Author: keaolama

He polokalamu hou paha ke hoʻokumu ʻia no ka poʻe ʻelemākule e nalowale.

ʻO ia aʻela kekahi poʻo nūhou o kēia lā, ka lā 22 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

Aia kekahi pila ma ka ʻAha ʻŌlelo o Hawaiʻi nei no ka pono o nā ʻelemākule e nalowale. ʻO ka Bila Kenekoa 2305, e hoʻokumu ana i polokalamu kahi e ʻimi ʻia ai a loaʻa nā ʻelemākule ke nalowale a me ka poʻe nō hoʻi i pilikia ka noʻonoʻo. Ma nei polokalamu, e hiki ana i ka ʻoihana mākaʻi ke hoʻolaha aku i kelekiko ma kahi e kokoke ana i kahi hope loa i ʻike ʻia ai ka mea i nalowale, ma loko paha o ka hoʻokahi mile a ʻelua mile paha. A ke ʻike aku i ka mea i nalowale ke kanaka iā ia ke kelepona hele, he hiki nō iā ia ke kāhea aku i ke kōkua. Na Kenekoa Brandon Elefante ka pila, a i kēia manawa, aia nō ma ke kōmike ʻaha o ka Hale o nā Lunamakaʻāinana a me ka ʻAha Kenekoa.

I ka Pōʻalima nei, lanakila aku nei ʻo Kai Kamaka III ma luna o Bubba Jenkins ma ka puni mua o ka Hoʻokūkū Inoa Moho 145 paona o ka ʻAhahui Mokomoko Loea. Ua lōkahi ka manaʻo o nā luna loiloi.

Aloha nō nā Kāne Ānuenue. Ua eo iho nei lākou iā Irvine ma loko o nā pāʻani ʻekolu i ka pō Pōʻalima nei. A hāʻule pahū ihola ka manaʻo, e paʻa hou ka inoa moho o ka ʻAhahui Komohana Nui iā Hawaiʻi. A ma ka puni inoa moho ma waena o Kekaha Loa a me Irvine i ka Pōʻaono nei, na ka inoa mua nō i kāʻili i ka lanakila ma loko o nā pāʻani ʻehā.

Eia mai kā kākou ʻōlelo noʻeau,

ʻAlamihi kakani pōʻeleʻele.

He ʻōlelo kēia no ke kanaka hoʻokanikani i ka wā pōʻeleʻele.

E mokomoko hou aku ana ʻo Kai Kamaka.

ʻO ia aʻela kekahi poʻo nūhou o kēia lā, ka lā 19 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

Aloha nō. Ua ʻōpā ʻia aku nei kekahi wahine o Kunia e kekahi mau kaʻa ʻelua. E hele ana ua wahine lā a i kona wā ma waena o ia mau kaʻa ʻelua, hoʻokuʻi ʻia kekahi o ia mau kaʻa e kekahi kaʻa, a ʻo ia ka wā i ʻōpā ʻia aku ai ka wahine. Hoʻihoʻi koke ʻia aku nei ʻo ia i ka haukapila ma ke kūlana kūpilikiʻi. Wahi a ka ʻoihana mākaʻi, kohu mea lā, ʻo ka holo nui a me ka wai ʻona kekahi mau kumu o ka ulia.

E komo hou ana ʻo Kai Kamaka i ka pahu hao huinawalu. He mea mokomoko ʻo Kamaka no ka UFC ma mua, akā, haʻalele ihola ʻo ia he ʻekolu makahiki aku nei. A lilo ihola ʻo ia i mea mokomoko no Bellator. A lanakila akula ʻo ia he ʻekolu manawa ma hope kekahi o kekahi. Akā, i ka mahina ʻo Nowemapa o ka makahiki nei i hala, ua kūʻai ʻia ʻo Bellator e ka ʻAhahui Mokomoko Loea. A he ʻeono mahina ma hope mai o kona mokomoko hope loa ʻana, e ʻike hou ʻia ana nā ʻai a ka uʻi o Hawaiʻi. ʻO ia kekahi o nā mea mokomoko e hoʻokūkū ana no ka inoa moho 145 paona o ia ʻahahui. A e lilo ana he $1 miliona kālā i ka lanakila. I kēia lā ana nō ka puni mua, a e hakakā ana ʻo Kamaka me Bubba Jenkins ma Kikako. E hoʻomaka ana i ka hola 3:30 ma ke kānela ESPN. A e hoʻolele ʻia ana nō hoʻi ma ESPN+.

Ma ka pāʻani pōpō paʻipaʻi, kūʻē aku nei nā Kāne Ānuenue o Hawaiʻi i ko Kāna Palapala. Hāʻule ihola ʻo Hawaiʻi ma ka pāʻani mua, hiu aʻela naʻe nā Ānuenue a kāʻili akula i nā pāʻani ʻekolu ma ia hope mai. He ʻumi kumamākolu hoʻopio a Alakaʻi Todd. E kūʻē aku ana ʻo Hawaiʻi iā UC Irvine i kēia ahiahi.

Eia mai kā kākou ʻōlelo noʻeau,

Peʻapeʻa maka walu.

He ʻōlelo kēia no ke kanaka makaʻala a ʻiʻike a no ke kanaka paha i lehia ma kekahi hana.

He mau ʻōlelo hoʻoweliweli ka mea i pani ʻia ai kekahi mau kula uku o Oʻahu nei.

ʻO ia aʻela kekahi poʻo nūhou o kēia lā, ka lā 17 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma muli o ka loaʻa ʻana iho nei o kekahi leka e hoʻoweliweli ana i ke kī pū ʻana ma ke Kula ʻo Damien i ka Pōʻalua nei, pani ʻia ihola ke kula a paʻa a kāpae ʻia ihola nā papa a me nā hana kula like ʻole. ʻAʻohe kanaka i kī aku i ka pū ma laila i nehinei, akā, pani hou ʻia ke kula i kēia lā. A ma ka leka, ua ʻōlelo ʻia, ma ke Kula ʻo Maryknoll e kī pū ai kekahi ma ia lā hoʻokahi nō. A pani ʻia ihola nā kahua kula o Maryknoll a kāpae ʻia nō hoʻi nā papa. Akā, e hoʻomaka hou ke kula ma Maryknoll i kēia lā. Aia nō ka mākaʻi ke noiʻi akula.

A i ka Pōʻakahi nei ma nā Kula ʻo Kamehameha ma Kapālama, aia kahi hana i ʻane like. Ma ka paia o kekahi hale o ia kahua kula, ua kahakaha ʻia kahi ʻōlelo hoʻoweliweli no ke kī pū ʻana o kekahi kanaka ma laila. A no laila, kāpae ʻia ihola nā papa o ia lā me ka hoʻomaopopo ʻana i nā kumu, nā haumāna, a me nā limahana, ʻaʻole e hele aku i ke kula. Aia nō ka mākaʻi ke noiʻi akula.

Ma ka Pōʻaono nei, ua loaʻa aku nei i ka mākaʻi ke kino o kekahi kanaka ma kona hale ma Waipahu, ua pau ka ʻike, a pau ka lohe. A ma hope mai, ua ʻike ʻia, ua make nō. Ua loaʻa nō hoʻi kekahi naheka wili pōpō ma ia hale. ʻO kona lōʻihi, he ʻekolu kapuaʻi me ka hapa. ʻO ka halihali ʻana i ka naheka a me ka mālama ʻana, he mea kūʻē kānāwai ia. A ʻo ka hoʻopaʻi, he $200,000 a emi mai a me ka noho paʻahao he ʻekolu makahiki a emi mai. He polokalamu hoʻokuʻu ko ke aupuni mokuʻāina, ʻaʻole e kau ka hoʻopaʻi ke hāʻawi ʻia aku ka holoholona kūʻē kānāwai i ke Keʻena Mahiʻai o Hawaiʻi, ka ʻAhahui Kūʻē i ka Hoʻomāinoino Holoholona, ke kahua hōʻikeʻike holoholona laka ʻole, a me ka hale hōʻikeʻike iʻa paha. Akā, inā ua hoʻomaka ʻē ʻia ka noiʻi ʻana, ua hala ʻē ka Puʻulena.

Eia mai kā kākou ʻōlelo noʻeau,

Eia aʻe ka makani Kona.

Hoʻopuka ʻia aku kēia ʻōlelo i ka wā e hiki mai ana ke kanaka huhū.

Kū kilakila ana kahi keiki o Waiʻanae.

ʻO ia aʻela kekahi poʻo nūhou o kēia lā, ka lā 15 o ʻApelila, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

Ua loaʻa aku nei kekahi kanaka o Haleʻiwa i ka piwa haʻihaʻi iwi i kona wā i hele aku ai i ka ʻāina ʻē. A ʻo ka mea e hopohopo nei ke Keʻena Ola o ke aupuni mokuʻāina, he nui lehuelehu nā makika ma kahi o ka hale o ua kanaka lā a me nā wahi e pili ana. A he mau makika hoʻi ia nāna e hoʻolaha aʻe i ka mea hoʻomaʻi piwa haʻihaʻi iwi. Aia nō ka hale ma kahi e kokoke ana i ke Awa Kū Moku o Haleʻiwa. A he nui loa nā kānaka a me nā malihini mākaʻikaʻi e holoholo ana ma laila. Ua kīkī aku nā limahana o ke Keʻena Ola i ka lāʻau i mea e kāhaʻu ai nā makika. A e makaʻala ana nō lākou i ia wahi ma nā pule ʻelua e hiki mai ana a e lawelawe aku ana i ka hana e pono ai. Aia nō ke Keʻena Ola ke paipai aʻela i ka lehulehu, a i ko Haleʻiwa hoʻi, e hana i ka mea e pale aku ai i ka makika, ʻo ka hamohamo i ka lāʻau pale makika, ʻo ke komo i ka lole pale makika, a e ninini ʻia aku ka wai kū, ʻoiai, ʻo kahi ia e kiko ai ka hua makika a e ola ai ka naio.

Lilo aku nei ka inoa moho BMF iā Max Holloway i ka Pōʻaono nei. ʻO Justin Gaethje kona hoa paio. I ka hopena o ka puni mua, peku hope ʻōniu akula ʻo ia iā Gaethje a ʻo ke kahe ihola nō ia o ke koko mai kona ihu mai. Akā, ʻaʻole i lepahū iki kona manaʻo. A i ka ʻelima o ka puni, ka puni hope loa hoʻi, e ʻoi aku ana nā ʻai a Holloway, a he 10 kekona i koe, kono akula ʻo Holloway i kona hoa paio, e kū lāua he alo a he alo, a pāluku aku, pāluku mai a kani ka pele. A ʻae koke maila ka hoa paio. A he ʻelua wale nō kekona i koe, pā pono akula ke poʻo o Gaethje i ke kuʻi māhanahana a Holloway a hina ihola. A e waiho wale ana nō ʻo Gaethje i lalo, ua pau ka ʻike, pau hoʻi ka lohe. Lilo aku nei he $600,000 i ke keiki o Hawaiʻi. He $300,000 no ka hoʻokūkū ʻoi o ia ahiahi a he $300,000 no ka mokomoko ʻoi.

Eia mai kā kākou ʻōlelo noʻeau,

Hoʻokahi ka ʻilau like ʻana.

ʻO ia hoʻi, e alu like.

Hala aku nei kekahi pilikua o Hawaiʻi nei i ke ala hoʻi ʻole mai.

ʻO ia aʻela kekahi poʻo nūhou o kēia lā, ka lā 12 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻi aku nei ʻo Chad Haʻaheo Rowan e moe i ka moe kapu o Niolopua i kēia mahina nei ma hope o ka ʻāʻumeʻume lōʻihi ʻana me ka maʻi. No Waimānalo mai ʻo Rowan, a hele akula nō ʻo ia a kaulana i ia mea ʻo ka hākōkō sumō. ʻO ia nei ka mea mua i hānau ʻole ma Iāpana, i lilo i poʻokela ma ia hana leʻaleʻa o laila. Nāna nō i waele i ke ala, a ma hope mai nō, he mau malihini hou nō i hiki aku i ia kūlana hanohano. He ʻumi kumamākolu ona makahiki i kūpāpā aku ai ma ia ʻoihana, a lilo aku nei nā Makana Kīʻaha ʻEmepela he ʻumi kumamākahi iā ia.

E hoʻomaka ka wāwahi ʻia ʻana aku o ke Alapiʻi o Haʻikū i ka hopena o kēia mahina nei. Pēlā ka ʻōlelo a ke kūlanakauhale o Honolulu nei. Hōʻike aʻela ka Meia Rick Blangiardi i kekahi mau kumu o ka wāwahi ʻana aku i ia alapiʻi, ʻo ka palekana o ka lehulehu, ʻo ka uku aku ke kū ke kūlanakauhale i ka hewa, ʻo ke komo hewa ʻana a me kekahi mau hoʻoluhi i nā kānaka e noho ana ma kahi kokoke. Na ka hui ʻo Nakoa Cos. ka wāwahi ʻana. Uku aku nei ke kūlanakauhale i ia hui he $2.34 miliona kālā no ka lawelawe ʻana i ia hana.

E komo hou aku ana ʻo Max Holloway i ka huinawalu i ke ahiahi o ka lā ʻapōpō. ʻO ka pō ia o ka UFC 300. A ʻo ka hoa paio o Holloway, ʻo ia ʻo Justin Gaethje. A e paio ana lāua no ka inoa moho BMF ma ka māhele 155. ʻO Gaethe ka inoa moho BMF i kēia manawa. ʻAʻole ia he inoa moho kūhelu, akā, he hōʻike ʻiʻo nō i ke poʻokela. A ʻo kekahi mea hou, hoʻonui aʻe nei ʻo Dana White, ka pelekikena o ka UFC, i ka uku makana a i ka $300,000. ʻO ka hoʻokūkū nui loa o ia ahiahi, ʻo ia ka hui pū ʻana o Alex Pereira lāua ʻo Jamahal Hill no ka inoa moho ma ka māhele 205. ʻO Alex Pereira ka inoa moho i kēia manawa. A ʻo ke kolu o ka hoʻokūkū inoa moho, e kūʻē aku ana ʻo Zhang Weili iā Yan Xiaonan no ka inoa moho ma ka māhele 115 paona. He ʻelua hou hoʻokūkū nui, a ʻo ka huina nui o nā hoʻokūkū a pau o ia lā, he ʻumi kumamākolu.

Eia mai kā kākou ʻōlelo noʻeau,

ʻAʻohe ʻalae nāna e keʻu ka ʻaha.

ʻO ia hoʻi, ʻaʻohe mea nāna e hoʻopilikia mai.

Kau aku nei kekahi mau kumu kula o Hawaiʻi i ka hano hāweo.

ʻO ia aʻela kekahi poʻo nūhou o kēia lā, ka lā 10 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Lilo aku nei ka Makana Hoʻonaʻauao Milken i kekahi mau kumu kula aupuni o Hawaiʻi nei. He makana ia no nā kumu aʻo poʻokela. ʻO ke kumu mua i lilo aku ai ia makana, ʻo Jade Pham o ke Kula Waena ʻo Ke Kamāliʻi David Kawānanakoa ma Honolulu. No Da Nang, Viekanama ʻo Pham, ʻelua ona makahiki i kona wā i neʻe mai ai kona ʻohana i Hawaiʻi nei. Ua loaʻa mai kāna kekelē kālaiʻāina ma ke Kulanui ʻo Corban. A i kona hoʻi ʻana mai i Hawaiʻi nei, hai ʻia ʻo ia e ke Kula Kiʻekiʻe o Kaimukī, kona wahi i puka mai ai. A loaʻa maila kāna kekelē lae oʻo ma ka hoʻonaʻauao ʻana. I kēia manawa, ʻo ia ka luna hoʻolaukaʻi lawelawe haumāna a me ke kākoʻo hope kumu kūikawā. A ʻo ka lua o ke kumu i lilo ai ua makana lā, ʻo ia ʻo Rory Inouye o ke Kula Kiʻekiʻe o Waiākea. Paʻa ihola ke kekelē lae pua ma ka hoʻonaʻauao ma ke Kulanui o Hawaiʻi ma Mānoa. A ma hope mai, hele aku nei ʻo ia i ke Kulanui o Hawaiʻi ma Hilo, kahi i paʻa ai ke kekelē lae oʻo ma ka hoʻonaʻauao. He kumu aʻo makemakika ʻo Inouye i kēia manawa. A ma ka lilo ʻana aku nei o ia makana iā Pham a me Inouye, lilo pū nō hoʻi he $25,000 iā lāua pākahi.

I ka Pōʻakolu nei, hopu ʻia aku nei kekahi kanaka no ka loaʻa ʻana o ka pū ma kona kino. A he pū ia i ʻaihue ʻia. ʻO ke kumu i paʻa ai ua kanaka lā i nā mākaʻi o ke Keʻena Hoʻomalu Kumu Waiwai, ua manaʻo ʻia, ua ʻaʻe ia kanaka i nā kānāwai lawaiʻa ʻupena, a ʻo ia ka wā i loaʻa ai ka pū. Aia nō ua kanaka lā ma ka malu o ka mākaʻi i ka wā e noiʻi ʻia ana.

Eia mai kā kākou ʻōlelo noʻeau,

Ahuwale nā pae puʻu o Hāʻupukele.

He ʻōlelo kēia no kekahi mea i ahuwale a i waiho akaaka paha.

Ua ʻolu nō ke kino i ka hula.

ʻO ia aʻela kekahi poʻo nūhou o kēia lā, ka lā 8 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

Niniu ana Molokaʻi, poahi Lānaʻi i ka hopena pule nei. A ʻo nā mea a pau o ia mau pō, he nani hoʻi kau a koe aku. A ʻo ka hālau poʻokela o ia mau ahiahi i lilo aku ai ka Makana Mau Loa ʻo Lokalia Montgomery, ʻo ia nō ʻo Ka Lā ʻŌnohi Mai O Haʻehaʻe, a ʻo Tracie lāua ʻo Keawe Lopes nā kumu hula. A ʻo ka hālau i hahai koke aku nō ma hope, ʻo Hālau Ka Lei Mokihana o Leinaʻala, ʻo Leinaʻala Pavao Jardin ke kumu hula. A lilo aku nei ka makana helu ʻekolu i ka Hula Hālau ʻo Kamuela, ʻo Kūnewa Mook lāua ʻo Kauʻionālani Kamanaʻo nā kumu hula. A ma ia kaʻina like nō i kau ai ia mau hālau ma ka hano hāweo ma ka māhele wahine holoʻokoʻa. A ma ka māhele kāne holoʻokoʻa, ʻo Hālau Hiʻiakaināmakalehua ka ʻoi, ʻo Robert Keano Kaʻupu IV lāua ʻo Lono Padilla nā kumu hula. A ʻo Hālau Nā Mamo O Puʻuanahulu kai ke kūlana ʻelua, ʻo William Kahakuleilehua Haunuʻu Sonny Ching lāua ʻo Lopaka Igarta-De Vera nā kumu hula. A ʻo Hālau Kekuaokalāʻauʻalaʻiliahi kai ke kūlana ʻekolu, ʻo Haunani lāua ʻo ʻIliahi Paredes nā kumu hula.

Aia kahi pila ma ka Hale o nā Lunamakaʻāinana o Hawaiʻi nei e hoʻomāhuahua ana i nā wahi noho i haʻahaʻa kūpono ke kumu kūʻai a me ka uku hoʻolimalima paha. Ma ka Pila Hale 2328, e ʻae ʻia ana ka lilo ʻana o ʻŌhiʻa Hale, o Blaisdell Hale a me Whitlow Hale i ke aupuni mokuʻāina i mea e hoʻomāhuahua ʻia ai nā wahi noho nona ke kumu kūʻai haʻahaʻa kūpono o ke aupuni mokuʻāina. Aia nō naʻe kekahi mau kānaka o ke Kaona Pākē e hopohopo ana o kipaku ʻia nā ʻoihana kamaʻāina o laila, he mau ʻoihana hoʻi nāna e lawelawe ana i nā kānaka kāwaʻe ʻia.

Eia mai kā kākou ʻōlelo noʻeau,

Hāʻale i ka wai a ka manu.

He ʻōlelo kēia no ke kanaka uʻi.

ʻOlu nō nā kino i ka hula i ka pō nei.

ʻO ia aʻela kekahi poʻo nūhou o kēia lā, ka lā 5 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

ʻAʻole o kana mai ka nani o ka hula o nā moho Miki Aloha Hula o ka pō nei. A kau aʻela ʻo Kaʻōnohikaumakaakeawe Kananiokeakua Holokai Lopes i ka hano hāweo. ʻO ia nō Miki Aloha Hula hou. A ʻo ka hā ia o ka ʻōlapa o ka hālau ʻo Ka Lā ʻŌnohi Mai O Haʻehaʻe i lilo ʻo ia ka Miki Aloha Hula ma hope kekahi o kekahi mai ka makahiki 2021. A lilo aku nei nō hoʻi ka Makana ʻŌlelo Hawaiʻi iā Kaʻōnohi.

E pouli hapa ana ka lā ma Hawaiʻi nei i kēia Pōʻakahi. E hoʻomaka ana i ka hapalua hola ʻeono o ke kakahiaka. A i ka ʻumi kumamālua minuke i hala ka hola ʻehiku, e pouli ana he 30 pākeneka o ka lā a emi iki paha. E hiki ana ke ʻike ʻia aku ma nā wahi e huli ana i ka hikina, e laʻa ʻo Kailua, ʻo Makapuʻu a me Maunalua paha ma Oʻahu nei. E ʻike ʻia ana ka pouli holoʻokoʻa ma Mekiko, ʻAmelika Hui Pū ʻIa a me Kanakā. Ke nānā aku ʻoe i ka pouli ʻana o ka lā, e kau ka maka aniani kūpono no ia hana, ʻaʻole lawa ka maka aniani pale lā.

Aia nō ka uniona kahu maʻi a me ke Kikowaena Lapaʻau ʻo Kapiʻolani ke kūkākūkā aʻela no nā mea e pono ai ka palapala ʻaelike hou. He ʻeono mahina a ʻoi aku ka lōʻihi o ke kūkākūkā ʻana, a he pāʻumeʻume mau nō. Ma Ianuali, ʻolohani ihola nā kahu maʻi he hoʻokahi pule. A ma Pepeluali, komo ihola ka mea ʻuao ma ke kūkākūkā ʻana.

Eia mai kā kākou ʻōlelo noʻeau,

ʻO Muku ka lā, mumuku nā hana.

ʻO ia hoʻi, ʻaʻole maikaʻi ke hoʻomaka i kahi papahana i ka pō i o Muku o kō ʻole.

E nāueue ana ka honua ma Taiuana.

ʻO ia aʻela kekahi poʻo nūhou o kēia lā, ka lā 3 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

E nei ana ke ōlaʻi i ke kakahiaka o ka Pōʻakolu ma Taiuana. Pōʻino ihola kekahi mau hale a me kekahi mau ala loa. He ʻehā mau kānaka i make. A he 57 mau kānaka i ʻeha a ʻoi aku paha. ʻO ka ikaika o ke ōlaʻi, he 7.2. A he mau manunu ma hope mai o ia ōlaʻi, a ʻo ka ikaika o kekahi, he 6.5. ʻElua wale nō wahi i hōʻea aku ai ke kai hoʻēʻe, ma Taiuana a me Iāpana Hema, he hoʻokahi wale nō kapuaʻi o nā nalu a emi mai. A ʻo ka mea pōmaikaʻi, ʻaʻohe mea i pōʻino i ia mau nalu.

Kohu mea lā, ʻaʻole e ʻāpono ʻia aku ka hoʻolilo ʻana i ke puhi ʻana o ke kanaka makua i ka pakalōlō ma Hawaiʻi nei. Aia nō ka Pila Kenekoa 3335 ma ke Kōmike Waiwai o ka Hale o nā Lunamakaʻāinana, akā, hōʻole aku nei ka Luna Hoʻomalu o ia kōmike, ʻo Kyle Yamashita i ke koho ʻana i ka ʻāpono a me ka ʻāpono ʻole paha i ia pila. ʻŌlelo aʻela ʻo Yamashita, ma muli o ka nui o nā nīnau no ka hoʻokō ʻana i ka pila, holo ihola ka manaʻo, e pau ke kūkākūkā ʻana ma ke Kōmike Waiwai o ka Hale.

He ʻōlelo hoʻoholo hou ma ka ʻAha Kūkā o Honolulu no ka hoʻokumu ʻana i Keʻena Hoʻomalu Kai. I kēia manawa, aia nō ke kuleana hoʻomalu kai ma lalo o ke Keʻena Lawelawe Ulia. ʻO ka ʻŌlelo Hoʻoholo 50 ia, a ma ia ʻōlelo hoʻoholo, e kau ana ka nīnau no ia hoʻokaʻawale ʻana ma ka pāloka o ka lā koho pāloka o ka lā 5 o Nowemapa. A ke ʻāpono ʻia, he pono nō hoʻi ke hoʻokumu i komikina no ia keʻena e like me ke Komikina Kinai Ahi a me ke Komikina Mākaʻi. ʻO ka mea ʻāpiki, hōʻike aʻela ka Hope Luna Hoʻokele o ke kūlanakauhale, ʻo Krishna Jayaram, he mana ko ka meia e hāpai ai i ʻōlelo hoʻoholo e hoʻokumu ʻia ai ia keʻena hoʻomalu kai i kēia manawa, ke ʻāpono mai ka ʻAha Kūkā. Akā, he kūʻē kekahi mau luna ʻAha Kūkā i ka hana ʻana o ka meia pēlā.

Eia mai kā kākou ʻōlelo noʻeau,

ʻEliʻeli kūlana o ʻĀinaʻike.

He ʻōlelo kēia no ke kanaka mahalo ʻia no ke kūliʻu o kona ʻike.

Ke noke aʻela ke Keʻena ʻĀina Hoʻopulapula i ka hana e loaʻa ai nā ʻāina hoʻopulapula i nā kānaka.

ʻO ia aʻela kekahi poʻo nūhou o kēia lā, ka lā mua o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻO ka pahuhopu o ke Keʻena ʻĀina Hoʻopulapula, ʻo ia ka loaʻa ʻana o kahi noho i nā ʻohana he 6,000 ma nā makahiki pōkole e hiki mai ana. A ʻo kekahi o ia mau wahi noho, he mau wahi noho hoʻolimalima no nā ʻohana no lākou ka uku makahiki haʻahaʻa a ma hope o nā makahiki he 15, e hiki ana iā lākou ke kūʻai mai. A ʻo ka nui o ia ʻano wahi noho, he 500 paha a e ʻoi aku paha i ke 1,100. He mea maikaʻi loa nō ia, ʻoiai, ʻaʻole i hiki i kekahi poʻe ke ʻae aku i ka ʻāina hoʻopulapula ma muli o ka lawa ʻole o ke kālā e kūʻai mai ai i ka hale. ʻO ka nui o nā kānaka e noi nei i ʻāina hoʻopulapula, he 28,700. A ma muli o ia ʻano wahi noho hoʻolimalima no ka poʻe uku makahiki haʻahaʻa, e lilo ana kahi noho iā lākou ma mua o ka lilo ʻana aku o kahi noho i kekahi mau kānaka i lōʻihi loa ke kali ʻana ʻo ka loaʻa mai o ka ʻāina hoʻopulapula.

Ma ka pāʻani pōpō wāwae, ʻo Carly Ann Cormack o ka Punahou ka Mea Pāʻani ʻOi o ka Makahiki o nā kaikamāhine. He kūwaena ʻo Cormack a i ke kikina i hala iho nei, he 11 āna ʻai a he ʻeiwa hānai. A ʻo Cormack nō hoʻi ka Mea Pāʻani ʻOi o kēlā makahiki aku nei. A ʻo ka lua nō hoʻi ia o ka makahiki o kona kū ʻana, ʻo ia ke kāpena o ka hui pōpō wāwae. A wahi a ke kumu aʻo pōpō wāwae, a Shelley Izuno, ʻo ke ʻano alakaʻi ʻana o Cormack, ʻo ia ka mea nui loa.

A no nā keiki kāne, ʻo Parker Patterson o ke Kula Kiʻekiʻe o Mililani ka Mea Pāʻani ʻOi o ka Makahiki. He kūpale ʻo ia a ma ke kikina nei, he ʻeono āna ʻai a he ʻehā hānai. He mea hoʻopūʻiwa noʻonoʻo, ʻoiai, ma ka hoʻomaʻamaʻa ʻana ma mua o ka hele ʻana aku i Hawaiʻi mokupuni no kekahi hoʻokūkū ma mua o ka hoʻomaka ʻana o ke kikina, ua hemo ihola kona poʻohiwi. A hemo hou ihola ma ke kūʻē ʻana aku iā Kamapela ma ka puni inoa moho o ka Hoʻokūkū Inoa Moho o nā Kula Aupuni o Oʻahu. A hemo hou nō ma ke kūʻē ʻana aku iā King Kekaulike ma ka puni wae moho.

Eia mai kā kākou ʻōlelo noʻeau,

Ke ʻehuʻehu nei nā ʻale.

He ʻōlelo kēia no ke kanaka e hele ana a huhū.