04-30-21

ʻEha ihola kekahi mau kānaka i ka pōhaku kaʻa.

ʻO ia aʻela kekahi poʻo nūhou o kēia lā, ka lā 30 o ʻApelila, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

Ua ʻeha kūkonukonu ihola kekahi mau kānaka ʻelua, he 25 makahiki o kekahi, a he 27 makahiki o kekahi, ma ka Wailele o Lulumahu ma Pauoa i ka Pōʻahā nei. I ke awakea, ma kahi o ka hola 1:40 [ma kahi o ka iwakālua minuke i koe kani ka hola ʻelua], e noho ana ia mau kānaka ʻelua a kaʻa ihola he pōhaku a he mau pōhaku paha a pā pono ihola lāua. ʻO ke kanaka nona nā makahiki he 25, aia nō ma ke kūlana kūpilikiʻi. A ʻo ke kanaka nona nā makahiki he 27, aia ma ke kūlana kūkonukonu.

E hoʻomaka ana ka Hoʻokūkū Inoa Moho Pōpaʻipaʻi o nā kāne o nā Kulanui o ʻAmelika. ʻO ka puni mua, aia i ka lā 3 o Mei. E kūʻē ana ʻo Pene Mokuʻāina iā Pelemone Ape. ʻO ka puni ʻelua, aia i ka lā 4 a he ʻelua hoʻokūkū o ia lā. E kūʻē ana ke Kulanui o Kaleponi ma Kāna Palapala iā Pepakine. A ʻo ka lua o ka hoʻokūkū, e kūʻē ana ʻo Lui i ka lanakila o ka hoʻokūkū ma waena o Pene Mokuʻāina a me Pelemone Ape. A ʻo ka puni ʻekolu, aia i ka lā 6 o Mei. A ʻo ko Hawaiʻi kekahi o nā hui o ia lā. E kūʻē ana ʻo Hawaiʻi iā Kana Palapala a iā Pepakine paha. A ʻo Berigama Iana, e kūʻē ana i ka lanakila o ka hoʻokūkū me Lui. A ʻo nā lanakila o ia mau hoʻokūkū hope, e kūʻē ana no ka inoa moho o ke ao nei i ka lā 8 o Mei.

Eia mai kā kākou ʻōlelo noʻeau,

Hea wawalo ke kai o ʻŌʻōkala.

He ʻōlelo hoʻokolohe ia ke lohe ʻia ka leo nui loa o kekahi.

04-28-21

ʻO Hawaiʻi nō ka ʻoi ma ka pāʻani pōpō paʻipaʻi.

ʻO ia aʻela kekahi poʻo nūhou o kēia lā, ka lā 28 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Aloha nō kahi kenekoa o Hawaiʻi nei. Ua loaʻa aku nei ʻo Kenekoa Kalani English i ke KOVITA-19 i ka mahina ʻo Nowemapa i hala i kona manawa e huakaʻi ana me kona ʻohana ma ka ʻāina ʻē. Ua ʻūpalu wale iho nō nā ʻōuli. ʻO ka mea minamina, e kūlōʻihi ana kekahi mau ʻōuli, ʻo ka mālohi mau, ʻo ka pilikia i ka poina wale, a me ka pōwehiwehi o ka noʻonoʻo. No laila, e haʻalele loa ana ʻo English i kona kūlana Kenekoa i ka lā mua o ka mahina ʻo Mei. No Hāna, Maui ʻo English, a aia ʻo ia ma ka ʻAha Kenekoa mai ka makahiki 2000. Na nā luna o ka ʻAoʻao Kemokalaka e koho i ʻekolu mau moho a na ke Kiaʻāina David Ige e koho i ka mea nāna e pani i ka mākālua.

Kau aku nei kekahi mea pāʻani pōpō paʻipaʻi o ke Kulanui o Hawaiʻi i ka hano hāweo. ʻO Rado Parapunov kona inoa, a koho ʻia ihola ʻo ia, ʻo ia ka Mea Pāʻani ʻOi o ka Makahiki o ka ʻAhahui Komohana Nui. Ua lilo nō hoʻi ia kūlana hanohano iā Parapunov i kēlā makahiki aku nei. ʻO ia ka mea pāʻani pōpō paʻipaʻi mua o Hawaiʻi i lilo ʻo ia ka mea pāʻani ʻoi o ka makahiki o ka ʻahahui ma kekahi mau kikina ʻelua, ma hope kekahi o kekahi.

Eia mai kā kākou ʻōlelo noʻeau,

He pili wehena ʻole.

ʻO ia hoʻi, he pili koko.

04-26-21

E ʻae ʻia ana paha ka mālama ʻia ʻana o nā iwi e like me ka hana a nā kūpuna o ke au i hala.

ʻO ia aʻela kekahi poʻo nūhou o kēia lā, ka lā 26 o ka mahina ʻo ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻO kēia lā, ka Pōʻakahi hoʻi, ka lā hope loa no ka waiho inoa ʻana i ka inoa o nā ʻŌiwi Hawaiʻi i lālā no ka pānela nāna e hāpai i ke ala e hoʻokele ʻia ai nā hana hoʻomalu pono iā Maunakea. He ʻumi kumamālima ana lālā o ia pānela, he luna hoʻomalu, he ʻehiku limahana aupuni a he ʻehiku ʻŌiwi Hawaiʻi. ʻŌlelo maila ʻo Healani Sonoda-Pale, e paipai ana Ka Lāhui Hawaiʻi ʻaʻole e komo i ia hana, ʻoiai, ʻo Scott Saiki kekahi ma ia hana, a he kūpaʻa ʻo ia ma hope o ka ʻOhe Nānā Kanakolu Mika. A wahi a Kealoha Pisciotta o ka Mauna Kea Hui, like kēia pānela me kekahi hui i hoʻokumu ʻia ma ka makahiki 2000, akā, ua huli kua ʻia nā ʻŌiwi Hawaiʻi i kākoʻo ʻole i ka TMT a me ke kūkulu ʻana ma luna o Mauna Kea.

Aia nō kekahi kōmike nona nā Lunamakaʻāinana a me nā Kenekoa ke hoʻololi aku nei i ka Pila Kenekoa 1021. He pila ia e ʻae ana i ke kanu ʻana i ke kanaka i hala e like me ke kanu ʻana o ka Hawaiʻi o ka wā kahiko. Na ia kōmike e kūkākūkā a holo like ka manaʻo, ʻoiai, ua ʻāpono ʻia nō kekahi mana o ka pila e ka Hale Lunamakaʻāinana piha a me kekahi mana e ka ʻAha Kenekoa piha.

Eia mai kā kākou ʻōlelo noʻeau,

Mai puni aku o hei i ka ʻupena a ka Lawakua.

ʻO ia hoʻi, ʻaʻohe kumu e hilinaʻi ai i ka ʻōlelo a kekahi.

04-23-21

Hoʻopiʻi ʻia ke Kūlanakauhale e ka wahine nāna ke kāne i make i ke kī pū ʻia e ka mākaʻi.

ʻO ia aʻela kekahi poʻo nūhou o kēia lā, ka lā 23 o ʻApelila, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

Ua make ʻo Lindani Myeni i ke kī pū ʻia e ka mākaʻi i ka lā 14 o ka mahina ʻo ʻApelila. A waiho aku nei kāna wahine, ʻo Lindsay Myeni, i hoʻopiʻi i ke kūlanakauhale a me nā mākaʻi ʻekolu i hihia akula ma ia ahiahi i make ai ʻo Myeni. Ua ʻōlelo ka wahine a Myeni, ʻaʻole hōʻike mai i nā ʻike no ka make ʻana o kāna kāne. Ua noi ʻia nā lipine 911, ka ʻōlelo a ka mea hoʻouna hikiwawe i nā mākaʻi, a me ka māhele wikiō ma mua a ma hope nō hoʻi o ka māhele wikiō a ka ʻOihana Mākaʻi o Honolulu i hoʻolaha ai. ʻAʻohe naʻe wahi mea a loaʻa mai.

Ua hoʻomaka iho nei ka Hoʻokūkū Inoa Moho Pōpō Paʻipaʻi o ka ʻAhahui Komohana Nui. ʻAʻole naʻe i pāʻani nā Koa Ānuenue no ka mea, ua lele wale i ka puni ʻelua, ʻoiai, ʻo Hawaiʻi ka hui nāna nā lanakila nui loa o ia ʻahahui ma ke kau nei a ʻo ia nō hoʻi ka hui helu ʻekahi o ka hoʻokūkū. Ua lanakila aku nei ke Kulanui o Kaleponi ma Kāna Kieko ma luna o Cal State Northridge i ka Pōʻahā nei, a no laila, ʻo ia ana ka hoa paio o nā Ānuenue i ka hola ʻehiku o kēia ahiahi. I ka hapalua hola ʻehā o ka ʻauinalā, e kūʻē ana ke Kulanui o Kaleponi ma Kāna Palapala iā ke Kaha Loa. ʻO nā hui lanakila ʻelua ke ʻāʻumeʻume aku no ka inoa moho o ka ʻAhahui Komohana Nui i ka hola 7:00 o ke ahiahi Pōʻaono.

Eia mai kā kākou ʻōlelo noʻeau,

Aia nō i ke au a ka wāwae.

He pane kēia ke nīnau ʻia, “E hele ana ʻoe i hea?”

04-21-21

Ua kau ka ʻōlelo hoʻoholo no Derek Chauvin.

ʻO ia aʻela kekahi poʻo nūhou o kēia lā, ka lā 21 o ʻApelila, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.

Ua kau aʻela ka ʻōlelo hoʻoholo a ke kiule no Derek Chauvin, he mākaʻi ma mua no Mineapoli. Ua pili nō ʻo Chauvin i ka hewa ma ka pepehi kanaka ulia ma ke kēkelē ʻelua, ma ka pepehi kanaka ma ke kēkelē ʻekolu a ma ka lawe ola ma ke kēkelē ʻelua. Ma ka lā 25 o ka mahina ʻo Mei o kēlā makahiki aku nei, ua make ihola ʻo George Floyd ma muli o ke kukuli ʻana aku o Chauvin ma ka ʻāʻī o Floyd no nā minuke he ʻeiwa me ka hapa. A i hopu ʻia ʻo Floyd i kona hoʻohuoi ʻia no ka hāʻawi ʻana aku i ke kālā hoʻopunipuni, he pila ʻaluʻalu o $20, ma ke kūʻai ʻana mai i ka ʻope kikaliki. E kau ana ka ʻōlelo hoʻopaʻi o Chauvin ke hala nā mahina ʻelua. ʻO ka hoʻopaʻi ʻoi no ka hoʻopiʻi koʻikoʻi loa, he 40 makahiki o ka noho paʻahao ʻana.

E noi ke Kiaʻāina Yuriko Koike o Tokyo lāua ʻo ke Kiaʻāina Hirofumi Yoshimura o Osaka i ke aupuni o Iāpana i ke kūkala i ka ulia pōpilikia ma muli o ka maʻi ahulau. Aia nō ke māhuahua hou aʻela ma ia mau wahi. ʻO Tokyo ke kapikala, a ʻo Osaka ka helu ʻelua o nā kūlanakauhale nui loa o Iāpana. Ma Tokyo, he 843 mau kānaka i loaʻa i ke COVID-19 i ka Pōʻakolu. ʻAkahi a hoʻomaka ke aupuni o Iāpana i ke ʻō ʻia ʻana o ka lehulehu i ka lāʻau koʻokoʻo i kēia mahina nei, ʻo nā kānaka i piha nā makahiki he 65 a ʻoi. I loko nō o ia mau pilikia, ua paʻa ka manaʻo o ke Kuhina Nui Yoshihide Suga, e hoʻomaka nō nā Pāʻani ʻOlimepika ma Tokyo i ka lā 23 o ka mahina ʻo Iulai.

Eia mai kā kākou ʻōlelo noʻeau,

Hāʻule i ka hope waʻa.

He ʻōlelo no ke kanaka i hiki hope loa mai, a i hiki lohi mai paha.

04-19-21

He mau polokalamu kula kauwela manuahi ke mālama ʻia ana i kēia kauwela.

ʻO ia aʻela kekahi poʻo nūhou o kēia lā, ka lā 19 o ʻApelila, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

E mālama ʻia ana kekahi mau polokalamu kula kauwela e nā kula aupuni he 230 a ʻoi a puni kēia pae ʻāina nei. I mea ia e kōkua ai i nā haumāna ʻoiai he makahiki kula kūpikipikoʻō ka makahiki nei i hala ma muli o ka maʻi ahulau. Eia mai kekahi mau mea e mālama ʻia ana, ʻo nā papa maʻa mau no ka ʻai, ʻo ke kikowaena aʻo, ʻo ke kākoʻo no nā haumāna nele i ke kōkua kūikawā ʻole, ʻo ka polokalamu holo mīʻoi ma kekahi mau kumuhana, a me ka polokalamu hoʻomākaukau haumāna no ke kulanui. A no nā keiki e komo ana i ka papa māla aʻo, i komo ʻole i ke kula kamaliʻi, e mālama ʻia ana kekahi papa hoʻomākaukau. ʻO kekahi, e hiki ana i nā haumāna o ka papa kiʻekiʻe loa ke hoʻomau i ka hapahā ʻehā a i ke kauwela i mea e hoʻokō ai i nā ʻai e pono ai ka puka ʻana. A ʻo ia mau polokalamu, he manuahi nō.

Ua loaʻa maila ka poloka kokī ma Waimānalo. I ka mahina ʻo Pepeluali, ua hōʻike aku kekahi kanaka e noho ana ma laila no kona lohe ʻana i ka poloka kokī. Akā, i ka hele ʻana aku o nā luna nānā o ka ʻOihana Mahi ʻAi o Hawaiʻi i ia pō, ʻaʻohe wahi poloka i lohe ʻia a i loaʻa mai hoʻi. Ma hope mai, he ʻelima manawa o ia mau luna nānā i hele hou ai, a loaʻa mai nō nā poloka he ʻekolu a emi mai i kēlā me kēia manawa. A lohe ʻia nō hoʻi nā poloka kokī ma kekahi mau wahi e pili ana. A ʻāpono ʻia ka huli ʻana ma ia mau wahi pili, a ma ka mahina ʻo Malaki, loaʻa maila nā poloka kokī he 33. A ma kēia mahina nei ʻo ʻApelila, ua loaʻa hou maila he 18 i ka lā 9, a he 14 i ka lā 15. ʻO ka lua kēia o ka manawa i loaʻa mai ai ka poloka kokī ma Oʻahu nei. I ka mahina ʻo Iune o ka makahiki 2003, ua loaʻa maila ma Wahiawā. Akā, ua hoʻopau loa ʻia ma laila ma hope o nā makahiki ʻekolu.

Eia mai kā kākou ʻōlelo noʻeau,

ʻAʻohe hua o ka maiʻa i ka lā hoʻokahi.

He pane kēia i ke kanaka ahonui ʻole.

04-16-21

Kī pū ʻia kekahi kanaka e ka mākaʻi a make.

ʻO ia aʻela kekahi poʻo nūhou o kēia lā, ka lā 16 o ʻApelila, he Pōʻalima. Welina e nā makamaka.

ʻO Ke Aolama kēia a penei ka nūhou.

Ua make kekahi kanaka i ke kī pū ʻia e ka mākaʻi ma Nuʻuanu i ka pō Pōʻakolu nei. ʻO Lindani Sanele Myeni kona inoa. He 29 ona makahiki a no ʻApelika Hema ʻo ia. ʻAʻohe pū ma ka lima o Myeni. Ua ʻōlelo ʻia, komo wale akula ʻo Myeni i loko o ka hale o kekahi ʻohana a e hoʻāʻo ana ʻo ia e kamaʻilio me nā kānaka o ka hale. Ma hope mai, haʻalele ihola ʻo Myeni i ka hale. I ka hiki ʻana o ka mākaʻi i laila, aia ʻo Myeni ma luna o kona kaʻa. Lele ihola ʻo ia i lalo a hoʻomaka akula i ka hele aku i kekahi o nā mākaʻi. A laila, kāhea kekahi mākaʻi, e kū ʻo Myeni a moe ma ka honua. ʻO ka huli akula nō o Myeni a holo akula i ia mākaʻi me ke kuʻi ʻana aku iā ia he mau manawa. Hiki maila ke kolu o ka mākaʻi, a kī uila ʻo ia iā Myeni, he mea ʻole naʻe ia iā ia. Kuʻi akula ʻo Myeni i ke kolu o ka mākaʻi a laila hoʻomaka e holo hou aku no ka mākaʻi āna e kuʻi ana ma mua, kī akula ʻo ia i hoʻokahi pōkā iā Myeni, kiomana ihola ʻo Myeni ma luna o ia mākaʻi me ka noke aku i ka pāluku iā ia. A laila, kī maila kekahi mākaʻi iā Myeni he ʻekolu manawa. A hina ihola ʻo Myeni. ʻO ka mea ʻāpiki, ʻaʻole i hopu ʻia ʻo Myeni ma mua no ka hana kalaima.

E holo mua ana ke Keʻena Kuleana Hawaiʻi ma ka hoʻolālā ʻana i ke kūkulu ʻana i nā ʻeka he 30 ma Kakaʻako i loko nō o ke kūʻē ʻana o kekahi poʻe o ke kaiāulu a me ka ʻaha kenekoa o Hawaiʻi. A he kānāwai nō hoʻi e pāpā ana i ke kūkulu ʻana i kahi noho ma laila. I ka Pōʻahā nei, ua hoʻokumu iho nei ka Papa Kahu Waiwai o ke Keʻena Kuleana Hawaiʻi i kekahi pānela no ka ʻimi ʻana a loaʻa kahi papa helu o nā kānaka kūkā kūkulu, ka noiʻi ʻana i nā lula ʻāina a waiwai ʻoihana kālepa a me ka hai paha i ke kanaka hoʻolālā kaiāulu.

Eia mai kā kākou ʻōlelo noʻeau,

ʻAi nō ka ʻiole a haʻalele i kona kūkae.

He ʻōlelo kēia no ke kanaka maua, ʻaʻole ʻo ia hōʻike i ka mahalo i ka mea i hana loko maikaʻi iā ia.

04-14-21

Paʻakūkū ke koko o kekahi mau wāhine ma muli o ka lāʻau koʻokoʻo a ka hui ʻo Johnson & Johnson.

ʻO ia aʻela kekahi poʻo nūhou o kēia lā, ka lā 14 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou,

He mau koko paʻakūkū ko kekahi mau wāhine i ʻō ʻia i ka lāʻau koʻokoʻo COVID-19 a ka hui ʻo Johnson & Johnson. He ʻeono lākou a ʻo kekahi, ua make ihola. A no laila, no ka manawa, e hoʻōki ʻia ke ʻō ʻia ʻana o ka lāʻau koʻokoʻo a J&J. Ua ʻike ʻia nā ʻōuli o ke koko paʻakūkū mai ka ʻeono a ka ʻumi kūmākolu mau lā ma hope o ke ʻō ʻia ʻana o ia mau wāhine ʻeono i ka lāʻau koʻokoʻo a J&J. Ua loaʻa maila he 47,612 māhele o ia lāʻau koʻokoʻo i ka mokuʻāina ʻo Hawaiʻi a ʻō ʻia aku nei he 17,808 māhele lāʻau. A hiki i kēia manawa, ʻaʻohe kanaka ma Hawaiʻi nei i hōʻike mai he koko paʻakūkū ko lākou ma hope o ke ʻō ʻia ʻana i ka lāʻau koʻokoʻo a J&J. Akā, inā ua ʻō ʻia ʻoe i ia lāʻau, e makaʻala i nā ʻōuli, ʻo ia hoʻi, ʻo ka ʻapiʻapi ma ka hanu ʻana, ke poʻo huaʻi, ka ʻeha o ka ʻōpū a me ka ʻeha o ka wāwae.

I ka lā mua o ka mahina ʻo Iulai, e piʻi ana he 10% ka uku makahiki o ke kiaʻāina, nā luna kau kānāwai, nā luna kānāwai a me nā luna o nā keʻena aupuni mokuʻāina o Hawaiʻi. Akā, e hoʻopaneʻe ʻia ana a hiki i ka mahina ʻo Ianuali o ka makahiki 2023. I holo ka manaʻo e hoʻopaneʻe ʻia ka piʻi o ka uku makahiki ma muli o ka pilikia i ka maʻi ahulau COVID-19. Aia nō ka pila ma ka Hale o nā Lunamakaʻāinana i kēia manawa a e koho pāloka hou ana lākou i ka Pōʻahā. Kākoʻo nō hoʻi ke Kiaʻāina David Ige.

Eia mai kā kākou ʻōlelo noʻeau,

He ʻīnaʻi na ka wela a ka lā.

He ʻōlelo kēia no ke kanaka i moʻa loa kona ʻili i ka lā.

04-12-21

Aloha nō. Ua moe aku nei kahi loea hoʻokele waʻa i ka moe kapu o Niolopua.

ʻO ia aʻela kekahi poʻo nūhou kēia lā, ka lā 12 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua hala akula kahi loea hoʻokele waʻa i ke ao polohiwa a Kāne i ka Pōʻahā nei. ʻO Chad Kalepa Baybayan nō. Aia ʻo Baybayan me kāna wahine ma Sitala kahi e lapaʻau ʻia nei ka moʻopuna a lāua no ka maʻi ʻaʻai. A ma laila i hanu ai ʻo Baybayan i ka hanu hope loa. Hōʻike maila ka makuahine o Baybayan, ʻo Lillian Suter, maikaʻi wale ʻo Baybayan, a loaʻa ihola kona kino e waiho wale ana i kāna wahine ma hope o kekahi haʻi ʻōlelo a Baybayan i mālama ʻia ma ka Zumalani. Mai ka makahiki 1975 kāna hana ʻana ma ka Hōkūleʻa, a ma hope mai, lilo ihola ʻo ia i kāpena a i hoʻokele waʻa no nā waʻa kaulua ʻo ka Hōkūleʻa, ka Hawaiʻiloa a me ka Hōkūalakaʻi. Nui kona holo ʻana ma ka Hōkūleʻa. I ka makahiki 1980, ʻo ia ka ʻōhua ʻōpiopio loa ma ka holo ʻana i Kahiki a me ka hoʻi ʻana mai. ʻO ia kekahi ma ka holo mua ʻana i Aotearoa i ka makahiki 1987. A ʻo Baybayan ka mea nona nā mile nui loa i holo ai ma ke ʻano he kāpena a he luna hoʻokele ma ka huakaʻi “Mālama Honua” i holo a puni ka honua. Ua haʻalele ʻo Baybayan i hope nei, i kāna mau kaikamāhine, ʻo Kalā Tanaka lāua ʻo Pukanalā Llanes; kāna keiki kāne ʻo ʻAukai, kona mau palala, ʻo Lyle Baybayan lāua ʻo Ted Suter; a me kona kaikuahine, ʻo Sister Anne Marie.

Ma Minekoka, kī ʻia kekahi kanaka i ka pū e ka mākaʻi, a make ihola ʻo ia. ʻO Daunte Wright kona inoa. E kalaiwa ana ʻo Wright a hoʻokū ʻia ʻo ia e ka mākaʻi ma muli o kekahi ʻaʻe. A laila, ʻike akula ka mākaʻi, he palapala hopu ko Wright a hoʻāʻo akula ka mākaʻi e hopu aku iā ia, akā, kau hou akula ʻo ia ma luna o kona kaʻa. I kona kau hou ʻana aku, ua kī akula ka mākaʻi a kū ʻo Wright i ka pōkā. ʻO ke kalaiwa akula nō ia o Wright, akā, ma hope iki mai, ua make ihola ʻo ia. Kohu mea lā, he ulia ke kī ʻana, ua manaʻo paha ka mākaʻi, e hoʻohana i ka pū uila, ʻo ka pū kī pōkā naʻe ka mea āna i paʻa ai ma kona lima.

Eia mai kā kākou ʻōlelo noʻeau,

Piʻi aku a kau i ka nuʻu.

He ʻōlelo kēia no ke kanaka i kau i ka hano.

04-09-21

E lohe hou ʻia ana ka leo o Prince.

ʻO ia aʻela kekahi poʻo nūhou o kēia lā, ka lā 9 o ʻApelila, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

Ua kī aku nei ʻo Phillip Adams i ʻelima mau kānaka a make i ka Pōʻakolu nei ma Kalolaina  Hema. A ma hope mai, hoʻi akula ʻo Adams i ka hale o kona mau mākua, a kī ihola iā ia iho a make. ʻO nā kānaka āna i hoʻomake ai, he kauka, ʻo Robert Lesslie a me kāna wahine, ʻo Barbara, a me kā lāua mau moʻopuna ʻelua, he ʻeiwa makahiki o kekahi, a he ʻelima makahiki o kekahi. ʻO ka lima o ke kanaka i kī ʻia a make, ʻo James Lewis, he limahana ʻo ia ma ka hale o ka ʻohana Lesslie. Ua kī ʻia kekahi kanaka, a aia ʻo ia ma ka haukapila me nā ʻeha pōkā kūkonukonu. He mea pāʻani pōpō peku ʻo Adams ma mua. Ua pāʻani pōpō peku ʻo ia ma ke ʻano he loea no nā makahiki he ʻelima. ʻAʻole i maopopo ke kumu a Adams i kī aku ai i ia mau kānaka.

He pā hoʻokani hou i piha i nā mele a Prince ke kūʻai ʻia. Ma ka lā 30 o ka mahina ʻo Iulai e hemo ai. A ʻo ka inoa o ua pā hoʻokani hou lā, ʻo “Welcome 2 America.” He ʻumi kūmālua mele o ia pā hoʻokani a ua ʻoki ʻia ma ka Hale ʻOki Leo ʻo Paisley Park i ka makahiki 2010, ʻaʻole naʻe i hoʻolaha ʻia ma mua. Ua make ʻo Prince ma muli o ka pākela ʻai lāʻau i ka makahiki 2016. Mai ka makahiki 2010 a i ka makahiki 2012, mālama aku nei ʻo Prince he 80 ʻaha mele a ʻoi ma ka inoa like o ka pā hoʻokani ʻo “Welcome 2 America” akā, ʻaʻole naʻe ʻo ia i hōʻike i kāna kumu i hoʻolaha ʻole ai i ia pā.

Eia mai kā kākou ʻōlelo noʻeau,

Hāʻale i ka wai a ka manu.

ʻO ia hoʻi, he kanaka uʻi.