Ke Aolama

ʻO ke Kaʻi Huakaʻi Maluhia ʻo ʻOnipaʻa, aia i kēia lā.

ʻO ia aʻela kekahi poʻo nūhou o kēia lā, ka lā 17 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

I kēia lā, e kaʻi huakaʻi ana kānaka mai Maunaʻala a i ʻIolani Hale Aliʻi i mea hoʻomanaʻo i ka piha ʻana o nā makahiki he 132 i ka hoʻokahuli ʻia ʻana o ke Aupuni Mōʻī a i mea nō hoʻi e hoʻomanaʻo ai i ko kākou Mōʻīwahine Liliʻuokalani. Hoʻomaka iho nei i ka hola 7:00 ka ʻākoakoa ʻana a me nā hana like ʻole e pono ai. A i ka hapahā i koe kani ka hola 10:00 e hoʻomaka ai ke kaʻi huakaʻi ʻana ma ke Alanui Nuʻuanu no ʻIolani Hale. A ma hope, e mālama ʻia ana nā hana like ʻole ma laila, ʻo ka hula, ka haʻi ‘ōlelo a me ka hoʻokani pila.

ʻAkahi nō a maopopo ka inoa o ke keiki nona nā iwi i loaʻa ma ka lā 29 o Iune o ka makahiki 2014. Aia nā iwi i loko o kekahi kini kila ma ka waihona lole o kekahi keʻena noho ma Waikīkī. Ua pepehi ʻia akula ua keiki lā a make he 60 makahiki aku nei a ʻoi aku paha. He kaikamahine ia. A ʻo Mary Sue Fink kona inoa a ua hānau ʻo ia ma ka lā 29 o ʻApelila o ka makahiki 1959. Manaʻo ihola nā mākaʻi kiu, pepehi ʻia aku ia kaikamahine ma waena o ka makahiki 1961 a me ka makahiki 1963.

ʻEkolu mau paʻahao i mahuka mai ka Hale Paʻahao ʻo Hale Nani ma ka mokupuni ʻo Hawaiʻi i ka lā 13 o Kēkēmapa. A i ka Pōʻalua nei, ua hopu ʻia aku nei ʻo Kawai James Pomroy. ʻO ka lua ia o ka paʻahao mahuka. E holo ana ʻo Pomroy ma ke kaʻa ma ke Ala Loa 11 a pau ihola ke kakalina ma kahi o ka māka mile 33 ma ka Pāka Lua Pele o Hawaiʻi. A ma hope mai, loaʻa aku nei ʻo Pomroy i nā lanakia o ka pāka. ʻO Joseph Canito Fernandez ka mahuka mua, a hopu ʻia i ka lā 18 o Kēkēmapa. A ʻo ke kolu o ka mahuka, ʻo Clyde Takeshi Talosaga Loa ʻŌpio, aia nō ke lele pio aʻela.

Eia mai kā kākou ʻōlelo noʻeau,

E ala! E alu! E kuilima!

He ʻōlelo kēia no ke alu like ʻana a me ka lauaki ʻana.

Aia nō kekahi ahi ana ʻole ma ke Kūlanakauhale o nā ʻĀnela.

ʻO ia aʻela kekahi poʻo nūhou o kēia lā, ka lā 13 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

Aia nō ke ahi ke pāhola aku nei ma ke Kūlanakauhale o nā ʻĀnela ma Kaleponi, a ma nā hola he 24 i hala iho nei, pau aku nei he 1,000 ʻeka i ke ahi o Pacific Palisades. Ua ʻā ʻia nō ke ahi i kēlā Pōʻalua aku nei. A ʻo ka nui o ka ʻāina i pau i ia ahi, he 22,000 ʻeka a ʻoi aku a kohu mea lā, ʻaʻole e ʻōlelo ke ahi, ua ana ia. A ke hui pū me ke ahi o Eaton, pau aku nei he 36,000 ʻeka, he 56 mile kuea hoʻi, a ʻoi, a he 14 mau kānaka i make, a ʻoi aku paha. A he 16 paha mau kānaka i nalowale. Hōʻike aʻela ke Kiaʻāina Gavin Newsom, e māhuahua auaneʻi paha ka nui o nā kānaka i make. ʻO kekahi pilikia, ua wānana ʻia, e ikaika hou ana ka pā ʻana o ka makani.

Paʻa ihola he ʻaelike kūikawā ma waena o ke Kikowaena Lapaʻau ʻo Mōʻīwahine a me ka ʻAhahui Kahu Maʻi o Hawaiʻi. A he mea maikaʻi nō ia, ʻoiai, inā ʻaʻole i paʻa ka ʻaelike, inā ua hoʻomaka ka ʻolohani ʻana o ka poʻe kahu maʻi o ia haukapila i ka hola 7:00 o kēia kakahiaka nei.

Kau aʻe nei ʻo Jaron-Keawe Sagapolutele lāua ʻo Aiden Manutai i ka hano hāweo. ʻO Sagapolutele, ka ʻalihikūlele o Kamapela, ʻo ia ka Mea Pāʻani Kūlele ʻOi o ka Makahiki nei i hala. ʻO ka nui o kāna mau ʻīā i nou ai ma kona wā pāʻani, he 10,653, a he 114 ʻai holo. A ʻo Manutai, ʻo ia ka Mea Pāʻani Kūpale ʻOi o ka Makahiki nei i hala. He ʻāʻiwa no Kahuku ma mua a laila, he ʻāwaʻa. A i kekahi manawa, pāʻani ʻo ia ma ka ʻaoʻao kūlele. ʻO Tupu Alualu ke Kumu Aʻo o ka Makahiki. ʻO ka makahiki mua ia o Alualu e hana ana ma ke ʻano he poʻo no Kāna Lui.

Eia mai kā kākou ʻōlelo noʻeau,

Ehu ahiahi.

He ʻōlelo kēia no ka wā hāpauea.

He ʻopakuma kai loaʻa mai Hawaiʻi moku.

ʻO ia aʻela kekahi poʻo nūhou o kēia lā, ka lā 8 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

I ka Pōʻaono nei, loaʻa aku nei he ʻopakuma i kekahi hale kūʻai ma Kona ma ka mokupuni ʻo Hawaiʻi. He mea kūʻē kānāwai ka ʻopakuma ma Hawaiʻi nei ʻoiai he mea ia e pōʻino ai nā holoholona ʻōiwi o Hawaiʻi nei. A he mau omoola kā ka ʻopakuma i kekahi manawa, a he mau maʻi nō hoʻi. Ua hoʻouna ʻia mai ka holoholona i Oʻahu nei a hoʻomake ʻoluʻolu ʻia ihola. A ua loaʻa nō hoʻi ʻekolu ʻopakuma ma Oʻahu nei i ka makahiki i kaʻa hope aku nei. ʻO kekahi, ma Kalihi i ka mahina ʻo ʻAukake. ʻO kekahi, ma ke kaona i Honolulu ma Iulai, a ʻo ke kolu, ma ke Awa Kū Moku o Honolulu ma Iune. A mai ka makahiki 2005 a i ka makahiki 2016, he ʻelima hou ʻopakuma. Pehea lā i hiki mai ai ia mau ʻopakuma i Hawaiʻi nei?

Hōʻike aʻela ke Keʻena o ke Kauka Kolokolo o Honolulu i ka inoa o ka hā o ke kanaka i make ma ka ulia ahi kao ma Āliamanu i ka Lā Makahiki Hou. ʻO Carmelita Benigno kona inoa, a he 61 ona makahiki. ʻO nā kānaka ʻē aʻe i pio nā kukui ma muli o ia ulia, ʻo Nelie Ibarra, he 58 ona makahiki, ʻo Jennifer Van, he 23 ona makahiki, a ʻo Cassius Ramos-Benigno, he 3 wale nō ona makahiki. ʻO Ramos-Benigno, ʻakahi nō a hala i ka Pōʻakahi nei ma ke Kikowaena Lapaʻau ʻo Kapiʻolani.

Ma muli o ia ulia ahi kao mānaʻonaʻo, hāpai aʻela ke Keʻena Hoʻokō Kānāwai o Hawaiʻi i ka manaʻo e hoʻokumu ʻia kekahi hui nāna e hoʻēmi a e hoʻopau paha i ke ahi kao kūʻē kānāwai ma Hawaiʻi nei ma o ka hoʻokō ʻana i nā kānāwai e pili ana i ka mea pahūpahū a me ke ahi kao, noiʻi i ka ulia, kāʻili kū i ke ahi kao kūʻē kānāwai, a pēlā aku. ʻO kekahi mea e pono ai ia hui hoʻokō kānāwai ahi kao, ʻo ia ka puʻu kālā hou mai ka ʻaha ʻōlelo mai e uku ai i mau kūlana hana hou e hiki ai ke lawelawe pono ʻia ka hana.

Eia mai kā kākou ʻōlelo noʻeau,

E ʻau mālie i ke kai pāpaʻu, o pakī ka wai a pula ka maka.

ʻO ia hoʻi, e akahele ke hele aku i kahi i kamaʻāina ʻole.

Māhuahua ke kumu kūʻai no ka hua moa.

ʻO ia aʻela kekahi poʻo nūhou o kēia lā, ka lā 20 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Pohā ka lae i ke kumu kūʻai o ka hua moa. Piʻi loa aʻela ke kumu kūʻai. I ka Pōʻakolu nei, $5.57 o ke kākini ma ke Komohana Waena o ʻAmelika. A ma Kaleponi, he $8.85 o ke kākini. Ma muli o ka palū manu e hele nei a laha ia piʻi loa ʻana. He 35 miliona moa wahine hānau hua i make i ka palū manu i kēia makahiki nei, a ʻo ka nui o ia mau moa i loaʻa i ka mea hoʻomaʻi palū manu ma nā mahina ʻekolu i hala iho nei, he hapalua o ia 35 miliona a emi iki.

I ka Pōʻakolu nei, ua loaʻa mai nei kekahi o nā kānaka i mahuka aku nei mai ka Hale Paʻahao ʻo Hale Nani ma Hilo a hopu ʻia ihola. ʻO Joseph Fernandez kona inoa a loaʻa ihola ʻo ia ma kekahi hale ma Hawaiian Ocean View. ʻAʻole i paʻa kona mau hoa mahuka, ʻo Clyde Takeshi Talosaga Loa ʻŌpio lāua ʻo Kawai James Pomroy.

Lanakila aku nei ʻo Maryknoll ma luna o El Capitan ma ka Pōʻakolu nei ma ka helu ʻai he 72 i ke 44. A ʻo ka mea pāʻani nui o ka ʻai, ʻo Puaʻena Herrington. He 38 āna ʻai. Ua paʻa ihola he 30 ma ka hapalua mua. A me ka ʻeha nō o kona kuʻekuʻe wāwae. He ʻeono āna kī kolu i komohia, ʻekolu kāʻili, a ʻelua ʻaihue. He ʻeiwa ʻai a Rebekah Lum Kee a pēlā pū me Talitha Tupola. ʻO ka lā mua ia o ka Hoʻokūkū Kono ʻo Tony Sellitto.

Eia mai kā kākou ʻōlelo noʻeau,

Hala nā lā ʻino o ka hoʻoilo.

ʻO ia hoʻi, ua pau ka wā pilikia.

He ulia mokulele kahi i make ai ʻelua mau pailaka.

ʻO ia aʻela kekahi poʻo nūhou o kēia lā, ka lā 18 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Hoʻokuʻi akula kekahi mokulele i kekahi hale ma kahi e kokoke ana i ke Kahua Hoʻolulu Mokulele ʻo Daniel K. Inouye. He mokulele ia no ka hui mokulele ʻo Kamaka. ʻElua pailaka o luna o ka mokulele. A ua pau lāua i ka make. ʻAʻohe ʻōhua o luna. Ua haʻalele ihola ka mokulele i ke kahua mokulele no Lānaʻi akā, ʻaʻole i liʻuliʻu kona lele ʻana, a ʻo kona pilikia ihola nō ia. ʻO Hiram deFries lāua ʻo Preston Kaluhiwa nā pailaka. A nui ka mahalo iā lāua no ke kuʻupau ʻana i ka hana i ʻole ai e pōʻino ke ola o nā kānaka ma ka honua. Aia kekahi ulia o ka mokulele Kamaka ma Molokaʻi i ka lā 15 o Ianuali o ka makahiki 2023. ʻAʻohe ola i pōʻino, akā, ua ʻeha ihola ʻelua mau pailaka.

Noi aʻe nei ke Aupuni Mokuʻāina o Hawaiʻi, ʻaʻole e halihali ʻia aʻe ka manu mai kekahi mokupuni a i kekahi no nā lā he 90, akā, ʻaʻole ia he koina, na kēlā me kēia e koho i ka hoʻokō a me ka hoʻokō ʻole paha. Hoʻomaka iho nei i kēlā Pōʻalima aku nei. Ma muli ia o ka loaʻa ʻana o ka palū manu H5N1 ma kēia pae ʻāina. E hopohopo ana nā luna aupuni o laha loa ia maʻi a puni ʻo Hawaiʻi.

Holo ihola ka manaʻo o Caylen Alexander e lilo i mea pāʻani pōpō paʻipaʻi no ke Kulanui o Mikouli. He mea pāʻani ʻo Alexander no Hawaiʻi ma nā makahiki ʻekolu i hala iho nei. Akā, ma hope mai o ke kikina nei i hala, komo akula ʻo ia i ka ʻīpuka lele kulanui i mea e komo ai i kekahi kulanui.

Eia mai kā kākou ʻōlelo noʻeau.

Hāʻale i ka wai a ka manu.

He ʻōlelo kēia no ke kanaka uʻi.

ʻO ia aʻela kekahi poʻo nūhou o kēia lā, ka lā 15 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

He manaʻo ko ke Kahua Ola Kino o ka Mōʻīwahine e kūkulu i haukapila hou ma kahi e kokoke ana i ke Costco ma Kailua i Kona ma Hawaiʻi. He 80 ana moe o ia haukapila a he kahua kuʻu mokulele pinao ana nō hoʻi kona i mea e pōkole loa ai ka manawa e lele ai i ke kikowaena lapaʻau ʻeha kūpilikiʻi ma Oʻahu nei. A i mea e paipai ai i nā kauka, nā kahu maʻi a me nā limahana e hana ma laila, e kūkulu ʻia ana he 300 paha wahi noho emi ma kahi wahi e pili ana. ʻO ka nui o ke kālā e hoʻolilo ʻia ana, he $400 miliona a i ka $500 miliona paha.

Lilo aku nei ka Makana Heisman iā Travis Hunter o Kololako. ʻO ka nui o kona mau pāloka helu ʻekahi, he 552, a ʻo ka huina o kāna mau ʻai, he 2,231. ʻO Hunter, pāʻani ʻo ia ma ka ʻaoʻao kūpale a me ka ʻaoʻao kūlele o Kololako. Ma ka ʻaoʻao kūpale, he ʻāʻiwa ʻo ia. A ma ka ʻaoʻao kūlele, he ʻāʻapo. ʻO Ashton Jeanty, he ʻāpohu no Boise Mokuʻāina, ka helu ʻelua. Ma hope koke aku nō o Hunter, he 309 ona pāloka helu ʻekahi, a he 2,017 āna ʻai. ʻO Dillon Gabriel, he ʻalihikūlele no ʻOlekona, ka helu ʻekolu, he 24 ona pāloka helu ʻekahi, a he 516 āna ʻai. A ʻo Cam Ward o Miami ka helu ʻehā, ʻeono ona pāloka helu ʻekahi, a he 229 āna ʻai.

Eia mai kā kākou ʻōlelo noʻeau,

Na wai ke kupu ʻo ʻoe?

ʻO ia hoʻi, ʻo wai kou makua?

ʻAkahi a loaʻa mai ʻo Hannah Kobayashi i kona ʻohana.

ʻO ia aʻela kekahi poʻo nūhou o kēia lā, ka lā 13 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua loaʻa maila ʻo Hannah Kobayashi, ka wahine i manaʻo ʻia, ua nalowale, a hana kolohe ʻia paha. Akā, i ka Pōʻakolu nei, ʻōlelo aʻela kona ʻohana, ua kamaʻilio nō me ia, a aia i Mekiko. Ua nui ke kālā i hāʻawi manawaleʻa ʻia ma kahi hoʻoulu kālā ʻo GoFundMe, he $47,000 a ʻoi. A hōʻike aʻe nei ka ʻohana o Kobayashi, inā makemake e hoʻihoʻi ʻia kāu kālā i hāʻawi ai, e hoʻopihapiha ʻia ka palapala hoʻopiʻi ke hiki aku i ka lā 18 o Kēkēmapa.

He ʻekolu mau Wāhine Ānuenue pāʻani pōpō paʻipaʻi i komo aku nei i ka ʻīpuka lele kulanui. ʻO Caylen Alexander kekahi. ʻO Alexander ka Mea Pāʻani ʻOi o ka Makahiki o ka ʻAhahui Komohana Nui. A ʻelua makahiki aku nei, ʻo ia ka Mea Pāʻani Haumāna Hou o ka Makahiki o ia ʻahahui. A i kēia kikina nei, ʻo ia ka ʻoi ma ka hoʻopio, he 602 ma mua o ke komo ʻana i ka Hoʻokūkū Inoa Moho o ka ʻAhahui ʻĀlapa Kulanui ʻAmelika. ʻO ka lua i komo i ka ʻīpuka, ʻo Jacyn Bamis. He mea pāʻani ʻo Bamis i pāʻani no Clemson a hele mai i Hawaiʻi no ke kikina 2023. A ʻo ke kolu, ʻo Jackie Matias, he loea paʻi ulele. Inā haʻalele lākou, he pilikia nō, ʻoiai, e puka ana ʻo Kate Lang, ka Mea Hānai ʻOi o ka Makahiki, a pēlā pū me Tayli Ikenaga, ka Mea Pāʻani Kūpale ʻOi o ka Makahiki.

Eia mai kā kākou ʻōlelo noʻeau,

Eia aʻe ka makani Kona.

ʻO ia hoʻi, aia lā kekahi kanaka huhū ke hele maila.

Hiki akula ka maʻi palū ma Hawaiʻi moku.

ʻO ia aʻela kekahi poʻo nūhou o kēia lā, ka lā 10 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I kēia lā, hōʻike aʻela ke Keʻena Ola o Hawaiʻi, ua loaʻa aku nei ka mea hoʻomaʻi palū manu H5 ma ka wai moka o ka Hale Hoʻomaʻemaʻe Wai Moka o Hilo ma ka mokupuni ʻo Hawaiʻi. ʻO ka manawa mua kēia o ka loaʻa o ka palū manu ma kekahi mokupuni ma waho o Oʻahu nei. ʻO kahi mea i maopopo ʻole, inā ʻo ka H5N1 ia. ʻO ka H5N1 ka mea hoʻomaʻi ʻino loa o ia palū. Ke paipai ʻia aʻela ka lehulehu e kāhea aku i ke Keʻena Mahiʻai o Hawaiʻi ke ʻike aku i ka maʻi ʻano ʻē o nā manu, ka holoholona hānai, a me nā manu makanahele a me nā holoholona ʻāhiu paha. Eia mai ka helu kelepona o ia keʻena, 808-483-7102. A ma waho o nā hola hana a me nā lā nui, e kāhea aku i ka helu 808-837-8092.

Kūkala ʻia aʻela nā moho Makana Heisman i ka Pōʻakahi nei. A he keiki no Hawaiʻi kekahi o lākou moho. ʻO ia ka ʻalihikūlele o ʻOlekona, ʻo Dillon Gabriel hoʻi. Mai ke Kula Kiʻekiʻe o Mililani i puka mai ai ʻo Gabriel. Ma kēia kikina nei, he 3,558 āna ʻīā i nou ai, he 28 āna ʻai holo i nou ai, a he ʻehiku āna ʻai holo i holo ai. Eia nā moho Heisman ʻē aʻe, ʻo Travis Hunter o Kololako, ʻo Ashton Jeanty o Boise Mokuʻāina, a ʻo Cam Ward o Miami. Iā wai lā e lilo ai ka makana? I kēia Pōʻaono e ʻike ʻia ai.

Eia mai kā kākou ʻōlelo noʻeau,

Haoʻe nā ʻale o Hōpoe i ka ʻino.

ʻO ia hoʻi, ke hele nei kekahi a huhū.

Hopohopo ana kekahi o loaʻa auaneʻi nā manu ʻōiwi i ka palū manu.

ʻO ia aʻela kekahi poʻo nūhou o kēia lā, ka lā 9 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua loaʻa aku nō kekahi mau manu ma ʻOʻahu nei i ka palū manu. A ʻo kekahi pilikia, ʻakahi nō a loaʻa kekahi manu makanahele i ia maʻi. ʻAʻole paha e lele aʻe ka palū manu i ke kanaka, akā, ke hopohopo nei o loaʻa auaneʻi nā manu ʻōiwi i ua maʻi lā. He mau kumu e emi nei nā manu ʻōiwi o Hawaiʻi nei, a eia kā, ua hiki mai kekahi mea hou. I kēia manawa, he 712 ʻalae ʻula, he 1,500 paha aeʻo, a he 673 paha koloa maoli. Makaʻu nō hoʻi o lele aku ka maʻi a ma nā mokupuni ʻē aʻe.

ʻO ke kanalima kēia o nā makahiki i hana hoʻomākeʻaka ai ʻo Frank De Lima. A e mālama ana ʻo ia i ʻaha hoʻomākeʻaka ma ka Blue Note Hawaiʻi ma Waikīkī. Aia ana ma ka lā 15 o Kēkēmapa, a ma ka hola 1:00 o ke awakea e hoʻomaka ai. He $35 o ke kikiki, a he $45 o ke kikiki uku kaulele, a he pono nō hoʻi ke hoʻolilo aku he $10 ma ka mea inu a ma ka mea ʻai paha.

Mālama ʻia aku nei ka heihei maratona o Honolulu i ka lā i nehinei. ʻO Cynthia Limo ka inoa moho o nā wāhine. ʻO kona manawa holo, he 2 hola, 31 minuke a he 14 kekona. No Kenia ʻo Limo a ʻo kēlā makahiki aku nei kona makamua i holo ai ma nei maratona, a nāna nō hoʻi i kāʻili i ka inoa moho wahine o ia makahiki. No nā kāne, ʻo Yemane Hailesellasie o Eritrea ka inoa moho a ʻo kona manawa holo, he 2 hola, 11 minuke a he 59 kekona. Lilo aku nei he $25,000 i ia mau lanakila ʻelua.

Eia mai kā kākou ʻōlelo noʻeau,

ʻAu ana ka Lae o Maunauna i ka ʻino.

He ʻōlelo kēia no ke kanaka wiwo ʻole e kūpaʻa ana ke hiki mai nā ʻīnea like ʻole.

Ua eo ʻo Hawaiʻi ma ka puni mua o ka hoʻokūkū inoa moho pōpō paʻipaʻi.

ʻO ia aʻela kekahi poʻo nūhou o kēia lā, ka 6 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hai iho nei i loio ka ʻohana o ka wahine i nalowale mai ka lā 11 mai o Nowemapa. ʻO Hannah Kobayashi ka inoa o ua wahine lā. No Oʻahu mai ʻo Kobayashi, akā, neʻe aku nei i Maui. A haʻalele ihola iā Maui i ka lā 8 o Nowemapa, a hele akula no ke Kūlanakauhale o nā ʻĀnela me ka manaʻo, e lele aku i Nū Ioka, ʻaʻole naʻe ʻo ia i kau aku ma luna o ia mokulele. ʻO kona makuakāne, ʻo Ryan Kobayashi, hele aku nei ʻo ia i laila e ʻimi aku ai i kāna kaikamahine, a ma ka lā 24 o Nowemapa, ma hope o kekahi mau pule ʻelua, lawe ihola ka makuakāne i kona ola ponoʻī. He mau mea kai lohe ʻia no Kobayashi, ʻaʻole naʻe i hiki i ka ʻohana ke hōʻoia. Ua ʻōlelo ka luna mākaʻi o ke Kūlanakauhale o nā ʻĀnela, hele wale aku nei ʻo Kobayashi no Mekiko.

Aloha nō. Hāʻule pahū ihola ka manaʻo, e lilo ka inoa moho pōpō paʻipaʻi o ke ao nei i nā Wāhine Ānuenue. I ka ʻauinalā o nehinei, hiu aʻela ʻo Tekeka Kalikiano a kāʻili kū i ka lanakila ma loko o nā pāʻani ʻekolu wale nō. Ma ka moʻolelo o nā Wāhine Ānuenue, ʻo ka manawa mua ia i suipa ʻia ai lākou ma ka puni mua mai ka makahiki 1997.

Ma ka hoʻokūkū inoa moho pōpō paʻipaʻi o ka Māhele II o ka ʻAhahui ʻĀlapa Kulanui o ʻAmelika, na kekahi kulanui o Hawaiʻi ka luku wale. I nehinei, ma ka puni mua o ia hoʻokūkū, lanakila aku nei ʻo Chaminade ma luna o Stanislaus Mokuʻāina ma loko o nā pāʻani ʻekolu wale nō. I kēia lā, e kūʻē aku ana ʻo Chaminade iā Kapalakiko Mokuʻāina.

Eia mai kā kākou ʻōlelo noʻeau,

ʻAi nō i kalo moʻa.

ʻO ia hoʻi, ua pau ka hana, a he wā hoʻonanea kēia.