Author: keaolama

Ua hū aʻela ka pele ma kekahi mau wahi hou ma Puna.

ʻO ia aʻela kekahi poʻo nūhou o kēia lā, ka lā 4 o ka mahina ʻo Mei, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hū aʻela ka pele mai loko mai o kahi māwae he 492 kapuaʻi ka lōʻihi, a kahe ana ma ka ʻāina ʻo Leilani Estates no nā hola ʻelua. Ua kauoha ʻia nā kānaka e noho ana ma Leilani Estates a me Lanipuna Gardens, e haʻalele koke i ko lākou mau wahi noho. Ua pani ʻia ke Kula ʻĀmana ʻo Kua O Ka Lā, ke Kula Hana Noʻeau a Hana ʻImi Naʻauao o Hawaiʻi, ke Kula Haʻahaʻa o Keonepoko a me ke Kula Haʻahaʻa, Waena a Kiʻekiʻe o Pāhoa.

Ua mākaukau iho nei ka mana ʻōlelo Hawaiʻi o ke kiʻi ʻoniʻoni ʻo Moana, a e hōʻikeʻike mua ʻia ana i ka lā 10 o ka mahina ʻo Iune, ka Lā Kai Honua hoʻi. A aia ana ma ka Hōkele ʻo Ko ʻOlina. ʻO nā mea nona nā leo, he mau kānaka kaulana nō. ʻO ka leo o Moana, no ʻAuliʻi Cravalho ia. ʻO ko Maui, no Kaipulaumakaniolono nō. ʻO ko Sina, no Nicole Scherzinger. ʻO ko Aliʻi Tui, no Kelikokauaikekai Hoe. ʻO ko Puna Tala, no Kalehua Kawaʻa. A ʻo ko Tamatoa leo, no Kamakakēhau Fernandez. He hoʻolauleʻa ke mālama ʻia ana ma Ko ʻOlina ma ia lā, e hoʻomaka ana i ka hola 4:00 o ka ʻauinalā. A i ka napoʻo ʻana iho o ka lā, e hoʻomaka ai ke kiʻi ʻoniʻoni. He manuahi nō ke komo ʻana a e hoʻopaʻa ʻia ka likiki ma ka pūnaewele ma 2018worldoceansdaykoolina.eventbrite.com. ʻO ka ʻauhau kūkulu kaʻa, he $10.

E mālama ʻia ana kahi ʻaha mele o Bruno Mars ma ke Kahua Pāʻani ʻo Aloha ma ka mahina ʻo Nowemapa. Aia ana i ka lā 10. A e mālama ʻia paha ka lua o ka ʻaha mele ma ka lā 11. Aia nō ʻo ia ke kaʻapuni akula i ka honua ma ka Huakaʻi Honua ʻAha Mele 24K Magic.

Eia mai kā kākou ʻōlelo noʻeau,

Hānau ʻia i ka pō Lāʻau, lāʻau nā iwi, he koa.

He ʻōlelo kēia no ke kanaka wiwo ʻole.

Kipaku ʻia aku nā kānaka kuewa mai Kakaʻako aku.

ʻO ia aʻela kekahi poʻo nūhou o kēia lā, ka lā mua o Mei. Welina e nā makamaka. ʻO Ke Aolama kēia a penei ka nūhou.

Ua kipaku ʻia aku nā kānaka e hoʻomoana ana a e noho paʻa ana ma nā pīpā alanui a me nā pāka o Kakaʻako i ka pō Pōʻakahi nei. Ma mua, aia nā pīpā alanui ma lalo o ka malu o ke kūlanakauhale, a ʻo nā pāka, aia ma lalo o ka malu o ka mokuʻāina. A i ia wā, i ka wā e kipaku ʻia ai nā kānaka kuewa mai ka pīpā alanui aku, he hele wale aku lākou i ka pāka ma kahi e kokoke ana, ʻoiai no ka mokuʻāina ia. Akā, i kēia manawa, ua paʻa ihola kahi ʻaelike ma waena o ke kūlanakauhale a me ka mokuʻāina, a he hiki i ka mākaʻi ke kipaku i nā kānaka mai ka pāka mokuʻāina aku ma hope o ka hola 10:00 o ke aumoe, ka hola hoʻi e pani ʻia ai ka pāka.

Ua komo wale aku kahi piko pau ʻiole i loko o ka hale o ke Kamāliʻiwahine Abigail Kawānanakoa i ke kakahiaka Lāpule nei a ʻaihue ihola i kekahi pahu halihali ʻīlio Louis Vuitton a me kekahi mekala poni mōʻī a ka mōʻī o ke aupuni ʻo Tonga i hāʻawi aku ai iā Kawānanakoa. A he mau mea hou nō kai lawe ʻia, ʻaʻole naʻe i hōʻike ʻia mai. Wahi a ka wahine a Kawānanakoa, ʻo Veronica Gail Worth, aia nō lāua i ka hale i ka manawa i komo ai ua piko pau ʻiole lā. Ua hōʻoia ihola ka mākaʻi i ke kanaka i hoʻohuoi ʻia nāna ka ʻaihue ʻana ma ka wikiō i paʻi ʻia. A ke ʻimi ʻia akula ua kanaka lā.

Ua hoʻāʻo aku nei kekahi mau kānaka e ʻaihue i kekahi mīkini helu kālā o ke Kulanui Kaiāulu o ʻEwa. Aia nō ia mīkini ma loko o ka hale ʻaina ʻo Uluwehi. A wāwahi hale akula ia mau kānaka, he ʻelua paha a ʻoi, a komo akula i loko i ka hola 1:00 o ka wanaʻao o ka Pōʻakahi nei. Aia nō ka mākaʻi ke noiʻi akula.

Eia mai kā kākou ʻōlelo noʻeau,

Waiho kāhelahela ʻo Kalaupapa.

He ʻōlelo kēia no kahi mea ahuwale.

He mea kanu hou ana ko Hawaiʻi nei.

ʻO ia aʻela kekahi poʻo nūhou o kēia lā, ka lā 30 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

He manaʻo ko ke aupuni mokuʻāina ʻo Hawaiʻi, e lilo ke olonā paka lōlō ʻole i mea kanu nui no Hawaiʻi nei. A ʻo ia ke kumu i kūkala aʻe nei ka ʻOihana Mahiʻai o ke aupuni mokuʻāina, ʻo ka wā kēia e noi ʻia ai ka laikini mahi olonā paka lōlō ʻole. ʻO ka ʻauhau o ka laikini, he $500. A ʻo kekahi koina, he ʻāina mahiʻai. ʻO ka lōʻihi o ka laikini, he ʻelua makahiki. Na ke aupuni mokuʻāina e hoʻolako i nā ʻano like ʻole o nā ʻanoʻano olonā paka lōlō ʻole, a ʻo ka mua, ʻo ia ka mea i kapa ʻia ʻo Yuma. Hiki ke hana ʻia ke olonā paka lōlō ʻole i mea ʻai, i wahie, i makelia kūkulu, a i mea ulana ʻia nō hoʻi.

Kāʻili mai nei nā Wāhine Ānuenue o Hawaiʻi i ka inoa moho pōpō paʻipaʻi kahakai o ka ʻAhahui Komohana Nui mai nā lima wīkani mai o nā wāhine o Ke Kahaloa i ka Pōʻaono nei a komo ʻo Hawaiʻi i ka Hoʻokūkū Inoa Moho o ka ʻAhahui ʻĀlapa o nā Kulanui o ʻAmelika Hui Pū. Ma ka puni mua, e kūʻē aku ana ʻo Hawaiʻi iā Kalolaina Hema i kēia Pōʻalima.

A piha hauʻoli paha ka naʻau o kekahi mau mea pāʻani pōpō peku o ke Kulanui o Hawaiʻi ma mua. Ua paʻa ihola kahi palapala ʻaelike o Trayvon Henderson lāua ʻo Dejon Allen no ka pāʻani pōpō peku ʻana ma ke ʻano he loea. He ʻāwaʻa ke kūlana o Henderson, a ʻo Cincinati kāna hui e pāʻani ana. A ʻo Allen, he mau kūlana kāna o ka pāʻani ʻana, he kūlua a he kūkahi ʻākau. ʻO Kikako kāna hui o ka pāʻani ʻana.

Eia mai kā kākou ʻōlelo noʻeau,

E kuhi aku ana i Kuhiau.

ʻO ia hoʻi, he kuhi hewa kou.

E wāwahi ʻia aku paha ke pale kai o ke kūʻono ʻo Cromwell.

ʻO ia aʻela kekahi poʻo nūhou o kēia lā, ka lā 27 o ʻApelila, he Pōʻalima. Welina e nā makamaka. ʻO Ke Aolama kēia a penei a nūhou.

Noi aku nei ke Kahua Manawaleʻa ʻo Doris Duke no ka Hana Noʻeau Mohameka i palapala no ka wāwahi ʻana aku i ke pale kai o ke kūʻono ʻo Cromwell ma Kūpikipikiʻō a e waiho aku i nā pōhaku ma loko o ke kai i ʻole e lele aku ke kanaka i loko. Wahi a ke Kahua Manawaleʻa ʻo Doris Duke, ua loaʻa kekahi kanaka i ka maʻi lōlō ma ka lima a me ka wāwae ma hope o ka lele ʻana aku i loko o ia kūʻono, a ua loaʻa ʻelua mau kānaka i ka maʻi lōlō o ka wāwae. He kūʻē naʻe kekahi mau kānaka i ka wāwahi ʻia ʻana o ke pale kai o laila. ʻO ka Papa Kaiāulu o Waiʻalae me Kāhala kekahi, a pēlā pū me ke Kahua Manawaleʻa Historic Hawaiʻi. Aia ka mana ʻāpono i ka Papa ʻĀina a Waiwai Pili ʻĀina, a ke paipai aʻela ke Keʻena Hoʻomalu a ʻĀina Kapakai e ʻāpono ʻia aku ia noi. Ua kohokoho ʻia, e hoʻolilo ʻia he $2.5 miliona no ia papahana. E holo ka manaʻo o ka Papa ʻĀina a Waiwai Pili ʻĀina ma ka hālāwai o kēia lā.

ʻO ka nui paha o nā malihini mākaʻikaʻi e hele mai ana i Hawaiʻi nei i kēia makahiki nei, he 10,000,000 a ʻoi aku paha. ʻO ka nui o nā malihini mākaʻikaʻi o ka makahiki 2017, he 9.38 miliona. I ka mahina iho nei ʻo Malaki, he 903,550 mau malihini mākaʻikaʻi i hiki mai i Hawaiʻi nei. A ʻo ia ka nui loa o nā malihini mākaʻikaʻi o ka mahina hoʻokahi ma ka moʻolelo o kēia aupuni mokuʻāina nei. Ma ka mahina ʻo Iulai o ka makahiki 2017 ka nui loa ma mua, he 891,878. A ʻo kekahi kumu e ʻoi aku ai i ka 10 miliona i kēia makahiki, ʻakahi nō a kūkala aʻe ka Hui Mokulele ʻo Southwest i ka Pōʻahā nei, e hoʻomaka ka lele ʻana o kona mau mokulele i Honolulu, Līhuʻe, Kona a me Kahului i kēia makahiki.

Eia mai kā kākou ʻōlelo noʻeau,

ʻAʻohe ʻai pani ʻia o ka ʻamo.

ʻO ia hoʻi, he maikaʻi nā mea ʻai a pau. He pane kēia i ke kanaka waha nina.

ʻO ka Lā ʻŌhiʻa Lehua kēia.

ʻO ia aʻela kekahi poʻo nūhou o kēia lā, ka lā 25 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Kuahaua aʻela ke Kiaʻāina David Ige, ʻo ka Lā ʻŌhiʻa Lehua kēia ma Hawaiʻi nei. A e mālama ʻia ana he ʻaha kanu ʻōhiʻa lehua i kēia kakahiaka nei ma Hānaiakamālama, ka Hale Aliʻi Kauwela o ka Mōʻīwahine Emma. He mea nui ka ʻōhiʻa lehua ma ke kaiaola o Hawaiʻi nei, he hoʻomalu a he hānai kona i ka manu ʻōiwi, ka mea kolo a me ka holoholona lele a he hoʻokomo nō hoʻi i ka wai i loko o ka papa pōhaku wai. Ua hoʻokaʻawale ʻia he $2 miliona a emi mai o ke aupuni mokuʻāina no ka hoʻopau ʻana i ka laha ʻana o ka maʻi hoʻomake ʻōhiʻa. He 135,000 ʻeka ulu lāʻau i loaʻa i ua maʻi lā ma ka mokupuni ʻo Hawaiʻi. Ua ʻike ʻia nō ma Kalapana, Hilo, Volcano, Nāʻālehu, Kona a me Kohala. A hiki i kēia manawa, ʻaʻole i ʻike ʻia ma nā mokupuni ʻē aku.

Aia kahi Pila Hale 2748 i hoʻololi ʻia i mua o ka Hale piha a me ka ʻAha Kenekoa piha no ke koho pāloka ʻana. He pila ia e hoʻokaʻawale ana he $200 miliona no ke kūkulu ʻana i nā wahi noho nona ka uku hoʻolimalima haʻahaʻa kūpono. Ma o ia pila, e kūkulu ʻia he 25,000 wahi noho ke hiki aku i ka makahiki 2030 no nā ʻohana nona ka loaʻa makahiki he 140 pākeneka o ka loaʻa makahiki kūwaena o ia wahi a emi mai paha. A no ia puʻu kālā he $200 miliona, e kūkulu ʻia he 1,600 wahi noho hoʻolimalima ʻia ma ka uku haʻahaʻa kūpono.

Eia mai kā kākou ʻōlelo noʻeau,

Ka iwi ʻopihi o ka ʻāina ʻē.

ʻO ia hoʻi, ʻo ke kālā.

ʻAʻole e pāʻani ana ʻo Hawaiʻi ma ka Hoʻokūkū Inoa Moho Pōpō Paʻipaʻi.

ʻO ia aʻela kekahi poʻo nūhou o kēia lā, ka lā 23 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

E komo ana ʻo Max Holloway i loko o ka pahu mokomoko ma ka UFC 226 i ka lā 7 o Iulai ma Las Vegas. ʻO Holloway ka inoa moho māhele 145 paona a ʻo Brian Ortega ke kū ana he alo a he alo me ia no ka inoa moho. A e hakakā ana kekahi keiki o Hawaiʻi nei ma ia ahiahi hoʻokahi nō, ʻo ia ʻo Yancy Medeiros o Mākaha, a ʻo kona hoa paio, ʻo ia ʻo Mike Perry.

Aloha nō. ʻAʻole i koho ʻia nā Kāne Ānuenue o Hawaiʻi i hui no ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa o nā Kulanui o ʻAmelika Hui Pū ʻIa. Ua eo iho nei lākou iā Ke Kahaloa ma ka puni inoa moho o ka ʻAhahui Komohana Nui i ka Pōʻaono nei. ʻO ka lanakila o ia puni, he komo wale i loko o ka hoʻokūkū nui. A ʻoiai, ua hāʻule ʻo Hawaiʻi, ʻo ia kekahi o nā hui ʻoi e koho ʻia no kekahi o nā hakahaka e waiho wale ana. ʻAʻole naʻe i lilo aku i nā Ānuenue. Ua lilo akula iā UC Irvine. ʻO ka mea ʻāpiki, he ʻekolu manawa i hoʻokūkū ai lāua, a he ʻelua manawa i lilo aku ai ke eo iā Hawaiʻi.

A ma ke kinipōpō pekupeku, hōʻike aʻela ʻo Taulia Tagovailoa i ka paʻa o kona manaʻo e pāʻani pōpō pekupeku no ke Kulanui o Alabama. ʻO Taulia, he ʻalihikūlele ʻo ia no Kapolei ma mua, a i ka neʻe ʻana o kona ʻohana i Alabama, hoʻomaka ihola ʻo ia i ka pāʻani ʻana ma ke Kula Kiʻekiʻe ʻo Thompson ma Alabaster. ʻO Taulia ke kaikaina o Tua Tagovailoa, ka ʻalihikūlele i hoʻolalelale aku iā Alabama a lanakila ai ma luna o Keokia, a paʻa ihola ka inoa moho o ʻAmelika Hui Pū ʻIa.

Eia mai kā kākou ʻōlelo noʻeau,

Hāʻule i ka hope waʻa.

He ʻōlelo kēia no ke kanaka i hiki lohi mai. A ʻo ka mea hope loa paha i hiki mai.

He ahi ke hōlapu ana ma ke Kulanui o Hawaiʻi ma Mānoa.

ʻO ia aʻela kekahi poʻo nūhou o kēia lā, ka lā 20 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

E lapalapa ana ke ahi ma ke kahua o lalo o ke Kulanui o Hawaiʻi ma Mānoa i ke ahiahi o ka Pōʻahā nei. Aia nō ma ke kahua liʻiliʻi o ka hui uila ma ke ala ʻo Kalele ma waho o ke Kahua Pāʻani ʻo Les Murakami. Ua ʻōlelo kekahi mau kānaka, ua lohe ʻia ka pahū ʻana ma mua o ka ʻā ʻana o ke ahi. ʻAʻohe ola i pōʻino. Kinai ʻia iho nei ke ahi e ka poʻe kinai ahi, akā, ma muli o ia ahi, ua pio loa ihola ke kukui ma nā hale he nui ma Lēʻahi, Kapahulu, Pūowaina, Makiki, Mānoa, Nuʻuanu a me Kāna Lui. A holo hou ana ka uila ma ia mau wahi a pau i ka hola 8:40 o ia pō, koe naʻe kekahi mau wahi o ke Kulanui o Hawaiʻi ma Mānoa. A i kēia manawa, aia nō ka uila e holo hou ana ma ke Kulanui o Hawaiʻi a puni. A e mālama ʻia ana nā papa e like me ka mea mau.

 

ʻO nā kāne pōpō paʻipaʻi o ka Punahou ka ʻoi ma ka ʻAhahui Kula Uku o Honolulu. A ʻo ka 15 ia o ka inoa moho o ka ʻAhahui Kula Uku o Honolulu i lilo iā lākou ma nā makahiki he 15 i hala iho nei. Ua suipa lilo akula ʻo Punahou iā ʻIolani, he 25 i ka 17, he 25 i ka 22, a he 25 i ka 11. E hoʻomaka ana ka Hoʻokūkū Inoa Moho o ka Mokuʻāina i ka lā 30 o ʻApelila. ʻO ka Punahou, ua lilo akula iā ia he 11 inoa moho mokuʻāina Māhele I ma nā makahiki he 13 i kaʻa hope aku nei.

Eia mai kā kākou ʻōlelo noʻeau,

Ma Koʻolau e ʻōlelo ai, he lohe ma Kona.

ʻO ia hoʻi, ʻo ka laha koke ʻana aʻe o kahi ʻōlelo a puni ka ʻāina.

Ua hoʻopiha ʻia ka mākālua ma ka Hale o nā Lunamakaʻāinana.

ʻO ia aʻela kekahi poʻo nūhou o kēia lā, ka lā 18 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

He manaʻo ko Dennis “Bumpy” Kanahele, e lilo ke kahua kolepa ʻo Olomana i wahi no ka poʻe hale ʻole o Waimānalo e noho ai. Ua pani kū ʻia iho nei ua kahua kolepa nei i ka Pōʻalima i hala ma muli o ka hiki ʻole ke uku aku i nā pila a me nā limahana. No ke aupuni mokuʻāina ia ʻāpana ʻāina, a ua hoʻolimalima ʻia i ka mea nona ke kahua kolepa. ʻO ka manaʻo o Kanahele, e hana ʻia he kūlanakauhale ma o ka hoʻohana ʻana i nā mea hou o ke ao nei. ʻO kekahi, he mea ia e māhuahua ai nā kūlana hana.

He ʻekolu moho hope loa no ke pani ʻana aku i ka mākālua ma ka Hale o nā Lunamakaʻāinana e waiho wale ana ma muli o ka haʻalele ʻana o Joseph Souki. ʻO ia ʻo Troy Hashimoto, ʻo Dain Kane, a me Joseph Wildman. A ʻo Hashimoto kai hoʻokohu ʻia e ke Kiaʻāina David Ige. He hope luna hoʻokō ʻo ia no ka Luna ʻAha Kūkā o Maui, ʻo Mike White, mai ka makahiki 2011. A mai ka makahiki 2013 a i ka makahiki 2017, ʻo Hashimoto ka luna hoʻomalu o ka ʻAoʻao Kemokalaka o ke Kalana ʻo Maui. E lawelawe ana ʻo ia i ka hana a pau ke koena o ka noho ʻana o Souki. A holo ihola kona manaʻo, e alualu i ia kūlana like ma ke koho wae moho e hiki mai ana.

Hoʻāʻo akula kekahi kanaka e ʻaihue kanaka aku i kekahi ʻōpiopio i kona wā e hele ana i ke Kula Kiʻekiʻe ʻo Kapolei. He 17 makahiki o ka ʻōpiopio, a e hele ana ʻo ia ma ke alanui ʻo Kaiau, a i ia manawa, lālau ʻia akula ʻo ia e kekahi kanaka. E ʻāʻumeʻume aku ana lāua a hemo akula kahi ʻōpiopio a holo akula. ʻO ke kanaka ʻaihue, he 30 a 40 paha ona makahiki. He ʻili hāuli kona. He lauoho ʻeleʻele pōkole, a he 200 ona paona, a he 5 ona kapuaʻi, 9 ʻīniha. A e komo ana ʻo ia i ka pālule ʻeleʻele, ua pukapuka, a me ka lole wāwae ʻekekeʻi ʻāhina. Aia nō ka mākaʻi ke ʻimi akula i ua wahi kanaka lā.

Eia mai kā kākou ʻōlelo noʻeau,

Puʻuwai hao kila.

ʻO ia hoʻi, he wiwo ʻole.

E makaʻala e ka poʻe holo paikikala Biki.

ʻO ia aʻela kekahi poʻo nūhou o kēia lā, ka lā 17 o ʻApelila, he Pōʻalua. Welina e nā makamaka. ʻO Ke Aolama kēia a penei ka nūhou.

ʻAuhea ʻoukou e ka poʻe holo paikikala Biki. I ka wā e hoʻihoʻi ʻia ai ka paikikala Biki, e kau pono ka paikikala ma kona wahi kūkulu o hoʻouku ʻia ʻoe he $1,200. Inā ʻaʻole kau pono ka paikikala, ʻaʻole nō e paʻa i ka laka ʻia, a he hiki ke lawe wale ʻia aku. Ua hoʻāʻo ihola ʻo BikeShare Hawaiʻi e hoʻouku i nā kānaka he 107 he $1,200, akā, ʻo ka nui o nā kānaka i uku i ia puʻu kālā, he 10 wale nō a emi mai. ʻO ke kumu i emi mai ka poʻe i uku, ma hope iki mai, ua hoʻihoʻi ʻia aku ka paikikala i manaʻo ʻia, ua ʻaihue ʻia.

Aia nō nā luna kūlanakauhale ke kūkākūkā akula no ka hiki a me ka ʻole paha o ka pohō i ʻike ʻia ma nā wahi aupuni o Honolulu Hikina a me nā Koʻolau o Oʻahu nei a i ka $3.5 miliona. Inā e hiki aku i laila, e lilo mai kahi puʻu kālā pekelala no nā wahi i loaʻa i ka ulia pōpilikia.

Ua kūkala ʻia aʻela nā hui o nā mea pāʻani pōpō paʻipaʻi ʻoi o ka ʻAhahui Komohana Nui i ka Pōʻakahi nei. A he ʻehā mea pāʻani o Hawaiʻi i lilo i mea pāʻani no ka hui ʻekahi, ʻo ia ʻo Tui Tuileta, he libero; ʻo Joe Worsley, he mea hānai; ʻo Stijn van Tilburg, he mea hili; a me Patrick Gasman, he kūwaena. A ʻo Gage Worsley, ua koho ʻia ʻo ia i mea pāʻani no ka hui haumāna komo hou o ka ʻAhahui Komohana Nui. ʻO ka lua kēia o ka manawa i koho ʻia ai ʻo Tilburg ma ka hui ʻekahi.

Eia mai kā kākou ʻōlelo noʻeau,

Ka lālā kaukonakona haki ʻole i ka pā a ka makani Kona.

He ʻōlelo kēia no ke kanaka ikaika.

ʻAʻole o kana mai ka ua o Kauaʻi.

ʻO ia aʻela kekahi poʻo nūhou o kēia lā, ka lā 16 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

Luʻuluʻu ihola ʻo Hanalei i ka ua nui a hoʻopuka ai ke Kiaʻāina David Ige i ka palapala kūkala ulia pōpilikia no Kauaʻi. Ua hālana ʻia ka ʻāina e ka wai a hāneʻe ihola ka mauna. ʻO kahi nui loa o ka pilikia, mai Hanalei a i Hāʻena. Ua pani ʻia a paʻa kahi māhele o ke alaloa ʻo Kūhiō, mai Waikoko a i Wainiha, ma muli o ka hāneʻe ʻana o ka lepo. A pēlā pū nō mai Princeville a i ka Uapo o Hanalei ma muli o ka hāneʻe ʻana a me ka wai hālana nui. A ua pani ʻia nō hoʻi a paʻa kahi o ia alaloa ma ka Uapo o Kalihiwai. Ua wehe ʻia kekahi mau wahi hoʻomalu ma ke Kula Waena o Kapaʻa, ka ʻEkalesia o ka Pākīpika ma Princeville a me ke Kula Haʻahaʻa o Hanalei.

Ua lele aʻela ka hauli o Ke Kahaloa i nā Koa Ānuenue o Hawaiʻi. ʻO Ke Kahaloa ka hui helu ʻekahi o ke ao nei a ʻo Hawaiʻi ka hui helu ʻeono. Ua hahana nō ka pāʻani ʻana. Ma ka pāʻani ʻelima, ua paʻi a paʻi, he 10 ʻai a Hawaiʻi a he 10 ʻai a Ke Kahaloa. A hiu aʻela nā Ānuenue, a hoʻokahi hoʻopio a Brett Rosenmeier, he ʻelua hoʻopio a Rado Parapunov a he ʻeki kā Gage Worsley. A ma hope iki mai, lilo akula ke eo iā Hawaiʻi ma ka hoʻopio hou a Parapunov i sila paʻa ʻia ai ka lanakila. Ma muli o ia lanakila ʻana aku o Hawaiʻi, ʻaʻole ʻo ia e pāʻani ana ma ka puni mua o ka hoʻokūkū inoa moho o ka ʻAhahui Komohana Nui e hoʻoomaka aʻe ana i kēia pule aʻe. I kēia Pōʻalima ma ka puni ʻelua, e kūʻē aku ana nā Ānuenue i ka lanakila o ka hoʻokūkū ʻana o UC Irvine me UC Kāna Kieko.

Eia mai kā kākou ʻōlelo noʻeau,

ʻĀhaʻi akula i ka welowelo.

ʻO ia hoʻi, ua lanakila.