09-06-17

E kāpae ʻia ana ka polokalamu e kākoʻo ana i ka poʻe i eʻe moku mai i ka wā e kamaliʻi ana.

ʻO ia aʻela kekahi poʻo nūhou o kēia lā, ka lā 6 o Kepakemapa, he Pōʻakolu. Aloha e nā makamaka. ʻO Ke Aolama kēia a penei ka nūhou.

ʻĀkoakoa aku nei kekahi mau kānaka he 60 a ʻoi ma ke Alanui ʻo Ala Moana ma kahi o ka Hale Pekelala i ka Pōʻalua nei no ke kūʻē ʻana aku i ka holo ʻana iho o ka manaʻo o ka Pelekikena Donald Trump, e hoʻopau loa aku i ka polokalamu e ʻae ana i ka noho paʻa ʻana o nā ʻōpiopio eʻe moku ma ʻAmelika Hui Pū ʻIa. ʻO ka inoa o ia polokalmu, ʻo ia hoʻi, ʻo Hoʻopaneʻe Kipaku i nā Eʻe Moku Hiki Mai i ka Wā Kamaliʻi. A e pau loa ia polokalamu a ʻaʻole e ʻae ʻia nā noi hou. Wahi a kekahi poʻe, ʻo kekahi pilikia, he mea ia e hoʻokaʻawale ana i nā ʻohana. He 21,000 mau eʻe moku i ʻae ʻole ʻia ma Hawaiʻi nei, a he 2,000 i hiki ke noi aku i ke komo i ia polokalamu. Ma ʻAmelika Hui Pū ʻIa a puni, he 800,000 mau kānaka ma ia polokalamu i kēia manawa.

Ke laha akula nā kiʻi o nā iʻa make a me nā manu make ma Lehua ma hope mai o ka lū ʻana iho i ka maunu lāʻau make e pau loa ai nā ʻiole o laila. Ua ʻike ʻia he 45 iʻa i make, a he 2 manu i make, ʻo ka ʻā ʻōpio paha ia. E lana wale ana nō lākou ma ka ʻaoʻao ʻākau o ia mokupuni. I ka lā 23 a me ka lā 30 i lū ʻia ai ka maunu ma Lehua, a he hoʻokahi hou lā ma kēia hope aku. A ʻo ka nui loa o ka maunu lāʻau make, he 11 kona. ʻO ka mea e kau ai ka weli, pehea ke kanaka ke ʻai aku i ka iʻa i ʻai i ia maunu?

Eia mai kā kākou ʻōlelo noʻeau

Ke mokomoko lā me ka makani.

He ʻōlelo kēia no ke kanaka waha paʻa.

09-05-17

Aia nō ke waiho wale akula ka mokulele i kuʻu ʻino ma kahi o Kunia.

ʻO ia aʻela kekahi poʻo nūhou o kēia lā, ka lā 5 o Kepakemapa, he Pōʻalua. Welina e nā makamaka heluhelu. ʻO Ke Aolama kēia a penei ka nūhou.

ʻAʻole e kiʻi ʻia aku nā ʻāpana o ka mokulele i kuʻu ʻino ma kahi o Kunia i ka lā 28 o ka mahina ʻo Iulai. Aia nō ke kiʻi ʻana a me ka ʻole paha i ka mea nona ka mokulele, iā Jahn Mueller. Akā, wahi āna, ʻaʻole ʻo ia e kiʻi aku. ʻO ka mokulele, aia nō ma ka ʻĀina Hoʻomalu Ululāʻau o Honouliuli. A hōʻike aʻela ke Keʻena ʻĀina a Waiwai Pili ʻĀina, ke keʻena nona ke kuleana ma ia ʻāina, ua holo ka manaʻo, ʻaʻole ka mokulele he mea e pōʻino ai ke ʻano o ka nohona a me nā mea e hoʻopuni ana. A no laila, ʻaʻole e kiʻi ʻia e ia keʻena. Akā, he manaʻo ko kekahi poʻe, he pono ke kiʻi ʻia ʻana o ka mokulele i mea e noiʻi ʻia ai, ʻoiai ʻo ka lua ia o ka mokulele o Mueller i kuʻu ʻino i loko o nā lā he 30 wale nō.

Lanakila hou aku nei nā Koa Ānuenue pōpō peku i ka Pōʻaono nei. ʻO Kalolaina Komohana ka hoa paio, a ʻo ka helu ʻai, he 41 i ka 18. ʻO kekahi kumu paha i lanakila ai ʻo Hawaiʻi, ʻo ia nā kaupaku ʻekolu i ka peku ʻaikolu. Na Meffy Koloamatangi ʻelua, a na Viane Moala kekahi. A ʻo kekahi o ia mau pōpō i kaupaku ʻia, lilo akula iā Trayvon Henderson o Hawaiʻi, a holo akula ʻo ia a loaʻa ka ʻaiholo. A ʻo ka holo ʻana o Diocemy Saint Juste, maikaʻi wale, paʻa ihola he 202 ʻīā ma nā holo ʻana he 25. Ma ka hapalua mua o ka hoʻokūkū, he 181 āna ʻīā. Mai like a like me ka nui loa o nā ʻīā holo nui loa o ka hapalua mua ma ka moʻolelo o ke Kulanui o Hawaiʻi, he ʻeiwa wale nō ʻīā i koe. Ua maikaʻi nō hoʻi ka holo ʻana o Ryan Tuiasoa, ʻaʻole i like me ko Saint Juste, akā, he ʻelua āna ʻaiholo.

Eia mai kā kākou ʻōlelo noʻeau,

Kūʻonoʻono ka lua o Kuhaimoana.

He ʻōlelo kēia no ke kanaka kūʻonoʻono.

09-01-17

Ua ʻoluʻolu ihola nā lumi papa he 1,000 ma Hawaiʻi nei a puni.

ʻO ia aʻela kekahi poʻo nūhou o kēia lā, ka lā mua o Kepakemapa, he Pōʻalima. Welina e nā hoa makamaka. ʻO Ke Aolama kēia a penei ka nūhou.

Ua kō ka ʻōlelo hoʻohiki a ke Kiaʻāina David Ige, ʻo ia hoʻi, ʻo ka hoʻokomo i ka mīkini hōʻolu ea i loko o nā lumi papa he 1,000. I nehinei nō i komo ai ka mīkini hōʻolu ea 1,000 i ka Hale M ma ke Kula Waena a Kiʻekiʻe o Nānākuli. ʻO nā lumi papa he 1,000, aia nō ma nā kula like ʻole a puni ka pae ʻāina ʻo Hawaiʻi. A ke hiki aku i ka hopena o ka mahina ʻo Kepakemapa, he 300 lumi papa hou e ʻoluʻolu i ka mīkini hōʻolu ea. ʻO ke kumu i hiki ai ke hana pēlā, ua hoʻokaʻawale ʻia he $100 miliona e ka ʻAha Kau Kānāwai o Hawaiʻi nei. ʻO kekahi pilikia i kupu mai, ʻaʻole i lawa ka papa hoʻokumu uila e holo ai ka mīkini hōʻolu ea hou ma ka hapanui o nā kahua kula, a ʻo kekahi, inā hoʻohana ʻia ka uila, he mea ia e piʻi ai ka pila hoʻohana uila. No laila, ʻo ka lā ka mea e holo ai nā mīkini hōʻolu ea i hoʻokomo ʻia.

Ua ʻāhaʻi akula nā Wāhine Ānuenue i ka lanakila i ka pō Pōʻahā nei, ka lā mua o ka Hoʻokūkū Panina Hui Mokulele Hawaiʻi. A ʻo ka lanakila mua ia o ke kumu aʻo hou ʻo Robyn Ah Mow-Santos. A he mea ia e kau ai ka haliʻa aloha i kona wā e pāʻani pōpō paʻipaʻi ana no ke Kulanui o Hawaiʻi, a he 21 makahiki i hala aku nei, ua koho ʻia ʻo Ah Mow-Santos, ʻo ia ka mea pāʻani ʻoi o ia hoʻokūkū hoʻokahi nō. Ua kāʻili koke aku nei ʻo Hawaiʻi i ka lanakila ma loko o nā pāʻani he ʻekolu wale nō, a pau akula ʻo Kalolaina Komohana. ʻO Norene Iosia, he 22 āna hānai, a 13 ʻali.

Eia mai kā kākou ʻōlelo noʻeau,

He nani wale nō ʻo Puna mai ʻō a ʻō

ʻO ia hoʻi, he maikaʻi nā mea a pau, ʻaʻohe mea e namunamu ai a e hoʻohalahala ai paha.

 

08-31-17

Ua holo mua ka Pila Kenekoa 4 a i ka Hale o nā Lunamakaʻāinana.

ʻO ia aʻela kekahi poʻo nūhou o kēia lā, ka lā 31 o ʻAukake, he Pōʻahā. Welina e nā hoa makamaka. ʻO Ke Aolama kēia a penei ka nūhou.

Ua ʻāpono ʻia aku nei ka Pila Kenekoa 4 ma ka ʻAha Kenekoa. I kēia manawa, e hele ana i mua o ka Hale o nā Lunamakaʻāinana. ʻO ia pila, e hoʻokaʻawale ana ia i haʻawina kālā no ka hoʻokō pono ʻana i ke ala e hiki aku ai ke kaʻa uila kau i ka lewa i ke Kikowaena Kūʻai ʻo Ala Moana. Ma ke koho pāloka ʻana, he 16 kenekoa i kākoʻo, a he 9 kenekoa i kūʻē. Ke lana nei ka manaʻo o ka meia, e pau i ka ʻāpono ʻia i ka hopena o ke kau kūikawā i kēia Pōʻalima.

A lū ʻia aku nei ka maunu nona ka lāʻau make ma ka mokupuni ʻo Lehua i mea e pau ai nā ʻiole ma laila. ʻO ka lua kēia o ka manawa i lū ʻia ai ka maunu. A hoʻokahi manawa i koe. Ke pau nā ʻiole o Lehua, e lilo ia i wahi hoʻomalu no ka manu ʻane nalowale. ʻO kekahi pilikia i hāpai ʻia e kekahi mau kupa o Kauaʻi, e hopohopo ana o pilikia ka iʻa a me nā wahi e pili ana i ia lāʻau make. Hōʻike aʻela ke aupuni mokuʻāina, ʻaʻole e nui loa ka pōʻino. A ʻo kekahi, e makaʻala ana nā luna nānā o ke aupuni mokuʻāina a me ke aupuni pekelala no ka pono o nā iʻa o ke kai a me nā manu.

Eia mai kā kākou ʻōlelo noʻeau,

Mōhala maikaʻi ke oho o ke kupukupu.

He ʻōlelo kēia no ke kanaka uʻi.

08-30-17

Kohu mea lā, nui ke kākoʻo o nā kenekoa o Hawaiʻi nei i ka Pila Kenekoa 4.

ʻO ia aʻela kekahi poʻo nūhou o kēia lā, ka lā 30 o ʻAukake, he Pōʻakolu. Aloha mai e nā makamaka. ʻO Ke Aolama kēia a penei ka nūhou.

Ua ʻāpono aku nei ke Keʻena Mālama Kai o ʻAmelika Hui Pū ʻIa i ka hoʻomaʻamaʻa kī pōkā pahū o ka Māhele Kaua Lewa ma ke kai o Kauaʻi no nā makahiki ʻehā e hiki mai ana. ʻO kahi noi hou ia, ua emi iho nā mea pahū e hoʻopahū ʻia ana a hoʻonui ʻia aʻela ka makaʻala ʻana i ka hopena o nā koholā a me nā naiʻa. Ua hoʻohalahala ʻo David Henkin, he loio no ka hui ʻo Earthjustice, i nā mea i hoʻolālā ʻia ma mua, me ka ʻī ʻana aku, ʻaʻole i lawa ka hana e mālama ʻia ai nā koholā a me nā naiʻa. Akā wahi a Henkin no ka mea hou i hoʻolālā ʻia, ua hoʻoikaika ka Māhele Kaua Lewa i ka makaʻala ʻana no ka pono o ia mau iʻa o ke kai, a he holo mua ia no ka maikaʻi. Hōʻike mai nei ka Māhele Kaua Lewa, he pono ke hoʻomaʻamaʻa kī pōkā pahū ma Kahi Kī Pōkā Pahū Pākīpika o Kauaʻi a hiki i ka lā 20 o ʻAukake o ka makahiki 2022 ma muli paha o ka hana hoʻoweliweli i kupu aʻe nei no Kina.

He nui ke kākoʻo o ka ʻAha Kenekoa o Hawaiʻi nei i ka Pila Kenekoa 4 e hoʻokaʻawale ana i haʻawina kālā no ke kaʻa uila kau i ka lewa. A i kēia lā ke koho hope loa ʻana o ka ʻAha Kenekoa ma mua o ka lele ʻana aku o ka Pila Kenekoa 4 a i ka Hale o nā Lunamakaʻāinana. Ma kekahi koho pāloka hea inoa o nehinei, kākoʻo he 17 mau kenekoa a ua kūʻē he ʻehiku. ʻO kekahi hana ke ʻāpono ʻia ka pila, e piʻi auaneʻi ka ʻauhau lumi hōkele ma Hawaiʻi a puni he hoʻokahi pākeneka no nā makahiki he 13 e hiki mai ana. A e hoʻomau ʻia ka hapa pākeneka ʻauhau helu waiwai o Oʻahu nei he ʻekolu hou makahiki.

Eia mai kā kākou ʻōlelo noʻeau,

Eia aʻe ka makani Kona.

ʻO ia hoʻi, he kanaka huhū ke hele maila.

08-29-17

Ke kāmau iki akula ke ola o ke kaʻa uila kau i ka lewa.

ʻO ia aʻela kekahi poʻo nūhou o kēia lā, ka lā 29 o Kepakemapa, he Pōʻalua. Welina e nā hoa makamaka. ʻO Ke Aolama kēia a penei ka nūhou.

Ua pakele māhunehune iho nei ke kaʻa uila kau i ka lewa. Ma ke Kōmike ʻImi Kālā o ka ʻAha Kenekoa, ua holo mua ka Bila Kenekoa 4, e hoʻokaʻawale ana i puʻu kālā no ka hoʻopau pono ʻana i ke ala o ke kaʻa uila kau i ka lewa a i ke Kikowaena ʻo Ala Moana. ʻO ka lōʻihi, he 20 mile. ʻO ka nui o ke kālā e hoʻokaʻawale ʻia ana ma nei pila, he $2.4 biliona. He 6 mau lālā i kākoʻo, a he 5 i kūʻē. I kēia lā, e koho pāloka ana ka ʻAha Kenekoa. Ua kohokoho ʻia, ʻo ka nui o ke kālā e pono ai ka hoʻopau pono ʻana i ka hana, he $10 biliona kālā a emi iki mai. ʻAneʻane e pālua ke kālā i kuhi ʻia i ka hopena o ka makahiki 2014, ʻo ia hoʻi, he $5.26 biliona. Ke hiki aku i ka lā 15 o Kepakemapa, he pono i ke kūlanakauhale ke hōʻike aku i ka Papa Halihali Pekelala i ka hana e hoʻoulu ʻia ai ke kālā e kō pono ai ke ala a i ke Kikowaena ʻo Ala Moana.

Eia mai kā kākou ʻōlelo noʻeau,

Ka lama kū o ka noʻeau.

He ʻōlelo kēia no ke kanaka keu a ke akamai.

08-28-17

Kū kilakila ana nā Kāne Ānuenue ma Makakukeka.

ʻO ia aʻela kekahi poʻo nūhou o kēia lā, ka lā 28 o Kepakemapa, he Pōʻakahi. Welina e nā hoa makamaka. ʻO Ke Aolama kēia a penei ka nūhou.

Loaʻa aku nei kekahi ʻōpiopio i hou ʻia he mau manawa ma Pūowaina i ka pō Pōʻaono nei. ʻAʻole i maopopo kona mea i hou ʻia ai. Ua lapaʻau ʻia ʻo ia e nā kahu lapaʻau ulia a lawe koke ʻia akula i ka haukapila ma ke kūlana kūpilikiʻi. Wahi a ka mākaʻi, na kekahi mau kānaka ʻelua paha i hou aku i ka ʻōpiopio. Aia nō ka mākaʻi ke noiʻi akula i ia hoʻāʻo pepehi kanaka.

Ua ʻāhaʻi aku nei nā Koa Ānuenue o Hawaiʻi i ka lanakila i ka Pōʻaono nei ma ke kūʻē ʻana aku i ke Kulanui o Makakukeka ma ka helu ʻai he 38 i ke 35. A ua hahana nō ka pāʻani ʻana. I nā kekona hope loa o ka hapahā ʻelua, paʻa ihola ka ʻai holo iā Makakukeka a paʻi aʻela a paʻi ma ka helu ʻai he 14. A i ka hoʻi ʻana i ka hapahā ʻekolu, i loko o nā minuke he 11, paʻa he ʻelua ʻai holo hou iā Makakukeka. Akā, ma hope mai o kēlā, ua hiu aʻela ʻo Hawaiʻi a loaʻa ka lei o ka lanakila. ʻO kahi pilikia o Hawaiʻi ma ka hapalua mua, ua hoʻopaʻi ʻia he ʻewalu manawa no nā ʻīā he 83.

Aloha nō nā Wāhine Ānuenue. Hāʻule iho nei lākou iā UCLA i ka pō Lāpule nei ma loko o nā pāʻani ʻelima. Akā, wahi a Robyn Ah Mow Santos, ke kumu aʻoʻao o Hawaiʻi, kohu mea lā, ua lanakila au, ua lanakila hoʻi ka hui. ʻO kāna kumu paha i ʻōlelo ai pēlā, i ka pō Pōʻaono nei, ua suipa lilo ʻia ʻo Hawaiʻi, ka hui helu 20 o ke ao nei e Kāna Kieko, ka hui helu 22. A i ka pō Pōʻalima nei, ua hāʻule iā Marquette i loko o nā pāʻani he ʻelima, a ʻo Marquette, ʻaʻole ia ʻo kekahi o nā hui ʻoi he 25 o ke ao nei. A ua ʻoi aku ka maikaʻi o ka pāʻani ʻana o Hawaiʻi ma ke kūʻē ʻana aku iā UCLA.

Eia mai kā kākou ʻōlelo noʻeau,

Mai ʻalaʻala paha i ka ua o ka Waʻahila.

ʻO ia hoʻi, ʻakahi nō a pakele aku i ka pilikia.