He ulia mokulele pinao ma Kauaʻi.
ʻO ia aʻela kekahi poʻo nūhou o kēia lā, ka lā 23 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua kuʻu ʻino ihola kekahi mokulele pinao ma Kahi Kī Kao Lele o ka Pākīpika ma Nōhili i Kauaʻi. A make ihola he ʻehā mau kānaka. Ma mua o ia kuʻu ʻino ʻana, e hoʻolahalaha ana ua mokulele pinao lā he 1,000 kapuaʻi ma luna aʻe o ke ala holo mokulele i ka wā e hoʻokuʻu ʻia ana kekahi mau mea a i ka honua. A i ia manawa nō, ua huli wale ka mokulele i ka ʻākau a huli ana ka ihu i lalo a lele ana i lalo me ka māmā loa a kuʻu ʻino ihola. Manaʻo ʻia, ua hele ka pailaka a huikau lewa loa.
He mau pila ma ka ʻAha ʻŌlelo Kūloko o Hawaiʻi nei, e pāpā ana, ʻaʻole e hoʻokae ʻia nā kānaka ma ka polokalamu kōkua uku hoʻolimalima. Nui loa nā wahi e ʻae ʻole ana i ka Paukū 8. ʻO ka Paukū 8, ʻo ia ka polokalamu pekelala nāna e kōkua i nā ʻohana, nā ʻelemākule a me nā kānaka kīnā ma ka uku ʻana i ka uku hoʻolimalima. ʻO nā Pila Kenekoa 2399 a me 206, e ʻae ana i ka mea hoʻolimalima wahi noho i ka hoʻopiʻi i ka haku hale inā hoʻohuoi ʻia, ua hōʻole ʻia ʻo ia ma muli o ka pila ʻaiʻē o ia polokalamu pekelala.
Eia mai kā kākou ʻōlelo noʻeau,
ʻŌpā nā kuku o Waimea.
ʻO ia hoʻi, ua luhi nā wāwae ma hope o ka hele loa ʻana.
Ke Aolama 