10-18-17

He manaʻo ko kekahi e hoʻonui i nā mea ma Hawaiʻi nei e pale aku ai i ke kaua.

ʻO ia aʻela kekahi poʻo nūhou o kēia lā, ka lā 18 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

He manaʻo ko Lukānela Kenelala Dan “Fig” Leaf o ka Māhele Kaua Lewa i hoʻomaha loa, he pono ke hoʻomaikaʻi aʻe i nā mea pale kao lele ma Hawaiʻi nei i ʻike ai ʻo Kim Jong Un, ʻaʻole e noho wale ʻo ʻAmelika Hui Pū ʻoiai ʻo Kōlea ʻĀkau e hoʻoweliweli mai ana. ʻO Leaf, he hope luna kaua ʻo ia no ka Pūʻali Koa Pākīpika o ʻAmelika Hui Pū ʻIa. Hōʻike mai kekahi, ma Hawaiʻi nei, e hoʻāʻo ʻia ana kahi kao lele pale i mea e ʻike ai i ka maikaʻi a me ka maikaʻi ʻole paha i ke kau kupu lau a ma hope iki aku paha.

Aloha nō! Pau ihola ka pāʻani pōpō peku ʻana o John Ursua i kēia kikina nei. He ʻāʻapo ʻo Ursua no ke Kulanui o Hawaiʻi a i ka Pōʻaono i hala aku nei, ʻeha ihola kona kuli ma ka hapalua ʻelua o ka hoʻokūkū. A i ka nānā ʻana aku o ke kauka, ʻike ʻia ihola ka nahae o ke aʻa puʻupuʻu o ke kuli ʻākau o Ursua. ʻAʻole i paʻa ka lā e kaha ʻia ai kona kuli, akā, ʻo ka wā hoʻopolapola, he ʻeono paha mahina a ʻoi. ʻO ka makahiki ʻekolu kēia o Ursua o ka pāʻani ʻana. Ma nā ʻīā ʻapo, ʻo ka helu ʻeono ʻo Ursua a puni ʻo ʻAmelika Hui Pū ʻIa, he 111.2 ʻīā o ka hoʻokūkū. A ma ka ʻapo ʻana, ʻo ka helu ʻehiku ia. He 7.8 o ka hoʻokūkū. He hiki nō i kekahi mau mea pāʻani ke pani i ka mākālua e waiho wale ana, ʻo Kumoku Noa, ʻo Davine Tullis ʻo Kalakaua Timoteo III a me Isaiah Bernard.

Eia mai kā kākou ʻōlelo noʻeau,

Pēpē i ka ua hoʻopoponi ʻili.

He ʻōlelo kēia no ke kanaka i ʻeha ka naʻau i ka ʻōlelo a i ka hana paha a kekahi.

4 thoughts on “10-18-17”

    1. Aloha hou mai e Kauākolo,

      Maikaʻi kāu nīnau. ʻO nā kao lele a me nā mea kī kao lele, ʻo ia wale nō paha, a ʻo nā kānaka nō hoʻi paha. ʻAʻole i mōakāka iaʻu, ma ka ʻāina wale nō ia mau kao lele, a ma ka moku kaua nō hoʻi paha. A inā ma ka moku kaua, e noho paʻa paha ia moku kaua ma Hawaiʻi nei? Ke kuhi nei au, ʻo ka makemake o ia ʻano kanaka, e māhuahua pū nā pūʻali koa.
      Akā, ma kaʻu kākau ʻana aku nei, ʻo “mea ma Hawaii…kaua,” ʻo ke kao lele wale nō ia, ʻaʻole ʻo ke kanaka. He pili laulā nō, ʻeā?
      ke aloha
      kekeha
      ke aloha
      kekeha

      Like

    1. Aloha mai e Kauākolo,
      Maikaʻi nō paha nā hua ʻōlelo ʻelua. ʻO mākālua, ʻike au ma ke kamaʻilio ʻana no ke kanu ʻana i kalo a i hua ʻē aʻe paha. A ma hope mai, ʻike ʻia akula ma kekahi moʻolelo nūpepa e kamaʻilio ana no ka hakahaka o ke kekahi kūlana hana, a ʻo mākālua ka hua ʻōlelo i hoʻohana ʻia. A manaʻo ihola au, he nani ia. A ʻo ia kaʻu mea e hoʻohana ai iā mākālua i kekahi manawa.
      Mahalo i ka heluhelu ʻana.
      ke aloha

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s