Ke Aolama

ʻAʻole paha e hoʻokō ka ʻOihana Moku i ke kauoha o ke Keʻena Ola o Hawaiʻi.

ʻO ia aʻela kekahi poʻo nūhou o kēia lā, ka lā 8 o Kēkēmapa, he Pōʻakolu. Welina e nā makamaka. ʻO Ke Aolama kēia a penei a nūhou.

Kauoha akula ke Keʻena Ola o Hawaiʻi, e hoʻōki ka ʻOihana Moku i ka lawelawe ʻana i ka hana ma kahi hoʻāhu wahie ma Kapūkakī a e hoʻomaloʻo nō hoʻi i nā pahu wahie ma lalo o ka honua. A he pono nō hoʻi i ka ʻOihana Moku ke hoʻomaʻemaʻe i ka wai inu ma laila. Akā, hoʻouna leka aku nei kekahi loio o ka ʻOihana Moku i ke Keʻena Ola me ka ʻōlelo ʻana, e kūʻē ana ka Lia ʻAkimalala Timothy Kott i ia kauoha. ʻO Kott ka mea nāna e alakaʻi nei i ka Māhele ʻOihana Moku ma Hawaiʻi. Mai ka lā 28 o Nowemapa, he nui nā kānaka i hōʻike no ke ʻano ʻē o ka wai paipu—kohu ʻaila ke honi aku a ʻano ʻē ke hoʻāʻo. A he mau kānaka kai hōʻike i ka loaʻa i ka poluea, ka hī, ka ʻōhune, a me ke poʻo ʻeha. He mau ʻōuli ia ke pā ke kanaka i ka ʻaila kā.

Aia nō ka ʻoihana mākaʻi ke noi aʻela i ka lehulehu i ke kōkua ma ka loaʻa ʻana o kekahi kanaka e ʻimi ʻia nei no ka hoʻāʻo pepehi kanaka. ʻO Arthur Birano kona inoa, a manaʻo ʻia, nāna nō i kī aku i kekahi kanaka i ka pū ma Kalihi i ke ahiahi o ka lā 30 o Nowemapa. ʻO Birano, he 5 kapuaʻi me nā ʻīniha ʻehiku, a he 180 paona, he maka uliuli kona a he lauoho ʻeleʻele. Inā he ʻike paha, e kāhea i ka helu 808-955-8300. A e hoʻouna paha i ka ʻike me ka hōʻike ʻole aku i kou inoa i www.honolulucrimestoppers.org.

Eia mai kā kākou ʻōlelo noʻeau,

Ke ʻehuʻehu nei nā ʻale.

ʻO ia hoʻi, ke hele nei a huhū kekahi.

Kulu ihola ka ʻaila kā i ka luawai ma Kapūkakī.

ʻO ia aʻela kekahi poʻo nūhou o kēia lā, ka lā 6 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hōʻike aʻela ke Kenekoa Brian Schatz, ke Kenekoa Mazie K. Hirono, ka Lunamakaʻāinana Ed Case a me ka Lunamakaʻāinana Kaialiʻi Kahele i ko lākou manaʻo, e hoʻopau aku ke Kuhina o ka ʻOihana Moku, ʻo Carlos Del Toro, i ka lawelawe ʻana i ka hana hoʻāhu wahie ma Kapūkakī. A ʻo ke Kiaʻāina David Ige kekahi me ia mau Luna Kau Kānāwai o Hawaiʻi. I ka Pōʻahā nei, ʻōlelo aʻela ka ʻOihana Moku, ua loaʻa nō ka ʻaila kā ma ka luawai o Kapūkakī. A kūkala aʻela ka Hōkū-Avalataisa o Honolulu, ua nānā ka ʻOihana Moku i ka wai o ia luawai i Iulai, ʻAukake a me Kepakemapa, a he ʻaila kā nō ko loko i ia manawa, ʻaʻole naʻe i hoʻomaopopo ʻia ke Keʻena Ola o ka mokuʻāina a i ka lā 24 o Nowemapa. Mai ke Kaua Honua II, he mau pahu hoʻāhu wahie nunui ko ka ʻOihana Moku, aia ma lalo o ka honua, he 100 kapuaʻi ma luna aʻe o kekahi o nā luawai aniani ʻano nui o Oʻahu nei.

Ma ka Pōʻalima nei, ma hope o nā pāʻani hahana ʻelima, lanakila aku nei nā Wāhine Ānuenue ma luna o Mikikipi Mokuʻāina ma ka puni mua o ka Hoʻokūkū Inoa Moho Pōpō Paʻipaʻi. A i ka Pōʻaono nei, kūʻē aku nei lākou iā Wakinekona ma ka puni ʻelua. A hāʻule pahū koke ihola ka manaʻo o nā wāhine o Hawaiʻi nei, e lilo lākou, ʻo lākou ka inoa moho o ʻAmelika Hui Pū ʻIa i kēia makahiki nei. ʻEkolu wale nō pāʻani, a pau ihola.

Eia mai kā kākou ʻōlelo noʻeau,

Anu hewa i ka pō, he kuʻuna iʻa ʻole.

He ʻōlelo kēia no ka hana makehewa.

ʻO ka Merrie Monarch, e ʻike hou ʻia aku ana i kēia makahiki aʻe.

ʻO ia aʻela kekahi poʻo nūhou o kēia lā, ka lā 3 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Piha hauʻoli ka naʻau o ko Hawaiʻi a me ko ka honua nei paha. E mālama hou ʻia ana ka Hoʻokūkū Hula ʻo ka Merrie Monarch i kēia makahiki aʻe. Ma ʻApelila nō e mālama ʻia ai ka hoʻokūkū. ʻAʻole naʻe e kūʻai ʻia ana ka likiki i ka lehulehu. A no laila, ʻaʻole e hoʻouna ʻia ke noi kūʻai kikiki ma ka leka e like me ka mea maʻa mau ma nā makahiki i hala. ʻŌlelo aʻela ʻo Luana Kawelu, ka pelekikena o ka Merrie Monarch, e hāʻawi ʻia ana nā likiki i nā hālau e hoʻokūkū ana a e hāʻawi ʻia aku ana i nā kānaka a me nā hui e kākoʻo ana i ka hoʻokūkū ma nā makahiki he nui i kaʻa hope aku nei.

E ʻike hou ʻia ana nā Koa Ānuenue ma ke kahua pāʻani. Ua kono ʻia ka hui pōpō pekupeku o ke Kulanui o Hawaiʻi i kekahi hoʻokūkū. ʻO ke Pola Hawaiʻi paha ia hoʻokūkū. He ʻeono lanakila a Hawaiʻi a he ʻehiku hāʻule, no laila, ʻaʻole i kō ke koina e komo ai i ke pola hoʻokūkū. Akā, ua hana ʻia he pola hou, a ʻo ia ke kumu i lilo ai ke kono iā Hawaiʻi. E kūʻē aku ana paha lākou iā Memphis ma ke Ahiahi Kalikimaka ma ke Kāhua Pāʻani ʻo Ching. ʻO kahi mea minamina no Hawaiʻi, ʻaʻole e pāʻani ana ʻo Chevan Cordeiro, ka ʻalihikūlele, a me Dae Dae Hunter, ka ʻāholo. Ua holo ko lāua manaʻo, e ʻimi i kulanui hou e pāʻani pōpō pekupeku ai.

Aia nō kekahi mau Wāhine Ānuenue ke kau aʻela ma ka hano hāweo. Ua koho ʻia ʻo Brooke Van Sickle, ʻo ia ka mea pāʻani pōpō paʻipaʻi ʻoi o ka makahiki o ka ʻAhahui Komohana Nui. A koho ʻia ʻo Robyn Ah Mow, ʻo ia ke kumu aʻo ʻoi o ka makahiki o ia ʻahahui. I kēia lā, e kūʻē aku ana nā Wāhine Ānuenue iā Mikikipi Mokuʻāina ma ka puni mua o ka Hoʻokūkū Inoa Moho o ka ʻAhahui ʻĀlapa o nā Kulanui o ʻAmelika Hui Pū ʻIa.

Eia mai kā kākou ʻōlelo noʻeau,

Paʻa ka moku i ka heleuma.

He ʻōlelo kēia no ke kanaka i male ʻia

E ʻō ʻia aku paha i ka lāʻau koʻokoʻo pākeu.

ʻO ia aʻela kekahi poʻo nūhou o kēia lā, ka lā mua o ka mahina ʻo Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Hōʻike aʻela ke Keʻena Ola o Hawaiʻi nei, ʻo ka poʻe kānaka makua a pau i ʻō piha ʻia i ka lāʻau koʻokoʻo o Moderna a o Pfizer paha he ʻeono mahina i hala a ʻoi aku paha, e ʻō ʻia lākou i ka lāʻau koʻokoʻo pākeu. A inā ua ʻō ʻia i ka lāʻau koʻokoʻo o Johnson a me Johnson he ʻelua mahina i hala a ʻoi aku, e ʻō ʻia nō hoʻi i ka lāʻau koʻokoʻo pākeu. He hahai ia i nā lula hou o ke Kikowaena Hoʻomalu a Pale Maʻi Lele o ʻAmelika Hui Pū ʻIa. ʻAkahi nō a ʻāpono ʻia iho ia mau lula hou ma muli o kekahi mana hou o ke COVIDA-19 i kapa ʻia ʻo ka ʻomikolona. ʻŌlelo aʻela ke Kauka Elizabeth Char, ka Luna Ola Kino o Hawaiʻi, ʻaʻole wahi mea o ka mana ʻomikolona a ʻike ʻia ma Hawaiʻi nei, akā, e ʻō ʻia ʻoe a me ka ʻohana i ka lāʻau koʻokoʻo, e komo i ka pale ihu, a ʻaʻole e hele ma kahi e ʻākoakoa ana nā kānaka he nui

Aloha nō. I ke ahiahi Pōʻakahi nei, make iho nei kekahi ʻelemakule ma hope o kona hoʻokuʻi ʻia ʻana aku e kekahi kaʻa ma kahi e kokoke ana i ka huina alanui o Kekaulike a me Nimitz. E moe wale iho ana nō ua ʻelemakule nei ma ke kāʻei koʻele wāwae o ke alanui a ʻo ia kona wā i hoʻokuʻi ʻia ai e ke kaʻa. Lawe ʻia akula ʻo ia i ka haukapila ma ke kūlana kūpilikiʻi. A ma laila ʻo ia kahi i make ai. ʻO ke kanahā ia o ke kanaka i make ma ka ulia kaʻa ma Oʻahu nei i kēia makahiki nei.

Eia mai kā kākou ʻōlelo noʻeau,

Puka ma ka ʻāpua.

He ʻōlelo kēia no ke kanaka i pakele māhunehune i ka pilikia.

Paʻa ihola ka hoa paio o nā Wāhine Ānuenue ma ka puni mua o ka Hoʻokūkū Inoa Moho.

ʻO ia aʻela kekahi poʻo nūhou o kēia lā, ka lā 29 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua pani ʻia iho nei ke Kahakai o Kekaha i ka ʻauinalā o ka Lāpule nei ma hope o ka ʻike ʻia ʻana aku o kekahi manō ma laila. ʻO ka nui o ua manō lā, he ʻewalu kapuaʻi a ʻoi. Ua ʻōlelo ʻia, e hahai ana ka manō i kekahi kanaka e ʻau ana no uka. ʻAʻohe kanaka i ʻeha a pōʻino paha. E pani hou ʻia paha i kēia lā, aia nō i ka nānā ʻana.

Hopu ʻia aku nei kekahi wahine i ka wanaʻao o ka Lāpule nei ma kahi e kokoke ana i ke Kikowaena Kūʻai o Mānana no ka nahu ʻana i kekahi mākaʻi. He iwakālua kumamāhā makahiki o ua wahine lā, a aia ʻo ia ma ka malu o ka mākaʻi i kona wā i nahu ai i ka mākaʻi.

Ua eo nā Wāhine Ānuenue iā Kāna Palapala i ka Pōʻaono nei akā, ma muli o ko Hawaiʻi lanakila ʻana aku ma luna o Cal State Northridge i ka Pōʻalima, ua lilo nā Wāhine ʻo lākou ka inoa moho o ka ʻAhahui Komohana Nui, paʻa ai hoʻi ko lākou komo ʻana i ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa Kulanui o ʻAmelika Hui Pū ʻIa. I kēia Pōʻalima ma Sitala, e kūʻē aku ana ʻo Hawaiʻi iā Mikikipi Mokuʻāina ma ka puni mua o ia hoʻokūkū inoa moho.

Eia mai kā kākou ʻōlelo noʻeau,

Ua hihina wale i Moeawakea.

He ʻōlelo hoʻomākeʻaka kēia inā hāʻule kekahi kanaka hiamoe ʻoi kau ka lā.

E piha hou ana paha nā hale ʻaina i nā kānaka e ʻai mūkā ana.

ʻO ia aʻela kekahi poʻo nūhou o kēia lā, ka lā 24 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Kūkala aʻela ke Kiaʻāina David Ige, ma kēia hope aku, na nā kalana e hana i ko lākou mau lula maʻi ahulau. A wahi āna, e emi mai ka ʻoʻoleʻa o kekahi mau lula. Ua ʻoi aku ka maikaʻi i kēia manawa, akā, ʻaʻole i pau. ʻAʻohe wahi mea i loli ma ka polokalamu Huakaʻi Palekana, ma ka lula kau pale ihu, nā koina ʻō lāʻau koʻokoʻo a me ka nānā ʻana i ka loaʻa a me ka ʻole o nā limahana mokuʻāina me kalana i ua maʻi lā. A pēlā pū nō me ka poʻe kānaka kepa ʻia a me nā mea kipa i nā hale mokuʻāina. ʻŌlelo aʻela ka Meia Rick Blangiardi e pau ka lula hoʻokaʻawale ʻeono kapuaʻi ma nā hale ʻaina o Oʻahu nei i mea e piha hou ai i nā kānaka.

Ma ka puni ʻelua o ka Hoʻokūkū Kono o Maui, ua eo ihola ʻo Chaminade iā Notre Dame ma ka helu ʻai he 90 i ke 64. ʻO Dane Goodwin o nā ʻAiliki Hakakā, he 17 āna ʻai. A ʻo Isaac Amaral-Artharee o nā ʻĀhinahina, he 16 āna ʻai. Ma Las Vegas e mālama ʻia nei ka hoʻokūkū kono o Maui a e hoʻi hou i Maui i kēia makahiki aʻe.

Eia mai kā kākou ʻōlelo noʻeau,

Holu ka pua o ka mauʻu, kapalili ka lau o ka lāʻau, māewa ka lau o ke ʻuki.

He ʻōlelo kēia no ka māmā o ke kanaka i ka holo.

E alakaʻi ana kekahi kāʻeʻaʻeʻa hākōkō o Hawaiʻi i ka hui hākōkō wahine o ke Kulanui o ʻIoa.

ʻO ia aʻela kekahi poʻo nūhou o kēia lā, ka lā 22 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Kūkala aʻe nei ke Kulanui o ʻIoa, e hoʻomaka ana ka polokalamu hākōkō o nā wāhine i ke kikina 2023 – 2024. A ʻo ia ke kulanui mua o ka ʻAhahui Mana ʻElima o ka ʻAhahui ʻĀlapa o nā Kulanui o ʻAmelika Māhele I e hana pēlā. A ua paʻa ihola ke poʻo kumu aʻo mua o ia polokalamu hākōkō hou, ʻo ia ʻo Clarissa Chun. No Hawaiʻi ʻo ia. A ua puka mai ke Kula Kiʻekiʻe ʻo Rusawela. Koho ʻia ʻo Chun, ʻo ia kekahi ma ka Hale Kaulana o ke Kulanui o Mikouli, ka Hale Kaulana ʻĀlapa o Hawaiʻi a me ka Hale Kaulana o ke Kula Kiʻekiʻe ʻo Rusawela i ka makahiki 2018. A he mea ʻālapa ʻo Chun ma nā Hoʻokūkū ʻOlimepika i ka makahiki 2008 ma Beijina a ma ka makahiki 2012 ma Lākana. Ma Beijina, ʻo Chun ka helu ʻelima. A ma Lākana, lilo aku nei ka mekala keleawe iā ia.

I ka Pōʻaono nei, suipa lilo akula nā Wāhine Ānuenue iā Cal Poly ma ka pōpō paʻipaʻi. A ma muli o kēlā, ua paʻa ihola ko Hawaiʻi kūlana inoa moho o ka ʻAhahui Komohana Nui i kēia kau nei. Akā, he hiki nō iā Kāna Palapala ke kau pū aku ma ia kūlana. I kēia manawa, e ʻoi ana ʻo Hawaiʻi iā Kāna Palapala he ʻelua hoʻokūkū, a he ʻelua hoʻokūkū i koe. Hoʻokahi wale ala e kau pū ai ʻo Kāna Palapala me Hawaiʻi, ʻo ia ka lanakila ʻana ma nā hoʻokūkū ʻelua i koe a me ka hāʻule ʻana o Hawaiʻi ma nā hoʻokūkū ʻelua i koe. E kūʻē ana ʻo Kāna Palapala iā Cal State Northridge ma ka Pōʻalua. A e kūʻē aku ana nā Ānuenue iā Cal State Northridge i ka Pōʻalima. A ma ka Pōʻaono e hui ana ʻo Hawaiʻi a me Kāna Palapala ma ke kahua no ke kūʻē ʻana.

Eia mai kā kākou ʻōlelo noʻeau,

ʻEha i ka ʻeha lima ʻole a ke aloha.

ʻO ia hoʻi, ua hoʻohihi loa kekahi kanaka i kekahi.

ʻO ia aʻela kekahi poʻo nūhou o kēia lā, ka lā 19 o ka mahina ʻo Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Kūkala aʻela ka Papa Kiaʻāina o ke Kikowaena Hikina-Komohana, ʻo Suzanne Vares-Lum ana ka pelekikena hou o ia kikowaena. ʻAkahi nō a lilo ia kūlana i ka ʻŌiwi Hawaiʻi a i ka wahine nō hoʻi. Ua hānau ʻo Vares-Lum ma Wahiawā, a lilo ihola i Lukānela ʻelua ma ka polokalamu o ka Pūʻalikoa Aʻo Aliʻi Koa Ukali o ke Kulanui o Hawaiʻi ma Mānoa. He 34 ona makahiki i hana ai ma ka Pūʻalikoa ʻAmelika Hui Pū ʻIa a he Mekia Kenela ʻo ia i kona wā i hoʻomaha loa ai i ʻApelila. ʻO ka wahine Hawaiʻi mua loa ʻo Vares-Lum i lilo i kenelala.

He kaʻa wane hoʻomākaʻikaʻi kai pau i ke ahi i kona wā e piʻi ana no luna o Mauna Kea i ka lā 9 o ka mahina ʻo Nowemapa. E holo ana nō ke kaʻa wane, a honi ʻia aʻela ka uahi, hoʻokū ke kiakaʻa i ke kaʻa, a lele ihola nā mea a pau o luna i lalo o ka honua. He ʻeiwa mau kānaka o luna o ke kaʻa, ʻo ke kiakaʻa a me nā ʻōhua he ʻewalu. Ma hope iho, ua ʻā ʻia ke ahi, a e pahū ana kekahi mau mea o ke kaʻa. Ua kāhea ʻia aku ke kinai ahi, a hiki maila he hui kinai ahi pekelala mai Kahi Hoʻomaʻamaʻa o Pōhakuloa he 30 minuke ma hope mai, a hoʻopio akula i ke ahi. Ua pau loa ke kaʻa wane i ka pōʻino. Akā, ʻo ka mea nui, ʻaʻohe ola i pōʻino.

Hopu ʻia aku kekahi kanaka iwakālua kumamāhiku makahiki e ka mākaʻi o Honolulu. Ua ʻōlelo ʻia, ua kuʻi akula ʻo ia i kekahi kiaʻipoʻo. Ua hoʻāʻo ke kiaʻipoʻo e lawe aku i ua kanaka lā i waho o ka Pūpū o Waikīkī no ka mea, ʻaʻole ʻo ia e komo ana i ke pale ihu. He 71 makahiki o ke kiaʻipoʻo. ʻO ka Pūpū o Waikīkī, he wahi ia e nānā ʻia ai ka loaʻa o ke kanaka i ka maʻi COVIDA a me ka ʻole paha.

Eia mai kā kākou ʻōlelo noʻeau,

Kāpī ʻia i ka paʻakai a miko.

ʻO ia hoʻi, ua pono ke uku aku i uku hoʻopaʻi kanono.

He mau kūlana hana hou ko ke Keʻena ʻĀina a Waiwai Pili ʻĀina o Hawaiʻi nei.

ʻO ia aʻela kekahi poʻo nūhou o kēia lā, ka lā 17 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua make iho nei kekahi kanaka i kona wā e ʻō iʻa ana ma kahi e kokoke ana i ka Uapo Makai o Waimānalo i ka pō Pōʻakahi nei. E ʻō iʻa ana ʻo ia me kekahi mau hoa aloha ona, ʻaʻole naʻe ʻo ia i hoʻi mai i uka. I ka ʻimi ʻana aʻe o kona mau hoa, ʻo kāna kukui paʻa lima wale nō kai loaʻa mai. Ua hiki maila nā kānaka kinai ahi ma kahi o ka uapo ma mua iki o ka ʻumi minuke i koe kani ka hola ʻumi (ka hola 10:50) o ke aumoe. Ua loaʻa nō ua kanaka ʻō iʻa lā i kekahi mau kānaka ma kahi e kokoke ana i ke kahakai o Kaupō a lawe ʻia maila i uka a hoʻomaka akula i ka hoʻohanu ʻana i mea e ola hou ai ʻo ia. I ka hiki ʻana aku o nā kānaka lapaʻau ulia, kūkala ʻia aʻela, ua make ua kanaka lā.

I ka Pōʻakahi nei, kūkala aʻe nei ke Keʻena ʻĀina a Waiwai Pili ʻĀina o Hawaiʻi, ke ʻimi ʻia akula he mau moho no kona Māhele Hoʻomalu Waiwai a puni kēia pae ʻāina, ʻoiai he mau kūlana hana hou. ʻO ka uku, he $23.39 o ka hola, ma kahi o ka $48,650 o ka makahiki. ʻO ke koina haʻahaʻa, ua piha nā makahiki he 21, he laikini kalaiwa kū i ke kānāwai, a ʻae ʻia ma ke kānāwai kona mālama ʻana i ka pū. ʻAʻole e ʻae ʻia ke kanaka i hoʻāhewa no ka hana hoʻomāino kūloko, ke kalaima peloni a me ke kalaima weliweli. A inā hai ʻia, e pau pono i ke ʻō ʻia i ka lāʻau koʻokoʻo ke hiki aku i ka lā mua o ka hana. He hiki ke noi ʻia ka hoʻokuʻu ʻia o ia koina ma muli o ke kumu hoʻomana a me ka pilikia ola kino paha. E kau ana ka hoʻolaha ma jobs.hawaii.gov/careers ma ka lā 4 o ka mahina ʻo Kēkēmapa. E ʻae ʻia ka palapala noi a i ka lā 15 o Ianuali, inā ʻaʻole e hiki ʻē nā palapala noi i ka nui i kau palena ʻia no kēlā me kēia hoʻolaha. No laila, e noi koke. I ka makahiki 2019, ka wā hoʻi i ʻimi ʻia ai he mau moho, he mau hola helu wale nō a pani ʻia ma muli o ka piha koke i nā palapala noi.

Eia mai kā kākou ʻōlelo noʻeau,

ʻO kona maʻi, he ake pau.

He ʻōlelo kēia no ke kanaka i nui kona makemake e hoʻopau koke i kāna hana.

Hahana nō ka mokomoko ʻana o ka Pōʻaono nei.

ʻO ia aʻela kekahi poʻo nūhou o kēia lā, ka lā 15 o ka mahina ʻo Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Kū kilakila ana kahi kāʻeʻaʻeʻa o Waiʻanae i ka Pōʻaono nei ma Las Vegas. Ma ka hoʻokūkū ʻano nui o ka Pō Mokomoko o ka UFC, lanakila aku nei ʻo Max Holloway ma luna o Yair Rodriguez. Ua lōkahi ka manaʻo o nā luna loiloi, ʻo Holloway ka ʻoi, akā, ua ʻike ʻia nō nā ʻai a nā uʻi ʻelua. Ua pā kanono ʻo Rodriguez iā Holloway he 230 manawa. A he 159 manawa i pā kanono ai ʻo Holloway iā Rodriguez. Ma hope pono o ka hopena o ka hoʻokūkū, lawe ʻia akula ʻo Holloway lāua ʻo Rodriguez i ka haukapila.

He māpeta hou ko Sesamī Alanui. He Kōlea ʻAmelika. ʻO Ji-Young kona inoa. A ʻo ia ka māpeta ʻĀkia ʻAmelika mua loa ma ia polokalamu keiki. He ʻehiku makahiki o Ji-Young a puni ʻo ia i ka hoʻokani kīkā uila a me ka holo papa huila. ʻO Kathleen Kim ka mea nāna ʻo Ji-Young i hana. A he Kōlea ʻAmelika nō hoʻi ʻo Kim. I hana ʻia ʻo Ji-Young ma muli o nā kūkākūkā he nui ma hope o ka hana i make ai ʻo George Floyd a me nā hoʻomake a hōʻeha maka welawela ʻia o nā kānaka ʻĀkia ma ka makahiki 2020.

Eia mai kā kākou ʻōlelo noʻeau,

ʻAʻohe pueo keʻu, ʻaʻohe ʻalae kani, ʻaʻohe ʻūlili holoholo kahakai.

ʻO ia hoʻi, he maluhia.