Author: keaolama

E luku ʻia ana ʻo Tonga e ka makani pāhili.

ʻO ia aʻela kekahi poʻo nūhou o kēia lā, ka lā 12 o Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻAkahi nō a loaʻa he mau moho e manaʻo nei e alualu i ke kūlana hope kiaʻāina. He ʻelima lākou mai loko mai o ka ʻaoʻao Kemokalaka, ʻo ia ʻo Kenekoa Josh Green, ʻo Kim Coco Iwamoto, ʻo Meia Bernard Carvalho ʻōpio, ʻo Kenekoa Will Espero, a me Kenekoa Jill Tokuda. A i ka Pōʻaono nei, mālama ʻia iho nei he ʻaha hōʻike manaʻo no ia mau moho. A hōʻike mai lākou a pau, he pono ke lilo ke kūlana hope kiaʻāina i mea nui no ka pono o nā kānaka o Hawaiʻi nei.

Pāhola aku nei ka Makani Pāhili ʻo Gita i nā mokupuni o Tonga. ʻO ke kūlana 4 ia. A ʻo ka makani pāhili ikaika loa paha ia ma ka moʻolelo o Tonga. I ka pō Pōʻakahi ma Tonga, kāʻalo aku ana ka maka o Gita ma ka ʻaoʻao hema o ka mokupuni ʻo Tongatapu, a ʻo kona ikaika, he 145 mile o ka hola. A ma Tongatapu kahi noho o ka hapanui o nā kānaka o Tonga. A ma laila hoʻi ke kapikala ʻo Nukuʻalofa. Ke pā ka makani kūlana 4, e haki ke kumu lāʻau a e ʻulaʻa pū paha me ka lepo. Ua kūkala ʻia he ulia pōpilikia ko Tonga. A pēlā pū me Kāmoa ʻAmelika, ʻoiai, ma laila i pāhola ai ka Makani Pāhili ʻo Gita ma mua o kona hiki ʻana aku i Tonga.

Eia mai kā kākou ʻōlelo noʻeau,

Ua hihina wale i Moeawakea.

He ʻōlelo kēia no ke kanaka e hiamoe ana ʻoi kau ka lā.

ʻO nā Leʻaleʻa ʻOlimepika Hoʻoilo, ua hiki mai.

ʻO ia aʻela kekahi poʻo nūhou o kēia lā, ka lā 9 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻomaka iho nei nā Leʻaleʻa ʻOlimepika Hoʻoilo o ka makahiki 2018 i ka pō Pōʻalima ma Pyeongchang i Kōlea Hema. A kohu mea lā, he maluhia nō nā Kōlea ʻelua, ʻoiai, aia nō ke kaikuahine o Kim Jong Un i laila, a ua lūlū lima ihola me ka Pelekikena o Kōlea Hema, me Moon Jae-in. A i ia pō, kaʻi like akula nā ʻālapa o Kōlea Hema a me Kōlea ʻĀkau i loko o ke Kahua Pāʻani ʻOlimepika a ʻo ka makamua ia o ke kaʻi like ʻana o ia mau ʻāina ma nā Leʻaleʻa ʻOlimepika mai ka makahiki 2007.

He hoʻoweliweli hoʻopahū pōkā pahū kai ʻike ʻia ma ke Kula Kiʻekiʻe o Mililani. Ua kākau ʻia ma kekahi hoʻolaha no ka lilo ʻana i mea hoʻōho, e hoʻopahū ʻia ke kula i ka hola 1:00. Akā, ma hope o ka hoʻohaʻalele ʻia ʻana o ke kula a me ka ʻimi ʻana aku o ka ʻOihana Mākaʻi, ʻaʻohe wahi mea i loaʻa. A no laila, he hoʻopunipuni ia, a aia nō ka ʻOihana Mākaʻi ke noiʻi akula.

Eia mai kā kākou ʻōlelo noʻeau,

Keiki ʻopeʻope nui o Kaluakoʻi.

He ʻōlelo kēia no ke kanaka i nui kāna mau ʻeke a pūʻolo paha.

 

Aia ka Lā Kūkahekahe i kēia Pōʻaono.

ʻO ia aʻela kekahi poʻo nūhou o kēia lā, ka lā 8 o Pepeluali, he Pōʻahā. Aloha mai e nā makamaka. ʻO Ke Aolama kēia a penei ka nūhou.

Aia ka Lā Kūkahekahe 2018 i kēia Pōʻaono, ka lā 10 hoʻi o Pepeluali. E mālama ʻia ana ma ke Kula Kaiāulu o nā Koʻolau. I ka hola 8:30 o ke kakahiaka e hoʻomaka ai. A i ka hola 2:00 o ke awakea e pau ai. He mau papa hoʻonui ʻike Hawaiʻi ke mālama ʻia ana. A he mau puʻukani nō ke hīmeni ana ma laila, ʻo ia ʻo Keauhou a me Kamakakēhau Fernandez. ʻO ka haʻi ʻōlelo nui o ia lā, na Hiapo Perreira. A e kūkākūkā ʻia ana ka makahiki e kekahi mau kānaka, ʻo ia ʻo Rangi Matamua, ʻo Kalei Nuʻuhiwa, ʻo Mikiʻala Pescaia a me Kaliko Baker. ʻAʻole e kūʻai ʻia ka mea ʻai ma laila, a no laila, ʻo ka lawe aku i kāu mea ʻai ponoʻī ka mea e pono ai. E kākau inoa ma eventbrite: https://www.eventbrite.com/e/la-kukahekahe-kaiaulu-olelo- hawaii-registration-41464967835.

Ma ka hoʻokūkū inoa moho o ka ʻAhahui Kula Aupuni o Oʻahu, kāʻili aku nei ʻo Kalani i ka inoa moho Māhele II ma ka lanakila ʻana aku nei ma luna o Rusawela ma ka helu ʻai he 61 i ke 52. No Kalani, he 16 ʻai a Kapaʻa Nishimura a he 13 ʻai a Brandon Chung. A no Rusawela, he 13 ʻai a Juan Alvarez a he 11 a Micah Visoria.

A ʻo Kalāheo ka inoa moho Māhele I ma hope o ka lilo ʻana aku o ke eo iā lākou ma ka helu ʻai he 55 i ke 53. Ua pūʻiwa ihola ka naʻau o ke anaina mākaʻikaʻi, ʻoiai, e ʻoi ana ʻo Kahuku i ka hapanui o ka manawa. Akā, i ka wā he 35 kekona i koe, komohia ihola ke kī kolu a Kanoa Smith o Kalāheo, a he 52 a Kalāheo i ke 53 a Kahuku. A i ka wā he 4 kekona i koe, kī kolu akula ʻo Cannen Chiu a komohia ihola. A paʻa ihola ka helu ʻai, he 55 a Kalāheo i ke 53 a Kahuku a ke kani ʻana o ka pū i ka hopena o ka hoʻokūkū.

Eia mai kā kākou ʻōlelo noʻeau,

Kamaʻilio ka waha, hana ka lima.

I loko nō o ke kamaʻilio ʻana, he hiki i ka lima ke hana.

E mālama hou ʻia ana kahi ʻaha mele uluwehi i ka Lā Lei.

ʻO ia aʻela kekahi poʻo nūhou o kēia lā, ka lā 7 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

E mālama hou ana ʻo Robert Cazimero i ka ʻaha mele i ka lā mua o Mei. Akā, i kēia makahiki, aia ana ma ka Hale Hōʻikeʻike ʻo Bīhopa. Ua mālama ʻo Uluwehi lāua me kona kaikaina, me Roland i ka ʻaha mele Lā Lei ma ka Pūpū o Waikīkī no nā makahiki he kanakolu a emi iki mai. A he lana ka manaʻo o Uluwehionapuaikawekiuokalani, na kekahi e hoʻomau aku i nei ʻaha mele ma kēia hope aku. ʻAʻole i paʻa nā mea a pau o ka ʻaha mele o kēia makahiki nei a no laila, ʻaʻole e kūʻai ʻia nei nā kikiki i kēia manawa. Ua paʻa naʻe kahi ʻaha mele Lā Lei o Cazimero i ka hola 7:30 o ke ahiahi o ka lā 28 o ʻApelila. Aia ia ʻaha mele ma ka Hale Keaka Kākela o ke Kikowaena Hana Noʻeau me Hana Kahiko o Maui. He $12 o ke kikiki emi loa, a he $55 o ke kikiki pipiʻi loa.

Aia ka Hoʻokūkū Pōpō Hīnaʻi o ka ʻAhahui Kula Aupuni o Oʻahu i kēia ahiahi. E kūʻē aku ana ke Kula Kiʻekiʻe ʻo Kalani i ke Kula Kiʻekiʻe ʻo Rusawela no ka inoa moho o ka Māhele II i ka hola 5:30. A ma hope aku o kēlā, e kūʻē aku ana ʻo Kahuku iā Kalāheo no ka inoa moho o ka Māhele I. Aia ia mau hoʻokūkū inoa moho ʻelua i ke Kula Kiʻekiʻe ʻo Makinalē.

A ma ka ʻAhahui Kula Uku o Honolulu, e kūʻē aku ana ʻo Melenola iā Punahou no ka inoa moho o ka Māhele I. Aia ana ia hoʻokūkū inoa moho ma ke Kula Kiʻekiʻe ʻo Melenola.

Eia mai kā kākou ʻōlelo noʻeau,

Aia a kau ka iʻa i ka waʻa, manaʻo ke ola.

Like kēia ʻōlelo me kahi ʻōlelo noʻeau haole, ʻo ia hoʻi, mai helu aku i kāu mau moa keiki ma mua o ke kiko ʻana. ʻO ia hoʻi, aia a kiko ka hua moa, a laila e helu i ka nuio nā moa keiki.

E hoʻopaneʻe ʻia ana ka mokomoko ʻana no ka inoa moho UFC o ka māhele 145 paona.

ʻO ia aʻela kekahi poʻo nūhou o kēia lā, ka lā 6 o Pepeluali, he Pōʻalua. Welina e nā makamaka. ʻO Ke Aolama kēia a penei ka nūhou.

E hoʻopaneʻe ʻia ana ka Mokomoko o Max Holloway me Frankie Edgar no ka inoa moho o ka māhele 145 paona ma muli o ka ʻeha o ka wāwae o Holloway i kona wā e hoʻomaʻamaʻa ana. ʻO Holloway ka inoa moho ma ia māhele i kēia manawa, a ʻaʻole ʻo ia i hāʻule ma ke kahua mokomoko ma nā makahiki ʻehā i kaʻa hope aku nei.

Ua kaiehu ʻia akula he ʻewalu mākaʻi o ka ʻOihana Mākaʻi o Honolulu i ka makahiki 2017 no nā hana like ʻole. I ia makahiki, he 22 ka nui o nā mākaʻi i kaiehu ʻia no nā hana like ʻole a e hoʻāʻo ʻia nei paha e kaiehu ʻia. Eia mai nā hana, ʻo ka puʻe ʻana, ka ʻaihue kanaka, ka ʻai lāʻau ʻona a pēlā aku. ʻO ka mea maikaʻi, ua emi mai ia helu mai ka makahiki 2016, he 24 mākaʻi a he 25 i ka makahiki 2015. A i ka makahiki 2017, he 76 mākaʻi i hoʻopaʻi ʻia no ka hana kūpono ʻole. A i ka makahiki 2016, he 81 mākaʻi i hoʻopaʻi ʻia. ʻO kahi mea minamina, i kēlā pule aku nei, hoʻopiʻi ʻia iho nei he ʻehā mākaʻi no ka ʻonou ʻana i kekahi kanaka e kau kona waha ma ka mīana o kahi lumi hoʻopau pilikia no ka lehulehu. Hoʻohiki ihola ka luna mākaʻi hou, ʻo Susan Ballard, e hoʻomaikaʻi i ka hana ma ka hoʻokolokolo ʻana i nā mākaʻi i hoʻopiʻi ʻia. Ua hōʻike ʻo Ballard i ka mahina ʻo ʻOkakopa o kēlā makahiki aku nei, he nui loa nā mākaʻi i kaiehu ʻia no ke kumu kūpono, i hoʻi hou naʻe i ka hana, a ʻo kekahi mau mākaʻi, ua kaiehu hewa ʻia. He pono ke kaulike ka hoʻopaʻi me ke kumu kūpono.

Eia mai kā kākou ʻōlelo noʻeau,

Ahuwale nā pae puʻu o Hāʻupukele.

He ʻōlelo kēia no kahi mea i ahuwale.

 

 

 

Loaʻa kahi kāhuli leo leʻa o ka nahele o Hawaiʻi nei i ka maʻi ʻaʻai.

ʻO ia aʻela kekahi poʻo nūhou o kēia lā, ka lā 5 o Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.

Aloha nō. Loaʻa aku nei ʻo Willie Kahaialiʻi, kahi puʻukani a hoʻokani pila kaulana, i ka maʻi ʻaʻai ma ke akemama. A no laila, e kāpae ʻia ana kekahi mau ʻaha mele ona. Akā, ua hele aku nei ʻo ia i ka hīmeni a hoʻokani ʻana ma ka pāʻina Kahului Pōpō Peku 52 ma ke Kikowaena Hana Noʻeau a Hana Kahiko o Maui. Ua pau iho nei nā puni mua ʻehā o ka lapaʻau kemika a e hoʻomau ʻia ka lapaʻau ʻana ma nā pule he 12 e hiki mai ana. E pule paha a e hoʻouna aku i nā manaʻo maikaʻi iā Kahaialiʻi a me nā kānaka a pau i loaʻa i ia maʻi ʻino.

Aia nō nā ʻAeko o Piladelepia ke kīkaha aʻela ma hope o ko lākou lanakila ʻana ma luna o Nū ʻEnelani i nehinei ma ke Kahului Pōpō Peku LII. He hahana nō ka pāʻani ʻana. Ma hope o ka hapahā ʻelua, e ʻoi ana ʻo Piladelepia ma ka helu ʻai he 22 i ka 12, akā, ma hope o ka wā hoʻomaha hapalua like, hiu aʻela ʻo Nū ʻEnelani a i ka hopena o ka hapahā ʻekolu, he 29 ʻai a nā ʻAeko a he 26 a nā Aloha ʻAmelika. A i ka hapahā ʻehā, ʻakahi nō a ʻoi aʻe nā ʻai a Nū ʻEnelani ma ka helu ʻai he 33 i ke 32. Akā, ma muli o Nick Foles a me ka ʻaoʻao kūlele o Piladelepia, holo akula lākou he 75 ʻīā a loaʻa ka ʻai holo. Ua hoʻāʻo ihola no nā ʻai ʻelua, ʻaʻole naʻe i loaʻa, a ʻo ka helu ʻai i ia manawa, he 38 i ke 33. Ua mākaukau ʻo Tom Brady a me nā Aloha ʻAmelika no ka holo loa a loaʻa ka ʻai holo, ʻaʻole naʻe i like ka manaʻo o Brandon Graham. Paʻi akula ka lima o Graham a pakelo ihola ka pōpō a Brady a loaʻa akula iā Derek Barnett o nā ʻAeko. A ma hope mai, loaʻa ka ʻai peku iā Piladelepia a ʻo ia ihola, ʻaʻole i hiki iā Nū ʻEnelani ke hoʻi hou i ka pahu hopu. ʻO ka helu ʻai hope, he 41 a Piladelepia i ke 33 a Nū ʻEnelani.

Eia mai kā kākou ʻōlelo noʻeau,

E kanu i ka huli ʻoi hāʻule ka ua.

ʻO ia hoʻi, e hoʻokō koke ʻoe i ka hana i ka wā hiki.

Holomua aʻela ka pila no nā hale nunui ma ka ʻAha Kūkā o Honolulu.

ʻO ia aʻela kekahi poʻo nūhou o kēia lā, ka lā mua o Pepeluali, he Pōʻahā. Welina e nā makamaka. ʻO Ke Aolama kēia a penei ka nūhou.

Ua holomua aʻela ka Pila 110 (2017) ma ka heluhelu ʻalua ʻana o ka ʻAha Kūkā o Honolulu i ka Pōʻakolu nei. ʻO ia ka pila e koi ana i ke Keʻena Hoʻolālā me Palapala ʻAe e hoʻōki i ka hoʻopuka ʻana i nā palapala ʻae kūkulu i nā hale nunui no nā makahiki ʻelua a emi iho paha. I kēia mana o ka pila, ʻo ka hale nunui, he 3,500 kapuaʻi kuea o kahi noho ʻia. Ma ke kākau mua o ia pila, ana ʻia ma ka nui o nā lumi moe, ʻaʻole naʻe i holo ka manaʻo i ia manawa ma ka nui o nā lumi moe e kaupalena ʻia ana.

Hopu ʻia aku nei kahi kanaka i manaʻo ʻia nāna i puhi kolohe aku i kahi hale i haʻalele loa ʻia ma Nānākuli. Ma ka wanaʻao o ka Pōʻalua nei, e lalapa ana ke ahi ma ia hale ma ke Alanui ʻo Mikana. Hiki akula nā kinai ahi a pau ihola ke ahi i ke kinai ʻia i ka hola 4:53 o ke kakahiaka nui. Wahi a ka ʻOihana Mākaʻi, ma mua o ia ahi, hoʻāʻo ihola ia kanaka e hoʻā i ke ahi ma kekahi wahi hale ma ka hola 3:00 o ka wanaʻao, akā, i ka hiki ʻana aku o ka mākaʻi i laila, pau ʻē ia kanaka i ka haʻalele. A ʻo ia paha kona wā i puhi ai i ka hale i ke Alanui ʻo Mikana i ke ahi. A hōʻike aʻela nā hoa noho, he ʻewalu ona manawa a ʻoi aku paha i hoʻā ai i ke ahi ma ia ʻāina.

Eia mai kā kākou ʻōlelo noʻeau,

He hele pīlali ʻāina maoli nō.

He ʻōlelo kēia no kahi kanaka i hele aku a lilo ka noʻonoʻo i kahi ʻē, poina ihola ka hoʻi ʻana aku i kauhale.

 

Haʻalele iho nei ʻo Shan Tsutsui i kona kūlana hope kiaʻāina.

ʻO ia aʻela kekahi poʻo nūhou o kēia lā, ka lā 31 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

I ka Pōʻakahi nei, hōʻike aʻela ka Hope Kiaʻāina Shan Tsutsui, e waiho ʻo ia i kona kūlana hope kiaʻāina i kēia lā. ʻO ka mea ʻāpiki, ʻaʻohe wahi luna e makemake nei e hoʻopiha aku i ia mākālua. Ma ke kānāwai, e lilo mua i ka pelekikena o ka ʻAha Kenekoa o ka mokuʻāina, a inā ʻaʻohe ona makemake, e lilo aku i ka luna hoʻomalu o ka Hale o nā Lunamakaʻāinana o ka mokuʻāina, a ma hope, e lilo aku i ka loio kuhina o ka mokuʻāina. ʻO Ron Kouchi ka Pelekikena ʻAha Kenekoa, a ʻaʻohe ona makemake iki i ke kūlana hope kiaʻāina. ʻO Scott Saiki ka Luna Hoʻomalu Hale Lunamakaʻāinana, a like ʻo ia me Kouchi, ʻaʻohe ulu iki o ka hoi. ʻO Doug Chin mai, ʻo ka loio kuhina, a e hōʻike aʻe i kona manaʻo i ka Pōʻalima.

Eia mai kā kākou ʻōlelo noʻeau,

Ua hiki maila nā hoa aloha ʻo Keʻolohaka lāua ʻo Hanalē.

ʻO ia hoʻi, ua pōloli ihola.

E pouli ana ka mahina i kēia pō.

ʻO ia aʻela kekahi poʻo nūhou o kēia lā, ka lā 30 o Ianuali, he Pōʻalua. Welina e nā makamaka. ʻO Ke Aolama kēia a penei ka nūhou.

Ua ʻoki leo ʻia ke kiʻi ʻoniʻoni ʻo Moana ma nā ʻōlelo he 45. A ʻo ka ʻōlelo Hawaiʻi ana ke 46. A ʻo ka makamua ia o ke kiʻi ʻoniʻoni e ʻoki leo ʻia ma ka ʻōlelo Hawaiʻi. Hoʻomaka iho nei ke ʻoki leo ʻana i kekahi mau pule aku nei i hala. He 140 mau kānaka a ʻoi i nīnauele no ka lilo ʻana i mea hana keaka leo no ia kiʻi ʻoniʻoni. A koho ʻia he 23. No ʻAuliʻi Carvalho ana ka leo o Moana. A ʻo ka leo o Māui, no kahi haumāna o ke Kula Kaiāpuni ma mua, a me ke Kula Kiʻekiʻe ʻo Kamehamhea, no Kaipu Baker nō. ʻO ka pahuhopu, e pau ke kiʻi ʻoniʻoni i ke ʻoki leo ʻia ke hiki aku i ke kau wela. A he manaʻo ko ke Kulanui o Hawaiʻi, e hāʻawi ʻia aku ke kiʻi ʻoniʻoni ma ke pā DVD a me ke pā Blue-Ray paha ma ka ʻOihana Hoʻonaʻauao i mea aʻo.

E pouli ana ka mahina i kēia pō. A he kupamahina ana nō hoʻi ia, ʻoiai, aia ana ka mahina ma kahi kokoke loa i ka honua nei. A ʻo ka mahina piha ʻelua ia o ka mahina, ʻo ia hoʻi, he mahina polū. E hoʻomaka ana ka pouli ʻana i ka hola 1:48 o ke aumoe. A e piha ka pouli ʻana i ka hola 2:51 o ka wanaʻao, a ʻo ka lōʻihi o ka pouli piha ʻana, he hoʻokahi hola me nā minuke he 16. A e hemo loa ana ka mahina i waho i ka hola 5:11 o ke kakahiaka nui. Manaʻo ʻia, ʻo Maui a me Hawaiʻi kahi maikaʻi loa e ʻike aku ai i ia pouli ʻana.

Eia mai kā kākou ʻōlelo noʻeau,

ʻEha ʻo Keoni Pulu iā Hanalē.

ʻO ia hoʻi, ua pōloli.

 

 

 

 

 

 

E ʻae ʻia ana ka ʻōlelo Hawaiʻi ma ka ʻaha hoʻokolokolo.

ʻO ia aʻela kekahi poʻo nūhou o kēia lā, ka lā 29 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

E ʻae ana ka ʻOihana Kānāwai i ka hoʻohana ʻia ʻana o ka māhele ʻōlelo ke makemake ke kanaka e hōʻike aku i kona manaʻo ma ka ʻōlelo Hawaiʻi i mua o ka ʻaha hoʻokolokolo. He maikaʻi loa ia he hiki ke ʻōlelo Hawaiʻi i loko o ka ʻaha, akā, e kala mai i ko ʻoukou mea kākau, ʻaʻole maopopo ka makemake o ka mea i ʻonipaʻa ma ka ʻōlelo Hawaiʻi i loko o ka ʻaha hoʻokolokolo, ʻo Kaleikoa Kaeo, ʻo ia hoʻi, he hiki ke hōʻike aku i ka manaʻo ma ka ʻōlelo Hawaiʻi me ka māhele ʻōlelo a me ke loaʻa ʻole paha o ka māhele ʻōlelo. ʻO kahi nīnau naʻe i kēia manawa, āhea e kū ai kahi lunakānāwai ʻōlelo Hawaiʻi ma ka ʻaha hoʻokolokolo o Hawaiʻi nei i mea e pono ʻole ai ka māhele ʻōlelo?

E kūkulu ʻia ana paha he wahi pela makani hana uila e lana ana ma ke kai he mau mile ma kai aku o Oʻahu. He ʻehā mau hui e noi nei i ke kuleana. A ke manaʻo ʻia nei, e kūkulu ʻia he 50 pela makani a ʻoi ma kahi hoʻokahi. He manaʻo ko kekahi hui, e kūkulu ʻia he ʻelua wahi pela makani hana uila. A ʻo nā wahi paha e kūkulu ai ia hui, he 17 mile ma ka ʻaoʻao hema o Lēʻahi, a he 12 mile ma ka ʻaoʻao komohana ʻākau o Ka Lae o Kaʻena. A ʻo kekahi hui, e manaʻo ana e kūkulu ʻia he 15 paha mile ma kai aku o ka ʻaoʻao hema o Oʻahu nei.

Lilo aku nei nā Makana Grammy he ʻeono iā Bruno Mars. Penei nā māhele ʻeono, ʻo ke mele R&B ʻoi, ka hōʻike R&B ʻoi, ke pā leo R&B ʻoi, ka haku mele ʻoi o ka makahiki, ke mele ʻoi o ka makahiki a me ke pā leo ʻoi o ka makahiki. A lilo aku nei he ʻelima Makana Grammy iā Kendrick Lamar.

Eia mai kā kākou ʻōlelo noʻeau,

Nahā ka houpo.

He ʻōlelo kēia no ka pōloli.