Author: keaolama

Puka aʻela kahi mana o ka Pila Hale 1585 ma ka ʻAha Kenekoa.

ʻO ia aʻela kekahi poʻo nūhou o kēia lā, ka lā 13 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

ʻĀpono ʻia aku nei ka Pila Hale 1585 (SD3) e ka ʻAha Kenekoa. ʻO ia ka pila e pāpā ana, aia ke kūkulu ʻana ma luna o Mauna Kea a hoʻokō ʻia kekahi mau koina. He 15 kenekoa i ʻāpono, a he 8 i kūʻē. ʻAʻole naʻe paha e puka ma ka Hale o nā Lunamakaʻāinana, no ka mea, e hopohopo nā lunamakaʻāinana o ʻākeʻakeʻa ʻia auaneʻi ke kūkulu ʻia ʻana o ka ʻOhe Nānā Kanakolu Mika ma Mauna Kea, ʻoiai, i kēia manawa, he ʻokoʻa ka Pila Hale 1583 a ʻokoʻa ka Pila Hila 1585 i ʻāpono ʻia e ka ʻAha Kenekoa. A no laila, he pono nā ʻaoʻao a ʻelua ke hui pū a kūkākūkā no ka hana e pono ai ia pila. A i kēia manawa ʻānō, aia nō kekahi mau hihia ʻelua, he mau hoʻopiʻi hou hoʻi, ma ka ʻAha Hoʻokolokolo Kiʻekiʻe no ia ʻohe nānā. ʻO kekahi, no ka hoʻolimalima hou ʻana, a ʻo kekahi no ka palapala ʻae kūkulu ma ka ʻāina hoʻomalu ʻia. I kēia wā a ka ʻAha e kūkākūkā ana, aia ka papa ʻOhe Nānā Kanakolu Mika ke ʻimi akula i wahi hou e kūkulu ʻia ai ka ʻohe nānā ma ka ʻĀina Manu Mele, a e kūkala ʻia ana paha ke kūlana o ia papahana i kēia lā.

I ka lā mua o ʻApelila, hoʻomaka ihola ke kūlanakauhale e pani a paʻa nā ʻīpuka a me nā lumi hoʻopau pilikia o nā pāka kūlanakauhale he 25 o Oʻahu nei. Hōʻike aʻe nei ka Meia Kirk Caldwell, i hana ʻo ia pēlā ma muli o ka luku wale ʻia o nā pāka kūlanakauhale he 600 manawa a ʻoi ma nā makahiki ʻekolu i kaʻa hope aku nei. He ʻekolu mahina o kēia hana, a inā he holo pono, e pani ʻia ana a paʻa nā pāka a pau o Oʻahu nei ke hiki aku i ka hopena o kēia makahiki.

Eia mai kā kākou ʻōlelo noʻeau,

I hea nō ka lima a ʻau mai?

ʻO ia hoʻi, mai namunamu, e hoʻohana ʻoe i kou mau lima e hoʻokō ai i ka hana.

Loaʻa maila ka pū i make ai ka paʻa male ma Mauna Huʻihʻuʻi.

ʻO ia ʻela kekahi poʻo nūhou o kēia lā, ka lā 11 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua loaʻa nō kahi pū, he Galaka 9-milimika, ma kahi e waiho ana nā kino kupapaʻu o Christopher Kapua-Allison lāua ʻo Jolene-Rae Kapua-Allison. He mākaʻi ʻo Christopher, a ʻo ka pū hana ia āna i hāʻawi ʻia e ka ʻOihana Mākaʻi o ke Kalana ʻo Hawaiʻi. Hōʻike aʻela ke Kāpena Mākaʻi Randall Medeiros, kohu mea lā, ʻo ia ka mea make i hoʻohana ʻia. Ma ke kālai kupapaʻu i lawelawe ʻia iho nei i ke kakahiaka o ka Pōʻalua nei, ua akāka ihola, i make ʻo Kapua-Allison a me kāna wahine i ke kū o ke poʻo i ka pōkā, pēlā mai ka hōʻike a ka ʻOihana Mākaʻi. A ua ʻike ʻia nō hoʻi, na kekahi i lawe aku i ke ola o Jolene-Rae Kapua-Allison, a na ke kāne i kī iā ia iho a make. Ua ʻōlelo ihola ʻo Heitiare Kapua-Leslie, ke kaikamahine a Jolene-Rae, he hana māinoino a hoʻomāʻewaʻewa hoʻi ʻo Christopher i kona makuahine, a kau ka weli o ka makuahine i ka manaʻo e haʻalele loa i kāna kāne no ka mea, ua hoʻoweliweli aku ʻo Christopher iā ia, inā hōʻinoʻino ʻia kona kūlana, a kipaku ʻia paha ʻo ia mai kona kūlana hana ma ka ʻOihana Mākaʻi, e pepehi mai kēlā iā ia nei a make.

He hui mokulele piliʻāina hou nō ko Hawaiʻi nei, akā, he ʻelua wale nō ona mokupuni e lele ai, mai Lānaʻi a i Honolulu, a hoʻi aku. Ua kapa ʻia ʻo Lānaʻi Air, a na ka Hui Mokulele ʻo Mokulele ka lawelawe ʻana i ka hana. He ʻewalu noho o ka mokulele, a ʻo ke kikiki emi loa, he $500 o nā kānaka ʻelua, a he hoʻokahi wale nō lele ʻana mai kekahi mokupuni a i kekahi. A he $500 hou no ka hoʻi ʻana.

Eia mai kā kākou ʻōlelo noʻeau,

Poʻohū ka lae i ka ʻalā.

He ʻōlelo kēia no ke kumu kūʻai pipiʻi loa.

He pepehi kanaka ma Mauna Huʻihuʻi.

ʻO ia aʻela kekahi poʻonūhou o kēia lā, ka lā 10 o ʻApelila, he Pōʻalua. Welina e nā makamaka. ʻO Ke Aolama kēia a penei ka nūhou.

Loaʻa iho nei nā kupapaʻu o kekahi kāne a me kāna wahine ma ka hale ma Mauna Huʻihuʻi. Ua manaʻo ʻia, ua pepehi kanaka akula ke kāne i kāna wahine, a laila, lawe ihola ʻo ia i kona ola ponoʻī. Hōʻike aʻela ʻo Heitiare Kapua-Leslie, ʻo kona makuahine ia, ʻo Jolene Kapua-Allison, a me ke kāne a kona makuahine, ʻo Christopher Kapua-Allison. He mākaʻi ke kāne, a ʻo ia kāna ʻoihana no nā makahiki he 11. Wahi a ke kaikamahine, ua kau ka weli o kona makuahine i kāna kāne. He hana hoʻomāinoino kā ke kāne iā Kapua-Allison. Ua haʻi mai ʻo Kapua-Allision i kāna kaikamahine, inā e hana ʻo Kapua-Allision i mea e pilikia ai ka ʻoihana a kāna kāne a me ke kūlana paha, e pepehi ʻia ʻo ia a make. A ʻo ia ke kumu i hōʻike ʻole aʻe ai ʻo Kapua-Leslie i ka hana a ke kāne a kona makuahine iā haʻi. Aia nō ka ʻoihana mākaʻi ke noiʻi akula. Ua haʻalele mai nō hoʻi ʻo Jolene Kapua-Allison i hope nei i kāna keiki kāne, iā Brock Kapua-Leslie a me kona kaikunāne, ʻo Reyd Kapua.

Eia mai kā kākou ʻōlelo noʻeau,

He naʻau pōkole.

ʻO ia hoʻi, ʻo ka huhū hikiwawe.

Aia nō ke kūʻai ʻia nei nā kikiki o ka ʻAha Mele Lā Lei o Robert Cazimero.

ʻO ia aʻela kekahi poʻo nūhou o kēia lā, ka lā 9 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

E mālama ʻia ana nō ka ʻAha Mele Lā Lei o Robert Cazimero i ka lā mua o Mei. Aia ana ma ka Pā Mauʻu o ka Hale Hōʻikeʻike ʻo Bīhopa. E hemo ana nā puka i ka hola 4:30 o ka ʻauinalā. A he mau puʻukani hou aku nō. E hoʻokani ana ʻo Louis “Moon” Kauakahi, ʻo Horace Dudoit a me Keao Costa me Uluwehi. A aia ana nō hoʻi ke Kawika Trask Trio, ʻo Keauhou, ʻo Jerry Santos a me Marlene Sai. E hula ana ʻo Hālau Nā Kamalei O Likolehua. A he mau hālau hula hou aku nō, ʻo Pua Aliʻi ʻIlima, kumu hula Victoria Holt Takamine; ʻo Hālau Mōhala ʻIlima, kumu hula Mapuana de Silva; ʻo Hālau Hula Ka Noʻeau, kumu hula Michael Pili Pang; a me Hālau O Ke ʻAʻaliʻi, kumu hula Manu Boyd. He ʻekolu māhele kikiki. ʻO ka mua, ma ka pā mauʻu, he $25 o ke kikiki ke kūʻai ʻē ʻia, a he $35 ke kūʻai ʻia ma ka ʻīpuka. ʻO ka lua, ʻo ka māhele hoʻopaʻa ʻē ʻia, he $35 o ke kikiki ke kūʻai ʻē ʻia, a he $45 ma ka ʻīpuka. ʻO ke kolu, ʻo ka māhele kiʻi maka nunui, he $75 o ke kikiki ke kūʻai ʻē ʻia, a he $100 ma ka ʻīpuka. ʻO ka mea ʻāpiki, ʻo nā noho o kahi māhele, na ka ʻeleu mikimiki ka lawe lilo.

Niniu Molokaʻi, poahi Lānaʻi. He 29 hālau hula i komo i loko o ka hoʻokūkū, a lilo aku nei ka Makana Mau Loa ʻo Lokalia Montgomery iā kumu hula Nāpua Greig a me kona hālau, ʻo Nā Lei Kaumaka O Uka, he 1,200 ʻai. A mai lilo aku ia hanohano iā kumu hula Kaleo Trinidad me nā kāne o Ka Leo O Laka I Ka Hikina O Ka Lā, he 1,198 ʻai. ʻO Ka Lei Mokihana O Leinaʻala, kumu Leinaʻala Pavao Jardin kai ke kūlana ʻekolu, he 1,188 ʻai. A i ka Pōʻahā nei, lilo akula ka ʻōlapa a Nāpua Greig, ʻo Shalia Kapuauʻionālani Kikuyo Kamakaokalani, ʻo ia ʻo Miki Aloha Hula.

Eia mai kā kākou ʻōlelo noʻeau,

Niniu Molokaʻi, poahi Lānaʻi.

He ʻōlelo kēia no ka ʻoniʻoni ʻana o ke kīkala ma ka hula.

 

 

 

ʻO kahi kaikamahine o Maui ka Miki Aloha Hula hou.

ʻO ia aʻela kekahi poʻo nūhou o kēia lā, ka lā 6 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

He ʻolu nō ke kino i ka hula, akā, ʻo Maui nō ka ʻoi. Lilo iho nei ʻo Shalia Kapuauʻionālani Kikuyo Kamakaokalani, ʻo ia ka Miki Aloha Hula. He haumāna ʻo ia na kumu hula Nāpua Greig o ka Hālau Nā Lei Kaumaka O Uka. Mai lilo aku ia hanohano iā Ecstasy Jetta Laverne Kamakalikolehua Ligon o Ka Lā ʻŌnohi Mai O Haʻehaʻe. ʻO kāna mau kumu hula, ʻo ia ʻo Keawe a me Tracie Lopes. He 1130 ʻai a Kamakaokalani, a he 1125 ʻai a Ligon. Akā, lilo aku nei ka Makana ʻŌlelo Hawaiʻi iā Ligon. ʻO Nicole Mailenani Yuen o ka Hālau Hiʻiakaināmakalehua kai ke kūlana ʻekolu, he 1122 āna ʻai. ʻO Asialynn Genoa Kalihilihiʻulaonālehuaʻohōpoe Yap o ka Hālau Manaola kai ke kūlana ʻehā, he 1096 āna ʻai. A ma ke kūlana ʻelima, ʻo ia ʻo Maile Yurika Garrett o Kawailiʻulā, he 1088 āna ʻai.

ʻAʻole e kū ana ʻo Max Holloway lāua ʻo Khabib Nurmagomedov he alo a he alo i loko o ka pahu mokomoko i kēia Pōʻaono. E kāpae ʻia aku ana ia hoʻoūkū inoa moho ma waena o lāua ma muli o ka hiki ʻole iā Holloway ke hoʻēmi i nā paona e pono ai kona mokomoko ʻana ma ka māhele 155 paona. Ua mihi akula ʻo Holloway iā Nurmagomedov ma ka ʻIoʻio (Twitter) ma ka ʻī ʻana, he manaʻo kona e mokomoko, akā, ke hōʻole ʻia nei ʻo ia, a hāʻawi ʻo ia i ka leo mihi i ka hui mokomoko o Nurmagomedov a me kona mau makahehi. ʻAʻole i maopopo ka loaʻa a me ka loaʻa ʻole paha o kahi hoa paio hou o Nurmagomedov.

Eia mai kā kākou ʻōlelo noʻeau,

Nahā nā ʻōmaka wai a ka lihilihi.

ʻO ia hoʻi, e kulu ana ka waimaka o kekahi.

E ʻimi ʻia aʻe ana nā pōkā i pahū ʻole ma kahakai o Mākua.

ʻO ia aʻela kekahi poʻo nūhou o kēia lā, ka lā 4 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

He papahana ʻimi pōkā pahū ʻole kai hoʻomaka iho nei ma kahakai o Mākua i ka Pōʻakahi nei. Na ka Pūʻalikoa e hoʻolilo ana he $3.5 miliona ma ia hana i mea e pau ai nā pōkā i pahū ʻole e waiho wale ana ma laila. I holo ka manaʻo e hana pēlā ma muli o ka loaʻa ʻana o kahi pōkā he ʻelima ʻīniha ka lōʻihi i ka makahiki 2016. Ua hai ʻia nā mea nāna ka ʻimi ʻana aku. A he ʻelua mahina a emi mai paha ka lōʻihi o nei papahana. ʻO ka nui o kahi e ʻimi ʻia ai, he 22 ʻeka a aia nō ma kahi i loaʻa ai ia pōkā i ka makahiki 2016. Ma nā lā noa wale nō ka hana. Inā e loaʻa ka pōkā i pahū ʻole a he hiki ke hoʻoneʻe ʻia, e lawe ʻia i uka o ka ʻāina a hiki i kahi kūpono no ka hoʻopahū ʻia ʻana.

I ka lā i nehinei, ua ʻā aʻela ke ahi ma Pālolo Homes ma ke alanui ʻo Ahe a ma hope iki mai, pahū aʻela kekahi mea. Ua ʻeha ihola he ʻekolu mau kānaka, a lawe ʻia akula i ka haukapila. ʻO kekahi, aia nō ma ke kūlana kūpilikiʻi. ʻO ka lua, aia ma ke kūlana kūkonukonu. A ʻo ke kolu, ma ke kūlana paʻa. Ua kuhi ʻia, he pahu ea ola māmā kai pahū, akā, aia nō ka ʻOihana Kinai Ahi ke noiʻi akula i ke kumu o ka pahū ʻana.

Eia mai kā kākou ʻōlelo noʻeau,

Neʻe aku, neʻe mai ke one o Punahoa.

He ʻōlelo kēia no ke kanaka hiki ʻole ke holo kona manaʻo, koho i kekahi ʻaoʻao a laila, loli kona manaʻo. A he ʻōlelo paha no kahi hui i mahae lua.

ʻO nā wāhine o Notre Dame a me nā kāne o Villanova ke kū kilakila nei.

ʻO ia aʻela kekahi poʻo nūhou o kēia lā, ka lā 3 o ʻApelila, he Pōʻalua. Welina e nā makamaka. ʻO Ke Aolama kēia a penei ka nūhou.

Ua emi ihola nā koholā i ʻike ʻia ma nā kai o kēia pae ʻāina i kēia makahiki nei. He 34 wale nō koholā i ʻike ʻia i loko o nā minuke he 15 o ka Pōʻaono nei. A ma ka hopena o Malaki o kēlā makahiki aku nei, he 85 koholā i ʻike ʻia. A ma ka helu koholā i mālama ʻia ma Maui e ke Kahua Koholā Pākīpika, he 529 mau koholā i ʻike ʻia i ka lā 24 o Pepeuali. A i ka makahiki 2017, he 984 koholā i ʻike ʻia, a i ka makahiki 2016, he 1,488 koholā.

Lilo aku nei ka inoa moho pōpō hīnaʻi i nā wāhine o Notre Dame ma ke kī kolu ʻana o Arike Ogunbowale, he 0.1 wale nō kekona i koe, a ʻo ka helu ʻai hope loa, he 61 i ke 58. ʻO Mikikipi Mokuʻāina ka hoa paio, a i nā minuke mua o ka hapahā ʻekolu, e ʻoi ana ʻo Mikikipi ma ka helu ʻai he 40 i ka 25, akā naʻe, i ka hopena o ia hapahā, ua paʻi aʻela a paʻi, he 41 ʻai pākahi. ʻO ka lua kēia o ka inoa moho i lilo iā Notre Dame. ʻO ka mua, aia i ka makahiki 2001.

ʻĀhaʻi aku nei nā kāne o Villanova i ka lanakila i nehinei ma ka helu ʻai he 79 i ke 62 a Mikikana. A ʻo nā Pōpoki ʻĀhiu ka inoa moho. Ua ʻike ʻia aku nō nā ʻai a ka uʻi. ʻO Donte DiVincenzo, he 31 āna ʻai. He ʻehiku ona manawa i kī ai i ke kī kolu, a komohia akula he ʻelima. A koho ʻia ihola ʻo ia, ʻo ia ka mea pāʻani ʻoi o nā hui hope loa ʻehā. ʻO ka lua kēia o ka inoa moho i lilo aku iā Villanova ma nā kikina ʻekolu i kaʻa hope aku nei.

Eia mai kā kākou ʻōlelo noʻeau,

Aia me Niolopua.

ʻO ia hoʻi, ke hiamoe akula.

E kūʻē aku ana ʻo Max Holloway iā Khabib Nurmagomedov no ka inoa moho.

ʻO ia aʻela kekahi poʻo nūhou o kēia lā, ka lā 2 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

Hopu ʻia iho nei ke kanaka i manaʻo ʻia, nāna i hoʻāʻo e ʻaihue kanaka i kekahi kaikamahine ma ka Lucky Strike Social ma ke Kikowaena ʻo Ala Moana i ka lā 19 o Malaki. He ʻeiwa wale nō makahiki o ia kaikamahine. ʻO Jason Dee Nolen ka inoa o ua kanaka lā i hopu ʻia, a ua hoʻopiʻi ʻia ʻo ia no ka hoʻāʻo ʻaihue kanaka a me ka puʻe ma ke kekelē ʻekolu. E kū ana ʻo Nolen i mua o ka ʻaha hoʻokolokolo i ke kakahiaka o kēia lā.

E hoʻi hou aku ana ʻo Max Holloway i ka pahu mokomoko. ʻO Holloway ka inoa moho o ka māhele 145 paona, akā, e hakakā ana ʻo ia me Khabib Nurmagomedov no ka inoa moho ma ka māhele 155 paona ma ka UFC 223 i kēia Pōʻaono e hiki koke mai ana. ʻO Conor McGregor wale nō ka mea mokomoko i kū i ka moku ma kekahi mau māhele i ka wā hoʻokahi, ʻo ka māhele 145 a me ka māhele 155. A inā lanakila ʻo Holloway, ʻo ia ana ka lua o ka mea mokomoko nāna e hana pēlā. ʻO Tony Ferguson ka hoa paio o Nurmagomedov ma mua, akā, ua ʻeha ihola kona kuli e hiki ʻole ai iā ia ke hakakā i ka Pōʻaono. ʻAʻole i lōʻihi ka wā a Holloway e hoʻomākaukau ai no kēia hoʻokūkū inoa moho, akā, lana ka manaʻo o ko Hawaiʻi, na ke keiki o Waiʻanae e kāʻili aku i ka lanakila.

Eia mai kā kākou ʻōlelo noʻeau,

Ua pau koʻu lihi hoihoi i ka nani o Poka ʻAilana.

ʻO ia hoʻi, ua pau ka hoihoi o kekahi.

 

 

He puhi kolohe ka hana ma ka hale papaʻi ʻo Oahuan Tower.

ʻO ia aʻela kekahi poʻo nūhou o kēia lā, ka lā 29 o Malaki, he Pōʻahā. Welina e nā makamaka. ʻO Ke Aolama kēia a penei ka nūhou.

Ua puhi kolohe ʻia aku nei ke keʻena noho o ka hale papaʻi ʻo Oahuan Tower ma Makiki, pēlā ihola ka manaʻo o ke Keʻena Kinai Ahi o Honolulu ma hope o ka noiʻi ʻana. Ua make kekahi kanaka, ʻo Alvin K. Asakura kona inoa, a he 49 ona makahiki. He limahana ʻo ia no ka Hale ʻAina ʻo HASR a me ka Hui Waina ʻo HASR, a wahi a Terry Kakazu, ka mea nona ia mau wahi, ua nīnau ʻia ʻo ia inā ua kaumaha lua ʻo Asakura. Akā, hōʻike aʻela ʻo Kakazu, ʻaʻole ʻo ia i kaumaha, ua hauʻoli kona naʻau, akā, ua loaʻa ʻo ia i ka maʻi palū ma ia lā, a ʻaʻole paha na Asakura i hoʻā i ke ahi. ʻO ka nui o ka pohō, he $380,000.

Kau aʻe nei ka ʻōlelo hoʻopaʻi o Cody Joslin o Maui no kāna hana ʻāpuka i ke Keʻena Koa Kahiko o ʻAmelika Hui Pū ʻIa. Ma muli o kāna hana hoʻopunipuni, lilo akula iā ia he $48,595 mai ia keʻena aku. ʻO kona hoʻopaʻi, he noho paʻahao no nā mahina he 18 a me ka hoʻihoʻi ʻana aku i ia puʻu kālā. Ua hoʻopunipuni ʻo Joslin i ke Keʻena Koa Kahiko, ua kūpilikiʻi kona noʻonoʻo ma muli o kāna hana ma ke ʻano he koa ma ʻIlaka a me ʻApekanikana. Haʻi akula ʻo ia i ia keʻena, ua pā kona kaʻa e holo ana i ka pōkā pahū hoʻolele ʻia, e hakakā pahi ana ʻo ia me ka ʻenemi, a ua ʻike ʻo ia i ka make ʻana o kona mau hoa ma ke kaua paio. ʻO ka pilikia naʻe, he ʻeiwa wale nō mahina o Joslin i hana ai ma ka Pūʻalikoa, ʻaʻole ʻo ia i hoʻouna ʻia i ka ʻāina ʻē, a ʻaʻole ʻo ia i komo iki i ke kaua paio.

Eia mai kā kākou ʻōlelo noʻeau,

Noho i ke puhi.

ʻO ia ka noho paʻahao ʻana.

 

 

Hoʻopakele ʻia aʻe nei kahi wahine ma ke kai o Punaluʻu.

ʻO ia aʻela kekahi poʻo nūhou o kēia lā, ka lā 28 o Malaki, he Pōʻakolu. Welina e nā makamaka puni mea hou. ʻO Ke Aolama kēia a penei ka nūhou.

Lele aku nei kahi kaʻa i loko o ke kai o Punaluʻu i ka pō Pōʻakahi nei. Ma ka ʻaoʻao pōmaikaʻi, ʻike ʻia aʻela ia lele ʻana o ke kaʻa e kekahi kanaka, a ʻo ua kanaka lā, ʻo Aaron Kia ia, he mea pāʻani pōpō peku ʻo ia no ke Kulanui o Hawaiʻi ma mua. Holo akula ʻo Kia a lele akula i loko o ke kai no ke kōkua ʻana aku i ka mea kalaiwa. Wehe akula ʻo Kia i ka puka a me ka ʻili kuapo a huki ihola ʻo ia i ka wahine a i lalo o ke kaʻa, a lawe akula iā ia i uka. Lapaʻau ʻia ihola ka wahine a lawe ʻia akula i ka haukapila. Wahi a Kia, ua komo akula ʻo ia i kahi polokalamu Kiaʻi Ola ʻŌpio ma mua.

He mea hou kā ko Oʻahu nei e uku aʻe ai i ka ʻauhau no ke kau ʻana ma luna o ke kaʻa lawe ʻōhua a me ke Kaʻa Wane Handi. A pēlā pū me ke kaʻa uila kau i ka lewa i ka wā e hoʻomaka ai kona holo ʻana. He kāleka ia mea hou e hoʻoili ʻia ai ke kālā a ʻo ia ka mea e uku ai no ke kau ʻana i luna o ke kaʻa lawelawe o Oʻahu nei. E hoʻomaka ka hoʻonoho ʻia ʻana iho o nā mīkini heluhelu kāleka ma luna o nā kaʻa lawe ʻōhua i kēia mahina aʻe me ka manaʻo e paʻa ka mīkini heluhelu kāleka ma nā kaʻa lawe ʻōhua a pau, he 550 ka nui, i ka hapahā mua o kēia makahiki aʻe.

Eia mai kā kākou ʻōlelo noʻeau,

Ka ʻōpuʻu pua i mōhala.

ʻO ia hoʻi, he pēpē.