Author: keaolama

ʻO Loretta Sheehan ka luna hoʻomalu hou o ke Komikina Mākaʻi o Honolulu.

ʻO ia aʻela kekahi poʻo nūhou o kēia lā, ka lā 22 o Pepeluali, he Pōʻahā. Welina e nā makamaka. ʻO Ke Aolama kēia a penei ka nūhou.

He luna hoʻomalu hou ko ke Komikina Mākaʻi o Honolulu. ʻO Loretta Sheehan kai koho ʻia ʻo ia ka luna hoʻomalu hou. A ʻo kona makemake, e ʻeleu ke komikina ma ka hana, a e akāka ka hana a ke komikina i mua o ka lehulehu. A ʻo kekahi manaʻo ona, e lilo nā komikina ʻehiku i mau alakaʻi no ke komikina ma kā lākou mau māhele mākaukau. ʻO Max Sword, he maikaʻi loa kāna hana hoʻopaipai; ʻo Jerry Gibson, he loea ʻo ia ma ka ʻoihana malihini mākaʻikaʻi; a ʻo Dick Grimm, he nui kona mau makahiki e hana ana ma loko o ka ʻoihana kūkala ma Hawaiʻi nei. He mau mea hou aku kā Sheehan e makemake nei i mea e ʻoi aku ai ka ʻOihana Mākaʻi o Honolulu.

Loli iki ihola ka manaʻo o ka Pelekikena Donald Trump ma nā kānāwai e pili ana i ka pū kī. Ma muli paha ia o kona kūkākūkā ʻana me nā haumāna a me nā mākua no nā mea i ʻike ʻia ma ke Kula Kiʻekiʻe ʻo Marjory Stoneman Douglas ma Pololika. Noi ana ia mau haumāna a me nā mākua i ka pelekikena i ka hōʻoʻoleʻa ʻana i nā kānāwai pū kī. ʻO kekahi mea a Trump i hōʻike ai, he kākoʻo ʻo ia i ka piʻi ʻana o nā makahiki e kūʻai ai ke kanaka i kekahi mau ʻano pū a piha nā makahiki he 21 i ke kanaka. I kēia manawa, ke piha nā makahiki he 18 i ke kanaka, he hiki iā ia ke kūʻai i ka pū laipela. He hōʻole naʻe ka ʻAhahui Laipela Aupuni i ia piʻi ʻana o nā makahiki. A wahi a Trump, e koi ana ʻo ia i ka noiʻi pono ʻia ʻana o ka moʻolelo o ke kanaka kūʻai pū ma mua o kona kūʻai ʻana mai i ka pū, me ke kālele ʻana i ka nānā i ka maikaʻi a me ka ʻole paha o kona noʻonoʻo kanaka.

Eia mai kā kākou ʻōlelo noʻeau,

Hāʻawe i ke kua; hiʻi i ke alo.

He ʻōlelo kēia no ka wahine e hana ana ma kahi ʻoihana a me ka mālama pū ʻana aku i ke kama.

E pāpā ʻia ana ka moe ʻana ma kahi kau kaʻa lawe ʻōhua.

ʻO ia aʻela kekahi poʻo nūhou o kēia lā, ka lā 21 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻAkahi nō a pūlima ʻia aku nei ka Pila 99 (2017) e ka Meia Kirk Caldwell a lilo ihola i kānāwai. E pāpā ana ia pila, ʻaʻole e moe ke kanaka ma kahi kau kaʻa ʻōhua o Oʻahu nei a me kahi e pili ana mai ka hola 4:00 o ka wanaʻao a i ke kulu ʻana o ke aumoe, i ka hola 1:00 hoʻi, ʻo ia hoʻi nā hola e holo ai nā kaʻa lawe ʻōhua. E kū ia kānāwai hou i ka lā 12 o Iune e lawa ai ka wā e aʻo ai ka ʻOihana Mākaʻi a me ke Keʻena Halihali i ka lehulehu no ke kānāwai hou. ʻO ka hoʻopaʻi, he $50. A he pono ke aʻo mua ʻia ke kanaka e moe ana ma kahi kau kaʻa ʻōhua ma mua o kona hoʻopaʻi ʻia ʻana aku.

Pōmaikaʻi kekahi mau Kānaka Maoli ʻelima o Hawaiʻi nei i ka lilo ʻana aku o kahi puʻu kālā e hoʻomōhala a e hoʻāʻo ai e haku i nā mea like ʻole ma kā lākou hana noʻeau. ʻO lākou ʻelima, he mau puʻukani a hoʻokani pila paha, ʻo ia ʻo Jeff Peterson lāua ʻo Kalani Peʻa, a he mau kānaka hana noʻeau, ʻo ia ʻo Marques Hanalei Marzan lāua ʻo Pōhaku Kahoʻohanohano. A ʻo Ciara Leinaʻala Lacy ka lima a ʻo kāna māhele, ʻo ka hana kiʻi ʻoniʻoni. ʻO ka nui o ke kālā i lilo iā lākou, he $20,000. He makana ia e lilo aku i ka ʻIlikini ʻAmelika, ke Kanaka Maoli o ʻĀlaka a me ke Kanaka Maoli o Hawaiʻi a puni ʻo ʻAmelika Hui Pū ʻIa i loea ma ka hana noʻeau o ke au kahiko a me ka hana noʻeau paha o ke au hou.

Eia mai kā kākou ʻōlelo noʻeau,

I kai nō ka iʻa, mali ʻē ka makau.

ʻO ia hoʻi, e hoʻomākaukau ʻoe i mākaukau.

Make iho nei kekahi mau kānaka ʻelua i ka hoʻokuʻi ʻia e ke kaʻa.

ʻO ia aʻela kekahi poʻo nūhou o kēia lā, ka lā 20 o Pepeluali, he Pōʻalua. Welina e nā makamaka. ʻO Ke Aolama kēia a penei ka nūhou.

He ulia kaʻa aku nei ko Mākaha ma kahi o ka hola 7:40 o ka pō Pōʻakahi nei. E hoʻoponopno ana kekahi mau kānaka ʻelua i ko lāua kaʻa ma kaʻe o ke Alaloa ʻo Farinatona. I ia manawa, hoʻokuʻi ʻia akula lāua e kekahi kaʻa. ʻO ka pilikia, ua holo wale aku nō ia kaʻa me ke kōkua ʻole i nā kānaka i hoʻokuʻi ʻia. ʻO kekahi o lāua, he kanaka no Māʻili, ua make nō i kahi o ka ulia. A ʻo ka lua, he kanaka no Nānākuli, ua make ihola ma ka haukapila. Wahi a ka ʻoihana mākaʻi, ʻaʻohe kanaka i hopu ʻia, akā, he 30 minuke ma hope mai o ka ulia, ua loaʻa ke kaʻa i hoʻokuʻi i ia mau kānaka ma ke Alanui ʻo Lahilahi, ʻaʻole naʻe i loaʻa ka mea nāna e kalaiwa ana. Aia nō ka mākaʻi ke noiʻi akula.

Aia nō ke Komikina Mākaʻi o Honolulu ke kūkākūkā ihola no ka pono a me ka pono ʻole paha o ke koho ʻana i luna hoʻomalu hou. ʻO Max Sword ka luna hoʻomalu e kū nei i kēia manawa. Ua lōkahi ka manaʻo o nā lālā o ke komikina ma ke koho ʻana iā ia i luna hoʻomalu i ka mahina ʻo Kēkēmapa o ka makahiki 2016, he hoʻokahi mahina ma hope o ka haʻalele ʻana o Ron Taketa i ia kūlana. I ka wā e noho ana ʻo Sword, ʻo ia ka luna hoʻomalu, hoʻohalahala ʻia ihola kekahi mau hana a ke komikina. ʻO kekahi, ʻo ia ka ʻāpono ʻana i ka uku ʻana iā Louis Kealoha, ka luna mākaʻi ma mua, he $250,000 i kona wā i waiho ai i ka hana. A ʻo kekahi mea i hoʻohalahala ʻia, ʻo ia ka ʻūlōlohi o ke koho ʻana i luna mākaʻi hou.

Eia mai kā kākou ʻōlelo noʻeau,

Ua hoʻi ka ʻōpua i Awalua.

ʻO ia hoʻi, ua hoʻi aku kekahi i kona hale.

 

 

Hiki akula ma kahi ʻaelike nā Kula ʻo Kamehameha a me nā mea hoʻopiʻi.

ʻO ia aʻela kekahi poʻo nūhou o kēia lā, ka lā 16 o Pepeluali, he Pōʻalima. Welina e nā hoa makamaka. ʻO Ke Aolama kēia a penei ka nūhou.

E uku ana nā Kula ʻo Kamehameha he $80 miliona i ka poʻe hoʻopiʻi, he 30 a ʻoi. ʻO ia poʻe hoʻopiʻi, ʻo ia kekahi o nā kānaka i lolokukui ʻia e Kauka Robert Browne i ko lākou wā e haumāna ana ma ke Kula ʻo Kamehameha. He mau mea kā nā Kula ʻo Kamehameha i ʻae ai, ʻo kekahi, ʻo ia ka mālama ʻana i helu kelepona na ke kanaka a me ka haumāna paha e hōʻike ai no ka lolokukui a me nā pilikia like ʻole paha. A ʻo kekahi hana i ʻae ʻia, ʻo ia ka hoʻokumu ʻana i waihona kālā e kōkua ʻia ai nā haumāna ʻē aʻe i lolokukui ʻia e Browne, i komo ʻole naʻe i ka hoʻopiʻi ʻana. Wahi a Mark Davis, kekahi o nā loio o nā mea hoʻopiʻi, ʻo kekahi mea nui o ka ʻaelike, ʻo ia ka loaʻa o kahi maluhia loa no ka hoʻomalu ʻana i nā haumāna o kēia hope aku.

 

Ma ka Hoʻokūkū Inoa Moho Mokuʻāina, e kūʻē aku ana ʻo Punahou iā Kahuku no ka inoa moho ma ka Māhele I. Lanakila aku nei ʻo Punahou ma luna o Moanalua ma ka helu ʻai he 75 i ke 69 i ka pō nei. A ʻo Kahuku, lanakila aku nei ma luna o Maryknoll ma ka helu ʻai he 49 i ke 43. ʻO Kahuku ka inoa moho o kēlā makahiki aku nei a ʻo Punahou ko lākou hoa paio ma ka puni inoa moho o ia makahiki.

A ma ka Māhelele II, e kūʻē aku ana ʻo Damien iā Kāna Palakika no ka inoa moho. ʻO Damien, lanakila aku nei ma luna o Kalani. A ʻo Kāna Palakika, pepehi aku nei iā Kauaʻi.

A i ka lā ʻapōpō ka ʻAhamele ʻo Hoʻomau Oʻahu ma ka Hale Hōʻikeʻike ʻo Bīhopa. Ma laila e lohe ʻia ai nā leo nani o nā keiki o nā Pūnana Leo like ʻole a me kekahi mau kula kaiapuni paha. A aia ana nō hoʻi kekahi mau kāhuli leo leʻa o ka nahele. E hoʻomaka ana i ka hola 5:00 o ka ʻauinalā. He $20 o ke kikiki ke kūʻai ʻia ma ka pūnaewele, www.honoluluboxoffice.com a he $25 ke kūʻai ʻia ma ka ʻīpuka.

Eia mai kā kākou ʻōlelo noʻeau,

Loaʻa ke ola i Hālauaola.

ʻO ia hoʻi, ua maikaʻi a maluhia a ola ma hope o kahi wā pilikia.

Ke ʻimi ʻia akula i wahi e pau ai ka heihei kaʻa ʻana ma ke Alanui ʻo Puʻuʻōhiʻa.

ʻO ia aʻela kekahi poʻo nūhou o kēia lā, ka lā 15 o Pepeluali, he Pōʻahā. Welina e nā makamaka. ʻO Ke Aolama kēia a penei ka nūhou.

Aia nō ko Makiki ke ʻimi akula i wahi e pau ai ka heihei kaʻa ʻana ma ke Alanui ʻo Puʻuʻōhiʻa. I ka lā 25 o ka mahina ʻo Ianuali, hoʻokuʻi aku nei kahi kaʻa e heihei ana i kekahi wahine e holo paikikala ana ma ia alanui. Lawe koke ʻia akula ua wahine lā i ka haukapila ma ke kūlana kūpilikiʻi. Ua lilo ka heihei kaʻa i mea maʻa mau ma ia alanui, a i kēia mau lā, e heihei ana nō i ke kakahiaka, mai ka hola 6:00 a i ka hola 7:00, a pēlā pū me ka ʻauinalā, ma kahi o ka hola 5:00. A ʻo ia mau hola nā hola e hele wāwae ai a e holo paikikala ai paha nā kānaka hoʻoikaika kino ma kaʻe alanui. E mālama ʻia ana kahi hālāwai o ka Papa Kaiāulu o Makiki, Pūowaina Lalo, me Puʻuʻōhiʻa i kēia ahiahi ma ka Pāka ʻĀpana o Makiki, mai ka hola 6:30 a i ka hola 8:30, no ka hōʻike manaʻo ʻana o ka lehulehu.

I kēia Pōʻaono, e mālama ʻia ana ʻo Hoʻomau Oʻahu. E hoʻomaka ana i ka hola 5:00 o ka ʻauinalā. A aia ana ma ka Hale Hōʻikeʻike ʻo Bīhopa. E nui ana nā puʻukani o ia ahiahi, ʻo ʻAnakala Jerry Santos me Kamuela Kimokeo, ʻo Hoʻopono Wong me kona mau hoa, ʻo Pōmaikaʻi Lyman me kona ʻohana a me Sudden Rush. E kūʻai i ke kikiki ma www.honoluluboxoffice.com. He $20 o ke kikiki. A hiki nō hoʻi ke kūʻai ʻia ke kikiki ma ka ʻīpuka ma ka Pōʻaono, akā, he $25 o ke kikiki ma laila. ʻO ka poʻe kūpuna he 65 makahiki a ʻoi a me nā keiki he 12 a emi mai, he manuahi ke komo ʻana.

Eia mai kā kākou ʻōlelo noʻeau,

Hili hewa ka manaʻo ke ʻole ke kūkākūkā.

He mea nui ke kūkākūkā ʻana i mea e holo pono ai ka hana.

 

 

E ola paha nā iʻa o ke kai ma muli o kahi pila hou.

ʻO ia aʻela kekahi poʻo nūhou o kēia lā, ka lā 14 o Pepeluali, he Pōʻakolu. A ʻo ka Lā hoʻi kēia o Lonoikeaweawealoha. Welina e nā makamaka aloha. ʻO Ke Aolama kēia a penei ka nūhou.

Holomua akula ka pila e pāpā ana, ʻaʻole e kūʻai ʻia ka ʻaila pale lā nona ke kemika “oxybenzone” a me ka “octinoxate” paha. ʻO ka Pila Kenekoa 2571 ia, a ʻōlelo ʻia ma ia pila, ʻo ia mau kemika ʻelua, he mea hoʻopōʻino ia i ka ʻākoʻakoʻa, he hoʻokīnā hoʻi i kekahi mau iʻa o ke kai, a no ke kanaka, he hoʻonui i ka maʻi hoʻohānau a hoʻohua paha. ʻO ia mau kemika ʻelua, ua ʻāpono ʻia e ka Papa Luna Hoʻokele Mea ʻAi me Lāʻau Lapaʻau, akā, ma ka Pila Kenekoa 2571, e pāpā ʻia ke kūʻai ʻia ʻana o ka ʻaila pale lā ma nā kino like ʻole nona ka “oxybenzone” a me ka “octinoxate” paha ke ʻole e loaʻa ke kuhikuhi lāʻau.

Maikaʻi wale ka hana a Glenn Lee ma ke Kula Kiʻekiʻe ʻo Waialua ma kona kūkulu ʻana i ka polokalamu lopako ma laila. A ma muli o ia hana, ʻo ia kekahi o nā moho hope loa he 10 ma ka hoʻokūkū e ʻimi ana i ke kumu ʻoi loa ma ka honua nei. A ʻo Lee wale nō ka moho o ʻAmelika Hui Pū ʻIa, ʻo nā moho hope loa ʻē aʻe, no Tureke, no ʻApelika Hema, no Kolomebia, no ka ʻĀina Pilipino, no Berazila, no Belegiuma, no ʻAukekulelia, no ke Aupuni Mōʻī Hui Pū ʻIa a no Nolewai. ʻO ka nui o nā moho i komo i nei hoʻokūkū, he 30,000. ʻO ka makana e lilo ana i ke kumu ʻoi loa o ka honua, he $1 miliona. E kūkala ʻia ana ka lanakila i ka lā 18 o Malaki.

Eia mai kā kākou ʻōlelo noʻeau,

Pulelo ke ahi haʻaheo i nā pali.

He ʻōlelo kēia no ka lanakila ʻana.

E lilo paha ʻo Mark Bennett i lunakānāwai no ka ʻAha Hoʻokolokolo Kaʻapuni Helu ʻEiwa no nā Hoʻopiʻi Hou.

ʻO ia aʻela kekahi poʻo nūhou o kēia lā, ka lā 13 o Pepeluali, he Pōʻalua. Welina e nā makamaka. ʻO Ke Aolama kēia a penei ka nūhou.

Ua koho aku nei ka Pelekikena Donald Trump iā Mark Bennett i lunakānāwai no ka ʻAha Hoʻokolokolo Kaʻapuni Helu ʻEiwa no nā Hoʻopiʻi Hou. Akā, aia wale nō a ʻāpono ka ʻAha Kenekoa ʻAmelika Hui Pū ʻIa a laila, e hoʻokohu ʻia ʻo Bennett. ʻO ka loio kuhina ia o Hawaiʻi mai ka makahiki 2003 a i ka makahiki 2011 ma lalo o ke Kiaʻāina Linda Lingle. A ma mua o kēlā, he kākoʻo loio ʻAmelika Hui Pū no Hawaiʻi a hana ihola ʻo ia ma ke ʻano he loio no nā makahiki he nui. A he polopeka ʻo ia ma ke Kula Loio ʻo William S. Richardson o ke Kulanui o Hawaiʻi ma Mānoa. Nui ka mahalo o nā Kenekoa Mazie Hirono lāua ʻo Brian Schatz i ia koho ʻia ʻana o Bennett, akā, ʻo Bennett ka mea i kākoʻo iā Lingle ma ke kūʻai ʻana aku i nā ʻāina i kāʻili ʻia mai ke aupuni Mōʻī mai i loaʻa mai ke kenikeni no ke aupuni mokuʻāina.

He manaʻo ko ka ʻaha ʻōlelo o Hawaiʻi e hoʻokumu aku i ʻoihana nāna e hoʻokele i ka hana ma Mauna Kea a me ka mālama pono ʻana i ia ʻāina aloha. ʻO ka pila, ʻo ia ka Pila Kenekoa 3090, a i hāpai ʻia nei pila ma muli o ka hoʻohalahala ʻia ʻana o ka hana a ke Kulanui o Hawaiʻi ma ka hoʻokele ʻana i ka hana. I ka Pōʻakahi nei, mālama ʻia ka hālāwai hōʻike manaʻo mua no ia pila, a mahae lua paha nā kānaka, he kākoʻo kekahi, a he kūʻē kekahi. Wahi a Healani Sonoda-Pale o ke Kōmike Hana Kālaiʻāina o Ka Lāhui Hawaiʻi, ʻoiai naʻe e kaupalena ʻia ka nui o nā ʻohe nānā e ʻae ʻia ma Mauna Kea, ʻaʻole paha e kaupalena ʻia ka nui o ke kūkulu ʻana ma laila, a e waele ʻia ana he ala e kūkulu ʻia ai ka ʻOhe Nānā Kanakolu Mika. ʻO kekahi mea i hoʻohalahala ʻia ai ka pila, ʻo ia nā lālā o ka papa o ia ʻoihana. He ʻeiwa lālā, a e like me ka pila i kākau ʻia i kēia manawa, eia mai nā lālā, ʻo ka luna o ke Keʻena ʻOihana, Hoʻomohala Kūlana Waiwai a me Hoʻokipa Malihini; ka ʻAhahui o nā Hui Kīwila Hawaiʻi; ke Kikowaena Hikina-Komohana; ka ʻAhahui Loio Kanaka Maoli; ka ʻAhahui Kamehameha; he ʻahahui ʻoihana o ka mokuʻāina; he ʻahahui ʻoihana o Hawaiʻi moku; he kanaka i hoʻokohu ʻia e ka pelekikena o ka ʻAha Kenekoa; a he kanaka i hoʻokohu ʻia e ka luna hoʻomalu o ka Hale o nā Lunamakaʻāinana.

Eia mai kā kākou ʻōlelo noʻeau,

Moe poʻo a hiʻu i Kalaeʻoiʻo.

ʻO ia hoʻi, ua kū a pilikia loa. [ʻO Kalaeʻōʻio paha kekahi inoa o ia ʻāina.]

E luku ʻia ana ʻo Tonga e ka makani pāhili.

ʻO ia aʻela kekahi poʻo nūhou o kēia lā, ka lā 12 o Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻAkahi nō a loaʻa he mau moho e manaʻo nei e alualu i ke kūlana hope kiaʻāina. He ʻelima lākou mai loko mai o ka ʻaoʻao Kemokalaka, ʻo ia ʻo Kenekoa Josh Green, ʻo Kim Coco Iwamoto, ʻo Meia Bernard Carvalho ʻōpio, ʻo Kenekoa Will Espero, a me Kenekoa Jill Tokuda. A i ka Pōʻaono nei, mālama ʻia iho nei he ʻaha hōʻike manaʻo no ia mau moho. A hōʻike mai lākou a pau, he pono ke lilo ke kūlana hope kiaʻāina i mea nui no ka pono o nā kānaka o Hawaiʻi nei.

Pāhola aku nei ka Makani Pāhili ʻo Gita i nā mokupuni o Tonga. ʻO ke kūlana 4 ia. A ʻo ka makani pāhili ikaika loa paha ia ma ka moʻolelo o Tonga. I ka pō Pōʻakahi ma Tonga, kāʻalo aku ana ka maka o Gita ma ka ʻaoʻao hema o ka mokupuni ʻo Tongatapu, a ʻo kona ikaika, he 145 mile o ka hola. A ma Tongatapu kahi noho o ka hapanui o nā kānaka o Tonga. A ma laila hoʻi ke kapikala ʻo Nukuʻalofa. Ke pā ka makani kūlana 4, e haki ke kumu lāʻau a e ʻulaʻa pū paha me ka lepo. Ua kūkala ʻia he ulia pōpilikia ko Tonga. A pēlā pū me Kāmoa ʻAmelika, ʻoiai, ma laila i pāhola ai ka Makani Pāhili ʻo Gita ma mua o kona hiki ʻana aku i Tonga.

Eia mai kā kākou ʻōlelo noʻeau,

Ua hihina wale i Moeawakea.

He ʻōlelo kēia no ke kanaka e hiamoe ana ʻoi kau ka lā.

ʻO nā Leʻaleʻa ʻOlimepika Hoʻoilo, ua hiki mai.

ʻO ia aʻela kekahi poʻo nūhou o kēia lā, ka lā 9 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻomaka iho nei nā Leʻaleʻa ʻOlimepika Hoʻoilo o ka makahiki 2018 i ka pō Pōʻalima ma Pyeongchang i Kōlea Hema. A kohu mea lā, he maluhia nō nā Kōlea ʻelua, ʻoiai, aia nō ke kaikuahine o Kim Jong Un i laila, a ua lūlū lima ihola me ka Pelekikena o Kōlea Hema, me Moon Jae-in. A i ia pō, kaʻi like akula nā ʻālapa o Kōlea Hema a me Kōlea ʻĀkau i loko o ke Kahua Pāʻani ʻOlimepika a ʻo ka makamua ia o ke kaʻi like ʻana o ia mau ʻāina ma nā Leʻaleʻa ʻOlimepika mai ka makahiki 2007.

He hoʻoweliweli hoʻopahū pōkā pahū kai ʻike ʻia ma ke Kula Kiʻekiʻe o Mililani. Ua kākau ʻia ma kekahi hoʻolaha no ka lilo ʻana i mea hoʻōho, e hoʻopahū ʻia ke kula i ka hola 1:00. Akā, ma hope o ka hoʻohaʻalele ʻia ʻana o ke kula a me ka ʻimi ʻana aku o ka ʻOihana Mākaʻi, ʻaʻohe wahi mea i loaʻa. A no laila, he hoʻopunipuni ia, a aia nō ka ʻOihana Mākaʻi ke noiʻi akula.

Eia mai kā kākou ʻōlelo noʻeau,

Keiki ʻopeʻope nui o Kaluakoʻi.

He ʻōlelo kēia no ke kanaka i nui kāna mau ʻeke a pūʻolo paha.

 

Aia ka Lā Kūkahekahe i kēia Pōʻaono.

ʻO ia aʻela kekahi poʻo nūhou o kēia lā, ka lā 8 o Pepeluali, he Pōʻahā. Aloha mai e nā makamaka. ʻO Ke Aolama kēia a penei ka nūhou.

Aia ka Lā Kūkahekahe 2018 i kēia Pōʻaono, ka lā 10 hoʻi o Pepeluali. E mālama ʻia ana ma ke Kula Kaiāulu o nā Koʻolau. I ka hola 8:30 o ke kakahiaka e hoʻomaka ai. A i ka hola 2:00 o ke awakea e pau ai. He mau papa hoʻonui ʻike Hawaiʻi ke mālama ʻia ana. A he mau puʻukani nō ke hīmeni ana ma laila, ʻo ia ʻo Keauhou a me Kamakakēhau Fernandez. ʻO ka haʻi ʻōlelo nui o ia lā, na Hiapo Perreira. A e kūkākūkā ʻia ana ka makahiki e kekahi mau kānaka, ʻo ia ʻo Rangi Matamua, ʻo Kalei Nuʻuhiwa, ʻo Mikiʻala Pescaia a me Kaliko Baker. ʻAʻole e kūʻai ʻia ka mea ʻai ma laila, a no laila, ʻo ka lawe aku i kāu mea ʻai ponoʻī ka mea e pono ai. E kākau inoa ma eventbrite: https://www.eventbrite.com/e/la-kukahekahe-kaiaulu-olelo- hawaii-registration-41464967835.

Ma ka hoʻokūkū inoa moho o ka ʻAhahui Kula Aupuni o Oʻahu, kāʻili aku nei ʻo Kalani i ka inoa moho Māhele II ma ka lanakila ʻana aku nei ma luna o Rusawela ma ka helu ʻai he 61 i ke 52. No Kalani, he 16 ʻai a Kapaʻa Nishimura a he 13 ʻai a Brandon Chung. A no Rusawela, he 13 ʻai a Juan Alvarez a he 11 a Micah Visoria.

A ʻo Kalāheo ka inoa moho Māhele I ma hope o ka lilo ʻana aku o ke eo iā lākou ma ka helu ʻai he 55 i ke 53. Ua pūʻiwa ihola ka naʻau o ke anaina mākaʻikaʻi, ʻoiai, e ʻoi ana ʻo Kahuku i ka hapanui o ka manawa. Akā, i ka wā he 35 kekona i koe, komohia ihola ke kī kolu a Kanoa Smith o Kalāheo, a he 52 a Kalāheo i ke 53 a Kahuku. A i ka wā he 4 kekona i koe, kī kolu akula ʻo Cannen Chiu a komohia ihola. A paʻa ihola ka helu ʻai, he 55 a Kalāheo i ke 53 a Kahuku a ke kani ʻana o ka pū i ka hopena o ka hoʻokūkū.

Eia mai kā kākou ʻōlelo noʻeau,

Kamaʻilio ka waha, hana ka lima.

I loko nō o ke kamaʻilio ʻana, he hiki i ka lima ke hana.