09-12-17

E nui auaneʻi paha ke kālā o ka māhele ʻālapa o ke Kulanui o Hawaiʻi.

ʻO ia aʻela kekahi poʻo nūhou o kēia lā, ka lā 12 o Kepakemapa, he Pōʻalua. Welina e nā makamaka. ʻO Ke Aolama kēia a penei ka nūhou.

Ua hala iho nei he ʻelua mahina a emi iki mai, mai ka lā i pōʻino ai ka hale papaʻi ʻo Marco Polo i ke ahi, ʻo ka lā 14 ia o Iulai, ʻaʻole naʻe i ʻike ʻia ke kumu i ʻā ʻia ai ke ahi. Ua paʻa ihola kahi i ʻā ʻia ai ke ahi, ʻo ke keʻena noho 2602. Ua make ihola he ʻekolu mau hoa noho o ka Marco Polo. A ʻo kekahi kanaka, ua hala he 20 mau lā ma hope mai. Na ke Keʻena Kinai Ahi ka noiʻi ʻana, a i kēia manawa, ua kāpae ʻia ka puhi kolohe, ke kuke ʻana a me ka hoʻohana ʻana i ka wai ʻā koke, ʻaʻole ke kumu ʻā ʻo ia mau mea. ʻO ka uku pohō, he $100,000,000 a ʻoi. Waha a Kāpena David Jenkins, ka waha ʻōlelo o ke Keʻena Kinai Ahi, e pau paha ka noiʻi ʻana i loko o kekahi mau pule.

Ma muli o kahi ʻaelike hou me ke Koleke IMG o Winston Salem, Kalolaina ʻĀkau, e lilo mai ana he $27.7 miliona a ʻoi aku i ke Kulanui o Hawaiʻi ma nā makahiki he 10 e hiki mai ana. Mai ka makahiki 2003, na ke Kulanui nō i lawelawe i ka hana hoʻolaha ma nā ʻano like ʻole ma hope o ke ʻoki ʻia ʻana o ka pilina me Leigh Steinberg. A i ia wā, ua holo mua nō, akā, ʻo ka mea nāna i alakaʻi i ia māhele, ʻo John McNamara, ua haʻalele i kona kūlana ma ke Kulanui o Hawaiʻi i ka mahina ʻo Nowemapa o ka makahiki 2017. Ma ka ʻaelike me IMG, e lilo i ke Kulanui o Hawaiʻi, he uku makana pūlima he hoʻokahi miliona kālā. A ʻo ka puʻu kālā makahiki e lilo i ke Kulanui o Hawaiʻi, he $2.2 miliona i kēia makahiki mua, a e piʻi liʻiliʻi nō i kēlā me kēia makahiki a ka $3 miliona ma ka makahiki hope loa o ka palapala ʻaelike.

Eia mai kā kākou ʻōlelo noʻeau,

Ua noi i ke ao ua ʻole.

ʻO ia hoʻi, ua noi aku ʻoe i kekahi kanaka ʻōpūkeʻemoa i kekahi mea, a ua hōʻole maila ʻo ia ala.

09-11-17

E kau ana nā mea waʻa o ka Hōkūleʻa i ka hano hāweo.

ʻO ia aʻela kekahi poʻo nūhou o kēia lā, ka lā 11 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I kēia Pōʻaono, e kau aʻe ana ka poʻe hoʻokele o nā waʻa kaulua ʻo ka Hōkūleʻa i ka hano hāweo. E lilo aku ana ka makana Hoʻomaluhia Hanohano iā Nainoa Thompson a me nā mea waʻa o ka Hōkūleʻa ma muli o ko lākou mālama honua. ʻO ka Lā Maluhia ia o Hawaiʻi nei. E hoʻomaka ana ka ʻaha hāʻawi makana i ka hola 6:00 o ke ahiahi. A ma ke Kikowaena ʻIke a Hana ʻo Soka Gakkai e mālama ʻia ai.

E mālama ʻia ana ka ʻaha mele o Dionne Warwick ma Waimānalo i kēia Pōʻaono ma hope o ka Hoʻokūkū Polo e ulele ana ma ke Kahua Pāʻani Polo o Waimānalo. ʻO kekahi mau puʻukani e hīmeni ana i ia ahiahi, ʻo ke keiki a Warwick, ʻo Damon Elliot, ʻo kona inoa puʻukani, ʻo Nomad, a ʻo Mya ana kekahi ma laila. He $50 o ke kikiki. A ʻo ke kikiki Kiʻi Maka Nunui, he $250. ʻO ka hoʻokūkū polo, mai ka hola 3:00 a i ka hola 6:00. A ʻo ka ʻaha mele, e hoʻomaka ana i ka hola 6:00.

Ma Kalasona, Kaleponi, lilo aku nei ke eo iā Brian Viloria ma ka puni ʻelima ma ke kuʻikuʻi puʻupuʻu i ka Pōʻaono nei, ma muli o ka hiki ʻole i kona hoa paio, iā Miguel Cartagena, ke hoʻomau aku i ka hoʻolei puʻupuʻu. I kēia manawa, he 38 lanakila a Viloria, a he ʻelima āna hāʻule.

Eia mai kā kākou ʻōlelo noʻeau

Pae ka waʻa i Kaʻena.

He ʻōlelo kēia no ke kanaka i hele a inaina.

09-08-17

Naue ana ka honua.

ʻO ia aʻela kekahi poʻo nūhou o kēia lā, ka lā 8 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Nei aku nei ke ōlaʻi ma Mekiko i ka pō nei. A he keu aku ia a ka ikaika. A ʻo ia kekahi o nā ōlaʻi ikaika loa ma ka moʻolelo o Mekiko. ʻO kona ikaika, he 8.1 ma ke ana ōlaʻi. He 32 mau kānaka i make, a hiolo ihola nā hale, nā keʻena aupuni a me nā hale ʻoihana. Aia nō ia ōlaʻi ma kahi o ka mokuʻāina ʻo Chiapas ma kahi o ka palena o Kuatemala.

Ua hāʻule hou ihola nā Wāhine Ānuenue ma ka pāʻani pōpō paʻipaʻi i ka pō nei ma ke kūʻē ʻana aku iā Berigama Iana. Lilo aku nei ke eo o nā pāʻani mua ʻelua i nā Koukā o Berigama Iana. Akā, na Hawaiʻi i kāʻili i ka pāʻani ʻekolu a me ʻehā. Akā, ua piula ihola paha nā Wāhine Ānuenue a ʻaʻole i hiki ke kāʻili i ka lima o ka pāʻani. I hāʻule paha ʻo Hawaiʻi ma muli o ka ʻeleu o Veronica Jones-Perry o nā Koukā. He 27 āna hoʻopio. ʻO McKenna Granato ko Hawaiʻi kupuʻeu, he 23 āna hoʻopio. I kēia ahiahi, e kūʻē aku ana ʻo Hawaiʻi iā Bela. A ʻo Berigama Iana, e kū’ē aku ana iā Newaka.

Eia mai kā kākou ʻōlelo noʻeau,

He lāʻau maka no ka nāhelehele.

He ʻōlelo kēia no ke kanaka ʻakahi ʻakahi ma kekahi hana. ʻAʻole i maʻa.

09-07-17

Kaiehu hewa ʻia paha kekahi mau limahana o ka Panakō Koko o Hawaiʻi.

ʻO ia aʻela kekahi poʻo nūhou o kēia lā, ka lā 7 o Kepakemapa, he Pōʻahā. Welina e nā makamaka. O Ke Aolama kēia a penei ka nūhou.

Waiho aku nei ke Komikina Hai Like o ʻAmelika Hui Pū ʻIa i hoʻopiʻi i mua o ka ʻAha Hoʻokolokolo ʻĀpana ʻAmelika o Hawaiʻi e hoʻopiʻi ana i ka Panakō Koko o Hawaiʻi me ka ʻōlelo ʻana aʻe, ua ʻaʻe ia hui i ke kānāwai pekelala i kona wā i kaiehu aku ai i kekahi mau limahana ʻekolu i hoʻomaha mai ka hana aku he 12 pule a ʻoi ma muli o ke kīnā. Ma ke Kānāwai Wā Hoʻomaha Mālama ʻOhana a Lapaʻau Kino, he koina ka ʻae ʻana aku i ka limahana he 12 pule hoʻomaha. Akā, ʻo ka pilikia, ma ke Kānāwai no nā ʻAmelika Kīnā, he pono ke kūkākūkā ʻana me ka limahana no ka hoʻi ʻana i ka hana, e ʻae aku paha i mau lā hoʻomaha hou, a i ʻole ia, e hoʻi ka limahana i ka hana me ka hoʻokō i kekahi māhele o ke kuleana a ola hou ua limahana nei. Wahi a Anna Park o ka ʻī ʻana aʻe, ʻaʻole e kaiehu ʻia ka limahana a ʻonou ʻia paha e haʻalele i ka hana ma muli o ke kīnā o ke kino.

Ua piʻi hou aʻela ka heluʻai a nā haumāna o Hawaiʻi ma ka Hōʻike Hoʻokomo Kulanui ʻo ACT. A ʻo ke kolu kēia o ka makahiki i piʻi aʻe ai ka helu ʻai. I ka makahiki 2013, hoʻomaka ihola ke aupuni mokuʻāina i ke koi ʻana i nā haumāna o ka papa 11, e kākau i ka hōʻike ACT i mea e ana ai i ka mākaukau kulanui ma ka ʻōlelo Pelekane, ma ka heluhelu ʻana, ma ka makemakika a me ke akeakamai. A ma ia manawa mai, ua piʻi liʻiliʻi mai ka helu ʻai ʻawelika o nā māhele ʻehā. I ka makahiki 2013, he 17.3 ka helu ʻai ʻawelika. A i ka makahiki 2017, he 18.0 ka helu ʻai. He mea ka hōʻike ACT e ʻike ai nā kumu i kahi e hoʻoikaika ai i ke aʻo ʻana aku a me ka hoʻolilo ʻana i nā kumu waiwai e holo mua ai nā haumāna ma ke kulanui.

Eia mai kā kākou ʻōlelo noʻeau,

Ola ia kini ke ʻā maila ke ahi.

Hoʻopuka ʻia kēia ʻōlelo i ka wā e ʻaneʻane ai e mākaukau ka mea ʻai.

09-06-17

E kāpae ʻia ana ka polokalamu e kākoʻo ana i ka poʻe i eʻe moku mai i ka wā e kamaliʻi ana.

ʻO ia aʻela kekahi poʻo nūhou o kēia lā, ka lā 6 o Kepakemapa, he Pōʻakolu. Aloha e nā makamaka. ʻO Ke Aolama kēia a penei ka nūhou.

ʻĀkoakoa aku nei kekahi mau kānaka he 60 a ʻoi ma ke Alanui ʻo Ala Moana ma kahi o ka Hale Pekelala i ka Pōʻalua nei no ke kūʻē ʻana aku i ka holo ʻana iho o ka manaʻo o ka Pelekikena Donald Trump, e hoʻopau loa aku i ka polokalamu e ʻae ana i ka noho paʻa ʻana o nā ʻōpiopio eʻe moku ma ʻAmelika Hui Pū ʻIa. ʻO ka inoa o ia polokalmu, ʻo ia hoʻi, ʻo Hoʻopaneʻe Kipaku i nā Eʻe Moku Hiki Mai i ka Wā Kamaliʻi. A e pau loa ia polokalamu a ʻaʻole e ʻae ʻia nā noi hou. Wahi a kekahi poʻe, ʻo kekahi pilikia, he mea ia e hoʻokaʻawale ana i nā ʻohana. He 21,000 mau eʻe moku i ʻae ʻole ʻia ma Hawaiʻi nei, a he 2,000 i hiki ke noi aku i ke komo i ia polokalamu. Ma ʻAmelika Hui Pū ʻIa a puni, he 800,000 mau kānaka ma ia polokalamu i kēia manawa.

Ke laha akula nā kiʻi o nā iʻa make a me nā manu make ma Lehua ma hope mai o ka lū ʻana iho i ka maunu lāʻau make e pau loa ai nā ʻiole o laila. Ua ʻike ʻia he 45 iʻa i make, a he 2 manu i make, ʻo ka ʻā ʻōpio paha ia. E lana wale ana nō lākou ma ka ʻaoʻao ʻākau o ia mokupuni. I ka lā 23 a me ka lā 30 i lū ʻia ai ka maunu ma Lehua, a he hoʻokahi hou lā ma kēia hope aku. A ʻo ka nui loa o ka maunu lāʻau make, he 11 kona. ʻO ka mea e kau ai ka weli, pehea ke kanaka ke ʻai aku i ka iʻa i ʻai i ia maunu?

Eia mai kā kākou ʻōlelo noʻeau

Ke mokomoko lā me ka makani.

He ʻōlelo kēia no ke kanaka waha paʻa.

09-05-17

Aia nō ke waiho wale akula ka mokulele i kuʻu ʻino ma kahi o Kunia.

ʻO ia aʻela kekahi poʻo nūhou o kēia lā, ka lā 5 o Kepakemapa, he Pōʻalua. Welina e nā makamaka heluhelu. ʻO Ke Aolama kēia a penei ka nūhou.

ʻAʻole e kiʻi ʻia aku nā ʻāpana o ka mokulele i kuʻu ʻino ma kahi o Kunia i ka lā 28 o ka mahina ʻo Iulai. Aia nō ke kiʻi ʻana a me ka ʻole paha i ka mea nona ka mokulele, iā Jahn Mueller. Akā, wahi āna, ʻaʻole ʻo ia e kiʻi aku. ʻO ka mokulele, aia nō ma ka ʻĀina Hoʻomalu Ululāʻau o Honouliuli. A hōʻike aʻela ke Keʻena ʻĀina a Waiwai Pili ʻĀina, ke keʻena nona ke kuleana ma ia ʻāina, ua holo ka manaʻo, ʻaʻole ka mokulele he mea e pōʻino ai ke ʻano o ka nohona a me nā mea e hoʻopuni ana. A no laila, ʻaʻole e kiʻi ʻia e ia keʻena. Akā, he manaʻo ko kekahi poʻe, he pono ke kiʻi ʻia ʻana o ka mokulele i mea e noiʻi ʻia ai, ʻoiai ʻo ka lua ia o ka mokulele o Mueller i kuʻu ʻino i loko o nā lā he 30 wale nō.

Lanakila hou aku nei nā Koa Ānuenue pōpō peku i ka Pōʻaono nei. ʻO Kalolaina Komohana ka hoa paio, a ʻo ka helu ʻai, he 41 i ka 18. ʻO kekahi kumu paha i lanakila ai ʻo Hawaiʻi, ʻo ia nā kaupaku ʻekolu i ka peku ʻaikolu. Na Meffy Koloamatangi ʻelua, a na Viane Moala kekahi. A ʻo kekahi o ia mau pōpō i kaupaku ʻia, lilo akula iā Trayvon Henderson o Hawaiʻi, a holo akula ʻo ia a loaʻa ka ʻaiholo. A ʻo ka holo ʻana o Diocemy Saint Juste, maikaʻi wale, paʻa ihola he 202 ʻīā ma nā holo ʻana he 25. Ma ka hapalua mua o ka hoʻokūkū, he 181 āna ʻīā. Mai like a like me ka nui loa o nā ʻīā holo nui loa o ka hapalua mua ma ka moʻolelo o ke Kulanui o Hawaiʻi, he ʻeiwa wale nō ʻīā i koe. Ua maikaʻi nō hoʻi ka holo ʻana o Ryan Tuiasoa, ʻaʻole i like me ko Saint Juste, akā, he ʻelua āna ʻaiholo.

Eia mai kā kākou ʻōlelo noʻeau,

Kūʻonoʻono ka lua o Kuhaimoana.

He ʻōlelo kēia no ke kanaka kūʻonoʻono.

09-01-17

Ua ʻoluʻolu ihola nā lumi papa he 1,000 ma Hawaiʻi nei a puni.

ʻO ia aʻela kekahi poʻo nūhou o kēia lā, ka lā mua o Kepakemapa, he Pōʻalima. Welina e nā hoa makamaka. ʻO Ke Aolama kēia a penei ka nūhou.

Ua kō ka ʻōlelo hoʻohiki a ke Kiaʻāina David Ige, ʻo ia hoʻi, ʻo ka hoʻokomo i ka mīkini hōʻolu ea i loko o nā lumi papa he 1,000. I nehinei nō i komo ai ka mīkini hōʻolu ea 1,000 i ka Hale M ma ke Kula Waena a Kiʻekiʻe o Nānākuli. ʻO nā lumi papa he 1,000, aia nō ma nā kula like ʻole a puni ka pae ʻāina ʻo Hawaiʻi. A ke hiki aku i ka hopena o ka mahina ʻo Kepakemapa, he 300 lumi papa hou e ʻoluʻolu i ka mīkini hōʻolu ea. ʻO ke kumu i hiki ai ke hana pēlā, ua hoʻokaʻawale ʻia he $100 miliona e ka ʻAha Kau Kānāwai o Hawaiʻi nei. ʻO kekahi pilikia i kupu mai, ʻaʻole i lawa ka papa hoʻokumu uila e holo ai ka mīkini hōʻolu ea hou ma ka hapanui o nā kahua kula, a ʻo kekahi, inā hoʻohana ʻia ka uila, he mea ia e piʻi ai ka pila hoʻohana uila. No laila, ʻo ka lā ka mea e holo ai nā mīkini hōʻolu ea i hoʻokomo ʻia.

Ua ʻāhaʻi akula nā Wāhine Ānuenue i ka lanakila i ka pō Pōʻahā nei, ka lā mua o ka Hoʻokūkū Panina Hui Mokulele Hawaiʻi. A ʻo ka lanakila mua ia o ke kumu aʻo hou ʻo Robyn Ah Mow-Santos. A he mea ia e kau ai ka haliʻa aloha i kona wā e pāʻani pōpō paʻipaʻi ana no ke Kulanui o Hawaiʻi, a he 21 makahiki i hala aku nei, ua koho ʻia ʻo Ah Mow-Santos, ʻo ia ka mea pāʻani ʻoi o ia hoʻokūkū hoʻokahi nō. Ua kāʻili koke aku nei ʻo Hawaiʻi i ka lanakila ma loko o nā pāʻani he ʻekolu wale nō, a pau akula ʻo Kalolaina Komohana. ʻO Norene Iosia, he 22 āna hānai, a 13 ʻali.

Eia mai kā kākou ʻōlelo noʻeau,

He nani wale nō ʻo Puna mai ʻō a ʻō

ʻO ia hoʻi, he maikaʻi nā mea a pau, ʻaʻohe mea e namunamu ai a e hoʻohalahala ai paha.