01-06-23

Luaʻi hou ana ka pele ma Halemaʻumaʻu.

ʻO ia aʻela kekahi poʻo nūhou o kēia lā, ka lā 6 o Ianuali, he Pōʻalima. Welina e nā makamaka. ʻO Ke Aolama kēia a penei ka nūhou.

Puoho hou aʻela ka pele ma Halemaʻumaʻu ma ka ʻauinalā Pōʻahā nei. ʻO ka hana pele ma loko wale nō o ka lua o Kīlauea, ʻaʻole i hū aʻe ma waho. Wahi a nā luna o ka Hale Kilo Lua Pele Hawaiʻi, i kēia manawa, ʻaʻohe kaiāulu a wahi kūkulu ʻia paha e pōʻino. Akā, koe aku ia.

Ma Kauaʻi, e hoʻāʻo ana kekahi kanaka no Pōlani e kōkua i kekahi mau kānaka ʻauʻau ʻelua i pilikia ma ke kai o Hanalei. Akā, hele ihola ua kanaka Pōlani lā a kūpilikiʻi nō hoʻi. Ua pae maila nā kānaka ʻelua i pilikia i uka, akā, ʻo ua kanaka Pōlani lā, ua pau ka ʻike, pau ka lohe. Na kekahi mau heʻe nalu ʻo ia i hoʻihoʻi mai i uka. E hoʻāʻo ana nā kānaka e hoʻohanu aku i ka Pōlani i kona pae ʻana mai i uka, a ma ka wā nō hoʻi e lawe ʻia ana i ka Haukapila ʻo Samuel Mahelona, ʻaʻole naʻe i hoʻi hou mai ka hanu. ʻO Janusz Jakubowicz ka inoa o ka Pōlani. A ua piha nā makahiki he kanaono kūmāhiku iā ia.

Aia nō ka mākaʻi o ka mokupuni ʻo Hawaiʻi ke noiʻi akula i ka make ʻana o kahi pēpē i kēlā Pōʻaono aku nei. He ʻelima wale nō mahina o ua kama iki lā. E lawe ana nā mākua i ua pēpē lā i ka Hale Kinai Ahi o Pāhoa i kōkua. A hui pū ihola nā mākaʻi me nā kānaka kinai ahi me ia ʻohana ma ke Alaloa 130. Lawe koke ʻia akula ka pēpē i ke Kikowaena Lapaʻau o Hilo ma ke kaʻa ulia kūhewa. Ma laila i kūkala ʻia ai kona make i ka ʻeono minuke i koe, kani ka hola ʻeono o ia kakahiaka Pōʻaono. I ke kālai ʻia ʻana o ke kupapaʻu, he mau ʻeha hoʻopōʻino ola ko ke keiki.

Eia mai kā kākou ʻōlelo noʻeau,

ʻAʻohe kolopā nāna e une.

He ʻōlelo kēia no ke kanaka poʻo paʻakikī.

01-04-23

E hoʻolewa ʻia ana ke Kamāliʻiwahine Kawananakoa ma ka Hale Aliʻi ʻo ʻIolani.

ʻO ia aʻela kekahi poʻo nūhou o kēia lā, ka lā 4 o ka mahina ʻo Ianuali, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.

Ua moe iho nei ke Kamāliʻiwahine Abigail Kinoiki Kekaulike Kawananakoa i ka moe kapu o Niolopua i ka lā ʻumi kūmākahi o ka mahina nei ʻo Kēkēmapa. E waiho ana kona kino kupapaʻu ma ʻIolani Hale i ka lā iwakālua kūmālua o kēia mahina nei ʻo Ianuali. A ma laila ana e mālama ʻia ai ke anaina hoʻolewa mai ka hola 2:00 o ka ʻauinalā a i ka hola 8:00. A ʻae ʻia nō ka lehulehu e hele a e ʻike. A ma Mauna ʻAla, e mālama ʻia ana kekahi anaina no ka poʻe wale nō e kono ʻia. A ma laila ana e kanu ʻia ai ʻo Kawananakoa.

Ua koho ʻia ka hui pōpō paʻipaʻi o ke Kulanui o Hawaiʻi, ʻo ia ka hui helu ʻekahi o ke ao nei. ʻO Hawaiʻi ka inoa moho ma nā makahiki ʻelua i kaʻa hope aku nei. Ma nā makahiki ʻehā i hala, ʻo ke kolu kēia o ka manawa i hoʻomaka ai ke kikina, ʻo Hawaiʻi ka helu ʻekahi. ʻO UCLA ka hui helu ʻelua. ʻO Ke Kaha Loa ka hui helu ʻekolu. ʻO Pena Mokuʻāina ka hui helu ʻehā. A ʻo Pepakine ka hui helu ʻelima.

Eia mai kā kākou ʻōlelo noʻeau,

Akāka wale nō ʻo Kaumaikaʻohu.

ʻO ia hoʻi, ua ahuwale.

12-14-22

@font-face {font-family:”Cambria Math”; panose-1:2 4 5 3 5 4 6 3 2 4; mso-font-charset:0; mso-generic-font-family:roman; mso-font-pitch:variable; mso-font-signature:-536870145 1107305727 0 0 415 0;}@font-face {font-family:Calibri; panose-1:2 15 5 2 2 2 4 3 2 4; mso-font-charset:0; mso-generic-font-family:swiss; mso-font-pitch:variable; mso-font-signature:-536859905 -1073732485 9 0 511 0;}@font-face {font-family:Times; panose-1:0 0 5 0 0 0 0 2 0 0; mso-font-charset:0; mso-generic-font-family:auto; mso-font-pitch:variable; mso-font-signature:-536870145 1342185562 0 0 415 0;}@font-face {font-family:”Times New Roman \(Body CS\)”; panose-1:2 2 6 3 5 4 5 2 3 4; mso-font-alt:”Times New Roman”; mso-font-charset:0; mso-generic-font-family:roman; mso-font-pitch:variable; mso-font-signature:-536859921 -1073711039 9 0 511 0;}p.MsoNormal, li.MsoNormal, div.MsoNormal {mso-style-unhide:no; mso-style-qformat:yes; mso-style-parent:””; margin:0in; margin-bottom:.0001pt; mso-pagination:widow-orphan; font-size:12.0pt; font-family:Times; mso-fareast-font-family:Calibri; mso-fareast-theme-font:minor-latin; mso-bidi-font-family:”Times New Roman \(Body CS\)”;}.MsoChpDefault {mso-style-type:export-only; mso-default-props:yes; font-family:Times; mso-ascii-font-family:Times; mso-fareast-font-family:Calibri; mso-fareast-theme-font:minor-latin; mso-hansi-font-family:Times; mso-bidi-font-family:”Times New Roman \(Body CS\)”;}div.WordSection1 {page:WordSection1;}

Hala akula kahi kamāliʻiwahine i ke ala hoʻi ʻole mai. ʻO ia aʻela kekahi poʻo nūhou o kēia lā, ka lā 14 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou. Moe ihola ke Kamāliʻiwahine Abigail Kinoiki Kekaulike Kawananakoa i ka moe kapu o Niolopua. I ka hola 6:45 o ke ahiahi Lāpule nei i lele aʻe ai kona aho hope loa ma kona hale ma Nuʻuanu. Aia nō kāna wahine me ia. He keiki ke Kamāliʻwahine Abigail na ke Kamāliʻiwahine Lydia Kamakaʻeha Liliuokalani Kawananakoa Morris lāua ʻo William Jeremiah Ellerbrock. Nui nā hana ke Kamāliʻiwahine Abigail e pōmaikaʻi ai nā Kānaka ʻŌiwi. A he kūʻē nō ʻo ia i ke kaʻa uila kau i ka lewa o Honolulu a me ke kūkulu ʻia ʻana o ka ʻOhe Nānā Kanakolu Mika ma Mauna Kea. I ka makahiki 2001, ua hoʻokumu ke Kamāliʻiwahine i waihona kālā no ka pono o ke Kanaka ʻŌiwi. Ua pau iho nei ka hū ʻana o ka pele o Mauna Loa a me Kīlauea. Pēlā ka ʻōlelo a nā kānaka ake akamai o ka Hale Kilo Lua Pele Hawaiʻi ma ka Pōʻalua nei. A i kēia manawa, e noiʻi ana nā mea ake akamai i ka pili o kekahi o ia mau lua pele i kekahi. Pūlima aku nei ka Pelekikena Joe Biden i ke kānāwai hou e hoʻomalu ʻia ai ka male ʻana o ke kāne me ke kāne, a pēlā hoʻi ka wahine me ka wahine. Ma mua, e hopohopo ana kekahi poʻe o hoʻololi ka ʻAha Hoʻokolokolo Kiʻekiʻe o ʻAmelika Hui Pū i ka ʻōlelo hoʻoholo ma ka hihia o Obergefell kūʻē Hodges o ka makahiki 2015, e ʻae ana i ia ʻano male ʻana. ʻO kekahi mea e hoʻomalu ʻia ana ma ke kānāwai hou, ʻo ia ka male ʻana o ke kanaka o kekahi lāhui me ke kanaka o kekahi lāhui. I ka makahiki 1967, hoʻopau akula ka ʻAha Hoʻokolokolo Kiʻekiʻe o ʻAmelika i nā kānāwai ma nā mokuʻāina he 16 e pāpā ana i ka male ʻana o ke kanaka o kekahi lāhui me ke kanaka o kekahi lāhui. Eia mai kā kākou ʻōlelo noʻeau, Aia i Kona, i Honalo. He ʻōlelo kēia no kekahi mea i nalowale.

12-12-22

Nui nā aloha ʻāina i kaʻi like no ka pono o ka ʻāina.

ʻO ia aʻela kekahi poʻo nūhou o kēia lā, ka lā 12 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Pōʻaono nei, ʻākoakoa iho nei nā kānaka he nui ma ka Pāka Kahakai ʻo Keʻehi a naue like akula i nā keʻena o ke Poʻo ʻŌnaehana Wilikī o ka ʻOihana Moku no ke koi ʻana e pani ʻia kahi hoʻāhu ʻaila o Kapūpakī a paʻa mau loa. E kaʻi like ana ua mau kānaka lā ma ke Ala Loa ʻo Nimitz. ʻO ka ʻOihana Wai o Honolulu a me ka Hui Sierra o Hawaiʻi kekahi i komo pū i loko o ia kūpaʻa ʻana ma hope o ka ʻāina.

Hāpai aku nei ka ʻAha Hoʻoponopono Wahi Lawaiʻa o ka Pākīpika Komohana i kānāwai hou no nā kai a puni ʻo Papahānaumokuākea. Ma ia kānāwai, e ʻae ʻia ana ka hana a ka poʻe kahiko o Hawaiʻi, ka lawaiʻa ʻana hoʻi, ma laila i mea e ola ai ke kanaka a me kona ʻohana. A ʻo kekahi mea i komo i loko o ia kānāwai, ke paʻa mai ka palapala ʻae, he hiki i ke kanaka ke kālepa a kūʻai aku paha i ka iʻa i loaʻa mai ma ia huakaʻi lawaiʻa i mea e hoʻokaʻa ai i nā lilo o ia huakaʻi. A ʻo ka palena, he $15,000 o ka huakaʻi. Kūʻē ana kekahi poʻe me ka ʻōlelo ʻana, ʻaʻole i hele nā kānaka o ke au kahiko i ia mau kai no ka lawaiʻa ʻana.

Ua kū ka mana o ka pele e holo ana no ke Ala Loa ʻo Daniel K. Inouye, he 1.9 mile mai ke ala loa aku. A pau ihola ka puaʻi ʻana o ka pele ma ia mana. ʻO ka mea ʻāpiki, ʻaʻole maopopo ke kahe hou a me ka ʻole paha ma kēia hope aku. A i kēia manawa, ke ʻimi akula ke aupuni i ala e holo ai nā kaʻa inā kahe ʻia ke ala loa e moe aʻela e ka pele. Inā pani ʻia ke Ala Loa ʻo Inouye, ʻo ke ala e holo ai nā kaʻa ma waena o Hilo a me Kona, ʻo ia ke ala e moe ana a puni ua mokupuni lā, ʻo ke Ala Hoʻopuni Hawaiʻi. Inā pēlā, e lōʻihi aku ana ka holo ʻana, a e kūpilikiʻi auaneʻi nā hale kūʻai a me nā kānaka e holo ana ma waena o ia mau wahi.

Eia mai kā kākou ʻōlelo noʻeau,

Aʻeaʻe mōhala i luna o ke kukui.

He ʻōlelo kēia no ke kanaka i hele a poʻohina.

12-09-22

Kau aʻe nei ʻo Clarissa Moore i ka hano hāweo.

ʻO ia aʻela kekahi poʻo nūhou o kēia lā, ka lā 9 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka Pōʻalua nei, ʻakahi nō a hoʻouna aku ke Keʻena ʻĀina Hoʻopulapula Hawaiʻi i ka ʻAha ʻŌlelo i ka hana i hoʻolālā ʻia e hoʻolilo ʻia aku ai nā kālā he 600,000,000 i hoʻokaʻawale ʻia no ka lawelawe ʻana i ka hana e pono ai ka loaʻa ʻana o kahi noho i nā Kānaka ʻŌiwi. ʻO ia hana i hoʻouna ʻia iho nei, ua ʻane like me ka hana i hoʻolālā ʻē ʻia a kākoʻo ʻia e ke Komikina ʻĀina Hoʻopulapula Hawaʻi ma ʻAukake. Eia naʻe, hoʻohalahala ʻia e kekahi mau hui e kū ana no ka pono o nā kānaka ʻāina hoʻopulapula Hawaiʻi o kēia wā a o kēia hope aku kekahi. Ua hoʻolālā nō hoʻi ia mau hui i ka hana i manaʻo ʻia he pono a hoʻouna ʻia i ka ʻAha ʻŌlelo a me ke Kiaʻāina Josh Green i poni ʻia iho nei. ʻO kekahi manaʻo o ia mau hui, me kahi hapanui o ia puʻu kālā, $345,000,000, e kūʻai ʻia mai he mau ʻāpana ʻāina a he mau hale paha e kū nei no nā mea hoʻokahu ʻia.

Hoʻopiʻi ʻia aku nei ʻo William Michael Bell no ka hewa pepehi kanaka ma ke kekelē ʻelua. Manaʻo ʻia, ʻo Bell ka mea nāna i hou aku iā Mike Chu i ka Pōʻalua nei ma Kāneʻohe. Ke hoʻāhewa ʻia ke kanaka no ka hewa pepehi kanaka ma ke kekelē ʻelua, ʻo ka hoʻopaʻi, ʻo ia ka noho paʻahao a pau kona ola me ka hiki ke palola ʻia. ʻO Chu, he kanahiku kūmāhiku ona makahiki, he ʻelua āna keiki i kanaka makua, a e hānau mai ana kāna moʻopuna mua i loko o nā pule pōkole e hiki mai ana.

Lilo aku nei ka Makana ʻo AAU James E. Sullivan iā Carissa Moore. ʻO ka makamua ia o ka lilo ʻana o ia makana i ke Kanaka ʻŌiwi a i ka heʻe nalu nō hoʻi. He makana ia e lilo i ka ʻālapa kulanui a i ka ʻālapa ʻOlimepika paha. ʻO kekahi mau moho o kēia makahiki nei, ʻo Jocelyn Alo, he mea pāʻani pōpō hili; ʻo Jordan Burroughs, he mea hākōkō; ʻo Ivan Melendez, he mea pāʻani pōpō hili; a me Bryce Young, he mea pāʻani pōpō peku. ʻO kekahi mau kānaka i lilo ai ua makana lā, ʻo ia ʻo Bobby Jones, ʻo Wilma Rudolph, ʻo Carl Lewis, ʻo Mark Spitz, ʻo Jackie Joyner Kersee, ʻo Peyton Manning, ʻo Michael Phelps a me Michelle Kwan.

Eia mai kā kākou ʻōlelo noʻeau,

Puhi niho wakawaka.

He ʻōlelo kēia no ke koa wiwoʻole a kānaioa.

12-07-22

Kōkua ana ke Koa Kiaʻi Lāhui ma ka Moku o Keawe.

ʻO ia aʻela kekahi poʻo nūhou o kēia lā, ka lā 7 o Kēkēmapa, he Pōʻakolu. Welina e nā makamaka. ʻO Ke Aolama kēia a penei ka nūhou.

No ka nui o nā kānaka e mākaʻikaʻi aku ana i ka luaʻi ʻana o ka pele o Mauna Loa, kūkala aʻe nei ka Meia Mitch Roth o ke Kalana ʻo Hawaiʻi i kēlā pule aku nei i ka hemo ʻana o ke Alanui Saddle kahiko i mea e emi ai ka nui o nā kaʻa ma ke Alaloa ʻo Daniel K. Inouye. A i ka Pōʻalua nei, hiki akula he 20 mau koa o ka Pūʻalikoa Kiaʻi Lāhui o Hawaiʻi i laila no ka hoʻomalu ʻana. ʻO ka manawa hana o ia mau koa, he ʻumi kūmālua hola ka lōʻihi, a e kōkua ana ma ka hoʻoholo ʻana i nā kaʻa ma nā ala kūpono a me ke komo ʻole ʻana i nā wahi i pāpā ʻia.

Ua loaʻa mai nei ka lua ʻakēʻakē ma ka Pāka Lua Pele o Hawaiʻi he mau mahina aku nei ma muli o kahi ʻīlio hoʻokolo manu. A ʻike ʻia nō ka ʻakēʻakē keiki ma ia lua. A ʻakahi nō ʻo ia a puka mai mai loko mai o ka lua hoʻokahi mahina ma mua o ka puoho ʻana o ka pele o Mauna Loa i ka lā 27 o Nowemapa. He manu kai ka ʻakēʻakē, a ʻo ia ka manu kai liʻiliʻi loa a kakaʻikahi loa nāna e hoʻopiʻi ma Hawaiʻi nei. A he manu ʻane nalowale loa ia. ʻO ka pūnana ʻakēʻakē mua ia i hōʻoia ʻia ma ua pāka lua pele lā. Na Charlotte Forbes Perry i ʻike mua aku i ia ʻakēʻakē keiki. He mea kālaimeaola ʻo Forbes Perry no ka Māhele ʻIke Hoʻolaulima Pākīpika o ke Kulanui o Hawaiʻi. A he palapala kāna me kona hui e ʻae ana i ka noiʻi ʻana i ka manu kai ma ka pāka lua pele.

Eia mai kā kākou ʻōlelo noʻeau,

Hoʻokuʻi a kole ka lae.

He ʻōlelo kēia no ke kanaka i kū i ka pilikia.

12-05-22

@font-face {font-family:”Cambria Math”; panose-1:2 4 5 3 5 4 6 3 2 4; mso-font-charset:0; mso-generic-font-family:roman; mso-font-pitch:variable; mso-font-signature:-536870145 1107305727 0 0 415 0;}@font-face {font-family:Calibri; panose-1:2 15 5 2 2 2 4 3 2 4; mso-font-charset:0; mso-generic-font-family:swiss; mso-font-pitch:variable; mso-font-signature:-536859905 -1073732485 9 0 511 0;}@font-face {font-family:Times; panose-1:0 0 5 0 0 0 0 2 0 0; mso-font-charset:0; mso-generic-font-family:auto; mso-font-pitch:variable; mso-font-signature:-536870145 1342185562 0 0 415 0;}@font-face {font-family:”Times New Roman \(Body CS\)”; panose-1:2 2 6 3 5 4 5 2 3 4; mso-font-alt:”Times New Roman”; mso-font-charset:0; mso-generic-font-family:roman; mso-font-pitch:variable; mso-font-signature:-536859921 -1073711039 9 0 511 0;}p.MsoNormal, li.MsoNormal, div.MsoNormal {mso-style-unhide:no; mso-style-qformat:yes; mso-style-parent:””; margin:0in; margin-bottom:.0001pt; mso-pagination:widow-orphan; font-size:12.0pt; font-family:Times; mso-fareast-font-family:Calibri; mso-fareast-theme-font:minor-latin; mso-bidi-font-family:”Times New Roman \(Body CS\)”;}.MsoChpDefault {mso-style-type:export-only; mso-default-props:yes; font-family:Times; mso-ascii-font-family:Times; mso-fareast-font-family:Calibri; mso-fareast-theme-font:minor-latin; mso-hansi-font-family:Times; mso-bidi-font-family:”Times New Roman \(Body CS\)”;}div.WordSection1 {page:WordSection1;}

Ua hāʻule nā Wāhine Ānuenue ma ka puni mua o ka hoʻokūkū inoa moho. ʻO ia aʻela kekahi poʻo nūhou o kēia lā, ka lā 5 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou. Kūkala ʻia aʻela nā huina a pau o Oʻahu nei e kūkulu ʻia ai ka pahu paʻi kiʻi i mea e paʻi kiʻi ʻia ai ke kaʻa ke holo hewa ma ke kukui ʻulaʻula. Ma ka māhele mua o ia polokalamu, kūkulu ʻia kekahi pahu paʻi kiʻi ma ka huina o ke Alanui Vīnia a me ke Alanui Pālama, a ʻo kekahi pahu paʻi kiʻi, ma ka huina o nā Alanui ʻo Vīnia a me Liliha. Ma ka māhele ʻelua, ʻekolu hou huina alanui, ʻo ka huina o nā Alanui Vīnia a me Nuʻuanu; ka huina o ke Alaloa Pali; a me ka huina o ke Alaloa Pali a me ke Alanui ʻo Kula. Ma ka māhele ʻekolu, he ʻelima hou huina alanui, ʻo ka huina o ke Alaloa ʻo Likelike a me ke Alanui ʻo Kula; ke Alanui Mōʻī a me ke Alanui ʻo Ward; ke Alanui ʻo Kapiʻolani a me ke Alanui ʻo Kamakeʻe; ʻo ke Alanui ʻo Pelekania a me ke Alanui ʻo Piʻikoi; a me ka Alanui ʻo Makalē a me ke Alanui ʻo Albaroba. ʻO ka hoʻopaʻi mua, ke holo aku ke kaʻa i ke kukui ʻulaʻula, he $200 a emi mai. Pau iho nei ke kikina pōpō paʻipaʻi o nā Wāhine Ānuenue ma ka puni mua. E kūʻē ana ʻo Hawaiʻi iā Luisiana Mokuʻāina. A na nā Wāhine Ānuenue ka pāʻani mua, akā, na nā Kika nā pāʻani ʻekolu ma ia hope mai. A ʻo nā Kika ke holo mua ana i ka puni ʻelua. He ʻumi kūmāono hoʻopio a Sanaa Dotson o Luisiana. A he ʻumi kūmāhā paku a nā Kika. A ma ka ʻaoʻao o Hawaiʻi, he iwakālua hoʻopio a Riley Wagoner. A he ʻumi kūmāono hoʻopio a Amber Igiede. Akā, ʻo kahi pilikia o Hawaiʻi, he kanakolu kūmālua hemahema. Eia mai kā kākou ʻōlelo noʻeau, ʻOhuʻohu Halemano i ka lau lehua. He ʻōlelo kēia no ke kanaka nohea.

12-02-22

Moe aku nei i ka moe kapu o Niolopua kekahi kanaka i aloha i ka ʻāina a me kona lāhui.

ʻO ia aʻela kekahi poʻo nūhou o kēia lā, ka lā 2 o Kēkēmapa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hele akula ʻo Noa Emmett Aluli i ke ala ʻula a Kanaloa. ʻO ia nei kekahi o nā kiaʻi mua e kūpaʻa ana i mea e pau ai ka hoʻopahū ʻia ʻana o Kahoʻolawe. ʻŌlelo mai nei ʻo Walter Ritte, he hoa kiaʻi no Aluli, he nui kona aloha i ka ʻāina a me ke kai a he nui nō hoʻi kona aloha i ke kanaka. Ua hānau ʻo Aluli ma Oʻahu, akā, ma hope o kona lilo i kauka i ka makahiki 1975, neʻe akula i Molokaʻi no ka hana ʻana ma ke ʻano he kauka. ʻO Aluli kekahi o ka papa mua o ke Kula Lapaʻau ʻo John A. Burns o ke Kulanui o Hawaiʻi. A ma Molokaʻi ʻo ia i pene ai. Nui nā hana a Aluli no ka pono o ka Lāhui Hawaiʻi. Ua hoʻokumu lāua ʻo Ritte i ka Hui Alaloa nāna i kūpaʻa no ka pono o nā lawaiʻa a me nā kānaka hahai holoholona o Molokaʻi. ʻO Aluli nō hoʻi kekahi o nā mea i hoʻokumu iā Protect Kahoʻolawe ʻOhana. Ua haʻalele mai ʻo Aluli i hope nei i kāna wahine iā Kauka Davianna McGregor; i kā lāua kaikamahine iā Rosie Alegado Kong; i kā lāua hūnōna iā Raymond Kong; i nā moʻopuna iā Justice lāua ʻo Cassius; a me ka ʻohana Aluli-McGregor.

I ka lā i nehinei, ua lawe ʻia mai nei kekahi ʻelemakule mai Reno mai a i Honolulu nei a hopu ʻia iho nei ma muli o kona hoʻopiʻi ʻia ʻana aku no ka pepehi kanaka ʻana i kekahi wahine ma Waikīkī i ka lā 7 o Ianuali o ka makahiki 1972. ʻO Tudor Chirila ʻŌpio kona inoa, a he 77 ona makahiki. Ua hoʻopiʻi ʻia ihola ʻo ia i ka lā 12 o Kepakemapa no ka pepehi kanaka ma ka ʻAha Hoʻokolokolo ʻĀpana o Honolulu. A i ka lā 13 o Kepakemapa, hopu ʻia aku nei e ka mākaʻi o Reno. Ma hope mai, hoʻopiʻi aku nei ke kiule nui o Oʻahu iā Chirila no ka hewa pepehi kanaka kekelē ʻelua i ka lā 23 o Kepakemapa. He 26 makahiki o Chirila i kona wā i hoʻomake ai Nancy Elaine Anderson.

Eia mai kā kākou ʻōlelo noʻeau,

ʻEliʻeli kūlana o ʻĀinaʻike.

He ʻōlelo kēia no ke kanaka i mahalo ʻia kona ʻike kūliʻu.

11-30-22

He pilikia hou ma ke kahua o ka ʻOihana Moku ma Kapūkakī.

ʻO ia aʻela kekahi poʻo nūhou o kēia lā, ka lā 30 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I ke awakea o ka Pōʻalua nei, ua hanini aʻe nei he 1,100 kālani huʻa kinai ahi ma kahi hoʻāhu ʻaila o ka ʻOihana Moku ma Kapūkakī. He ʻawahia nō ia huʻa kinai ahi. A he kemika ko loko i kapa ʻia he kemika mau loa no ka ʻūlōlohi loa o kona emi ʻana a nalo. A ʻo kekahi pilikia, he mea ia kemika e nui ai ka hiki ke loaʻa o ke kanaka i ka maʻi ʻaʻai ma ka hakuʻala a me ka hua. A he mea nō hoʻi ia kemika e nui aʻe ai ke koko piʻi ma nā wāhine e kōkō ana i ke keiki, a me kekahi mau pilikia ola kino ʻē aʻe. Ma kahi o ka hola 1:00 o ke awakea i hanini ai ka huʻa, akā, he ʻelua hola ma hope mai ka wā i hoʻomaopopo ʻia ai ke Keʻena Ola o ke aupuni mokuʻāina. A i ka wā i hiki aku ai ka luna o ia keʻena ma ia hope mai, ʻaʻole nō i pau ka hanini ʻana i ke kāohi ʻia.

Ua heluhelu mua ʻia aku nei ka Pila 57 o ka ʻAha Kūkā o Honolulu. ʻO ia ka pila e hōʻike ana i nā wahi e hiki ʻole ai ke lawe ʻia aku ka pū e ke kanaka nona ka laikini hāpai pū. Ua ʻāpono ʻia nō ia heluhelu mua ʻana e ka ʻAha Kūkā, he ʻeono luna i kākoʻo, a ʻelua i kūʻē, ʻo ia ka Luna ʻAha Kūkā Augie Tulba lāua ʻo Andria Tupola. A ʻo ka Luna ʻAha Kūkā Heidi Tsuneyoshi, ʻaʻole ʻo ia ma ka wā koho. Akā, he nui loa nō nā kānaka i kūʻē. He 372 mau palapala hōʻike i waiho ʻia i mua o ka ʻAha Kūkā, he 287 o ia mau palapala, e kūʻē ana i ka pila. A he 85 e kākoʻo ana. Ma ka Pila 57, ʻo nā wahi i pāpā ʻia ai ka lawe hūnā ʻana i ka pū, ʻo ke kula, ʻo ke kaʻa halihali kanaka o ka lehulehu, a me nā wahi koho pāloka. A pēlā pū me kēia mau wahi, ʻo ke Kai Kūʻono ʻo Hanauma, ʻo ke Kikowaena Kaunānā Keiki o Hawaiʻi, ka Hale Hōʻikeʻike Iʻa o Honolulu a me ke Kahua Hōʻikeʻike Holoholona Laka ʻOle. A ʻo kekahi, ʻaʻole hiki ke hele a kokoke i ka hui nona nā kānaka he 25 a ʻoi i ʻākoakoa no ka hana e pono ai nā pono kīwila o ke kanaka, ʻo ia hoʻi, he pono ke kū he 100 kapuaʻi a ʻoi mai nā kānaka aku o ka lihi palena o ia ʻākoakoa ʻana.

Eia mai kā kākou ʻōlelo noʻeau,

Nāpelepele nā pali o Kalalau i ka wili a ka makani.

ʻO ia hoʻi, ua piula loa ihola.

11-28-22

Hū ana ka pele o Mauna Loa.

ʻO ia aʻela kekahi poʻo nūhou o kēia lā, ka lā 28 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hoʻomaka iho nei ka luaʻi ʻana o ka pele o Mauna Loa. ʻO ke kahe ʻana o ka pele, ma ka piko wale nō o ka lua kīlauea o Mauna Loa i kēia manawa. Kūkala aku nei ka Meia Mitch Roth o ka mokupuni ʻo Hawaiʻi i ka pilikia kūhewa, akā, i ka hola 7:00 o ke kakahiaka nei, ʻaʻole wahi mea a hoʻohaʻalele ʻia o nā kānaka. Aia nō nā luna aupuni ke noiʻi aku nei inā e luaʻi ka pele ma kekahi kāʻei māwae, ʻoiai, inā ma kekahi kāʻei māwae ka luaʻi ʻana, e kahe wikiwiki paha ka pele no lalo o ka mauna. Ua wehe ʻia kahi hoʻomalu ma Pāhala a me Kona.

Hahana nō ka pāʻani pōpō paʻipaʻi ʻana o Hawaiʻi me Kāna Palapala i ka Pōʻalima nei. A lanakila aku nei nā Wāhine Ānuenue ma luna o Kāna Palapala ma loko o nā pāʻani ʻelima. A ma muli o ia lanakila, lilo aku nei ka inoa moho o ka ʻAhahui Komohana Nui iā Hawaiʻi me ke komo wale aku i loko o ka Hoʻokūkū Inoa Moho o ka ʻAhahui ʻĀlapa o nā Kulanui o ʻAmelika. A i ka Pōʻaono nei, lanakila ʻo Hawaiʻi ma luna o Cal State Northridge ma loko o nā pāʻani ʻekolu.

A i ka Lāpule nei, koho ʻia ka hoa paio o Hawaiʻi ma ka puni mua o ka Hoʻokūkū Inoa Moho. ʻO ia ke Kulanui o Luisiana Mokuʻāina. A ʻo Baton Rouge, ʻo ia ka ʻāina o Amber Igiede o nā Wāhine Ānuenue. I ka Pōʻalima e hui pū ai ia mau kulanui ma ke kahua pāʻani. Aia ana ma Kanapola i Kaleponi.

Ma ka pāʻani pōpō peku, eo iho nei ʻo Hawaiʻi iā Chevan Cordeiro a me Kāna Jose Mokuʻāina ma ka helu ʻai he 27 i ka 14. ʻO Cordeiro, he ʻalihi kūlele ʻo ia no Hawaiʻi ma mua, akā, haʻalele mai nei ʻo ia i ke Kulanui o Hawaiʻi i ka hopena o ke kikina o ka makahiki 2021 a hele aku nei i Kāna Jose no ka pāʻani ʻana.

Eia mai kā kākou ʻōlelo noʻeau,

I hea nō ka lima a ʻau mai?

ʻO ia hoʻi, mai namunamu, e hoʻohana i nā lima a me nā wāwae i mea e kō ai ka hana.