Ke Aolama

Loaʻa kahi kāhuli leo leʻa o ka nahele o Hawaiʻi nei i ka maʻi ʻaʻai.

ʻO ia aʻela kekahi poʻo nūhou o kēia lā, ka lā 5 o Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.

Aloha nō. Loaʻa aku nei ʻo Willie Kahaialiʻi, kahi puʻukani a hoʻokani pila kaulana, i ka maʻi ʻaʻai ma ke akemama. A no laila, e kāpae ʻia ana kekahi mau ʻaha mele ona. Akā, ua hele aku nei ʻo ia i ka hīmeni a hoʻokani ʻana ma ka pāʻina Kahului Pōpō Peku 52 ma ke Kikowaena Hana Noʻeau a Hana Kahiko o Maui. Ua pau iho nei nā puni mua ʻehā o ka lapaʻau kemika a e hoʻomau ʻia ka lapaʻau ʻana ma nā pule he 12 e hiki mai ana. E pule paha a e hoʻouna aku i nā manaʻo maikaʻi iā Kahaialiʻi a me nā kānaka a pau i loaʻa i ia maʻi ʻino.

Aia nō nā ʻAeko o Piladelepia ke kīkaha aʻela ma hope o ko lākou lanakila ʻana ma luna o Nū ʻEnelani i nehinei ma ke Kahului Pōpō Peku LII. He hahana nō ka pāʻani ʻana. Ma hope o ka hapahā ʻelua, e ʻoi ana ʻo Piladelepia ma ka helu ʻai he 22 i ka 12, akā, ma hope o ka wā hoʻomaha hapalua like, hiu aʻela ʻo Nū ʻEnelani a i ka hopena o ka hapahā ʻekolu, he 29 ʻai a nā ʻAeko a he 26 a nā Aloha ʻAmelika. A i ka hapahā ʻehā, ʻakahi nō a ʻoi aʻe nā ʻai a Nū ʻEnelani ma ka helu ʻai he 33 i ke 32. Akā, ma muli o Nick Foles a me ka ʻaoʻao kūlele o Piladelepia, holo akula lākou he 75 ʻīā a loaʻa ka ʻai holo. Ua hoʻāʻo ihola no nā ʻai ʻelua, ʻaʻole naʻe i loaʻa, a ʻo ka helu ʻai i ia manawa, he 38 i ke 33. Ua mākaukau ʻo Tom Brady a me nā Aloha ʻAmelika no ka holo loa a loaʻa ka ʻai holo, ʻaʻole naʻe i like ka manaʻo o Brandon Graham. Paʻi akula ka lima o Graham a pakelo ihola ka pōpō a Brady a loaʻa akula iā Derek Barnett o nā ʻAeko. A ma hope mai, loaʻa ka ʻai peku iā Piladelepia a ʻo ia ihola, ʻaʻole i hiki iā Nū ʻEnelani ke hoʻi hou i ka pahu hopu. ʻO ka helu ʻai hope, he 41 a Piladelepia i ke 33 a Nū ʻEnelani.

Eia mai kā kākou ʻōlelo noʻeau,

E kanu i ka huli ʻoi hāʻule ka ua.

ʻO ia hoʻi, e hoʻokō koke ʻoe i ka hana i ka wā hiki.

Holomua aʻela ka pila no nā hale nunui ma ka ʻAha Kūkā o Honolulu.

ʻO ia aʻela kekahi poʻo nūhou o kēia lā, ka lā mua o Pepeluali, he Pōʻahā. Welina e nā makamaka. ʻO Ke Aolama kēia a penei ka nūhou.

Ua holomua aʻela ka Pila 110 (2017) ma ka heluhelu ʻalua ʻana o ka ʻAha Kūkā o Honolulu i ka Pōʻakolu nei. ʻO ia ka pila e koi ana i ke Keʻena Hoʻolālā me Palapala ʻAe e hoʻōki i ka hoʻopuka ʻana i nā palapala ʻae kūkulu i nā hale nunui no nā makahiki ʻelua a emi iho paha. I kēia mana o ka pila, ʻo ka hale nunui, he 3,500 kapuaʻi kuea o kahi noho ʻia. Ma ke kākau mua o ia pila, ana ʻia ma ka nui o nā lumi moe, ʻaʻole naʻe i holo ka manaʻo i ia manawa ma ka nui o nā lumi moe e kaupalena ʻia ana.

Hopu ʻia aku nei kahi kanaka i manaʻo ʻia nāna i puhi kolohe aku i kahi hale i haʻalele loa ʻia ma Nānākuli. Ma ka wanaʻao o ka Pōʻalua nei, e lalapa ana ke ahi ma ia hale ma ke Alanui ʻo Mikana. Hiki akula nā kinai ahi a pau ihola ke ahi i ke kinai ʻia i ka hola 4:53 o ke kakahiaka nui. Wahi a ka ʻOihana Mākaʻi, ma mua o ia ahi, hoʻāʻo ihola ia kanaka e hoʻā i ke ahi ma kekahi wahi hale ma ka hola 3:00 o ka wanaʻao, akā, i ka hiki ʻana aku o ka mākaʻi i laila, pau ʻē ia kanaka i ka haʻalele. A ʻo ia paha kona wā i puhi ai i ka hale i ke Alanui ʻo Mikana i ke ahi. A hōʻike aʻela nā hoa noho, he ʻewalu ona manawa a ʻoi aku paha i hoʻā ai i ke ahi ma ia ʻāina.

Eia mai kā kākou ʻōlelo noʻeau,

He hele pīlali ʻāina maoli nō.

He ʻōlelo kēia no kahi kanaka i hele aku a lilo ka noʻonoʻo i kahi ʻē, poina ihola ka hoʻi ʻana aku i kauhale.

 

Haʻalele iho nei ʻo Shan Tsutsui i kona kūlana hope kiaʻāina.

ʻO ia aʻela kekahi poʻo nūhou o kēia lā, ka lā 31 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

I ka Pōʻakahi nei, hōʻike aʻela ka Hope Kiaʻāina Shan Tsutsui, e waiho ʻo ia i kona kūlana hope kiaʻāina i kēia lā. ʻO ka mea ʻāpiki, ʻaʻohe wahi luna e makemake nei e hoʻopiha aku i ia mākālua. Ma ke kānāwai, e lilo mua i ka pelekikena o ka ʻAha Kenekoa o ka mokuʻāina, a inā ʻaʻohe ona makemake, e lilo aku i ka luna hoʻomalu o ka Hale o nā Lunamakaʻāinana o ka mokuʻāina, a ma hope, e lilo aku i ka loio kuhina o ka mokuʻāina. ʻO Ron Kouchi ka Pelekikena ʻAha Kenekoa, a ʻaʻohe ona makemake iki i ke kūlana hope kiaʻāina. ʻO Scott Saiki ka Luna Hoʻomalu Hale Lunamakaʻāinana, a like ʻo ia me Kouchi, ʻaʻohe ulu iki o ka hoi. ʻO Doug Chin mai, ʻo ka loio kuhina, a e hōʻike aʻe i kona manaʻo i ka Pōʻalima.

Eia mai kā kākou ʻōlelo noʻeau,

Ua hiki maila nā hoa aloha ʻo Keʻolohaka lāua ʻo Hanalē.

ʻO ia hoʻi, ua pōloli ihola.

E pouli ana ka mahina i kēia pō.

ʻO ia aʻela kekahi poʻo nūhou o kēia lā, ka lā 30 o Ianuali, he Pōʻalua. Welina e nā makamaka. ʻO Ke Aolama kēia a penei ka nūhou.

Ua ʻoki leo ʻia ke kiʻi ʻoniʻoni ʻo Moana ma nā ʻōlelo he 45. A ʻo ka ʻōlelo Hawaiʻi ana ke 46. A ʻo ka makamua ia o ke kiʻi ʻoniʻoni e ʻoki leo ʻia ma ka ʻōlelo Hawaiʻi. Hoʻomaka iho nei ke ʻoki leo ʻana i kekahi mau pule aku nei i hala. He 140 mau kānaka a ʻoi i nīnauele no ka lilo ʻana i mea hana keaka leo no ia kiʻi ʻoniʻoni. A koho ʻia he 23. No ʻAuliʻi Carvalho ana ka leo o Moana. A ʻo ka leo o Māui, no kahi haumāna o ke Kula Kaiāpuni ma mua, a me ke Kula Kiʻekiʻe ʻo Kamehamhea, no Kaipu Baker nō. ʻO ka pahuhopu, e pau ke kiʻi ʻoniʻoni i ke ʻoki leo ʻia ke hiki aku i ke kau wela. A he manaʻo ko ke Kulanui o Hawaiʻi, e hāʻawi ʻia aku ke kiʻi ʻoniʻoni ma ke pā DVD a me ke pā Blue-Ray paha ma ka ʻOihana Hoʻonaʻauao i mea aʻo.

E pouli ana ka mahina i kēia pō. A he kupamahina ana nō hoʻi ia, ʻoiai, aia ana ka mahina ma kahi kokoke loa i ka honua nei. A ʻo ka mahina piha ʻelua ia o ka mahina, ʻo ia hoʻi, he mahina polū. E hoʻomaka ana ka pouli ʻana i ka hola 1:48 o ke aumoe. A e piha ka pouli ʻana i ka hola 2:51 o ka wanaʻao, a ʻo ka lōʻihi o ka pouli piha ʻana, he hoʻokahi hola me nā minuke he 16. A e hemo loa ana ka mahina i waho i ka hola 5:11 o ke kakahiaka nui. Manaʻo ʻia, ʻo Maui a me Hawaiʻi kahi maikaʻi loa e ʻike aku ai i ia pouli ʻana.

Eia mai kā kākou ʻōlelo noʻeau,

ʻEha ʻo Keoni Pulu iā Hanalē.

ʻO ia hoʻi, ua pōloli.

 

 

 

 

 

 

E ʻae ʻia ana ka ʻōlelo Hawaiʻi ma ka ʻaha hoʻokolokolo.

ʻO ia aʻela kekahi poʻo nūhou o kēia lā, ka lā 29 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

E ʻae ana ka ʻOihana Kānāwai i ka hoʻohana ʻia ʻana o ka māhele ʻōlelo ke makemake ke kanaka e hōʻike aku i kona manaʻo ma ka ʻōlelo Hawaiʻi i mua o ka ʻaha hoʻokolokolo. He maikaʻi loa ia he hiki ke ʻōlelo Hawaiʻi i loko o ka ʻaha, akā, e kala mai i ko ʻoukou mea kākau, ʻaʻole maopopo ka makemake o ka mea i ʻonipaʻa ma ka ʻōlelo Hawaiʻi i loko o ka ʻaha hoʻokolokolo, ʻo Kaleikoa Kaeo, ʻo ia hoʻi, he hiki ke hōʻike aku i ka manaʻo ma ka ʻōlelo Hawaiʻi me ka māhele ʻōlelo a me ke loaʻa ʻole paha o ka māhele ʻōlelo. ʻO kahi nīnau naʻe i kēia manawa, āhea e kū ai kahi lunakānāwai ʻōlelo Hawaiʻi ma ka ʻaha hoʻokolokolo o Hawaiʻi nei i mea e pono ʻole ai ka māhele ʻōlelo?

E kūkulu ʻia ana paha he wahi pela makani hana uila e lana ana ma ke kai he mau mile ma kai aku o Oʻahu. He ʻehā mau hui e noi nei i ke kuleana. A ke manaʻo ʻia nei, e kūkulu ʻia he 50 pela makani a ʻoi ma kahi hoʻokahi. He manaʻo ko kekahi hui, e kūkulu ʻia he ʻelua wahi pela makani hana uila. A ʻo nā wahi paha e kūkulu ai ia hui, he 17 mile ma ka ʻaoʻao hema o Lēʻahi, a he 12 mile ma ka ʻaoʻao komohana ʻākau o Ka Lae o Kaʻena. A ʻo kekahi hui, e manaʻo ana e kūkulu ʻia he 15 paha mile ma kai aku o ka ʻaoʻao hema o Oʻahu nei.

Lilo aku nei nā Makana Grammy he ʻeono iā Bruno Mars. Penei nā māhele ʻeono, ʻo ke mele R&B ʻoi, ka hōʻike R&B ʻoi, ke pā leo R&B ʻoi, ka haku mele ʻoi o ka makahiki, ke mele ʻoi o ka makahiki a me ke pā leo ʻoi o ka makahiki. A lilo aku nei he ʻelima Makana Grammy iā Kendrick Lamar.

Eia mai kā kākou ʻōlelo noʻeau,

Nahā ka houpo.

He ʻōlelo kēia no ka pōloli.

Ua hoʻopau ʻia ka palapala hopu i kekahi Hawaiʻi Alakaʻi.

ʻO ia aʻela kekahi poʻo nūhou o kēia lā, ka lā 26 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

Ua kāpae aku nei ka Lunakānāwai Blaine Kobayashi i ka palapala hopu iā Kaleikoa Kaeo i ka Pōʻahā nei. I hoʻopuka ʻia aku ia palapala hopu ma muli o ke kūpaʻa ʻana o Kaeo e ʻōlelo Hawaiʻi wale nō ma loko o ka ʻaha. ʻAʻole naʻe i hōʻike mai ʻo Kobayashi i kona kumu i hoʻopau ai i ka palapala hopu. Wahi a Kaeo, he hihia kēia e pili ana i nā ʻike a me nā hana Hawaiʻi, e pili ana hoʻi i ka ʻike maka ʻole ʻia o ka Hawaiʻi ma kona ʻāina ponoʻī a me nā ʻāina nō hoʻi a puni ka honua. ʻAʻole wale nō kēia he hihia no ka ʻōlelo. No ka pono ia o ka Hawaiʻi. E hoʻi hou ana ʻo Kaeo i mua o ka lunakānāwai no ka hoʻoholo ʻana no ka mea unuhi i ka lā 21 o Pepeluali. A i ia wā nō hoʻi e hoʻopaʻa ai i kona wā e hoʻokolokolo ʻia ai no kāna hana Aloha ʻĀina ma Haleakalā. I kēia lā, e ʻākoakoa ana nā kānaka Aloha ʻĀina a Aloha Lāhui hoʻi i mua o ka Hale ʻAha Hoʻokolokolo Kahiko o Wailuku no ka hālāwai hōʻeuʻeu. Mai ka hola 3:00 o ka ʻauinalā a i ka hola 5:00.

I kēia pule, e paipai ana nā luna aupuni o Hawaiʻi nei i ka UFC, e mālama ʻia kahi hoʻokūkū hākōkō inoa moho ma ke Kahua Pāʻani ʻo Aloha i ke kau wela. ʻO ka hālāwai mua ia o lākou he alo a he alo. A wahi a ia mau luna aupuni, ua holo mua nō ke kūkākūkā ʻana. Ma mua, ʻaole i makemake ʻo Dana White, ke poʻo o ka UFC, e mālama ʻia ma laila, no ka mea, e hopohopo ana ʻo ia, o ua auaneʻi. A ʻaʻole ʻo ia i makemake e mālama ʻia ma loko o kahi hale, ʻoiai, he liʻiliʻi loa nā hale ma Hawaiʻi nei. Akā, ua loli ihola kona manaʻo, ʻoiai, he inoa moho UFC nō ko Hawaiʻi nei, ʻo ia ʻo Max Holloway.

Eia mai kā kākou ʻōlelo noʻeau,

Ua holo ʻo Hanalē, komo mai ʻo Keoni Pulu.

ʻO ia hoʻi, ua māʻona ka ʻōpū.

He hoʻāʻo pepehi ʻōlelo Hawaiʻi ma ka ʻaha hoʻokolokolo o Maui.

ʻO ia aʻela kekahi poʻo nūhou o kēia lā, ka lā 25 o Ianuali, he Pōʻahā. Welina e nā makamaka. ʻO Ke Aolama kēia a penei ka nūhou.

ʻAʻole i ʻae ʻia kahi Hawaiʻi Alakaʻi e kūpale aku no kona pono iho ma ka ʻōlelo Hawaiʻi i mua o ka ʻAha Hoʻokolokolo ʻĀpana o Maui i ka Pōʻakolu nei. ʻO Kaleikoa Kaeo nō ua Hawaiʻi Alakaʻi nei, a i ka nīnau ʻana mai o ka Lunakānāwai Blaine J. Kobayashi no ko Kaeo hiki ʻiʻo ʻana i mua o ka ʻaha, pane akula ʻo ia ma ka ʻōlelo Hawaiʻi. He mau manawa ko Kobayashi i nīnau ai me ke kali ʻana iho ʻo ka pane aku a Kaeo ma ka namu. Ua hoʻokō ʻia naʻe e Kaeo kahi ʻōlelo mākia a ka Mōʻīwahine Liliʻuokalani, “ʻOnipaʻa.” Ma ka ʻōlelo Hawaiʻi nō ʻo Kaeo. ʻAʻole i makemake ʻo Kobayashi i ia hana a no laila, hoʻopuka aʻela ʻo ia i palapala hopu i ua Hawaiʻi Alakaʻi nei. I ka manawa mua a Kaeo i kū ai i mua o ka ʻaha no kahi hihia, ua hai ʻia kahi mea unuhi no Kaeo e ke aupuni. Akā, i Kēkēmapa, ʻāpono ihola ʻo Kobayashi i ke noi a ke Keʻena Loio Hoʻokolokolo o Maui e koi ana, ma ka ʻōlelo haole ka hihia. Kainō he au hoʻōla kēia i ka ʻōlelo Hawaiʻi aloha o kākou, eia kā kekahi mau kānaka e kuʻupau ihola e pepehi i nei ʻōlelo aloha i ʻaneʻane e nalo loa. Wahi a Kaleikoa Kaeo, he mea nui iā ia ke kūpaʻa ʻana no ka pono, no ka mea, he ʻōlelo kūhelu ka ʻōlelo Hawaiʻi no ka mokuʻāina, a ʻo ka ʻōlelo Hawaiʻi ka ʻōlelo kumu o nei pae ʻāina a he pono ke ʻae ʻia ka ʻōlelo Hawaiʻi ma loko o ka ʻaha hoʻokolokolo. ʻAuhea ʻoukou, e kāhea aku i nā lunamakaʻāinana, nā kenekoa, ke Kiaʻāina, nā lunakānāwai a e leka aku paha iā lākou me ka hōʻike ʻana i ke kūpono ʻole o ia hana a ia mau ʻelele o ke aupuni mokuʻāina.

Ma ka pōpō hīnaʻi, kāʻili aku nei nā kaikamāhine o ke Kula Kiʻekiʻe ʻo Kalani i ka inoa moho Māhele I o ka ʻAhahui Kula Aupuni o Oʻahu i ka pō Pōʻakolu nei. ʻO Moanalua ka hoa paio a ʻo ka helu ʻai i ka hopena o ka hoʻokūkū, he 55 a Kalani i ke 33 a Moanalua. ʻO Kalani ka inoa moho Māhele II o ka ʻAhahui Kula Aupuni o Oʻahu i kēlā makahiki aku nei. A ʻakahi a lilo iho iā Kalani ka inoa moho Māhele I. ʻO ka makamua kēia ma ka moʻolelo o ka ʻAhahui Kula Aupuni o Oʻahu, ʻo ia hoʻi, ka lilo o ka inoa moho Māhele II i kekahi kula i kekahi makahiki, a i ka makahiki ma hope pono mai, lilo akula ka inoa moho Māhele I i ia kula hoʻokahi nō.

Eia mai kā kākou ʻōlelo noʻeau,

Ua paʻa ka houpo.

ʻO ia hoʻi, ua mā’ona.

E pau paha ke kūkulu ʻia ʻana o ka hale nui a ka launa ʻole.

ʻO ia aʻela kekahi poʻo nūhou o kēia lā, ka lā 24 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻĀpono aku nei ke Kōmike Hoʻolālā o ka ʻAha Kūkā o Honolulu i ka Pila 110. He pila ia e pāpā ana i ka hoʻopuka ʻia ʻana o ka palapala ʻae kūkulu hale nunui no kahi wā pōkole a paʻa pono kahi pila kūpono. ʻO ka hale nunui, he hale no ka ʻohana hoʻokahi a ʻelua paha, nona nā kapuaʻi kuea he 3,500 a ʻoi aku paha. Inā ʻāpono ʻia ua pila nei e ka ʻAha Kūkā, e hiki ana ke kūkulu ʻia ka hale nunui, he mau koina ʻoʻoleʻa naʻe kā ke kanaka e hoʻokō ai. E koho pāloka ana ka ʻAha Kūkā piha i ka ʻāpono a me ka ʻole paha i ia pila. A laila, e hoʻi hou i ke Kōmike Hoʻolālā a i ka lā 5 o Pepeluali e koho hou ai ia kōmike, a ma ka lā 13 o Pepeluali, e koho pāloka ka ʻAha Kūkā piha, ʻo ia ke koho hope loa.

Kāʻili aku nei nā kaikamāhine o ke Kula Kiʻekiʻe ʻo Maryknoll i ka inoa moho pōpō hīnaʻi o ka ʻAhahui Kula Uku o Honolulu i ka pō Pōʻalua nei ma ka lanakila ʻana aku nei ma luna o ʻIolani ma ka helu ʻai he 51 i ke 31. A ʻo ka hā kēia o ka inoa moho i lilo aku nei iā Maryknoll, ma hope kekahi o kekahi. A ma ka moʻolelo o ua kula nei, he 10 inoa moho ʻAhahui Kula Uku o Honolulu i paʻa ihola i ua kula nei. ʻOiai, ʻo Maryknoll ka inoa moho, ʻaʻole ʻo ia e pāʻani ana ma ka puni mua o ka Hoʻokūkū Inoa Moho Mokuʻāina.

Eia mai kā kākou ʻōlelo noʻeau,

Kūpalaka ke kai o Hāna.

0
0
1
224
1279
Kawaihuelani
10
2
1501
14.0

Normal
0

false
false
false

EN-US
JA
X-NONE

/* Style Definitions */
table.MsoNormalTable
{mso-style-name:”Table Normal”;
mso-tstyle-rowband-size:0;
mso-tstyle-colband-size:0;
mso-style-noshow:yes;
mso-style-priority:99;
mso-style-parent:””;
mso-padding-alt:0in 5.4pt 0in 5.4pt;
mso-para-margin:0in;
mso-para-margin-bottom:.0001pt;
mso-pagination:widow-orphan;
font-size:12.0pt;
font-family:Times;}

ʻO ia hoʻi, ua māʻona ka ʻōpū.

Pau iho nei ka wā uku ʻole ʻia o nā limahana pekelala.

ʻO ia aʻela kekahi poʻo nūhou o kēia lā, ka lā 23 o Ianuali, he Pōʻalua. Welina e nā makamaka. ʻO Ke Aolama kēia a penei ka nūhou.

Hoʻi hou ana nā limahana pekelala i ka hana me ka uku ʻia. ʻĀpono aku nei ka ʻAha ʻŌlelo Lāhui i kahi pila kūikawā a pūlima ʻia nō hoʻi e ka Pelekikena Donald Trump i ka pō Pōʻakahi nei. ʻO ka mea ʻāpiki, he ʻekolu wale nō pule, ʻo ka lā 8 o Pepeluali ka lā hope loa. Inā ʻaʻole e holo pono ka manaʻo o ka ʻAha ʻŌlelo Lāhui ke hiki aku i ia lā, e hoʻomaka hou kahi wā uku ʻole ʻia o nā limahana pekelala.

Holo ihola ka manaʻo o Dru Brown, ka ʻalihikūlele o ka hui pōpō peku o ke Kulanui o Hawaiʻi, e haʻalele iho iā Hawaiʻi nei a e pāʻani pōpō peku no kekahi kulanui i kona makahiki hope loa. Wahi a Brown, e paʻa ana kona kekelē lae pua ma Iune. A i ka wā hoʻomaha hoʻoilo nei, ua hala ihola kona kupunakāne i ke ala hoʻi ʻole mai, a he makemake ko Brown e pāʻani pōpō peku ma kahi e kokoke ana i ka hale o kona ʻohana ma Kaleponi ʻĀkau. He mau ʻalihikūlele ko Hawaiʻi e hoʻi mai ana, ʻo ia ʻo Cole McDonald lāua ʻo Larry Tuileta. He ʻalihikūlele nō hoʻi ʻo Kyle Gallup, e hoʻomaʻamaʻa ana ʻo ia ma ke ʻano he ʻāʻapo i ka makahiki nei i hala. A he ʻelua mau ʻalihikūlele hou. ʻO Jeremy Moussa o Kaleponi a me Chevan Cordeiro o ke Kula Kiʻekiʻe ʻo Kāna Lui.

Eia mai kā kākou ʻōlelo noʻeau,

E hākōkō ana ʻo Heneli me Keoni Pulu; ua lilo ke eo iā Keoni Pulu.

ʻO ia hoʻi, ua māʻona ka ʻōpū.

Aloha nō nā limahana o ke aupuni pekelala.

ʻO ia aʻela kekahi poʻo nūhou o kēia lā, ka lā 22 o Ianuali, he Pōʻakahi. Aloha mai e nā makamaka. ʻO Ke Aolama kēia a penei ka nūhou.

Aloha nō. E hoʻomaka ana kahi wā uku ʻole o nā limahana o ke aupuni pekelala. He mau kaukani limahana pekelala ko Hawaiʻi nei. Pau iho nei ka lawelawe ʻia ʻana o ka hana aupuni pekelala i ka pō Pōʻalima nei. ʻO nā limahana ʻano nui loa, ʻo ia wale nō nā mea e hoʻomau ana i ka lawelawe ʻana i ka hana, ʻaʻole naʻe lākou e uku koke ʻia, aia wale nō a holo pono ka manaʻo o ka ʻAha ʻŌlelo ma ka ʻaelike no ka moʻohelu kālā.

Paʻa ihola nā hui ʻelua o ke Kahului Pōpō Peku Kanalima Kūmālua. Luku aku nei ʻo Pilakelepia iā Minekoka ma ka helu ʻai he 38 i ka 7. A ma ka ʻAhahui Pōpō Peku ʻAmelika, mai lilo ʻo Iakasonawila, ʻo ia ka hoa hoʻokūkū o Pilakelepia no ka inoa moho. E ʻoi ana Nā Iākua ma kahi hapa mua o ka hapahā hope loa ma ka helu ʻai he 20 i ka 10, ua hiu aʻela naʻe ʻo Nū ʻEnelani a kāʻili akula i ka lanakila ma ka helu ʻai he 24 i ka 20. A e kūʻē ana ʻo Pilakelepia iā Nū ʻEnelani no ka inoa moho pōpō peku i ka lā 4 o Pepeluali.

Eia mai kā kākou ʻōlelo noʻeau,

Pae maila ka waʻa i ka ʻāina.

ʻO ia hoʻi, ua māʻona ka ʻōpū.