Author: keaolama

E kūpale hou ana paha nā Kula ʻo Kamehameha i ka lula hoʻokomo haumāna.

ʻO ia aʻela kekahi poʻo nūhou o kēia lā, ka lā 15 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Aia nō kekahi hui ke hoʻomākaukau aʻela i hoʻopiʻi e kūʻē ana i nā lula hoʻokomo haumāna o nā Kula ʻo Kamehameha. ʻO Students for Fair Admissions ka inoa o ia hui a ke ʻimi aʻela i mau kānaka nāna e hoʻopiʻi i ia lula. No laila, ʻaʻohe hoʻopiʻi e waiho nei i mua o ka ʻaha ʻōlelo i kēia manawa. Akā, ke ʻōlelo aʻela ka hui SFFA, he hana hoʻokae ʻili ia lula a he ʻaʻe kānāwai nō hoʻi. Hōʻike aʻela nā Kula ʻo Kamehameha, e hoʻomaopopo koke ʻia aku nā kānaka kākoʻo i nā Kula ʻo Kamehameha i ka hana e pono ai.

I kēlā Pōʻakolu aku nei, hopu ʻia aku nei ke kanaka i manaʻo ʻia nāna i limanui i kekahi ʻelemakule ma ka hale kūʻai ʻo Ross Dress for Less ma Waikīkī i ka lā mua o Kepakemapa. ʻO Helkena Carland ka inoa o ia kanaka limanui. A i kēlā Pōʻahā aku nei, hoʻopiʻi ʻia aku nei ʻo ia ala no ka hōʻeha ʻana. Ma ka lā mua o Kepakemapa, komo akula ʻo Manuel Lindayao i loko o ka lumi hoʻopau pilikia o Ross a hoʻomaka ihola e mimi ma ka mīana. A ʻo ia ka wā a Carland i kuʻi mai ai i kona maka. Ua hina ʻo Lindayao a noho ihola ʻo Carland ma kona umauma a kuʻi hou i ka maka o Lindayao a pau kona ʻike, pau hoʻi ka lohe. Ua pehu loa ka ʻaoʻao ʻākau o ka maka o Lindayao, ua haki kona ihu, e kahe ana ke koko, a ua ʻeha kona lolo.

Lanakila aku nei ʻo Hawaiʻi ma luna o Pokalana Mokuʻāina ma ka hoʻokūkū pōpō pekupeku o ka pō Pōʻaono nei ma ka helu ʻai he 23 i ka 3. ʻO Luke Weaver ka ʻalihikūlele a ʻelua ona manawa i nou ai iā Cam Barfield a loaʻa ka ʻai holo. A he ʻekolu ʻai peku a Kansei Matsuzawa.

Eia mai kā kākou ʻōlelo noʻeau,

E kāmau iho i ka hoe a pae aku i ke kula.

ʻO ia hoʻi, e noke aku i ka miki ʻana i ka poi a māʻona ka ʻōpū.

ʻAʻole hauʻoli iki kekahi poʻo i ke noi a ka hui Blue Hawaiian Helicopters.

ʻO ia aʻela kekahi poʻo nūhou o kēia lā, ka lā 12 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Waiho aku nei ka hui ʻo Blue Hawaiian Helicopters i noi i mua o ke Keʻena ʻOihana Mokulele Pekelala. A ʻo ke noi, ʻo ka lele ʻana o kona mau mokulele pinao he 700 kapuaʻi mai ka honua aʻe. ʻO ka lula i kēia manawa, he 1,500 kapuaʻi ke kiʻekiʻena haʻahaʻa. A nui aʻela ka poʻe kūʻēʻē. ʻO kekahi mau kumu o ke kūʻē ʻana, nui loa ke kanikani ʻana o nā mokulele pinao, a ke lele ma ke kiʻekiʻena haʻahaʻa loa, he ulia aku paha koe. Ua ʻōlelo ʻo Karl Schneiter o Paʻauilo, lele pinepine nā pailaka o ia hui ma lalo loa o ka 1,500 kapuaʻi ma kona ʻāina.

Kāʻili aku nei nā Wāhine Ānuenue i ka lanakila mai nā lima wīkani o nā wāhine o Pokalana ma loko o nā pāʻani ʻelima i ka Pōʻahā nei. ʻO Cha’lei Reid, he 18 āna hoʻopio a he 10 ʻali. A ʻo Stella Adeyemi, he 16 āna hoʻopio. A he 18 paku a Hawaiʻi, he 9 paku a Miliana Sylvester, a he 9 a Bri Gunderson, a he 11nō hoʻi āna hoʻopio. ʻO Adriana Arquette, he 43 āna hānai, he 14 ʻali, he 7 paku, a he 2 ʻeki. ʻO kekahi mea minamina, ma mua o ka hoʻomaka ʻana o ka hoʻokūkū o ka pō nei, ua kūkala ʻia aʻela, ʻaʻole e pāʻani hou ana ʻo Tali Hakas i kēia kikina ma muli o ka ʻeha o kona poʻohiwi ʻākau. Ua ʻeha ihola ma ke kūʻē ʻana iā Kāna Kieko i ka pāʻani mua o ka lā 31 o ʻAukake. A ʻaʻole ʻo ia i pāʻani hou ma hope mai.

Eia mai kā kākou ʻōlelo noʻeau,

ʻAʻohe kolopā nāna e une.

He ʻōlelo kēia no ke kanaka poʻo paʻakikī.

E hoʻomaka i kēia mahina aʻe ka hoʻokololo ʻia ʻana o nā limahana nāna i hoʻopunipuni no ka nui o nā ʻaila i hanini ma Kapūkakī.

ʻO ia aʻela kekahi poʻo nūhou o kēia lā, ka lā 9 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

E hoʻokolokolo ʻia ana nā limahana kīwila o ka ʻOihana Moku o ʻAmelika Hui pū ʻia i hoʻopiʻi ʻia no ka hoʻololiloli ʻana i nā palapala a me ka hoʻopunipuni ʻana i mea e hoʻonalonalo ai i ka hanini ʻana o ka ʻaila ma Kapūkakī. ʻO ka lā 6 o Mei o ka makahiki 2021 ka lā i hanini ai ka ʻaila, a i ka lā 27 o ʻOkakopa e kū ai ia mau limahana i mua o ka lunakānāwai. ʻO ka mua, ʻo John Floyd, no Mililani. A ʻo ka lua, ʻo Nelson Wu, no Waipahu. Ua hōʻike ʻo Floyd lāua ʻo Wu, he 1,618 wale nō kālani ʻaila i hanini. Akā, ʻo ka ʻoiaʻiʻo, he 20,000 kālani.

Ua loaʻa aku nei kekahi ʻiole manakuke ola ma ke Awa Kū Moku o Nāwiliwili ma Kauaʻi i kēlā Pōʻalima aku nei. Ua laha ka manakuke ma nā mokupuni ʻo Oʻahu, ʻo Maui, ʻo Molokaʻi a me Hawaiʻi. ʻAʻole naʻe pēlā ma Kauaʻi, a no laila, he alu like ka hana a kekahi mau keʻena aupuni i ʻole e hiki aku ka manakuke ma Kauaʻi, a i ʻole nō hoʻi e hoʻomaka ka noho ʻana o ia holoholona ma laila. Ke ʻike ʻia ka ʻiole manakuke ma Kauaʻi, e kāhea koke aku i ke Kōmike Lāhui Hōʻino o Kauaʻi ma ka helu 808-821-1490; ka helu wawe mea hoʻopilikia o ka mokuʻāina ma ka helu 808-643-PEST, a e hele aku paha i 643pest.org ma ka pūnaewele.

Kau aʻe nei kekahi mau Wāhine Ānuenue ʻekolu o ka hui pōpō paʻipaʻi ma ka hano hāweo o ka ʻAhahui Komohana Nui. ʻO Cha’lei Reid, he haumāna komo hou, ka mua. Ua koho ʻia ʻo Reid, ʻo ia ka Mea Pāʻani Kūlele ʻOi o ka Pule. A ʻo ia nō hoʻi ka mea pāʻani poʻokela o ka Hoʻokūkū Kono ʻo Outrigger o ka hopena pule nei. He 50 āna hoʻopio, a he 10 ʻeki. ʻO Bri Gunderson ka lua, ua koho ʻia ʻo ia ka Mea Pāʻani Kūpale ʻOi o ka Pule. Ma ka paku, ʻo ka ʻawelika, he 1.64 āna paku o ka pāʻani o ia hoʻokūkū. A ma ka hoʻopio, he 2.36 o ka pāʻani. A he ʻehiku āna ʻeki. ʻO ke kolu o ka Wahine, ʻo Adrianna Arquette. ʻO ia ka Mea Hānai ʻOi o ka Pule. He 10.27 āna hānai o ka pāʻani ma ia hoʻokūkū.

Eia mai kā kākou ʻōlelo noʻeau.

Lele i Kona; lele i Koʻolau.

He ʻōlelo kēia i ka wā e ʻimi i ke kanaka, akā, paʻakikī kona loaʻa ʻana mai.

He kaneka Kakōlika ʻōpiopio hou.

ʻO ia aʻela kekahi poʻo nūhou o kēia lā, ka lā 8 o Kepakemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

ʻAuhea ʻoukou, e nā kāhuli leo leʻa o Hawaiʻi nei, inā he manaʻo kou e lilo i moho no ka hoʻokūkū hīmeni ʻo American Idol, ʻo ka lā ʻapōpō nō, ka lā 9 o Kepakemapa, ka lā e hoehoene ai kou leo i mua o nā mea hoʻohua o American Idol, a e hoʻomaopopo koke ʻia ka holo mua a me ka ʻole paha. E mālama ʻia ana mai ka hola 7:00 o ke kakahiaka a i ke kau ʻana o ka lā i ka lolo. Akā, ʻōlelo ʻia, e hoʻokaʻawale ʻia ka lā holoʻokoʻa, ʻoiai, e kupu aʻe paha ka pilikia. Kau palena ʻia ka nui o nā makahiki e komo ai i nei hoʻokūkū, ʻo ia hoʻi, ua hānau ma waena o ka la 2 o Iune o ka makahiki 1996 a me ka lā 15 o Pepeluali o ka makahiki 2011. Ma ka Zoom e mālama ʻia ai. Inā ulu ka hoi, e hele aku i abc.com/shows/american-idol/auditions no ke kākau inoa ʻana.

Ma kekahi ʻaha a ka Pope Leo e alakaʻi ana, ua lilo aku nei kekahi ʻōpio i kaneka Kakōlika i ka Lāpule nei. ʻO Carlo Acutis kona inoa. He ʻĪkālia i hānau ma Pelekānia. He 15 ona makahiki i kona wā i make ai i ka lūkīmia a ʻo ka mea mua ia o ka hanauna milenio i lilo i kaneka Kakōlika. Ua aʻo mai ʻo Acutis i ka hua ʻālualua kamepiula a kūkulu aʻela i mau kahua pūnaewele i mea e hoʻolaha ai i kona manaʻoʻiʻo i ke Akua mana loa. Ua hiki aku ʻo Acutis i ke kūlana like me ka Makuahine Teresa a me Palakiko o Asisi.

ʻO nā Wāhine Ānuenue ke kū kilakila ana i ka hopena o ka Hoʻokūkū Kono ʻo Outrigger ma ka Lāpule nei. Suipa aku nei lākou iā Kāna Ioane. ʻO ka mea i pūʻiwa ai ka manaʻo, ma ia hoʻokūkū ʻana me Kāna Ioane, he 16 ʻeki a Hawaiʻi. ʻO ka nui o nā ʻeki o ka hoʻokūkū ma ka moʻolelo o ka polokalamu pōpō paʻipaʻi o nā Wāhine Ānuenue, he 17. I kēia Pōʻahā a me ka Pōʻalima, e kūʻē aku ana ʻo Hawaiʻi iā Pokalana ma ka Stan Sheriff. ʻO ka hoʻokūkū mua ia o ke kikina.

Eia mai kā kākou ʻōlelo noʻeau,

Eia aʻe ka makani Kona.

Hoʻopuka ʻia kēia ʻōlelo i ka wā e hiki mai ana ke kanaka huhū.

Pau ihola kekahi o nā heihei kaulana o Hawaiʻi nei.

ʻO ia aʻela kekahi poʻo nūhou o kēia lā, ka lā 5 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

ʻAʻole e holo hou ʻia ka Heihei Kaulana ʻo The Great Aloha Run. He kanahā kumamākahi makahiki i mālama ʻia ai. A ʻoiai, ua hoʻomaha loa ihola ʻo Carole Kai Onouye mai ka hana aku, holo ihola kona manaʻo, ua lawa. A no laila, ʻaʻole e mālama ʻia aku ana i kēia makahiki aʻe. Na Onouye lāua ʻo Kauka Jack Scaff i hoʻokumu i ia heihei, a ua lilo ia, ʻo ia kekahi o nā hana ʻālapa nui loa o Hawaiʻi nei, a pēlā pū me ka hoʻoulu kālā. A i ka makahiki 1993, ua hoʻokumu ʻia he heihei no nā keiki, ʻo ia hoʻi, The Keiki Great Aloha Run. A nui aʻela nā keiki i komo pū ma ia hana hoʻoikaika kino. ʻO ka nui o nā kānaka i komo i loko o The Great Aloha Run a i hiki aku i ka pahu hopu, he 750,000. A ʻo ka nui o ke kālā i hoʻoulu ʻia no nā hui hoʻoulu kaiāulu, he $20,000,000 a emi iho.

Mai lanakila nā Wāhine Ānuenue ma ka hoʻokūkū pōpō paʻipaʻi i ka pō Pōʻahā nei. Hāʻule pahū ihola naʻe ka manaʻo. Ua eo lākou iā Kāna Jose Mokuʻāina ma loko o nā pāʻani ʻelima. Na Kāna Jose i kāʻili i nā pāʻani mua ʻelua. Hiu aʻela naʻe nā Wāhine, a lilo ke eo iā lākou ma nā pāʻani ʻekolu me ʻehā. A ma ka lima o ka pāʻani, ʻeleu nā Wāhine a e ʻoi ana ma ka helu ʻai he 12 i ka 9. Akā, loaʻa mai iā Kāna Jose, he ʻehā ʻai a ʻaʻohe ʻū, lilo akula ke eo iā Kāna Jose, ma ka helu ʻai he 15 i ka 13. I kēia ahiahi, e kūʻē aku ana ʻo Hawaiʻi iā ʻŪkā.

Eia mai kā kākou ʻōlelo noʻeau,

ʻAi nō ka ʻiole a haʻalele i kona kūkae.

He ʻōlelo kēia no ke kanaka ʻawaʻawahua.

He mau kiʻi maka nunui ma ka ʻālapa kai hoʻokomo ʻia i loko o ka Hale Kaulana o Hawaiʻi Moku.

ʻO ia aʻela kekahi poʻo nūhou o kēia lā, ka lā 3 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia ka Makani Pāhili ʻo Kiko ke ikaika aʻela ma ka hikina o ka Moana Nui Ākea. I ke ahiahi o ka Pōʻalua nei, ʻo ka ikaika o ka makani, he 105 mile o ka hola. A e ikaika hou ana, akā, e nāwaliwali hou ana ke hiki aku i ka Pōʻalima paha a i ka Pōʻaono paha.

Kau aku nei kekahi mau ʻālapa ʻehā i ka hano hāweo, ʻo Joey Estrella, ʻo Charles “Sparky” Kawamoto, ʻo Sharon Peterson, a me Max Unger. Hoʻokomo ʻia aku nei lākou i loko o ka Hale Kaulana o Nā ʻĀlapa o ka Mokupuni ʻo Hawaiʻi. ʻO Estrella, ʻo ke kumu alakaʻi mua ia o ka hui pōpō hili o ke Kulanui o Hawaiʻi ma Hilo. He kanakolu kumamāhiku ona makahiki ma ia kūlana. He 657 ona lanakila, he 935 hāʻule a 5 paʻi a paʻi mai ka makahiki 1977 a i ka makahiki 2013. A ma loko o ia mau makahiki, he ʻekolu manawa i hiki aku ai ka hui pōpō hili i nā Hoʻokūkū Inoa Moho Honua o ka NAIA. Ua pāʻani ʻo Estrella i ka pōpō hīnaʻi ma Hilo a i ka pōpō hili ma Mānoa. A lawelawe aku nei nō hoʻi ʻo ia i ka hana ma loko o ke Keʻena ʻĀlapa o ke Kulanui o Hawaiʻi ma Hilo. ʻO Kawamoto, he kumu aʻo ʻOlumepika ʻo ia a nāna nō hoʻi i hoʻolālā i ka hana ʻia ʻana o ka Pūnāwai ʻAuʻau o Hoʻolulu Pāka. ʻO Peterson, he wahine ia i pāʻani ma nā hui pōpō paʻipaʻi ʻOlumepika mua ʻelua o ʻAmelika Hui Pū i nā makahiki 1964 a me 1968. A ma hope mai, ua lilo ʻo Peterson, ʻo ia ke kumu pōpō paʻipaʻi o nā wāhine o ke Kulanui o Hawaiʻi ma Hilo mai ka makahiki 1977 a i ka makahiki 2002. A lilo aku nei iā lākou nā inoa moho NAIA he ʻelima manawa a me nā inoa moho o ka Māhele II o ka AIAW. A mai ka makahiki 2003 a hiki i ka makahiki 2021, ʻo ke kumu alakaʻi ia ma Hawaiʻi Prep Academy, a mai ia makahiki a hiki i kēia lā, ma ke Kula ʻo Parker. ʻO Unger, ʻo ia ka huki pōpō o nā Seahawks a ua kāʻili lākou i ka lanakila ma ke Kahului Pōpō Peku XLVIII. Aia nō hoʻi ʻo ia ma ka hui mua o nā Loea i ka makahiki 2014, a he ʻekolu ona manawa i pāʻani ai ma ka Ipu Loea.

Eia mai kā kākou ʻōlelo noʻeau,

Ke lino aʻe nei ke kēhau o Waiʻōpua.

He ʻōlelo kēia no ke kanaka kūloaʻa.

ʻO ka hōʻikeʻike hana noʻeau, ʻo KULEANA, aia ma ke Kulanui Kaiāulu o nā Koʻolau.

ʻO ia aʻela kekahi poʻo nūhou o kēia lā, ka lā 29 o ʻAukake, he Pōʻalima. Welina e nā makamaka. ʻO Ke Aolama kēia a penei ka nūhou.

E wehe ‘ia ana ka hōʻikeʻike hana noʻeau i kapa ʻia ʻo KULEANA i kēia ʻauinalā, mai ka hola 4:00 a i ka hola 7:00. Aia ana ma ka Hale Hōʻikeʻike Hana Noʻeau ʻo ʻIolani i ke Kulanui Kaiāulu o nā Koʻolau mai kēia lā a i ka lā ʻumi kumamālua o Kēkēmapa. ʻO Kapulani Landgraf lāua ʻo April A.H. Drexel nā kahu mālama. Ma kēia hope aku, e hemo ana ia hale hōʻikeʻike mai ka hola 1:00 o ke awakea a i ka hola 5:00 mai ka Pōʻakahi a i ka Pōʻaono. ʻAʻole nō e hemo ma ka Lāpule a me nā lā nui. Aia ana kekahi mau pānela kūkākūkā. ʻO ka mua, aia nō i ka lā ʻapōpō, mai ka hola 3:00 a i ka hola 4:30. A ʻo nā hoa kūkā, ʻo ia ʻo Maile Andrade, ʻo Drew Kahuʻāina Broderick a me Kaili Chun. ʻO April Drexel ka luna hoʻomalu.

Ua pōmaikaʻi he 115 mau Hawaiʻi ma ka Pōʻaono i hala. Lilo aku nei iā lākou nā hale he 115 ma ka ʻāina hoʻopulapula ʻo Kaʻuluokahaʻi. Ua hoʻomaka ke kūkulu ʻana he ʻelua makahiki aku nei. Na ka hui ʻo Gentry Homes e kūkulu nei i nā hale. A ʻo ka nui o nā lumi moe o nā hale, mai ka ʻelua a ka ʻelima. A ʻo ke kumu kūʻai, mai ka $498,000 a i ka $691,000. ʻO ia mau kānaka i pōmaikaʻi, ua ʻāpono ʻē ʻia no ka ʻai ʻē e pono ai ke kūʻai ʻana mai i ka hale. E hoʻomaka ka noho ʻana ma ka hale ma nā mahina mua o kēia makahiki aʻe.

Eia mai kā kākou ‘ōlelo noʻeau,

Makaʻā hōlapu kāheka.

He ʻōlelo kēia no ke keiki makahai e hoʻoluhi ana i nā kānaka ma kahi e kokoke ana iā ia.

He palapala hoʻopiʻi i mua o ka Papa Mahi ʻAi a Pale Mea Hōʻino no ka pono o Molokaʻi nui a Hina.

ʻO ia aʻela ke poʻo nūhou o kēia lā, ka lā 27 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻO Molokaʻi wale nō ka mokupuni o Hawaiʻi nei i hiki ʻole ai ka puʻu laehaokela niu. A lana ka manaʻo, ʻaʻole e hiki aku i laila ma kēia hope aku. I ka mahina ʻo Iulai, waiho aku nei ʻo Kunani lāua ʻo Ipo Nihipali i palapala hoʻopiʻi i mua o ke Keʻena Mahi ʻAi a Pale Mea Hōʻino e noi ana i kānāwai e pāpā ana, ʻo nā mea kanu, ka lepo, ka pulupulu a pēlā aku, kahi maikaʻi hoʻi e noho ai ka puʻu laehaokela niu, ʻaʻole e halihali ʻia i Molokaʻi mai nā wahi ʻē aʻe o ka mokuʻāina ʻo Hawaiʻi. ʻO ka mea pōmaikaʻi, ma ka hālāwai o ka Pōʻalua nei, holo ihola ka manaʻo o ka Papa Mahi ʻAi a Pale Mea Hōʻino o Hawaiʻi, e holo mua ia kānāwai. ʻAʻole naʻe i koho pāloka. Akā, hōʻike aʻela ia papa e heluhelu ke kōmike aʻoaʻo o ia papa i ka palapala hoʻopiʻi a e mākaukau no ke kūkākūkā ma ka hālāwai o Kepakemapa.

I ka Pōʻalua nei, hopu aku nei ka ʻoihana mākaʻi o Honolulu he 14 mau kānaka, he mau kāne, a he mau wāhine nō hoʻi, e noho ana ma kahi hoʻomoana o ka poʻe kuewa ma ka lihi o ke Kahua Kolepa o ke Ala Wai. I ka lā ʻehā o ʻAukake, he ʻumi kumamālua lā i hala, kau aʻela nā hōʻailona e pāpā ana, ʻaʻole e komo wale a ʻaʻe kū paha ma ia wahi a aʻo ʻia ka poʻe e noho ana ma nā hale peʻa ma laila i ia manawa, e hiki koke mai ana ka wā hoʻokō.

Eia mai kā kākou ʻōlelo noʻeau,

A nui mai ke kai o Waialua, moe pupuʻu ʻo Kalena i HaleʻauʻAu.

He ʻōlelo kēia no ke kanaka puni i ka hoʻoipoipo me Niolopua me ka hana ʻole i ka hana.

Kāʻili ʻo Hawaiʻi i ka lanakila ma ka hoʻokūkū pōpō peku.

ʻO ia aʻela kekahi poʻo nūhou o kēia lā, ka lā 25 o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.

He polokalamu hou ke mālama ʻia aʻe nei ma Waikīkī. ʻAkahi nō a hoʻomaka i kēlā Pōʻakolu aku nei. ʻO ka Polokalamu ʻEmepakekoa Hoʻomalu ia. Hōʻike aʻe nei ʻo Solomon Kaimimoku, ka luna hoʻohana o ia polokalamu, he polokalamu hou ia e holo ana i nā hola a pau o kēlā lā, kēia lā a he ʻekolu māhele hana. Hoʻokahi ʻemepakekoa o ka māhele hana a me kona luna. He polokalamu kēia e hoʻokō kānāwai ai a e pale ai i ka hana kalaima ma Waikīkī. A he kākoʻo ia i ka ʻoihana mākaʻi. I ka makahiki 2024, holo akula ka ʻoihana mākaʻi i nā wahi he 2,381 manawa no ka lawelawe ʻana i ka hana ma ka ʻĀpana 6. A ʻo Waikīkī kekahi o ia ʻāpana.

ʻĀhaʻi aku nei ʻo Hawaiʻi i ka lanakila ma muli o ka wāwae pekupeku o Kansei Matsuzawa ma ka helu ʻai he 23 i ka 20 a Kanapola. Ma ka ʻehiku minuke o ka hapahā mua, e ʻoi aku ana ʻo Kanapola ma ka helu ʻai he 10 i ka hua kakā a Hawaiʻi. Hiu aʻela nā Ānuenue ma ia hope mai a i ka hopena o ka hapahā ʻelua, kū kilakila ana ʻo Hawaiʻi ma ka helu ʻai he 17 i ka 13. I ka hapahā hope, paʻa hou ka ʻai holo iā Kanapola, a he 20 i ka 17. A kohu mea lā, e holo hou ana paha a loaʻa ka ʻai hou, akā, ʻapo lilo aku nei ʻo Kilinahe Mendiola-Jensen, he ʻāwaʻa no Hawaiʻi, i ka pōpō. Holo i mua ʻo Hawaiʻi a loaʻa ka ʻai peku e paʻi ai a paʻi ka helu ʻai ma ka 20. A loaʻa koke ke kinipōpō iā Hawaiʻi ma muli o ke kūpaʻa o ka ʻaoʻao kūpale. A hana aku nei ʻo Hawaiʻi a koe ʻekolu kekona a peku hou ʻo Matsuzawa e lanakila ai ʻo Hawaiʻi.

Eia mai kā kākou ʻōlelo noʻeau,

Aia nō ke ea i ka puka ihu.

He pane kolohe kēia ke nīnau mai kekahi no kekahi hoa a ʻohana paha, ʻo ia hoʻi, pehea ʻo Mea? Aia nō ke ea i ka puka ihu.

Hoʻopiʻi ʻia aku kekahi kanaka no ke kiloi ʻakika ma luna o kekahi kanaka.

ʻO ia aʻela kekahi poʻo nūhou o kēia lā, ka lā 20 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

Mai hoʻokuʻu ʻia aku ke kanaka i manaʻo ʻia, nāna i kiloi i ka ʻakika ma luna o kekahi kanaka, ʻoiai, ua kokoke loa i ka wā kau palena no ka hoʻopiʻi ʻana. Akā, ua hoʻopiʻi ʻia nō ʻo Marquis Johnson i ka ʻauinalā o ka Pōʻalua nei no ka limanui ma ke kekelē ʻekahi. Ma kēlā Pōʻahā aku nei, hōʻike akula ka ʻoihana mākaʻi i ke kiʻi o Johnson i ka lehulehu me ka ʻōlelo pū ʻana, ʻo ia ka mea i hoʻohuoi ʻia no ia kalaima. A i ka Lāpule nei, hele aku nei ʻo Johnson i ke keʻena mākaʻi a hāʻawi pio akula. Ma ka hōʻike a ka ʻoihana mākaʻi, hele aku nei ʻo Johnson i mua o kekahi kanaka ma ka huina o ke Alanui Hōkele ʻĀkau a me Kamika, a nīnau akula i kekahi mau nīnau. I ia manawa, kiloi honua akula i ka ʻakika kūkaepele ma luna o ia kanaka. He limahana ia kanaka no ka hale ʻaina ʻo Livestock Tavern.

ʻAkahi nō a hemo ka moku ʻo Discovery ma Kewalo. Ua ili maila ua moku lā ma ka ʻāpapapa i ka lā 9 o kēia mahina nei. I ke kakahiaka o ka Pōʻaono i ili ai, a hai koke ka mea nona ka moku i hui nāna e hoʻohemo. ʻAʻohe naʻe wahi mea a hemo o ka moku. No laila, ua lawe ʻia i kahi ʻē ka ʻaila a me nā mea ʻino ʻē aʻe i ʻole e kulu i ke kai. A ma hope, alu like ke aupuni mokuʻāina a me ke Kiaʻi Kai o ʻAmelika Hui Pū ma ka hoʻohemo ʻana i ka moku. Aia nō nā kānaka luʻu o ke aupuni ke ʻimi akula i nā wahi o ka ʻāpapapa i pōʻino.

Eia mai kā kākou ʻōlelo noʻeau,

Aia i Kona i Honalo.

ʻOia hoʻi, ua nalowale loa.