Author: keaolama

He kōkua ka hana a ke aupuni mokuʻāina i ka poʻe ma ka polokalamu SNAP.

ʻO ia aʻela kekahi poʻo nūhou o kēia lā, ka lā 31 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua piha koke ke kākau inoa ʻana no ka hoʻomāhelehele mea ʻai o ka Panakō Meaʻai o Waipiʻo. He mau hola helu wale nō e kākau inoa ai, a piha loa ihola. He mea ia no nā kānaka no lākou na pōmaikaʻi SNAP a me nā limahana i pilikia i ke pani ʻia ʻana o ke aupuni o ʻAmelika Hui Pū. I kēia lā nō ka hāʻawi ʻana i ka mea ʻai. Paipai ʻia aku ka lehulehu i ka nānā aku i ke kahua hawaiifoodbank.org/shutdown i mea e ʻike ai i nā hoʻomāhelehele hou a puni ʻo Oʻahu nei. A hōʻike aʻela nā luna o ka Panakō Meaʻai, e hana hou ʻia ana he mau hoʻomāhelehele mea ʻai hou aku ma Oʻahu nei ma muli o ia pani ʻia ʻana o ke aupuni pekelala.

ʻO ka poʻe o Hawaiʻi nei no lākou ka pōmaikaʻi SNAP, e lilo aku ana iā lākou pākahi he $250 ma ke kāleka hoʻoili pōmaikaʻi ma ka mahina ʻo Nowemapa. Pēlā mai ka ʻōlelo a ke Kiaʻāina Josh Green. E hoʻoili ʻia ana ia puʻu kālā i ke kāleka i ka lā 14 o Nowemapa a ma mua mai paha. ʻO ka puʻu kālā maʻa mau e kaʻa ana i ke kanaka hoʻokahi ma ka polokalamu SNAP he $346 ma ka mahina. Ua lawa ke kālā o ke aupuni mokuʻāina o Hawaiʻi nei no Nowemapa, akā, aia nō ke kiaʻāina ke ʻimi akula i wahi e loaʻa mai ai ke kālā hou ke hoʻomau ʻia ke pani ʻia o ke aupuni pekelala.

ʻO Zavior Ward ka mea pāʻani polo wai ʻoi o ka makahiki o ka ʻAhahui Kula Uku o Honolulu. A aia nō ʻo ia ke hoʻopiʻi akula i kona kula kiʻekiʻe, ʻo Hawaiʻi Baptist Academy, a me ka ʻAhahui Kula Uku o Honolulu ma muli o ka hiki ʻole iā ia ke pāʻani polo wai i kona wā ma ka papa kiʻekiʻe loa, ka papa hoʻi e puka ana. Ua pāʻani polo wai nō ʻo Ward he ʻehā makahiki ma ke kula kiʻekiʻe, a ma nā lula o ka ʻAhahui ʻĀlapa o nā Kula Kiʻekiʻe o Hawaiʻi, ʻaʻole e ʻoi aku ka hoʻokūkū ʻana o ka haumāna i nā kikina ʻehā ma kekahi hana leʻaleʻa.

Eia mai kā kākou ʻōlelo noʻeau,

Noʻeau ka hana a ka ua; akamai ka ʻimina o ka noʻonoʻo.

He ʻōlelo mahalo kēia i ke kanaka keu a ke akamai.

ʻO ka mokuʻāina ʻo Hawaiʻi kekahi e hoʻopiʻi aku nei i ka pelekikena.

ʻO ia aʻela kekahi poʻo nūhou o kēia lā, ka lā 29 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Waiho aku nei kekahi mau mokuʻāina he ʻeono kāuna a ʻoi o ʻAmelika Hui Pū, i hoʻopiʻi i mua o ka ʻaha hoʻokolokolo pekelala no ka ʻōnoʻonou ʻana i ka Pelekikena Trump e hoʻohana i puʻu kālā, mai loko mai o kahi waihona ulia, i mea e hoʻomau ai i ka polokalamu SNAP, kahi e lilo ai i ka poʻe kānaka i nele i ke kālā ʻole, ke kālā kūʻai mea ʻai. ʻO Hawaiʻi kekahi o ia mau mokuʻāina hoʻopiʻi. Ma Hawaiʻi nei, he 161,400 mau kānaka e kālele nei i nā pōmaikaʻi o ka polokalamu SNAP i kēlā me kēia mahina. A ke helu pū ʻia ko ʻAmelika Hui Pū, ʻo ka nui o ke kālā e lilo aku ma ia polokalamu, he $8 biliona.

Aia nō ka ʻOihana Mākaʻi o Kauaʻi ke noi aʻela i ka lehulehu i kōkua ma ka hōʻoia ʻana i ka heana i loaʻa aku nei ma kahakai o ʻAliomanu ma ka mahina ʻo ʻApelila. Hōʻike aʻela ka ʻOihana Mākaʻi, he kāne nō. A kaha ʻia nō kona kino no ka hua lele i kona wā e ola ana. ʻO kekahi mea i loaʻa pū me ka heana, he ʻelua pale ʻaʻahu hoʻopumehana a me ka lole wāwae kuakua ʻōmaʻomaʻo. Aia nō ka mākaʻi ke noiʻi akula. Inā he ʻike kāu, e kāhea aku i ka Mākaʻikiu Hamberg ma ka helu kelepona, 808-241-1707. A e kāhea aku paha iā Crime Stoppers o Kauaʻi ma ka helu ʻai, 808-246-8300. A ma ka polokalamu P3 Tips paha e hōʻike aku ai.

Eia mai kā kākou ʻōlelo noʻeau.

ʻO ʻole wale mā.

E hōʻike ana kēia ʻōlelo, he mea ʻole ka manaʻo i hāpai ʻia e kekahi kanaka.

ʻAʻole i hoʻokō ʻo Maui Land & Pineapple i kekahi mau kauoha a ke Komikina Hoʻokahe Wai.

ʻO ia aʻela kekahi poʻo nūhou o kēia lā, ka lā 27 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka lā 8 o ʻOkakopa, hōʻike aʻela ke Komikina Hoʻokahe Wai o ke aupuni mokuʻāina, ʻaʻole i hoʻokō ka Hui ʻo Maui Land & Pineapple i kekahi kauoha a ke Komikina, a ua ʻaneʻane e piha nā makahiki he ʻeono. ʻO ka hana, ʻo ia ka hoʻomaikaʻi ʻana i ke kahua hoʻokahe wai. A ma ka lā 14 o ʻOkakopa, kūkala aʻela ua hui lā e hoʻokō ʻia nō i ka lā 17 o ʻOkakopa a ma mua paha. A wahi a MLP, ua hoʻokō ʻia aku nō i ka lā 17 o ʻOkakopa. ʻO kekahi pilikia a ke Komikina Hoʻokahe Wai i hōʻike aku ai iā MLP, he nui nō nā lā i emi ai ka wai e kahe ana i ka haʻahaʻa kūpono. He 36 lā o kēia makahiki nei, ma waena o ka lā mua o Ianuali a i ka lā 14 o ʻAukake.

Aloha nō. Make aku nei kekahi mau lawaiʻa ʻelua ma Kaʻena i ka Pōʻaono nei. He ʻumi kumamāwalu o lāua makahiki. Wahi a ka hōʻike a ka mākaʻi, lilo aku nei kekahi o lāua i ke kai, a komo akula kekahi i loko o ke kai i mea e kōkua aku ai i kona hoa. Ma hope mai, loaʻa aku nei lāua i ke kiaʻi ola ma kahi o Keawaʻula, a pae ma uka nei, hoʻāʻo akula ke kiaʻi e hoʻōla hou, a lawe ʻia maila lāua i ka haukapila ma ke kūlana kūpilikiʻi. A ʻo ko lāua make ihola nō ia ma hope mai.

Eia mai kā kākou ʻōlelo noʻeau,

Ka iwi ʻopihi o ka ʻāina ʻē.

ʻO ia hoʻi, ʻo ke kālā.

Hou ʻia kekahi kanaka i ka pahi ma Mōʻiliʻili.

ʻO ia aʻela kekahi poʻo nūhou o kēia lā, ka lā 24 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hou ʻia aku nei kekahi kanaka ma Mōʻiliʻili i ka ʻauinalā o ka Pōʻakolu nei. Ma kahi o ka hola 3:00, pōā aku nei kekahi mau kānaka ʻelua i ua kanaka lā i kona wā e noho ana ma luna o kona kaʻa ma kekahi wahi kūkulu kaʻa o Mōʻiliʻili. He pū kā kekahi kanaka, a he pahi kā kekahi. Ma hope o ka pōā ʻana, hou ʻia akula ke kanaka he mau manawa a heʻe akula nā lokoʻino. Lawe ʻia akula ka mea i hou ʻia i ka haukapila ma ke kūlana kūkonukonu. Aia nō ka mākaʻi ke kolokolo akula. Inā he ʻike paha kā kekahi, e kāhea aku i ka helu 911 a iā CrimeStoppers paha ma ka helu (808) 955-8300. A e hōʻike aku paha ma ka polokalamu P3 Tips.

He mau kānaka kaulana i ke mele a i ka hula paha ke kau ana i ka hano hāweo. E hoʻokomo ʻia ana lākou i loko o ka Holo Kaulana o ke Mele Hawaiʻi. ʻO nā mea e hoʻoheno ʻia ana, ʻo Myra English, ʻo Jack de Mello, ʻo Gary Keawe-Aiko, ʻo Hiram Olsen, ʻo Aloha Dalire, ʻo ka ʻOhana Lim, a me nā Kaikamāhine Alama, ʻo Leilani lāua ʻo Puanani. E mālama ʻia ana ʻo ka Lei o nā Hōkū 2025 i ka hola 10:00 o ke kakahiaka o ka lā 15 o Nowemapa ma ka Hōkele ʻo Halekūlani. He $200 o ka likiki. No kahi ʻike, e leka uila aku iā Toni Lee ma Parade.Lady001@gmail.com.

Eia mai kā kākou ʻōlelo noʻeau,

Ua ʻike paha i ka makapaʻa.

He ʻōlelo kēia no ke kanaka i pakalaki.

Kū ana i ka pono no nā haumāna ʻŌiwi o Hawaiʻi nei.

ʻO ia aʻela kekahi poʻo nūhou o kēia lā, ka lā 22 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua nui nā kānaka i ʻākoakoa aku nei ma ka pā o ʻIolani Hale i ka Pōʻalua nei no ka hōʻike ʻana i ka lōkahi a me ke alu like no ka pono o nā Kula ʻo Kamehameha a me kona lula hoʻokomo haumāna. ʻAkahi nō a waiho ʻo Students for Fair Admissions i hoʻopiʻi i mua o ka ʻAha Hoʻokolokolo ʻĀpana o ʻAmelika Hui Pū ʻIa ma Hawaiʻi. E ʻōlelo ana ka mea nāna ka hoʻopiʻi, he mea kūʻē kānāwai kīwila pekelala ka lula hoʻokomo haumāna o ia kula ma ka ʻae mua ʻana i ke Kanaka ʻŌiwi. E alu ka pule i Hakalau.

E hai ana nā ʻĀnela o Los Angeles iā Kurt Suzuki, ʻo ia ka luna hoʻohana hou. Ua puka ʻo Suzuki mai ke Kula Kiʻekiʻe ʻo Balawina ma Maui. A he ʻumi kumamāono ona makahiki i pāʻani ai ma ke ʻano he loea pāʻani pōpō hili. I kona wā e pāʻani ana no Wakinekona, lilo aku nei ka Inoa Moho Honua iā Wakinekomna i ka makahiki 2019.  A ma kona mau kikina hope loa ʻelua, he hopu pōpō ʻo ia no nā ʻĀnela. A ma hope o ke kikina 2022 ʻo ia i hoʻomaha loa ai. Ma nā kikina ʻekolu i kaʻa hope aku nei, he kōkua kūikawā ʻo Suzuki no ka luna hoʻohana Perry Minasian o nā ʻĀnela.

Eia mai kā kākou ʻōlelo noʻeau,

Ka ʻelele leo ʻole.

ʻO ia hoʻi, he leka kākau lima ʻia, a he leka uila paha.

Pau iho nei nā lā ʻelima o ka ʻolohani ʻana o nā kahu maʻi o Kaiser.

ʻO ia aʻela kekahi poʻo nūhou o kēia lā, ka lā 20 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua nui nā kānaka i ʻākoakoa aʻela, ʻelua mano a ʻoi, ma ke Alanui Pelekania i ka Pōʻaono nei, no ke kūʻē ʻana aku i ka pelekikena o ʻAmelika Hui Pū ʻIa. E kū ana lākou mai ke Alanui Bīhopa a ma ʻaneʻi mai o ka huina o ke Alanui Pūowaina. ʻO ka hālāwai hōʻeuʻeu maluhia ia i kapa ʻia ʻo “ʻAʻohe Poʻo Aupuni Nāna Ka Mana A Pau Loa”. Ua ʻōlelo ʻia, ʻo ka nui o nā kānaka i ʻākoakoa ma Hawaiʻi nei a puni, he 22,000. Aia nō hoʻi kekahi mau kānaka helu wale e kākoʻo ana iā Trump.

ʻO ka Pōʻaono nei ka lā ʻelima a nā kahu maʻi o Kaiser Permanente o ka ʻolohani ʻana, a no laila, ua pau ihola. Ma ia wā, hoʻokumu ʻia iho nei kekahi mau lula hou o ke Komikina Hui e hoʻonohonoho ana i ka lawa pono o nā limahana i koina no ka palekana o nā maʻi. E hoʻi ana nā ʻelele uniona i ke kūkākūkā ʻana me ko Kaiser i ka lā 28 me 29 o ʻOkakopa.

ʻĀhaʻi aku nei ʻo Hawaiʻi i ka lanakila ma ka hoʻokūkū kinipōpō pekupeku o ka Pōʻaono nei. ʻO Kololako Mokuʻāina ka hoa paio, a ʻo ka helu ʻai i ka hopena, he 31 i ka 19. Ma muli o ia lanakila ʻana, ua paʻa ihola ke komo ʻana o Hawaiʻi i loko o ka Hoʻokūkū Ipu. Maikaʻi wale ka hana a Micah Alejado, he 301 āna ʻīā i nou ai a he ʻekolu nō hoʻi ʻai holo. A he ʻai peku kā Kansei Matsuzawa ma ia hoʻokūkū, a ʻo ka iwakālua kumamākahi ia ma hope kekahi o kekahi. A ʻo ia ka nui loa ma ka moʻolelo o ke Kulanui o Hawaiʻi. Ma mua, ʻo Jason Elam ka ʻoi o ke Kulanui o Hawaiʻi ma ka ʻai peku, he 20 ma hope kekahi o kekahi i ka makahiki 1992.

Eia mai kā kākou ʻōlelo noʻeau,

Paʻa ka moku i ka heleuma.

He ʻōlelo kēia no ke kanaka i male.

He ʻolohani hou nō paha.

ʻO ia aʻela kekahi poʻo nūhou o kēia lā, ka lā 17 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻomaopopo aku nei ka hui uniona Local 996 i ke Kikowaena Lapaʻau ʻo Kapiʻolani, i ka hola 7:00 o kēia Pōʻalima nei, e hoʻomaka ka ʻolohani ʻana o nā limahana he 300 paha, ʻo ka mea ʻike loea, ka mea hoʻolālā ʻaina pono, ka mālama hale, a me kekahi mau kūlana lawelawe hana. E ʻolohani ana nō i nā hola a pau o ka lā, ma nā lā a pau o ka pule, a ʻaʻole i paʻa ka lā e pau ai ia kūʻē ʻana.

Ua ʻōmaʻimaʻi ihola he 15 mau haumāna o kekahi mau kula ʻehā o Oʻahu nei. I ʻōmaʻimaʻi paha i ka inu ʻana i ka waiū kokoleka a ka hui Meadow Gold. ʻO nā ʻōuli, ʻo ka ʻōpū ʻeha, ka naluea a me ka luaʻi. Ua kūkala aʻela ka hui Meadow Gold, e hoʻihoʻi ʻia i ia hui nā waiū kokoleka hapa paina, ʻo ka lā 16 o ʻOkakopa kona lā kau palena. Ma kekahi kula ma Oʻahu nei a ma kekahi ma Maui, hōʻike aʻe nei no ke ʻano kūpono ʻole o ia waiū kokoleka, ua kūpū, kohu pukini kokoleka. ʻAʻohe naʻe haumāna i hele a maʻi ma ia mau kula ʻelua.

Hui hou ihola nā kaikamāhine o Kamehameha a me nā kaikamāhine o ʻIolani no ka hoʻokūkū inoa moho pōpō paʻipaʻi o nā kula uku o Honolulu i ka pō Pōʻahā nei, a lilo aku nei ka inoa moho i ka inoa ʻelua ma loko o nā pāʻani ʻekolu wale nō. He 14 hoʻopio a Taimane Ainuʻu, a he 13 a Poema Kalama-Kingma. Aloha nō ʻo Kamehameha. He ʻelua pule ma mua aku nei, lanakila aku nei ʻo Kamehameha ma luna o ʻIolani i loko o nā pāʻani ʻelima. A i kēlā pule aku nei ma ka puni ʻelua o ka hoʻokūkū, na ʻIolani nō i kāʻili i ka lanakila.

Eia mai kā kākou ʻōlelo noʻeau,

Wela ke kai o Hoʻohila.

He ʻōlelo mahalo kēia i ke koa wiwoʻole. A ʻo kekahi manaʻo, e hōʻike ana ia, aia kahi mea hoʻopōʻino mai ma kahi kokoke.

Ke kū aʻela nā limahana o Kaiser i ka pono.

ʻO ia aʻela kekahi poʻonūhou o kēia lā, ka lā 15 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō nā limahana o Kaiser Permanente ke ʻolohani aku nei. I ka Pōʻalua nei nō i hoʻomaka ai ka hana ʻolohani. He 2,300 paha limahana Kaiser ma Hawaiʻi nei, a he 45,000 hou aku e ʻolohani ala a puni ʻo ʻAmelika Hui Pū ʻIa. ʻO ka mea e hoʻopaʻapaʻa ʻia nei, ʻo ia ka uku hana, ka mālama i ka pōmaikaʻi, a me ka pilikia i ka pōkole o nā limahana. Wahi a ka hui uniona Local 5, ʻoi aku ka uku o nā o nā limahana o Kaiser i ka ʻāina haole he 30% a emi mai, ma mua o ko Hawaiʻi poʻe limahana. He ʻelima lā o nei ʻolohani ʻana.

A ʻo kekahi hui paha e ʻolohani, ʻo ia ka poʻe kalaiwa kaʻa ʻōhua o ke Kūlanakauhale a me ke Kalana o Honolulu. He 130,000 mau kānaka kau kaʻa ʻōhua o ka lā, a ke paipai ʻia nei lākou e ʻimi aku i ala hou e hiki aku ai i ko lākou mau wahi e hele aku ai. Ua hoʻomaka iho nei ke kūkākūkā ʻana o Oʻahu Transit Services me ka hui uniona Local 996 ma ka mahina ʻo Iune, ʻaʻole naʻe i loaʻa mai kahi ʻaelike.

Kau aʻe nei kekahi mau mea pāʻani pōpō peku ʻekolu o ke Kulanui o Hawaiʻi i ka hano hāweo, ʻo lākou ka ʻoi o ka ʻAhahui Mauna Komohana ma muli o kā lākou hana ma ka Pōʻaono nei. ʻO ka mua, ʻo ia ʻo Jamih Otis, ka mahikua waena. ʻO ia ka Mea Pāʻani Kūpale ʻOi o ka Pule. Ma muli o Otis i pahemo ai ka pōpō a lilo maila iā Hawaiʻi. A ma hope mai, ma ke kiloi hope loa ʻana a Bryson Barnes, ka ʻalihikūlele o ʻUta Mokuʻāina, ʻapo lilo akula ʻo Otis i ka pōpō. ʻO ka lua o ke kanaka i kau i ka hano hāweo, ʻo Kansei Matsuzawa. Ua koho ʻia ʻo Matsuzawa, ʻo ia ka Mea Pāʻani ʻOi o ka Hui Kūikawā. A ʻo ke kolu, ʻo ia ʻo Micah Alejado, ka ʻalihikūlele o Hawaiʻi. ʻO ia ka Haumāna Komo Hou ʻOi o ka Pule. He 413 āna ʻīā i nou ai me nā ʻaiholo 3.

Eia mai kā kākou ʻōlelo noʻeau,

Hele kā hoʻi a hiki i Kealia, ua napoʻo ka lā.

He ʻōlelo kēia no ke kanaka hoʻopaneʻe pinepine i ka hana.

Hoʻopau ʻia ke kaua ma Gaza.

ʻO ia aʻela kekahi poʻo nūhou o kēia lā, ka lā 13 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma hope o nā makahiki ʻelua o ke kaua ʻana o ʻIkelaʻela me Hamasa, ʻaelike ihola lāua ʻelua i ka hoʻopau kaua. Hoʻomaka aʻela ʻo Hamasa e hoʻokuʻu aku i kekahi o nā kānaka pānaʻi ʻIkelaʻela hope loa i ka Pōʻakahi. Ua ʻōlelo ʻia, e hoʻokuʻu ʻia aku ana he 20 mau kānaka pānaʻi e ola nei, a e hoʻihoʻi ʻia ana nā kino o nā kānaka pānaʻi make he 26. A e hoʻokuʻu ʻia ana nō hoʻi nā Palekekine he 2,000 a emi iho i hoʻopaʻahao ʻia. Ua paʻa ihola ia ʻaelike i kēlā pule aku nei ma ʻAikupika.

Hahana nō nā hapahā mua ʻelua o ka hoʻokūkū pōpō peku ʻana o Hawaiʻi me ʻUta Mokuʻāina i ka Pōʻaono nei. ʻO ka helu ʻai i ka hopena o ka hapahā ʻelua, he 24 ʻai a Hawaiʻi i ka 20 a ʻUta. Ma hope mai, ua hiu aʻela nā Koa Ānuenue a kāʻili akula i ke eo ma ka helu ʻai he 44 i ka 26. He 413 ʻīā a Micah Alejado i nou ai. ʻO ke kolu ia o ka hoʻokūkū i ʻoi ai kāna mau ʻīā nou i ka 400. A he ʻelua ʻāʻapo o Hawaiʻi na lāua nā ʻīā he 100 a ʻoi. ʻO Jackson Harris, he 117 āna ʻīā. A ʻo Pofele Ashlock, he 113 āna ʻīā. I kēia manawa, he 5 lanakila o Hawaiʻi a he 2 hāʻule. Inā e lanakila hou ʻo Hawaiʻi, he hiki nō ke lilo i moho no ka hoʻokūkū ipu.

Eia mai kā kākou ʻōlelo noʻeau,

Meʻe uʻi o Hanalei.

He ʻōlelo kēia no ke kanaka nohea.

Mākaukau ka māhele 2 o ke ala uila kau i ka lewa.

ʻO ia aʻela kekahi poʻo nūhou o kēia lā, ka lā 10 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka Pōʻahā nei, kau aku nei kekahi poʻe kākau nūhou ma luna o ke kaʻa uila kau i ka lewa, a holo akula ma ka māhele ʻelua. ʻO ia ka māhele e holo ana mai Hālawa a i Kahauiki. ʻAkahi nō a mākaukau. A e hoʻomaka ke kau ʻana o ka lehulehu i kēia pule aʻe. ʻO kekahi o nā wahi e kū ai ke kaʻa uila, aia ma Āhua. A ma laila e kau ai ke kanaka ma ke kaʻa ʻōhua e holo ana no ke kaona, no Waikīkī, a no ke Kulanui o Hawaiʻi ma Mānoa. E manuahi ana ke kau ʻana ma ke kaʻa uila i nā lā 17 me 18 o ʻOkakopa nei. Ke lana nei ka manaʻo o nā luna aupuni, e māhuahua loa ana nā kānaka kau kaʻa uila.

Ua māhuahua aʻela nā kānaka i limanui aku i nā mākaʻi i kēia makahiki nei. Mai ka hoʻomaka ʻana o kēia makahiki nei a hiki i ka Pōʻalua nei, he 35 mau mākaʻi i limanui ʻia. Ma ia wā like o ka makahiki 2024, he 29 wale nō mākaʻi i limanui ʻia. Ua piʻi he 21 pākeneka. A no ka makahiki 2024 piha, he 43 hihia hōʻeha mākaʻi.

Ma muli o ke pani ʻia ʻana o ke aupuni pekelala, hoʻomaka iho nei ka poʻe kamahele e kāpae aku i nā huakaʻi. A aia a hemo hou ke aupuni pekelala a laila, hoʻi hou i ka lele ʻana ma ka mokulele. He manaʻo ko kekahi poʻe, he mau lā hou aku paha ka lōʻihi, a he mau pule paha.

Eia mai kā kākou ʻōlelo noʻeau,

Ua laʻi ka nohona i ke alo pali.

ʻO ia hoʻi, ua maluhia loa.