10-10-22

Pehea lā e pau ai ka luku wale ʻia o nā pāka o Oʻahu nei?

ʻO ia aʻela kekahi poʻo nūhou o kēia lā, ka lā 10 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua māhuahua aʻela ka luku wale ʻia ʻana iho o nā pāka o Oʻahu nei. I kēia makahiki nei, hoʻolilo ʻia aku nei he $339,393 no ka hoʻoponopono ʻana, ka hoʻomaʻemaʻe ʻana a me ia hana aku, ia hana aku ma muli o ka luku wale ʻana. Manaʻo ihola ka Luna ʻAha Kūkā Augie Tulba, ka luna hoʻomalu o ke Kōmike Lawelawe Kaiāulu a Pāka, e hoʻonui ʻia nā hana like ʻole ma nā pāka, nā hana hoʻi e lana ai ka manaʻo o ka lehulehu, a ʻo ia ka mea e emi ai ka luku wale ʻana. Wahi a Nate Serota, ka waha ʻōlelo o ke Keʻena o nā Pāka a me nā Hana Hoʻonanea, he pono ke kōkua o ke kaiāulu ma ka makaʻala ʻana i nā pāka o kākou. No kākou a pau ia mau wahi, a ke pani ʻia aku kekahi ma muli o ka hoʻopōʻino ʻia, e hoka kākou a pau. ʻO kekahi mau hui i komo i ka hana, ʻo ia ʻo APB Skateshop lāua me ka Panakō American Savings. Na ia mau hui e mālama nei i ka Pāka ʻo ʻAʻala. ʻO ka mea nona ʻo APB Skateshop, ʻo Chad Hiyakumoto, ua hoʻomaka i ka makahiki 2002. Ua hele ʻo ia a ʻaikena i ke kahakaha kolohe ʻia o ka pāka holo papa huila a no laila, pena akula ʻo ia a uhi ʻia iho nā kahakaha. A pēlā hoʻi ma nā lumi hoʻopau pilikia o laila. I ka makahiki 2015, hoʻomaka akula ka Panakō American Savings i ka hoʻomaʻemaʻe ʻana i ia pāka. A mai ka makahiki 2019, mālama ʻia nā papa like ʻole ma laila, ʻo ka papa hoʻoikaika kino, ka papa hoʻomaʻamaʻa ʻīlio, a me ka papa aʻo hana ʻālapa. A hui pū aku nei me APB Skateshop no ka mālama papa holo papa huila kekahi.

Mai lanakila ʻo Hawaiʻi ma luna o Kāna Kieko Mokuʻāina i ka Pōʻaono nei. Ma hope o ka ʻai holo a Dedrick Parson, e ʻoi ana nā Koa Ānuenue ma ka helu ʻai he 14 i ka 13, a he hoʻokahi minuke koe me nā kekona he 19. Akā, hiu aʻela ʻo Kāna Kieko. He ʻehiku wale nō kekona i koe, a loaʻa ka ʻai peku, a hāʻule ihola ʻo Hawaiʻi ma ka helu ʻai he 16 i ka 14.

Eia mai kā kākou ʻōlelo noʻeau,

Aia nō ke ea i ka puka ihu.

He pane kolohe kēia ke nīnau mai kekahi, pehea kekahi hoa aloha a ʻohana paha.

10-07-22

E luaʻi hou paha ka pele o Mauna Loa.

ʻO ia aʻela kekahi poʻo nūhou o kēia lā, ka lā 7 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

ʻAʻole i luaʻi pele ʻo Mauna Loa no nā makahiki he 38. Akā, e hū hou auaneʻi ka pele ma kēia hope aku. Pēlā ka manaʻo o Ken Hon, ka luna o nā kānaka akeakamai o ka Hale Kilo Hōkū o ka Lua Pele. ʻO ke kumu o kona manaʻo ʻana pēlā, ʻo ia ka nui o nā ōlaʻi ma laila a me ka pehu ʻana o ka honua. I ka mahina ʻo Iune, ʻo ka nui o nā ōlaʻi o ka lā, mai ka ʻelima a ka ʻumi. A ma Iulai a me ʻAukake, māhuahua iki aʻe,mai ka ʻumi a ka iwakālua. A ma kekahi mau lā ʻelua o ka hopena o Kepakemapa, māhuahua loa aʻela, he 100 mau ōlaʻi a ʻoi. A mai ia manawa mai, e nei ana ke ōlaʻi, he 40 a ke 50 paha manawa o ka lā. Ma mua o ka makahiki 1950, ua luaʻi ka pele o Mauna Loa i kēlā me kēia makahiki ʻelima a ʻeono paha. Akā, ma hope mai o ka makahiki 1950, he ʻelua wale nō manawa i luaʻi pele ai. A ʻo ka manawa hope loa i luaʻi ai ka pele o Mauna Loa, aia i ka makahiki 1984. ʻO kekahi pilikia, ke luaʻi ka pele o Mauna Loa, he kahe wikiwiki loa.

Kūkala aʻe nei ka Pelekikena Joe Biden i ka Pōʻahā nei, e huikala ana ʻo ia i nā hewa pekelala no ka loaʻa liʻiliʻi o ka pakalōlō. A noi mai nei ʻo Biden i nā kiaʻāina e hana like i nā hewa mokuʻāina no ka loaʻa liʻiliʻi o ka pakalōlō. A ʻōlelo mai ka waha ʻōlelo o ke kiaʻāina, ʻo Cindy McMillan, kākoʻo ʻo Ige i ka hana e like ai nā kānāwai pekelala a me nā kānāwai mokuʻāina ma kēia nīnaau, a aia nō ʻo Ige ke nānā aku nei i ke noi a ka pelekikena i mea e ʻike ai i ke kūlike me ke kānāwai mokuʻāina me ke kūlike ʻole paha, a inā kū i ka pono o nā kānaka o Hawaiʻi nei a kū ʻole paha.

Eia mai kā kākou ‘ōlelo noʻeau,

ʻĀhaʻi akula i ka welowelo.

He ʻōlelo kēia no ka lanakila ʻana. A he ʻōlelo nō hoʻi no ke kanaka i heo akula.

10-05-22

E hiki koke mai ana ka Pule ʻIo.k

ʻO ia aʻela kekahi poʻo nūhou o kēia lā, ka lā 5 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

I kēia Lāpule e hiki mai ana, ka lā ʻeiwa hoʻi o ʻOkakopa, e hoʻomaka ana ka “Pule ʻIo,” i mea e nui ai ka hoʻomaopopo ʻana i ia mea ʻo ka ʻio ʻōiwi o Hawaiʻi nei. E mālama ʻia ana nā haʻi ʻōlelo a me nā hōʻikeʻike i mea e maopopo loa ai ka waiwai o ka ʻio. Aia ka ʻike no ia mau hana ma www.birdfesthawaii.org. Ma muli o ka ʻeha pinepine o kekahi ʻio i hoʻokumu ʻia ai ka Pule ʻIo. Ua kapa ʻia ka inoa o ua ʻio lā ʻo Makaʻio. He ʻekolu ona makahiki a i kēia manawa, noho ʻo ia ma ke Kikowaena Holoholona Laka ʻOle o Hawaiʻi ma Kohala ʻĀkau ma lalo o ka malu o ke kauka holoholona, ʻo Kauka Juan Guerra a me kona hui. ʻElua pilikia nui o Makaʻio, ʻo ka ʻeha o kona maka, a me ka ʻeha o kona ʻēheu. Ua ola ka ʻēheu, akā, ʻaʻohe ʻike o kona maka ʻākau. A ʻoiai he manu poʻi ka ʻio, inā ʻaʻole hiki i ka ʻio ke ʻike me nā maka ʻelua, e pilikia auaneʻi ʻo ia ke noho ma waho o kahi hoʻomalu ʻia.

Aia nō ke māhuahua aʻela ka pilikia o ke Keʻena Kinai Ahi o Honolulu i ka mokulele pailaka ʻole. I ka wā e lele ai ka mokulele pinao o ke Keʻena Kinai Ahi o Honolulu, a ʻike ʻia ka mokulele pailaka ʻole ma kahi e kokoke ana, he pono ke lele ka mokulele pinao ma kahi palekana a kuʻu iho. A aia wale nō a haʻalele ka mokulele pailaka ʻole, a laila, e lele hou ka mokulele pinao. ʻO ka mea hoʻolele i ka mokulele pailaka ʻole, inā e hoʻolele ʻo ia i ka mokulele pailaka ʻole ma kahi pāpā ʻia, he hiki nō ke hoʻopaʻi ʻia ʻo ia he $37,000 a emi mai.

Eia mai kā kākou ʻōlelo noʻeau,

Aia i Kona i Honalo.

ʻŌlelo ʻia kēia, ke nalowale kekahi mea, e hōʻike ana, ua nalo ia mea, a ʻaʻole paha e loaʻa hou.

10-03-22

ʻIke ʻia aku nei ka haunaele ʻino ma kekahi hoʻokūkū pōpō wāwae.

ʻO ia aʻela kekahi poʻo nūhou o kēia lā, ka lā 3 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Lāpule nei, mālama ʻia iho nei ka hana keaka hope loa o ka Hale Hana Keaka ʻo Ruger. Ua kūkulu ʻia aku ua hale hana keaka lā i ka makahiki 1932 i hale kiʻi ʻoniʻoni no nā koa ʻAmelika a me nā ʻohana o lākou e noho ana ma ka Pāpū ʻo Ruger. A i ka makahiki 1952, ua lilo ua hale lā, ʻo ia kahi o ka hui ʻo Honolulu Community Theatre. A loli ka inoa o ia hui i ka makahiki 1990, a ʻo ka inoa hou, ʻo Diamond Head Theatre. E wāwahi ʻia ana ka Hale Hana Keaka ʻo Ruger i kēia mahina aku. A ma kahi e pili ana i ia wahi, e kūkulu ʻia ana kahi hale hana keaka hou, a ma laila e mālama ʻia ai nā hana keaka ma kēia hope aku. ʻO ka hana keaka mua, aia ana i ka lā 20 o Ianuali o kēia makahiki aʻe.

Ua ala aʻela ka haunaele ma hope o kekahi hoʻokūkū pōpō wāwae i ka pō Pōʻaono nei ma Malang i ʻInidonesia. Ma hope o ka hoʻokūkū, e hakakā ana kekahi mau kānaka, a no laila, kī akula ka mākaʻi i ke ea hoʻokulu wai, a ʻo ia ka mea i uluāoʻa ai kānaka. A make ihola nā kānaka he 125 a ʻoi, a e piʻi aʻe paha ia helu. I ka Lāpule nei, ma nā hoʻokūkū pōpō wāwae a puni ka honua, mālama ʻia iho nei hoʻokahi minuke o ka hāmau maluhia i mea hoʻomanaʻo i nā kānaka i make ma ia ulia mānaʻonaʻo.

Ua kaiehu ʻia aku nei ke kanaka i nānā aku nei i ka pono a me ka pono ʻole paha o ke ola o ke kino a me ka noʻonoʻo o Tua Tagovailoa ma hope o kona haʻalele ʻana i ke kahua me ka hili kau ʻana o kona wāwae i ka Lāpule i kūʻē aku ai ʻo Miami iā Buffalo. Na ka ʻAhahui o nā Mea Pāʻani o ke Kuʻikahi Pōpō Peku Aupuni i kaiehu aku. Ua ʻae aku nō ua kanaka lā, e komo hou ʻo Tagovailoa i ka hoʻokūkū ma ia Lāpule. A ma kēlā Pōʻahā aku nei, pilikia loa ihola ʻo Tagovailoa i kona hoʻohina ʻia e Josh Tupou.

Eia mai kā kākou ʻōlelo noʻeau,

Ke ʻehuʻehu nei nā ʻale.

He ʻōlelo kēia no ke kanaka e hele ana a huhū.

09-30-22

ʻEha ihola ke poʻo o Tua Tagovailoa ma ka hoʻokūkū pōpō peku o ka pō Pōʻahā nei.

ʻO ia aʻela kekahi poʻo nūhou o kēia lā, ka lā 30 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

He holoholona hou ko ke kahua hōʻikeʻike holoholona laka ʻole o Honolulu nei. He laehaokela ʻeleʻele hikina. ʻO Aria kona inoa, a he ʻewalu ona makahiki. Ua hānau ʻo ia ma Pololika, a e noho ana ma ka Pāka Safari o ke kahua hōʻikeʻike holoholona laka ʻole o Kāna Kieko. Aia ka laehaokela ʻeleʻele hikina ma ka papa helu o nā holoholona ʻane nalowale loa ma muli o ka hahai holoholona ʻia ʻana i kū ʻole i ke kānāwai. I ka makahiki 2010, he 800 wale nō laehaokela ʻeleʻele hikina a i kēia manawa, he 5,500 a ʻoi aku a emi mai.

Ua ʻeha loa ihola ʻo Tua Tagovailoa i ka pō Pōʻahā nei ma ke kūʻē ʻana aku o nā Naiʻa i nā Kika Penekala. Ua kulaʻi ʻia ihola ʻo Tagovailoa e Josh Tupou, he ʻeono wale nō paha minuke i koe o ka hapahā ʻelua. Ua kau ke kino o Tagovailoa ma luna o ka papa kua, hoʻopaʻa pono ʻia i ka manele a lawe ʻia akula i ka ʻaoʻao. Ma ka Lāpule nei, ua ʻeha ihola ke poʻo o Tagovailoa a haʻalele ai i ka pāʻani ʻana. Akā, hoʻi aku nei ʻo ia i ka pāʻani ma ka hapahā ʻekolu. A ma muli o kona hoʻi ʻana i ka pāʻani i ia lā, hoʻomaka iho nei kahi noiʻi ʻana o ke Kuʻikahi Pōpōpeku Aupuni a me ka ʻAhahui o nā Mea Pāʻani o ke Kuʻikahi Pōpōpeku Aupuni.

Eia ma kā kākou ʻōlelo noʻeau,

Puʻuwai hao kila.

ʻO ia hoʻi, he wiwo ʻole.

09-28-22

He keu ka ʻOihana Moku a ke aloha ʻāina ʻole lā

ʻO ia aʻela kekahi poʻo nūhou o kēia lā, ka lā 28 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Kanono ka hoʻopaʻi o ka ʻOihana Moku. Hoʻopaʻi aku nei ke Keʻena Ola o ke aupuni mokuʻāina o Hawaiʻi i ka ʻOihana Moku, he $8.7 miliona no ka hoʻokuʻu pinepine ʻia ʻana o ke kaekene i hoʻomaʻemaʻe ʻole ʻia a i hoʻomaʻemaʻe hapa wale ʻia aku nō paha i loko o ke kai a me kekahi mau hana kūpono ʻole kekahi. A kauoha ʻia nō hoʻi ka ʻOihana Moku e lawelawe i nā hoʻoponopono laulaha i mea e pale aku ai i ka pōʻino nui ma ia wahi. He 766 manawa i hoʻokuʻu ʻia ai ka mea ʻino i loko o ke kai ma waena o ka mahina ʻo Ianuali o ka makahiki 2020 a me ka mahina ʻo Iulai o ka makahiki 2022. A he 212 manawa i kō ʻole ai ka lawelawe ʻana i ka hana a me ka mālama ʻana i nā mīkini. A he 17 manawa i hōʻalo ai i ke kānana me ka hoʻāmana ʻole ʻia. He 20 lā o ka ʻOihana Moku e uku ai i ka hoʻopaʻi, a e kūʻē aku ai paha i nā ʻaʻe kū ʻana.

Nei akula ke ōlaʻi ma ka mokupuni ʻo Hawaiʻi i ka lā i nehinei. ʻO kona ikaika, he 4.5. I ka ʻumi kūmāono minuke koe, kani ka hola 1:00 o ke awakea i nei ai ke ōlaʻi, a aia he ʻeono mile ma ka hikina-hikina ʻākau o Pāhala a he 39 mile ma ka hema-komohana hema o Hilo. ʻO ka mea maikaʻi, ʻaʻohe kai hoʻēʻe i piʻi aʻe.

Eia mai kā kākou ʻōlelo noʻeau,

Mai ʻalaʻala paha i ka ua o ka Waʻahila.

ʻO ia hoʻi, ua pakele kekahi i ka pilikia.

09-26-22

Kūpaʻa ko Waipiʻo.

ʻO ia aʻela kekahi poʻo nūhou o kēia lā, ka lā 26 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma ka mahina ʻo Pepeluali o kēia makahiki nei, ua pani ʻia aku ke awāwa ʻo Waipiʻo, ʻaʻole e hele aku nā malihini. Na ka Meia Mitch Roth i pani i ia alanui ma muli o ka manaʻo, e pōʻino auaneʻi kekahi ke holo ma ke alanui e moe ana no lalo o ke awāwae. ʻO ka mea ʻāpiki, holo iho nei kona manaʻo, e wehe hou ʻia aku. A ʻakahi nō a wehe ʻia aku ua alanui lā i ka Pōʻakahi nei. Akā, ʻo ka poʻe wale nō e hele aku, ʻo ia ka poʻe noho o laila, ka poʻe hana i ka hana kahiko a me nā hui hoʻomākaʻikaʻi e holo ana ma nā kaʻa kaupoku ʻehā huila hoʻoholo ʻia i loaʻa ka laikini kalana. ʻAʻole naʻe i kūkākūkā ka Meia Roth me nā kānaka o Waipiʻo. A no laila, huliāmahi aʻela ka hui ʻo Protect Waipiʻo Valley, ʻo ia hoʻi nā kānaka, nā kūpuna, nā mahi ʻai kalo a me nā ʻohana noho papa o laila ma ke koi ʻana i nā kānaka e manaʻo ana e hele aku i ke awāwa, e huli hoʻi aku, ʻoiai, ʻaʻole i palekana ke alanui. Wahi a Darde Gamayo, ʻaʻole i hoʻoponopono ʻia ke alanui, a e ʻoi aku ka ʻino ke holo ʻia e nā kaʻa wane hoʻomākaʻikaʻi nona ke kaumaha he 10 tona a ʻoi he mau manawa o ka lā. A ʻōlelo nō hoʻi ʻo Gamayo, no nā makahiki he nui, e hāpai ana nā kūpuna i ka manaʻo, ʻo ka poʻe wale nō e hele i Waipiʻo, ʻo ia nā mahi ʻai kalo, nā kānaka e noho ana ma laila a me nā kānaka e mālama iā Waipiʻo. A kākoʻo ʻo Protect Waipiʻo Valley i ka ʻoihana malihini mākaʻikaʻi akā, ʻo kahi e mākaʻikaʻi ai nā malihini, aia ma luna o ke alanui. ʻAʻole ma lalo o ke awāwa. E mālama ʻia ana kekahi hālāwai no ke kūkākūkā ʻana no ke pani ʻia o ia alanui ma ka hapa mua o ka mahina ʻo ʻOkakopa.

Aloha nō. Ua eo iho nei ʻo Hawaiʻi iā Nū Mekiko Mokuʻāina i ka Pōʻaono nei ma ka helu ʻai he 45 i ka 26. A ʻo ka lanakila mua ia o Nū Mekiko Mokuʻāina i kēia kau pōpō peku nei. I kēia pule, ʻaʻohe hoa paio o nā Koa Ānuenue. A i kēia pule aʻe, e kūʻē aku ana lākou iā Kāna Kieko Mokuʻāina.

Eia mai kā kākou ʻōlelo noʻeau,

Nānā nō a ka lāʻau kū hoʻokahi.

ʻO ka ʻōlelo kēia ma ka ʻimi ʻana i ka lāʻau lapaʻau. ʻOi aku ka lāʻau kū hoʻokahi ma mua o ka lāʻau e ulu ana ma kahi kokoke i nā lāʻau like.

09-23-22

He mau kī pū ʻana.

ʻO ia aʻela kekahi poʻo nūhou o kēia lā, ka lā 23 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka wanaʻao Pōʻahā nei, hopu ʻia aku nei kekahi mau kānaka ʻelua i manaʻo ʻia, na lāua e kī wale ana i ka pōpō pena i nā kānaka ma ke Alanui Aliʻi i Kailua-Kona. ʻElua mau kānaka i hopu ʻia, akā, hoʻokuʻu ʻia aku nei kekahi. ʻO Cyan Batha ka mea i hoʻopiʻi ʻia. He 18 makahiki o Batha, a he 27 makahiki o ka mea i hoʻokuʻu ʻia. Ua ʻōlelo ʻia, aia lāua ma luna o kekahi kalaka i ko lāua wā e kīkī ana i nā pōpō pena. Kāhea ʻia akula ka mākaʻi, a i ka wā i hōʻea ai ka mākaʻi, kamaʻilio ʻia ihola kekahi mau kānaka ʻelua i ʻeha i nā pōpō pena. A ma muli o kēlā i loaʻa ai nā kolohe.

A ma Kalihi i ka pō Pōʻakolu nei, kī aku nei kekahi kanaka i kekahi pūʻulu kāne i ka pū. A pau ke kī ʻana, ʻo ka holo akula nō ia ma ke kaʻa ʻeleʻele, he Toyota Camry. ʻAʻohe kanaka i pōʻino. A aia nō ka mākaʻi ke noiʻi akula.

Eia mai kā kākou ʻōlelo noʻeau,

Pae ka waʻa i Kaʻena.

He ʻōlelo kēia no ka huhū o kekahi.

09-21-22

E akaholo, ʻaʻole e holo hewa ke kaʻa i ke kukui ʻulaʻula.

ʻO ia aʻela kekahi poʻo nūhou o kēia lā, ka lā 21 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō ke kūkulu ʻia aʻela ka pahu paʻi kiʻi kukui ʻulaʻula mua o Oʻahu nei ma ka huina o ke Alanui Vīnia a me ke Alanui Pālama. ʻO ke kumu e kau ai ka pahu paʻi kiʻi mua ma laila, ma kahi hōʻike, ua ʻike ʻia, he 10 manawa o ka lā i holo hewa ai ke kaʻa ma ke kukui ʻulaʻula. ʻO ka lua o ka pahu paʻi kiʻi kukui ʻulaʻula e kūkulu ʻia ana, aia ana ma ka huina o ke Alanui Vīnia a me ke Alanui Liliha. Ma ʻOkakopa ana e kūkulu ʻia ai. ʻO ka laikini kaʻa wale nō ke paʻi kiʻi ʻia. ʻAʻole e paʻi kiʻi ʻia ka mea kalaiwa. Ma ka wā e mākaukau ai ka pahu paʻi kiʻi, ma nā lā mua he 30, ke holo hewa ke kaʻa i ka wā kukui ʻulaʻula, he aʻo wale nō ka hopena, ʻaʻole e loaʻa i ka hoʻopaʻi. Akā, ma hope aku o ia wā, e hoʻouna ʻia aku ka hoʻopaʻi i ka mea nona ke kaʻa i holo hewa i ke kukui ʻulaʻula.

E hoʻomaha loa ana ʻo Kurt Suzuki mai ka pāʻani pōpō hili ʻana. ʻO ka hopu pōpō ʻo Suzuki o nā ʻĀnela o Los Angeles. No Hawaiʻi nei ʻo Suzuki, a mai ke Kula Kiʻekiʻe ʻo Balawina ʻo ia i puka mai ai. A ʻo Cal State Fullerton kona kula kiʻekiʻe i pāʻani pōpō hili ai. He 16 ona makahiki i pāʻani ai ma ke ʻano he loea. He ʻelima ona hui loea i pāʻani ai, ʻo ia hoʻi, ʻo ʻOkalana, ʻo Wakinekona. ʻo Minekoka, ʻo ʻAtalana, a me nā ʻĀnela. A i ka makahiki 2019, i kona wā e pāʻani ana ma lalo o Wakinekona, ua paʻa ihola ka Inoa Moho Pōpō Hili iā Minekoka. A ua pāʻani ʻo Suzuki ma ka Hoʻokūkū o nā Kāʻeʻaʻeʻa i ka makahiki 2014 i kona wā e pāʻani ana ma lalo o Minekoka.

Eia mai kā kākou ʻōlelo noʻeau.

Hanohano Paliuli i ka noe.

He ʻōlelo kēia i ke kanaka i mahalo ʻia.

09-19-22

Ua pakele ka wahine ʻōpio i ʻaihue kanaka ʻia.

ʻO ia aʻela kekahi poʻo nūhou o kēia lā, ka lā 19 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ke awakea Pōʻalima nei, ʻaihue kanaka ʻia aku nei kekahi wahine ʻōpio ma ke Kūʻono o ʻAnaehoʻomalu ma ka mokupuni ʻo Hawaiʻi. ʻO Mikella Debina kona inoa. A ma ka pōmaikaʻi, ua loaʻa mai ʻo ia, ua palekana, ma ke awakea Pōʻaono nei ma Hilo. ʻO ke kumu o Debina i pakele ai, noi aku nei ʻo ia nei i kona mea nāna i ʻaihue i ke kiʻi aku i mea ʻai, ʻoiai, ua pōloli ʻo ia. No laila, hele akula lāua i ka hale ʻaina ʻo Cafe Pesto. Ma laila i ʻike ai kekahi limahana o ia hale ʻaina iā Debina, ʻo Bridge Hartman kona inoa. A hele akula ʻo Hartman a kāʻili iā Debina mai nā lima mai o kona mea nāna i ʻaihue. ʻO Duncan Kealoha Mahi kona inoa. A i ia manawa, heʻe akula ʻo Mahi. Akā, i ka ʻauinalā o ka Pōʻaono nei, paʻa ihola ʻo ia ala i ka hopu ʻia.

ʻĀpono aku nei ke Keʻena Ola o ke aupuni mokuʻāina o Hawaiʻi i ke noi a ka hui ʻo Green Aloha i ka wehe ʻana i hale kūʻai pakalōlō hou ma Kauaʻi. Aia ia hale kūʻai pakalōlō hou ma Kōloa. A aia ka hale kūʻai mua ma Kapaʻa.

ʻAkahi nō a kāʻili nā Koa Ānuenue o Hawaiʻi i ka lanakila ma lalo o ka hoʻokele ʻana o Timmy Chang, ke kumu aʻo hou o ka hui pōpō peku o Hawaiʻi. ʻO ka helu ʻai, he 24 a Hawaiʻi i ka 14 a Duquesne. He ʻekolu manawa i ʻapo lilo ʻia ai ke kinipōpō a Duquesne. I kēia Pōʻaono e hiki mai ana, e kūʻē aku ana ʻo Hawaiʻi iā Nū Mekiko Mokuʻāina ma Nū Mekiko.

Eia mai kā kākou ʻōlelo noʻeau,

Pēpē i ka ua hoʻopoponi ʻili.

He ʻōlelo kēia no ke kanaka i ʻeha kona naʻau.