Author: keaolama

ʻO Hannah Kihalani Springer ka lālā hou o ke Komikina Hoʻokahe Wai.

ʻO ia aʻela kekahi poʻo nūhou o kēia lā, ka lā 28 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻonāueue ʻia aʻe nei ʻo Miamā e ke ōlaʻi ikaika i kēia lā. ʻO kona ikaika, he 7.7, a aia nō he 6.2 mile ma lalo o ka ʻili honua. Ua ʻōlelo ʻia, he 144 mau kānaka i make a ʻoi aku paha ma Miamā, a he 732 mau kānaka i ʻeha. Noi aʻela ke Kenelala Min Aung Hlaing i nā aupuni a pau o ka honua nei i kōkua ʻoiai, he nui hou aku paha ka poʻe i make a i ʻeha paha. ʻO Hlaing kekahi o nā luna o ke aupuni pūʻalikoa o Miamā. Ua pā nō hoʻi ʻo Tailana i ia ōlaʻi. A he ʻeiwa mau kānaka i make ma ke kapikala ʻo Banakoka, a ʻoi aku paha.

Loli ihola ka manaʻo o ke Kiaʻāina Josh Green ma ka hoʻopiha ʻana i ka mākālua o ke Komikina Hoʻokahe Wai. Hoʻokohu aku nei ʻo Green iā Hannah Kihalani Springer i lālā no ia komikina i ka Pōʻahā nei. A e hoʻomaka ʻānō ʻo Springer i ka lawelawe ʻana i ka hana, akā, aia a ʻāpono ka ʻAha Kenekoa o Hawaiʻi, a laila, e noho ʻo Springer ma ia kūlana a ka lā 30 o Iune o ka makahiki 2028. Ma mua, hōʻole ʻo Green i ka lilo ʻana o ia noho iā Springer. A hoʻopiʻi ʻia ʻo ia i mua o ka ʻaha hoʻokolokolo ma muli o ia hana āna.

Ua hopu ʻia aku nei ʻo Gerhardt Konig no ka hoʻāʻo pepehi kanaka i kāna wahine, iā Arielle Konig. A hoʻoholo ihola ʻo Judge Kristine Yoo, e kau kona pela he $5 miliona. He kauka ʻo Gerhardt Konig, a e piʻi kuahiwi ana lāua me kāna wahine, me Arielle, i ke kakahiaka o ka Pōʻakahi nei. A hoʻomaka lāua e hoʻopaʻapaʻa a ʻāʻumeʻume. A i ia manawa, hoʻokuʻi ihola ʻo Konig i ke poʻo o kāna wahine me ka pōhaku he mau manawa. A he mau kui hou kā Konig e ʻō aku ai iā Arielle. Ma ka pōmaikaʻi, lohe iho nei kekahi mau kānaka piʻi kuahiwi i ka ʻuā ʻana o Arielle i kōkua. I ka ʻike ʻana o Konig i ka hele mai o ia mau kānaka piʻi kuahiwi, holo akula. Akā, ma hope mai, ua loaʻa ʻo ia i ka mākaʻi.

Eia mai kā kākou ʻōlelo noʻeau,

Piʻi ka ihu o ka naiʻa i ka makani.

He ʻōlelo kēia no ke kanaka hoʻokano.

E hoʻohui ʻāina hewa hou ana paha ʻo ʻAmelika Hui Pū ʻIa.

ʻO ia aʻela kekahi poʻo nūhou o kēia lā, ka lā 24 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.

I kēia pule, e kipa aku ana ʻo Usha Vance, ka wahine a ka Hope Pelekikena JD Vance, i kekahi kahua pūʻalikoa ma ka ʻĀina ʻŌmaʻomaʻo me kekahi mau luna aupuni pekelala. ʻO kekahi kumu a lākou e hele aku ana i laila, he manaʻo ko ka Pelekikena Donald Trump, e hoʻohui ʻāina iā ʻĀina ʻŌmaʻomaʻo me ʻAmelika Hui Pū ʻIa. Ma muli o ia manaʻo, e hoʻohalahala ana nā luna aupuni o ʻĀina ʻŌmaʻomaʻo i ia huakaʻi a Vance mā. I kēia manawa, he aupuni hapa kūʻokoʻa ko ʻĀina ʻŌmaʻomaʻo ma lalo o Kenemaka. A ua hōʻike mai ia mau aupuni ʻelua i ke kūʻē i ka hoʻohui ʻāina ʻia e ʻAmelika Hui Pū ʻIa.

Aia nō ka mākaʻi o ka mokupuni ʻo Hawaiʻi ke ʻimi aʻela iā Vesna Young. He wahine ʻo Young nona nā makahiki he 51 a ua ʻike hope loa ʻia aku nei ʻo ia ma Miloliʻi i ka lā 16 o Malaki ma kahi o ka pōlaka 88-100 o ke Alanui ʻUmi ma kahi o ka hapalua hola ʻekolu (3:30) o ka ʻauinalā. He haole ʻo Young a he 5 ona kapuaʻi he ʻehiku ʻīniha, a he 165 ona paona. He lauoho melemele kona a he maka mākuʻe kona. Inā he ʻike paha kāu no Young a no kona wahi paha e noho ana, e kāhea i kēia helu o ke keʻena mākaʻi, 808-935-3311.

I ka Pōʻaono nei ma ʻEwa, hopu aku nei ka mākaʻi i kekahi kanaka holo paikikala uila a mokokaikala uila paha no ka hoʻohaunaele, ke kalaiwa ʻana me ka loaʻa ʻole o ka laikini a me ka hoʻokuli i ka mākaʻi. A aia nō hoʻi ke noiʻi aku nei i ka hana a kekahi mau kānaka holo paikikala uila a pēlā pū me ka mokokaikala uila.

Eia mai kā kākou ʻōlelo noʻeau,

ʻEleʻelepī ka waha o kānaka.

He ʻōlelo kēia no ke kanaka waha koʻu.

ʻĀpono ʻia ka piʻi ʻana o ka uku o nā luna aupuni.

ʻO ia aʻela kekahi poʻo nūhou o kēia lā, ka lā 14 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

Ua ʻāpono lōkahi ke Komikina Uku Hana i ka piʻi ʻana o ka uku o nā luna aupuni. E piʻi ka uku o ke kiaʻāina a ka 27% ke hiki aku i ka makahiki 2030, a ʻo nā luna kānāwai, he 32%. ʻO ka lālā o ka ʻaha ʻōlelo, he 44% ka piʻi ʻana ma loko o nā makahiki ʻelima. Akā, e hoʻomaka ka piʻi ʻana o ka uku hana o ka luna kau kānāwai i ka lā mua o Ianuali o ka makahiki 2027, ma hope o ke koho pāloka ʻana o ka makahiki 2026. He 32% ma ka piʻi mua ʻana, a ma hope mai, he 4% o ka makahiki a hiki i ka makahiki 2030.

Ma ka puni mua o ka Hoʻokūkū Kono o ka Outrigger, pau koke iho nei ʻo Ball State, ka hui helu 12, i nā Kāne Ānuenue ma ka hoʻokūkū pōpō paʻipaʻi o ka pō Pōʻahā nei ma ka helu ʻai he 25 i ka 19, he 25 i ka 13 a he 29 i ka 27. He 14 hoʻopio a Kristian Titriyski, a pēlā pū me Louis Sakanoko. A he 11 a Adrien Roure. A he ʻehiku ʻeki o Hawaiʻi i ia ahiahi. ʻO Tread Rosenthal, he 36 āna hānai. ʻO Hawaiʻi ka hui helu 3 o ke ao nei. E kūʻē aku ana ʻo Hawaii iā Penn State, ka hui helu 19, i kēia ahiahi. Ua suipa lilo ʻia ʻo Penn State e Kaleponi Hema, ka hui helu ʻelima, ma ka puni mua.

Eia mai kā kākou ʻōlelo noʻeau,

ʻOiai e nānā mai ana nō nā maka.

E mālama pono ke kanaka i kona wā e ola ana.

E pilikia auaneʻi nā keiki a kākou.

ʻO ia aʻela kekahi poʻo nūhou o kēia lā, ka lā 12 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Kāpae aku nei ka poʻe lawelawe hana a ka Pelekikena Donald Trump i kekahi mau polokalamu pekelala ʻelua e kākoʻo pono ana i ke kūʻai ʻana i nā mea ʻai kūloko a i ka hānai pono ʻana o ke kula aupuni i ke keiki. He $660 miliona kālā e ʻoki ʻia ana. ʻAkahi nō a komo ʻo Hawaiʻi i loko o kekahi o ia mau polokalamu i ka makahiki 2022. A i ka Pōʻalua nei, kūkala aʻela ka ʻOihana Hoʻonaʻauao o ʻAmelika Hui Pū ʻIa, e kaiehu ʻia ana he 1,300 o kona mau limahana. ʻAneʻane i ka hapalua like o kona mau limahana a pau.

Ua haʻalele ihola ke kaʻi ʻalihikūlele i ka hui pōpō pekupeku o Hawaiʻi ma muli o nā kumu pilikino. ʻO Cade Socha kona inoa. ʻAkahi nō a lilo ʻo Socha, ʻo ia ke kaʻi ʻalihikūlele ʻoiai, hoʻomaha loa ihola ʻo Dan Morrison i Kēkēmapa nei. ʻAʻole i komo ʻo Socha i nā pule mua

ʻekolu o ka hoʻomaʻamaʻa kupulau ma muli o kona loaʻa i ka maʻi palū. A ma hope o kēlā, holo ihola kona manaʻo, e haʻalele loa i ka polokalamu pōpō peku o Hawaiʻi. A ʻo kekahi mea e haʻalele ana i ka hui pōpō peku o Hawaiʻi nei, ʻo ia ka mea peku lilo. ʻO Lucas Borrow kona inoa, a ʻaʻole i ʻae ʻia kāna noi e pāʻani pōpō peku i ke ono o kona mau makahiki. No laila, e ʻimi ana ʻo ia i wahi e pāʻani ai ma ke ʻano he loea.

Eia mai kā kākou ʻōlelo noʻeau,

E moni i ke koko o ka inaina, ʻumi ka hanu o ka hoʻomanawanui.

ʻO ia hoʻi, e ahonui.

E kaiehu ʻia ana he 1,000 limahana hou o ke Keʻena Lewa me Kai o ʻAmelika.

ʻO ia aʻela kekahi poʻo nūhou o kēia lā, ka lā 10 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma nā pule i kaʻa hope aku nei, he 1,300 paha limahana o ke Keʻena Lewa me Kai o ʻAmelika i haʻalele iho i ko lākou mau kūlana hana a i kaiehu ʻia paha e ka poʻe lawelawe hana a ka Pelekikena Donald Trump. A he manaʻo ko Trump mā e kaiehu aku i 1,000 hou limahana. He 13,000 ka nui o nā limahana o ke Keʻena Lewa me Kai o ʻAmelika. A ke hui pū ka nui o nā limahana i haʻalele a i kaiehu ʻia me nā limahana e hoʻokuʻu koke ʻia ana, he 20 pākeneka a emi mai o ka nui o nā limahana o ia keʻena. A he mea kūpilikiʻi ia ʻoiai, e hiki koke mai ana ka wā makani pāhili.

Ua kū kekahi ʻīlio i ka pōkā pipipi i ka lā 20 o Ianuali ma Hauʻula. ʻO Akua ka inoa o ua ʻīlio lā a lawe koke ʻia akula ʻo ia i ka haukapila holoholona a ma laila ʻo ia i make ai. Aia nō ka mākaʻi ke ʻimi akula i ka mea nāna i kī aku iā Akua i ka pū pipipi. ʻO ka hoʻomāinoino holoholona ma ke kekelē ʻekahi, he peloni papa C ia, a ʻo ka hoʻopaʻi kiʻekiʻe loa, he ʻelima makahiki e noho paʻahao ai.

ʻO ka hui holo moku peʻa o ke Kulanui o Hawaiʻi, ka hui kāne me wahine, ʻo ia ka helu ʻelua ma ka Heihei Moku Uapo o ke Kūlanakauhale o nā ʻĀnela i mālama ʻia aku nei ma Kāna Pedero i Kaleponi. ʻO Erik Anderson ke kahu o ka moku. A eia mai ka poʻe hoʻokele moku, ʻo Kees Horn, ʻo Sophia Shaeffer, ʻo Malia Johnson, ʻo Everett McAvoy, ʻo Vivian Bonsager, ʻo Arden Rathkopf a me Grady Van Ness. Ua lilo ka Makana Helu ʻEkahi i ke Kulanui o Kaleponi Hema.

Eia mai kā kākou ʻōlelo noʻeau,

ʻAwapuhi lau pala wale.

He ʻōlelo kēia no ke kanaka nāwaliwali a no kekahi mea hala koke a pau koke paha kona pono.

Hopu ʻia kekahi no ka hoʻomāinoino i kāna wahine.

ʻO ia aʻela kekahi poʻo nūhou o kēia lā, ka lā 7 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hopu ʻia aku nei ʻo Kealiiwainue “Kealii” Mamala a hoʻopiʻi ʻia no kekahi mau hewa hoʻomāino kūloko. He 25 ona hewa i hoʻopiʻi ʻia ai, ʻo ka hoʻopaʻahao hewa, ʻo ka limanui ma ke kekelē ʻelua ʻekolu manawa, ka hoʻomāino kūloko he 14 manawa a me kekahi mau hewa hou aku. E noi ana ka loio hoʻopiʻi o ke Kalana ʻo Hawaiʻi, ʻaʻole e hoʻokuʻu ʻia aku ʻo Mamala ma ka pela.

Ua paʻa ihola ka inoa moho pōpō hīnaʻi o ka ʻAhahui Komohana Nui i nā Wāhine Ānuenue ma muli o ko lākou kāʻili ʻana aku i ke eo ma ke kūʻē ʻana iā Pekafila i ka Pōʻahā nei. ʻO ka helu ʻai, he 66 i ke 51. He 12 ʻai a Kelsie Imai. ʻO Lily Wahinekapu, he 11 āna ʻai, a ʻo Imani Perez, he 10 ʻai. A ʻo Jovi Lefotu, he ʻewalu āna ʻai, a pēlā pū me Brooklyn Rewers. ʻO ke kolu kēia o ka inoa moho o ka ʻAhahui Komohana Nui i lilo iā Hawaiʻi ma nā makahiki ʻehā i kaʻa hope aku nei. E kūʻē aku ana ʻo Hawaiʻi iā Nolika i kēia Pōʻaono. A inā e hāʻule ʻo Hawaiʻi, a e lanakila ʻo Ilewaina ma luna o Davisa i kēia Pōʻaono, e kū like ana ʻo Hawaiʻi lāua ʻo Davisa, ʻo lāua nā inoa moho o ka ʻAhahui Komohana Nui.

E hoʻomaka ana ka hoʻokūkū inoa moho o ka ʻAhahui Komohana Nui i kēia Pōʻakolu aʻe. ʻOiai, ʻo Hawaiʻi ka helu ʻekahi o ia ʻahahui, e holo pololei ana i ka puni ʻelua, a i ke kakahiaka o kēia Pōʻalima aʻe kona hoʻokūkū ʻana.

Eia mai kā kākou ʻōlelo noʻeau,

Māʻewaʻewa i ka hale kuleana ʻole.

Mai lilo ʻoe i puni wale, o lilo ʻoe i kamaliʻi.

Mai puni wale aku. E nānā a hoʻolohe pono, a noʻonoʻo pono i ka maikaʻi a me ka maikaʻi ʻole paha.

He mau Kāne Ānuenue pāʻani pōpō paʻipaʻi i kau i ka hano hāweo.

ʻO ia aʻela kekahi poʻo nūhou o kēia lā, ka lā 5 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō ka mākaʻi o Hawaiʻi moku ke ʻimi aʻela i ke kanaka i manaʻo ʻia nāna i kī aku iā Latisha Soares i ka pū. Lawe ʻia akula ʻo Soares i ka haukapila a ma laila ʻo ia kahi i make ai i ka wanaʻao o ka Pōʻalua nei. ʻO Isaiah Kaleo Jiaan Fourshey ka inoa o ke kanaka a ka mākaʻi e ʻimi aʻela. No Mauna Huʻihuʻi ʻo Fourshey. A he 5 ona kapuaʻi, he 10 ʻīniha, a he 165 ona paona. He ʻeleʻele kona lauoho a he maka mākuʻe kona. A he pū nō kāna, a manaʻo ʻia, he kanaka nō ia e hoʻopōʻino i kekahi. Inā he ʻike paha kāu, e kāhea aku i ka helu 911, a i ka Mākaʻi Kiu Duane Rapoza ʻŌpio ma ka helu (808) 961-2383. A inā he manaʻo kou e hoʻonalo i kou inoa, e kāhea aku iā Crime Stoppers ma ka helu (808) 961-8300.

I ka Pōʻalua nei, hoʻopiʻi aku nei ke kiule nui i kekahi mau wāhine ʻelua o Oʻahu nei no ka make ʻana o Sarai Perez-Rivera. He ʻekolu wale nō makahiki o Perez-Rivera. Ua hoʻopiʻi ʻia aku nei ʻo Janae Perez lāua ʻo Ashleigh Utley no ka pepehi kanaka ma ke kekelē ʻelua, ka limanui ma ke kekelē ʻekahi, a me ka ʻaihue kanaka. A hoʻopiʻi ʻia nō hoʻi lāua no ka hana ʻino i nā kaikunāne ʻelua o Perez-Rivera a me kona muli. I kēia manawa, aia nō ke hoʻopaʻa ʻia aku nei ʻo Perez lāua ʻo Utley ma ka Hale Paʻahao o Oʻahu me ka pela ʻole.

ʻEkolu mea i kau i ka hano hāweo o ka ʻAhahui Komohana Nui. ʻO Kristian Titriyski, ʻelua makana i lilo aku nei iā ia. ʻO Titriyski ka ʻOi o nā Haumāna Hou o ka Pule a ʻo ia nō hoʻi ka Mea Pāʻani Kūlele ʻOi o ka Pule. ʻO ia nei ka helu ʻeono ma ka hoʻopio i kēia manawa ma ʻAmelika a puni. ʻO ʻEleu Choy ka lua i kau i ka hano hāweo. ʻO ia ka Mea Pāʻani Kūpale ʻOi o ka Pule. A ʻo ke kolu, ʻo ia ʻo Tread Rosenthal, ʻo ia ka Mea Hānai ʻOi o ka Pule. A ʻo ke kolu ia o ka manawa i lilo ai ia hanohano iā Rosenthal i kēia kikina nei.

Eia mai kā kākou ʻōlelo noʻeau,

Lele i Kona; lele i Koʻolau.

He ʻōlelo kēia no ke kanaka e ʻimi ʻia ana a paʻakikī kona loaʻa ʻana mai.

Ua piha nā makahiki he 50 i ka Hōkūleʻa.

ʻO ia aʻela kekahi poʻo nūhou o kēia lā, ka lā 3 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻO ka piha makahiki 50 kēia o ka Hōkūleʻa. I ka lā 8 o ka mahina ʻo Malaki o ka makahiki 1975, ua hoʻolana ʻia akula ua waʻa kaulua nei ma ke Kai Kūʻono o Kāneʻohe. A i ka makahiki 1976, na Loea Pius “Mau” Piailug i hoʻokele i ka Hōkūleʻa mai Hawaiʻi aku a i Kahiki ma ke kilo hōkū. A i ka makahiki 1980, na Nainoa Thompson i hana like. A ma ia hope mai, he ʻumi kūmālua a ʻoi nā manawa o Thompson i hoʻokele ai i kekahi ʻāina. A ua holo aku ka Hōkūleʻa i nā ʻāina like ʻole a puni ka honua. A māhuahua aʻela nā mea waʻa o ia waʻa kaulua, he 400 a ʻoi. I kēia Pōʻaono, ka lā 8 o Malaki, e mālama ʻia ana ka Hoʻolauleʻa Waʻa o Kualoa me Hakipuʻu. E mālama ʻia ana ma ka Pāka ʻo Kualoa mai ka hola 8:00 o ke kakahiaka a i ka hola 4:00 o ka ʻauinalā. A i ka lā 9 o Malaki, aia ka Pāʻina Hoʻoulu Kālā no ka Piha Makahiki 50 o ka Hōkūleʻa. I ka lā 10, mai ka hola 3:00 o ka ʻauinalā a i ka hola 6:00, e mālama ʻia ana ka hoʻomākaʻikaʻi ʻana i ka Hōkūleʻa. Aia ma ke Kikowaena ʻAha o Hawaiʻi. A i ka lā 14 o Malaki, aia ana “Ka Lā Piha Makahiki 50 o ka Hōkūleʻa: E Ola Mau” ma ka Hale Hōʻikeʻike ʻo Bīhopa mai ka hola 5:00 o ka ʻauinalā a i ka hola 9:00. He $10 o ke kikiki ke kūʻai ʻia ma mua o ia lā, a he $15 o ke kikiki ma ka ʻīpuka.

ʻElua lā i luku wale aku ai nā Kāne Ānuenue iā Irvine, ka hui helu ʻekolu, ma ka pāʻani pōpō paʻipaʻi. I ka Pōʻalima nei ka mua, ma ka helu ʻai he 25 i ka 21, he 26 i ka 24, a he 25 i ka 22. A hana hou ʻia i ka Lāpule nei ma ka helu ʻai he 25 i ka 22, he 25 i ka 19, a he 25 i ka 20. Ma ia ahiahi, no nā Ānuenue, he 19 hoʻopio a Kristian Titriyski. A he 12 hoʻopio a Louis Sakanoko.

Eia mai kā kākou ʻōlelo noʻeau.

ʻĀhaʻi akula i ka welowelo.

ʻO ia hoʻi, ua lanakila.

E naue aku i ka Hale Hana Keaka ʻo Kennedy no ka nānā ʻana iā “Rent.”

ʻO ia aʻela kekahi poʻo nūhou o kēia lā, ka lā 28 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.

ʻElua Ola Ka ʻĪ o ka lā ʻapōpō, ka lā mua o Malaki. Aia ʻo Ola Ka ʻĪ Kauaʻi-Niʻihau ma ke Kikowaena Kūʻai ʻo Kukui Grove. I ka hola 10:00 ana e hoʻomaka ai a i ka hola 3:00 ana e pau ai. A ʻo Ola Ka ʻĪ Kona, aia ana ma ke Kikowaena Kūʻai ʻo Keauhou a i ka hola 9:00 ana e hoʻomaka ai. A e pau ana i ka hola 3:00.

Aia ana ka hana keaka ʻo “Rent” ma ke kahua nui o ka Hale Hana Keaka ʻo Kennedy. I kēia ahiahi ana e hoʻomaka ai. ʻO ka makamua ia ma nā makahiki he ʻumi kūmāhā i kaʻa hope aku nei e hōʻikeʻike ai ke Keʻena Hana Keaka me Hulahula o ke Kulanui o Hawaiʻi ma Mānoa i ka hana keaka ʻana i kekahi hana keaka mele nui o ke Alanui Laulā. A ʻo ka makamua nō hoʻi ia o ka hana ʻana o Joshua “Baba” Kamoaniʻala Tavares ma ke ʻano he luna kuhikuhi. Ua puka ʻo Tavares mai ke Kulanui o Hawaiʻi ma Mānoa me ke Kekelē Lae Oʻo Hana Noʻeau Walea i ka makahiki 2024. A ʻakahi nō ʻo ia a hai ʻia i polopeka ma ke Keʻena Hana Keaka me Hulahula ma ke Kulanui o Hawaiʻi ma Mānoa. Aia ana ʻo “Rent” ma ka hapalua hola ʻehiku o kēia ahiahi a me ke ahiahi o nā lā 7 me 8 o Malaki a i ka hola 2:00 o ka ʻauinalā o ka lā 9 o Malaki. ʻO ka hana keaka o ke ahiahi o ka lā ʻapōpō, ua pau nā kikiki i ke kūʻai ʻia. He $25 o ke kikiki. He $22 o ke kikiki no ke kumu a me ka limahana o ke Kulanui o Hawaiʻi, no ka poʻe pūʻalikoa, a me ka poʻe ʻelemākule. He $15 o ke kikiki no ka poʻe ʻōpiopio a keiki paha. A he $8 o ke kikiki no ka haumāna Kulanui o Hawaiʻi ke hōʻike ʻia ke Kāleka Hōʻoia Haumāna.

Hopu ʻia aku nei ʻelua mau wāhine i ka ʻauinalā Pōʻahā nei no ka waiho wale aku i ke kaikamahine a make loa i ka pōloli. ʻO Sarai Perez-Rivera ka inoa o ua kaikamahine lā a he ʻekolu wale nō ona makahiki. A ʻo Janae Perez lāua ʻo Ashleigh Utley nā wāhine i hopu ʻia. ʻO Perez ka makuahine o Perez-Rivera ke kaikamahine i make. Ua hopu ʻia aku ʻo Perez lāua ʻo Utley ma lalo o ka hoʻohuoi i ka pepehi kanaka ma ke kekelē ʻelua, ka limaikaika ma ke kekelē ʻekahi, ka ʻākeʻakeʻa i ka hoʻopiʻi ʻana a me ka ʻaihue kanaka. He ʻekolu keiki hou a Perez, akā, ʻaʻole lākou ma lalo o kona malu i kēia manawa ma muli o ia mau hoʻopiʻi ʻana.

Eia mai kā kākou ʻōlelo noʻeau,

Hana a lau a lau ke aho, a laila, loaʻa ka iʻa kāpapa o ka moana.

ʻO ia hoʻi, e hoʻomākaukau pono no ka papahana nui.

Nui nā kānaka o Maui i kaiheu ʻia iho nei.

ʻO ia aʻela kekahi poʻo nūhou o kēia lā, ka lā 26 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

Aloha nō ka ʻAhahui Kūʻē i ka Hoʻomāinoino o Maui. Ua ʻoki ʻia iho nei kahi puʻu kālā pekelala i kēlā pule aku nei. He puʻu kālā ia e uku ana he ʻekolu mau limahana, a ʻo kekahi mea minamina, he iwakālua kūmāhā wale nō hola a emi mai e hoʻokuʻu ʻia ai ia mau limahana. ʻO ka puʻu kālā, no loko mai ia o kahi polokalamu nāna e kōkua i ke kanaka i kūpilikiʻi i ka ulia hoʻopōʻino, ua pau paha kona wahi hana a wahi noho paha. A ʻo kekahi pilikia, ʻo nā wahi mālama holoholona a puni kēia pae ʻāina, ua piha ʻū. Aia nō ka ʻAhahui Kūʻē i ka Hoʻomāinoino o Maui ke ʻimi akula i wahi e mau ai ka hana a ia mau limahana ʻekolu ma laila.

I ka Pōʻakahi nei, kaiehu ʻia iho nei he 131 mau kānaka o Maui i pau ko lākou mau hale i ke ahi o ka lā 8 o ʻAukake o ka makahiki 2023. Aia lākou a pau ma lalo o ia polokalamu pekelala nāna e kōkua i ke kanaka i kūpilikiʻi i ka ulia hoʻopōʻino. A e hana ana lākou ma nā hana e mōhala hou ai ʻo Maui ma hope o ia ahi weliweli. I ka Pōʻakahi nei lākou i hoʻomaopopo ʻia ai, ua pau loa ko lākou mau kūlana hana, ʻaʻole e hoʻi hou i ko lākou mau wahi hana. I kēia Pōʻaono, mai ka hola 9:00 o ke kakahiaka a ke kau ʻana o ka lā i ka lolo, e mālama ʻia ana kekahi fea ma ke Kikowaena ʻOhana ma Wailuku, kahi e kōkua ʻia ai nā kānaka ma ka ʻimi ʻana i hana hou. A paipai ʻia nā kānaka i kaiehu ʻia iho nei e kāhea i ka helu 808-877-6555 no ke kōkua ʻana ma ke noi ʻana i nā pono limahana kaiehu ʻia. A ʻo ke Kikowaena ʻOihana ʻAmelika Maui kekahi e kākoʻo. Aia nō ma ka helu wahi 110 Alanui ʻAlaʻihi, helu lumi 209 ma Kahului a ma ka pūnaewele, mauicounty.gov/1116/Maui-American-Job-Center.

Eia mai kā kākou ʻōlelo noʻeau,

He ʻūlei kolo.

He ʻōlelo kēia no ke kanaka ikaika a pūkonakona.