Author: keaolama

Ua komo ihola ka ʻuao pekelala i loko o ke kūkākūkā ʻana o ka uniona me ka Haukapila ʻo Kapiʻolani.

ʻO ia aʻela kekahi poʻo nūhou o kēia lā, ka lā 27 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Mākena wale nā poloka kokī ma Kuliʻouʻou. A no laila, e hoʻohana ana ke Keʻena ʻĀina me Waiwai Pili ʻĀina i ka mokulele kanaka ʻole i mea e hoʻokuʻu iho ai i ka wai paʻipaʻi ʻano lemi ma luna o ia mau poloka Poko Liko. Ua lohe ʻia aku ke kani a ke kokī ma Kuliʻouʻou a hōʻike ʻia aku i ke Keʻena ʻĀina a Waiwai Pili ʻĀina i ke kau wela nei. A ma hope o ke ana ʻia ʻana o ka ʻāina, ʻike ʻia ihola, ua manomano ia poloka ma ia ʻāina. E hai ana ua keʻena lā i ka hui ʻo Aloha ʻĀina Drones o Hilo a nāna e hoʻokō aku. I ka makahiki 2022, na kekahi mau keʻena aupuni mokuʻāina i hoʻohana i ka mokulele pinao no ka hoʻokuʻu ʻana aku i ia wai paʻipaʻi ma Waimānalo no ka hoʻopau ʻana i nā kokī o laila.

I ke kakahiaka Pōʻahā nei, hoʻomaka ihola ka uniona o nā kahu maʻi a me ke Kikowaena Lapaʻau ʻo Kapiʻolani e hana pū me ka ʻuao pekelala i mea e loaʻa ai ka ʻaelike. A e mau ana nō ia kūkākūkā ʻana a hala ka hola 7:00 o ke ahiahi. Lana ka manaʻo, e paʻa koke nō ka palapala ʻaelike e hoʻi hou ai nā kahu maʻi i ka hana.

Hōʻike aʻela ke Kulanui o Hawaiʻi i kona manaʻo, e kūpaʻa kona hui pōpō pekupeku ma ka ʻAhahui Mauna Komohana a hiki i ka lā 30 o Iune o ka makahiki 2032. A pēlā pū nō hoʻi me kekahi mau kulanui ʻeono. I ka lā 11 o Kepakemapa, kūkala aʻela ʻo Poisi Mokuʻāina, ʻo Kololako Mokuʻāina, ʻo Fereseno Mokuʻāina, a me Kāna Kieko Mokuʻāina i ko lākou manaʻo, e haʻalele i ka ʻAhaui Mauna Komohana no ka ʻAhahui Kapakai Pākīpika, ʻo ia hoʻi, ʻo ka Pac-12. A i ka Pōʻakahi nei, hahai aku nei ʻo ʻŪkā Mokuʻāina ma hope o lākou. ʻO nā hui e kūpaʻa ana ma ka ʻAhahui Mauna Komohana, e lilo ana kahi puʻu kālā iā lākou. ʻO ke kālā e lilo ana i ke Kulanui o Hawaiʻi, he $6.75 miliona.

Eia mai kā kākou ʻōlelo noʻeau,

Eia aʻe ka makani Kona.

Hoʻopuka ʻia kēia i ka wā e ʻike aku ai i ke kanaka huhū i ka hele ʻana mai.

Ua loaʻa aku nei paha he mea hoʻopōʻino ola ma Kapālama.

ʻO ia aʻela kekahi poʻo nūhou o kēia lā, ka lā 25 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua pani ʻia nā Kula ʻo Kamehameha a me kona mau kula kamaliʻi ma Kapālama i ka Pōʻalua nei. I pani ʻia ma muli o ka loaʻa ʻana mai o kekahi mea i hoʻohuoi ʻia he mea hoʻopōʻino ola paha ma ke kahua kula. ʻAʻole i hōʻike ʻia aʻe ke ʻano o ia mea, kona wahi i loaʻa ai, ka loaʻa o ka ʻōlelo hoʻoweliweli a me ka loaʻa ʻole paha, a me ke kumu i manaʻo ʻia ai e pani ʻia nā kula. E hemo hou ana nā kula i kēia lā.

I ka Pōʻakahi nei, paʻa i ka hopu ʻia he 10 mau kānaka e ʻolohani ana ma ka Haukapila ʻo Kapiʻolani. I hopu ʻia lākou no ka ʻākeʻakeʻa ʻana i ka puka o kekahi mau kaʻa ʻōhua i ʻole nā kahu maʻi pani hakahaka e lele i lalo. A i ka Pōʻalua nei, paipai aʻela ke Kiaʻāina Josh Green i ka uniona o nā kahu maʻi a me ka Haukapila ʻo Kapiʻolani e noi i ʻuao pekelala no ke kōkua ʻana ma ke kūkākūkā ʻana i mea e loaʻa koke ai ka palapala ʻaelike hou. Ua hana pū ia mau ʻaoʻao me ka ʻuao pekelala ma ka mahina ʻo Mei, ʻaʻole naʻe i hiki ke paʻa ka ʻaelike i ia manawa. Akā, ʻōlelo aʻela ʻo Green, maikaʻi paha ke hoʻāʻo hou. Hālāwai hou ihola nā ʻaoʻao a i ʻelua i ka Pōʻalua nei, ʻaʻohe naʻe wahi mea a loaʻa o ka palapala ʻaelike. E kūkākūkā hou ana lāua i ka Pōʻahā.

A hoʻomaka iho nei ka ʻolohani ʻana o nā limahana o ka Hōkele ʻo Hilton Hawaiian Village i ka Pōʻalua nei. ʻO ka nui o lākou, he 1,800 a ʻoi. A hōʻike aʻela ka uniona, aia ko lākou hoʻi ʻana i ka hana a paʻa mai ka palapala ʻaelike hou. A hiki i kēia manawa, ua hoʻokō ka Hōkele a me nā ʻona i ka hapalua o nā mea a ka uniona e noi nei.

Eia mai kā kākou ʻōlelo noʻeau,

Ola i ke ahe lau makani.

Hoʻopuka kēia ke pā mai ka makani aheahe i ka lā wela.

ʻAʻole i paʻa ka palapala ʻaelike o nā kahu maʻi o ka Haukapila ʻo Kapiʻolani.

ʻO ia aʻela kekahi poʻo nūhou o kēia lā, ka lā 22 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma nā lā ʻehā i hala iho nei, e kūkākūkā ana ke Kikowaena Lapaʻau ʻo Kapiʻolani me ka uniona o kona mau kahu maʻi, ʻaʻohe naʻe wahi mea a loaʻa o ka ʻaelike. ʻO kahi pilikia, mai ka lā 14 o Kepakemapa, ka lā hoʻi a nā kahu maʻi uniona i ʻolohani ai, a hiki i kēia lā, ua pāpā ʻia ko lākou hana ʻana ma ka haukapila, aia wale nō a ʻāpono ʻia he palapala ʻaelike hou a laila, e hoʻi hou lākou i ka hana. Inā ʻaʻole e loaʻa ka palapala ʻaelike hou ma mua o ka lā mua o ʻOkakopa, e pau loa nā pōmaikaʻi mālama olakino o ia mau kahu maʻi.

Ua hoʻoweliweli ʻia aku nei ke Kula Kiʻekiʻe ʻo Balauina a no laila, e māhuahua ana nā mākaʻi ma ke kahua kula i kēia lā a ma nā wahi e pili ana, a pēlā ana nō a ʻike leʻa, ʻaʻohe mea e pōʻino ai ke ola o kekahi ma ia kula. Paipai aʻela ka ʻOihana Mākaʻi o Maui, e makaʻala ka lehulehu a e hōʻike aku i ke keʻena mākaʻi i nā hana ʻano ʻē ke ʻike aku.

He manaʻo ko ka Hui Aukahi Energy LLC, e kūkulu ʻia he iwakālua kumamālua mau pela hana uila a ʻoi aku paha ma ke Kai ʻo Kaiwi. ʻO ka nui o ke kālā e hoʻolilo ʻia aku, he $1.8 biliona. ʻO nā wahi e kokoke loa ana i Oʻahu nei, aia ana he 12 mile loa mai ka lae o Makapuʻu, Waimānalo a me Lanikai. A he 12 mile loa mai kahi komohana ʻākau loa o Molokaʻi. ʻO ke kiʻekiʻe o ia mau pela hana uila, he haneli ʻīā a ʻoi. ʻO ka nui o ka uila e loaʻa, he 25% o ka uila hoʻohana ʻia ma Oʻahu nei.

Eia mai kā kākou ʻōlelo noʻeau,

Peʻa nā lima i ke kaha o Kaupeʻa.

ʻO ia hoʻi, ua hoka kekahi.

E kūʻai mai i nā kikiki no ka hana keaka ʻo Puana.

ʻO ia aʻela kekahi poʻo nūhou o kēia lā, ka lā 20 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

I kēia Pōʻalima aʻe ana e hoʻomaka ai ka hana keaka ʻōlelo Hawaiʻi i kapa ʻia ʻo Puana, ka hana keaka hou a ka Mea Haku Hana Keaka kaulana a Polopeka hoʻi, ʻo Hailiʻōpua Baker. E ulele ana i ka hola 7:30 o ke ahiahi i ka lā 27 me 28 a me ka lā 4 me 5 o ʻOkakopa. A i ka lā 6, aia i ka hola 2:00 o ka ʻauinalā. Ma mua o nā hana keaka o nā Pōʻaono, e mālama ʻia ana kahi wā kūkākūkā, aia ma ka hola 6:45 o ke ahiahi. No ke kanaka makua, he $25 o ke kikiki. No ke kumu a me ka limahana o ke Kulanui o Hawaiʻi, he $22 o ke kikiki. Pēlā pū me ka poʻe pūʻalikoa a me ka poʻe ʻelemākule. No ka poʻe haumāna o waho o ke Kulanui o Hawaiʻi a me ka poʻe ʻōpiopio, he $15. A he $8 wale nō kālā no ka haumāna o ke Kulanui o Hawaiʻi, ke hōʻike aku i ke kāleka hōʻoia kanaka o ia kulanui.

Aia nō ka ʻOihana Mākaʻi o Honolulu nei ke noi aʻela i kōkua ma ka ʻimi ʻana aku i kekahi luahine. ʻO Cathy Kaonohi kona inoa. He 71 ona makahiki. A ʻo kona wahi hope loa i ʻike ʻia ai, aia ma Kapiʻolani Pāka i ke awakea o ka lā 11 o Kepakemapa nei. He mea maʻa mau iā Kaonohi ka holoholo ʻana ma Makiki a me Waikīkī. ʻO kahi pilikia, ma muli o kona olakino, he mau lāʻau kāna e inu ai i kēlā me kēia lā e pono ai kona kino. He 5 ona kapuaʻi hoʻokahi ʻīniha, a he 112 ona paona. Ua poʻohina ʻo ia a he maka uliuli kona. Inā he ʻike paha, e kāhea aku i ka helu 808-955-8300 a e waiho paha i ʻōlelo ma honolulucrimestoppers.org a ma ka polokalamu P3 Tips paha.

Ma ke kūʻē ʻana aku o Los Angeles iā Miami i ka Pōʻakolu nei, ua kupanaha ka hana a Shohei Ohtani. I loko o ke kikina hoʻokahi, ua paʻa ihola kāna pā holo puni 50 a me kāna ʻaihue pahu 50. ʻO Ohtani ka mea pāʻani mua i hana pēlā ma loko o ka moʻolelo o ka Pāʻani Pōpō Hili Loea ma ʻAmelika a me Kanakā. ʻO ka nui loa o nā pahu i ʻaihue ʻia ma loko o ke kikina hoʻokahi, he 64. Na ka pahu pōkole o Kinikinati, na Elly De La Cruz ia hana. ʻO ka nui loa o nā pā holo puni ma ke kikina hoʻokahi, he 53. A na Aaron Judge o nā Iankī o Nū Ioka i hana pēlā.

Eia mai kā kākou ʻōlelo noʻeau,

Kū a keʻokeʻo; ʻaʻohe i hōʻea mai.

ʻO ia hoʻi, e kali ana ʻo ka hiki mai o kekahi, ʻaʻole naʻe i hiki mai.

He noi kā ka ʻOihana Mākaʻi.

ʻO ia aʻela kekahi poʻo nūhou o kēia lā, ka lā 18 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō ka ʻOihana Mākaʻi o Honolulu ke noi aʻela i ka lehulehu i ke kōkua i mea e loaʻa ai ke kanaka i ʻike i ke kī ʻia ʻana aku o kekahi wahine a make. A ʻo Christina Baca ka inoa o ua wahine lā. A ʻo kona kino kupapaʻu ka mea i loaʻa mai ma kekahi paipu hoʻokahe wai ua o Mānoa. Manaʻo ihola ka mākaʻi, ua make ʻo Baca i ke kī pū ʻia i kēlā Pōʻakahi aku nei, ka lā 9 hoʻi o Kepakemapa, ma kahi o ka hola 2:00 o ka wanaʻao. ʻO Baca, he 5 ona kapuaʻi, hoʻokahi ʻīniha, a he 120 paona. He lauoho hāʻehuʻehu kona a he maka polū.

Lilo iho nei ka Hui Mokulele ʻo Hawaiian i ka malu o ka Hui Mokulele ʻo Alaska. ʻAkahi a pau pono ke kūʻai ʻana mai o ka Hui Alaska Air, ka hui makua o ka Hui Mokulele ʻo Alaska, i ka Hui ʻo Hawaiian Holdings, ka hui makua o ka Hui Mokulele ʻo Hawaiian. ʻO ka pahuhopu, ʻo ia ka lawelawe ʻia ʻana o ka hana ma ke ʻano he hui mokulele hoʻokahi, ʻo ko lāua ʻano ponoʻī naʻe, ʻo ia ke kaʻawale mau. Ma kēia hope koke aku, e hiki ana ke kūʻai ʻia ke kikiki mokulele no nā hui ʻelua ma nā kahua pūnaewele pākahi o ia mau hui.

Hōʻike aʻela ʻo Tua Tagovailoa, ke ʻalihikūlele o nā Naiʻa o Miami, ʻaʻohe ona manaʻo e hoʻomaha loa i loko o nā paipai ʻana o kekahi mau mea pāʻani ma mua a me ke aʻoaʻo a kekahi kauka, e hoʻomaha loa ʻo ia ma hope o ka ʻeha ʻana o kona lolo ma kēlā Pōʻahā aku nei. He ʻekolu a ʻoi aku paha manawa i ʻeha ai kona lolo ma loko o nā kikina ʻehā āna e pāʻani ana ma ke ʻano he loea.

Eia mai kā kākou ʻōlelo noʻeau,

He naiʻa, he iʻa lele.

He ʻōlelo kēia no ke kanakak lele ʻē ka manaʻo.

Ua manaʻo ihola kekahi kanaka hou e kī aku iā Donald Trump i ka pū.

ʻO ia aʻela kekahi poʻo nūhou o kēia lā, ka lā 16 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Lāpule nei, ua hoʻāʻo aku nei kekahi kanaka e kī pū aku iā Donald Trump, ka pelekikena ma mua, ma Pololika. ʻO ka inoa o ua kanaka lā, ʻo Ryan Wesley Routh. Ua paʻa ʻo ia i ka hopu ʻia e ka mākaʻi. I ka wā a Trump e pāʻani kolepa ana, ʻike akula nā kiaʻi ʻoihana kiu i ka ʻohe lena o ka pū laipela e kuhikuhi ana i kahi a Trump e pāʻani kolepa ana. Kī akula kekahi kiaʻi iā Routh i ka pū, a ʻauheʻe akula ʻo Routh. Ua paʻi kiʻi ʻia kona kaʻa a me ke pā laikini, a ʻo ia kona mea i loaʻa ai i ka mākaʻi. He 58 makahiki o Routh, a ua kākau inoa ʻo ia no ke koho pāloka ʻana ma Kalolaina Hema a koho pāloka aku nei ma ke koho wae moho o ka ʻaoʻao Kemokalaka ma laila ma ke kau kupu lau nei. A e noho ana ʻo Routh ma Kaʻaʻawa, a e hana ana ma Hawaiʻi nei mai ka makahiki 2018.

I ka Pōʻalima nei ma Mānoa, ua loaʻa iho nei ke kino kupapaʻu o kekahi wahine. Ua kī ʻia nō ke kino i ka pū he mau manawa. Wehe ʻia aʻe nei ka hihia pepehi kanaka ma ke kēkelē ʻelua, a aia nō ka ʻoihana mākaʻi o Honolulu ke noiʻi akula.

E lana ana ka manaʻo, na Hawaiʻi e kāʻili i ka lanakila ma ka ʻāina ʻē i ka hopena pule nei. Ua eo ihola naʻe nā Koa Ānuenue iā Sam Houston i ka pō Pōʻaono nei ma ka helu ʻai he 31 i ka 13. ʻO kahi pilikia o nā Koa Ānuenue, he 14 hoʻopaʻi no nā ʻīā he 122. Ma ka wā a Timmy Chang e alakaʻi ana i ka hui pōpō peku o Hawaiʻi, he hoʻokahi wale nō lanakila ma ka ʻāina ʻē, a he 12 hāʻule.

Eia mai kā kākou ʻōlelo noʻeau,

Kūpopou ana i ka pali o Kēʻē.

He ʻōlelo kēia no ke kanaka laulima ʻole.

ʻEha hou ka lolo o Tua Tagovailoa ma ka hoʻokūkū pōpō peku.

ʻO ia aʻela kekahi poʻo nūhou o kēia lā, ka lā 13 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Hopu ʻia aku nei kekahi kaikamahine e ka mākaʻi i ka Pōʻalua nei. He 12 ona makahiki, a he haumāna ʻo ia ma ke Kula Waena o Mililani. ʻO kona mea i hopu ʻia ai, no ka hoʻohuoi i ka hoʻoweliweli ʻana ma ke kēkelē ʻekahi. Ua hoʻoweliweli paha ʻo ia a laha ma o ke kamepiula, e kīkī pū ana ʻo ia ma ke Kula Waena o Mililani i ka Pōʻakolu nei.

Ua ʻeha ihola ka lolo o Tua Tagovailoa ma ka hoʻokūkū pōpō pekupeku o ka pō Pōʻahā nei ma ke kūʻē ʻana aku iā Pāpulō. Ma ka hina ʻehā, a he ʻehā ʻīā e pono ai ka hina mua, holo akula ʻo Tagovailoa me ka pōpō a loaʻa nō ia mau ʻīā a ʻoi, akā, hoʻokuʻi maila ʻo Damar Hamlin, he ʻāwaʻa no Pāpulō. Hina ihola ʻo Tagovailoa a ʻaʻole i hiki iā ia ke kū koke i luna. Ma hope mai, kūʻoʻi akula ʻo ia a ma ka ʻaoʻao o ke kahu pāʻani a hele pololei i ka lumi waihona pāiki. ʻAʻole ʻo ia i hoʻi hou i ka pāʻani. A hiki i kēia lā, he ʻekolu a ʻehā paha manawa i ʻeha ai ka lolo o Tagovailoa.

Lanakila aku nei nā Wāhine Ānuenue ma luna o Tekeka Mokuʻāina ma loko o nā pāʻani ʻehā i ka Pōʻalua nei. He 20 hoʻopio a Caylen Alexander. He 10 hoʻopio a Jacyn Bamis a pēlā pū me Miliana Sylvester. ʻO Tali Hakas, he 16 āna ʻali. A ʻo Tayli Ikenaga, he 14 ʻali. A ʻo Victoria Leyva, he 10 āna ʻali.

Eia mai kā kākou ʻōlelo noʻeau,

Kumuhea kupu ʻino.

He ʻōlelo kēia no kahi mea e pilikia ai ke ola kino.

E naue aku i ka hana keaka Hawaiʻi hou.

ʻO ia aʻela kekahi poʻo nūhou o kēia lā, ka lā 11 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

He hana keaka Hawaiʻi hou ke hiki koke mai ana i kēia mahina nei ma ke Kahua Hana Keaka ʻo Kennedy ma ke Kulanui o Hawaiʻi ma Mānoa. Na Tammy Hailiʻōpua Baker i haku me ka lauaki mai o nā Kumu Hula ʻo Keawe Lopes ʻŌpio lāua ʻo Tracie Kaʻōnohiokalani Lopes, ʻo Zachary Alakaʻi Lum, a me Tawaroa Kawana. ʻO Puana ka inoa o ka hana keaka, a he hana keaka ia e pili ana i ka pilina o ke Kanaka Maoli me kona mau kūpuna. He ʻelima lā e mālama ʻia ai ka hana keaka. Ma ka lā 27 me 28 o Kepakemapa a ma ka lā 4 me 5 o ʻOkakopa, i ka hola 7:30 o ke ahiahi e hoʻomaka ai. A i ka lā 6 o ʻOkakopa, i ka hola 2:00 e hoʻomaka ai. He $25 o ke kikiki. A he kumu kūʻai kūikawā no ka poʻe ʻelemākule, ke kumu a me ka limahana a pēlā pū me ka haumāna. A e emi nō hoʻi ke kumu kūʻai o ke kikiki i ka Pōʻaono mua.

Hoʻokaʻawale ʻia he $3 miliona no ka noiʻi ʻana i wahi e hālana ʻole ai ka wai o ke Kahawai o Wailupe. A ʻo ia kahawai wale nō ke kahawai o Honolulu Hikina i paʻa ʻole kona papakū i ke kimeki. A ʻo ia paha ke kumu e hālana pinepine ai ka wai ma laila. E uku ʻia ana he 50% o ia puʻu kālā i ka Pūʻulu Wilikī o ka Pūʻalikoa o ʻAmelika no ka hana. A ua ʻōlelo ʻia, e komo pū ana ka poʻe lawaiʻa o laila a me ka poʻe ʻŌiwi Hawaiʻi i loko o ke kūkākūkā ʻana.

Hōʻike aʻe nei ʻo Taylor Swift i kona kākoʻo ʻana aku i ka Hope Pelekikena Kamala Harris ma kona alualu ʻana i ke kūlana pelekikena. I hōʻike aʻe ʻo Swift i kona kūpaʻa ma hope o Harris i mua o ka lehulehu ma muli o ka hoʻopunipuni ʻana ma ke kahua pūnaewele o Donald Trump, he kākoʻo ʻo Swift iā Trump ma kona alualu ʻana i ke kūlana pelekikena.

Eia mai kā kākou ʻōlelo noʻeau,

Ke mokomoko lā me ka makani.

He ʻōlelo kēia no ke kanaka e kahakā ana, a e kūʻēʻē ana paha i kekahi.

Kū kilakila ana nā Wāhine Ānuenue.

ʻO ia aʻela kekahi poʻo nūhou o kēia lā, ka lā 9 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Pāhola aku nei ke Kaipuni Kūkanono ʻo Yagi i Viekanama ʻākau i ka Pōʻaono nei. ʻO ka ikaika o kona mau makani, he 99 mile o ka hola a emi mai. ʻO ka nui o nā kānaka i make, he ʻehā a ʻoi aku paha. A ʻo ka nui i ʻeha, he 78. A he ʻekolu kāuna i nalowale ma ke kai. Ua hiki mua aku ʻo Yagi i ka ʻĀina Pilipino, kahi i make ai nā kānaka he 16 a ma hope mai, ma Hainan i Kina, he ʻelua mau kānaka i make a ʻoi aku paha. A ʻo ka ikaika o nā makani o Yagi ma Hainan, he 145 mile o ka hola.

E kūkulu ʻia aʻe ana ka hōkele ma ʻEwa. ʻO ka hōkele mua ana ia ma laila. ʻAkahi nō a paʻa i ka hui ʻo Alakaʻi Development he $135 miliona no ke kūkulu ʻana. Aia ana ma ke Alanui ʻo Nānā Hope. A i ka makahiki 2025 paha e hoʻomaka ai ke kūkulu ʻana. ʻO ka nui o ka hale, he ʻelima ona papahele, a he 240 lumi.

Hahana nō ka pāʻani pōpō paʻipaʻi o ka Pōʻaono nei ma Mānoa. E kūʻē aku ana nā Wāhine o Hawaiʻi iā Pepperdine. A lilo maila ke eo o nā pāʻani mua ʻelua iā Hawaiʻi. Akā, hiu aʻela ʻo Pepperdine, a lilo akula ke eo o nā pāʻani ʻekolu me ʻehā. A ʻo ka lima o ka pāʻani, na nā Wāhine Ānuenue i kāʻili ma ka helu ʻai he 15 i ka 9. He 25 hoʻopio a Caylen Alexander. A he 13 a Stella Adeyemi. He 33 ʻali a Tayli Ikenaga a he 12 a Victoria Leyva. He 57 hānai a Kate Lang a he 14 āna ʻali. I ka Pōʻalua, ka lā ʻapōpō hoʻi, ʻo Tekeka Mokuʻāina ka hoa paio o Hawaiʻi.

Eia mai kā kākou ʻōlelo noʻeau,

ʻO ka hana ia a ka lawaiʻa iwi paoa, iho nō ka makau, piʻi nō ka iʻa.

He ʻōlelo kēia no ke kanaka laki.

ʻŌkaikai paha ke Kikowaena Lapaʻau ʻo Kapiʻolani.

ʻO ia aʻela kekahi poʻo nūhou o kēia lā, ka lā 6 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Paʻa aku nei i ka hopu ʻia he ʻehiku mau ʻīlio i ka mākaʻi a me ka ʻAhahui Kūʻē i ka Hoʻomāinoino i ka Pōʻakolu nei. I ʻimi aku ka mākaʻi a me ia ʻahahui i nā ʻīlio ma hope o ka hoʻopiʻi ʻana o ke kaiāulu. ʻElua o ia mau ʻīlio, he nanā a ʻāhiu paha. ʻO lākou a pau, lawe ʻia akula ma lalo o ka malu o ka ʻAhahui Kūʻē i ka Hoʻomāinoino.

I ka Pōʻahā nei, he hālāwai kūkākūkā hou kai mālama ʻia aku nei ma waena o ka uniona kahu maʻi o ka Haukapila ʻo Kapiʻolani a me nā poʻo o laila. ʻAʻohe wahi mea a loaʻa o ka ʻaelike. Hōʻike aʻela nā poʻo o Kapiʻolani, inā ʻaʻole e ʻae ʻia ka palapala ʻaelike, e kipaku ʻia nā limahana pūlima ʻole, ʻaʻole lākou e komo i loko o ka haukapila no ka hana. Ua holo ka manaʻo o ka ʻAhahui Kahu Maʻi o Hawaiʻi, ma kahi o 600 haneli kahu maʻi o Kapiʻolani, e ʻolohani ma ka lā 13 o Kepakemapa. A ʻōlelo aʻela nā poʻo o Kapiʻolani, ma hope o ia lā, ʻo nā kahu maʻi laikini i pau ka palapala ʻaelike i ka lā 30 o Nowemapa o kēlā makahiki aku nei, ʻaʻole e ʻae ʻia ko lākou hoʻi ʻana i ka hana. Wahi a Rosalee Agas-Yuu, ka pelekikena o ka ʻAhahui Kahu Maʻi o Hawaiʻi, ua maikaʻi nō kekahi mau mea i kūkākūkā ʻia a he mau ʻaelike nō. A e hālāwai hou ana paha i loko o kahi wā pōkole.

Eia mai kā kākou ʻōlelo noʻeau,

Ka ʻalā paʻa o Kaueleau.

ʻElua manaʻo. ʻO kekahi, ʻo ke kālā ia. A ʻo kekahi, ʻo ke kanaka poʻo paʻakikī.