01-23-18

Pau iho nei ka wā uku ʻole ʻia o nā limahana pekelala.

ʻO ia aʻela kekahi poʻo nūhou o kēia lā, ka lā 23 o Ianuali, he Pōʻalua. Welina e nā makamaka. ʻO Ke Aolama kēia a penei ka nūhou.

Hoʻi hou ana nā limahana pekelala i ka hana me ka uku ʻia. ʻĀpono aku nei ka ʻAha ʻŌlelo Lāhui i kahi pila kūikawā a pūlima ʻia nō hoʻi e ka Pelekikena Donald Trump i ka pō Pōʻakahi nei. ʻO ka mea ʻāpiki, he ʻekolu wale nō pule, ʻo ka lā 8 o Pepeluali ka lā hope loa. Inā ʻaʻole e holo pono ka manaʻo o ka ʻAha ʻŌlelo Lāhui ke hiki aku i ia lā, e hoʻomaka hou kahi wā uku ʻole ʻia o nā limahana pekelala.

Holo ihola ka manaʻo o Dru Brown, ka ʻalihikūlele o ka hui pōpō peku o ke Kulanui o Hawaiʻi, e haʻalele iho iā Hawaiʻi nei a e pāʻani pōpō peku no kekahi kulanui i kona makahiki hope loa. Wahi a Brown, e paʻa ana kona kekelē lae pua ma Iune. A i ka wā hoʻomaha hoʻoilo nei, ua hala ihola kona kupunakāne i ke ala hoʻi ʻole mai, a he makemake ko Brown e pāʻani pōpō peku ma kahi e kokoke ana i ka hale o kona ʻohana ma Kaleponi ʻĀkau. He mau ʻalihikūlele ko Hawaiʻi e hoʻi mai ana, ʻo ia ʻo Cole McDonald lāua ʻo Larry Tuileta. He ʻalihikūlele nō hoʻi ʻo Kyle Gallup, e hoʻomaʻamaʻa ana ʻo ia ma ke ʻano he ʻāʻapo i ka makahiki nei i hala. A he ʻelua mau ʻalihikūlele hou. ʻO Jeremy Moussa o Kaleponi a me Chevan Cordeiro o ke Kula Kiʻekiʻe ʻo Kāna Lui.

Eia mai kā kākou ʻōlelo noʻeau,

E hākōkō ana ʻo Heneli me Keoni Pulu; ua lilo ke eo iā Keoni Pulu.

ʻO ia hoʻi, ua māʻona ka ʻōpū.

01-22-18

Aloha nō nā limahana o ke aupuni pekelala.

ʻO ia aʻela kekahi poʻo nūhou o kēia lā, ka lā 22 o Ianuali, he Pōʻakahi. Aloha mai e nā makamaka. ʻO Ke Aolama kēia a penei ka nūhou.

Aloha nō. E hoʻomaka ana kahi wā uku ʻole o nā limahana o ke aupuni pekelala. He mau kaukani limahana pekelala ko Hawaiʻi nei. Pau iho nei ka lawelawe ʻia ʻana o ka hana aupuni pekelala i ka pō Pōʻalima nei. ʻO nā limahana ʻano nui loa, ʻo ia wale nō nā mea e hoʻomau ana i ka lawelawe ʻana i ka hana, ʻaʻole naʻe lākou e uku koke ʻia, aia wale nō a holo pono ka manaʻo o ka ʻAha ʻŌlelo ma ka ʻaelike no ka moʻohelu kālā.

Paʻa ihola nā hui ʻelua o ke Kahului Pōpō Peku Kanalima Kūmālua. Luku aku nei ʻo Pilakelepia iā Minekoka ma ka helu ʻai he 38 i ka 7. A ma ka ʻAhahui Pōpō Peku ʻAmelika, mai lilo ʻo Iakasonawila, ʻo ia ka hoa hoʻokūkū o Pilakelepia no ka inoa moho. E ʻoi ana Nā Iākua ma kahi hapa mua o ka hapahā hope loa ma ka helu ʻai he 20 i ka 10, ua hiu aʻela naʻe ʻo Nū ʻEnelani a kāʻili akula i ka lanakila ma ka helu ʻai he 24 i ka 20. A e kūʻē ana ʻo Pilakelepia iā Nū ʻEnelani no ka inoa moho pōpō peku i ka lā 4 o Pepeluali.

Eia mai kā kākou ʻōlelo noʻeau,

Pae maila ka waʻa i ka ʻāina.

ʻO ia hoʻi, ua māʻona ka ʻōpū.

01-19-18

Loaʻa aku nei paha kekahi i ka ʻeaʻōlena A.

ʻO ia aʻela kekahi poʻo nūhou o kēia lā, ka lā 19 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

Loaʻa aku nei paha kekahi limahana o kekahi hale ʻaina o Māpunapuna i ka ʻeaʻōlena A. Aia nō ke Keʻena Ola ke noiʻi akula. ʻO ka inoa o ka hale ʻaina, ʻo ia ʻo Wah Kung. ʻO ka wā lele o ia maʻi, mai ka lā mua o Kēkēmapa a i ka lā 6 o Ianuali, a e hana ana ia limahana ma laila i ia wā. Inā ua ʻai a inu paha ʻoe i ka Hale ʻAina ʻo Wah Kung ma ia wā, e kipa aku i ke kauka.

He manaʻo ko John Carroll i ke Kiaʻāina David Ige, e waiho ʻo ia i kona kūlana kiaʻāina ma muli o ke kūkala hewa ʻia o ke kī ʻia mai o ke kao lele pahū ma ka Pōʻaono i hala iho nei. ʻO Carroll, he moho lepupalika ʻo ia e alualu ana i ke kūlana kiaʻāina. Hōʻike aʻela kekahi o nā luna o ko Ige paipai kālaiʻāina ma kona alualu hou ʻana i ke kūlana kiaʻāina, ʻaʻole e waiho ana ʻo Ige i kona kūlana.

He kumu aʻo pōpō peku pae oʻo hou ko ke Kula Kiʻekiʻe o Kahuku. He ʻumi a ʻoi paha nā moho i noi aku nei i ia kūlana hana. A koho ʻia ihola he ʻehiku mau moho a ʻoi paha no ka nīnauele. ʻO Sterling Carvalho lāua ʻo Makoa Freitas nā moho hope ʻelua e kū ana ma hope o ka lua o ka nīnauele. A holo ihola ka manaʻo, ʻo Carvalho ke kumu aʻo hou. A ʻo ia ka lima o ke kumu aʻo pōpō peku pae oʻo mai ka makahiki 2013. ʻO Freitas ke kumu aʻo kūikawā i ke kikina 2017. ʻO kekahi mea maikaʻi, ʻo Carvalho ke kumu aʻo pae ʻōpio o Kahuku ma nā makahiki ʻekolu i kaʻa hope aku nei. Ua noi nō hoʻi kekahi mau kumu aʻo pōpō peku o Kahuku ma mua i ia kūlana hana, ʻo ia ʻo Siuaki Livai, ʻo Reggie Torres a me Vavae Tata. ʻO Carvalho naʻe ke kū ihola i ka moku.

Eia mai kā kākou ʻōlelo noʻeau,

ʻEha ʻo Hanalē iā Keoni Pulu.

ʻO ia hoʻi, ua māʻona ka ʻōpū.

01-18-18

Ke ʻimi ʻia nei nā kānaka kōkua ma ka helu kanaka kuewa ʻana.

ʻO ia aʻela kekahi poʻo nūhou o kēia lā, ka lā 18 o Ianuali, he Pōʻahā. Welina e nā makamaka. ʻO Ke Aolama kēia a penei ka nūhou.

ʻAʻole lawa nā kānaka kōkua no ka helu kanaka ʻana i nā kānaka kuewa o Oʻahu nei. ʻO ka nui o nā kānaka kōkua i makemake ʻia, he 500, akā, he 300 wale nō a ʻoi iki i kēia manawa. Ma mua, ʻo Hawaiʻi ka mokuʻāina nona ka nui loa o nā kānaka haleʻole. Ke paʻa iho ka helu o nā kānaka kuewa, he mea ia e lilo mai ai ka puʻu kālā pekelala no nā polokalamu e pono ai ia mau kānaka e lewa hele ana, ʻaʻohe kahua paʻa. Inā he makemake paha e kōkua ma ka helu ʻana, e kipa aku i ke kahua pūnaewele, partnersincareoahu.org.

Aloha nō. E haʻalele ana kahi mea hou i ka hui pōpō peku o ke Kulanui o Hawaiʻi. I kēia manawa, he mea pāʻani ia, a ʻo ka ʻoi ia o nā ʻāʻapo o nā Ānuenue. ʻO Dylan Collie kona inoa, a e puka ana ʻo ia mai ke Kulanui o Hawaiʻi ma Mānoa i ka mahina ʻo Mei, a e lele aku ana i kekahi kulanui no ka polokalamu lae oʻo. A ma ia kulanui hou ʻo ia e pāʻani pōpō peku ai. ʻOiai, he haumāna lae oʻo ana ʻo ia, inā koho ʻo ia i kekahi o nā kulanui o ka Māhele Ipu Pōpōpeku, e hoʻomaka koke kona pāʻani ʻana i ke kikina e hiki mai ana, ʻaʻole pono ke pālule ʻulaʻula. ʻAʻole i hōʻike aʻe ʻo Collie i kona kulanui e hele aku ai, akā, he mea pāʻani pālule ʻulaʻula ʻo ia no ke Kulanui ʻo Berigama Iana i ka makahiki 2012.

Eia mai kā kākou ʻōlelo noʻeau,

Ua mālō ke ʻeke.

ʻO ia hoʻi, ua māʻona ka ʻōpū.

 

01-17-18

Aia ana nā hana like ʻole ma ʻIolani Hale no ka hoʻomanaʻo ʻana i ka hoʻokahuli aupuni.

ʻO ia aʻela kekahi poʻo nūhou o kēia lā, ka lā 17 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

E naue aku i ka Hale Aliʻi ʻo ʻIolani i kēia lā no “ʻOnipaʻa Kākou,” kahi hanana e kulāia ana i ka piha ʻana o nā makahiki he 125 i ka hoʻokahuli aupuni. Nui ana nā hana like ʻole, e hoʻokani pila ana kekahi, e hula ana kekahi, a e haʻi ʻōlelo ana kekahi. I ke kau ʻana o ka lā i ka lolo, aia ana kekahi mau hana ma ke Kapikala, ʻoiai, ʻo ka lā hemo ia o ke Kau ʻAha ʻŌlelo.

ʻAkahi nō a paʻa nā kūlana hope kumu aʻo a pau o ka hui pōpō peku o ke Kulanui o Hawaiʻi. I nehinei, kūkala ʻia aku nei ka hai ʻana i nā mea hope ʻelua. Ua haʻalele mai nei ʻo Legi Suiaunoa a me Kefense Hynson no ka lilo ʻana i kumu aʻo no ʻOlekona Mokuʻāina. A no laila, ʻimi akula ʻo Nick Rolovich a loaʻa maila nā mea nāna e hoʻopiha i ka mākālua. ʻO Andre Allen ke kumu aʻo ʻāʻapo hou. A ʻo Ricky Loko ke kumu aʻo laina kūpale hou.

Eia mai kā kākou ʻōlelo noʻeau,

ʻOnipaʻa.

ʻO ka ʻōlelo mākia ia a ko kākou Mōʻīwahine Liliʻuokalani.

01-16-18

Kau ka weli o ko Hawaiʻi.

ʻO ia aʻela kekahi poʻo nūhou o kēia lā, ka lā 16 o Ianuali, he Pōʻalua. Welina e nā makamaka. ʻO Ke Aolama kēia a penei ka nūhou.

Ua kau iho nei ka weli o ko Hawaiʻi i ka Pōʻaono nei, i ka hoʻomaopopo ʻia ʻana mai no kahi kao lele i kī ʻia mai i kēia pae ʻāina nei. ʻAʻole naʻe ia he ʻoiaʻiʻo. Ua kaomi hewa ʻia ke pihi e kekahi limahana o ke Keʻena Lawelawe Ulia Pōpilikia Hawaiʻi. Ma hope mai naʻe o nā minuke he 38 i kūkala ʻia ai, ʻaʻohe kao lele i kī ʻia mai. I ka Pōʻakahi nei, hoʻonoho aku nei ke Kiaʻāina David Ige iā Kenelala Kenneth Hara i hope kenelala nāna e kauʻeliʻeli i ka hana o ke Keʻena Lawelawe Ulia Pōpilikia Hawaiʻi o ka Pōʻaono nei a hana i hōʻike i loko o nā lā he 30 e hiki mai ana. A laila, e hoʻokumu ʻo Hara i hōʻike no ka hoʻomaikaʻi ʻana i ka mākaukau o ka mokuʻāina no ka ulia pōpilikia.

Pau iho nei ka ʻimi ʻana o Nick Rolovich i kumu aʻo laina kūlele. I ka pule ʻehiku o ke kikina 2017, haʻalele ihola ʻo Chris Naeole, ke kumu aʻo laina kūlele ma mua. A i ia manawa, na Brian Smith, ka luna hoʻolaukaʻi kūlele, a me John Estes, he lima kōkua, ke aʻo ʻana i ka laina kūlele i ke koena o ke kikina. ʻO Mark Weber ana ke kumu aʻo hou. I ka makahiki 2016, ʻo ke kumu aʻo laina kūlele ia o Fresno State. Ma mua aku o kēlā, ʻo ka hope kumu aʻo ia o Utah State. A mai ka makahiki 2007 a i ka makahiki 2012, aʻo akula ʻo ia i nā mea pāʻani laina kūlele ma Berigama Iana.

Eia mai kā kākou ʻōlelo noʻeau,

ʻAi a puʻu ka nuku.

ʻO ia hoʻi ka ʻai ʻana a māʻona.

 

 

 

 

01-11-18

Hanini akula he 500 kālani ʻaila ma Waiawa.

ʻO ia aʻela kekahi poʻo nūhou o kēia lā, ka lā 11 o Ianuali, he Pōʻahā. Welina e nā makamaka. ʻO Ke Aolama kēia a penei ka nūhou.

Lana ka manaʻo o Micah Kane, he kahu waiwai no nā Kula ʻo Kamehameha, e paʻa kahi ʻaelike me kekahi mau kānaka e hoʻopiʻi aku nei i ia kula. Ua lolokukui ʻia ua mau kānaka nei e ke kauka hoʻoponopono noʻonoʻo i ko lākou wā e haumāna ana ma Kamehameha. I ka Pōʻakolu nei, hoʻomaka hou iho nei ka ʻuao ʻana ma waena o nā ʻaoʻao ʻelua. A i kēia puni ʻelua, wahi a Kane, he haʻawina kālā nui kai hāpai ʻia e Kamehameha i mua o ia mau kānaka hoʻopiʻi i mea e pau ai ka hihia. Akā, hōʻike aʻela ka loio o nā mea hoʻopiʻi, ʻaʻole lākou ʻaelike me ka manaʻo o Kane no ia haʻawina kālā. Inā ʻaʻole e paʻa kahi ʻaelike, e hoʻomaka ka hoʻokolokolo ʻana i ka mahina ʻo Iune.

Ua hanini ihola he 500 kālani ʻaila ma nā pā hale o ke Alanui ʻo Waiawa i ka ʻauinalā o ka Pōʻakolu nei. Kāhea akula kekahi kanaka i ka Hui Uila Hawaiʻi i kona ʻike ʻana i ka ʻaila ma kona pā hale. Na ka Hui Uila Hawaiʻi ka paipu ʻaila a pani ʻia akula a paʻa a hoʻomaʻemaʻe ʻia aʻela. ʻAʻole i maopopo kahi o ka paipu i kulu ai ka ʻaila. I kēia lā, e ʻeli ana a ʻike ʻia.

Eia mai kā kākou ʻōlelo noʻeau,

Waiho kāhelahela ʻo Kalaupapa.

He ʻōlelo kēia no kahi mea i ahuwale.