka Hui Mokulele ʻo Hawaiian no ka poʻe kamaʻāina.

ʻO ia aʻela kekahi poʻo nūhou o kēia lā, ka lā 18 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Kūkala aʻela ke Keʻena Ola o Hawaiʻi, ʻo nā kānaka i hele aku i ka Hōʻikeʻike Hānaiahuhu o Mililani i ka lā 2 o Nowemapa, ua pā paha i ka palū manu H5N1. ʻAkahi nō a hōʻoia ʻia, aia nō ma kekahi mau manu ma Oʻahu Waena. A aia nō ia mau manu ma ka hōʻikeʻike ma Mililani. Ma ke kūkala a ke Keʻena Ola, ʻo nā ʻōuli o ia maʻi i ʻike ʻia ma nā manu, ua ʻike ʻia aku he mau lā ma hope mai o ka hōʻikeʻike, no laila, ʻaʻole paha i laha i ke kanaka. Akā, ke paipai nei ia keʻena, ʻo ka poʻe i hele i ka hōʻikeʻike a i hoʻopā aku hoʻi i kakā a i nēnē paha e makaʻala i ka ʻōili mai o nā ʻōuli o ka maʻi palū manu, ʻo ka piwa, ke kunu, ka puʻu ʻeha, a me ka maka ʻākala paha. ʻO ka mea maʻa mau, e ʻōʻili nā ʻōuli i loko o nā lā ʻelima a emi mai paha, a i kekahi manawa, he 10 paha lā a emi mai paha. Ke ʻike ʻia nā ʻōuli, e hoʻomalu maʻi ʻoe iā ʻoe iho ma ka hale, a e kāhea aku i ke kauka. ʻO ka poʻe me nā ʻōuli o ia maʻi i kēia manawa a ma mua paha, e kāhea i ka helu, 808-586-4586 no ka hōʻike ʻana a me ke kōkua paha.

He polokalamu hou ana ko ka Hui Mokulele ʻo Hawaiian no ka pono o nā kamaʻāina o Hawaiʻi nei ke lele mokulele ma kēia pae ʻāina nei. A e hoʻomaka ana i kēia makahiki aʻe. I kapa ʻia ka polokalamu ʻo Huakaʻi by Hawaiian. Ma kēlā a me kēia hapahā o ka makahiki, hoʻokahi manawa e hoʻēmi ʻia ai ke kumu kūʻai he 10 pākeneka no ka poʻe kamaʻāina, a he 20% no nā lālā o ke kāleka kāki hanohano o ia hui mokulele.

Eia mai kā kākou ʻōlelo noʻeau,

Hoa pupuʻu o ka pō anu

He ʻōlelo kēia no ka ipo a no ka pili ʻaoʻao paha.