08-31-22

Hoʻopiʻi ʻia aku nei kekahi kanaka no ka ʻaihue kanaka.

ʻO ia aʻela kekahi poʻo nūhou o kēia lā, ka lā 31 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

Hopu ʻia aku nei kekahi kanaka ma Hōnaunau i ka lā 24 o ʻAukake no ka hoʻohuoi i ka hoʻopaʻahao kūʻē kānāwai. ʻO Christopher Estoy kona inoa, no Kailua-Kona. ʻAkahi nō ʻo ia a hoʻopiʻi ʻia aku nei i ka Pōʻakahi nei no ka ʻaihue kanaka, ka ʻākeʻakeʻa i ka mālama ʻana, ka hoʻoweliweli ʻana ma ke kēkelē ʻekahi a me ka hoʻopaʻahao kūʻe kānāwai ma ke kēkelē ʻelua. Ma kekahi hihia ma mua, i ka makahiki 2013, ua hoʻāhewa ʻia aku ʻo Estoy no ka hoʻāʻo ʻaihue kanaka ma ke Kiko Waena Kūʻai ʻo Ala Moana. ʻO ka hoʻopaʻi, he 10 makahiki o ka noho paʻahao ʻana. Ua kō nō iā Estoy ia hoʻopaʻi, a ʻakahi nō a hoʻokuʻu ʻia mai he ʻekolu mahina aku nei.

ʻŌlelo aʻela ʻo Josh Green lāua ʻo James “Duke” Aiona, inā e lilo ʻo ia ke kiaʻāina, e lilo ʻo Kapūkakī, ʻo ia kekahi o nā mea nui loa, a e koi hoʻohune i ka ʻOihana Moku e wikiwiki ma ke pani ʻana i nā hana ma laila. Akā, ʻokoʻa ka manaʻo o Green a ʻokoʻa hoʻi ka manaʻo o Aiona ma ka hoʻomau ʻana i nā palapala ʻaelike e pau ana i nā makahki e hiki mai ana. Wahi a Green, he pono i ka pūʻalikoa ke hoʻomaikaʻi hou i ka pilina i mea e hilinaʻi ʻia ai lākou e ke kaiāulu, a aia wale nō a hilinaʻi hou ʻia lākou, a laila, e hoʻomau ʻia nā palapala ʻaelike. Wahi a Aiona, ina ʻo ia ke kiaʻāina, e hoʻomau ʻia ka pilina maikaʻi o ka mokuʻāina me ka pūʻalikoa. ‘Ōlelo nō hoʻi ʻo Aiona, ma ko lāua wā me Linda Lingle e kū ana i ka moku, he keu ka maikaʻi o ka pilina me ka pūʻalikoa. A ua ʻoi loa aku ia pilina i kēia manawa, a ʻoi loa aku me ka ʻŌiwi Hawaiʻi. A makemake ʻo Aiona e mālama i ia pilina maikaʻi.

Hōʻike aʻela ʻo Timmy Chang, ke kumu o ka hui pōpō peku o Hawaiʻi, he ʻekolu mau mea pāʻani e hoʻokūkū ana no ke kūlana ʻalihi kūlele mua. ʻO ia ʻo Brayden Schager, ʻo Joey Yellen, a me Cammon Cooper. ʻO Schager lāua ʻo Yellen wale nō nā ʻalihi kūlele i pāʻani ma ka Pōʻaono nei ma ke kūʻē ʻana aku iā Wanapila. E kūʻē aku ana ʻo Hawaʻi iā Kenetuke Komohana i kēia Pōʻaono ma ke Kahua Pāʻani ʻo Ching.

Eia mai kā kākou ʻōlelo noʻeau,

Mōhala maikaʻi ke oho o ke kupukupu.

He ʻōlelo kēia no ke kanaka uʻi.

08-29-22

Hoʻopaneʻe ʻia ka hihia o kekahi mau kānaka o Maui i hoʻopiʻi ʻia no ke kalaima makawela.

ʻO ia aʻela kekahi poʻo nūhou o kēia lā, ka lā 29 o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua hoʻopaneʻe ʻia aku nei ka hihia o kekahi mau kānaka Hawaiʻi a ka lā 7 o Nowemapa. ʻO ko lāua mea i hoʻopiʻi ʻia ai, he kalaima makawela pekelala. Ua hoʻopiʻi ʻē ka mokuʻāina iā Kaulana Alo-Kaonohi lāua ʻo Levi Aki ‘Ōpio no ka limanui ma ke ʻano he peloni, a he ʻehiku makahiki ma hope mai o ka limanui ʻana i ka makahiki 2021, aia nō ke Keʻena Loio o ʻAmelika Hui Pū ʻIa e hoʻopiʻi aku ana iā lāua no ke kalaima makawela me ka ʻōlelo ʻana, he hoʻokae ʻili ke kumu o ko lāua pepehi ʻana iā Chris Kunzelman a pau ka ʻike a pau hoʻi ka lohe. Ma ka palapala hoʻopōkole ʻia no ka hihia i waiho ʻia e Salina Kanai, ka loio o Alo-Kaonohi, ʻaʻole pili iki ka ʻili a me ke koko paha o Kunzelman. Akā, ʻo ka hana hōʻino a Kunzelman a me kona mahalua, ʻo ia ke kumu i kū ai ʻo Alo-Kaonohi mā i ke alo o ua kanaka lā. Ua kupu aʻe ia hana i ka mahina ʻo Pepeluali o ka makahiki 2014 ma Kahakuloa. Ua kūʻai ʻo Kunzelman i hale ma laila a i kona hiki ʻana aku, ʻākeʻakeʻa ʻia ke ala e moe ana i kona hale hou. Ua paʻa ka ʻīpuka i ka laka, no laila, ua ʻoki wale aku ʻo Kunzelman i ka laka, a kalaiwa akula i ke ala, āna i manaʻo ai he kū nō kona hele ʻana i ke kānāwai. Manaʻo ihola ʻo Alo-Kaonohi lāua ʻo Aki, he komo hewa kā Kunzelman i kā lāua ala i hoʻomalu ʻia.

Aloha nō. Hāʻule ihola ʻo Hawaiʻi iā Vanderbilt ma ka pōpō pekupeku o ka Pōʻaono nei. Na nā Koa Ānuenue nō nā ʻai mua ma ka holo ʻana o Dedrick Parson a loaʻa ka ʻai holo. Akā, ma hope o kēlā, hiu aʻela nā Komakoa a lilo ke eo iā lākou ma ka helu ʻai he 63 i ka 10 a Hawaiʻi. I kēia pule, e kūʻē aku ana ʻo Hawaiʻi iā Kenetuke Komohana.

Kāʻili aku nei nā keiki o Honolulu i ka lanakila ma ka puni inoa moho o ka Hoʻokūkū Inoa Moho Pōpō Hili o ka Honua o ke Kuʻikahi Liʻiliʻi. Ua eo ʻo Curacao iā Honolulu, ma ka helu ʻai he 13 a Honolulu i ka 3 a Curacao.

Eia mai kā kākou ʻōlelo noʻeau,

He nani wale nō ʻo Puna mai ʻō a ʻō.

ʻO ia hoʻi, ʻaʻohe mea e namunamu ai.

08-26-22

Piha hauʻoli ka naʻau o kekahi paʻahao i hoʻokuʻu laʻelaʻe ʻia.

ʻO ia aʻela kekahi poʻo nūhou o kēia lā, ka lā 26 o ʻAukake, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hoʻokuʻu laʻelaʻe ʻia kekahi kanaka e noho paʻahao ana no nā makahiki he 36 a ʻoi. ʻO Sullivan Walter ka inoa o ua kanaka lā, a he 53 ona makahiki i kēia manawa. He 17 ona makahiki i kona wā i hoʻāhewa hewa ʻia ai no ka puʻe ʻana i ka wahine ma Nū ʻOlina. He mau pilikia ko ka hihia. ʻO kekahi mea nui loa, ʻaʻole i hōʻike ʻia i mua o ka ʻaha ka like ʻole o ke ʻano o ke koko o Walter me ke keakea i loaʻa ma ka wahine ma hope o ka puʻe ʻana. Wahi a Richard Davis, kekahi Luna o ka Papahana Hewa ʻOle o Nū ʻOlina, ʻo nā loio a me nā mākaʻi i pili i ia hihia, ua hana lākou me he mea lā, ua hilinaʻi lākou, hiki iā lākou ke hana e like me ko lākou makemake i ka ʻōpio Pāʻele no loko mai o ka ʻohana puhikole a ʻaʻole e loi ʻia kā lākou hana.

Aia nō ke noiʻi ʻia akula kahi kaʻa lawe maʻi i ā ʻia i ke ahi ma ka Haukapila ʻo Kākela ma Kailua. E lawe ʻia ana kahi maʻi i ka haukapila a i ka wā i hiki aku ai i ke ala kalaiwa o ia haukapila, ʻā ʻia aʻela ke ahi, a e hōlapu ana. ʻEkolu mau kānaka o luna o ke kaʻa lawe maʻi i ia manawa, ʻo ke kahu lapaʻau ulia e kalaiwa ana, ua pakele akula, ʻaʻohe wahi ʻeha. A ʻo ke kahu lapaʻau ulia ma kahi o hope o ke kaʻa, ua pakele nō ma ka puka ʻana i waho, ua ʻeha kūpilikiʻi naʻe. A ʻo ka maʻi, ʻaʻole i puka mai i waho, a ʻo kona make ihola nō ia. Hoʻopūhili ʻia ka noʻonoʻo o nā luna kahu lapaʻau ulia, ma ka nui o ko lākou mau makahiki e hana ana ma ka ʻoihana kahu lapaʻau ulia, ʻaʻole lākou i ʻike iki i ka ʻā ʻia o ke kaʻa lawe maʻi i ke ahi.

E kūʻē aku ana ʻo Hawaiʻi iā Vanderbilt ma ka pōpō pekupeku i ka lā ʻapōpō, ka lā 27 hoʻi o ʻAukake. A ua pau loa nā likiki i ke kūʻai ʻia. E mālama ʻia ana ka hoʻokūkū ma ke Kahua Pāʻani ʻo Clarence T.C. Ching, a he 9,346 mau noho o ia wahi. E ulele ana ka hana ma ka hola 4:30 o ka ʻauinalā. E hoʻolele ʻia ana nō hoʻi ma luna o ke kīwī i ia wā nō ma ke kānela CBS Sports.

Eia mai kā kākou ʻōlelo noʻeau,

Pihaʻā moe wai uka.

He ʻōlelo kēia no nā kāʻeʻaʻeʻa ma nā hana ʻālapa.

08-24-22

E kāpae ʻia paha kahi ʻaiʻē haumāna.

ʻO ia aʻela kekahi poʻo nūhou o kēia lā, ka lā 24 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

Kūkala aʻela ka Pelekikena Joe Biden i kona manaʻo, e hoʻokō ʻia kāna ʻōlelo hoʻohiki e kāpae ʻia aku kahi ʻaiʻē haumāna. ʻO ka nui o ko ke kanaka ʻaiʻē e kāpae ʻia, he $10,000. ʻO nā kānaka ʻaiʻē nona ka uku hana makahiki he $125,000 a emi mai, ʻo ia nā kānaka hiki ke noi i ke kāpae ʻia o ka ʻaiʻē haumāna. A ʻo ka uku hana makahiki o ka ʻohana, e emi mai i ka $250,000.

Make ihola kekahi mau kānaka ʻelua ma ka ulia kaʻa ma Mālaekahana i ke awakea Pōʻakahi nei. E kalaiwa pupule ana kekahi kanaka ma ke kalaka a i kekahi manawa āna i ʻaʻe hewa ai i kekahi ʻaoʻao o ke alanui, hoʻokuʻi akula kona kalaka i kekahi kaʻa e holo mai ana. ʻO ka wahine e kalaiwa ana i ke kaʻa, lawe ʻia akula ʻo ia i ka haukapila kahi ona i make ai ma hope mai ma muli o nā ʻeha. A ʻo ka ʻōhua ma ka noho o hope o ia kaʻa, ua make nō ma kahi o ka ulia kaʻa. ʻO ka ʻōhua ma ka noho o mua, aia nō ma ke kūlana kūpilikiʻi ma ka haukapila. A ʻo ke kanaka e kalawa ana i ke kalaka, aia nō ma ka haukapila ma ke kūlana kūkonukonu. Aia nō ka mākaʻi ke noiʻi akula.

ʻAneʻane e hiki aku nā keiki pōpō hili o Honolulu i ka puni inoa moho o ka Hoʻokūkū Kuʻikahi Liʻiliʻi o ʻAmelika. ʻO Nolensville, Tenesī ko lākou hoa paio i kēia lā, a ʻo ka lanakila o ka hoʻokūkū o kēia lā, ʻo ia ke komo aku i ka puni inoa moho. E ulele ana i ka hola 9:00 o ke kakahiaka.

Eia mai kā kākou ʻōlelo noʻeau,

Ka lawaiʻa nui i ʻeaʻea nā kuʻemaka, a i ʻehuʻehu nā lihilihi.

He ʻōlelo mahalo kēia i ka loea lawaiʻa.

08-22-22

Lilo aku nei kahi makana iā Kealohapauʻole Wong.

ʻO ia aʻela kekahi poʻo nūhou o kēia lā, ka lā iwakālua kūmālua o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua lilo mai nei he haʻawina kālā iā Kealohapauʻole Wong no kona ʻano he haku mele kau i ka hano no ka mokuʻāina ʻo Hawaiʻi. He $50,000. A he puʻu kālā ia mai ka ʻAhahui Haku Mele ʻAmelika mai. ʻO Wong, ʻo ia ka haku mele kau i ka hano mua o Hawaiʻi nei. A ke paʻa mai ia puʻu kālā iā ia, e paʻi kiʻi ʻoniʻoni ʻia kekahi mau papa haku mele me ka lana o kona manaʻo, e hoʻoulu ʻia nā kānaka a e kaʻana like i ko lākou mau moʻolelo ma o ka haku mele. E mālama ʻia ana ia mau papa haku mele no nā haumāna o ka papa ʻehiku o ke Kula Hoʻāmana ʻo Ka Waihona o ka Naʻauao ma Waiʻanae. A ke pau i ke paʻi ʻia, e hoʻokumu ʻo ia i kahua pūnaewele, kahi e ʻike ai ka lehulehu i nā haʻawina, nā mele, a me ia mau papa. Ma ke kau ʻahaʻōlelo o Hawaiʻi i hala iho nei, paʻa ihola kahi ʻōlelo hoʻoholo, e wae ʻia he haku mele hanohano hou i kēlā me kēia makahiki ʻekolu. A e hoʻomaka ana i ka mahina ʻo Ianuali o ka makahiki 2023.

ʻO OBRL Kado Hawaiʻi nō ka ʻoi! ʻĀhaʻi aku nei nā keiki o OBRL Kado Hawaiʻi i ka inoa moho o ka Hoʻokūkū Inoa Moho ʻo Babe Ruth no nā keiki he 13 makahiki a emi mai. Ma ke komo ʻana ʻekahi, e ʻoi ana ʻo Pittsfield, Makakukeka, he ʻakahi i ka hua kakā. Akā, hiu aʻela nā keiki o Hawaiʻi, a lanakila ai lākou ma ka helu ʻai he ʻalima i ka ʻakahi.

Eia mai kā kākou ʻōlelo noʻeau,

He iʻa kokoke kā ka lawaiʻa.

He ʻōlelo kēia no ke kanaka hiki ke hoʻokō koke i kona makemake ma muli o kona akamai.

08-17-22

Hoʻopakele ʻia kekahi mau keiki i kūʻai ʻia ma Hawaiʻi nei.

ʻO ia aʻela kekahi poʻo nūhou o kēia lā, ka lā ʻumi kūmāhiku o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻAkahi a hoʻomaka ka ʻOihana Mākaʻi o Maui i ka noiʻi ʻana i ka pepehi ʻana iā John Picanco a make. Ua loaʻa ke kino kupapaʻu o Picanco i ke kakahiaka o ka lā 10 o ʻAukake ma ke kahua pāʻani pōpō paʻipaʻi o ka Pāka Kahakai o Kamaʻole. A ma muli o ka noiʻi a me ke kālai kupapaʻu ʻana, holo ihola ka manaʻo, ua pepehi kanaka ʻia ʻo Picanco. Inā he wahi ʻike paha kāu no ia make ʻana o Picanco, e kāhea aku i ka Mākaʻikiu Kamuela Mawae ma ka helu 808-875-5411. A inā ʻaʻole makemake e hōʻike ʻia kou inoa, e kāhea aku i ka helu 808-242-6966.

Huliāmahi nā mākaʻi like ʻole a me nā keʻena like ʻole ma ka ʻimi ʻana a loaʻa nā kānaka i kūʻai ʻia no ka hoʻokamakama ʻana. A ma Hawaiʻi nei, alu like ihola ka Pulo Mākaʻi Pekelala me

ka ʻOihana Kiu o ʻAmelika Hui Pū ʻIa, ke Keʻena Loio Hoʻopiʻi o Honolulu, ke Keʻena Mākaʻi o Honolulu, ke Kikowaena Keiki Nalowale o Hawaiʻi, ke Keʻena Lawelawe Pono Keiki o ka Mokuʻāina ʻo Hawaiʻi, a me ke Keʻena Kaiāulu ʻo Susanna Wesley, a loaʻa ai iā lākou he ʻehiku mau keiki i kūʻai ʻia no ka hoʻokamakama i kēlā Pōʻalima aku nei. A hopu ʻia nō hoʻi, he ʻelua mau kānaka nāna i kūʻai i ia mau keiki ʻehiku. A ma ʻAmelika Hui Pū ʻIa nō hoʻi i hana pū ai ka Pulo Mākaʻi Pekelala me nā keʻena like ʻole i mea e ʻimi ai a loaʻa nā kānaka i kūʻai ʻia.

Eia mai kā kākou ʻōlelo noʻeau,

He lani ke keiki, he milimili na ka makua.

ʻO ia hoʻi, he mea nui ka mālama pono ʻana i ke keiki, e like hoʻi me ka mālama ʻana i ke aliʻi.

08-15-22

Pau ke koho wae moho.

ʻO ia aʻela kekahi poʻo nūhou o kēia lā, ka lā 15 o ʻAukake, he Pōʻakahi. Welina e nā hoa makamaka, ʻo Ke Aolama kēia a penei ka nūhou.

Pau iho nei nā pāloka i ka helu ʻia ma ke koho wae moho. No ke kūlana kiaʻāina, ʻo Josh Green ka moho Kemokalaka a ʻo James “Duke” Aiona ka moho Lepupalika. A no ka hope kiaʻāina, ʻo Sylvia Luke ke Kemokalaka, a ʻo Seaula Tupai ʻŌpio ka Lepupalika. No ka ʻĀpana 2 o ka ʻAha ʻŌlelo Lāhui, ʻo Jill Tokuda ka moho Kemokalaka, ʻo Joe Akana ka moho Lepupalika, a ʻo Michelle Tippens wale nō ka moho o ka ʻaoʻao Libetaria. No ka ʻĀpana 1 o ka ʻAha ʻŌlelo Lāhui, ʻo Ed Case ka moho Kemokalaka, ʻo Conrad Kress ka moho Lepupalika, ʻo Calvin Griffin ka moho ʻŌmaʻomaʻo, a ʻo Steven Abkin, ʻaʻohe pili ʻaoʻao. A no ka ʻAha Kenekoa, ʻo Brian Schatz ka moho Kemokalaka, ʻo Bob McDermott ka moho Lepupalika, ʻo Feena Bonoan ka moho Libetaria, ʻo Dan Decker ka moho Aloha ʻĀina, a ʻo Emma Jane Pohlman ka moho ʻŌmaʻomaʻo.

He ʻumi kūmāono kumu kula i koho ʻia i mau moho no ka makana Kumu Kula o Hawaiʻi o ka Makahiki 2023. Ma ka mahina ʻo ʻOkakopa e koho ʻia ai ke poʻokela o ia mau kumu. Eia mai nā moho, ʻo Makena Ale o ke Kula Haʻahaʻa o Kahuku, he kumu papa māla aʻo; ʻo Cornelio “CJ” Ancheta o ke Kula Kiʻekiʻe o Lahainaluna, he kumu makemakika; ʻo Chayanee Brooks o ke Kula Kiʻekiʻe o Kaʻū a me ke Kula Haʻahaʻa o Pāhala, he kumu ʻōlelo Pelekane; ʻo Malia Draper o ke Kula Haʻahaʻa o Waiheʻe, he luna hoʻolaukaʻi papa haʻawina; ʻo Shelby Ann Erdmann o ke Kula Kiʻekiʻe o Waimea, he kumu ʻōlelo Pelekane a he kumu hoʻonaʻauao haumāna kīnā; ʻo Jared Haiola o ke Kula Haʻahaʻa o Haleʻiwa, he kumu hoʻonaʻauao haumāna kīnā a he kumu STEM nō hoʻi; ʻo Michael Ida o ke Kula Kiʻekiʻe ʻo Kalani, he kumu makemakika a he kumu akeakamai lolo uila; ʻo Nuikala Koerte o ke Kula Haʻahaʻa o Waiʻanae, he kumu papa māla aʻo; ʻo Cerina Livaudais o ke Kula Hoʻāmana ʻo DreamHouse ma ʻEwa, he kumu ʻepekema a he kumu akeakamai lolo uila; ʻo Leeann Manuel o ke Kula Waena o ʻEwa Makai, he luna hoʻolaukaʻi papa haʻawina; ʻo Keevan Matsumoto o ke Kula Kiʻekiʻe o Kaimukī, he luna hoʻolaukaʻi lawelawe hana hoʻonaʻauao haumāna kīnā; ʻo Joel Matsunaga, he kumu hoʻomōhala haʻawina pilikino me olakino no nā kula o Honokaʻa, Kealakehe, Kohala a me Konawaena; ʻo Daphne Okunaga o ke Kula Kiʻekiʻe o Mānana, he kumu makemakika a he kumu ʻoihana; ʻo Kristi Taise, he kumu hana haʻawina o nā kula o Hilo a me Waiākea; ʻo Deanne Takeno o ke Kula Haʻahaʻa o Maunawili, he kumu aʻo hoʻoholomua; a ʻo Cherie Teraoka o ke Kula Waena o Āliamanu, he luna hoʻolaukaʻi papa haʻawina.

Eia mai kā kākou ʻōlelo noʻeau.

ʻAʻohe mea nāna e paʻi i ke poʻo.

ʻO ia hoʻi, ʻaʻohe kanaka i like kona maikaʻi a mākaukau paha ma kekahi hana.

08-10-22

E lilo mai ana he $78 miliona i ka mokuʻāina ʻo Hawaiʻi.


ʻO ia aʻela kekahi poʻo nūhou o kēia lā, ka lā 10 o ʻAukake, he Pōʻakolu. Welina e nā hoa makamaka. ʻO Ke Aolama kēia a penei ka nūhou.

Ma muli o kahi ʻaelike, e uku ana nā hui ʻo Johnson lāua ʻo Johnson, ʻo AmerisourceBergen, ʻo Cardinal Health a me McKesson he $26 biliona i nā mokuʻāina a pau. A e lilo mai ana he $78 miliona iā Hawaiʻi ma loko o nā makahiki he 18 e hiki mai ana. Ma nā makahiki mua he ʻeiwa, he $5.2 miliona kālā o ka makahiki, a ma hope aku, he $3.5 miliona o ka makahiki. Hōʻike aʻela ke Kiaʻāina David Ige, e hoʻokumu ʻia he kōmike kauleo nāna e noiʻi i nā mea e pono ai a e hōʻike i nā mea kūpono e hoʻolilo ai i ke kālā. ʻO ke kumu i hoʻopaʻi ʻia ai ia mau hui, ʻo ia kā lākou hana e hoʻohei ʻia ai nā kānaka he nui hewahewa i ka lāʻau hoʻomalule kino, ʻo ka ʻopioida hoʻi. Wahi a Ige, e hoʻokaʻawale ʻia ana he $66 no ka lapaʻau ʻia ʻana o nā kānaka i hei i ka ʻopioida a me ke pale ʻana aku i ka hei ʻopioida.

Ua māhuahua aʻela nā kākau inoa pū he ʻehiku pākeneka i ka makahiki 2021. A e ulu ana nō ka nui o nā kānaka mea pū ma nā makahiki he iwakālua i kaʻa hope aʻe nei. ʻO Hawaiʻi wale nō ka mokuʻāina o ʻAmelika Hui Pū ʻIa, e koi ana e kākau inoa ʻia nā pū a pau.

Hoʻi hou ana ʻo Marcus Mariota i ke kahua pāʻani, akā, me nā Palekona o ʻAtalana. ʻO Matt Ryan ka ʻalihikūlele o ʻAtalana, akā, i ka mahina ʻo Malaki, kuapo ʻia ʻo ia a aia ʻo ia ma Palakimoa i kēia manawa. A ma hope mai i pūlima ai ʻo Mariota i palapala ʻaelike ʻelua makahiki me nā Palekona. A wae nō hoʻi ʻo ʻAtalana iā Desmond Ridder ma ka puni ʻekolu o ka wae ʻana. He ʻalihikūlele ʻo Ridder no nā Benekala o Kinikinati ma mua. Akā, kohu mea lā, ʻo Mariota ana ka ʻalihikūlele mua.

Eia mai kā kākou ʻōlelo noʻeau,

He ʻale kua loloa no ka moana.

He ʻōlelo kēia no ke kanaka ikaika.

08-08-22

E mālama ʻia ana nā hālāwai hōʻike manaʻo no ka noiʻi hopena ʻāina o ka ʻOhe Nānā Kanakolu Mika.

ʻO ia aʻela kekahi poʻo nūhou o kēia lā, ka lā 8 o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma ke koho pāloka o ka lā 8 o Nowemapa, e nīnau ʻia ana ko Maui no ka pono a me ka pono ʻole paha o ka hoʻokumu ʻia ʻana iho o ke Keʻena Kumu Waiwai ʻŌiwi. He keʻena ia nāna e alakaʻi i ke kalana i mea e hoʻoholo pono ʻia ai ka hana e pili ana i nā inoa ʻāina, nā wahi pana, nā wahi kanu iwi kupuna a pēlā aku. Ke ʻāpono ʻia ma ia lā koho pāloka, e hoʻokumu ʻia ua keʻena lā ma ka lā mua o Iulai o ka makahiki 2024 a ma mua mai paha. A ʻo kekahi, e lawelawe ʻia ka hana ma ka ʻōlelo Hawaiʻi a me ka ʻōlelo haole. Na Keoni Kuoha, ka luna o ka Māhele Maui o ke Kahua Kaiāulu Hawaiʻi, i hāpai i ka manaʻo no ia nīnau pāloka.

I kēia pule, e mālama ʻia ana e ke Kahua ʻEpekema Aupuni he mau hālāwai e hōʻike ai ka lehulehu i ka manaʻo no nā ala ʻē aʻe a me nā hopena o nā mea e hoʻopuni ana, e noiʻi ʻia i ka wā e hana ai i ka hōʻike hopena ʻāina. ʻŌlelo aʻela ʻo Andre Perez, he aloha ʻāina, he nānā ʻole ke Kahua ʻEpekema Aupuni i ka manaʻo o ka hapanui loa o nā ʻŌiwi Hawaiʻi, ʻo ia hoʻi, ʻaʻole makemake i ka ʻOhe Nānā Kanakolu Mika. A wahi nō hoʻi a Perez, ʻaʻole maopopo iki i ke Kahua ʻEpekema Aupuni ka paʻa o ka manaʻo o nā kānaka Hawaiʻi no ke kūʻokoʻa. Akā, e ʻōlelo ana ʻo Richard Ha, nui nā kānaka, a me nā ʻŌiwi Hawaiʻi kekahi, e kākoʻo ana i ka ʻOhe Nānā Kanakolu Mika me ka lana o ka manaʻo, e nui nā pōmaikaʻi e loaʻa mai. Ua kākau ka Lunamakaʻāinana Kai Kahele i leka e koi ana i ke Kahua ʻEpekema Aupuni, e hoʻopaneʻe i ka noiʻi a paʻa ke Keʻena Lawelawe no ka pono o Mauna Kea i ka makahiki 2023.

Eia mai kā kākou ʻōlelo noʻeau,

Hoʻomaha ʻole ke kai a Mokupaoa.

He ʻōlelo kēia no ke kanaka e hana mau ana me ka hoʻomaha ʻole.

08-05-22

Māhuahua ana ka maʻi puʻu keko.

ʻO ia aʻela kekahi poʻo nūhou o kēia lā, ka lā 5 o ʻAukake, he Pōʻalima. Welina e nā makamaka. ʻO Ke Aolama kēia a penei ka nūhou.

He kanaka hou i loaʻa aku nei i ka maʻi puʻu keko ma Maui. A ʻo ka huina nui o nā kānaka o Hawaiʻi nei i loaʻa i ia maʻi, he ʻumi kūmālua. ʻO ka lā 3 o Iune ka manawa mua i ʻike ʻia ai ke kanaka i loaʻa i ka maʻi puʻu keko ma Hawaiʻi nei. He Oʻahu ʻo ia, a ua huakaʻi aku nō i kekahi wahi i ʻike ʻia ai ka maʻi puʻu keko. A ma Hawaiʻi nei, hoʻomaka ihola ke ʻō ʻia ʻana o ka lāʻau koʻokoʻo i ka lā 27 o Iulai. He mau kānaka helu wale nō i loaʻa i ua maʻi lā ma kēia pae ʻāina, akā, ma Pololika, Keokia, ʻIlinoe, a me Tekeka, he 500 a ʻoi. A ma Kaleponi, he 800 a ʻoi, a ma Nū Ioka, he 1,700 a ʻoi. ʻO ka nui o nā kānaka i loaʻa i ka maʻi puʻu keko ma ʻAmelika, he 7,100 a ʻoi.

Hōʻike aʻela ka ʻOihana Wai, he ʻaila ma kekahi luawai nānā ma ke Awāwa o Moanalua ma Oʻahu. He luawai nānā wale nō ia, a no laila, he maikaʻi ka wai ke inu. Ke kuhi ʻia nei, ma muli paha ia ʻaila o ke kulu ʻana mai kahi pahu ʻaila o ka ʻoihana moku ma Kapūkakī. ʻAʻole i noʻonoʻo mua ʻia, e kulu aku i laila, a no laila, i kēia manawa, he pono ke noiʻi i ke kahe ʻana o ka wai honua. Eia nō ka ʻOihana Wai ke hoʻokikina akula i ka ʻoihana moku e wikiwiki ma ka hoʻomaloʻo ʻana i nā pahu ʻaila ma Kapūkakī a me ke pani loa ʻana.

Emi loa ka lele piliʻāina ma ka Hui Mokulele ʻo Southwest. He $39 o ka lele ʻana. Hoʻomaka iho nei i ka lā 26 o Iulai, a pēlā ana nō a ka lā hope loa o Kēkēmapa.

Eia mai kā kākou ʻōlelo noʻeau,

Hāʻale i ka wai a ka manu.

He ʻōlelo no ke kanaka uʻi.