He manaʻo paha ko Vladimir Putin e kī aku i nā kao lele nukelea.
ʻO ia aʻela kekahi poʻo nūhou o kēia lā, ka lā 28 o ka Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.
Kauoha aku nei ka Pelekikena Vladimir Putin o Lūkia e liuliu nā pūʻali nukelea a mākaukau loa. Wahi a Putin, i kauoha ʻo ia pēlā ma muli o nā ʻōlelo hōʻoiʻoi a ka ʻAhahui Kuʻikahi ʻAkelanika ʻĀkau a me nā hana hoʻohāiki waiwai. A e hopohopo ana kekahi poʻe o hoʻouka ʻia auaneʻi ke kaua nukelea. Ua pau nā kānaka he 422,000 a ʻoi i ka haʻalele iā ʻUkalena no Pōlani. Akā, he 22,000 mau kānaka i komo i loko o ʻUkalena no ke kūpale ʻana i ko lākou ʻāina hānau. Ke manaʻo ʻia nei, e kōkua ana ʻo Belarusa iā Lūkia ma ka hoʻouna ʻana i nā koa i loko o ʻUkalena i ka Pōʻakahi.
Hele mai nei ke Kuhina ʻOihana Moku o ʻAmelika Hui Pū ʻIa, ʻo Carlos Del Toro, i Hawaiʻi nei i ka Pōʻalima nei no ke kūkākukā ʻana i ka ʻinoʻino o ka wai i ka ʻaila. Ua mālama ʻo ia i hālāwai me nā ʻohana ʻoihana moku, a mākaʻikaʻi aku nei i kahi hoʻāhu ʻaila o Kapūkakī, a kipa aku nei nō hoʻi i nā kaiāulu o ke Kahua Pūʻalikoa o Puʻuloa a me Hickam no ke kamaʻilio ʻana me nā kānaka e noho ana ma laila. ʻŌlelo aʻela ʻo Del Toro, “Ke kuʻupau aku nei mākou i ka hana me ka paʻa o ka manaʻo e hōʻoia i ke ola a me ka palekana o ko Hawaiʻi, a pēlā pū nō me nā ʻohana pūʻalikoa. A i loko nō o nā pilikia he nui hewahewa, ʻaʻole i kana mai ka holo mua a he pono iā mākou ke noke i ke alu like ma ka hana i mea e hilinaʻi hou mai ai lākou.”
Eia mai kā kākou ʻōlelo noʻeau,
Alahula Puʻuloa, he alahele na Kaʻahupāhau.
He ʻōlelo kēia no ke kanaka hele i nā wahi a pau, a ʻike i nā mea a pau, nā hana hewa nō hoʻi paha o ʻAmelika Hui Pū ʻIa.
Ke Aolama 