Author: keaolama

Nui ka hoʻohemahema o ka ʻOihana Moku.

ʻO ia aʻela kekahi poʻo nūhou o kēia lā, ka lā 15 o Nowemapa, he Pōʻalima. Welina e nā makamaka, ʻO Ke Aolama kēia a penei ka nūhou.

ʻAkahi nō a hoʻokuʻu aʻe ke Keʻena Luna Nui Kuhina o ke Keʻena Pale Kaua i mua o ka lehulehu i nā hōʻike no ke kahua wahie a me ke kahua wai a ka ʻOihana Moku ma Oʻahu nei. ʻO kekahi mau mea ma nā hōʻike e pili ana i ka ʻinoʻino o ka lua wai ma Kapūkakī i ka wahie, ua laha ʻē. He mau mea hou naʻe ko nā hōʻike no ka hemahema o ka ʻOihana Moku a me ka huikau i ka wā i hoʻomaka ai ia pilikia. ʻO kekahi mau luna ʻOihana Moku, ʻaʻole i maopopo iki iā lākou, he lua wai ko laila a ʻaʻole nō hoʻi i maopopo, ua kokoke loa ka hanini ʻana o ka wahie i ua lua wai lā. Ua alu like nō nā ʻelele ʻaha ʻōlelo lāhui o Hawaiʻi ma ka ʻōlelo ʻana, ua hoʻākāka mai nā hōʻike, ua maulina a hoʻohemahema ka ʻOihana Moku a me ke Keʻena Pale Kaua i ka lawelawe ʻana i ka hana wahie a me ka wai ma Kapūkakī a pēlā pū ma ke Kahua Pūʻalikaua o Puʻuloa-Hickam a puni, ʻaʻole i hana iki i ka mea e pono ai ka palekana o ko Hawaiʻi nei. ʻAʻohe manaʻo.

Aia nō nā luna ola kino o ke aupuni mokuʻāina ke noiʻi aku nei i ke kumu o ka mea hoʻomaʻi palū manu H5. ʻO ka makamua ia o ka loaʻa ʻana mai o ia mea hoʻomaʻi ma ka wai moka o Oʻahu nei. Holo ihola ka manaʻo o ia mau luna ola kino, ʻaʻole e laha ia mea hoʻomaʻi ma waena o ka lehulehu. Ua ʻoʻe ʻia ka wai ma ka lā 7 o Nowemapa, a ma ka Pōʻalua nei i loaʻa mai ai ka hōʻike. ʻO ka mea i koe i kēia manawa, ʻo ia ka ʻike ʻana i ke ʻano o ia mea hoʻomaʻi H5. Inā ʻo ka H5N1 ia, ʻo ia ka mea ʻino loa.

Eia mai kā kākou ʻōlelo noʻeau,

ʻEliʻeli kūlana o ʻĀinaʻike.

He ʻōlelo kēia no ke kanaka i mahalo ʻia kona ʻike kūliʻu.

Hoʻoponopono ʻia aku kahi hewa o ke kiʻi o ka Pelekikena Wiliama Makinalē.

ʻO ia aʻela kekahi poʻo nūhou o kēia lā, ka lā 13 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻO ka Pōʻakahi nei ka lā i piha ai ka makahiki 107 o ka hala ʻana o ka Mōʻīwahine Liliʻuokalani. A ma ka Pōʻakahi nei nō hoʻi, ua huʻe ʻia aku kahi hōʻailona e hoʻopololei ana i kahi hoʻopunipuni ma ke kiʻi o ka Pelekikena Wiliama Makinalē e kū ala ma ke Kula Kiʻekiʻe ʻo Makinalē. Ma ke kiʻi, aia ke Kuʻikahi Hoʻohui ʻĀina ma ka lima o Makinalē, me he mea lā, ua ʻāpono ʻia e ka ʻAha Kenekoa o ʻAmelika Hui Pū ʻIa. ʻAʻole naʻe i ʻāpono ʻia aku.  A no laila, ma ka hōʻailona i kūkulu ʻia ma mua o ke kiʻi, penei ka ʻōlelo, “ʻAʻole i hoʻohui ʻāina ʻia ʻo Hawaiʻi iā ʻAmelika ma ke kuʻikahi, e like me ke kiʻi e kuhikuhi ana. ʻAʻole wahi mea a ʻāpono ʻia aku o kahi kuʻikahi e ka ʻAha Kenekoa e like me ke koina o ke Kumu Kānāwai o ʻAmelika Hui Pū ʻIa.” Na ka ʻAhahui o nā Hui Kīwila Hawaiʻi i hana i ka hōʻailona. A mai ka makahiki 2009, e koi hoʻohune ana i ia hoʻoponopono ʻana.

Lanakila aku nei nā Kāne Ānuenue ma luna o Pākīpika ma ka helu ʻai he 76 i ke 66 i ka Pōʻakahi nei, lilo ai ka inoa moho o ka Hoʻokūkū Ānuenue Hōkele Outrigger ma Mānoa. ʻO ke kolu ia o ka hoʻokūkū o Hawaiʻi i kēia kikina nei, a ʻo ke kolu ia o ka lanakila. Ua komo koke ʻo Marcus Greene i ka pāʻani ʻana ma ka hapahā mua, a i ka hopena, he 18 āna ʻai, a he 8 lālau. A ʻo Gytis Nemeiska kekahi i komo ma hope mai o ka ulele ʻana, a he 18 nō hoʻi āna ʻai, a he 10 āna lālau.

Eia mai kā kākou ʻōlelo noʻeau,

Puʻuwai hao kila.

ʻO ia hoʻi, he wiwo ʻole.

He Kauaʻi ka luna hoʻomalu o ka Hale o nā Lunamakaʻāinana o Hawaiʻi nei.

ʻO ia aʻela kekahi poʻo nūhou o kēia lā, ka lā 8 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Pau iho nei ka ʻolohani ʻana o nā kahu maʻi a me nā mea mālama ola kino o ke Kikowaena Lapaʻau o Maui. He ʻekolu o lākou lā i ʻolohani ai a i ke kakahiaka o ka Pōʻahā nei, hoʻi aku nei lākou i ka hana. I ʻolohani lākou ma muli o ka ʻae iki ʻole ʻana ma ka hālāwai kūkākūkā o kēlā Pōʻalima aku nei. A ʻo ka mea e kamaʻilio ʻia ana i ia manawa, ʻo ia ka lawa ʻole o nā lima hana no ka mālama pono ʻana i nā maʻi.

I ka Pōʻakolu nei, ua lilo ihola ka Lunamakaʻāinana Nadine Nakamura o Kauaʻi, ʻo ia ka luna hoʻomalu o ka Hale o nā Lunamakaʻāinana o Hawaiʻi nei. A ʻo ia ka wahine mua i lilo ʻ o ia ka luna hoʻomalu o ia hale. ʻO Scott Saiki ka luna hoʻomalu ma mua, akā, ʻaʻole ʻo ia i lanakila ma ke koho wae moho o ka lā 7 o ʻAukake. ʻO Nakamura, ua lilo ʻo ia i lunamakaʻāinana i ka makahiki 2016. A ma nā makahiki ʻelua i hala iho nei, ʻo ia ke alakaʻi hapanui o ka Hale.

Ua eo nā Wāhine Ānuenue iā Riverside i loko o nā pāʻani ʻelima i ka pō nei. Ma ka moʻolelo o Riverside, ʻo ka makamua ia o ka lanakila ʻana ma luna o Hawaiʻi. A ʻo ke 34 ia o ka hālāwai ʻana o ia mau hui a i ʻelua ma ke kahua pāʻani.

Eia mai kā kākou ʻōlelo noʻeau,

ʻAʻohe ʻai pani ʻia o ka ʻamo.

He ʻōlelo kēia i ke kanaka waha lina.

Pau iho nei ke koho pāloka ʻana.

ʻO ia aʻela kekahi poʻo nūhou o kēia lā, ka lā 6 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Hāʻule pahū ihola ka manaʻo o Kamala Harris, a e hoʻi hou aku ana ʻo Donald Trump i ka Hale Keʻokeʻo. Ua loaʻa pono ihola ka nui o nā pāloka e kū hou ai ʻo Trump i ka moku, he 279 a ʻoi aku paha. Lele ka hauli i ka ʻike koke ʻana aku i ka lehulehu o nā pāloka i kaʻa aku ma ka ʻaoʻao o Trump. ʻAʻole i pau ka helu ʻia ʻana aku o nā pāloka, akā, lilo aku nei kekahi hapanui o nā noho ʻAha Kenekoa i nā Lepupalika, he 52. He ʻeono noho i koe. A ma ka Hale o nā Lunamakaʻāinana, i kēia manawa, he 203 noho o nā Lepupalika, a he 181 o nā Kemokalaka. He 51 noho i koe.

He ʻalihikūlele hoʻomaka hou ana ko ke Kulanui o Kaleponi Hema. A no Hawaiʻi nei nō ʻo ia. ʻO Jayden Maiava kona inoa, a mai ke Kula Kiʻekiʻe ʻo Kaimukī ʻo ia i puka ai. ʻO Miller Moss ka ʻalihikūlele hoʻomaka ma mua, akā, kāpae ʻia aku ʻo ia ma ka ʻaoʻao, ʻoiai, ma loko o nā hoʻokūkū ʻelima i hala iho nei, ʻehā hāʻule o Kaleponi Hema. A no laila, ke hoʻomākaukau ʻia nei ʻo Maiava i mea e alakaʻi ai ʻo ia iā Kaleponi Hema ma ke kūʻē ʻana aku iā Nebaraka ma ka lā 16 o Nowemapa. I ka makahiki 2023, aia ʻo Maiava ma ka hui ʻo Nevada Las-Vegas, a ua hoʻomaka ʻo ia ma nā hoʻokūkū he 14. A i ia makahiki, ua koho ʻia ʻo ia, ʻo ia ka Mea Pāʻani Komo Hou ʻOi o ka Makahiki o ka ʻAhahui Mauna Komohana. Inā he manaʻo ko Kaleponi Hema e komo ma kekahi hoʻokūkū ipu, he pono ke kāʻili ʻana i ʻelua lanakila hou.

Eia mai kā kākou ʻōlelo noʻeau,

ʻĀhaʻi akula i ka welowelo.

He ʻōlelo kēia no ke kanaka i lanakila. A ʻo kekahi manaʻo, no ke kanaka i heo akula.

He pōmaikaʻi kai lilo aku i kekahi hui e hana ana no ka pono o nā ʻōpiopio o Waiʻanae.

ʻO ia aʻela kekahi poʻo nūhou o kēia lā, ka lā 4 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Lilo aku nei he 249 ʻeka ʻāina o ke Awāwa ʻo Mākaha iā MAʻO Organic Farms. Na ka Waihona ʻo Harry lāua ʻo Jeanette Weinberg i hāʻawi aku. He mau ʻeka ʻāina ia i kūkulu ʻole ʻia. He 200 o ia mau ʻeka, ua hoʻokaʻawale ʻia aku no ke kūkulu wahi noho. A no laila, ʻo kekahi hana a MAʻO ma ia ʻāina, ʻo ia ke kūkulu ʻana i mau hale no ka hanauna e hiki mai ana, na lākou e hana a e mālama i ia ʻāina. A he 36 mau ʻeka, no ka mahi ʻai ʻana. Na Kukui lāua ʻo Gary Maunkea-Forth i hoʻokumu iā MAʻO he 25 makahiki aku nei a emi iki mai i mea e kōkua aku ai i nā ʻōpiopio o Waiʻanae. A ʻo MAʻO, he māhele ia no ka Hui Hoʻomōhala Hou i ke Kaiāulu o Waiʻanae, na nā Maunakea-Forth nō hoʻi. A he mau mea kā ia hui e hana ai i mea e holo mua ai nā ʻōpio o laila, he mau kūlana hana kūikawā no nā haumāna kula kiʻekiʻe, ʻo nā puʻu kālā hele kula nui, a me nā kūlana hana manawa piha.

Lilo aku nei ke eo iā Hawaiʻi ma ka hoʻokūkū pōpō peku ma ka Pōʻaono nei ma Fresno ma ka helu ʻai he 21 a Hawaiʻi i ka 20 a Fresno Mokuʻāina. Na nā Ānuenue nō ka ʻai holo mua ma ka nou ʻana a Brayden Schager i ka pōpō iā Pofele Ashlock ma ka hapahā mua. Akā, ma ia hope mai, ʻeleu aʻela ʻo Fresno a loaʻa ka ʻai holo ma ka hapahā mua, ka lua a me ke kolu me ka loaʻa ʻole o kahi ʻai iā Hawaiʻi. ʻO kahi pōmaikaʻi naʻe o Hawaiʻi, ʻo ka ʻai peku keu o ka ʻai holo o ka hapahā ʻelua, ua pale ʻia aku e Hawaiʻi. A ma muli o ia pale ʻana, i ka paʻa ʻana o nā ʻai holo ʻelua o ka hapahā hope i nā Ānuenue, lanakila aʻela ma luna o Fresno.

Eia mai kā kākou ʻōlelo noʻeau,

He manu hulu.

He ʻōlelo kēia no ke kanaka kūʻonoʻono.

He keu a ke aloha ʻole lā i ka pōpoki!

ʻO ia aʻela kekahi poʻo nūhou o kēia lā, ka lā mua o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua make aku nei he ʻewalu mau pōpoki ma ke Awa Kū Moku Liʻiliʻi o Keʻehi ma ʻOkakopa. A kohu mea lā, ua pepehi māinoino ʻia aku lākou a pau. Ma ka lā 17 o ʻOkakopa, ua loaʻa kekahi pōpoki make e lana ana ma kahi o nā uapo o Keʻehi, ua ʻoki ʻia aku kona poʻo a hemo. A ma ka Pōʻalua nei, loaʻa iho nei he ʻehiku mau pōpoki hou, ua pau i ka make. A i ka nānā ʻana aku, ua hana ʻino ʻia e ke kanaka. ʻO ka hana māinoino holoholona, he kūʻē kānāwai ia. Inā he ʻike paha no ia mau hana māinoino, e kāhea aku i ke Keʻena ʻĀina a Waiwai Pili ʻĀina ma ka helu 643-3567.

Ma ka Hoʻokūkū Kolepa Kono, he ʻelima mau mea pāʻani ma ke kūlana ʻelua, a ʻo kekahi o lākou, he mea pāʻani kolepa no ke Kulanui o Hawaiʻi. ʻO Anson Cabello kona inoa, a ua puka mai ke Kula Kiʻekiʻe ʻo Kamehameha ma Maui. Ma ia hoʻokūkū, ʻo Hawaiʻi ka hui helu ʻekolu. ʻO Kāna Kieko ka helu ʻelua, a ʻo Miami (ʻOhaio) ka helu ʻekahi.

A ma ka pāʻani pōpō wāwae, lanakila aku nei nā Wāhine Ānuenue ma luna o Ke Kaha Loa ma ka helu ʻai he ʻakahi i ka hua nēnē. Ua paʻa ʻē nō ka inoa moho kikina o ka ʻAhahui Komohana Nui iā Hawaiʻi, a ʻo ka makamua ia mai kona wā i komo ai i loko o ia ʻahahui. Ma muli o ka paʻa o ka inoa moho, e lele pololei ana ʻo Hawaiʻi i ka puni ʻelua o ka Hoʻokūkū Inoa Moho o ka ʻAhahui Komohana Nui.

Eia mai kā kākou ʻōlelo noʻeau,

Aia i Kona i Honalo.

ʻO ia hoʻi, ua nalowale loa kekahi mea āu. ʻAʻole e loaʻa hou mai.

Kūʻē kekahi mau kānaka i ke ʻano i koho ʻia ai ka lālā hou o ke Komikina Hoʻoponopono Wai.

ʻO ia aʻela kekahi poʻo nūhou o kēia lā, ka lā 30 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Hoʻokohu aku nei ke Kiaʻāina Josh Green iā V.R. Hinano Rodrigues i lālā no ke Komikina Hoʻoponopono Wai. ʻO kekahi noho o ia komikina, hoʻokaʻawale ʻia aku no ka loea ma ka hoʻoponopono ʻana i ka wai e like me ka hana i ka wā kahiko ma Hawaiʻi nei. A ʻo ia ke kūlana i hoʻopiha ʻia e Rodrigues. ʻO ka mea ʻāpiki, ke kūʻē nei kekahi poʻe i ke ʻano i koho ʻia aku ai ʻo ia. I ka hopena o ka makahiki 2023, ua hoʻokumu ʻia kekahi kōmike nāna e ʻimi i mau moho no ia kūlana. A i nā mahina ʻo Ianuali a me Pepeluali, nīnauele aku nei ke kōmike i nā moho he 13, a hoʻouna ʻia aku nā inoa o nā moho ʻoi ʻehā i ke kiaʻāina. Akā, ma muli o ka haʻalele wale ʻana o kekahi mau moho ʻelua, ua pilikia ihola, ʻoiai, ʻo ke koina ma ke kānāwai, he ʻekolu moho ma ka papa moho e hāʻawi ʻia aku i ke kiaʻāina. A no laila, ua noi ʻo Green i papa moho hou. Akā, ua hana ʻia he kōmike hou, a na Green i koho i ʻelua lālā o ia kōmike a na ka luna o ka ʻAha Kenekoa i koho i kekahi, a na ka luna o ka Hale o nā Lunamakaʻāinana kekahi. A mālama ʻia iho nei he mau nīnauele hou no kekahi mau moho hou i nā lā 21 me 22 o ʻOkakopa nei. A nui nā kānaka e kūʻē ana i ia hana, ʻoiai, he ʻelua moho kūpono a mākaukau loa ma ka papa moho mua.

Hoʻomaka iho nei ka paipai ʻana aʻe o nā luna aupuni mokuʻāina, ʻaʻole e hoʻokuʻu wale aku ka lehulehu i ka iʻa, ke koʻa, me ia mea aku ia mea aku o kā lākou mau pahu iʻa ponoʻī i loko o nā kai o Hawaiʻi nei. ʻO ke kiloi wale ʻia aku o ia mau mea i loko o ke kai, he mea ia e laha ai nā lāhui iʻa o nā ʻāina ʻē ma nā kai o Hawaiʻi nei, a e pilikia ai hoʻi nā lāhui ʻōiwi. ʻAkahi a loaʻa he ʻōkole hou ma ke kai o Kāneʻohe i kēlā pule aku nei. A ma loko o nā makahiki ʻehā i kaʻa hope aku nei, ua loaʻa he 19 ʻano lāhui ʻē ma nā koʻa o Hawaiʻi nei. A he mau mea ia e make ai nā lāhui ʻōiwi, a e pōʻino ai paha ke ola o ke kanaka.

Eia mai kā kākou ʻōlelo noʻeau,

He ʻūlei kolo.

He ʻōlelo kēia no ke kanaka pūkonakona.

Ua eo ihola ʻo Max Holloway iā Ilia Topuria.

ʻO ia aʻela kekahi poʻo nūhou o kēia lā, ka lā 28 o ʻOkakopa. Welina e nā makamaka. ʻO Ke Aolama kēia a penei ka nūhou.

ʻAkahi nō a lanakila ʻo Hawaiʻi ma luna o ka hui o ka Māhele Hoʻokūkū Pola ma ka Pōpō Pekupeku i ka Pōʻaono nei. Ua hele aku nā kānaka he 9,538 i ke Kahua Pāʻani ʻo Ching ma Mānoa no ka mākaʻikaʻi ʻana a ʻike aku nei i ke kāʻili ʻana aku o nā Koa Ānuenue i ke eo mai nā lima wīkani mai o Newaka ma ka helu ʻai he 34 i ka 13. He ʻehā ʻai holo a Brayden Schager, a he 120 āna ʻīā i holo ai.

A ma ka mokomoko i ka Pōʻaono nei, ʻakahi nō a hina ʻo Max Holloway a waiho wale ana ma lalo ma muli o ke kuʻi māhanahana a Ilia Topuria ma ka puni ʻekolu. Ma mua o ka puni ʻekolu, ma nā kaha a nā luna loiloi, he ʻelua o lākou, ʻo Topuria ke mea e ʻoi ana he 20 i ka 18. A ʻo ke kolu o ka luna loiloi, ua paʻi a paʻi, he 19 i ka 19. ʻO nā kaha a ka Hōkū Avalataisa, e ʻoi ana ʻo Holloway ma ka helu ʻai he 20 i ka 18. Ma ka puni ʻekolu, loaʻa pono akula ke poʻo o Holloway i ka puʻupuʻu o Topuria, a pōniuniu ihola. A ma hope iki mai, loaʻa pono hou akula ke poʻo o Holloway a hina ai ʻo ia.

Hoʻi aku nei ʻo Tua Tagovailoa i ke kahua pāʻani ma ke kūʻē ʻana aku o Miami iā ʻAlikona. A he 234 āna ʻīā i nou ai a hoʻokahi ʻai holo. Ua eo naʻe ʻo Miami iā ʻAlikona ma ka helu ʻai he 28 i ka 27. A ʻo ka lima ia o ka hāʻule ma nā hoʻokūkū ʻeono i hala iho nei.

Eia mai kā kākou ʻōlelo noʻeau,

Ka ʻai kīʻoʻe lāʻau.

ʻO ka ʻulu hoʻi ia.

E hoʻi hou ana paha ʻo Tua Tagovailoa i ke kahua pāʻani i ka Lāpule.

ʻO ia aʻela kekahi poʻo nūhou o kēia lā, ka lā 25 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua lilo iho nei ka hui ʻo Nvidia, ʻo ia ka hui waiwai loa o ke ao nei, a aia ka hui ʻo ʻĀpala ke hahai koke aku nei ma hope. I ka mahina ʻo Iune o kēia makahiki nei, ʻo Nvidia nō ka hui waiwai loa, akā, ua piʻi aʻela ʻo Microsoft a me ʻĀpala. A ʻoiai, ʻo Nvidia ka hui nāna ka hana ʻana i ka lolo uila hou no ka AI, ʻo ia ke kumu i lilo hou ai ʻo ia ka hui helu ʻekahi ma ka waiwai. A ke māhuahua aʻela nā hui nāna e hoʻohana nei i ka AI ma ko lākou lawelawe ʻana i ka hana o kēlā me kēia lā. A ʻo ka lolo uila a Nvidia ka mea makemake loa ʻia.

Ua hoʻi aku nei ʻo Tua Tagovailoa i ka hoʻomaʻamaʻa pōpō pekupeku  ʻana i ka Pōʻakolu nei. A piha hauʻoli ka naʻau o nā Naiʻa, no ka mea, e hoʻi aku paha ʻo ia i ke kahua pāʻani i kēia Lāpule. E kūʻē aku ana ʻo Miami iā ʻAlikona. Ma hope o ka haʻalele ʻana o Tagovailoa i ka pāʻani ʻana ma muli o ka ʻeha loa ʻana o kona poʻo i ka pule ʻelua o ke kikina, ua hāʻule loa ihola ʻo Miami, a i kēia manawa, ʻo Miami ka hui nāna nā ʻai liʻiliʻi loa o ka hoʻokūkū, he 11.7 wale nō.

Ua ʻeha ihola ʻo Jayden Daniels, ka ʻalihikūlele o Wakinekona, i ka Lāpule nei a pani akula ʻo Marcus Mariota i ka hakahaka. A lilo aku nei nō ke eo iā Wakinekona ma ka helu ʻai he 40 i ka 7 a Kalolaina. A inā ʻo ia mau nō ka ʻeha o Daniels, e hoʻomaka ʻo Mariota i kēia Lāpule ma ke kūʻē ʻana aku iā Kikako.

Eia mai kā kākou ʻōlelo noʻeau,

He noio ʻaʻe ʻale no ke kai loa.

He ʻōlelo kēia no ke kanaka keu a ke akamai a mākaukau loa hoʻi paha ma kekahi hana.

Ke aʻo mai nei ka ʻīlio i ka hanu aku i ka naonao ahi liʻiliʻi a loaʻa.

ʻO ia aʻela kekahi poʻo nūhou o kēia lā, ka lā 23 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō kekahi mau kānaka ke aʻo akula i ka ʻīlio i ka ʻimi ʻana a loaʻa ka naonao ahi liʻiliʻi ma ka mokupuni ʻo Hawaiʻi. Na ka hui Conservation Dogs of Hawaiʻi ka papahana a i kēia manawa, he ʻeono a ʻehiku paha ʻīlio i mākaukau i ka ʻimi ʻana a loaʻa ia ʻano naonao. He mea ka naonao ahi liʻiliʻi e pōʻino ai ka hānaiahuhu. I kekahi manawa, hiki ke makapō ka ʻīlio a pōpoki paha. Aia nō ke noʻonoʻo ʻia nei kahi maikaʻi loa e hoʻohana ʻia ai nā ʻīlio hanu naonao ahi liʻiliʻi. Ma Oʻahu nei paha, i ʻole e laha loa ia naonao. A ma ka mokupuni ʻo Hawaiʻi paha, kahi i laha ai ma ʻō a ma ʻaneʻi o ka ʻāina.

Lanakila aku nei nā Wāhine Ānuenue ma luna o Pekafila ma loko o nā pāʻani ʻehā i ka Pōʻalua nei. Mai suipa lilo aku ʻo Hawaiʻi iā Pekafila, akā, ma ka pāʻani ʻekolu, hiu aʻela ʻo Pekafila ma ka hopena a loaʻa he 12 ʻai i ka 2 a Hawaiʻi, a lilo ai ke eo o ka pāʻani ʻekolu iā Pekafila. A ma ka pāʻani ʻehā, e ʻoi ana ʻo Pekafila ma ka helu ʻai he 16 i ka 13. Akā, ʻeleu aʻela nā Wāhine o Hawaiʻi a kāʻili i ke eo. E kūʻē aku ana ʻo Hawaiʻi iā Notariga (Kualapa ʻĀkau) i kēia Lāpule ma Mānoa.

Eia mai kā kākou ʻōlelo noʻeau,

ʻAʻohe kahua o nā manu.

ʻO ia hoʻi, ua piha kuʻi i nā kānaka a i nā mea ʻē aʻe paha.