Ke Aolama

He keiki Hawaiʻi, aia ma kahi kaulana i ka hana keaka.

ʻO ia aʻela kekahi poʻo nūhou o kēia lā, ka lā 20 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Hana keaka aku nei kekahi keiki o Hawaiʻi nei ma kahi kaulana o Nū Ioka, ma ke Alanui laulā, ma Broadway hoʻi, i ka lā 5 o kēia mahina nei ʻo Kēkēmapa. ʻO Ezekiel Kekuna ka inoa ua keiki lā a no Kāneʻohe mai. ʻO kona makamua nō ia o ka hana keaka ʻana ma laila. ʻO Simba ʻōpio ʻo ia ma “Ka Mōʻī Liona.” He keiki maʻa ʻo Kekuna i ka hana keaka. ʻO Fletcher ʻo ia ma “Ke Kiaʻi Kino” o ka Hale Hana Keaka o Lēʻahi ma mua iho nei. A mai ka makahiki 2018, komo akula ʻo ia i loko o ka polokalamu kauwela o ke Kahua ʻo He Keiki Bright Au. A he mea hulahula ʻo ia no ke Keʻena Hulahula ʻo 24-VII Danceforce. ʻŌlelo aʻela ka makuahine o Kekuna, ʻo Sarah, he nui loa ke kākoʻo o ia mau hui, he ʻohana nō.

Aia nō ka Meia Rick Blangiardi a me kekahi mau luna o ke Kūlanakauhale a me ke Kalana o Honolulu ke paipai aʻela i ka lehulehu, ʻo ke ahikao a me ka mea pahūpahū i kū i ke kānāwai, ʻo ia wale nō ke kuni ʻia i kēia Ahiahi Makahiki Hou. Hōʻike aʻela ʻo Blangiardi, he maloʻo nō kekahi mau wahi, akā, ʻaʻole pēlā ka uka aʻe nei o Mililani, eia naʻe, ua hōlapu nō ke ahi ma nā pule mua o kēia mahina nei.

Hoʻi mai nei ʻo Chevan Cordeiro i kona kula kiʻekiʻe. E hoʻomaʻamaʻa ana ʻo ia me kona hui pōpō pekupeku ʻo Kāna Jose Mokuʻāina ma ke kahua pāʻani pōpō peku o Kāna Lui. E kūʻē aku ana ʻo Cordeiro mā iā Kalolaina Kapakai ma ka Ipu Hawaiʻi i kēia Pōʻaono. E ulele ana ka hoʻokūkū i ka hapalua hola ʻelima o ka ʻauinalā ma ke Kahua Pāʻani ʻo Clarence T. C. Ching. A ʻo kekahi pōmaikaʻi, ʻakahi nō a paʻa ke kekelē lae pua iā Cordeiro.

Eia mai kā kākou ʻōlelo noʻeau,

Aia paha iā Limaʻāpā.

Hoʻopuka ʻia kēia ʻōlelo i ka wā e ʻimi ana i kekahi mea i nalo, ʻaʻole naʻe hiki ke loaʻa mai.

E pilikia auaneʻi paha ko kākou mau hoa hānau ma Aotearoa.

ʻO ia aʻela kekahi poʻo nūhou o kēia lā, ka lā 18 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma ke koho pāloka aku nei ma Aotearoa ma ka mahina aku nei ʻo ʻOkakopa, nui aʻela nā luna aupuni mākeʻe kūlana. A ke paipai aʻela i ka “pono kaulike” o nā kānaka a pau o laila, ʻo ia hoʻi, e hoʻopau ʻia aku ka hoʻoponopono ʻana i nā hewa i hana ʻia aku i ka poʻe Māori. A no laila, e kāpae ʻia aku paha ke keʻena ola Māori a me nā papahana e pōmaikaʻi ai ke kaiāulu. A ʻo kekahi mea paha e hana ʻia, ʻo ia ka pāpā ʻana i nā keʻena aupuni, ʻaʻole e hoʻohana i te Reo Māori. He manaʻo ko kekahi luna aupuni, e mālama ʻia ke koho kūikawā no ka pono a me ka pono ʻole paha o ke Kuʻikahi o Waitangi. Ma ka wā like i koho ʻia ai ia mau luna aupuni mākeʻe kūlana i koho ʻia ai ka luna aupuni ʻōpiopio loa ma ka moʻolelo o Aotearoa. A he Māori nō, a he lālā no ka ʻAoʻao Māori. ʻO Hana-Rawhiti Maipi-Clarke kona inoa. ʻŌlelo aʻela ʻo ia, i loko o nā pule ʻelua wale nō, kūʻēʻē aʻela ke aupuni i kona mau ʻano a pau ma nā ʻano a pau.

Hoʻopakele ʻia aku nei ʻo Nathan Grocholski Lopez ma hope o kona ʻau ʻana he ʻehā hola ma ke kai. I ka ʻauinalā Pōʻahā nei, ma waena o ka hola 5:00 a me ka hola 5:30, haʻalele ihola ʻo Grocholski Lopez a me kekahi mau haumāna ʻehā i ka pāka kahakai o Mahaiʻula ma nā waʻa kaukahi hoʻokahi kanaka a e holo ana no ke Awa o Honokōhau. A ma hope mai o ka hola hoʻokahi, kahuli aʻela ka waʻa o Grocholoski Lopez, a moku ihola ke kaula i paʻa ai ʻo ia i ka waʻa, a lilo akula ka waʻa i ke kai. Holo ihola kona manaʻo, e ʻau no Honokōhau. A i ia manawa, ua pōʻeleʻele ihola a nui aʻela ka makani. A ma ka pōmaikaʻi, loaʻa aku nei ʻo ia i nā kānaka e huli ana iā ia he 2.5 mile ma kai aku o ke Kahakai ʻo Pine Trees.

Eia mai kā kākou ʻōlelo noʻeau,

Akāka wale nō ʻo Kaumaikaʻohu.

ʻO ia hoʻi, ua ahuwale.

He ʻano hale hou kai kūkulu ʻia ma Pāʻia.

ʻO ia aʻela kekahi poʻo nūhou o kēia lā, ka lā 14 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma Maui aku nei kekahi kanaka kaha kiʻi hale kaulana, ʻo Shigeru Ban kona inoa, no ke kōkua ʻana i ke kūkulu ʻana i hale. A ʻo ke ʻano o ia hale, me ka ʻohe pepa e hana ʻia ai. A ʻo ia mau ʻohe pepa, he hiki ke hoʻopōʻaiapuni ʻia a he hale nō hoʻi ia e pau koke i ke kūkulu ʻia. A manaʻo ihola ʻo Ban, e kūkulu ʻia paha ia ʻano hale no ka poʻe i pau ko lākou mau hale i nā ahi. Aia nō ia hale i kūkulu ʻia ma Rinzai Zen Mikiona i Pāʻia. A ʻo ka nui o ia hale, he 20 kapuaʻi i ka 12 kapuaʻi. A ma muli o nā kānaka kōkua, i loko o nā lā ʻekolu i pau ai i ke kūkulu ʻia. Ua kūkulu ʻo Ban i ia ʻano hale ma nā ʻāina like ʻole o ka honua nei, ma Iāpana, Rwanda, Tureke, Aotearoa a ma ia wahi aku ia wahi aku.

Koho pāloka aku nei Nā Lāhui Hui Pū i ka Pōʻalua nei no ke koi a me ke koi ʻole paha i ka hoʻomalolo kaua ma Gaza. He 193 mau aupuni i koho pāloka a he 153 i koho i ke koi ʻana i ka hoʻomalolo kaua. He 10 mau aupuni i kūʻē, a he 23 i koho ʻole. ʻO ʻAmelika Hui Pū ʻIa kekahi o nā aupuni i kūʻē, a ʻo nā aupuni ʻē aʻe i kūʻē, ʻo ʻIkelaela, ʻo ʻAukekulia, ʻo Kekia, ʻo Kuatemala, ʻo Liperia, ʻo Maikonekia, ʻo Nauru, ʻo Pāpua Nū Kini, a me Palakuae.

Eia mai kā kākou ʻōlelo noʻeau,

Malu ke kula, ʻaʻohe keʻu pueo.

ʻO ia hoʻi, ua maluhia.

ʻAʻole i kana mai ka nui o ka iʻa make i pae ma kahakai o Hakodate.

ʻO ia aʻela kekahi poʻo nūhou o kēia lā, ka lā 8 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Pae maila nā kālina a me nā makalē he nui hewahewa ma kahakai o Hakodate i Iāpana i ke kakahiaka Pōʻahā nei. Aia ʻo Hakodate ma ka mokupuni ʻo Hokkaido. He mau kaukani kana ka nui o ia mau iʻa e waiho wale ana. ʻŌlelo aʻela nā kamaʻāina o laila, ʻaʻohe o lākou wahi mea a ʻike aku i ia hana a ka iʻa ma mua. ʻO kekahi o lākou, ʻohi aku nei i ka iʻa no ke kūʻai ʻana a no ka ʻai ʻana paha. Akā, koi aku nei nā luna aupuni, ʻaʻole e ʻai ʻia iho ka iʻa, ʻoiai, ʻaʻole i maopopo ke kumu i make ai a pae akula. Ua lohe ʻo Takashi Fujioka, he mea noiʻi no ka Hui Noiʻi ʻOihana Lawaiʻa o Hakodate, no ia hana a ka iʻa ma mua, akā, ʻakahi nō ʻo ia a ʻike maka.

Holo ihola ka manaʻo o Brayden Schager, ka ʻalihikūlele o ka hui pōpō peku o ke Kulanui o Hawaiʻi, e kau kona inoa ma ka papa helu o nā haumāna ʻālapa e makemake ana e hoʻololi kulanui. ʻO Schager ka ʻalihikūlele helu 10 ma ʻAmelika Hui Pū ʻIa a puni. He 3,542 āna ʻīā i nou ai. I kēlā pule aku nei, hōʻole ʻia kona haʻalele ʻana i ke Kulanui o Hawaiʻi ma Mānoa, eia naʻe, i ka Pōʻakolu nei, hōʻike aʻela ʻo Schager iā Tim Chang, ke kumu aʻo, i kona manaʻo e ʻimi i kulanui hou. I kēia manawa, he ʻekolu ʻalihikūlele o Hawaiʻi, ʻo Jake Farrell, ʻo Jonah Chong a me John-Keawe Sagapolutele. A e hiki mai ana kekahi mai ke Kula Kiʻekiʻe ʻo Bishop Gorman ma Las Vegas. ʻO Micah Alejado kona inoa. E pūlima ana ʻo ia i ka Palapala Hōʻike Manaʻo Paʻa i ka lā 20 o Kēkēmapa.

Eia mai kā kākou ʻōlelo noʻeau,

Kau ka ʻōnohi aliʻi i luna.

ʻO ia hoʻi, ua ʻōʻili mai ke ānuenue.

He pila paha e kōkua ana i nā kānaka i pau ko lākou mau wahi noho i nā ahi.

ʻO ia aʻela kekahi poʻo nūhou o kēia lā, ka lā 6 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou

ʻĀpono aku nei ka ʻAha Kūkā o Maui i ka Pila 131 ma ka heluhelu ʻana me ka hoʻololi ʻana i kekahi mau mea liʻiliʻi. A aia a koho pāloka hou ka ʻAha Kūkā a ʻāpono ʻia, a laila, e hoʻokō ʻia iho. Ma ka Pila 131, e hoʻēmi loa ʻia ka ʻauhau o ke kanaka mea hale nāna e hoʻolilo i kona wahi hoʻolimalima wā pōkole i wahi noho wā lōʻihi no nā kānaka no lākou nā hale i pau i nā ahi o ka lā 8 o ʻAukake. Hōʻike aʻela ka Meia Richard Bissen, ke ʻimi ʻia aʻela nā wahi noho he 2,700 no ia mau ʻohana. ʻO kekahi manaʻo o Bissen, ʻaʻole naʻe ia manaʻo ma loko o ka Pila 131, ke ʻole e hoʻololi ʻia i wahi noho wā lōʻihi nā wahi hoʻolimalima wā pōkole a me nā keʻena noho kaʻana manawa, e hoʻonui ʻia aʻe ka ʻauhau waiwai paʻa inā ʻo ka waiwai ʻiʻo, he $1 miliona a ʻoi aku.

Aia ana ka Heihei Malakona o Honolulu i kēia Lāpule. ʻO ke kanalima kumamākahi ia. A kuhi ʻia ihola, e nui ana nā malihini mākaʻikaʻi no Iāpana mai, e pālua ana paha i ko kēlā makahiki aku nei. E mālama ʻia ana ka hōʻikeʻike malakona ma ke Kikowaena Mālama ʻAha o Hawaiʻi. Ma ka Pōʻahā, mai ka hola 10:00 o ke kakahiaka a i ka hola 6:00 o ke ahiahi. Ma ka Pōʻalima, mai ka hola 9:00 a i ka hola 5:00 o ka ʻauinalā. A ma ka Pōʻaono, mai ka hola 9:00 a i ka hola 6:00. A ma ia lā nō hoʻi, aia ana nō hoʻi kekahi heihei pōkole ma ke Alanui Monsarrat, i kapa ʻia ʻo ka Mile Mele a ka Mōʻī Kalākaua. E hoʻomaka ana i ka hola 7:00 o ke kakahiaka. A he ʻelua heihei o ka Lāpule, ʻo ka heihei malakona a me ka heihei ʻumi kilomika i kapa ʻia ʻo ka Pahu Mua a ka Pāka. A e hoʻomaka ana ia mau heihei ʻelua ma ka hola like, ʻo ia hoʻi, i ka hola 5:00 o ka wanaʻao.

Eia mai kā kākou ʻōlelo noʻeau,

Lawea ke kihe i Mauliola.

He ʻōlelo kēia ke kihe ke kanaka.

He kāpili kaʻa paikikala ka hana ma Kahului.

ʻO ia aʻela kekahi poʻo nūhou o kēia lā, ka lā 4 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma ka Maui Marketplace i Kahului i ka Pōʻaono nei, nui nā kānaka e kōkua ana ma ke kāpili ʻana i nā kaʻa paikikala. A e hāʻawi manawaleʻa ʻia ana ia mau paikikala i nā keiki o Maui. Ma kahi o ka 400 mau kaʻa paikikala, i pau i ke kāpili ʻia. A ʻo ka pahuhopu, he 750. No laila, e hoʻomau ʻia aku ka hana i kēia Pōʻaono ma ka Maui Marketplace, mai ka hola 9:00 o ke kakahiaka a ka hola 2:00 o ka ʻauinalā. A pēlā ana nō a pau nā paikikala he 750 i ke kāpili ʻia. Ua hoʻomaka ia hana he ʻeiwa makahiki i hala ma Maui a mālama ʻia i kēlā me kēia wā Kalikimaka. A ʻo ka mea maʻa mau, hāʻawi ʻia nā paikikala i nā Hui Keiki me Kaikamahine o Maui, nā hale pule a me kekahi mau hui hou aku. Akā, i kēia makahiki, e makana ʻia ana nā ʻohana i pilikia i nā ahi o ka lā 8 o ʻAukake.

A pōmaikaʻi nō hoʻi ka hui puhi ʻohe o ke Kula Kiʻekiʻe o Lahainaluna. Ua nui nā pū kani i hāʻawi manawaleʻa ʻia aku, ʻo ka ʻohe puluka, ke kalioneke, ka pū pihi, ke kakopone a me kekahi mau mea hou aku. A pēlā pū me ka puʻu kālā. A e mālama ʻia aku ana ka ʻAhamele Hoʻoilo o ia kula kiʻekiʻe i ka lā 16 o Kēkēmapa. E hemo ana nā puka i ka hapalua hola ʻelima o ka ʻauinalā a e hoʻomaka iho ana ka ʻahamele i ka hola 6:00. Aia ana ma ka Hale Pāʻani Hoʻoikaika Kino ʻo Jimmie H. Greig. A he manuahi ke komo ʻana.

E kūʻai ana ka Hui Mokulele ʻo ʻĀlaka i ka Hui Mokulele ʻo Hawaiian. ʻO ka nui o ke kālā, he $1.9 biliona. ʻĀpono iho nei nā papa alakaʻi o nā hui mokulele ʻelua i ka Pōʻaono nei. Aia naʻe ka holo ʻana a ʻāpono ʻia e nā mea paʻa kea a me nā mea hoʻoponopono pekelala. ʻO ka nui o nā limahana o ka Hui Mokulele ʻo Hawaiian, ua puka 7,300. A ʻo ka hapanui o lākou, e mau ana nō ko lākou mau kūlana hana ke ʻāpono ʻia ke kūʻai ʻana.

Eia mai kā kākou ʻōlelo noʻeau,

Kaha ka ʻio i ka mālie.

He ʻōlelo kēia no ke kanaka nohea.

Holomua aku nei nā Wāhine Ānuenue a ka puni ʻelua o ka Hoʻokūkū Inoa Moho Pōpō Paʻipaʻi.

ʻO ia aʻela kekahi poʻo nūhou o kēia lā, ka lā mua o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Paʻi wikiō ʻia kahi e waiho wale ana ka mokulele P-8A o ka ʻOihana Moku ma luna o ka ʻāpapapa ma ke Kaikūʻono o Kāneʻohe, a kohu mea lā, ʻaʻole nō i nui kahi o ka ʻāpapapa i pōʻino.  

A i ka hiku o ka lā, hoʻōki ihola ʻo ʻIkelaʻela lāua ʻo Hamasa i ka maluhia, a hoʻomaka hou aʻela ka hoʻouka kaua ʻana. Āhea lā e pau ai ke poʻo paʻakikī o ia mau ʻaoʻao a ʻelua. Ma loko o ka wā hoʻomalolo kaua, he haneli mau kānaka pānaʻi a ʻoi i hoʻokuʻu ʻia e Hamasa. A he 240 Palekekine i hoʻokuʻu ʻia e ʻIkelaʻela.

E pani ʻia ana kekahi māhele o kahi kūkulu kaʻa o Uēkahuna a me kahi ʻāpana o ke Ala Hikina ma kaʻe o ka Lua Pele i mea e hoʻomalu ʻia ai kekahi mau nēnē, he kāne a me ka wahine no ka hoʻopiʻi ʻana. ʻO ke kau hoʻopūnana o ka nēnē, hoʻomaka aku nei ma ʻOkakopa a hele ana a ka mahina ʻo Mei. He nui nā mea e pōʻino ai ka nēnē, ʻo ka pōpoki ʻāhiu, ka ʻiole manakuke a me ka hoʻokuʻi ʻia e ke kaʻa. A no laila, paipai ʻia ka lehulehu, e mālie ke kalaiwa ʻana me ka makaʻala i ka nēnē ʻōʻili wale, ʻaʻole e hānai aku i ka nēnē i ka mea ʻai a ʻaʻole hoʻi e hele a kokoke. ʻO ka nēnē wahine, he ʻelima āna hua e hānau ai a emi mai paha. A laila, hoʻomoe ʻo ia i ia mau hua no nā lā he kanakolu ʻoiai kāna kāne e kū kiaʻi ana.

Kāʻili aku nei nā Wāhine Ānuenue i ka lanakila ma ka puni mua o ka Hoʻokūkū Inoa Moho Pōpō Paʻipaʻi. ʻO ʻIoa Mokuʻāina ka hoa paio, a lilo ke eo iā ia ma ka pāʻani mua. Akā, hiu aʻela ʻo Hawaiʻi a lanakila ai ma nā pāʻani ʻekolu ma ia hope mai. ʻO Caylen Alexander, he 18 āna hoʻopio. A ʻo Amber Igiede, he 14 āna hoʻopio, a he ʻehā paku. ʻO Kate Lang, ka mea hānai, he 45 āna hānai, he 13 ʻali, a he ʻekolu paku. A ʻo Tayli Ikenaga, he 16 āna ʻali. I ka hola 5:00 o kēia ʻauinalā, e kūʻē ana ʻo Hawaiʻi iā ʻOlekona.

Eia mai kā kākou ʻōlelo noʻeau,

Neʻepapa ka helu a ka lā i Punahoa.

ʻO ia hoʻi, ʻaʻole i pau koke ka hakakā ʻana a me ke kaua ʻana paha.

Lana ka manaʻo, e hoʻomau ʻia aku ka hoʻomalolo kaua ma Gaza.

ʻO ia aʻela kekahi poʻo nūhou o kēia lā, ka lā 29 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Maikaʻi loa paha ke noke aku nā luna aupuni mokuʻāina a me nā kūlanakauhale paha i ka hana e loaʻa ai i nā kānaka o Lāhainā kahi e noho lōʻihi ai. ʻO ka mea ʻāpiki, ʻaʻohe paha o lākou wahi mea a hana. A no laila, aia nō paha ka nui o ko laila poʻe ke hopohopo ihola i ke kipaku ʻia aku mai ko lākou wahi e noho akula.

I kēlā Pōʻakahi aku nei, kuʻu ihola kahi mokulele o ka ʻOihana Moku ma kahi hoʻolulu mokulele o ke Kahua Pūʻali Koa Malina o Hawaiʻi, a paheʻe loa akula a i loko o ke Kai Kūʻono o Kāneʻohe. I paheʻe paha ua mokulele lā i ka pulu o ke ala kuʻu mokulele i ka ua. ʻŌlelo aʻela ka Lia ʻAkimalala Kevin P. Lenox, kohu mea lā, ʻaʻole i manuheʻu iki ka mokulele. A ua hekau ka mokulele i ke ala kuʻu mokulele i ʻole e neʻe a ʻoniʻoni paha ma loko o ke kai kūʻono. I kēia manawa, ʻo ka ʻenekina hema a me ke kia kuʻu hema o mua, aia ma luna o ka ʻāpapapa.

ʻO ka Pōʻalua nei, ʻo ia ka lā ʻelima o ka hoʻomalolo kaua ma Gaza. Kuapo poʻe pānaʻi iho nei ʻo Hamasa a me ʻIkelaʻela. A he kuapo hou ko ka pō Pōʻakolu, a ke pau ia kuapo ʻana, pau pū ana nō me ka hoʻomalolo kaua. Aia nō nā ʻuao ma Qatara i mea e kūkākūkā ai i ka hoʻomau ʻana i ka hoʻomalolo kaua a me ka hoʻokuʻu ʻana i mau kānaka pānaʻi hou aku. Kauleo aku nei ʻo ʻAmelika Hui Pū ʻIa iā ʻIkelaʻela, ke hoʻokō aku ʻo ia i kāna ʻōlelo hoʻohiki, ʻo ia hoʻi, e hoʻouka hou i ke kaua, e mālama pono ʻo ia i nā kānaka kīwila Palekekine o Gaza a e hōʻalo i ka luku lehulehu ʻana i ia mau kānaka.

Eia mai kā kākou ʻōlelo noʻeau,

Ka laʻi loa a Kamaluohua.

He ʻōlelo kēia no ka maluhia loa ma hope o kahi wā pilikia.

ʻO Waipahu ka inoa moho pōpō pekupeku o Hawaiʻi nei.

ʻO ia aʻela kekahi poʻo nūhou o kēia lā, ka lā 27 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hui hou aʻela ʻo Waipahu lāua ʻo Konawaena ma ke kahua pāʻani pōpō pekupeku no ka Inoa Moho Māhele 1 o nā kula kiʻekiʻe o Hawaiʻi nei. ʻO lāua nō nā hui o ka puni inoa moho pōpō peku o kēlā makahiki aku nei. A na Konawaena i kāʻili i ka lanakila ma ka helu ʻai he 38 i ka 28. Akā, i ka pō Pōʻaono nei, lilo aku nei ka inoa moho iā Waipahu ma ka helu ʻai he 53 i ka 28. ʻO ka lua ia o ka inoa moho i lilo i nā keiki o Waipahu. ʻO ka mua, aia i ka makahiki 2018.

A ʻāhaʻi aku nei nā Kāne Ānuenue i ka lanakila ma ka hoʻokūkū pōpō peku hope loa o ko lākou kikina. Ua paʻi a paʻi, he 24 ʻai a kēlā me kēia ʻaoʻao. A peku akula ʻo Matthew Shipley i ka pōpō he 51 ʻīā a loaʻa ihola he 3 ʻai. A lanakila aʻela ʻo Hawaiʻi ma ka helu ʻai he 27 i ka 24 a Kololako Mokuʻāina. Inā i lanakila ʻo Kololako, inā ua lawa nā lanakila e pāʻani ai ma kekahi o nā Hoʻokūkū Ipu.

Ma ka pāʻani pōpō paʻipaʻi, lanakila aku nei nā Wāhine Ānuenue ma luna o Kekaha Loa ma loko o nā pāʻani ʻekolu wale nō, lilo ai ka inoa moho o ka ʻAhahui Komohana Nui iā lākou. ʻO Amber Igiede ka Mea Pāʻani ʻOi o ia hoʻokūkū, a he 16 āna hoʻopio i ia pō. A ma muli o ia lanakila ʻana, paʻa ihola ko lākou komo ʻana i loko o ka Hoʻokūkū Inoa Moho o nā Kulanui o ʻAmelika. A ʻo ʻIowa Mokuʻāina ko lākou hoa paio ma ka puni mua. Aia ana ka hoʻokūkū ma ʻOlekona i ka hola 2:00 o ka ʻauinalā Pōʻahā.

Eia mai kā kākou ʻōlelo noʻeau,

Puʻuwai hao kila.

He ʻōlelo kēia no ke kanaka wiwo ʻole.

He hoʻomalolo kaua ke ʻike ʻia ana ma Gaza.

ʻO ia aʻela kekahi poʻo nūhou o kēia lā, ka lā 22 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻAe like aʻela ʻo ʻIkelaʻela a me Hamasa i ka hoʻomalolo kaua no nā lā ʻehā. I ka lā 7 o ʻOkakopa i hoʻomaka ai ka hoʻouka kaua ʻana o Hamasa, a ʻo ka pule ʻehiku kēia o ke kaua ʻana o ia mau ʻaoʻao a ʻelua. E hoʻomaka ka hoʻomalolo kaua i ka hola 10:00 o ke awakea Pōʻahā. Ma loko o ia wā kaua ʻole, e hoʻokuʻu aku ana nā ʻaoʻao ʻelua i ka poʻe pānaʻi a me ka poʻe pio. A ʻo nā wāhine a me nā keiki nā mea mua e hoʻokuʻu ʻia aku. ʻAʻole i hoʻomaka ia hoʻomalolo ʻana, a no laila, aia nō nā ʻaoʻao ʻelua ke hoʻouka kaua aʻela.

E hoʻihoʻi ʻia aku kekahi mau hua ʻai o HMC Farms. ʻO ia ke noi a ia hui i ka poʻe na lākou i kūʻai mai, ʻoiai, ua ʻino i ka lisiteria. ʻO nā hua ʻai e hoʻihoʻi ʻia aku, ʻo ka piki, ka palama, a me ka nekatarina i kūʻai ʻia ma nā hale kūʻai a puni ʻo ʻAmelika, a ma Hawaiʻi nō hoʻi, ma waena o ka lā mua o Mei a i ka lā 15 o Nowemapa o ka makahiki 2022 a me ka makahiki 2023. ʻO nā hua ʻai i mahi ʻia me ke kemika ʻole, ʻaʻole lākou i ʻinoʻino. Ma kekahi mau mokuʻāina ʻehiku, he ʻumi kumamākahi mau kānaka i maʻi i ka ʻai ʻana i ia mau hua ʻai. A hoʻokahi mea i make ma Kaleponi. ʻAʻohe kanaka i pōʻino a maʻi paha ma Hawaiʻi nei. Ke ʻai ʻia iho ka hua ʻai i ʻino, ma loko o nā pule ʻelua e hoʻomaka ai ka ʻike ʻia ʻana o kēia mau ʻōuli, ʻo ka piwa, ka ʻeha o ke kino, a me ka luhi. A i kekahi manawa, ʻo ka nalulu o ka lae, ka ʻoʻoleʻa o ke kino, ka nalulu o ka ʻōpū a me ka hī. Inā he nīnau paha kāu, e kāhea iā HMC Farms ma ka helu 844-483-3867 mai ka hola 3:00 o ka wanaʻao a i ka hola 3:00 o ka ʻauinalā mai ka Pōʻakahi a ka Pōʻalima.

Eia mai kā kākou ʻōlelo noʻeau,

Wini ʻiʻo nō.

He ʻōlelo kēia no ke kanaka keu a ka mahaʻoi.