He pilikia hou ma ke kahua o ka ʻOihana Moku ma Kapūkakī.
ʻO ia aʻela kekahi poʻo nūhou o kēia lā, ka lā 30 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
I ke awakea o ka Pōʻalua nei, ua hanini aʻe nei he 1,100 kālani huʻa kinai ahi ma kahi hoʻāhu ʻaila o ka ʻOihana Moku ma Kapūkakī. He ʻawahia nō ia huʻa kinai ahi. A he kemika ko loko i kapa ʻia he kemika mau loa no ka ʻūlōlohi loa o kona emi ʻana a nalo. A ʻo kekahi pilikia, he mea ia kemika e nui ai ka hiki ke loaʻa o ke kanaka i ka maʻi ʻaʻai ma ka hakuʻala a me ka hua. A he mea nō hoʻi ia kemika e nui aʻe ai ke koko piʻi ma nā wāhine e kōkō ana i ke keiki, a me kekahi mau pilikia ola kino ʻē aʻe. Ma kahi o ka hola 1:00 o ke awakea i hanini ai ka huʻa, akā, he ʻelua hola ma hope mai ka wā i hoʻomaopopo ʻia ai ke Keʻena Ola o ke aupuni mokuʻāina. A i ka wā i hiki aku ai ka luna o ia keʻena ma ia hope mai, ʻaʻole nō i pau ka hanini ʻana i ke kāohi ʻia.
Ua heluhelu mua ʻia aku nei ka Pila 57 o ka ʻAha Kūkā o Honolulu. ʻO ia ka pila e hōʻike ana i nā wahi e hiki ʻole ai ke lawe ʻia aku ka pū e ke kanaka nona ka laikini hāpai pū. Ua ʻāpono ʻia nō ia heluhelu mua ʻana e ka ʻAha Kūkā, he ʻeono luna i kākoʻo, a ʻelua i kūʻē, ʻo ia ka Luna ʻAha Kūkā Augie Tulba lāua ʻo Andria Tupola. A ʻo ka Luna ʻAha Kūkā Heidi Tsuneyoshi, ʻaʻole ʻo ia ma ka wā koho. Akā, he nui loa nō nā kānaka i kūʻē. He 372 mau palapala hōʻike i waiho ʻia i mua o ka ʻAha Kūkā, he 287 o ia mau palapala, e kūʻē ana i ka pila. A he 85 e kākoʻo ana. Ma ka Pila 57, ʻo nā wahi i pāpā ʻia ai ka lawe hūnā ʻana i ka pū, ʻo ke kula, ʻo ke kaʻa halihali kanaka o ka lehulehu, a me nā wahi koho pāloka. A pēlā pū me kēia mau wahi, ʻo ke Kai Kūʻono ʻo Hanauma, ʻo ke Kikowaena Kaunānā Keiki o Hawaiʻi, ka Hale Hōʻikeʻike Iʻa o Honolulu a me ke Kahua Hōʻikeʻike Holoholona Laka ʻOle. A ʻo kekahi, ʻaʻole hiki ke hele a kokoke i ka hui nona nā kānaka he 25 a ʻoi i ʻākoakoa no ka hana e pono ai nā pono kīwila o ke kanaka, ʻo ia hoʻi, he pono ke kū he 100 kapuaʻi a ʻoi mai nā kānaka aku o ka lihi palena o ia ʻākoakoa ʻana.
Eia mai kā kākou ʻōlelo noʻeau,
Nāpelepele nā pali o Kalalau i ka wili a ka makani.
ʻO ia hoʻi, ua piula loa ihola.
Ke Aolama 