Hopu ʻia aku nei kekahi kanaka no ka limanui makawela i kekahi mau wāhine ʻĀkia ma Manahata.
ʻO ia aʻela kekahi poʻo nūhou o kēia lā, ka lā 4 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.
I kēlā hopena pule aku nei ma Manahata, Nū Ioka, limanui aku nei kekahi kanaka i kekahi mau wāhine ʻĀkia ʻehiku ma loko o nā hola ʻelua. ʻO Steven Zajonc kona inoa, a he 28 ona makahiki. A ʻakahi nō ʻo ia a hopu ʻia i ka Pōʻakolu nei ma waho o kekahi hale waihona puke ma Waenakaona. A hoʻopiʻi ʻia aku nei ʻo Zajonc no nā kalaima makawela. Kohu mea lā, ʻaʻole i kamaʻāina iki nā wāhine ʻehiku i ua kanaka lā. Ma kahi o ka hapalua hola ʻeono o ke ahiahi Lāpule nei, kuʻi akula ʻo Zajonc i ka wahine mua, he 57 ona makahiki. A he 10 minuke ma ia hope mai, kuʻi hou akula ʻo ia i ka lua o ka wahine, he 25 ona makahiki. A mai ia manawa mai a ma kahi o ka 20 minuke i koe kani ka hola 9:00, limanui hele akula ʻo ia i nā wāhine ʻē aʻe he ʻelima.
Make iho nei kekahi wahine a me kāna kaikamahine i ke aumoe Pōʻaono nei ma Nānākuli. ʻO Kelsey Palisbo ka wahine a ʻo Leah Hanakahi kāna kaikamahine. Ua kū ihola ko lāua kaʻa e kau ana ma ke Alanui ʻo Haleakalā a ʻo ia ka manawa i hoʻokuʻi ʻia aku ai e kekahi kalaka e holo nui ana a make ai lāua. Wahi a ka mākaʻi, ʻo ka holo nui a me ka wai ʻona kekahi mau kumu o ia ulia kaʻa. ʻO ia mea kalaiwa, ʻekolu ona manawa i hoʻopaʻi ʻia ai no ka holo nui ʻana. I ka makahiki 2018, ua hoʻopaʻi ʻia ʻo ia no ka holo pupule ʻana he 66 mile o ka hola ma ke kāʻei 35 mile o ka hola. A i ka makahiki 2019, ua hoʻopaʻi ʻia ʻo ia no ka holo nui ʻana he 73 mile o ka hola ma ke kāʻei 55 mile o ka hola. A ma ka makahiki 2020, ua uku ʻo ia he $267 no ke kalaiwa ʻana he 105 mile o ka hola ma ke kāʻei 45 mile o ka hola.
Eia mai kā kākou ʻōlelo noʻeau,
Haʻalele ʻo Makanikeoe.
ʻO ia hoʻi, ʻaʻohe maluhia a ʻaʻohe hoʻi aloha.
Ke Aolama 