11-06-17

He hana mānaʻonaʻo ma kekahi hale pule ma Tekeka.

ʻO ia aʻela kekahi poʻo nūhou o kēia lā, ka lā 6 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Lāpule nei ma Sutherland Springs i Kekeka, komo aku nei kekahi kanaka i loko o ka Hale Pule Papekiko Mua, a kīkī aʻela i nā kānaka o loko i ka pū. ʻO Devin Kelley ka inoa o ua kanaka lā. A ʻo ka nui o nā kānaka i make ma muli o ia hana mānaʻonaʻo a Kelley, he 26, a ʻo ka nui o nā kānaka i ʻeha, he 20. ʻO nā kānaka i make, mai ka ʻelemakule, ka luahine a me nā kamaliʻi. I ka wā i haʻalele ai ʻo Kelley i ka hale pule, kū akula i kona alo kekahi kamaʻāina o ia kaiāulu e paʻa ana i ka pū laipela. A ma hope mai, loaʻa akula ʻo Kelley i ka mākaʻi ma kona kaʻa ma ka laina palena o ia kalana, ua make. ʻAʻole naʻe i maopopo kona kumu i make ai, ʻo ke kī ʻana iā ia iho, a i ʻole ia, ʻo ia kanaka i kū akula i kona alo, nāna i kī aku iā ia a make. Aia nō ka mākaʻi ke noiʻi akula. Ua hōʻike mai kahi waha ʻōlelo o ka Māhele Kaua Lewa, ua hoʻopau hoʻoʻino ʻia aku ʻo Kelley mai ka Māhele Kaua Lewa aku, ua manaʻo ʻia, ua limanui aku ʻo ia i kāna wahine a me kāna keiki. Wahi a ka Pelekikena Donald Trump, ʻaʻole ka pilikia ʻo ka pū, ʻo ke ola noʻonoʻo ka pilikia.

Ke namunamu aʻela ka ʻAhahui Mahi Kope Kona i ka hoʻopāʻēʻē o kekahi hui Kaleponi i i ka nui o ka pāpapa kope Kona ma loko o nā kope hau e kūʻai ʻia nei e ia hui. Wahi a ke Keʻena Mahiʻai o ka mokuʻāina ʻo Hawaiʻi, ʻaʻole ona kuleana ma laila, ʻoiai, ʻaʻole pili ke kānāwai i ka mea inu. ʻO ke kānāwai o Hawaiʻi nei, he pono ke hōʻike ʻia ka nui o ka pāpapa kope i hoʻoulu ʻia ma Hawaiʻi nei, akā, he pili wale nō ia i ke kope hikiwawe a me ke kope loke. A inā ua hoʻohui pū ʻia me kekahi ʻano kope, he pono nō hoʻi ke hōʻike ʻia. ʻO kekahi pilikia, ʻo ka hapanui o nā mea inu, hana ʻia ma ka ʻāina ʻē, a no laila, ʻaʻohe kuleana o ke Keʻena Mahiʻai o Hawaiʻi nei. ʻŌlelo ihola kekahi mahi kope Kona, he hiki i nā luna aupuni ke pāpā i ke kūʻai ʻia o nā mea e hōʻike hewa ana i nā mea o loko ma Hawaiʻi nei.

Eia mai kā kākou ʻōlelo noʻeau,

He ʻōpū hālau.

He ʻōlelo kēia no ke kanaka ʻoluʻolu a heahea.

11-03-17

Pena kolohe ʻia ke kiʻi o kahi kamāliʻi o Hawaiʻi nei.

ʻO ia aʻela kekahi poʻo nūhou o kēia lā, ka lā 3 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

E hiki mai ana ka Pelekikena Donald Trump i Oʻahu nei i kēia lā a e hōʻaumoe ana ʻo ia a haʻalele mai no ʻĀkia. Akā, ma Honolulu nei, e hālāwai ana ʻo ia me nā kiaʻāina o Hawaiʻi, ʻĀlaka a me nā panalāʻau o ʻAmelika Hui Pū ʻIa ma ka Moananuiākea. ʻOiai ka Pelekikena ma Honolulu nei, e pupū ana ka hele ʻana o nā kaʻa ma Waikīkī a me Puʻuloa.

Hoʻopiʻi ʻia aku nei kekahi kanaka no ke pena kolohe aku i kekahi kanaka i ke kiʻi o ke Kamāliʻi Jonah Kūhiō Kalanianaʻole e kū akula ma Waikīkī i ka lā Heleuī i hala iho nei. ʻO Andrew Chalaire ka inoa o ua kanaka lā. ʻAe ihola ʻo ia i ka hoʻāhewa ʻia ʻana, ʻaʻole naʻe ʻo ia i hōʻike aku i ke kū o ka hewa iā ia. Hōʻike mai nei ka mākaʻi, ua loaʻa ihola ʻo Chalaire iā lākou i kona wā e pena kolohe ana. A he wikiō nō hoʻi e hōʻike ana i ia pena ʻana o kekahi kanaka i ke kiʻi. ʻO ka mea ʻāpiki, ʻo kona hoʻopaʻi, he ʻelua wale nō lā o ka noho paʻahao ʻana, a he ʻehā hola kōkua kaiāulu.

I ka Pōʻakolu nei, hoʻokuʻu ʻia aku nei ʻo Dean Jay Fletcher mai ka Hale Paʻahao Pekelala o Honolulu nei ma ke kauoha a kekahi luna kānāwai ʻAmelika Hui Pū ʻIa ma Hawaiʻi. ʻO Fletcher, ua hoʻopiʻi ʻia ʻo ia no ka pepehi kanaka ʻana i kāna wahine ma Tonga, a aia nō ʻo ia ma ka hale paʻahao ma Tonga, akā, ua mahuka aku nei. A pakele akula ma kona hiki ʻana aku i Kāmoa ʻAmelika. A mai laila mai ʻo ia i lawe ʻia ai i Honolulu nei. A ma mua, ua holo ka manaʻo o kekahi luna kānāwai, e hoʻouna ʻia aku ʻo Fletcher i Tonga no kona hoʻokolokolo ʻia ʻana. Akā, hōʻole ihola ke Kuhina Kuleana ʻĀina ʻĒ i ke noi a ke Aupuni Mōʻī o Tonga e hoʻouna ʻia aku ʻo Fletcher i laila. He aha lā kona kumu i hoʻokuʻu wale ʻia ai?

Eia mai kā kākou ʻōlelo noʻeau,

Wawā nā manu o Kaʻula.

He ʻōlelo kēia ke nui ka lawena ʻōlelo.

11-01-17

He pila hou e hoʻohāiki ana i ka mana hoʻouka kaua o ka pelekikena.

ʻO ia aʻela kekahi poʻo nūhou o kēia lā, ka lā mua o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

He pila hou kai hāpai ʻia aku nei e kekahi mau kenekoa ʻewalu o ʻAmelika Hui Pū ʻIa, e pāpā ana, ʻaʻole e hoʻouka kaua aku ka Pelekikena Donald Trump i mea e pale aku ai i ka hoʻouka kaua ʻana mai o Kōlea ʻĀkau me ka ʻāpono ʻole aʻe o ka ʻAhaʻōlelo Lāhui. ʻO Kenekoa Brian Schatz o Hawaiʻi nei kekahi o ia mau kenekoa nāna i hāpai ka pila. E pāpā ana ka pila i ka hoʻolilo wale ʻana i ke kālā o ka waihona kālā o ʻAmelika Hui Pū ʻIa me ka ʻāpono ʻole o ka ʻAhaʻōlelo Lāhui. Aia wale nō a he hoʻouka kaua mai koe, a laila, e hoʻohana aku ka pelekikena i ke kālā me ka ʻāpono ʻole ʻia. ʻO nā kenekoa i alu like ma ia pila, ʻo ia ʻo Chris Murphy o Konekikuka, ʻo Tammy Duckworth o ʻIlinoe, ʻo Cory Booker o Nū ʻIeleke, ʻo Bernie Sanders o Welemoneka, ʻo Jeff Merkley o ʻOlekona, ʻo Elizabeth Warren o Makakukeka, a ʻo Tom Udall o Nū Mekiko.

I ka lā i nehinei, e holo ʻino ana kahi kalaka ma ke ala kaʻa hehi wāwae ma kahi o ke Kikowaena Kālepa Honua, a e hoʻokuʻi wale aku ana i nā kānaka. He ʻewalu mau kānaka i make, a he 11 i ʻeha kūkonukonu. ʻO Sayfullo Saipov ka inoa o ke kanaka e kalaiwa ana i ke kalaka. He 29 ona makahiki, a komo maila ʻo ia i loko o ʻAmelika Hui Pū ʻIa i ka makahiki 2010. ʻO kona laikini hoʻokele kaʻa, no Pololika, akā, ma Nū ʻIeleke paha ʻo ia e noho ana. Ua hoʻolimalima aku ʻo Saipov i ke kalaka ma kahi o ka hola 2:00 o ka ʻauinalā ma kekahi Home Depot o Nū ʻIeleke, a hele akula i Nū Ioka a he hoʻokahi hola ma hope mai, komo akula i ke ala kaʻa hehi wāwae, a holo ʻino akula no ke Kikowaena Kālepa Honua a he hoʻokuʻi wale aku i nā mea a pau ma kona ala. A i ka wā i kū ai ke kalaka, lele ihola ʻo Saipov i lalo, a hele ana ma waena o nā kaʻa me kekahi mau pū. ʻAʻole naʻe he mau pū e pōʻino ai ke ola o kānaka. ʻO kekahi, he pū kī pōpō pena, a ʻo kekahi, he pū kī pōkā peleka. A kī aku nei kekahi mākaʻi iā ia ma muli o kona hōʻole ʻana i ka waiho i nā pū i lalo. Aia nō nā mākaʻi ke noiʻi akula i kumu i hana ai ʻo Saipov i ia hana mānaʻonaʻo.

Eia mai kā kākou ʻōlelo noʻeau,

Kū i ke Kīpuʻupuʻu.

ʻO ia hoʻi, ua ʻeha ihola ka naʻau o kekahi.

10-31-17

Hoʻi mai nei kekahi mau iwi kupuna i Hawaiʻi nei.

ʻO ia aʻela kekahi poʻo nūhou o kēia lā, ka lā 31 o ʻOkakopa, he Pōʻalua. Welina e nā makamaka. ʻO Ke Aolama kēia a penei ka nūhou.

ʻAkahi a hoʻi mai kekahi mau iwi kupuna i ʻaihue ʻia mai nā lua pao ma Hawaiʻi nei a kūʻai ʻia aku i kekahi hale hōʻikeʻike ma Kelemānia. He 100 mau makahiki a ʻoi ma ka ʻāina ʻē. He ʻelua iwi poʻo mai Oʻahu, a he hoʻokahi iwi poʻo a he iwi ā mai ka mokupuni ʻo Hawaiʻi. I kēlā Pōʻahā aku nei i hiki maila i Honolulu nei. A ʻo ke kumu o ka hoʻihoʻi ʻia ʻana mai, ma muli ia o ka noke ʻana aku o ka Hui Mālama i nā Kūpuna o Hawaiʻi nei i ka hana i hoʻomaka i ka makahiki 1991. He nui nā iwi kupuna i hoʻihoʻi ʻia maila ma muli o Hui Mālama, akā, ua pau ihola ia hui i ka makahiki 2015 ma muli o ka hoʻokō ʻia ʻana o kona kuleana, ʻo ia hoʻi, ʻo ke komo ʻana o nā ʻohana Hawaiʻi i loko o ia hana. A aia ʻo Halealoha Ayau, ka luna hoʻokō o Hui Mālama ma mua, ke kūkākūkā nei me kekahi hale hōʻikeʻike ma Berelina no ka hōʻiliʻili iwi kupuna o laila a me nā mea i hoʻomoe pū ʻia. A wahi a Ayau, ua lohe ʻo ia no ka iwi kupuna ma kekahi hale hōʻikeʻike o Palika. A e noiʻi ana ʻo ia i ka ʻoiaʻiʻo a me ka ʻole.

I ka pō Pōʻaono nei, hiu aʻela nā kaikamāhine pōpō paʻipaʻi o ke Kula Kiʻekiʻe ʻo Kamehameha, a kāʻili akula i ka inoa moho ma loko o nā pāʻani ʻekolu wale nō. ʻO ʻIolani ka hoa paio, a ʻo ka inoa moho hoʻi o kēlā makahiki aku nei, a he hahana nō ka pāʻani ʻekolu, hiki akula nā ʻai a Kamehameha i ke 31 i ka 29 a ʻIolani. ʻO ka inoa moho 21 ia o Kamehameha a ʻo ka iwa ia ma lalo o ke kumu aʻo ʻo Chris Blake. ʻO Kili Robins o Kamehameha, he ʻewalu āna hoʻopio, a he 13 āna ʻali. ʻO Braelyn Akana, he ʻeiwa āna hoʻopio, a ʻo Maluhia Maʻa, he ʻewalu āna hoʻopio. ʻO Lexis Akeo, he 35 āna hānai, 11 ʻali, a he ʻekolu hoʻopio. A ʻo Akeo ka mea pāʻani ʻoi o ka hoʻokūkū inoa moho.

Eia mai kā kākou ʻōlelo noʻeau,

Kū ka lau lama.

He hōʻailona no ka piha hauʻoli a me ka lanakila.

10-26-17

He kānāwai hou ke hoʻokō ʻia nei ma Honolulu.

ʻO ia aʻela kekahi poʻo nūhou o kēia lā, ka lā 26 o ʻOkakopa, he Pōʻahā. Welina e nā hoa makamaka. ʻO Ke Aolama kēia a penei ka nūhou.

Holo ihola ka manaʻo o ke Komikina Mākaʻi o Honolulu ma ka luna mākaʻi hou o ke Keʻena Mākaʻi o Honolulu. ʻO Mēkia Susan Ballard ka luna mākaʻi hou. A ʻo ia nō hoʻi ka wahine mua i lilo i luna mākaʻi no Honolulu. He 32 ona makahiki e hana ana ma ke ʻano he mākaʻi no kēia ʻāina. A lilo ihola ʻo ia i mēkia i ka makahiki 2001. A ʻo Ballard nō hoʻi kekahi o nā moho luna mākaʻi hope loa ʻehā i ka makahiki 2004, ka wā hoʻi i lilo ai ʻo Boisse Correa, ʻo ia ka luna mākaʻi o Honolulu.

ʻAkahi nō a hoʻohanohano ʻia nā koa kahiko Pilipino o ke Kaua Honua II e ʻAmelika Hui Pū ʻIa. Lilo aku nei ka Makana Kula ʻAha ʻŌlelo Lāhui i nā koa kahiko Pilipino he 260,000 a ʻoi i komo i ke kaua ma ka ʻĀina Pilipino a ma kekahi ʻāina paha. Hele aku nei he 13 mau ʻelele mai Hawaiʻi aku i Wainekona no ka ʻAha Makana Kula ʻAha ʻŌlelo Lāhui. He ʻekolu o lākou, he mau koa kahiko nō mai ia wā, a ʻo nā ʻelele ʻē aʻe, he ʻohana no nā koa kahiko i hala.

Ma Honolulu nei, pāpā ʻia, ʻaʻole e kelekiko ke koʻele wāwae i kona wā e hele ana ma ke kāʻei koʻele wāwae. ʻAʻole e nānā ke kanaka i kāna kelepona a me ka mea uila ʻē aʻe paha, e laʻa ke kamepiula hele a me ke kālana uila, ʻoiai ʻo ia e hele ana mai kekahi ʻaoʻao o ke alanui a i kekahi. ʻO ka hoʻopaʻi mua ke ʻaʻe ʻia ke kānāwai, mai ka $15 a ke $35. A no ka hoʻopaʻi hou i loko o ka makahiki hoʻokahi, he $35 a ke $75. A no ke kolu o ka hoʻopaʻi i loko o ia makahiki, he $75 a ke $99.

Eia mai kā kākou ʻōlelo noʻeau,

Hili hewa ka manaʻo ke ʻole ke kūkākūkā.

He mea nui ke kūkākūkā pū ʻana i mea e holo maikaʻi ai ka hana.

10-25-17

Kau aku nei kahi Wāhine Ānuenue i ka hano hāweo.

ʻO ia aʻela kekahi poʻo nūhou o kēia lā, ka lā 25 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aloha nō! Ua make aku nei ʻo Ocean Wright i ka lā 25 o Kepakemapa, he kama iki wale nō, he ʻelua wale nō ona makahiki. A manaʻo ʻia, ua ninini ʻia ka wai wela e paila ana ma luna o ua kama iki nei i ka mahina ʻo ʻAukake ʻoiai ʻo ia e noho ana me kona makuakāne ma ke Kahua Hale Koa ʻo Schofield. ʻO ka lā 18 o ʻAukake ka lā i ʻeha ai ʻo Ocean i ka wai wela. Ua wela kona maka, kona lae, kona ʻāʻī, kona lima a me kona wāwae. Aia nō ka mākaʻi ke noiʻi akula i ke kumu o ka make ʻana o ua keiki nei.

He Wahine Ānuenue hou ke kau nei i ka hano hāweo i kēia pule nei. Ma nā pule ʻelua i kaʻa hope iho nei, ʻO Emily Maglio ka mea pāʻani pōpō paʻipaʻi kūpale ʻoi o ka ʻAhahui Komohana Nui. A i kēia pule nei, lilo akula ia makana iā Savanah Kahakai ma muli o kāna pāʻani helu ʻekahi o kēlā pule aku nei. He 29 āna ʻali, he 10 ma ke kūʻē ʻana aku iā UC Riverside, a he 19 ma ke kūʻē ʻana aku iā Cal State Fullerton. He 1,312 ʻali a Kahakai ma kona wā e pāʻani ana no nā Ānuenue.

Lana ka manaʻo, e hiu aku nō nā Wāhine pōpō paʻipaʻi o Hawaiʻi ma ke koena o nā hoʻokūkū a lanakila, i komo ai lākou ma ka Hoʻokūkū Inoa Moho o ka ʻAhahui ʻĀlapa Kula Nui o ʻAmelika. He pono ke kāʻili ʻia ke eo ma nā hoʻokūkū i koe. I kēia Pōʻalima, e kūʻē hou aku ana ʻo Hawaiʻi iā Cal Poly. I ka wā o Cal Poly i hele mai ai i Oʻahu nei no ka hoʻokūkū ʻana, lilo aku nei ke eo iā lākou lā ma loko o nā pāʻani he ʻelima.

Eia mai kā kākou ʻōlelo noʻeau,

Hoʻohewahewa ke aloha, aia i Puna i Nānāwale.

Hoʻopuka ʻia aku kēia ʻōlelo ke nānā wale mai kahi hoa me ka hāʻawi ʻole mai i ke aloha.

10-24-17

E haʻalele paha kekahi mau lālā o ke Komikina Mākaʻi  i ko lākou kūlana?

ʻO ia aʻela kekahi poʻo nūhou o kēia lā, ka lā 24 o ʻOkakopa, he Pōʻalua. Aloha e nā makamaka heluhelu. ʻO Ke Aolama kēia a penei ka nūhou.

He manaʻo ko Alexander Silvert, he loio kūpale pekelala, e waiho kekahi mau lālā ʻekolu o ke Komikina Mākaʻi i ko lākou kūlana komikina. ʻO ia mau lālā, ʻo ia ka Luna Hoʻomalu Komikina Max Sword, ka Hope Luna Hoʻomalu Cha Thompson a me ke Komikina Eddie Flores. ʻO lākou ʻekolu nā komikina lōʻihi loa o ka noho ʻana ma ke ʻano he komikina. A ʻo ke kumu o Silvert e koi nei i ka haʻalele loa o lākou i ke kūlana komikina, ʻo ia ko lākou kākoʻo ʻana i ka Luna Mākaʻi Louis Kealoha i hoʻomaha loa i kona wā i hoʻopiʻi ʻia ai no ka hana ʻapakeʻe a me ka ʻōhumu. A ua holo ko lākou manaʻo e hāʻawi aku i palapala ʻaelike hou na Kealoha ma mua o ka hopena o kona kau mua, a ma ka loiloi ʻana aku iā Kealoha, he mau kaha kiʻekiʻe wale nō kā lākou e hāʻawi aku ai a koho ihola lākou e uku aku iā ia no ka hoʻomaha loa ʻana, ma kahi o ka ʻimi ʻana i wahi e kaiehu aku ai iā ia no ke kumu kūpono. A no laila, ke ʻōlelo nei ʻo Silvert, ʻaʻole maikaʻi ke komo ia mau komikina ʻekolu ma ka wae ʻana i luna mākaʻi hou.

Kūkala ʻia aʻe nei ka makaʻala wai hālana no Oʻahu, ke Kalana ʻo Maui a me ka mokupuni ʻo Hawaiʻi a hiki i kēia ʻauinalā. I ka Pōʻakahi nei ma Oʻahu, ʻeha ihola kekahi kaikamahine ʻōpiopio i kahi kumu lāʻau i hina i kona wā e kali ana ma kahi kau kaʻa ʻōhua ma kahi o ka huina o nā alanui Ala Moana a me Atkinson. A ma muli o ka nui o ka ua o ka Pōʻakahi nei, pio ihola ka uila o Haleʻiwa, ke kahakai o Waialua, ʻo Camp Erdman, ke kahua mokulele ʻo Dilinahama, a ma ke alaloa ʻo Falinatona a me kekahi mau wahi ʻē aku. I ka hola 3:41 o ka ʻauinalā ka pio ʻana o ka uila, a holo hou ana ka uila i loko nō o nā hola ʻelua.

Pōmaikaʻi kākou i kahi makana a Robert Uluwehi Cazimero. He ʻaha mele ana kona. A ma Blue Note Hawaiʻi e mālama ʻia ai ma ka lā 13 o Kēkēmapa. He ʻaha mele Kalikimaka ke ʻano. ʻElua ʻaha mele, aia ka mua i ka hola 6:30 o ke ahiahi, a ʻo ka lua, aia i ka hola 9:00.

Eia mai kā kākou ʻōlelo noʻeau,

Lī ka ʻili i ke anu o Hauaʻiliki.

ʻO ia hoʻi, he anuanu hoʻi kau a koe aku.