Author: keaolama

He hale paʻahao hou ana paha ko Oʻahu nei.

ʻO ia aʻela kekahi poʻo nūhou o kēia lā, ka lā 21 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Makaʻu ihola ke Keʻena ʻĀina Hoʻopulapula i ka piʻi ʻana aʻe o ka ʻilikai a me ka hālana ʻia o ka ʻāina a no laila, ua emi ihola nā hale e kūkulu ʻia ana ma kekahi ʻāina hoʻopulapula ma ʻEwa. Ma mua, hoʻolālā ʻia ke kūkulu ʻia ʻana aʻe o nā hale hoʻokahi ʻohana he 600 ma laila. A ua kuhi ʻia he $48 miliona kālā ka nui o nā lilo. Akā, i kēia manawa, holo ihola ka manaʻo, he 220 wale nō hale hoʻokahi ʻohana, a me nā hale lau ʻohana he 160 a emi mai. A ʻo ka nui o ke kālā e hoʻolilo ʻia no ka hoʻomākaukau i ka ʻāina, he $90 miliona a emi iki mai. ʻAʻole i helu ʻia ke kūkulu ʻia ʻana o nā hale ma loko o ia huina.

He manaʻo ko ke aupuni mokuʻāina o Hawaiʻi, e kūkulu i hale paʻahao hou ma Oʻahu nei, ʻoiai, ʻo ka hale paʻahao o Kalihi, ua pihaʻū a ʻinoʻino loa. A ma Hālawa e kūkulu ʻia ai ia hale hou. A ʻo ka nui paha o ke kālā e hoʻolilo ʻia, he $1.2 biliona. Inā holo pono nā mea a pau, e hoʻomaka ke kūkulu ʻana i ka makahiki 2029, a ma ka makahiki 2031 e hoʻomaka ai ka lawelawe ʻana i ka hana.

Eia mai kā kākou ʻōlelo noʻeau,

Uene ke kolopā.

ʻO ia hoʻi, ua kō ka hana.

Hoʻokahi moho e kū kilakila nei i pelekikena no ke Kulanui o Hawaiʻi.

ʻO ia aʻela kekahi poʻo nūhou o kēia lā, ka lā 18 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

He pelekikena hou ko ke Kulanui o Hawaiʻi. ʻO Wendy Hensel nō ia. I ka Pōʻahā nei ʻo ia i koho ʻia aku ai e ka Papa o nā Kahu Kula o ke Kulanui. He 11 kahu kula, a ʻo lākou a pau kai koho iā Hensel. ʻO ka lōʻihi o ka palapala ʻaelike, he ʻekolu makahiki. A ʻo kona uku makahiki, he $675,000 o ka makahiki. A he hiki nō ke hoʻomau ʻia he ʻelua makahiki hou, akā, aia wale nō a ʻāpono mai ka Papa o nā Kahu Kula. A e lilo nō hoʻi iā Hensel, he $7,000 o ka mahina no ka hoʻolimalima wahi noho.

Lanakila aku nei nā kaikamāhine pōpō paʻipaʻi o Kamehameha ma luna o ʻIolani, ka hui helu ʻekahi o ka ʻAhahui Kula o Honolulu ma loko o nā pāʻani ʻelima i ka pō Pōʻahā nei. A no laila, e hui hou ana ma ke kahua pāʻani i ka hola 3:00 o ka ʻauinalā Pōʻaono. Inā lilo ke eo iā ʻIolani ma ia lā, ʻo ia ana nō ka inoa moho o ka ʻAhahui Kula o Honolulu. A inā na Kamehameha e kāʻili i ke eo, e hui hou ana lāua ʻelua i ka Pōʻalua no ke kūʻē ʻana no ka inoa moho.

Eia mai kā kākou ʻōlelo noʻeau,

He lauhau, he iʻa hōkake kāheka.

He ʻōlelo kēia no ke kanaka leoleoā.

ʻO ka lāʻau haʻinole lolokū waena kekahi mea i pau nui ai nā kānaka i oʻo.

ʻO ia aʻela kekahi poʻo nūhou o kēia lā, ka lā 16 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma ka hana a kekahi poʻe noiʻi ma ke Kulanui o Hawaiʻi ma Mānoa, ʻo ka lāʻau haʻinole i ka lolokū waena ke kumu nui o ka make ʻana o ka poʻe kānaka i oʻo a me ka poʻe ʻelemākule i ka pākela ʻai lāʻau ʻona ma Hawaiʻi nei. Mai ka mahina ʻo Iulai o ka makahiki 2020 a i ka mahina ʻo Kēkēmapa o ka makahiki 2021, he 263 mau kānaka i make i ka lāʻau ʻona a puni ʻo Hawaiʻi nei. A ʻo ka nui o nā makahiki o ka hapanui o lākou, he 58.2%, mai ke 50 a i ke 79. A ma waena o lākou, he 64.3%, i make i ka lāʻau haʻinole i ka lolokū waena. A ke kuhi ʻia nei, e māhuahua paha nā kānaka oʻo a ʻelemakule paha i hei i ka lāʻau ʻona ma kēia hope aku. Ua hāpai ia hui noiʻi o ke Kulanui o Hawaiʻi i ka manaʻo, e hoʻonui i ke kūkākūkā ʻana me ke kaiāulu a me ka noiʻi ʻana i ke kumu e hoʻomau nei ka poʻe i oʻo i ia ʻano lāʻau haʻinole. A ʻo kekahi mea nui, ʻo ia ka ʻimi ʻana i ia mau kūpuna a e kōkua a e lapaʻau aku hoʻi.

Lilo aku nei kekahi kumu kula o ke Kula Kiʻekiʻe ʻo Kalani, ʻo ia ke Kumu Kula Aupuni Poʻokela o Hawaiʻi o ka makahiki 2025. ʻO Bryan Silver kona inoa. A lilo nō hoʻi ʻo Silver, ʻo ia ka moho ma ka Polokalamu Kumu Kula Aupuni Poʻokela o ʻAmelika Hui Pū ʻIa. He 24 ona makahiki e aʻo ana ma Honolulu a ʻo kāna māhele aʻo, ʻo ka wilikī. Ua nui nā puʻu kālā hele kulanui i lilo aku i kāna mau haumāna. A nui kāna mau haumāna i komo aku i nā ʻoihana ʻepekema, ʻenehana, wilikī a makemakika paha. A ma o kāna polokalamu robota i hoʻokumu ai, lilo akula iā ia he $283,000 a hoʻokumu ihola he ʻekolu hui a nā haumāna e lawelawe nei i mea e mau ai ia polokamu.

Eia mai kā kākou ʻōlelo noʻeau,

He ʻoʻopu kuʻia, ka iʻa hilahila o Kawainui.

He ʻōlelo kēia no ke kanaka maka hilahila.

Manaʻo ʻia, e hoʻi ana nō ʻo Tua Tagovailoa i ke kahua pāʻani.

ʻO ia aʻela kekahi poʻo nūhou o kēia lā, ka lā 14 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻElua koe moho no ke kūlana pelekikena o ke Kulanui o Hawaiʻi, ʻo Julian Vasquez Heilig lāua ʻo Wendy Hensel. A i kēia Pōʻakolu, e launa ana lāua me ka Papa o nā Kahu Kula o ke Kulanui. A e ninauele ʻia ana lāua e ia mau kahu kula. A e holo ana ko lākou manaʻo ma ka moho ʻoi ma ia hope aku.

Ua ʻāhaʻi aku nei ʻo Boise Mokuʻāina i ka lanakila ma ka hoʻokūkū pōpō pekupeku i ka Pōʻaono nei ma ka helu ʻai he 28 i ka 7 a Hawaiʻi. I ka hopena o ka hapahā ʻelua, e hahai koke aku ana nō ʻo Hawaiʻi ma hope o Boise ma ka helu ʻai he 13 i ka 7. Ma ka hapahā ʻekolu, ʻaʻohe wahi mea a loaʻa o ka ʻai. Akā, hiu aʻela ʻo Boise ma ia hope mai, ʻelua ʻai holo a Maddux Madsen i nou ai, iā Ashton Jeanty kekahi, a iā Austin Bolt kekahi. A ʻo ia ihola. I kēia Pōʻaono e hiki mai ana, e kūʻē aku ana ʻo Hawaiʻi iā Wakinekona Mokuʻāina.

Hōʻike aʻela ke kumu aʻo o nā Naiʻa o Miami, ʻo Mike McDaniel, e hoʻi ana nō ʻo Tua Tagovailoa i ka pāʻani pōpō pekupeku ʻana i kēia kikina nei. He ʻalihikūlele ʻo Tagovailoa, a ma ka pule ʻelua o kēia kikina nei, ka wā e kūʻē aku ana lākou iā Pāpulō, ua ʻeha loa ihola kona lolo. ʻO ke kolu ia o ka wā i ʻeha loa ai kona lolo ma kona wā e pāʻani ana ma ke ʻano he loea.

Eia mai kā kākou ʻōlelo noʻeau,

Ka mū ʻai paka o Puʻunui.

He ʻōlelo kēia no ke kanaka hoʻouluhua.

ʻO ʻOkakopa ka mahina hoʻomaopopo i ka lehulehu no ia mea he hana māinoino ʻohana.

ʻO ia aʻela kekahi poʻo nūhou o kēia lā, ka lā 11 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

E lilo paha kekahi ʻāina o nā Kula ʻo Kamehameha i wahi e kūkulu ʻia ai ke kahua paʻa o ke Kula Haʻahaʻa ʻo Kamehameha III. Aia nō ma Kuʻia i Lāhainā. ʻO ka nui o ia ʻāina, he 16 ʻeka a emi mai paha. Ma mua iho nei, he ʻekolu wale nō wahi i manaʻo ʻia i kahua paʻa no ia kula haʻahaʻa, ʻo kahi mua o ia kula ma ke Alanui Alo; ma Pulelehua, ma kahi hoʻi e kokoke ana i ke kahua kūikawā; a ma Kāʻanapali kekahi. E mālama ana ka ʻOihana Hoʻonaʻauao i hālāwai kahi e hōʻike ai ka lehulehu a me nā limahana o ke kula i ko lākou manaʻo.

I ka Pōʻalua nei ma Hilo, kū ana kānaka ma kaʻe o ke Alanui Kīlauea me nā hōʻailona i mea e ahuwale ai kahi pilikia nui o ka ʻāina, ʻo ka hana māinoino i ka ʻohana a i ka mea aloha paha. A ʻo ia mau kānaka paʻa hōʻailona, e kau ana ka līpine poni a paʻa ihola nō hoʻi nā līpine poni he mau kaukani ma ka pā e huli ana ke alo i ke Alanui Kīlauea, i hōʻike hoʻi i ka nui o nā kānaka a me ko lākou mau ʻohana i ʻike maka a i ʻeha paha ka ʻili, ka naʻau a me ka noʻonoʻo i ka hana māinoino i kēia makahiki haʻawina kālā nei. Na ke Keʻena Hoʻomalu Keiki me ʻOhana i mālama. He pilikia nui kēia ma nei pae ʻāina a puni. A no laila, e alu ka pule a me ka hana i mea e pau ai ia ʻino. He mea nui ka hoʻomalu ʻana i nā mea e hana ʻino ʻia nei, akā, ʻo ke kōkua ʻana i nā mea na lākou e hana māinoino aʻela, he mea nui nō hoʻi ia, i mea e hoʻōki ʻia ai ia hana a nalo loa, i mea hoʻi e pau ai ia welo.

Eia mai kā kākou ʻōlelo noʻeau,

Lele i Kona; lele i Koʻolau.

He ʻōlelo kēia ke paʻakikī ka ʻimi ʻana aʻe i kekahi kanaka a loaʻa.

Lilo aku nei ke eo o ka pāʻani ʻekolu o ka Hoʻokūkū Inoa Moho o ke Kuʻikahi Pōpō Hili Aupuni iā Sean Manaea a me Nū Ioka.

ʻO ia aʻela kekahi poʻo nūhou o kēia lā, ka lā 9 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

I ke kakahiaka o ka Pōʻalua nei, ua hoʻopiʻi ʻia iho nei ke kanaka nāna i hou aku i nā limahana ʻelua o Wendy’s. ʻO Reynaldo C. Cheney ka inoa o ua kanaka lā. ʻO kona mau hewa i hoʻopiʻi ʻia ai, ʻo ka hoʻāʻo pepehi kanaka ma ke kekelē ʻekahi a me ke kekelē ʻelua a me ka pepehi kanaka ma ke kekelē ʻelua. ʻO kekahi o nā limahana, ʻo Kashka Otto kona inoa, ua hou ʻia e Cheney a make. He hoʻokahi miliona o Cheney kālā e hoʻokuʻu ʻia ai ma ka pela.

Ma ka pāʻani ʻekolu o ka Hoʻokūkū Inoa Moho o ke Kuʻikahi Pōpō Hili Aupuni, alakaʻi aʻela ʻo Sean Manaea, ka nou pōpō, iā Nū Ioka a kāʻili akula i ka lanakila mai Piladelepia ma ka helu ʻai he 7 i ka 2. He ʻelua lanakila o Nū Ioka, a hoʻokahi o Piladelepia. E hui hou ana ia mau hui ʻelua i ka ʻauinalā o kēia lā. Inā e lanakila ʻo Nū Ioka, e holo mua ana i ka puni inoa moho Kuʻikahi Pōpō Hili Aupuni.

Ua ʻōlelo ʻia, e mākaukau ana paha ʻo Tua Tagovailoa, ka ʻalihikūlele o Miami, no ka hoʻi hou ʻana i ka hoʻomaʻamaʻa ʻana ke hiki aku i ka lā 23 o ʻOkakopa. A ʻo kona lā mua e ʻae ʻia ai e pāʻani hou, ʻo ia ka lā 27 o ʻOkakopa, ka lā hoʻi o Miami e kūʻē aku ai iā ʻAlikona.

Eia mai kā kākou ʻōlelo noʻeau,

Hoʻokahi ka ʻilau like ʻana.

ʻO ia hoʻi, e alu like.

He polokalamu kōkua i ka hoʻokaʻa ʻaiʻē hele kulanui.

ʻO ia aʻela kekahi poʻo nūhou o kēia lā, ka lā 7 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hou ʻia aku nei kekahi mau limahana ʻelua o ka hale ʻaina ʻo Wendy’s ma Nānākuli i ke kakahiaka o ka Lāpule nei. Lawe ʻia akula lāua i ka Haukapila ʻo ka Mōʻīwahine, a ma laila i make ai kekahi. A ʻo kekahi, ua lapaʻau ʻia a hoʻokuʻu ʻia akula. Ua paʻa ka mea nāna i hou aku iā lāua i ka hopu ʻia e ka mākaʻi. I hopu ʻia ʻo ia no ka hoʻāʻo pepehi kanaka ma ke kekelē ʻekahi a me ʻelua a no ka pepehi kanaka ma ke kekelē ʻelua. He 60 makahiki o ua kanaka lā. Aia ʻo ia ma loko o ka hale ʻaina e hoʻoneʻeneʻe ana i nā pono hale. Noi akula kekahi o ia mau limahana ʻelua i ka ʻelemakule e hoʻōki i ia hana. A hoʻomaka ihola ko lāua hoʻopaʻapaʻa ʻana. A ma hope iki mai, puka akula nā limahana ʻelua i waho a hahai aku nō ka ʻelemakule. E hoʻomau ʻia ana nō ka hoʻopaʻapaʻa ʻana, a kuʻi akula ka limahana wahapaʻa i ka ʻelemakule, a ʻo ia ka wā a ka ʻelemakule i hou aku ai iā ia. Hoʻāʻo ka lua o ka limahana e ʻākeʻakeʻa aku, a ʻo ia kona wā i hou ʻia ai i ka pahi. ʻO ka limahana i hou mua ʻia, ʻo ia ka mea i make.

Ua hoʻokaʻawale ʻia akula he $30 miliona no kahi polokalamu hou o Hawaiʻi nei, kahi e hoʻokaʻa ʻia iho ai nā ʻaiʻē haumāna no nā limahana ma ka ʻoihana mālama ola kino. Ma nā mahina mua he ʻumi o ia polokalamu, ua ʻāpono ʻia ka hoʻokaʻa ʻaiʻē o nā moho noi he 890. ʻO ka nui o ka ʻaiʻē, he $100,000 a emi mai, a e uku ʻia a pau ma loko o nā makahiki ʻelua. I kēia manawa, he 1,328 mau moho e kali ana ʻo ka ʻāpono ʻia o kā lākou mau noi. ʻO kekahi koina o ka polokalamu, ʻo ia ko lākou hana ʻana ma ia ʻoihana ma Hawaiʻi nei he ʻelua makahiki, a he 30% o kā lākou mau mea e lapaʻau ai, aia ma ka ʻinikua Medicare a Medicaid paha. Na ke Kiaʻāina Josh Green i noi i ka ʻAha ʻŌlelo Kau Kānāwai i ke kālā no ia polokalamu he ʻelua makahiki aku nei. A he manaʻo kona e noi hou he $30 miliona ke hoʻomaka hou ke kau ʻaha ʻōlelo.

Eia mai kā kākou ʻōlelo noʻeau,

Kāpae aʻe nō i kulakula.

ʻO ia hoʻi, e hoʻopoina aku.

Pau iho nei ka ʻolohani ʻana o kekahi mau limahana.

ʻO ia aʻela kekahi poʻo nūhou o kēia lā, ka lā 4 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻi hou ana nā kahu maʻi o ka ʻAhahui Kahu Maʻi o Hawaiʻi i ka hana ma ke Kikowaena Lapaʻau ʻo Kapiʻolani i ke kakahiaka Lāpule. Koho pāloka aku nei lākou i ka ʻāpono i ka palapala ʻaelike a me ka ʻāpono ʻole i ka Pōʻakolu nei, a ʻo ke 98% o nā kahu maʻi o ia ʻahahui i ʻāpono. ʻO kekahi mau mea ma ka palapala ʻaelike, ʻo ka piʻi ʻana o ka uku o nā kahu maʻi a pau ma kahi o ka 3.5% o ka makahiki no nā makahiki ʻehā e hiki mai ana; ʻo ka piʻi o ka uku no nā kahu maʻi laikini i hana ma Kapiʻolani no nā makahiki he 5, he 10 a he 15; ʻo ka hoʻokumu ʻana i ʻaha nona kekahi mau kahu maʻi o Kapiʻolani a me kekahi mau alakaʻi o ka ʻoihana kahu maʻi, a e hui pū lākou i kēlā me kēia mahina no ke kūkākūkā ʻana i nā pilikia limahana a me ka nānā pono ʻana i ka papa manawa hana o nā limahana i mea e ʻike ai, ua lawa pono nā kahu maʻi e hana ana i nā manawa a pau.

E hoʻi hou ana nā poʻolā o ka ʻaoʻao hikina o ʻAmelika Hui Pū ʻIa, ʻoiai, paʻa ihola kahi palapala ʻaelike kūikawā ma waena o ka uniona ʻAhahui Poʻolā o nā ʻĀina Like ʻOle a me ka hui haku, ʻo ka Hui Malina ʻAmelika Hui Pū. Ma ka palapala ʻaelike, e piʻi ka uku o nā poʻolā ma kahi o ke 62% ma nā makahiki ʻeono e hiki mai ana, ʻo ia hoʻi, mai ke $39 o ka hola a i kahi o ke $63. ʻO kekahi mea nui e kūkākūkā ai, ʻo ia ka mīkini hana nona iho, ʻoiai, he mea ia e emi ai nā kūlana hana.

Aia nō ke Keʻena Kaʻa Halihali Wikiwiki o Honolulu ke noi aʻela i ka hoʻokaʻawale ʻana he $1 biliona no ke kaʻa uila kau i ka lewa. Ua ʻōlelo ʻia, no ka makahiki haʻawina kālā ia o ka makahiki 2026 a me 2027.

Eia mai kā kākou ʻōlelo noʻeau,

I wai noʻu.

E hoʻopuka ʻia kēia ʻōlelo i kekahi kanaka ke manaʻo iho e hoʻokūkū me ia ma kekahi pāʻani a hana leʻaleʻa paha, ʻo ia hoʻi, ʻo ka maika, ʻo ke kulakulaʻi paha, a pēlā aku.

E naue aku i ka hale hana keaka ʻo Kennedy no ka nānā ʻana iā Puana.

ʻO ia aʻela kekahi poʻo nūhou o kēia lā, ka lā 2 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻO ka hopena pule hope loa kēia o ka mālama ʻia ʻana o ka hana keaka ʻo Puana ma ka Hale Keaka ʻo Kennedy i ke Kulanui o Hawaiʻi ma Mānoa. Wahi a ka lohe, he keu ia a ka hana keaka maikaʻi. He moʻolelo ia e ʻike ʻia ai ka pilina o ke Kanaka Maoli me kona mau kūpuna ma o ia mea he mele. I kēia Pōʻalima a me ka Pōʻaono, aia i ka hola 7:30 o ke ahiahi. A i ka Lāpule, ka lā hope loa hoʻi, aia i ka hola 2:00 o ka ʻauinalā.

ʻAkahi a paʻa kahi ʻaelike ma waena o ka uniona o nā kahu maʻi a me ke Kikowaena Lapaʻau ʻo Kapiʻolani i ka ʻauinalā o ka Pōʻalua nei. I kēlā pule aku nei i komo ai ʻelua ʻuao pekelala i loko o ke kūkā kamaʻilio ana. A he mau lā kūkākūkā lōʻihi ma ia hope mai, a paʻa ai ka ʻaelike. I kēia manawa, aia nō i nā kahu maʻi o Kapiʻolani. I kēia lā, e koho pāloka ana lākou i ka ʻāpono a me ka ʻāpono ʻole paha i ka palapala ʻaelike. A ke ʻāpono ʻia aku, e hoʻi hou lākou i ka hana i ka Lāpule.

Ua mākaukau ka hōʻike no ke kumu a me kahi i ʻā ʻia ai ke ahi o Lāhainā i ka lā 8 o ka makahiki 2023. A e hoʻolaha ʻia ana i ka lehulehu. Ua paʻa ihola ka hopena o ka noiʻi ʻana he 14 mahina ma hope mai o ia lā weliweli.

Eia mai kā kākou ʻōlelo noʻeau,

He peʻe makaloa.

He ʻōlelo kēia no ke kanaka pī. He nānā kona mau maka i lalo i kona wā e ʻai ana, i ʻole ʻo ia e ʻike i ke kanaka e kāʻalo ana a he pono kona kāhea ʻana aku e pāʻina pū.

E hoʻomau ʻia ana nā pōmaikaʻi ola kino o nā kahu maʻi o Kapiʻolani i ka wā kūkākūkā.

ʻO ia aʻela kekahi poʻo nūhou o kēia lā, ka lā 30 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hōʻike aʻela ʻo Gidget Ruscetta, ka luna lawelawe o ke Kikowaena Lapaʻau ʻo Kapiʻolani, e hoʻomau ʻia nā pōmaikaʻi ola kino o nā kahu maʻi uniona ke hala aku ka lā 30 o Kepakemapa nei, ʻoiai e hoʻomau ʻia nei ke kūkākūkā ʻana. Ma muli ia o ka ʻae ʻana o nā kahu maʻi, ʻaʻole e ʻākeʻakeʻa i ka lawelawe ʻia ʻana o ka hana ma ka haukapila. I ka Pōʻahā nei, ua komo pū ka ʻuao pekelala i loko o ke kūkākūkā ʻana.

Ua lele ka hauli o ko Suria a e kūmākena ana i ka make ʻana iho nei o ka luna o ka Hezebola, o Sayyed Hassan Nasrallah, i ka hoʻouka kaua ʻana o ʻIkelaʻela ma ka ʻaoʻao hema o Beiruta i ka Pōʻalima nei.

Lilo aku nei ka makana helu ʻekahi o ka heihei waʻa ʻo Nā Wāhine O Ke Kai iā Team Bradley i ka Lāpule nei. A ʻo ka lima ia ma hope kekahi o kekahi. Ua hoe ʻia ke Kai ʻo Kaiwi ma loko o nā hola ʻelima, nā minuke he kanahā kumamāhā, a me nā kekona he kanalima kumamālua. A he ʻelima minuke, ʻeiwa kekona ma hope mai, hiki maila ʻo Ka Lāhui Kai i ka pahu hopu. A ma ke kūlana ʻekolu ʻo Hawaiian, he iwakālua kumamākahi minuke, ʻeono kekona ma hope mai o Ka Lāhui Kai.

Eia mai kā kākou ʻōlelo noʻeau,

Mai ʻalaʻala paha i ka ua o ka Waʻahila.

ʻO ia hoʻi, ʻakahi nō a pakele kekahi i ka pilikia.