Ke Aolama

Loaʻa aku nei paha kekahi i ka ʻeaʻōlena A.

ʻO ia aʻela kekahi poʻo nūhou o kēia lā, ka lā 19 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

Loaʻa aku nei paha kekahi limahana o kekahi hale ʻaina o Māpunapuna i ka ʻeaʻōlena A. Aia nō ke Keʻena Ola ke noiʻi akula. ʻO ka inoa o ka hale ʻaina, ʻo ia ʻo Wah Kung. ʻO ka wā lele o ia maʻi, mai ka lā mua o Kēkēmapa a i ka lā 6 o Ianuali, a e hana ana ia limahana ma laila i ia wā. Inā ua ʻai a inu paha ʻoe i ka Hale ʻAina ʻo Wah Kung ma ia wā, e kipa aku i ke kauka.

He manaʻo ko John Carroll i ke Kiaʻāina David Ige, e waiho ʻo ia i kona kūlana kiaʻāina ma muli o ke kūkala hewa ʻia o ke kī ʻia mai o ke kao lele pahū ma ka Pōʻaono i hala iho nei. ʻO Carroll, he moho lepupalika ʻo ia e alualu ana i ke kūlana kiaʻāina. Hōʻike aʻela kekahi o nā luna o ko Ige paipai kālaiʻāina ma kona alualu hou ʻana i ke kūlana kiaʻāina, ʻaʻole e waiho ana ʻo Ige i kona kūlana.

He kumu aʻo pōpō peku pae oʻo hou ko ke Kula Kiʻekiʻe o Kahuku. He ʻumi a ʻoi paha nā moho i noi aku nei i ia kūlana hana. A koho ʻia ihola he ʻehiku mau moho a ʻoi paha no ka nīnauele. ʻO Sterling Carvalho lāua ʻo Makoa Freitas nā moho hope ʻelua e kū ana ma hope o ka lua o ka nīnauele. A holo ihola ka manaʻo, ʻo Carvalho ke kumu aʻo hou. A ʻo ia ka lima o ke kumu aʻo pōpō peku pae oʻo mai ka makahiki 2013. ʻO Freitas ke kumu aʻo kūikawā i ke kikina 2017. ʻO kekahi mea maikaʻi, ʻo Carvalho ke kumu aʻo pae ʻōpio o Kahuku ma nā makahiki ʻekolu i kaʻa hope aku nei. Ua noi nō hoʻi kekahi mau kumu aʻo pōpō peku o Kahuku ma mua i ia kūlana hana, ʻo ia ʻo Siuaki Livai, ʻo Reggie Torres a me Vavae Tata. ʻO Carvalho naʻe ke kū ihola i ka moku.

Eia mai kā kākou ʻōlelo noʻeau,

ʻEha ʻo Hanalē iā Keoni Pulu.

ʻO ia hoʻi, ua māʻona ka ʻōpū.

Ke ʻimi ʻia nei nā kānaka kōkua ma ka helu kanaka kuewa ʻana.

ʻO ia aʻela kekahi poʻo nūhou o kēia lā, ka lā 18 o Ianuali, he Pōʻahā. Welina e nā makamaka. ʻO Ke Aolama kēia a penei ka nūhou.

ʻAʻole lawa nā kānaka kōkua no ka helu kanaka ʻana i nā kānaka kuewa o Oʻahu nei. ʻO ka nui o nā kānaka kōkua i makemake ʻia, he 500, akā, he 300 wale nō a ʻoi iki i kēia manawa. Ma mua, ʻo Hawaiʻi ka mokuʻāina nona ka nui loa o nā kānaka haleʻole. Ke paʻa iho ka helu o nā kānaka kuewa, he mea ia e lilo mai ai ka puʻu kālā pekelala no nā polokalamu e pono ai ia mau kānaka e lewa hele ana, ʻaʻohe kahua paʻa. Inā he makemake paha e kōkua ma ka helu ʻana, e kipa aku i ke kahua pūnaewele, partnersincareoahu.org.

Aloha nō. E haʻalele ana kahi mea hou i ka hui pōpō peku o ke Kulanui o Hawaiʻi. I kēia manawa, he mea pāʻani ia, a ʻo ka ʻoi ia o nā ʻāʻapo o nā Ānuenue. ʻO Dylan Collie kona inoa, a e puka ana ʻo ia mai ke Kulanui o Hawaiʻi ma Mānoa i ka mahina ʻo Mei, a e lele aku ana i kekahi kulanui no ka polokalamu lae oʻo. A ma ia kulanui hou ʻo ia e pāʻani pōpō peku ai. ʻOiai, he haumāna lae oʻo ana ʻo ia, inā koho ʻo ia i kekahi o nā kulanui o ka Māhele Ipu Pōpōpeku, e hoʻomaka koke kona pāʻani ʻana i ke kikina e hiki mai ana, ʻaʻole pono ke pālule ʻulaʻula. ʻAʻole i hōʻike aʻe ʻo Collie i kona kulanui e hele aku ai, akā, he mea pāʻani pālule ʻulaʻula ʻo ia no ke Kulanui ʻo Berigama Iana i ka makahiki 2012.

Eia mai kā kākou ʻōlelo noʻeau,

Ua mālō ke ʻeke.

ʻO ia hoʻi, ua māʻona ka ʻōpū.

 

Aia ana nā hana like ʻole ma ʻIolani Hale no ka hoʻomanaʻo ʻana i ka hoʻokahuli aupuni.

ʻO ia aʻela kekahi poʻo nūhou o kēia lā, ka lā 17 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.

E naue aku i ka Hale Aliʻi ʻo ʻIolani i kēia lā no “ʻOnipaʻa Kākou,” kahi hanana e kulāia ana i ka piha ʻana o nā makahiki he 125 i ka hoʻokahuli aupuni. Nui ana nā hana like ʻole, e hoʻokani pila ana kekahi, e hula ana kekahi, a e haʻi ʻōlelo ana kekahi. I ke kau ʻana o ka lā i ka lolo, aia ana kekahi mau hana ma ke Kapikala, ʻoiai, ʻo ka lā hemo ia o ke Kau ʻAha ʻŌlelo.

ʻAkahi nō a paʻa nā kūlana hope kumu aʻo a pau o ka hui pōpō peku o ke Kulanui o Hawaiʻi. I nehinei, kūkala ʻia aku nei ka hai ʻana i nā mea hope ʻelua. Ua haʻalele mai nei ʻo Legi Suiaunoa a me Kefense Hynson no ka lilo ʻana i kumu aʻo no ʻOlekona Mokuʻāina. A no laila, ʻimi akula ʻo Nick Rolovich a loaʻa maila nā mea nāna e hoʻopiha i ka mākālua. ʻO Andre Allen ke kumu aʻo ʻāʻapo hou. A ʻo Ricky Loko ke kumu aʻo laina kūpale hou.

Eia mai kā kākou ʻōlelo noʻeau,

ʻOnipaʻa.

ʻO ka ʻōlelo mākia ia a ko kākou Mōʻīwahine Liliʻuokalani.

Kau ka weli o ko Hawaiʻi.

ʻO ia aʻela kekahi poʻo nūhou o kēia lā, ka lā 16 o Ianuali, he Pōʻalua. Welina e nā makamaka. ʻO Ke Aolama kēia a penei ka nūhou.

Ua kau iho nei ka weli o ko Hawaiʻi i ka Pōʻaono nei, i ka hoʻomaopopo ʻia ʻana mai no kahi kao lele i kī ʻia mai i kēia pae ʻāina nei. ʻAʻole naʻe ia he ʻoiaʻiʻo. Ua kaomi hewa ʻia ke pihi e kekahi limahana o ke Keʻena Lawelawe Ulia Pōpilikia Hawaiʻi. Ma hope mai naʻe o nā minuke he 38 i kūkala ʻia ai, ʻaʻohe kao lele i kī ʻia mai. I ka Pōʻakahi nei, hoʻonoho aku nei ke Kiaʻāina David Ige iā Kenelala Kenneth Hara i hope kenelala nāna e kauʻeliʻeli i ka hana o ke Keʻena Lawelawe Ulia Pōpilikia Hawaiʻi o ka Pōʻaono nei a hana i hōʻike i loko o nā lā he 30 e hiki mai ana. A laila, e hoʻokumu ʻo Hara i hōʻike no ka hoʻomaikaʻi ʻana i ka mākaukau o ka mokuʻāina no ka ulia pōpilikia.

Pau iho nei ka ʻimi ʻana o Nick Rolovich i kumu aʻo laina kūlele. I ka pule ʻehiku o ke kikina 2017, haʻalele ihola ʻo Chris Naeole, ke kumu aʻo laina kūlele ma mua. A i ia manawa, na Brian Smith, ka luna hoʻolaukaʻi kūlele, a me John Estes, he lima kōkua, ke aʻo ʻana i ka laina kūlele i ke koena o ke kikina. ʻO Mark Weber ana ke kumu aʻo hou. I ka makahiki 2016, ʻo ke kumu aʻo laina kūlele ia o Fresno State. Ma mua aku o kēlā, ʻo ka hope kumu aʻo ia o Utah State. A mai ka makahiki 2007 a i ka makahiki 2012, aʻo akula ʻo ia i nā mea pāʻani laina kūlele ma Berigama Iana.

Eia mai kā kākou ʻōlelo noʻeau,

ʻAi a puʻu ka nuku.

ʻO ia hoʻi ka ʻai ʻana a māʻona.

 

 

 

 

Hanini akula he 500 kālani ʻaila ma Waiawa.

ʻO ia aʻela kekahi poʻo nūhou o kēia lā, ka lā 11 o Ianuali, he Pōʻahā. Welina e nā makamaka. ʻO Ke Aolama kēia a penei ka nūhou.

Lana ka manaʻo o Micah Kane, he kahu waiwai no nā Kula ʻo Kamehameha, e paʻa kahi ʻaelike me kekahi mau kānaka e hoʻopiʻi aku nei i ia kula. Ua lolokukui ʻia ua mau kānaka nei e ke kauka hoʻoponopono noʻonoʻo i ko lākou wā e haumāna ana ma Kamehameha. I ka Pōʻakolu nei, hoʻomaka hou iho nei ka ʻuao ʻana ma waena o nā ʻaoʻao ʻelua. A i kēia puni ʻelua, wahi a Kane, he haʻawina kālā nui kai hāpai ʻia e Kamehameha i mua o ia mau kānaka hoʻopiʻi i mea e pau ai ka hihia. Akā, hōʻike aʻela ka loio o nā mea hoʻopiʻi, ʻaʻole lākou ʻaelike me ka manaʻo o Kane no ia haʻawina kālā. Inā ʻaʻole e paʻa kahi ʻaelike, e hoʻomaka ka hoʻokolokolo ʻana i ka mahina ʻo Iune.

Ua hanini ihola he 500 kālani ʻaila ma nā pā hale o ke Alanui ʻo Waiawa i ka ʻauinalā o ka Pōʻakolu nei. Kāhea akula kekahi kanaka i ka Hui Uila Hawaiʻi i kona ʻike ʻana i ka ʻaila ma kona pā hale. Na ka Hui Uila Hawaiʻi ka paipu ʻaila a pani ʻia akula a paʻa a hoʻomaʻemaʻe ʻia aʻela. ʻAʻole i maopopo kahi o ka paipu i kulu ai ka ʻaila. I kēia lā, e ʻeli ana a ʻike ʻia.

Eia mai kā kākou ʻōlelo noʻeau,

Waiho kāhelahela ʻo Kalaupapa.

He ʻōlelo kēia no kahi mea i ahuwale.

He mau puʻu kālā ke lilo aku i kekahi mau keʻena hana keaka o nā kula kiʻekiʻe o ʻAmelika Hui Pū ʻia.

ʻO ia aʻela kekahi poʻo nūhou o kēia lā, ka lā 10 o Ianuali, he Pōʻakolu. Welina e nā makamaka heluehlu. ʻo Ke Aolama kēia a penei ka nūhou.

Aloha nō. He ulia kaʻa ma Hauʻula i ke kakahiaka nui o ka Pōʻalua nei. E holo aku ana kahi kalaka ʻāhinahina no ka hikina ma ke Alanui ʻĀina Hoʻopulapula Hauʻula a paheʻe akula he mau haneli kapuaʻi a hoʻokuʻi akula i kekahi kumu lāʻau ma kahi uakeʻe o ke alanui a kahuli aʻela ke kalaka. ʻEkolu kanaka o luna o ia kalaka. A lawe koke ʻia akula i ka haukapila. ʻO ka ʻōhua o ka noho o mua, lawe ʻia akula i ka Haukapila o Kahuku ma ke kūlana kūpilikiʻi, kahi ona i make ai. A ʻo ka mea kalaiwa a me kekahi ʻōhua, lawe ʻia akula i ka Haukapila ʻo ka Mōʻīwahine. Ma ke kūlana kūpilikiʻi nō hoʻi lāua, akā, ua maikaʻi iki aʻela a ma ke kūlana kūkonukonu i kēia manawa. Wahi a ka ʻoihana mākaʻi, ʻo ka holo nui a me ka wai ʻona kekahi mau kumu o ka ulia kaʻa. ʻO kekahi pilikia, ʻaʻole i hoʻopaʻa aku ia mau kānaka ʻekolu i ka ʻili kuapo.

E pōmaikaʻi auaneʻi kekahi mau kula kiʻekiʻe he 50 a puni ʻo ʻAmelika Hui Pū ʻIa. Hōʻike aʻela ka hui hoʻolele kiʻi ʻo NBC, ua hoʻokaʻawale ʻia he $500,000 i mau puʻu kālā no nā keʻena hana keaka o nā kula kiʻekiʻe o ʻAmelika. Aia ana he polokalamu kīwī hou ma NBC i kapa ʻia ʻo Rise, a he moʻolelo ia e pili ana i kekahi kumu nāna i hōʻeuʻeu i ke keʻena hana keaka o kona kula kiʻekiʻe. A he polokalamu kīwī ia e pili ana i kekahi moʻolelo ʻoiaʻiʻo. A ʻo ia paha ke kumu i manaʻo ai ʻo NBC e kākoʻo aku i nā keʻena hana keaka o ʻAmelika. ʻO ʻAuliʻi Cravalho kekahi o nā mea hana keaka ma ka polokalamu ʻo Rise. E waiho aku nā kula kiʻekiʻe i nā palapala noi ma NBC.com/Rise a hiki i ka lā 6 o Pepeluali.

Eia mai kā kākou ʻōlelo noʻeau,

Pohu ka nohona, ua lulu kohekohe.

ʻO ia hoʻi, ua mālie nā mea a pau.

Aia nō ʻo Alabama ke kū kilakila aʻela.

ʻO ia aʻela kekahi poʻo nūhou o kēia lā, ka lā 9 o Ianuali, he Pōʻalua. Welina e nā makamaka. ʻO Ke Aolama kēia a penei ka nūhou.

ʻO Alabama nō ka ʻoi o nā kulanui pāʻani pōpō pekupeku o ʻAmelika. Lilo aku nei ka inoa moho pōpō peku o nā kulanui i ke Kai ʻUla i ka pō Pōʻakahi nei ma ka lanakila ʻana aku nei ma luna o Keokia ma ka helu ʻai he 26 i ka 23. Akā, ma hope o ka hapahā ʻelua, kohu mea lā, na nā ʻĪlio Pulu o Keokia e kāʻili i ka lanakila, ʻo ka helu ʻai i ia manawa, he 13 a Keokia, a he hua nēnē kā Alabama. Akā, holo ihola ka manaʻo o Nick Saban, ke kumu aʻo o Alabama, e huki ʻia ʻo Jalen Hurts, ka ʻalihikūlele hui mua, a e hoʻokomo aku iā Tua Tagovailoa, ka ʻalihikūlele hui ʻelua. No Hawaiʻi nei nō ʻo Tagovailoa, a ʻo Kāna Lui kona kula kiʻekiʻe i pāʻani pōpō peku ai. A ʻo ka makahiki mua kēia āna o ka pāʻani ʻana no Alabama. Akā, hilinaʻi ihola ʻo Saban i ua kāʻeʻaʻeʻa lā o Kāna Lui. A ʻike ʻia aʻela nā ʻai a ka uʻi. Ua maikaʻi ihola nō hoʻi ka hana a ka ʻaoʻao kūpale, a i ka hopena o ka hapahā ʻehā, ua paʻi a paʻi aʻela, he 20 a Keokia, a he 20 a Alabama. A ma ka wā pāʻani kaulele, lilo mua ka pōpō iā Keokia, a loaʻa ihola he 3 ʻai ma ka peku ʻana a Rodrigo Blankenship i ka pōpō he 51 ʻīā. A i ka hina mua o Alabama, kulaʻi ʻia akula ʻo Tagovailoa a hina he 16 mau ʻīā ma hope o ka laina hoʻouka. A lana aʻela paha ka manaʻo o nā ʻĪlio Pulu, ʻo lākou ke lanakila. Eia naʻe, i ka hina ʻelua, hiu aʻela ʻo Tagovailoa, a nou akula i ka pōpō iā Devonta Smith he 41 ʻīā a loaʻa ihola ka ʻai holo, a lilo ai ʻo Alabama, ʻo ia ka ʻoi.

Hoʻomaka ihola ʻo Colleen Hanbusa i kāna hana paipai kālai ʻāina no kona alualu ʻana aku i ke kūlana kiaʻāina. Hoʻohalahala akula ʻo Hanabusa i ke Kiaʻāina David Ige no ka hiki ʻole iā ia ke alakaʻi. A he pono ke alakaʻi hou i mea e emi ai nā pilikia e kū nei, ʻo kahi noho emi kūpono, a ʻo ka lawa o nā kūlana hana no nā hanauna e hiki mai ana. ʻO Hanabusa, ʻaneʻane e piha nā makahiki he 20 i kona lawelawe ʻana i ka hana ona i koho ʻia ai e ka lehulehu. He kenekoa mokuʻāina ʻo ia no nā makahiki he 12, a ʻo ia ka wahine mua i lilo ihola, ʻo ia ka pelekikena ʻAha Kenekoa mokuʻāina ma ka moʻolelo o Hawaiʻi nei. A he ʻehiku ona makahiki e hana ana ma ke ʻano he lunamakaʻāinana ʻAmelika Hui Pū ʻIa.

Eia mai kā kākou ʻōlelo noʻeau,

Pau kuhihewa i ka nani o ʻAipō.

Hoʻopuka ʻia kēia ʻōlelo i ka wā e ʻike maka ai kekahi i ke ʻano ʻiʻo o kekahi kanaka, kekahi wahi a me kekahi mea ʻē aʻe paha.

He kaʻi huakaʻi no ka hoʻomanaʻo ʻana i ka hoʻokahuli aupuni Mōʻī.

ʻO ia aʻela kekahi poʻo nūhou o kēia lā, ka lā 8 o Ianuali, he Pōʻakahi. Welina e nā makamaka. ʻO Ke Aolama kēia a penei ka nūhou.

Holo ihola ka manaʻo o ka Loio Kuhina Douglas Chin e haʻalele i ia kūlana i ka lā 15 o Malaki i mea e alualu aku ai i ke kūlana Lunamakaʻāinana ʻAmelika Hui Pū ʻIa. ʻO ke kūlana ia o Colleen Hanabusa i kēia manawa, akā, e haʻalele ana ʻo Hanabusa no ke alualu ʻana i ke kūlana kiaʻāina i kēia makahiki. Ua hoʻokohu ʻia ʻo Chin ʻo ia ka loio kuhina i ka makahiki 2015. A nui kāna hana ma ka waiho ʻana he mau hoʻopiʻi i nā papa hana a ka Pelekikena Donald Trump, ʻo kekahi, ʻo ia ka hoʻohāiki ʻana i ke komoneʻe ʻana o nā kānaka o kekahi mau ʻāina ʻē. ʻO kekahi mau kānaka e alualu ana i ia kūlana lunamakaʻāinana, ʻo ia ka Luna ʻAha Kūkā Ernie Martin, ʻo Kenekoa Donna Mercado Kim, a me Lunamakaʻāinana Kaniela Ing.

ʻOnipaʻa Kākou. I ka lā 17 o Ianuali, kēia Pōʻakolu aʻe, e mālama ʻia ana kahi hanana hoʻomanaʻo i ka lā i hoʻokahuli ʻia ai ke aupuni Mōʻī. ʻO ka piha ʻana ia o ka makahiki 125. E hoʻomaka ana kahi kaʻi huakaʻi ma Mauna ʻAla a e kaʻi like ana a i ka Hale Aliʻi ʻo ʻIolani. Ma ke Kapikala, e haʻi ʻōlelo ana ka Polopeka Jon Osorio a me John Waiheʻe, he kiaʻāina ma mua. A ma ka Hale Aliʻi, e haʻi ʻōlelo ana kekahi mau Hawaiʻi Alakaʻi, ʻo Andre Perez, ʻo Kahoʻokahi Kanuha, ka Polopeka Kaleikoa Kaʻeo, ka Polopeka Williamson Chang, ʻo Kamanaʻopono Crabbe, ka luna hoʻokō o ke Keʻena Kuleana Hawaiʻi a me Mililani Trask. A i ka hola 6:00 o ke ahiahi o ia lā hoʻokahi, e mālama ʻia ana ʻo E ola nā Mele Lāhui ma ka ʻAha Hoʻokolokolo Kiʻekiʻe ma ke Alanui ʻo Mōʻī. Ma laila e hōʻikeʻike ʻia ai ka hana a ka Hawaiʻi ma ka hōʻike ʻana i nā mea kālai ʻāina ma o ke mele a me ka hula a me nā palapala a me nā moʻolelo nūpepa e pili ana i ka hoʻokahuli aupuni.

Eia mai kā kākou ʻōlelo noʻeau,

Mai ke kumu a ka wēlau.

ʻO ia hoʻi, ʻo ka mea holoʻokoʻa.

ʻAʻole i make i ka lāʻau make nā koholā pailaka i loaʻa ma Kauaʻi.

ʻO ia aʻela kekahi poʻo nūhou o kēia lā, ka lā 20 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I ka mahina ʻo ʻOkakopa, loaʻa maila he ʻelima koholā pailaka make ma Kauaʻi. ʻElua o lākou, ua pae akula i uka o ke Kahakai o Kalapakī. A ʻekolu o lākou, e lana wale aʻe ana nō ma ke Awa Kū Moku o Nāwiliwili. Kuhi ihola kekahi, i make ia mau koholā pailaka i ka lāʻau hoʻomake ʻiole i lū ʻia aku nei ma Lehua i nā mahina ʻo ʻAukake a me Kepakemapa. Akā, ma ka hōʻike a ka ʻOihana Mahiʻai o ʻAmelika Hui Pū ʻIa, ʻaʻohe wahi lāʻau hoʻomake ʻiole i loaʻa ma ke ake o ia mau koholā. ʻAʻole naʻe i akāka mai ko lākou kumu i make ai. Aia nō nā akeakamai ke noiʻi akula.

ʻO kahi o ka hale kūʻai ʻo Sports Authority ma mua ma ke Alanui ʻo Ward, e lilo ana i mākeke maluhale i kēia makahiki aʻe. E hoʻopukapuka ana ʻo Chris Ulu, ka mea nona kahi waihona ʻo Storkeeper Self Storage, a me kekahi hoa ona he $1.5 miliona no ka hoʻoponopono ʻana i ia hale. ʻAkahi nō ʻo Ulu a pūlima i ka palapala hoʻolimalima me ka hui nona ia ʻāina. E hemo ana ia mākeke i ka mahina ʻo Mei. A ʻo nā ʻoihana o loko, e kūʻai ana i nā mea like ʻole i hana ʻia ma Hawaiʻi nei. ʻO ka nui loa o nā ʻoihana o loko, he 250. A ʻo ka uku hoʻolimalima o ka mahina, he $2,100 no kahi wahi he 100 kapuaʻi kuea, a he $1,500 no kahi wahi he 50 kapuaʻi kuea.

Eia mai kā kākou ʻōlelo noʻeau,

Nei ka honua, he ōlaʻi ia.

ʻO ia hoʻi, ʻike ʻia ke ʻano o kekahi mea ma kāna hana.

 

He manaʻo ko ka loio kuhina o Hawaiʻi e lilo i luna makaʻāinana.

ʻO ia aʻela kekahi poʻo nūhou o kēia lā, ka lā 19 o Kēkēmapa, he Pōʻalua. Welina e nā makamaka. ʻO Ke Aolama kēia a penei ka nūhou.

Hōʻike aʻela ka Loio Kuhina Douglas Chin i ka lehulehu, e alualu ana ʻo ia i ke kūlana luna makaʻāinana e waiho hakahaka nei. A i hakahaka ma muli o ka haʻalele ʻana iho o ka Luna Makaʻāinana Colleen Hanabusa i ia kūlana i mea e alualu ai i ke kūlana kiaʻāina. Na ke Kiaʻāina David Ige i hoʻokohu iā Chin i loio kuhina i ka makahiki 2015. ʻO nā hihia o ka makahiki nei i hala, no nā hana like ʻole a ka Pelekikena, ʻo ia ke kumu i holo ai ko Chin manaʻo e alualu i ke kūlana luna makaʻāinana.

Ua hala akula kahi puʻukani Kalikiano i ke ala hoʻi ʻole mai i ka Pōʻaono nei. ʻO Randy Hongo nō ia. E hele aku ana ʻo Hongo i kahi hale mālama ʻelemakule no ka hīmeni ʻana me kahi papa hīmeni a hula a ʻo ia kona wā o ka maʻule ʻana. Ua hānau ʻo Hongo i ka lā mua o Iulai o ka makahiki 1947 ma Hilo. A male akula me kāna wahine, me Gay, i ka makahiki 1971. A ma ia hui ʻana, he 19 o lāua pāleo. A lilo akula he ʻeono Makana Nā Hōkū Hanohano iā lāua. Haʻalele maila ʻo Hongo i hope nei, i kāna wahine a me kā lāua keiki kāne ʻo Andrew. Aia nō ke anaina hoʻolewa i ka Hale Pule ʻo Kalihi Union i kēia Pōʻaono. E hoʻomaka ana ke kipa ʻana i ka hola 9:00 o ke kakahiaka, a e hoʻomaka ana ke anaina haipule hoʻolewa i ka hola 11:00.

Eia mai kā kākou ʻōlelo noʻeau,

Oki kilohana ka pali o Waialoha.

He ʻōlelo kēia no ke kanaka kino maikaʻi.