11-08-17

ʻEha ihola kahi wahine mokomoko o Mililani i ka ulia kaʻa.

ʻO ia aʻela kekahi poʻo nūhou o kēia lā, ka lā 8 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua lilo aku nei paha ka moku lawaiʻa i ili aku ma ke kohola o ke Kahakai ʻo Kaimana i mea e pōʻino ai ke kanaka. ʻO Pacific Paradise ka inoa o ua moku lā, a ʻaneʻane e piha ka mahina o kona waiho ʻaoʻao ʻana. ʻO ka pilikia, i ka uhi ʻana mai o ka pō, eʻe aku kānaka i luna o ia moku. Wahi a ke Kiaʻi Kai, he pōʻino auaneʻi paha ke ola o ke kanaka ke kau aku ma luna o ia moku. Aia nō ke Kiaʻi Kai ke ʻimi akula i mea e hoʻopae aku ai i ka moku i uka.

Aloha nō. Ua ʻeha ihola ʻo Angela Lee i ka ulia kaʻa i ka Pōʻakahi nei. E kalaiwa ana ʻo ia mai Mililani a i ka hale hoʻoikaika kino o kona mau mākua ma Waipiʻo. A i ka manawa āna o ke kalaiwa ʻana, hāʻule ihola ʻo ia, hiamoe. ʻO ka mea pōmaikaʻi, ua paʻa kona ʻili kuapo, a no laila, ʻaʻole ʻo ia i ʻeha kūkonukonu. Ua ʻeha ka lolo, wela ihola kekahi mau māhele o kona kino, a he mau ʻeha ko ke kino. Akā, inā ʻaʻole i paʻa ka ʻili kuapo, inā paha ua kūkonukonu a kūpilikiʻi ka ʻeha, a inā paha ua make. Ma muli o ka ʻeha o kona kino, ʻaʻole e kūpale ana ʻo Lee i kona inoa moho ma ka ONE Championship i ka lā 24 o Nowemapa. ʻO Lee ka inoa moho ma ka māhele 115 paona.

Eia mai kā kākou ʻōlelo noʻeau,

Hana a lau a lau ke aho, a laila, loaʻa ka iʻa kāpapa o ka moana.

E hoʻomākaukau pono no kahi papahana nui.

11-07-17

E hoʻāʻo ana kekahi e kūkālā aku i ke one o Hawaiʻi nei.

ʻO ia aʻela kekahi poʻo nūhou o kēia lā, ka lā 7 o Nowemapa, he Pōʻalua. Welina e nā makamaka. ʻO Ke Aolama kēia a penei ka nūhou.

Aia nō ke one o kekahi mau kahakai o Hawaiʻi nei e kūkālā ʻia ana ma ka eBay. ʻO kekahi, ua ʻōlelo ʻia, mai ke kahakai ʻo Papakōlea. ʻAkahi nō a huki ʻia aku ia mau mea, ʻoiai, he kūʻē kānāwai ka lawe ʻana i ke one mai nā kahakai o Hawaiʻi nei. A ʻo ka hoʻopaʻi ke loaʻa pono ka mea ʻaihue one, e hiki aku paha i ka $100,000 a ʻoi. Na ka nūpepa ka Hawaiʻi Tribune-Herald i nīnau aku i ka hui ʻo Ebay no ia mau kūkālā ʻia ʻana o ke one, a ma hope mai o kēlā, ua hemo ihola. Ma mua, ʻae ʻia ma ke kānāwai ka lawe ʻia ʻana o kahi puʻu one liʻiliʻi e ke kanaka i kēlā me kēia lā. Akā, ua hoʻololi ʻia ihola ua kānāwai lā a he hana kū ʻole ia i ke kānāwai. Wahi a ka luna kuleana hui honua a launa ʻōlelo o eBay, e alu like nō ʻo eBay me ke Keʻena ʻĀina me Waiwai Pili ʻĀina o Hawaiʻi ma ka hana e pono ai ke kupu kēia ʻano pilikia ma kēia hope aku. Ua hemo ihola ia mau kūkālā ʻana, a wehewehe akula i nā mea nāna e kūkālā ana i ke one, he kūʻē ia i ka lula hoʻokele o eBay.

Kau aku nei kahi wahine pāʻani pōpō paʻipaʻi o Hawaiʻi i ka hano hāweo. ʻO Emily Maglio ka mea pāʻani ʻoi o ka ʻAhahui Komohana Nui o kēlā pule aku nei. ʻO ka manawa mua ia o ka lilo ʻana o ia hanohano iā ia. Akā, ʻo ia ka mea pāʻani kūpale ʻoi o ia ʻahahui, he ʻehā pule ma mua. ʻElua wale nō hoa paio i koe. I ka lā 16 o Nowemapa, e kūʻē ana nā Wāhine Ānuenue iā UC Davis, a i ka lā 18, e kūʻē aku ana iā UC Irvine.

Eia mai kā kākou ʻōlelo noʻeau,

Hului kōkō a Makaliʻi a kau i luna.

He ʻōlelo kēia no ke kanaka pī.

11-06-17

He hana mānaʻonaʻo ma kekahi hale pule ma Tekeka.

ʻO ia aʻela kekahi poʻo nūhou o kēia lā, ka lā 6 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Lāpule nei ma Sutherland Springs i Kekeka, komo aku nei kekahi kanaka i loko o ka Hale Pule Papekiko Mua, a kīkī aʻela i nā kānaka o loko i ka pū. ʻO Devin Kelley ka inoa o ua kanaka lā. A ʻo ka nui o nā kānaka i make ma muli o ia hana mānaʻonaʻo a Kelley, he 26, a ʻo ka nui o nā kānaka i ʻeha, he 20. ʻO nā kānaka i make, mai ka ʻelemakule, ka luahine a me nā kamaliʻi. I ka wā i haʻalele ai ʻo Kelley i ka hale pule, kū akula i kona alo kekahi kamaʻāina o ia kaiāulu e paʻa ana i ka pū laipela. A ma hope mai, loaʻa akula ʻo Kelley i ka mākaʻi ma kona kaʻa ma ka laina palena o ia kalana, ua make. ʻAʻole naʻe i maopopo kona kumu i make ai, ʻo ke kī ʻana iā ia iho, a i ʻole ia, ʻo ia kanaka i kū akula i kona alo, nāna i kī aku iā ia a make. Aia nō ka mākaʻi ke noiʻi akula. Ua hōʻike mai kahi waha ʻōlelo o ka Māhele Kaua Lewa, ua hoʻopau hoʻoʻino ʻia aku ʻo Kelley mai ka Māhele Kaua Lewa aku, ua manaʻo ʻia, ua limanui aku ʻo ia i kāna wahine a me kāna keiki. Wahi a ka Pelekikena Donald Trump, ʻaʻole ka pilikia ʻo ka pū, ʻo ke ola noʻonoʻo ka pilikia.

Ke namunamu aʻela ka ʻAhahui Mahi Kope Kona i ka hoʻopāʻēʻē o kekahi hui Kaleponi i i ka nui o ka pāpapa kope Kona ma loko o nā kope hau e kūʻai ʻia nei e ia hui. Wahi a ke Keʻena Mahiʻai o ka mokuʻāina ʻo Hawaiʻi, ʻaʻole ona kuleana ma laila, ʻoiai, ʻaʻole pili ke kānāwai i ka mea inu. ʻO ke kānāwai o Hawaiʻi nei, he pono ke hōʻike ʻia ka nui o ka pāpapa kope i hoʻoulu ʻia ma Hawaiʻi nei, akā, he pili wale nō ia i ke kope hikiwawe a me ke kope loke. A inā ua hoʻohui pū ʻia me kekahi ʻano kope, he pono nō hoʻi ke hōʻike ʻia. ʻO kekahi pilikia, ʻo ka hapanui o nā mea inu, hana ʻia ma ka ʻāina ʻē, a no laila, ʻaʻohe kuleana o ke Keʻena Mahiʻai o Hawaiʻi nei. ʻŌlelo ihola kekahi mahi kope Kona, he hiki i nā luna aupuni ke pāpā i ke kūʻai ʻia o nā mea e hōʻike hewa ana i nā mea o loko ma Hawaiʻi nei.

Eia mai kā kākou ʻōlelo noʻeau,

He ʻōpū hālau.

He ʻōlelo kēia no ke kanaka ʻoluʻolu a heahea.

11-03-17

Pena kolohe ʻia ke kiʻi o kahi kamāliʻi o Hawaiʻi nei.

ʻO ia aʻela kekahi poʻo nūhou o kēia lā, ka lā 3 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

E hiki mai ana ka Pelekikena Donald Trump i Oʻahu nei i kēia lā a e hōʻaumoe ana ʻo ia a haʻalele mai no ʻĀkia. Akā, ma Honolulu nei, e hālāwai ana ʻo ia me nā kiaʻāina o Hawaiʻi, ʻĀlaka a me nā panalāʻau o ʻAmelika Hui Pū ʻIa ma ka Moananuiākea. ʻOiai ka Pelekikena ma Honolulu nei, e pupū ana ka hele ʻana o nā kaʻa ma Waikīkī a me Puʻuloa.

Hoʻopiʻi ʻia aku nei kekahi kanaka no ke pena kolohe aku i kekahi kanaka i ke kiʻi o ke Kamāliʻi Jonah Kūhiō Kalanianaʻole e kū akula ma Waikīkī i ka lā Heleuī i hala iho nei. ʻO Andrew Chalaire ka inoa o ua kanaka lā. ʻAe ihola ʻo ia i ka hoʻāhewa ʻia ʻana, ʻaʻole naʻe ʻo ia i hōʻike aku i ke kū o ka hewa iā ia. Hōʻike mai nei ka mākaʻi, ua loaʻa ihola ʻo Chalaire iā lākou i kona wā e pena kolohe ana. A he wikiō nō hoʻi e hōʻike ana i ia pena ʻana o kekahi kanaka i ke kiʻi. ʻO ka mea ʻāpiki, ʻo kona hoʻopaʻi, he ʻelua wale nō lā o ka noho paʻahao ʻana, a he ʻehā hola kōkua kaiāulu.

I ka Pōʻakolu nei, hoʻokuʻu ʻia aku nei ʻo Dean Jay Fletcher mai ka Hale Paʻahao Pekelala o Honolulu nei ma ke kauoha a kekahi luna kānāwai ʻAmelika Hui Pū ʻIa ma Hawaiʻi. ʻO Fletcher, ua hoʻopiʻi ʻia ʻo ia no ka pepehi kanaka ʻana i kāna wahine ma Tonga, a aia nō ʻo ia ma ka hale paʻahao ma Tonga, akā, ua mahuka aku nei. A pakele akula ma kona hiki ʻana aku i Kāmoa ʻAmelika. A mai laila mai ʻo ia i lawe ʻia ai i Honolulu nei. A ma mua, ua holo ka manaʻo o kekahi luna kānāwai, e hoʻouna ʻia aku ʻo Fletcher i Tonga no kona hoʻokolokolo ʻia ʻana. Akā, hōʻole ihola ke Kuhina Kuleana ʻĀina ʻĒ i ke noi a ke Aupuni Mōʻī o Tonga e hoʻouna ʻia aku ʻo Fletcher i laila. He aha lā kona kumu i hoʻokuʻu wale ʻia ai?

Eia mai kā kākou ʻōlelo noʻeau,

Wawā nā manu o Kaʻula.

He ʻōlelo kēia ke nui ka lawena ʻōlelo.

11-01-17

He pila hou e hoʻohāiki ana i ka mana hoʻouka kaua o ka pelekikena.

ʻO ia aʻela kekahi poʻo nūhou o kēia lā, ka lā mua o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

He pila hou kai hāpai ʻia aku nei e kekahi mau kenekoa ʻewalu o ʻAmelika Hui Pū ʻIa, e pāpā ana, ʻaʻole e hoʻouka kaua aku ka Pelekikena Donald Trump i mea e pale aku ai i ka hoʻouka kaua ʻana mai o Kōlea ʻĀkau me ka ʻāpono ʻole aʻe o ka ʻAhaʻōlelo Lāhui. ʻO Kenekoa Brian Schatz o Hawaiʻi nei kekahi o ia mau kenekoa nāna i hāpai ka pila. E pāpā ana ka pila i ka hoʻolilo wale ʻana i ke kālā o ka waihona kālā o ʻAmelika Hui Pū ʻIa me ka ʻāpono ʻole o ka ʻAhaʻōlelo Lāhui. Aia wale nō a he hoʻouka kaua mai koe, a laila, e hoʻohana aku ka pelekikena i ke kālā me ka ʻāpono ʻole ʻia. ʻO nā kenekoa i alu like ma ia pila, ʻo ia ʻo Chris Murphy o Konekikuka, ʻo Tammy Duckworth o ʻIlinoe, ʻo Cory Booker o Nū ʻIeleke, ʻo Bernie Sanders o Welemoneka, ʻo Jeff Merkley o ʻOlekona, ʻo Elizabeth Warren o Makakukeka, a ʻo Tom Udall o Nū Mekiko.

I ka lā i nehinei, e holo ʻino ana kahi kalaka ma ke ala kaʻa hehi wāwae ma kahi o ke Kikowaena Kālepa Honua, a e hoʻokuʻi wale aku ana i nā kānaka. He ʻewalu mau kānaka i make, a he 11 i ʻeha kūkonukonu. ʻO Sayfullo Saipov ka inoa o ke kanaka e kalaiwa ana i ke kalaka. He 29 ona makahiki, a komo maila ʻo ia i loko o ʻAmelika Hui Pū ʻIa i ka makahiki 2010. ʻO kona laikini hoʻokele kaʻa, no Pololika, akā, ma Nū ʻIeleke paha ʻo ia e noho ana. Ua hoʻolimalima aku ʻo Saipov i ke kalaka ma kahi o ka hola 2:00 o ka ʻauinalā ma kekahi Home Depot o Nū ʻIeleke, a hele akula i Nū Ioka a he hoʻokahi hola ma hope mai, komo akula i ke ala kaʻa hehi wāwae, a holo ʻino akula no ke Kikowaena Kālepa Honua a he hoʻokuʻi wale aku i nā mea a pau ma kona ala. A i ka wā i kū ai ke kalaka, lele ihola ʻo Saipov i lalo, a hele ana ma waena o nā kaʻa me kekahi mau pū. ʻAʻole naʻe he mau pū e pōʻino ai ke ola o kānaka. ʻO kekahi, he pū kī pōpō pena, a ʻo kekahi, he pū kī pōkā peleka. A kī aku nei kekahi mākaʻi iā ia ma muli o kona hōʻole ʻana i ka waiho i nā pū i lalo. Aia nō nā mākaʻi ke noiʻi akula i kumu i hana ai ʻo Saipov i ia hana mānaʻonaʻo.

Eia mai kā kākou ʻōlelo noʻeau,

Kū i ke Kīpuʻupuʻu.

ʻO ia hoʻi, ua ʻeha ihola ka naʻau o kekahi.

10-31-17

Hoʻi mai nei kekahi mau iwi kupuna i Hawaiʻi nei.

ʻO ia aʻela kekahi poʻo nūhou o kēia lā, ka lā 31 o ʻOkakopa, he Pōʻalua. Welina e nā makamaka. ʻO Ke Aolama kēia a penei ka nūhou.

ʻAkahi a hoʻi mai kekahi mau iwi kupuna i ʻaihue ʻia mai nā lua pao ma Hawaiʻi nei a kūʻai ʻia aku i kekahi hale hōʻikeʻike ma Kelemānia. He 100 mau makahiki a ʻoi ma ka ʻāina ʻē. He ʻelua iwi poʻo mai Oʻahu, a he hoʻokahi iwi poʻo a he iwi ā mai ka mokupuni ʻo Hawaiʻi. I kēlā Pōʻahā aku nei i hiki maila i Honolulu nei. A ʻo ke kumu o ka hoʻihoʻi ʻia ʻana mai, ma muli ia o ka noke ʻana aku o ka Hui Mālama i nā Kūpuna o Hawaiʻi nei i ka hana i hoʻomaka i ka makahiki 1991. He nui nā iwi kupuna i hoʻihoʻi ʻia maila ma muli o Hui Mālama, akā, ua pau ihola ia hui i ka makahiki 2015 ma muli o ka hoʻokō ʻia ʻana o kona kuleana, ʻo ia hoʻi, ʻo ke komo ʻana o nā ʻohana Hawaiʻi i loko o ia hana. A aia ʻo Halealoha Ayau, ka luna hoʻokō o Hui Mālama ma mua, ke kūkākūkā nei me kekahi hale hōʻikeʻike ma Berelina no ka hōʻiliʻili iwi kupuna o laila a me nā mea i hoʻomoe pū ʻia. A wahi a Ayau, ua lohe ʻo ia no ka iwi kupuna ma kekahi hale hōʻikeʻike o Palika. A e noiʻi ana ʻo ia i ka ʻoiaʻiʻo a me ka ʻole.

I ka pō Pōʻaono nei, hiu aʻela nā kaikamāhine pōpō paʻipaʻi o ke Kula Kiʻekiʻe ʻo Kamehameha, a kāʻili akula i ka inoa moho ma loko o nā pāʻani ʻekolu wale nō. ʻO ʻIolani ka hoa paio, a ʻo ka inoa moho hoʻi o kēlā makahiki aku nei, a he hahana nō ka pāʻani ʻekolu, hiki akula nā ʻai a Kamehameha i ke 31 i ka 29 a ʻIolani. ʻO ka inoa moho 21 ia o Kamehameha a ʻo ka iwa ia ma lalo o ke kumu aʻo ʻo Chris Blake. ʻO Kili Robins o Kamehameha, he ʻewalu āna hoʻopio, a he 13 āna ʻali. ʻO Braelyn Akana, he ʻeiwa āna hoʻopio, a ʻo Maluhia Maʻa, he ʻewalu āna hoʻopio. ʻO Lexis Akeo, he 35 āna hānai, 11 ʻali, a he ʻekolu hoʻopio. A ʻo Akeo ka mea pāʻani ʻoi o ka hoʻokūkū inoa moho.

Eia mai kā kākou ʻōlelo noʻeau,

Kū ka lau lama.

He hōʻailona no ka piha hauʻoli a me ka lanakila.

10-26-17

He kānāwai hou ke hoʻokō ʻia nei ma Honolulu.

ʻO ia aʻela kekahi poʻo nūhou o kēia lā, ka lā 26 o ʻOkakopa, he Pōʻahā. Welina e nā hoa makamaka. ʻO Ke Aolama kēia a penei ka nūhou.

Holo ihola ka manaʻo o ke Komikina Mākaʻi o Honolulu ma ka luna mākaʻi hou o ke Keʻena Mākaʻi o Honolulu. ʻO Mēkia Susan Ballard ka luna mākaʻi hou. A ʻo ia nō hoʻi ka wahine mua i lilo i luna mākaʻi no Honolulu. He 32 ona makahiki e hana ana ma ke ʻano he mākaʻi no kēia ʻāina. A lilo ihola ʻo ia i mēkia i ka makahiki 2001. A ʻo Ballard nō hoʻi kekahi o nā moho luna mākaʻi hope loa ʻehā i ka makahiki 2004, ka wā hoʻi i lilo ai ʻo Boisse Correa, ʻo ia ka luna mākaʻi o Honolulu.

ʻAkahi nō a hoʻohanohano ʻia nā koa kahiko Pilipino o ke Kaua Honua II e ʻAmelika Hui Pū ʻIa. Lilo aku nei ka Makana Kula ʻAha ʻŌlelo Lāhui i nā koa kahiko Pilipino he 260,000 a ʻoi i komo i ke kaua ma ka ʻĀina Pilipino a ma kekahi ʻāina paha. Hele aku nei he 13 mau ʻelele mai Hawaiʻi aku i Wainekona no ka ʻAha Makana Kula ʻAha ʻŌlelo Lāhui. He ʻekolu o lākou, he mau koa kahiko nō mai ia wā, a ʻo nā ʻelele ʻē aʻe, he ʻohana no nā koa kahiko i hala.

Ma Honolulu nei, pāpā ʻia, ʻaʻole e kelekiko ke koʻele wāwae i kona wā e hele ana ma ke kāʻei koʻele wāwae. ʻAʻole e nānā ke kanaka i kāna kelepona a me ka mea uila ʻē aʻe paha, e laʻa ke kamepiula hele a me ke kālana uila, ʻoiai ʻo ia e hele ana mai kekahi ʻaoʻao o ke alanui a i kekahi. ʻO ka hoʻopaʻi mua ke ʻaʻe ʻia ke kānāwai, mai ka $15 a ke $35. A no ka hoʻopaʻi hou i loko o ka makahiki hoʻokahi, he $35 a ke $75. A no ke kolu o ka hoʻopaʻi i loko o ia makahiki, he $75 a ke $99.

Eia mai kā kākou ʻōlelo noʻeau,

Hili hewa ka manaʻo ke ʻole ke kūkākūkā.

He mea nui ke kūkākūkā pū ʻana i mea e holo maikaʻi ai ka hana.