Author: keaolama

E kāpae ka Hui Mokulele Hawaiʻi i kekahi mau ala e lele ai kona mau mokulele.

ʻO ia aʻela kekahi poʻo nūhou o kēia lā, ka lā 13 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

Kūkala aʻe nei ka Hui Mokulele Hawaiʻi, e kāpae ʻia aku kekahi mau ala lele ʻekolu. ʻO ia hoʻi, ʻo ka lele ʻana mai Honolulu a i Pokekona, i Incheon, Kōlea Hema, a i Fukuoka, Iāpana. Ma Nowemapa e kāpae ʻia aku ai. I kāpae ʻia aku ia mau ala lele no ke emi loa o nā kānaka lele. He 14 makahiki ka lōʻihi o ka lele ʻana i Incheon. A no Fukuoka a me Pokekona, i ka makahiki 2019 i hoʻomaka ai ka lele ʻana i ia mau wahi. ʻO nei kāpae ʻana, i mea ia e hoʻonui ai i ka lele ʻana mai Honolulu a i Kikanē, ʻAukekulelia; Papeete, Tahiti; ke Kūlanakauhale ʻĀnela a me Sitala, Kaleponi.

Ma hope o ka lanakila ʻana aku nei o Kāna Lui ma luna o Kahuku ma ka helu ʻai he 20 i ka hua kakā, ʻo ia mau nō kona kū ʻana ma ke kūlana helu ʻekahi o ka papa helu poʻokela a ka Hōkū-Avalataisa. ʻO ka makamua ia o ka hāʻule ʻana o Kahuku ma kona ʻāina me ka loaʻa ʻole o kahi ʻai. He ʻumi kumamālua pāloka helu ʻekahi, a lilo aku nei he ʻumi kumamākahi iā Kāna Lui. ʻO Kahuku ke kula kiʻekiʻe helu ʻelua. ʻO Kamehameha ka helu ʻekolu. ʻO Kamapela ka helu ʻehā. ʻO Mililani ka helu ʻelima. ʻO Kapolei ka helu ʻeono, ʻo Punahou ka helu ʻehiku, ʻo Farinatona ka helu ʻewalu, ʻo Kapaʻa ka helu ʻeiwa a ʻo Konawaena ka helu 10.

Eia mai kā kākou ʻōlelo noʻeau,

ʻĀhaʻi lā i ka pupuhi.

He ʻōlelo kēia no ka māmā o ka holo ʻana.

E kūkulu ʻia aʻe ana paha kekahi wahi hoʻolele kao halihali ukana ma ka mokupuni pālahalaha ʻo Kalama.

ʻO ia aʻela kekahi poʻo nūhou o kēia lā, ka lā 19 o Mei, he Pōʻalima. Welina e nā makamaka. ʻO Ke Aolama kēia a penei ka nūhou.

He manaʻo ko ke Keʻena Lewa Lilo Loa o ʻAmelika Hui Pū ʻIa, e lawelawe i ka hoʻolele ʻana i ke kao halihali ukana ma ka mokupuni pālahalaha ʻo Kalama, a i kapa ʻia nō hoʻi ʻo ka mokupuni pālahalaha ʻo Johnston. E kūʻē aku ana nā hui mālama ʻāina Hawaiʻi i ia hana. He puʻuhonua ia no nā manu kai a me nā ʻano iʻa like ʻole, he 300 a ʻoi. Ke lawelawe ʻia ka hoʻolele kao ma laila, e nui auaneʻi paha ka pōʻino o ia wahi, ʻo ia hoʻi, e ʻinoʻino ka ʻāina a me ke kai, e nui ka ʻōpala a me ke kani wawā, a e pahū hewa paha ke kao lele ma loko o ke kai hoʻomalu ʻia. He mau manawa i pahū ai ka moku lele lewa lilo loa o Elon Musk ma mua.

Ma muli o ka lanakila ʻana aku nei o nā Kāne Ānuenue ma luna o Kāna Kieko ma ka hoʻokūkū pōpō hili, e komo ana ʻo Hawaiʻi i loko o ka hoʻokūkū inoa moho o ka ʻAhahui Komohana Nui e mālama ʻia ana i kēia pule. ʻO ka helu ʻai, he 13 a Hawaiʻi i ka 2 a Kāna Kieko. Maikaʻi wale ka hana a Jordan Donahue, ka pahu pōkole o Hawaiʻi. ʻAkahi nō a loaʻa kāna pā holo puni i kēia kikina nei, a he ʻelua ma ia hoʻokūkū a ʻo kekahi o ia mau pā holo puni, he ʻekolu hoa pāʻani ma nā pahu. A ʻo kekahi hana a Donahue, ʻaihue aku nei i ka pahu eo ma ke komo ʻana ʻehiku. E kūʻē aku ana ʻo Hawaiʻi iā Kāna Palapala i kēia Pōʻakolu ma ka puni mua o ka Hoʻokūkū Inoa Moho o ka ʻAhahui Komohana Nui.

Eia mai kā kākou ʻōlelo noʻeau,

E kuahui like i ka hana.

ʻO ia hoʻi, e alu like ma ka hana.

Aia nō ka Pelekikena Trump ke hoʻopiʻi ʻia nei e nā mokuʻāina he iwakālua.

ʻO ia aʻela kekahi poʻo nūhou o kēia lā, ka lā 14 o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.

He iwakālua mau mokuʻāina e hoʻopiʻi aku nei i ka Pelekikena Donald Trump a me kona papa luna hoʻokele i mua o ka ʻaha hoʻokolokolo ʻāpana o ʻAmelika Hui Pū ʻia. A ʻo Hawaiʻi kekahi o nā mea hoʻopiʻi. ʻO ke kumu o ia hoʻopiʻi, ʻo ia ka ʻōlelo hoʻoweliweli ʻana o Trump mā, e ʻauʻa ʻia nā puʻu kālā, he mau biliona ka nui, a aia ka hoʻokuʻu ʻia o ia kālā a hoʻokō ʻia nā kauoha a Trump mā no ka poʻe kupa o nā ʻāina ʻē i pae malū ma ʻAmelika Hui Pū. ʻO nā mokuʻāina hoʻopiʻi ʻē aʻe, ʻo Kololako, ʻo Konekikuka, ʻo Kelawea, ʻo Maine, ʻo Makakukeka, ʻo Mikikana, ʻo Minekoka, ʻo Newaka, ʻo Nū Mekiko, ʻo Nū Ioka, ʻo ʻOlekona, ʻo Welemoneka, ʻo Wakinekona a me Wikonekina. ʻO ia mau mokuʻāina a pau, he Kemokalaka nā loio kuhina a me nā kiaʻāina, koe ʻo Newaka lāua ʻo Welemoneka, he Lepupalika nā kiaʻāina.

Ua hiki aku ʻo Thunderstorm Artis i nā kūlana ʻoi ʻelima o ka Hoʻokūkū Hīmeni ʻo American Idol. He puʻukani ʻo Artis, a he haku mele nō hoʻi, ʻaʻole naʻe ia ʻo kekahi o nā puʻukani ʻoi ʻekolu o ia hoʻokūkū. He iwakālua kumamākolu makahiki o ia hoʻokūkū, a he ʻelima wale nō moho i hānau a i hānai ʻia paha ma Hawaiʻi nei. ʻO Artis, ʻo Jordan Segundo, i ka makahiki 2003, ʻo Jasmine Trias a me Camile Velasco i ka makahiki 2004, a ʻo Iam Tongi i ka makahiki 2023, a ʻo Tongi ka inoa moho o ia makahiki.

Eia mai kā kākou ʻōlelo noʻeau,

Ka wai ʻeleʻele o ka poʻe ʻike.

ʻO ka ʻīnika ia o ka peni.

E loli paha ka inoa kūhelu o Hawaiʻi Moku.

ʻO ia aʻela kekahi poʻo nūhou o kēia lā, ka lā 12 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.

E hoʻololi ʻia iho ana paha ka inoa kūhelu o ka mokupuni nui o ko kākou pae ʻāina nei. ʻO ka Mokupuni ʻo Hawaiʻi ka inoa kūhelu i kēia manawa, akā, aia nō ke manaʻo ʻia nei, ʻo Hawaiʻi kona inoa hou. E koho pāloka ana ka Papa Hawaiʻi no nā Inoa ʻĀina i ka hālāwai ma ka mahina ʻo Iune. Na Kauka Kapāʻanaokalāokeola Oliveira, ka Hope Luna Kulanui no ka Holomua o Nā Haumāna o ke Kulanui o Hawaiʻi, i hāpai i ia manaʻo i ka mahina ʻo Malaki o ka makahiki 2024. Aia ʻo Oliveira ma ka Papa Hawaiʻi no nā Inoa ʻĀina. ʻO ke kumu i manaʻo ʻia ai e hoʻololi i ka inoa, ʻo Hawaiʻi Moku ka mokupuni hoʻokahi o nei pae ʻāina nona ka ʻōlelo “mokupuni ʻo” ma kona inoa kūhelu.

Hōʻole aku nei ka Papa ʻĀina a Waiwai Pili ʻĀina i ka Palapala Hōʻike Hopena Kaiapuni a ka Pūʻalikoa ʻAmelika no Pōhakuloa ma ka mokupuni ʻo Hawaiʻi. Ma muli o ka nui o nā hōʻike a nā kānaka i hiki kino aku i ka hālāwai, nā kānaka i hōʻike ma ka Zumalani, a me nā mea i kākau i hōʻike i holo ai ka manaʻo o ia papa pēlā. Akā, e holo mua ana ke kūkākūkā ʻana no ka hoʻolimalima ʻana o ka pūʻalikoa i ia ʻāina.

Eo iho nei nā Kāne Ānuenue iā UCLA ma ka hoʻokūkū pōpō paʻipaʻi i loko o nā pāʻani ʻekolu. A hāʻule pahū ihola ka manaʻo e lilo ʻo Hawaiʻi ka inoa moho. E kūʻē aku ana ʻo UCLA iā Kekaha Loa no ka inoa moho i kēia lā.

Eia mai kā kākou ʻōlelo noʻeau,

Aia i Kona i Honalo.

He ʻōlelo kēia no kekahi mea i nalowale.

Hoʻokuʻu ʻia aku nei ʻo Charmaine Benigo mai ka haukapila aku.

ʻO ia aʻela kekahi poʻo nūhou o kēia lā, ka lā 7 o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua hoʻokuʻu aku nei ke Kikowaena Lapaʻau ʻo Straub Benioff iā Charmaine Benigno. ʻO Benigno kekahi o nā kānaka i wela kūhohonu i ka pahū ʻana o nā ahikao ma Āliamanu i ka Lā Makahiki Hou. Ua wela he 80 pākeneka o kona kino a ʻoi aku. He ʻehā mahina o Benigno i noho ai ma ka haukapila. Ma waena o nā kānaka he 20 a ʻoi, ʻo ia ka mea hope loa i hoʻokuʻu ʻia. He wā polapola i koe, a he pono kona hoʻi ʻana i ka haukapila no ka pākuʻi ʻili ʻana.

Hōʻike aʻela ke Keʻena Hoʻonaʻauao o ʻAmelika Hui Pū ʻIa, ʻaʻole e helu ʻia nā Kānaka ʻŌiwi o Hawaiʻi, nā Kānaka ʻŌiwi o ʻAmelika a pēlā pū me ko ʻĀlaka ma ke ʻano he māhele no ka polokalamu ʻano like ʻole o ke kanaka, ke kaulike a me ka hoʻohui pū. A ʻaʻole nō hoʻi e helu ʻia he kumumanaʻo loiloi hoʻokae ʻili. Pēlā ka leka mai ke Keʻena Hoʻonaʻauao i ka ʻAhahui Hoʻonaʻauao Kanaka ʻŌiwi o ʻAmelika me ka ʻōlelo pū ʻana, he kūlana ko nā Kānaka ʻŌiwi i kū i ke kānāwai a me ka politika i ʻokoʻa loa.

E kūʻē aku ana ʻo Hawaiʻi iā Penn St. ma ka puni ʻelua o ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa o nā Kulanui o ʻAmelika. Aia ana i ke kakahiaka o ka Pōʻahā, ka lā ʻapōpō hoʻi. E ulele ana i ka hapalua hola ʻehiku o ke kakahiaka. A ma mua o ia hoʻokūkū, e kūʻē aku ana ʻo UCLA iā Belmont Abbey. A ʻo ka mea e kū kilakila ana ma hope, ʻo ia ke ʻāʻumeʻume ana me ka lanakila ma waena o Hawaiʻi me Penn St., i ka lā 10 no ka holo mua ʻana i ka puni inoa moho e mālama ʻia ana i ka lā ʻumi kumamālua.

ʻO kekahi mea pōmaikaʻi, ua hoʻomaʻamaʻa ʻo Kristian Titriyski me nā Ānuenue i ka Pōʻalua nei a kohu mea lā, e mākaukau ana ʻo ia no ka pāʻani ʻana i ka Pōʻahā.

Eia mai kā kākou ʻōlelo noʻeau,

Ua piha a hū ke kīʻaha.

ʻO ia hoʻi, ua ʻaikena kekahi kanaka i ka hana a kekahi.

ʻO nā ʻōpio wahine o ke Kula Kiʻekiʻe o Kamapela ke kū kilakila aʻela.

ʻO ia aʻela kekahi poʻo nūhou o kēia lā, ka lā 5 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Lāpule nei, kauoha aʻe nei ka Pelekikena Donald Trump i ke Keʻena Hale Paʻahao o ke aupuni pekelala e kūkulu hou i ka Hale Paʻahao o ʻAlakataraza ma ke Kai Kūʻono o Kapalakiko a e wehe hou ʻia i wahi e noho paʻahao ai ka poʻe hana kalaima weliweli loa. Ua pani loa ʻia ua hale paʻahao lā i ka makahiki 1963. A i kēia manawa, ʻo ia kekahi o nā wahi mākaʻikaʻi nui ʻia o Kapalakiko e ka poʻe malihini. Hōʻike ʻia ma ke kahua pūnaewele o ke Keʻena Hale Paʻahao, ʻo ke kumu i pani ʻia ai, ua pipiʻi loa ka lawelawe ʻana i ka hana ʻoiai he mokupuni ia. ʻO ka nui o ke kālā i hoʻolilo ʻia no ka lawelawe ʻana i ka hana, ua ʻaneʻane e pākolu i nā hale paʻahao pekelala ʻē aku a puni ʻo ʻAmelika Hui Pū ʻIa.

ʻO ka makahiki mua kēia o ka hoʻokūkū pōpō pekupeku lepa o nā ʻōpio wahine o nā kula kiʻekiʻe o Hawaiʻi nei. A na Kamapela i kāʻili i ka inoa moho mokuʻāina ma ka lanakila ʻana aku nei ma luna o Leilehua i ka pō Pōʻaono nei ma ka helu ʻai he 6 i ka hua kakā. ʻO Maya Gonsalves, ka ʻalihi kūlele o Kamapela, kai holo he 33 ʻīā a loaʻa ka ʻai holo ma ka hopena o ka hapahā mua. Ua holo ka manaʻo o Gonsalves a me kekahi o kona mau hoa pāʻani, e kāpae aku i ka hele ʻana i ka ʻaha hulahula o ka papa kiʻekiʻe loa, a e hoʻāʻo e hoʻokō i kekahi mea i hana ʻole ʻia ma nā kula kiʻekiʻe o Hawaiʻi nei.

Eia mai kā kākou ʻōlelo noʻeau,

He kanaka no kaulu hānai.

He ʻōlelo kēia no ke kāʻeʻaʻeʻa.

He mau iwi kanaka kai loaʻa mai.

ʻO ia aʻela kekahi poʻo nūhou o kēia lā, ka lā 2 o Mei, he Pōʻalima. Welina e nā makamaka. ʻO Ke Aolama kēia a penei ka nūhou.

ʻĀkoakoa aku nei kānaka a puni ʻo ʻAmelika Hui Pū ʻIa no ka pono o nā uniona a me ke kūʻē ʻana aku i nā hana like ʻole a ka Pelekikena Donald Trump. A ma Oʻahu nei, ua ʻākoakoa ma ke Kapikala, a laila, kaʻi like akula i ka Hale Pekelala. Kuhikuhi ana kekahi mau kānaka i ka hoʻolilo ʻana o ka pelekikena a me kāna poʻe hoʻokō i ke kōkua i ka poʻe ʻona biliona i mea nui loa a e noi ana nā kānaka iā Trump mā, e hoʻolilo i nā ʻohana hana, ʻo lākou nā mea nui, a e hoʻokaʻawale ʻia ka haʻawina kālā a lawa kūpono no nā polokalamu ola kino, kahi noho o ka lehulehu a me nā kula aupuni.

Hōʻike aʻela ka ʻOihana Mākaʻi o Honolulu, ua loaʻa aku nei i kekahi mau mākaʻi he mau iwi kanaka e waiho wale ana ma luna o kekahi kaʻa i kūkulu ʻia ma Varsity Place. E hoʻopaʻi ana kekahi mau mākaʻi i nā kaʻa i kūkulu hewa ʻia ma kahi o ke Kulanui o Hawaiʻi, a ʻo ia ka wā i loaʻa ai nā iwi i ia mau mākaʻi. Aia nō ka mākaʻi ke noiʻi aʻela.

Kau aku nei ʻo Lily Wahinekapu, he mea pāʻani pōpō hīnaʻi, ʻo Jordan Wedderburn, he mea pāʻani polo wai, a ʻo Brayden Schager, he mea pāʻani pōpō peku ma ka hano hāweo. Lilo aku nei ka Makana ʻo Jack Bonham iā lākou ʻekolu. ʻO ia ka makana hanohano loa e kau aku ma luna o ka ʻālapa o ke Keʻena Hana ʻĀlapa o ke Kulanui o Hawaiʻi. He makana ia no ka ʻālapa o ka papa e puka ana a i ʻoi kelakela aku kāna hana ʻālapa a me ka hana kulanui a he hana kaiāulu nō hoʻi kāna.

ʻO Charlie Wade kekahi i kau i ka hano. Ua koho ʻia ʻo ia, ʻo ia ke Kumu Aʻo Pōpō Paʻipaʻi ʻOi o Ka Makahiki o ka ʻAhahui Komohana Nui. A ʻo ke kolu ia o ka manawa i lilo ai ia hanohano iā ia ma loko o nā kikina ʻehā i kaʻa hope aku nei.

Eia mai kā kākou ʻōlelo noʻeau,

Hala nā lā ʻino o ka hoʻoilo.

ʻO ia hoʻi, ua pau ka wā pilikia.

He puʻukani no Hawaiʻi ke hele nei a kaulana.

ʻO ia aʻela kekahi poʻo nūhou o kēia lā, ka lā 30 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

E hoʻomaka nō ke kākau inoa ʻana no nā polokalamu kiaʻi ola no nā ʻōpiopio ma Oʻahu nei. Na ke Keʻena Palekana Kai o ke kūlanakauhale ka mālama ʻana i kekahi polokalamu manuahi ma ke kau wela. A i ka hola 8:00 o ke kakahiaka o ka lā mua o Mei e hoʻomaka ai ke kākau inoa ʻana ma ka pūnaewele. He hoʻokahi pule ka lōʻihi o ia polokalamu. A e holo mai ka hola 9:00 o ke kakahiaka a i ka hola 2:00 o ka ʻauinalā. ʻAe ʻia nā keiki mai ka ʻumi kumamākahi makahiki a i ka ʻumi kumamāhiku. A na ka ʻAhahui Kiaʻi Ola o ke Kapakai ʻĀkau ka mālama ʻana i kekahi a ma ke kau wela nō hoʻi. He $100 ka uku. No ke kākau inoa ʻana, e hele kino aku i ke kahua pāʻani pōpō wāwae o ka Pāka Kahakai o Paumalū i ka hola 9:00 o ke kakahiaka o ka lā 3 o Mei. He ʻehā pule o ia polokalamu. A hoʻokaʻawale ʻia nā keiki ma nā pae makahiki. No poʻe keiki he ʻewalu makahiki a i ka ʻumi kumamākahi, aia ana ma ke Kai Kūʻono o Waimea mai ka hola 8:00 o ke kakahiaka a i ka hola 12:00. A ma Iune ia. A ma Iulai, no nā ʻōpiopio he ʻumi kumamālua makahiki a i ka ʻumi kumamāhiku, aia ana ma ka Pāka Kahakai o ʻEhukai mai ka hola 8:00 o ke kakahiaka a i ka hola 1:00 o ke awakea.

He ʻumi wale nō moho koe o ka hoʻokūkū hīmeni ʻo American Idol. A ʻo Thunderstorm Artis kekahi o lākou. ʻO Artis, ua hānau ʻia a hānai ʻia nō hoʻi ma Oʻahu nei. I ka makahiki 2020, aia ʻo Artis ma ka hoʻokūkū hīmeni ʻo The Voice. A hiki akula nō ʻo ia a ka helu ʻekolu o ia hoʻokūkū. Ma Haleʻiwa kona hānai ʻia ʻana, akā, ma Nashville ʻo ia e noho akula i kēia manawa me kāna wahine a me nā keiki kāne ʻelua a lāua.

Eia mai kā kākou ʻōlelo noʻeau,

He heʻe ka iʻa, he iʻa kino palupalu.

He ʻōlelo kēia no ke kanaka nāwaliwali.

E hula leʻa ana a kulu ke aumoe.

ʻO ia aʻela kekahi poʻo nūhou o kēia lā, ka lā 27 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻO ke poʻokela o nā hālau a pau o nā ahiahi ʻelua o ka Hoʻokūkū Hula o ka Mōʻī ʻOliʻoli, ʻo nā wāhine o Hula Hālau ʻO Kamuela a me nā kumu hula Kunewa Mook lāua ʻo Kauʻionālani Kamanaʻo, he 1,216 a lākou ʻai. A he ʻekolu ʻai ma lalo mai, he 1,213 ʻai a nā wāhine o Hālau Ka Lei Mokihana o Leināʻala a me ke kumu hula Leināʻala Pavao Jardin. A ma ka helu ʻekolu, he 1,205 a lākou ʻai, ʻo nā kāne o Hālau Nā Kamalei o Līlīlehua me ke kula hula Robert Uluwehionāpuaikawēkiuokalani Cazimero. ʻO ka helu ʻekahi o nā wāhine o nā ahiahi ʻelua, ʻo Hula Hālau ʻO Kamuela. ʻO ka helu ʻelua, ʻo Hālau Ka Lei Mokihana o Leināʻala. A ʻo ka helu ʻekolu, ʻo Hālau Hula Ka Lehua Tuahine me kumu hula Kaʻilihiwa Vaughan-Darval. A eia mai nā ʻoi o nā kāne i ia mau ahiahi ʻelua. ʻO ka helu ʻekahi, ʻo ia nō ʻo Hālau Nā Kamalei O Līlīlehua. ʻO ka helu ʻelua, ʻo Hālau Hiʻiakaināmakalehua a me nā kumua hula Robert Keano Kaʻupu IV lāua ʻo Lono Padilla. A ʻo ka helu ʻekolu, ʻo Hālau Kekuaokalāʻauʻalaʻiliahi me nā kumu hula Haunani lāua ʻo ʻIliahi Paredes. Hoʻomaikaʻi i nā mea a pau i hula ma ka Mele Manaka. E ʻole ʻoukou, mau ai nā moʻolelo a me kahi hoʻokūkū hula pūlama ʻia.

Aia kekahi ʻōpiopio ke waiho akula ma ke kūlana kūpilikiʻi ma ka haukapila. I ke ahiahi Pōʻaono nei, ua hili ʻia kona poʻo i ka lāʻau hili e kekahi ʻōpiopio ma kahakai o ʻEwa. Ma hope, naholo aʻela ka mea nāna ka hili ʻana a me kona mau hoa aloha ma nā paikikala uila, nā mokokaikala uila a me nā mopeka. Aia ka ʻoihana mākaʻi ke noiʻi aʻela i ka hoʻāʻo pepehi kanaka ma ke kekelē ʻelua. Inā he ʻike paha kāu, e kāhea aku i ka helu 911.

Lilo aku nei ka Inoa Moho Pōpō Paʻipaʻi o ka ʻAhahui Komohana Nui i nā Kāne Ānuenue ma hope o ko lākou lanakila ʻana aku nei ma luna o Kekaha Loa i ka pō Pōʻaono nei. ʻO ka hā ia o ka inoa moho ʻAhahui Komohana Nui i lilo iā Hawaiʻi. Paʻa ihola ko lākou kūlana ma ka Hoʻokūkū Inoa Moho o ka ʻAhahui ʻĀlapa Kulanui o ʻAmelika. ʻO Kekaha Loa ka helu ʻekahi o ia hoʻokūkū, a ʻo Hawaiʻi ka helu ʻelua. Ma ka lā 8 o Mei, ka puni ʻelua o ka hoʻokūkū, e kūʻē aku ana ʻo Hawaiʻi i ka lanakila ma waena o Penn State a me Daemen.

Eia mai kā kākou ʻōlelo noʻeau,

Leʻaleʻa ka ʻōlelo i ka pohu aku o loko.

ʻO ia hoʻi, ʻono ke kolekole ʻana ke māʻona ka ʻōpū.

Maikaʻi Kauaʻi, hemolele i ka mālie.

ʻO ia aʻela kekahi poʻo nūhou o kēia lā, ka lā 25 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

Ua ʻolu nō ke kino i ka hula i ka pō Pōʻahā nei ma ka Hoʻokūkū Hula ʻo ka Mōʻī ʻOliʻoli. A na Jaedyn Janae Puahaulani Pavao o Hālau Ka Lei Mokihana o Leināʻala i ʻāhaʻi i ka lanakila, ʻo ia ka Miki Aloha Hula o kēia makahiki nei. A lilo nō hoʻi iā Pavao ka Makana ʻŌlelo Hawaiʻi. ʻO Tiare-Jennings Iwalani Kamaluoluokatuahine Rebecca Kaʻaumoana Vaughan-Darval o Hālau Hula Ka Lehua Tuahine ka helu ʻelua. Ma ka helu ʻekolu ʻo Emalia Pomaialoha KeleihanupīkakeiāPāʻoaehulaleʻaikalaninuiākea Dalire o Keolalaulani Hālau ʻŌlapa O Laka. Ma ka helu ʻehā ʻo Marina Laʻakea Choi o Hālau Hiʻiakaināmakalehua. A ʻo Chloe Makanaleiliʻiliʻi Rei Cummins o Hula Hālau ʻO Kamuela ka helu ʻelima.

Ma ka puni mua o ka Hoʻokūkū Inoa Moho Pōpō Paʻipaʻi o ka ʻAhahui Komohana Nui, lanakila aku nei ʻo Irivine ma luna o Notarika ma loko o nā pāʻani ʻelima i ka pō Pōʻahā nei, a no laila, ʻo Irvine ana ka hoa paio o Hawaiʻi i kēia ahiahi. Ma mua o ia hoʻokūkū, e kūʻē aku ana ʻo Kekaha Loa iā Kāna Kieko. ʻO nā lanakila ʻelua ke hui pū ma ka puni inoa moho i ke ahiahi Pōʻaono.

Ma ke koho mea pāʻani o ke Kuʻikahi Pōpeku Aupuni, ua koho ʻia ʻo Tetairoa McMillan ma ka puni mua. ʻO ia ka mea pāʻani ʻewalu i koho ʻia. Ua hānau ʻo McMillan ma Waimānalo a neʻe akula me kona ʻohana i Kaleponi i ka piha ʻana o nā makahiki he 12 iā ia. He ʻāʻapo ākea ʻo ia no ke Kulanui ʻo ʻAlikona.

Eia mai kā kākou ʻōlelo noʻeau,

Niniu Molokaʻi, poahi Lānaʻi.

He ʻōlelo kēia no ka hoʻolewa a me ka poahi ʻana o ke kīkala ma ka hula.