Ke Aolama

ʻO nā ʻōpio wahine o ke Kula Kiʻekiʻe o Kamapela ke kū kilakila aʻela.

ʻO ia aʻela kekahi poʻo nūhou o kēia lā, ka lā 5 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Lāpule nei, kauoha aʻe nei ka Pelekikena Donald Trump i ke Keʻena Hale Paʻahao o ke aupuni pekelala e kūkulu hou i ka Hale Paʻahao o ʻAlakataraza ma ke Kai Kūʻono o Kapalakiko a e wehe hou ʻia i wahi e noho paʻahao ai ka poʻe hana kalaima weliweli loa. Ua pani loa ʻia ua hale paʻahao lā i ka makahiki 1963. A i kēia manawa, ʻo ia kekahi o nā wahi mākaʻikaʻi nui ʻia o Kapalakiko e ka poʻe malihini. Hōʻike ʻia ma ke kahua pūnaewele o ke Keʻena Hale Paʻahao, ʻo ke kumu i pani ʻia ai, ua pipiʻi loa ka lawelawe ʻana i ka hana ʻoiai he mokupuni ia. ʻO ka nui o ke kālā i hoʻolilo ʻia no ka lawelawe ʻana i ka hana, ua ʻaneʻane e pākolu i nā hale paʻahao pekelala ʻē aku a puni ʻo ʻAmelika Hui Pū ʻIa.

ʻO ka makahiki mua kēia o ka hoʻokūkū pōpō pekupeku lepa o nā ʻōpio wahine o nā kula kiʻekiʻe o Hawaiʻi nei. A na Kamapela i kāʻili i ka inoa moho mokuʻāina ma ka lanakila ʻana aku nei ma luna o Leilehua i ka pō Pōʻaono nei ma ka helu ʻai he 6 i ka hua kakā. ʻO Maya Gonsalves, ka ʻalihi kūlele o Kamapela, kai holo he 33 ʻīā a loaʻa ka ʻai holo ma ka hopena o ka hapahā mua. Ua holo ka manaʻo o Gonsalves a me kekahi o kona mau hoa pāʻani, e kāpae aku i ka hele ʻana i ka ʻaha hulahula o ka papa kiʻekiʻe loa, a e hoʻāʻo e hoʻokō i kekahi mea i hana ʻole ʻia ma nā kula kiʻekiʻe o Hawaiʻi nei.

Eia mai kā kākou ʻōlelo noʻeau,

He kanaka no kaulu hānai.

He ʻōlelo kēia no ke kāʻeʻaʻeʻa.

He mau iwi kanaka kai loaʻa mai.

ʻO ia aʻela kekahi poʻo nūhou o kēia lā, ka lā 2 o Mei, he Pōʻalima. Welina e nā makamaka. ʻO Ke Aolama kēia a penei ka nūhou.

ʻĀkoakoa aku nei kānaka a puni ʻo ʻAmelika Hui Pū ʻIa no ka pono o nā uniona a me ke kūʻē ʻana aku i nā hana like ʻole a ka Pelekikena Donald Trump. A ma Oʻahu nei, ua ʻākoakoa ma ke Kapikala, a laila, kaʻi like akula i ka Hale Pekelala. Kuhikuhi ana kekahi mau kānaka i ka hoʻolilo ʻana o ka pelekikena a me kāna poʻe hoʻokō i ke kōkua i ka poʻe ʻona biliona i mea nui loa a e noi ana nā kānaka iā Trump mā, e hoʻolilo i nā ʻohana hana, ʻo lākou nā mea nui, a e hoʻokaʻawale ʻia ka haʻawina kālā a lawa kūpono no nā polokalamu ola kino, kahi noho o ka lehulehu a me nā kula aupuni.

Hōʻike aʻela ka ʻOihana Mākaʻi o Honolulu, ua loaʻa aku nei i kekahi mau mākaʻi he mau iwi kanaka e waiho wale ana ma luna o kekahi kaʻa i kūkulu ʻia ma Varsity Place. E hoʻopaʻi ana kekahi mau mākaʻi i nā kaʻa i kūkulu hewa ʻia ma kahi o ke Kulanui o Hawaiʻi, a ʻo ia ka wā i loaʻa ai nā iwi i ia mau mākaʻi. Aia nō ka mākaʻi ke noiʻi aʻela.

Kau aku nei ʻo Lily Wahinekapu, he mea pāʻani pōpō hīnaʻi, ʻo Jordan Wedderburn, he mea pāʻani polo wai, a ʻo Brayden Schager, he mea pāʻani pōpō peku ma ka hano hāweo. Lilo aku nei ka Makana ʻo Jack Bonham iā lākou ʻekolu. ʻO ia ka makana hanohano loa e kau aku ma luna o ka ʻālapa o ke Keʻena Hana ʻĀlapa o ke Kulanui o Hawaiʻi. He makana ia no ka ʻālapa o ka papa e puka ana a i ʻoi kelakela aku kāna hana ʻālapa a me ka hana kulanui a he hana kaiāulu nō hoʻi kāna.

ʻO Charlie Wade kekahi i kau i ka hano. Ua koho ʻia ʻo ia, ʻo ia ke Kumu Aʻo Pōpō Paʻipaʻi ʻOi o Ka Makahiki o ka ʻAhahui Komohana Nui. A ʻo ke kolu ia o ka manawa i lilo ai ia hanohano iā ia ma loko o nā kikina ʻehā i kaʻa hope aku nei.

Eia mai kā kākou ʻōlelo noʻeau,

Hala nā lā ʻino o ka hoʻoilo.

ʻO ia hoʻi, ua pau ka wā pilikia.

He puʻukani no Hawaiʻi ke hele nei a kaulana.

ʻO ia aʻela kekahi poʻo nūhou o kēia lā, ka lā 30 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

E hoʻomaka nō ke kākau inoa ʻana no nā polokalamu kiaʻi ola no nā ʻōpiopio ma Oʻahu nei. Na ke Keʻena Palekana Kai o ke kūlanakauhale ka mālama ʻana i kekahi polokalamu manuahi ma ke kau wela. A i ka hola 8:00 o ke kakahiaka o ka lā mua o Mei e hoʻomaka ai ke kākau inoa ʻana ma ka pūnaewele. He hoʻokahi pule ka lōʻihi o ia polokalamu. A e holo mai ka hola 9:00 o ke kakahiaka a i ka hola 2:00 o ka ʻauinalā. ʻAe ʻia nā keiki mai ka ʻumi kumamākahi makahiki a i ka ʻumi kumamāhiku. A na ka ʻAhahui Kiaʻi Ola o ke Kapakai ʻĀkau ka mālama ʻana i kekahi a ma ke kau wela nō hoʻi. He $100 ka uku. No ke kākau inoa ʻana, e hele kino aku i ke kahua pāʻani pōpō wāwae o ka Pāka Kahakai o Paumalū i ka hola 9:00 o ke kakahiaka o ka lā 3 o Mei. He ʻehā pule o ia polokalamu. A hoʻokaʻawale ʻia nā keiki ma nā pae makahiki. No poʻe keiki he ʻewalu makahiki a i ka ʻumi kumamākahi, aia ana ma ke Kai Kūʻono o Waimea mai ka hola 8:00 o ke kakahiaka a i ka hola 12:00. A ma Iune ia. A ma Iulai, no nā ʻōpiopio he ʻumi kumamālua makahiki a i ka ʻumi kumamāhiku, aia ana ma ka Pāka Kahakai o ʻEhukai mai ka hola 8:00 o ke kakahiaka a i ka hola 1:00 o ke awakea.

He ʻumi wale nō moho koe o ka hoʻokūkū hīmeni ʻo American Idol. A ʻo Thunderstorm Artis kekahi o lākou. ʻO Artis, ua hānau ʻia a hānai ʻia nō hoʻi ma Oʻahu nei. I ka makahiki 2020, aia ʻo Artis ma ka hoʻokūkū hīmeni ʻo The Voice. A hiki akula nō ʻo ia a ka helu ʻekolu o ia hoʻokūkū. Ma Haleʻiwa kona hānai ʻia ʻana, akā, ma Nashville ʻo ia e noho akula i kēia manawa me kāna wahine a me nā keiki kāne ʻelua a lāua.

Eia mai kā kākou ʻōlelo noʻeau,

He heʻe ka iʻa, he iʻa kino palupalu.

He ʻōlelo kēia no ke kanaka nāwaliwali.

E hula leʻa ana a kulu ke aumoe.

ʻO ia aʻela kekahi poʻo nūhou o kēia lā, ka lā 27 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻO ke poʻokela o nā hālau a pau o nā ahiahi ʻelua o ka Hoʻokūkū Hula o ka Mōʻī ʻOliʻoli, ʻo nā wāhine o Hula Hālau ʻO Kamuela a me nā kumu hula Kunewa Mook lāua ʻo Kauʻionālani Kamanaʻo, he 1,216 a lākou ʻai. A he ʻekolu ʻai ma lalo mai, he 1,213 ʻai a nā wāhine o Hālau Ka Lei Mokihana o Leināʻala a me ke kumu hula Leināʻala Pavao Jardin. A ma ka helu ʻekolu, he 1,205 a lākou ʻai, ʻo nā kāne o Hālau Nā Kamalei o Līlīlehua me ke kula hula Robert Uluwehionāpuaikawēkiuokalani Cazimero. ʻO ka helu ʻekahi o nā wāhine o nā ahiahi ʻelua, ʻo Hula Hālau ʻO Kamuela. ʻO ka helu ʻelua, ʻo Hālau Ka Lei Mokihana o Leināʻala. A ʻo ka helu ʻekolu, ʻo Hālau Hula Ka Lehua Tuahine me kumu hula Kaʻilihiwa Vaughan-Darval. A eia mai nā ʻoi o nā kāne i ia mau ahiahi ʻelua. ʻO ka helu ʻekahi, ʻo ia nō ʻo Hālau Nā Kamalei O Līlīlehua. ʻO ka helu ʻelua, ʻo Hālau Hiʻiakaināmakalehua a me nā kumua hula Robert Keano Kaʻupu IV lāua ʻo Lono Padilla. A ʻo ka helu ʻekolu, ʻo Hālau Kekuaokalāʻauʻalaʻiliahi me nā kumu hula Haunani lāua ʻo ʻIliahi Paredes. Hoʻomaikaʻi i nā mea a pau i hula ma ka Mele Manaka. E ʻole ʻoukou, mau ai nā moʻolelo a me kahi hoʻokūkū hula pūlama ʻia.

Aia kekahi ʻōpiopio ke waiho akula ma ke kūlana kūpilikiʻi ma ka haukapila. I ke ahiahi Pōʻaono nei, ua hili ʻia kona poʻo i ka lāʻau hili e kekahi ʻōpiopio ma kahakai o ʻEwa. Ma hope, naholo aʻela ka mea nāna ka hili ʻana a me kona mau hoa aloha ma nā paikikala uila, nā mokokaikala uila a me nā mopeka. Aia ka ʻoihana mākaʻi ke noiʻi aʻela i ka hoʻāʻo pepehi kanaka ma ke kekelē ʻelua. Inā he ʻike paha kāu, e kāhea aku i ka helu 911.

Lilo aku nei ka Inoa Moho Pōpō Paʻipaʻi o ka ʻAhahui Komohana Nui i nā Kāne Ānuenue ma hope o ko lākou lanakila ʻana aku nei ma luna o Kekaha Loa i ka pō Pōʻaono nei. ʻO ka hā ia o ka inoa moho ʻAhahui Komohana Nui i lilo iā Hawaiʻi. Paʻa ihola ko lākou kūlana ma ka Hoʻokūkū Inoa Moho o ka ʻAhahui ʻĀlapa Kulanui o ʻAmelika. ʻO Kekaha Loa ka helu ʻekahi o ia hoʻokūkū, a ʻo Hawaiʻi ka helu ʻelua. Ma ka lā 8 o Mei, ka puni ʻelua o ka hoʻokūkū, e kūʻē aku ana ʻo Hawaiʻi i ka lanakila ma waena o Penn State a me Daemen.

Eia mai kā kākou ʻōlelo noʻeau,

Leʻaleʻa ka ʻōlelo i ka pohu aku o loko.

ʻO ia hoʻi, ʻono ke kolekole ʻana ke māʻona ka ʻōpū.

Maikaʻi Kauaʻi, hemolele i ka mālie.

ʻO ia aʻela kekahi poʻo nūhou o kēia lā, ka lā 25 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

Ua ʻolu nō ke kino i ka hula i ka pō Pōʻahā nei ma ka Hoʻokūkū Hula ʻo ka Mōʻī ʻOliʻoli. A na Jaedyn Janae Puahaulani Pavao o Hālau Ka Lei Mokihana o Leināʻala i ʻāhaʻi i ka lanakila, ʻo ia ka Miki Aloha Hula o kēia makahiki nei. A lilo nō hoʻi iā Pavao ka Makana ʻŌlelo Hawaiʻi. ʻO Tiare-Jennings Iwalani Kamaluoluokatuahine Rebecca Kaʻaumoana Vaughan-Darval o Hālau Hula Ka Lehua Tuahine ka helu ʻelua. Ma ka helu ʻekolu ʻo Emalia Pomaialoha KeleihanupīkakeiāPāʻoaehulaleʻaikalaninuiākea Dalire o Keolalaulani Hālau ʻŌlapa O Laka. Ma ka helu ʻehā ʻo Marina Laʻakea Choi o Hālau Hiʻiakaināmakalehua. A ʻo Chloe Makanaleiliʻiliʻi Rei Cummins o Hula Hālau ʻO Kamuela ka helu ʻelima.

Ma ka puni mua o ka Hoʻokūkū Inoa Moho Pōpō Paʻipaʻi o ka ʻAhahui Komohana Nui, lanakila aku nei ʻo Irivine ma luna o Notarika ma loko o nā pāʻani ʻelima i ka pō Pōʻahā nei, a no laila, ʻo Irvine ana ka hoa paio o Hawaiʻi i kēia ahiahi. Ma mua o ia hoʻokūkū, e kūʻē aku ana ʻo Kekaha Loa iā Kāna Kieko. ʻO nā lanakila ʻelua ke hui pū ma ka puni inoa moho i ke ahiahi Pōʻaono.

Ma ke koho mea pāʻani o ke Kuʻikahi Pōpeku Aupuni, ua koho ʻia ʻo Tetairoa McMillan ma ka puni mua. ʻO ia ka mea pāʻani ʻewalu i koho ʻia. Ua hānau ʻo McMillan ma Waimānalo a neʻe akula me kona ʻohana i Kaleponi i ka piha ʻana o nā makahiki he 12 iā ia. He ʻāʻapo ākea ʻo ia no ke Kulanui ʻo ʻAlikona.

Eia mai kā kākou ʻōlelo noʻeau,

Niniu Molokaʻi, poahi Lānaʻi.

He ʻōlelo kēia no ka hoʻolewa a me ka poahi ʻana o ke kīkala ma ka hula.

Hoʻokuʻi ʻia aku nei kekahi wahine hāpai e ke kaʻa.

ʻO ia aʻela kekahi poʻo nūhou o kēia lā, ka lā 23 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Hopu ʻia aku nei kekahi kanaka i manaʻo ʻia, i kona wā e kalaiwa ana i kona kaʻa, ua hoʻāʻo ʻo ia e ili aku kona kaʻa a ma luna o kāna ipo hāpai i ka lā 8 o ʻApelila. ʻO Justin Kalani Ahkuoi ka inoa o ua kanaka lā a he 34 ona makahiki. I ka pō Pōʻakahi nei, hele aku nei ʻo ia i ke Keʻena Mākaʻi o Honolulu ma ke Alanui Pelekania. A ma laila ʻo ia i hopu ʻia ai a hoʻopiʻi ʻia ai nō hoʻi no ka hoʻāʻo pepehi kanaka. Ua ʻōlelo ʻia, e kuapo ana ka ipo a Ahkuoi i ka taea o kona kaʻa a i ia manawa i holo wikiwiki ai ke kaʻa o Ahkuoi a hoʻokuʻi akula i kāna ipo ma Waiʻanae. Akā, i ka hiki ʻana aku o ka mākaʻi i laila, ua haʻalele ʻē ʻo Ahkuoi. Haʻi akula ka wahine i hoʻokuʻi ʻia, ua piha nā mahina ʻehā o kona hāpai ʻana, a he mau māhoe nō a ʻo Ahkuoi ka makuakāne.

E paipai ana ke Keʻena Ola o Hawaiʻi e nihi ka hele ke huakaʻi aku i ka ʻāina ʻē ma muli o ka māhuahua loa ʻana o nā kānaka i loaʻa i ka piwa haʻihaʻi iwi ma Hawaiʻi nei a ma ka honua nei nō hoʻi a puni. I kēia makahiki nei ma Hawaiʻi, he ʻehiku mau kānaka i loaʻa i ua maʻi lā ma hope o ka huakaʻi ʻana i ka ʻāina ʻē, he ʻeono ma Oʻahu nei, a hoʻokahi ma Maui, a ʻo ʻApelila wale nō kēia. Mai ka mahina ʻo Ianuali a i Kēkēmapa o ka makahiki 2024, he 16 mau kānaka i loaʻa i ka piwa haʻihaʻi iwi. A no laila, manaʻo ʻia ihola, e pākolu a e pāhā paha i kēia makahiki nei. ʻO ka ʻōuli o ia maʻi, he loaʻa koke i ka piwa, ka ʻeha loa o ke poʻo, ka poluea, ka ʻeha o ka mākala a me ka ʻami, ka luaʻi ʻana a me ka ʻōhune. Na ka makika e hoʻolaha i ka piwa haʻihaʻi iwi mai ke kanaka i loaʻa i ia maʻi a i kekahi kanaka. A he ʻelua ʻano makika nāna e hoʻolaha, a aia nō ma ka mokupuni ʻo Hawaiʻi.

Eia mai kā kākou ʻōlelo noʻeau,

He ʻaloʻalo kuāua no kuahiwi.

He ʻōlelo kēia no ke kanaka wiwo ʻole.

Moe kau moe hoʻoilo ka Pīhopa o Roma.

ʻO ia aʻela kekahi poʻo nūhou o kēia lā, ka lā 21 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua lele akula ka hanu o ka Pope Palakiko i kēia lā. Ua piha nā makahiki he 88 iā ia nei. No ʻAlekenetina ʻo ia, a ʻo Jorge Mario Bergoglio kona inoa i kapa ʻia ai i kona hānau ʻana mai. Ua koho ʻia, ʻo ia ka pope i ka lā 13 o Malaki o ka makahiki 2013. Nui kona aloha i ka poʻe ʻilihune a me ka poʻe i hoʻokae ʻia. Hoʻohalahala ʻia ʻo Pope Palakiko e ka poʻe makeʻe kūlana, no ka hoʻopau ʻana i nā hana kuʻuna like ʻole, hoʻohalahala ʻia nō hoʻi ʻo ia e ka poʻe hoʻokāʻoi, no ka lawa ʻole o kāna hana ma ka hoʻoponopono ʻana i ka ʻEkalekia nona nā makahiki he 2,000.

Ua suipa ʻia aku nei nā Kāne Ānuenue, ka hui helu ʻekolu, e Kāna Palapala, ka hui helu 18, ma ka hoʻokūkū pōpō paʻipaʻi o ka pō Pōʻaono nei. E hoʻomaka ka Hoʻokūkū Inoa Moho o ka ʻAhahui Komohana Nui i kēia pule aʻe. A ma ia hoʻokūkū, ʻo Hawaiʻi ka helu ʻelua, no laila, ʻaʻole nō e pāʻani ana ma ka puni mua. ʻO kona hoa paio mua, ʻo ia ka lanakila o ke kūʻē ʻana o Irvine iā Northridge i kēia Pōʻalima aʻe. Ma ke Kikowaena ʻo Stan Sheriff ana e mālama ʻia ai nā hoʻokūkū.

Eia mai kā kākou ʻōlelo noʻeau,

Hāʻawe i ke kua; hiʻi i ke alo.

He ʻōlelo kēia no ka wahine paʻahana.

Hoʻoweliweli ʻia aku kekahi o nā luna aupuni o ʻAmelika.

ʻO ia aʻela kekahi poʻo nūhou o kēia lā, ka lā 16 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua hopu ʻia aku nei kekahi kanaka o Keokia no ka hewa hoʻoweliweli. ʻO Aliakbar Mohammad Amin kona inoa. A ʻo kāna mea i hoʻoweliweli ai e hoʻopōʻino, ʻo Tulsi Gabbard nō, ke Poʻo o ke Keʻena Waihona ʻIke Pūʻalikoa me Kālaiʻāina o ʻAmelika, a me kona ʻohana. Hoʻopiʻi ʻia aku ʻo Amin no ka hoʻoili ʻana i ka ʻōlelo hoʻoweliweli ma ke kelekiko ʻana me ka ʻōlelo ʻana, e make koke ana ʻo Gabbard a me kona ʻohana, a nāna nō, na Amin, ka hana inā he pono. Hōʻike aʻela ka Loio ʻAmelika kūikawā Richard S. Moultrie ʻŌpio, he hewa kalaima ka hoʻoweliweli i nā luna aupuni, a ʻaʻole e hoʻokuʻu wale ʻia ma ke ʻano he ʻōlelo kūkā.

He pila hou ma ka ʻAha Kenekoa no ka pono o ka lehulehu. Ma ka Pila Kenekoa 1202, e ʻae ana i ka hoʻohana ʻana aku o nā moho kālaiʻāina i ka waihona kālā paipai kālaiʻāina no ka mālama ʻana i ke keiki a me ka makua paha. I mea ia e hiki ai i nā kānaka mālama ʻohana ke alualu i ke kūlana luna aupuni. I kēia manawa, he 39 mokuʻāina a me ka ʻĀpana o Kolumebia e ʻae nei i ka uku ʻana no ka mālama keiki mai ka waihona kālā paipai kālaiʻāina.

E pilikia auaneʻi paha ke Kikowaena Hikina-Komohana. ʻO ka nui o ke kālā pekelala o ia kikowaena, he $22 miliona, he 52 pākeneka o kona moʻohelu kālā piha. A he manaʻo ko ka Pelekikena Donald Trump, e ʻoki aku i ke kālā e hoʻokaʻawale ʻia no ke Keʻena Pilina ʻĀina ʻĒ a hapalua like. A aia ke Kikowaena Hikina-Komohana ma lalo o ia keʻena.

Eia mai kā kākou ʻōlelo noʻeau,

Nau ke kuʻi, lohi ka lima.

ʻO ka huhū, he mea ia e lohi ai ka hana.

Ua loli iki ka Pila Hale 1194.

ʻO ia aʻela kekahi poʻo nūhou o kēia lā, ka lā 14 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua lilo iho nei ka Pila Hale 1194 i mea kamaʻilio nui ʻia. A ma kona mana e kū nei, hoʻomalu ʻia nā kānaka e lawelawe ana i nā hana hoʻohānau keiki a ka poʻe kahiko o Hawaiʻi nei ma lalo o ka Paukū XII, Māhele 7 o ke Kumukānāwai o ka Mokuʻāina ʻo Hawaiʻi, a ʻaʻole koi ʻia ka loaʻa o ka laikini pale keiki mai ke Keʻena ʻOihana Kālepa Me Hana Mea Kemu. A i ka Pōʻahā nei, ua hana ʻia aku nei he hoʻololi ʻōlelo pākuʻi e pale ana i nā hewa kalaima no nā kahu hoʻohānau e lawelawe ana i ka hana pale keiki, akā, e kau ana ka hoʻopaʻi kīwila. A me ia nō i ʻāpono ʻia ai ma ka ʻAha Kenekoa. He 20 kenekoa i ʻāpono, a he ʻehā i hōʻole. E hele aku i ke Kapikala i ka hola 11:15 o ke awakea o kēia lā no ke kūpaʻa ʻana ma hope o nā wāhine a me nā pale keiki.

Ma ka Pōʻaono nei, mālama aku nei ke Keʻena Hoʻokō Kānāwai i polokolamu kūʻai pū ma ke Kahua Pāʻani ʻo Aloha. ʻO ka nui o nā pū i kūʻai ʻia mai, he 367, a he mau pū o nā ʻano like ʻole. ʻO ka nui o ke kālā i lilo aku, he $37,900 ma ke kāleka makana Foodland. E mālama hou ʻia ana he mau polokalamu kūʻai pū.

Ua hahana nō ke kūʻē ʻana aku o nā Kāne Ānuenue iā Kekaha Loa ma ka pāʻani pōpō paʻipaʻi ʻana ma ka hopena pule nei. I ka pō Pōʻalima nei, na Kekaha Loa ke kāʻili ʻana i ka lanakila ma loko o nā pāʻani ʻehā. A i ka pō Pōʻaono nei, lilo aku nei ke eo iā Hawaiʻi ma ka lima o ka pāʻani. ʻO Kekaha Loa ka hui helu ʻekahi o ke ao nei, a ʻo Hawaiʻi ka hui helu ʻehā.

Eia mai kā kākou ʻōlelo noʻeau,

ʻAʻohe hana a Kauhikoa, ua kau ke poʻo i ka uluna.

ʻO ia hoʻi, ua kō ka hana, a hiki ke hoʻonanea.

Kau aku nei nā Wāhine Pāʻani Polo Wai o ke Kulanui o Hawaiʻi i ka hano hāweo.

ʻO ia aʻela kekahi poʻo nūhou o kēia lā, ka lā 11 o ʻApelila, he Pōʻalima. Welina e nā makamaka. ʻO Ke Aolama kēia. A penei ka nūhou.

Ua loaʻa kekahi keiki i ka maʻi ʻulāliʻi ma Hawaiʻi nei, a ʻo kahi mea e hopohopo nei nā luna aupuni, he mau kaukani keiki i ʻō ʻole ʻia. A ma kekahi mau kula o Hawaiʻi nei, he liʻiliʻi loa nā haumāna i ʻō ʻia. Ma ke Kula ʻo Mālamalama Waldorf i ka mokupuni ʻo Hawaiʻi, he 62.89 pākeneka o nā haumāna i ʻō ʻole ʻia, ua hoʻokuʻu ʻia ma muli o ka hoʻomana. A he 58.46 pākeneka o ke Kula ʻo Haleakalā Waldorf ma Maui. A ma ke Kula Hoʻomana Pōʻaono o Kohala, he 52.94 pākeneka. Hōʻike aʻela nā luna aupuni, inā e laha wale ka maʻi ʻulāliʻi, ʻaʻole paha e hiki i ka poʻe keiki i ʻō ʻole ʻia ke hele i ke kula.

Lilo aku nei ke eo i nā Wāhine Ānuenue ma ka polo wai i ka Pōʻahā nei ma ka helu ʻai he 12 i ka 7 a Kāna Kieko. ʻEhā ʻai a Jordan Wedderburn o Hawaiʻi. ʻO ka walu ia o ka lanakila ma hope kekahi o kekahi. A ma muli o ia lanakila ʻana o Hawaiʻi, ʻo ia ka inoa moho kikina kūmau o ka ʻAhahui Komohana Nui. Inā lanakila ʻo Ke Kaha Loa ma luna o Irvine, a eo ʻo Hawaiʻi iā Cal State Fullerton, e lilo ʻo Kekaha Loa, ʻo ia ka hoa inoa moho o Hawaiʻi ma ia ʻahahui. E hoʻomaka ana ka hoʻokūkū inoa moho o ka ʻAhahui Komohana Nui i ka lā 25 o ʻApelila.

Ua hai aku nei ka hui pōpō pekupeku o ke Kulanui o Hawaiʻi iā Chad Kapanui, ʻo ia ke kumu aʻo ʻalihi kūlele hou. He ʻalihi kūlele ʻo Kapanui no nā Ānuenue ma mua, a he mahikua nō hoʻi. A ma hope mai, ʻo ia ka luna hoʻolaukaʻi kūlele o ke Kula Kiʻekiʻe ʻo Bishop Gorman ma Las Vegas. A ʻo ke ʻalihi kūlele kūlana ʻekahi o ke Kulanui o Hawaiʻi, ʻo Micah Alejado, he ʻalihi kūlele kau moʻolelo ma ka nou ʻana ma Bishop Gorman i ko Kapanui wā ma laila.

Eia mai kā kākou ʻōlelo noʻeau.

Holu ka pua o ka mauʻu, kapalili ka lau o ka lāʻau, maewa ka lau o ke ʻuki.

He ʻōlelo kēia no ka māmā loa o kekahi i ka holo.