09-25-17

ʻAʻole lawa nā kauka lapaʻau o Hawaiʻi nei.

ʻO ia aʻela kekahi poʻo nūhou o kēia lā, ka lā 25 o Kepakemapa, he Pōʻakahi. Welina e nā hoa makamaka. ʻO Ke Aolama kēia a penei ka nūhou.

Ua pōkole nā kauka lapaʻau o Hawaiʻi nei. A ma nā kalana a pau, koe ʻo Kauaʻi, ua māhuahua aʻela ka nele. I ka makahiki 2016, he 339 mākālua e waiho wale ana ma Oʻahu nei. A i kēia makahiki nei, he 381 mākālua. A ma Hawaiʻi moku, he 183 mākālua i kēlā makahiki aku nei, a i kēia makahiki nei, he 196. A ʻo ke Kalana ʻo Maui, ua piʻi aʻela nā mākālua a ka 139, mai ka 125 o ka makahiki 2016. A ma Kauaʻi wale nō i emi iho ai, mai ke 62 a i ke 53. ʻO kekahi kumu o ka pōkole o nā kauka lapaʻau, he pipiʻi loa ka noho ʻana ma Hawaiʻi nei, a ke hoʻohālikelike ʻia ka uku makahiki o nā kauka o Hawaiʻi nei me ko ʻAmelika Hui Pū ʻIa, he oi aku ko ʻAmelika. Maikaʻi paha ke paipai aku i nā keiki o Hawaiʻi nei e lilo i kauka, a na ka mokuʻāina paha e uku i ka uku kulanui ke hiki aku lākou i laila.

Mai lanakila nā Koa Ānuenue ma luna o Waiomina ma ka hoʻokūkū pōpō pekupeku o ka hopena pule nei. Hahana aku nei ka pāʻani ʻana o nā ʻaoʻao a ʻelua a i ke kani ʻana aku o ka pū i ka hopena o nā hapahā ʻehā, ua paʻi aʻela a paʻi ma ka helu ʻai he 21 i ka 21. A komo akula i ka wā kaulele. Iā Waiomina ka mua, a paʻa koke ihola ka ʻai holo ma ka nou ʻana o Josh Allen iā James Price i ka pōpō ma ka pahu ʻai holo. A i ka wā i lilo ai ka pōpō iā Hawaiʻi, ʻo ka hana mua, holo akula ʻo Diocemy Saint Juste he 10 ʻīā. A ʻo ka hana ʻelua, nou akula ʻo Dru Brown i ka ʻaoʻao hema, akā, pā akula ka lima o kekahi mea kūpale, a ʻapo lilo akula ʻo Cassh Maluia, a hāʻule ihola nā Koa Ānuenue.

Eia mai kā kākou ʻōlelo noʻeau,

He kekē niho wale iho nō.

ʻO ia hoʻi, he hoʻoweliweli wale iho nō ka hana, ʻaʻole e hoʻokō ʻia.

09-22-17

Hopu ʻia kekahi no ka ʻaihue malū ʻana he $5.7 miliona kālā.

ʻO ia aʻela kekahi poʻo nūhou o kēia lā, ka lā 22 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Hopu ʻia aku nei ʻo Lola Jean Amorin no ka hana ʻāpuka. He mea lawelawe moʻowaiwai ʻo ia ma mua no Ka Piʻo ma Hawaiʻi. ʻO ia hui, he hui waiwai hoʻopuka ʻole ia nona kekahi mau hale mālama kanaka makua ma Oʻahu nei. He lawelawe i ka hana no nā mākua a me nā keiki hiki ʻole ke hana no lākou iho. ʻO Amorin, ua ʻaihue ʻo ia i ke kālā i hāʻawi ʻia iā ia e mālama ʻia no ia hui. A ʻo ka huina pau o ia kālā āna i ʻaihue ai, he $5.7 miliona a ʻoi ma nā makahiki he 10 a ʻoi, mai ka mahina ʻo Kēkēmapa o ka makahiki 2006 a i ka mahina ʻo Malaki o kēia makahiki nei. ʻO kāna mau mea i lū aku ai i ke kālā, ʻo ka huakaʻi, ka piliwaiwai, ke kaʻa, ka hoʻoponopono hale a me ka molaki no kekahi mau hale ʻehā. A hoʻopiʻi ʻia nō hoʻi ʻo Amorin no ka hana ʻāpuka ma ke kamepiula a me ka hoʻonalo ʻana i ke kumu i loaʻa ai ke kālā iā ia. ʻO ka hana ʻāpuka kamepiula, ʻo ia nā kalaima kūkonukonu loa, a ʻo ka hoʻopaʻi, he noho paʻahao no nā makahiki he 20 me ka hiki ʻole ke hoʻokuʻu koke ʻia.

He manaʻo ko ke Kalana ʻo Hawaiʻi e kūkulu i mau hale hau ʻInuika no ka poʻe hale ʻole o Kona. A ʻo ke aniani awe ka mea e kūkulu ʻia ai ua mau hale hau lā. ʻO ka nui o ka hale, he 314 kapuaʻi kuea a ʻōlelo ʻia, he ʻoi aku ka ʻoluʻolu o loko.

Eia mai kā kākou ʻōlelo noʻeau,

Wili Koʻolau.

He ʻōlelo kēia no kekahi mea i hana pupuāhulu ʻia.

09-21-17

Mai ʻaihue kanaka ʻia kahi keiki o ʻEwa.

ʻO ia aʻela kekahi poʻo nūhou o kēia lā, ka lā 21 o Kepakemapa, he Pōʻahā. Welina e nā hoa makamaka. ʻO Ke Aolama kēia a penei ka nūhou.

Pakele aku nei kekahi keiki mai ʻaihue kanaka ʻia i kona wā e hele aku ana i ke kula i ka Pōʻalua nei. He 10 makahiki o ua keiki nei, a e naue aku ana ʻo ia i ke Kula Haʻahaʻa o Keoneʻula i ke kakahiaka ma ke Alanui ʻo Kaipalaoa. A i ia manawa, hoʻāʻo ihola kekahi kāne e koi i ke keiki e kau aku i luna o kona kalaka. A lālau akula nō hoʻi ke kāne i ua keiki nei, a hoʻāʻo e huki iā ia ma luna o ke kalaka. Akā, pākele akula ua keiki nei ma ka ʻāpua.

He manaʻo ko Ilima-Lei MacFarlane e kāʻili aku i ka inoa moho māhele 125 paona o Bellator ma ka mokomoko. ʻO MacFarlane, mai ke Kula Kiʻekiʻe ʻo ka Punahou ʻo ia i puka mai ai. A e kūʻē aku ana ʻo ia iā Emily Ducote ma ka Bellator 186 i ka lā 3 o Nowemapa ma ke Kikowaena ʻo Bryce Jordan i Penekelevinia. ʻO MacFarlane, he ʻelima ona lanakila, a ʻaʻole ʻo ia i hāʻule iki ma Bellator. A he ʻekolu o ia mau lanakila, ma ka ʻae wale ʻana o ka hoa paio i ka hāʻule ma loko o ka lina mokomoko. ʻO Ducote, he ʻehā ona lanakila, a he hoʻokahi hāʻule ma Bellator. Ua hui pū lāua a ʻelua ma ka pahu hao ma mua i ka mahina ʻo Kēkēmapa o ka makahiki 2016, a ua hiki aku nō i ke kani ʻana o ka pele o ka puni hope loa. A lilo akula ke eo iā MacFarlane ma ka ʻōlelo hoʻoholo a nā luna loiloi. ʻO ka inoa moho māhele 125 paona, ʻakahi nō a hoʻokumu ʻia ma Bellator. A inā e lilo ka inoa moho iā MacFarlane, ʻo ia ana ka lua o ka wahine o Hawaiʻi nei e lilo i inoa moho mokomoko ma ka moʻolelo o Hawaiʻi nei. ʻO ka mua, ʻo ia ʻo Angela Lee. ʻO Lee, ka inoa moho ma ka māhele 115 paona ma ONE Championship.

Eia mai kā kākou ʻōlelo noʻeau,

Kukū ka pihapiha a piʻi ka lena.

He ʻōlelo kēia no ke kanaka i hele a huhū.

09-20-17

Ua pau loa ihola ke kikina pōpō pekupeku o ke Kula Kiʻekiʻe ʻo Kaiser.

ʻO ia aʻela kekahi poʻo nūhou o kēia lā, ka lā 20 o Kepakemapa, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.

He manaʻo ko ke Kulanui o Hawaiʻi e pau ka pōkole o nā kumu kula aupuni ma ka paipai ʻana aʻe i ko Hawaiʻi e lilo i kumu kula. I ka makahiki kula 2012, he 334 mākālua. A mai ia manawa mai, piʻi liʻiliʻi aʻela nā mākālua i kēlā me kēia makahiki, a i ka makahiki kula 2016, he 531 mākālua. Kapa ʻia aku ia papahana paipai, “E lilo i meʻe. E lilo hoʻi i kumu kula.” A e hoʻomaka nō hoʻi he polokalamu manuwahi no nā kumu pani hakahaka a me nā kumu kōkua, kahi e paʻa ai ke kekelē kumu aʻo ma ke Kulanui o Hawaiʻi ʻoiai lākou e hana ana ma ko lākou kūlana hana.

Holo ihola ka manaʻo o ke poʻo kumu Justin Mew o ke Kula Kiʻekiʻe ʻo Kaiser e hoʻopau ʻia ke kikina pōpō pekupeku o ka hui pae oʻo a me ka hui pae ʻōpio. ʻO ke kumu āna o ka hana ʻana pēlā, ʻo ka hoʻopaʻapaʻa a me ka hakakā ʻana o ke kumu aʻo pōpō pekupeku a me nā mākua o kekahi mau mea pāʻani pōpō pekupeku i ka Pōʻakahi nei. A ma muli o ia hana, kāhea ʻia akula ka mākaʻi, a hiki koke akula lākou. A ua noi ʻia ke Keʻena Mākaʻi o Honolulu i ke kiaʻi ʻana o nā mākaʻi he 8 a emi iki paha ma ke kahua kula i kēia pule. He kikina pilikia nō kēia no ka hui pae oʻo. Ua hāʻawi pio wale ma nā hoʻokūkū mua ʻehā ma muli o ka lawa ʻole o nā mea pāʻani. ʻO ka hoʻokūkū ʻelima, ua kūʻē aku iā Kamapela, a hāʻule ihola, he 71 ʻai a Kamapela, a he hua kakā kā Kaiser.

Eia mai kā kākou ʻōlelo noʻeau,

Ka lama kū o ka noʻeau.

He ʻōlelo mahalo kēia i ka ihupani.

09-19-17

Na ka Papa ʻĀina a Waiwai Pili ʻĀina e hoʻolohe i nā hōʻike o nā ʻaoʻao a pau ma ka hihia no ka ʻOhe Nānā Kanakolu Mika.

ʻO ia aʻela kekahi poʻo nūhou o kēia lā, ka lā 19 o Kepakemapa, he Pōʻalua. Aloha mai e nā hoa. ʻO Ke Aolama kēia a penei ka nūhou.

E hōʻike aʻe ana i mua o ka Papa ʻĀina a Waiwai Pili ʻĀina nā ʻaoʻao a pau i ko lākou mau manaʻo no ka pono a me ka pono ʻole o ke kūkulu ʻia ʻana aku o ka ʻOhe Nānā Kanakolu Mika ma Mauna Kea. He 23 mau ʻaoʻao a he 15 minuke o kēlā me kēia ʻaoʻao e hōʻike ai. I ka Pōʻakolu ana nō e mālama ʻia ai ka hihia ma ka Lumi Kalaunu o ka Hōkele Naniloa ma Hilo. Na ka Papa ʻĀina a Waiwai Pili ʻĀina ka ʻāpono a me ka ʻāpono ʻole paha i ka lilo aku o ka palapala kūkulu. A ʻaʻole paha e holo koke ka manaʻo o ka papa. A ke kuhi ʻia nei, ʻo ka ʻaoʻao hāʻule, e hoʻopiʻi hou i mua o ka ʻAha Hoʻokolokolo Kiʻekiʻe o Hawaiʻi nei. Wahi a Kealoha Pisciotta, ke alakaʻi o ka Hui Mauna Kea, lana kona manaʻo e hoʻokō ka papa i ko lākou kuleana. A inā ʻaʻole, ua mākaukau nō e kū i ka pono. He mau kānaka Kū Kiaʻi ʻĀina e ʻōlelo nei, ʻaʻole kūpono ka hana a ka Lunakānāwai Riki May Amano, ka lunakānāwai hoʻomalu o ka hihia. A ʻo nā loio o ka ʻOhe Nānā Kanakolu Mika, he ʻokoʻa ko lākou manaʻo me ka ʻī ʻana aʻe, he keu aku ka maikaʻi o ka hana a Amano a me ka Papa ʻĀina a Waiwai Pili ʻĀina, a ua hana lāua i nā hana like ʻole e pono ai nā ʻaoʻao a pau, a ua ʻoi aku i ke koina maʻa mau o nā hana kū i ke kaʻina kānāwai.

Lilo aku nei kahi puʻu kālā noiʻi i kekahi polopeka o ke Kula Lapaʻau ʻo John A. Burns o ke Kulanui o Hawaiʻi no ka noiʻi ʻana aku i ka mea hoʻomaʻi ʻo Zika. ʻO Mukesh Kumar ka inoa o ka polopeka, a he loea ʻo ia ma ka maʻi lele. A ʻo kekahi mea nui ma kona noiʻi ʻana, ʻo ia ka pilikia o ka wahine a me kāna keiki e kōkō ana. He manaʻo ko Kumar, e hana ʻo ia i mea e lele ʻole ai ka mea hoʻomaʻi Zika mai ka makuahine hāpai keiki a i kāna ʻaluʻalu e hānai ana. ʻAkahi nō a ʻike ʻo Kumar, he hiki nō ke loaʻa ka ʻiole puaʻa i kekahi ʻano maʻi Zika ʻAmelika, a no laila, he hiki ke noiʻi aku i ka ʻiole puaʻa no ka ʻike ʻana i ke ʻano e pilikia ai ke kanaka i ka mea hoʻomaʻi Zika. ʻO ka pēpē mua i loaʻa i ka mea hoʻomaʻi Zika i hānau ma ʻAmelika Hui Pū ʻIa, ua hoʻohānau ʻia mai ʻo ia ma ka haukapila ma Oʻahu nei i ka makahiki 2016. Ua loaʻa ka makuahine o ia pēpē i ka mea hoʻomaʻi Zika ʻoiai ʻo ia e noho ana ma Palakila. A lele akula i ka pēpē, ʻoiai ʻo ia ma ka pūʻao.

Eia mai kā kākou ʻōlelo noʻeau,

Paʻa ka moku i ka heleuma.

He ʻōlelo kēia no ke kanaka i male.

09-15-17

Pahū aʻela ka pōkā pahū ma Lākana,

ʻO ia aʻela kekahi poʻo nūhou o kēia lā, ka lā 15 o Kepakemapa, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

Hoʻopiʻi aʻe nei ke Kuhina Nui Theresa May ke Aupuni Mōʻī Hui Pū ʻIa i ke kūlana hoʻoweliweli hoʻomake huna mai ke koʻikoʻi a i ke kūpilikiʻi ma hope o ka pahū ʻana o kekahi pōkā pahū ma kekahi kaʻa holo ala hao ma Lākana i ka Pōʻalima nei. A ʻo ke kumu i piʻi ai ke kūlana, he manaʻo ko ke aupuni, e hana koke ʻia kekahi hana hoʻoweliweli hoʻomake huna. ʻAʻohe ola i pōʻino, a he 29 wale nō mau kānaka i ʻeha. Ua ʻōlelo ʻia, ua pahū hapa wale nō, a ʻo ia ke kumu i liʻiliʻi ai nā kānaka i ʻeha. Hōʻike aʻela ka hui Mokuʻāina ʻIsalama, nāna nō i hoʻopahū. Ma kahi o ka hola 8:20 o ke kakahiaka i pahū aʻe ai ka pōkā pahū i ka wā i kū ai ke kaʻa ma kahi kau kaʻa ma ke komohana hema o ke kūlanakauhale. Ua lapaʻau ʻia he 29 mau kānaka no ka wela i ke ahi. Aia nō kēia hana hoʻoweliweli ke noiʻi ʻia akula.

Ua maikaʻi aʻela ke kūlana o ke Kulanui o Hawaiʻi ma Mānoa. Ua helu ʻia iho ua kulanui nei, ʻo ia ke kulanui maikaʻi helu 159 ma waena o nā kulanui he 311 o ʻAmelika Hui Pū ʻIa. A ʻo nā kulanui o ia papa helu, ʻo ia nā kulanui nona nā polokalamu lae pua, lae oʻo a lae ʻula nō hoʻi, a he mea nui ka noiʻi ʻana. A ma waena o nā kulanui aupuni he 132, ʻo Hawaiʻi ke kulanui aupuni helu 83. A ua maikaʻi nō hoʻi ke kūlana o kekahi mau kulanui o Hawaiʻi nei. Ma ka māhele Kulanui ʻĀpana Komohana, nā kulanui me nā polokalamu lae pua a lae oʻo hoʻi, ma waena o nā kulanui he 141, ʻo Chaminade ka helu 40, ʻo ke Kulanui Hawaiʻi Pākīpika ka helu 59 a ʻo ke Kulanui o Hawaiʻi ma Hilo ka helu 66. Ma ka māhele Koleke ʻĀpana Komohana, ma waena o nā kulanui he 65, ʻo Berigama Iana Hawaiʻi ka helu 18 a ʻo ke Kulanui o Hawaiʻi ma Oʻahu Komohana ka helu 25.

Eia mai kā kākou ʻōlelo noʻeau,

Pae maila ka waʻa i ka ʻāina.

ʻO ia hoʻi, ua māʻona ihola ka ʻōpū. A ʻo kekahi manaʻo, ua hiki mai kekahi,

09-13-17

He mau lāhui iʻa hou kai loaʻa mai nei.

ʻO ia aʻela kekahi poʻo nūhou o kēia lā, ka lā 13 o Kepakemapa, he Pōʻakolu. Aloha mai e nā makamaka. ʻO Ke Aolama kēia a penei ka nūhou.

Ua alu like aʻela he 100 mau kānaka akeakamai a ʻoi ma ka ʻimi ʻana a hoʻākoakoa i nā iʻa o ke Kai Kūʻono o Kāneʻohe mai ka lā 20 o ka mahina ʻo Mei a i ka lā ʻelua o Iune. A ma nā lā mua o kēia mahina nei, ʻakahi nō a hoʻokuʻu ʻia ka hōʻike. He 3,700 mau iʻa i ʻohiʻohi ʻia a ua loaʻa nō hoʻi he mau lāhui hou, he mau haneli ka nui. ʻO kekahi, he 150 lāhui huʻakai i ʻike ʻole ʻia ma Hawaiʻi nei ma mua. A he hapakolu o lākou, he mau lāhui hou loa. Ma mua, he 10 wale nō paha lāhui huʻakai i ʻike ʻia ma ke Kai Kūʻono o Kāneʻohe. ʻAʻole i maikaʻi nā mea a pau i loaʻa. ʻO kekahi mea i loaʻa ma kahi o Mokoliʻi, he limu uluwale a hewa i kapa ʻia ʻo ka nahele lepo ʻūkele ʻili pipi. A i neʻe paha i laila mai ke Kai Kūʻono o Maunalua a me kekahi mau wahi ʻē aku.

Ua ʻike ʻia aku nei ka ʻai a ka uʻi o kahi keiki o Hawaiʻi nei ma ka pāʻani pōpō pekupeku i ka Pōʻaono nei. ʻO Tua Tagovailoa nō ia o Alabama, a ʻo ka ʻalihikūlele helu ʻelua ia o Alabama. Pāʻani aku nei ʻo ia no kahi wā pōkole ma ka hapahā ʻelua, a laila no ka hapanui o ka hapahā ʻehā. He 64 āna ʻīā i nou ai, a ʻo kekahi o ia nou ʻana, hopu ʻia ihola e Henry Ruggs III a loaʻa ka ʻai holo. A he ʻewalu āna ʻīā i holo ai. I ka hapahā ʻelua, ua hoʻohina ʻia ʻo Tagovailoa a hoʻi hope. Akā, wahi a ke kumu aʻo o Alabama, ʻo Nick Saban, ua maikaʻi ka hana a Tagovailoa.

Eia mai kā kākou ʻōlelo noʻeau,

ʻAʻohe hana a Kauhikoa; ua kau ka waʻa i ke ʻaki.

ʻO ia hoʻi, ua pau pono kāna hana.