Ke Aolama

ʻAʻole i pau ka pōʻino i ka ulia pauka pōkā o Āliamanu.

ʻO ia aʻela kekahi poʻo nūhou o kēia lā, ka lā 7 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.

I ke kakahiaka Pōʻakolu nei, ua make aku nei kekahi wahine hou ma muli o nā ʻeha kūpilikiʻi i ka ulia pauka pōkā o ka pāʻina ma Āliamanu i ka lā Hape Nū Ia. ʻO ke ono ia o ke kanaka i make ma muli o ia ulia. A ma ka Pōʻakolu nei nō hoʻi ma ka ʻAha Kenekoa, ʻāpono aku nei kekahi mau kōmike i nā pila e hoʻonui ana i ka hoʻopaʻi no ka poʻe kuni i nā ahi kao kū ʻole i ke kānāwai a he mau pila hoʻi e maʻalahi ai ka hoʻopaʻi ʻana a me ka hopu ʻana i ia mau kānaka.

A i kēlā Pōʻalima aku nei, ua hopu ʻia he ʻehā mau kānaka hou i manaʻo ʻia, ua ʻae lākou i kā lākou mau keiki e kuni i ka pauka pōkā ma ia pāʻina ma Āliamanu. Ua hopu ʻia ʻo Demi Alyssa Mendoza lāua ʻo Dao Rin no ka hoʻohuoi ʻia, he hoʻopōʻino noʻonoʻo ʻole kā lāua a me ka hoʻopōʻino ʻana i ke keiki oʻo ʻole a me ka hewa hoʻopahū pauka pōkā. Ua hopu ʻia nō hoʻi ʻo Michael ʻŌpio Reyes Cabato lāua ʻo Aidalys Britanee P. Pe Benito no ka hoʻohuoi ʻia, he hoʻopōʻino kā lāua i ke keiki oʻo ʻole. A ʻo Cabato, no ka hewa hoʻopahū pauka pōkā nō hoʻi. ʻO ka mea pōmaikaʻi, ʻo nā keiki a ia mau mākua ʻehā, ʻaʻole i ʻeha i ia pahū nui ʻana o nā mea a pau i ia pō.

E kāpae ana ke Kahua Ola Kino o ka Mōʻīwahine i nā kūlana he 100 paha ma kona mau haukapila. I mea ia e mau wale ai ka lawelawe ʻana i nā hana a e maʻa aku ai i ka loli ʻana o ke au o ka manawa. ʻAʻole i hōʻike mai ke Kahua i ke ʻano o nā kūlana e kāpae ʻia ana, a i ko lākou wā e kāpae ʻia ai. ʻO ka hapanui o nā limahana e kaiehu ʻia ana, he uniona ʻole.

Eia mai kā kākou ʻōlelo noʻeau,

He maoli pua lehua i ka wēkiu.

He ʻōlelo kēia no ke kanaka uʻi.

ʻO Tulsi Gabbard ana paha kekahi o nā luna ma lalo o ka Pelekikena Donald Trump.

ʻO ia aʻela kekahi poʻo nūhou o kēia lā, ka lā 5 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

I kēia Pōʻaono, ʻelua Ola Ka ʻĪ. ʻO kekahi, aia ma Hilo ma ke Kikowaena Kūʻai ʻo ke Kamāliʻi Kūhiō. I ka hola 10:00 ana e hoʻomaka ai. A i ka hola 3:00 ana e pau ai. ʻO ka lua, aia ma Oʻahu nei, ma ke Kikowaena Kūʻai o Kāhala. I ka hola 11:00 ana e hoʻomaka ai, a i ka hola 2:00 ana e pau ai. E naue aku i kekahi no ka hoʻolauleʻa ʻana. Aia ana nā mea hoʻohauʻoli, nā pāʻani ʻōlelo Hawaiʻi, ka hoʻokūkū haʻi ʻōlelo, a me nā mea like ʻole.

Ua kākoʻo kekahi kōmike Kenekoa i ka lilo ʻana o Tulsi Gabbard, ʻo ia ka luna o ke keʻena nāna e noiʻi i nā mea hoʻopōʻino ʻAmelika Hui Pū ʻIa. Kānalua kekahi mau luna kau kānāwai, akā, ma ke koho pāloka ʻana, he 9 i ʻae, ʻo nā Lepupalika ia, i ka lilo ʻana o Gabbard, a he 8 i hōʻole, ʻo nā Kemokalaka hoʻi. I kēia manawa, na ka ʻAha Kenekoa piha ke koho ʻana, ʻaʻole naʻe i paʻa ka lā. ʻO kekahi kumu i kānalua ai kekahi poʻe, ma mua, he mau ʻōlelo kā Gabbard e kākoʻo ana i ka hoa paio o ʻAmelika Hui Pū ʻIa.

ʻO Kamehameha ka inoa moho pōpō wāwae o ka ʻAhahui Kula Uku o Honolulu a ʻo Punahou ka lua. Akā, i ka Pōʻakahi nei, ʻaʻohe lua o Punahou. Lilo aku nei ka inoa moho pōpō wāwae o nā kaikamāhine o ka Māhele I i ua kula lā ma ka helu ʻai he ʻakahi i ka hua kakā a Kamehameha. Na Maya Yoshimura ka ʻai ma ka peku ʻana i ka peku hoʻopaʻi ma ka 10 minuke iwakālua kekona. ʻO ke kolu ia o ka inoa moho Māhele I i lilo iā Punahou ma hope kekahi o kekahi.

Eia mai kā kākou ʻōlelo noʻeau,

E kuahui like i ka hana.

ʻO ia hoʻi, e alu like.

Kau aku nei ʻo Kalani Peʻa i ka hano hāweo.

ʻO ia aʻela kekahi poʻo nūhou o kēia lā, ka lā 3 o Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻElua pila ma ka ʻAha ʻŌlelo Kūloko e koi ana i ka haumāna o ke Kula Lāʻau Lapaʻau ʻo John A. Burns nāna e uku i ka uku kula no ka poʻe kamaʻāina, e hana ʻo ia ma ia ʻoihana no nā makahiki ʻelua ma hope o kona puka ʻana aku mai ia kula lāʻau lapaʻau. A inā ʻaʻole ʻo ia e hana pēlā, e hoʻokaʻa aku ʻo ia i ke koena o ka uku kula no ka malihini. ʻO ka uku kula no ke kamaʻāina, he $36,372 o ka makahiki. A ʻo ka uku kula no ka malihini, he ʻaneʻane pālua i ko ke kamaʻāina, he $71,328. Aia nō ka Pila Hale 221 lāua me ka Pila Kenekoa 101 ke kūkākūkā ʻia nei ma ka ʻAha ʻŌlelo i kēia manawa. He mau pilikia, a ʻo kekahi, ʻo ke ala lapaʻau a ka haumāna e koho ai, i kekahi manawa, ʻaʻole ia ʻano lapaʻau ʻana ma Hawaiʻi nei, a no laila, he pono ke hana ʻia ma ʻAmelika.

Lilo hou aku nei ka Makana Grammy iā Kalani Peʻa ma ka māhele Pāleo Mele Kuʻuna no kāna pāleo ʻo “Kuini.” Ua pau kāuna. ʻO ka hā ia o ka Makana Grammy i lilo iā ia. ʻO ka mua, aia i ka makahiki 2017 no ke pāleo ʻo “E Walea,” a ʻo ka lua, i ka makahiki 2019 no ke pāleo ʻo “No ʻAneʻi,” a ʻo ke kolu, i ka makahiki 2022 no ke pāleo ʻo “Kau Ka Peʻa.”

A ʻakahi nō a lilo aku ka Makana Grammy iā Beyoncé ma ka māhele Pāleo ʻOi o ka Makahiki no kāna pāleo ʻo “Cowboy Carter.”

Eia mai kā kākou ʻōlelo noʻeau,

Hāʻale i ka wai a ka manu.

He ʻōlelo kēia no ke kanaka uʻi.

Hoʻomau ʻia ka ʻaelike o Robyn Ah Mow.

ʻO ia aʻela kekahi poʻo nūhou o kēia lā, ka lā 31 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

He mau kānaka hou kai hopu ʻia aku nei i ka Pōʻakolu nei no ia mau pauka pōkā i pahū ma ka lā mua o Ianuali ma 4144 Keaka Drive i Āliamanu. ʻEhā lākou, ʻelua mau kāne me kā lāua mau wāhine. Hopu ʻia ʻo Jessica Kaye Ferrer lāua ʻo Cedric Turalva Benigno ma lalo o ka hoʻohuoi no ka hoʻopōʻino ʻana i ke keiki oʻo ʻole, ka hoʻopōʻino noʻonoʻo ʻole a me ka hewa hoʻopahū pauka pōkā. ʻEhā keiki a Ferrer lāua ʻo Benigno, a ua ʻeha lākou keiki i ka pahū ʻana ma ia lā, lawe ʻia akula i ka haukapila, lapaʻau ʻia ihola a hoʻokuʻu ʻia. ʻO Daniel Ikaika Combis lāua ʻo Sherri Ho, ua hopu ʻia ma lalo o ka hoʻohuoi no ia mau hewa like o Ferrer lāua ʻo Benigno i hopu ʻia ai. ʻElua keiki a Combis lāua ʻo Ho, ʻaʻole naʻe i ʻeha kā lāua mau keiki i ka pahū ʻana. Ma ka pō o ia ulia, ua kāʻili ka mākaʻi i nā paona he 500 a ʻoi o ka pauka pōkā mai luna mai o nā kaʻa o nā kānaka i hele i ka pāʻina a ma kahi kūkulu kaʻa o ia wahi.

Kūkala aʻela ke Kulanui o Hawaiʻi, e hoʻolōʻihi ʻia aku ana ka ʻaelike o ke poʻo kumu aʻo pōpō paʻipaʻi Robyn Ah Mow. E hoʻomau ʻia ana a pau ke kikina 2027. Ua alakaʻi ʻo Ah Mow i nā Wāhine Ānuenue i nā inoa moho ʻAhahui Komohana Nui he ʻelima ma hope kekahi o kekahi. A ua komo aku nā Wāhine i ka hoʻokūkū inoa moho o ka ʻAhahui ʻĀlapa o nā Kulanui o ʻAmelika Hui Pū ʻIa i nā kikina a pau mai ka makahiki 2017, ka makahiki hoʻi i lilo ai ʻo Ah Mow ʻo ia ke poʻo kumu aʻo pōpō paʻipaʻi.

Eia mai kā kākou ʻōlelo noʻeau,

ʻAʻohe pilipili ʻāina wale mai, aia ka iʻa i ke kai.

He ʻōlelo kēia no ke kanaka hoʻomāʻiuʻiu i kona mau hoa a i kona pili koko paha.

E kāpae ʻia ana kekahi inoa ʻāina ʻōiwi ma muli o ke kauoha o ka pelekikena hou o ʻAmelika Hui Pū ʻIa.

ʻO ia aʻela kekahi poʻo nūhou o kēia lā, ka lā 29 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma ʻAmelika Hui Pū ʻIa, e hoʻololi ʻia ana ka inoa o ka mauna kiʻekiʻe loa ma ʻAmelika ʻĀkau. Ma ke kauoha a ka Pelekikena Donald Trump, e kapa ʻia ana ʻo Mauna Makinalē. ʻO ia nō kona inoa ma ʻAmelika Hui Pū ʻIa mai ka makahiki 1917, ka makahiki hoʻi i pūlima ʻia ai i kānāwai, a i ka makahiki 2016, ka makahiki hoʻi i kapa hou ʻia ai ma kona inoa kahiko, ka inoa o nā kānaka ʻōiwi o ia ʻāina, ʻo Denali. Na ke Kuhina Kālaiʻāina i hoʻoholo e hana pēlā i ka makahiki 2015. Akā, ma muli o kahi pelekikena hou, e kāpae hou ʻia ana ka mea ʻōiwi. A ke hoʻololi ʻia ma ka Kahua Hoʻonohonoho Inoa ʻĀina, e hoʻololi ana ʻo Google Maps i ka inoa. ʻO kekahi inoa e hoʻololi ʻia ma muli o ke kauoha o ka pelekikena, ʻo ia ka inoa o ke Kaikūʻono o Mekiko, a ʻo ka inoa hou, ʻo ke Kaikūʻono o ʻAmelika.

I ka Pōʻalua nei, he kanaka hou kai make iho nei ma muli o ia pahū ʻana o ka pauka pōkā ma Āliamanu i ka lā mua o kēia makahiki nei. Aia nō ʻo ia ma kekahi haukapila ma ʻAlikona i ia manawa, ʻoiai, ua lawe ʻia akula he ʻeono mau kānaka i wela i ia ulia i kekahi kikowaena lapaʻau wela o ʻAlikona. A ʻo ke kanaka i make iho nei kekahi o lākou. ʻO ka lima ia o ke kanaka i make ma muli o ia ulia pahū.

He ulia pauka pōkā kai ʻike hou ʻia iho nei i ka pō Pōʻakahi nei. Ua ʻeha kūkonukonu ihola kekahi wahine i ka pahū ʻana o kekahi pauka pōkā. Ma hope o ke kuni ʻana o ia wahine i ka pauka pōkā, pahū hewa aʻela a kū ihola nā lima o ia wahine i ke okaoka pōkā, a pēlā pū me kona mau wāwae a me kona umauma.

Eia mai kā kākou ʻōlelo noʻeau,

He heʻe ka iʻa, he iʻa kino palupalu.

He ʻōlelo kēia no ke kanaka nāwaliwali.

Hopu ʻia iho nei kekahi mau kānaka no ka pahū ʻana o nā pauka pahū ma Āliamanu.

ʻO ia aʻela kekahi poʻo nūhou o kēia lā, ka lā 27 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua hopu ʻia iho nei kekahi kāne a me kāna wahine ma muli o kā lāua hana ma ia pahū ʻana o nā pauka pōkā ma ka Lā Makahiki Hou ma Āliamanu. ʻO Ruben T. Mateo ka inoa o ke kāne, a ʻo Jewel Ann Quines Cabras ka inoa o ka wahine. A he ʻekolu a lāua keiki. I hopu ʻia ʻo Mateo lāua ʻo Cabras ma lalo o ka hoʻohuoi no ka hoʻopōʻino noʻonoʻo ʻole, ka hoʻopōʻino i ke keiki oʻo ʻole a me ka hewa hoʻopahū pauka pōkā. He ʻeha mau kānaka i make a he nui nā kānaka i ʻeha ma muli o ia ulia. Aia nō ka mākaʻi ke noiʻi aʻela, a he mau kānaka hou paha ke hopu ʻia.

I ka Pōʻalima nei, hōʻoia aʻe nei ka ʻOihana Mākaʻi, ʻo ke kupapaʻu i loaʻa ma Ke Iki i ka ʻauinalā o kēlā Pōʻaono aku nei, ʻo ia nō ʻo Joseph “Joey” Fujioka. Ua ʻike hope loa ʻia ʻo Fujioka lāua me kona kōkoʻolua me Samantha Chun ma kekahi hale kūʻai o Mililani ma kahi o ka ʻeono minuke i koe kani ka hola 10:00 o ke aumoe o ka lā 17 o Ianuali. ʻO ka mea minamina, ʻaʻohe wahi mea a loaʻa mai o Chun.

Kāʻili aku nei ʻo Mililani i ka Inoa Moho Pōpō Wāwae o ka Māhele I o ka ʻAhahui Kula Kiʻekiʻe o Oʻahu ma ka helu ʻai he 2 i ka 1 a Kamapela. Ua hahana nō ka pāʻani ʻana. He ʻelua manawa kaulele i mālama ʻia aku nei. ʻO ka hā ia o ia inoa moho i lilo iā Mililani ma hope kekahi o kekahi. A ma ka Māhele II, lilo aku nei ka inoa moho iā Kahuku ma ka helu ʻai he 2 i ka 1 a Waipahu.

Eia mai kā kākou ʻōlelo noʻeau,

Eia aʻe ka makani Kona.

ʻO ia hoʻi, aia kekahi kanaka huhū ke hele maila.

He kauhale hou no ka poʻe kuewa.

ʻO ia aʻela kekahi poʻo nūhou o kēia lā, ka lā 24 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

ʻAkahi nō a hoʻolaʻa ʻia he kauhale no ka poʻe kuewa. ʻO ka ʻumi kūmāwalu ia o ia ʻano kauhale ma Hawaiʻi nei. ʻO Kūlia i ka Nuʻu ka inoa a aia ma Waiʻanae. A i kēia pule aʻe ana e hoʻomaka ai ka noho ʻana o nā kānaka. Ua lawa ia kauhale e noho ai nā kānaka he 80 a emi mai paha. He manaʻo ko Kiaʻāina Josh Green, e kūkulu ʻia aku he 30 kauhale a puni kēia pae ʻāina ke hiki aku i ka hopena o ka makahiki 2026. A e noi ana ʻo Green i ka ʻAha ʻŌlelo i $100 miliona ma nā makahiki ʻelua e hiki mai ana i mea e kō ai kona manaʻo.

Aia nō ka ʻOihana Mākaʻi o Honolulu ke noi aʻela i ka lehulehu i kōkua i mea e loaʻa mai ai ke pihi mākaʻi a kekahi mākaʻi a me kāna pū. Aia nō ma luna o kekahi kaʻa mākaʻi, a ʻelemio ʻia aku nei i ke kakahiaka o nehinei ma Maunalua. ʻO ka lekiō a ia mākaʻi kekahi mea i ʻaihue ʻia aku. ʻAʻole i hōʻike mai ka ʻOihana Mākaʻi i ke ʻano i lilo ai ia mau mea, ua waiho hāmama ka puka, a wāwahi ʻia aku paha ka puka aniani.

Ua loaʻa kekahi kanaka o Oʻahu nei i ka piwa haʻihaʻi iwi i kona wā i huakaʻi aku ai i ka ʻāina ʻē. A ʻo ka mua ia o kēia makahiki nei. ʻO kona ʻāina i hele aku ai, he ʻāina ia i laha ai ka piwa haʻihaʻi iwi. I ka makahiki 2024, he 16 mau kānaka o Hawaiʻi nei i loaʻa i ia piwa ma ka wā i huakaʻi ai i ka ʻāina ʻē. ʻO nā ʻōuli o ka piwa haʻihaʻi iwi, he piʻi koke ka wela o ke kanaka, he poluea, he luaʻi, he ʻōhune a me ka ʻeha o ke kino, a ʻo ka lōʻihi o ia mau ʻōuli, he ʻelua paha lā a i ka ʻehiku paha.

Eia mai kā kākou ʻōlelo noʻeau,

Ahuwale nā pae puʻu o Hāʻupukele.

He ʻōlelo kēia no kekahi mea i ahuwale.

He kupapaʻu kai loaʻa iho nei ma ke Kahakai o Ke Iki.

ʻO ia aʻela kekahi poʻo nūhou o kēia lā, ka lā 22 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua loaʻa iho nei he kupapaʻu a he mau kupapaʻu paha ma kahi e kokoke ana i ke Kahakai o Ke Iki i ka ʻauinalā o ka Pōʻaono nei. A i ka ʻauinalā o ka Pōʻalua nei, hōʻoia aʻe nei ke Kauka Noiʻi Kupapaʻu o Honolulu, he kino kanaka ke kupapaʻu. ʻAʻole naʻe i maopopo inā he hoʻokahi wale nō kino a he mau kino paha, a he mau māhele kino wale nō paha. ʻO kahi i loaʻa ai ia kupapaʻu a mau kupapaʻu paha, ma kahi kokoke nō ia i kahi e ʻimi ʻia aku ana nā ʻōpio ʻelua o Mililani, ʻo Samantha Chun lāua ʻo Joseph Fujioka, nā ʻōpio hoʻi i nalowale i ke aumoe o kēlā Pōʻalima aku nei.

Ua kaiehu ʻia mai nei ke Poʻo ʻAkimalala Linda Lee Fagan o ke Kiaʻi Kai o ʻAmelika Hui Pū ʻIa. ʻO Fagan, ʻo ia ka wahine mua i lilo i poʻo no kekahi māhele o ka pūʻalikoa. Na ke Kuhina Hoʻomalu ʻAmelika Benjamine Huffman ia hana. A ua kūkala aʻela ʻo Fox News, ʻo ke kumu o Huffman i kaiehu mai ai iā Fagan, ma muli o ke kālele ʻana o Fagan ma ke kaulike o nā kānaka like ʻole ma mua o ka hoʻomalu ʻana i nā palena o ʻAmelika. Na ka Pelekikena ma mua, ʻo Joe Biden i hoʻokohu iā Fagan, ʻo ia ke Poʻo ʻAkimala o ke Kiaʻi Kai i ka makahiki 2021.

Eia mai kā kākou ʻōlelo noʻeau,

E kuʻi ka māmā a loaʻa ʻo Kaʻohele.

ʻO ia hoʻi, e kuʻupau aku a kō ka pahuhopu.

ʻO ke Kaʻi Huakaʻi Maluhia ʻo ʻOnipaʻa, aia i kēia lā.

ʻO ia aʻela kekahi poʻo nūhou o kēia lā, ka lā 17 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

I kēia lā, e kaʻi huakaʻi ana kānaka mai Maunaʻala a i ʻIolani Hale Aliʻi i mea hoʻomanaʻo i ka piha ʻana o nā makahiki he 132 i ka hoʻokahuli ʻia ʻana o ke Aupuni Mōʻī a i mea nō hoʻi e hoʻomanaʻo ai i ko kākou Mōʻīwahine Liliʻuokalani. Hoʻomaka iho nei i ka hola 7:00 ka ʻākoakoa ʻana a me nā hana like ʻole e pono ai. A i ka hapahā i koe kani ka hola 10:00 e hoʻomaka ai ke kaʻi huakaʻi ʻana ma ke Alanui Nuʻuanu no ʻIolani Hale. A ma hope, e mālama ʻia ana nā hana like ʻole ma laila, ʻo ka hula, ka haʻi ‘ōlelo a me ka hoʻokani pila.

ʻAkahi nō a maopopo ka inoa o ke keiki nona nā iwi i loaʻa ma ka lā 29 o Iune o ka makahiki 2014. Aia nā iwi i loko o kekahi kini kila ma ka waihona lole o kekahi keʻena noho ma Waikīkī. Ua pepehi ʻia akula ua keiki lā a make he 60 makahiki aku nei a ʻoi aku paha. He kaikamahine ia. A ʻo Mary Sue Fink kona inoa a ua hānau ʻo ia ma ka lā 29 o ʻApelila o ka makahiki 1959. Manaʻo ihola nā mākaʻi kiu, pepehi ʻia aku ia kaikamahine ma waena o ka makahiki 1961 a me ka makahiki 1963.

ʻEkolu mau paʻahao i mahuka mai ka Hale Paʻahao ʻo Hale Nani ma ka mokupuni ʻo Hawaiʻi i ka lā 13 o Kēkēmapa. A i ka Pōʻalua nei, ua hopu ʻia aku nei ʻo Kawai James Pomroy. ʻO ka lua ia o ka paʻahao mahuka. E holo ana ʻo Pomroy ma ke kaʻa ma ke Ala Loa 11 a pau ihola ke kakalina ma kahi o ka māka mile 33 ma ka Pāka Lua Pele o Hawaiʻi. A ma hope mai, loaʻa aku nei ʻo Pomroy i nā lanakia o ka pāka. ʻO Joseph Canito Fernandez ka mahuka mua, a hopu ʻia i ka lā 18 o Kēkēmapa. A ʻo ke kolu o ka mahuka, ʻo Clyde Takeshi Talosaga Loa ʻŌpio, aia nō ke lele pio aʻela.

Eia mai kā kākou ʻōlelo noʻeau,

E ala! E alu! E kuilima!

He ʻōlelo kēia no ke alu like ʻana a me ka lauaki ʻana.

Aia nō kekahi ahi ana ʻole ma ke Kūlanakauhale o nā ʻĀnela.

ʻO ia aʻela kekahi poʻo nūhou o kēia lā, ka lā 13 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

Aia nō ke ahi ke pāhola aku nei ma ke Kūlanakauhale o nā ʻĀnela ma Kaleponi, a ma nā hola he 24 i hala iho nei, pau aku nei he 1,000 ʻeka i ke ahi o Pacific Palisades. Ua ʻā ʻia nō ke ahi i kēlā Pōʻalua aku nei. A ʻo ka nui o ka ʻāina i pau i ia ahi, he 22,000 ʻeka a ʻoi aku a kohu mea lā, ʻaʻole e ʻōlelo ke ahi, ua ana ia. A ke hui pū me ke ahi o Eaton, pau aku nei he 36,000 ʻeka, he 56 mile kuea hoʻi, a ʻoi, a he 14 mau kānaka i make, a ʻoi aku paha. A he 16 paha mau kānaka i nalowale. Hōʻike aʻela ke Kiaʻāina Gavin Newsom, e māhuahua auaneʻi paha ka nui o nā kānaka i make. ʻO kekahi pilikia, ua wānana ʻia, e ikaika hou ana ka pā ʻana o ka makani.

Paʻa ihola he ʻaelike kūikawā ma waena o ke Kikowaena Lapaʻau ʻo Mōʻīwahine a me ka ʻAhahui Kahu Maʻi o Hawaiʻi. A he mea maikaʻi nō ia, ʻoiai, inā ʻaʻole i paʻa ka ʻaelike, inā ua hoʻomaka ka ʻolohani ʻana o ka poʻe kahu maʻi o ia haukapila i ka hola 7:00 o kēia kakahiaka nei.

Kau aʻe nei ʻo Jaron-Keawe Sagapolutele lāua ʻo Aiden Manutai i ka hano hāweo. ʻO Sagapolutele, ka ʻalihikūlele o Kamapela, ʻo ia ka Mea Pāʻani Kūlele ʻOi o ka Makahiki nei i hala. ʻO ka nui o kāna mau ʻīā i nou ai ma kona wā pāʻani, he 10,653, a he 114 ʻai holo. A ʻo Manutai, ʻo ia ka Mea Pāʻani Kūpale ʻOi o ka Makahiki nei i hala. He ʻāʻiwa no Kahuku ma mua a laila, he ʻāwaʻa. A i kekahi manawa, pāʻani ʻo ia ma ka ʻaoʻao kūlele. ʻO Tupu Alualu ke Kumu Aʻo o ka Makahiki. ʻO ka makahiki mua ia o Alualu e hana ana ma ke ʻano he poʻo no Kāna Lui.

Eia mai kā kākou ʻōlelo noʻeau,

Ehu ahiahi.

He ʻōlelo kēia no ka wā hāpauea.