He papa no ka pono o kā kākou mau ʻōpiopio.
ʻO ia aʻela kekahi poʻo nūhou o kēia lā, ka lā 26 o Kepakemapa, he Pōʻalua. Welina e nā makamaka heluhelu. ʻO Ke Aolama kēia a penei ka nūhou.
He papa hou ke mālama ʻia ana ma nā kula aupuni a me nā kula uku a puni ʻo Oʻahu nei. He papa ia no nā ʻōpiopio kahi e aʻo ai i ke kāohi ʻana aku i ka hoʻomaʻau ʻana a me ka pepehi ʻana o ka ʻōpio iā ia iho. Ma kēia pae ʻāina nei, ʻo ka nui o nā haumāna kula waena i komo ka manaʻo i loko o lākou e pepehi iā lākou iho, he 25 pākeneka a emi iki iho. A he 12.5 pākeneka, ua hoʻāʻo nō e pepehi iā lākou iho. A ma nā kula kiʻekiʻe, he 10.5 pākeneka o nā haumāna i hoʻāʻo e pepehi iā lākou iho. I ka nānā aku i ke kumu o ka make o nā ʻōpiopio o 10 makahiki a ka 19, mai ka makahiki 2012 a i ka makahiki 2016, he 47 ʻōpiopio i lawe i ko lākou ola ponoʻī, he 46 i make i ka ulia kaʻa a he 25 i make i ka maʻi ʻaʻai. Akā, no kēlā me kēia ʻōpiopio i lawe i ko lākou ola ponoʻī, he 25 mau ʻōpiopio hou aku i hoʻokomo ʻia i ka haukapila a i lapaʻau ʻia paha ma ka lumi lapaʻau ulia ma muli o ka hōʻeha ʻana iā lākou iho. Inā kūpilikiʻi kou noʻonoʻo a kamaʻāina paha i kahi kanaka i kūpilikiʻi ka noʻonoʻo, e kāhea i kēia helu ma Oʻahu nei, 832-3100. A ma nā mokupuni ʻē aku, eia ka helu, 800-753-6879. Inā he manaʻo kou e mālama ʻia kahi papa kāohi i ka hoʻomaʻau ʻana a me ka pepehi ʻana o ka ʻōpio iā ia iho, e kāhea i ke keʻena Mental Health America o Hawaiʻi ma ka helu 521-1846 a e leka uila aku paha i ka hua leka uila, prevention@mentalhealthhawaii.org.
Lilo aku nei he $6.35 miliona i ke Kulanui o Hawaiʻi no ka noiʻi ʻana aku i ka lāʻau koʻokoʻo nāna e pale aku i ka mea hoʻomaʻi Ebola. ʻO Axel Lehrer o ke Kulanui o Hawaiʻi ka mea nāna e lawelawe i ka puʻu kālā. A e hoʻomau ana ʻo ia i ka noiʻi ʻana i kāna lāʻau koʻokoʻo e hoʻomohala nei a me ke pale ʻana aku o ia lāʻau i kekahi mau mea hoʻomaʻi, ʻo ka mea hoʻomaʻi Sudan a me ka mea hoʻomaʻi Marburg. I kēia manawa, ua paʻa maila kekahi lāʻau koʻokoʻo mea hoʻomaʻi Ebola e pau ʻole i ka wela. ʻO nā wahi i laha ai ka Ebola i ka makahiki 2014, he mau ʻāina wela a panoa. No laila, he maikaʻi ia. A inā he hiki i ia lāʻau ke pale aku i nā mea hoʻomaʻi ʻekolu, he maikaʻi hoʻi kau a koe aku. He lana ka manaʻo o nā mea akeakamai e noiʻi akula i kēia lāʻau koʻokoʻo, e mākaukau ka lāʻau i loko o nā makahiki he 10 a emi iho.
Eia mai kā kākou ʻōlelo noʻeau,
Ola loko i ke aloha.
He mea nui ke aloha.
Ke Aolama 