04-05-21

Kū kilakila ana nā wāhine o Kanapola.

ʻO ia aʻela kekahi poʻo nūhou o kēia lā, ka lā 5 o ʻApelila, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

I ka Pōʻakahi, e hoʻomaka ana nā Kalana o Maui, Hawaiʻi a me Kauaʻi i ke ʻō ʻana aku i nā kānaka nona nā makahiki he 16 a ʻoi i ka lāʻau koʻokoʻo COVID-19. Inā ʻaʻole i piha nā makahiki he 18 i kekahi, he pono ke ʻalo pū ʻia e kona makua a me kona kahu paha. Ma Oʻahu nei, aia nō ke ʻō ʻia akula nā kānaka nona nā makahiki he 60 a ʻoi.

Mai hāʻule ʻo Kanapola ma ka hoʻokūkū inoa moho pōpō hīnaʻi. He mau kekona helu wale nō i koe a kī akula ʻo Aari McDonald o ʻAlikona, ʻaʻole naʻe i komohia, akā, inā i komohia ka pōpō inā ua lanakila nā Pōpoki ʻĀhiu o ʻAlikona. A no laila, lilo akula ka inoa moho i nā wāhine o Kanapola ma ka helu ʻai he 54 i ke 53. A ʻo ka inoa moho mua ia i lilo i nā Manu ʻUlaʻula a me ke kumu aʻo Tara VanDerveer ma nā makahiki he 29 i kaʻa hope aku nei.

A i kēia ahiahi, e kūʻē aku ana ʻo Gonzaga iā Baylor no ka inoa moho pōpō hīnaʻi. ʻO Gonzaga, ʻaʻole i hāʻule iki i kēia kau nei. Hoʻokahi wale nō hui i hāʻule ʻole ma ke kau me ka lilo ʻana mai o ka inoa moho iā ia, ʻo ia ʻo ʻInikiana i ka makahiki 1976. A inā lanakila ʻo Gonazaga, ʻo ka hui ʻelua ana ia nāna e hana pēlā. ʻO ka lua kēia o ka manawa o nā ʻĪlio Pulu o Gonzaga i hiki aku ai i ka puni inoa moho. I ka makahiki 2017 ka mua, a ua hāʻule ihola lākou iā Kalolaina ʻĀkau.

Eia mai kā kākou ʻōlelo noʻeau,

ʻAʻohe puʻu kiʻekiʻe ke hoʻāʻo ʻia e piʻi.

ʻO ia hoʻi, he hiki nō ke loaʻa ka haʻina o ka pilikia ke hoʻoikaika i ka huli.

03-31-21

Hoʻopiʻi ʻia ke Keʻena Hoʻomalu Lehulehu o Hawaiʻi.

ʻO ia aʻela kekahi poʻo nūhou o kēia lā, ka lā 31 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

E hoʻopiʻi ana ʻo Kevin Lifoifoi i ke Keʻena Hoʻomalu Lehulehu o Hawaiʻi. He paʻahao ʻo Lifoifoi i ʻeha i ka wā i ala aʻe ai ka haunaele ma ka Hale Paʻahao o Maui i ka makahiki 2019. Ma ka hihia a Lifoifoi, e ʻōlelo ana ʻo ia, ʻaʻole i hoʻomalu pono ʻia nā paʻahao ma kahi hale paʻahao i pihakuʻi. Ua haki ke ā o Lifoifoi a he mau ʻeha ʻē aʻe kona. I ia manawa, ua ʻoi aku he 40 pākeneka i ka nui e piha ai ia hale paʻahao.

Ua hopu ʻia ka Lunamakaʻāinana Sharon Har no ke kalaiwa ʻana i ke kaʻa ma lalo o ka malu o ka waiʻona i ka lā 22 o ka mahina ʻo Pepeluali a ua hana ʻia kekahi kōmike kūikawā ma ka Hale o nā Lunamakaʻāinana no ka noiʻi ʻana i ia hopu ʻia ʻana o Har. Akā, e kāpae ʻia ʻana ka noiʻi ʻana, aia a hoʻoholo ʻia ka hopena o kona hoʻopiʻi ʻia ʻana. E hele ana ʻo ia i mua o ka ʻaha hoʻokolokolo i ka lā 20 o ʻApelila.

I ka Pōʻakahi nei, ua limanui ʻia kekahi luahine ʻĀkia ʻAmelika ma Nū Ioka i kona wā e hele ana i ka hale pule. Ua peku ʻia ʻo ia ma kona ʻōpū a hehi ʻia kona maka. ʻO Vilma Kari ka inoa o ia luahine. He Pilipino ʻo ia a he 65 ona makahiki. Ua hopu ʻia ke kanaka nāna ia hana mānaʻonaʻo. ʻO Brandon Elliot kona inoa, a ua hopu ʻia ʻo ia i ke aumoe nei. Ua hoʻāhewa ʻia ʻo Elliot no ka pepehi ʻana i kona makuahine a make i ka makahiki 2002. A hoʻokuʻu ʻia ihola ma ka palola i ka makahiki 2019.

Eia mai kā kākou ʻōlelo noʻeau,

He hoʻokele waʻa no ka lā ʻino.

ʻO ia hoʻi, he kanaka koa.

03-29-21

Kū nā kānaka no ka pono o ka poʻe ʻĀkia ʻAmelika.

ʻO ia aʻela kekahi poʻo nūhou o kēia lā, ka lā 29 o ka mahina ʻo Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Pōʻaono nei, ʻākoakoa aku nei nā kānaka he mau haneli ka nui ma ke Kapikala i Honolulu nei no ke kū ʻana i ka pono o nā ʻĀkia ʻAmelika. A pēlā nō i kū ai nā kānaka he nui a puni ʻo ʻAmelika Hui Pū ʻia. Ua māhuahua loa aʻela ka hoʻokae ʻili a me ka hana ʻino weliweli i ka poʻe ʻĀkia ʻAmelika mai ka wā mai i hoʻomaka ai ka pāhola ʻana o ka maʻi ahulau COVID-19. Ma ka makahiki 2020, ʻo nā kalaima makawela i hana ʻia i nā ʻĀkia ʻAmelika, ua piʻi aʻela he ʻeono pākeneka, akā, ʻo nā kalaima makawela a pau, ua emi ihola he 145 pākeneka.

 Ua kī ʻia iho nei kekahi kanaka i ka pū a make i ka pō Pōʻaono nei ma ʻAiea. ʻO Malakai Maumalanga ka inoa o ua kanaka lā a ua piha nā makahiki he 45 iā ia. I ka wā e ʻōpiopio ana ʻo Maumalanga, he lālā ʻo ia no kekahi pūʻulu hana kolohe, akā, ma hope mai, ua hoʻololi ihola ʻo ia i ke ʻano o kona nohona me ka manaʻo e hahai mai ma hope ona nā ʻōpiopio e hele ana i ke ala kūpono ʻole. A ua kō nō kona manaʻo, he nui nā ʻōpiopio āna i kōkua ai ma ka hui ʻo nā Hoa Kanaka Makua no nā ʻŌpiopio. Ua hai ʻia ʻo ia e ia hui i ka makahiki 2002. A ua hele ʻo ia i ke kulanui a loaʻa maila ke kēkelē lae pua a me ke kēkelē lae oʻo ma ka hana lawelawe kanaka. ʻO ka make ana o Maumalanga, he pepehi kanaka ia ma ke kēkelē ʻelua, a aia nō nā mākaʻi ke noiʻi akula.

Eia mai kā kākou ʻōlelo noʻeau,

ʻAʻohe kolopā nāna e une.

He ʻōlelo kēia no ke kanaka poʻo paʻakikī.

03-24-21

Ma muli o ka maʻi ahulau, emi ihola nā haumāna kula kiʻekiʻe i komo i ke kulanui.

ʻO ia aʻela kekahi poʻo nūhou o kēia lā, ka lā 24 o ka mahina ʻo Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma Hawaiʻi nei, ua kualiliʻi ihola nā haumāna kula kiʻekiʻe ʻakahi a puka i komo i ke kulanui ma muli o ka maʻi ahulau i pāhola aku nei a puni ka honua. Ma waena o nā haumāna i puka mai ke kula kiʻekiʻe mai i ka makahiki 2019, he 55 pākeneka i kaukoe i ka ʻimi naʻauao ʻana ma ke kulanui. A ma ka makahiki 2020, he 50 wale nō pākeneka. A no ka ʻŌiwi Hawaiʻi, ua kanahaʻi loa ihola, he ʻeiwa pākeneka, mai ke 44 pākeneka a ke 35 pākeneka. A no nā kānaka o nā ʻAilana Pākīpika, emi ihola he ʻeono pākeneka, mai ke 35 pākeneka a ka 29 pākeneka.

ʻAe aku nei ʻo Marcus Mariota i ka hoʻololi ʻia ʻana o kāna palapala ʻaelike me nā Mea Pākaha o Vegas i mea e mau ai kona pāʻani ʻana me ia hui i ka makahiki 2021. Ma ka palapala ʻaelike a Mariota i pūlima ai i ka makahiki 2020, ua uku ʻia ʻo ia he $7 miliona ma ka makahiki mua o ia palapala ʻaelike. Akā, ma muli o ka maʻi ahulau, noi aku nei ʻo Vegas e hoʻololiloli ʻia. I kēia manawa, e uku ʻia ʻo Mariota he $3.5 miliona, a inā hoʻokō ʻia nā mea like ʻole o ia palapala ʻaelike, e piʻi aʻe ia uku a ka $8 miliona. Hoʻokahi wale nō hoʻokūkū a Mariota i pāʻani ai i ka makahiki 2020 ma muli o ka ʻeha, akā, ua maikaʻi wale. He 226 āna ʻīā i nou ai a me ka ʻai holo, a he 88 āna ʻīā i holo ai.

Eia mai kā kākou ʻōlelo noʻeau,

ʻAʻohe hana a Kauhikoa; ua kau ka waʻa i ke ʻaki.

ʻO ia hoʻi, ua pau ka hana.

03-22-21

Aia nō kekahi kalaima mānaʻonaʻo ke noiʻi ʻia akula ma ʻAtalana.

ʻO ia aʻela kekahi poʻo nūhou o kēia lā, ka lā 22 o ka mahina ʻo Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.

Aia nō nā mākaʻi pekelala ke noiʻi akula i ke kī ʻana aku o Robert Aaron Long i kekahi mau kānaka he ʻewalu i ka pū a make ma ʻAtalana. A ʻo nā mākaʻi o laila kekahi e noiʻi akula. ʻO kahi nīnau, ʻo ke kū a me ke kū ʻole paha o ka hana a Long i ke kalaima hoʻokae. Hōʻike mai nei nā mākaʻi pekelala, a hiki i kēia manawa, ʻaʻohe wahi hōʻike e kuhikuhi ana, he kalaima makawela ia. He ʻehiku o nā kānaka ʻewalu i make, he mau wāhine, a he ʻeono o lākou, he ʻĀkia.

I ka Pōʻaono nei, ua make aku nei kekahi kanaka o ka mokupuni ʻo Hawaiʻi ʻoiai ʻo ia ma lalo o ka malu o ka ʻOihana Mākaʻi o laila. Ua kāhea ʻia ka mākaʻi no kahi pilikia a i ka hōʻea ʻana aku i kahi o ka pilikia, ua paʻa ʻē ke kanaka i kekahi mau kānaka ʻē aku i ka hopu ʻia. A i ka lilo ʻana o ua kanaka lā i ka mākaʻi, ʻike ʻia ihola, ua kūpolō, a no laila, hoʻāʻo akula e hoʻōla iā ia a ka hiki ʻana aku o nā kinai ahi. ʻAʻole naʻe i ola hou ke kanaka. A lawe ʻia akula ʻo ia i ka Haukapila Kaiāulu o Kona a kūkala ʻia ihola kona make i ka hola 6:21 o ke ahiahi. ʻAʻole e hōʻike ʻia aku ka inoa o ua kanaka lā, aia wale nō a hoʻomaopopo mua ʻia kona ʻohana. Aia nō ke noiʻi ʻia akula kona make.

Eia mai kā kākou ōlelo,

Pohu ka nohona, ua lulu kohekohe.

ʻO ia hoʻi, ua laʻikū.

03-12-21

Pūlima ʻia aku nei ka pila puʻu hoʻomaha maʻi ahulau e ka Pelekikena Joe Biden.

ʻO ia aʻela kekahi poʻo nūhou o kēia lā, ka lā 12 o ka mahina ʻo Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

Aia nō ka ʻOihana Mākaʻi o Maui ke huli akula i kekahi kanaka i nalowale. ʻO Ryan Matthew Harris kona inoa, a ʻo Wangpo kona inoa kapakapa. ʻO ka lā 22 o Pepeluali kona lā hope loa i ʻike ʻia ai. He haole ʻo Harris nona ka lauoho hāʻehuʻehu a me nā maka mākuʻe. He 5 ona kapuaʻi me nā ʻīniha he 11, a he 160 ona paona. A he 31 ona makahiki. Inā he ʻike paha kāu no Harris, e kāhea i ka helu (808)244-6400. A inā he ulia pōpilikia, e kāhea i ka helu 9-1-1 me ka hōʻike aku i ka helu hōʻike #21-008545.

I ka Pōʻahā nei, ua pūlima aku nei ka Pelekikena Joe Biden i ka bila puʻu hoʻomaha maʻi kolona e hoʻokaʻawale ana he $1.9 keliliona. Ma ia pila, e lilo ana he $1,400 i nā kānaka nona ka loaʻa makahiki he $75,000 a emi mai. A e hoʻomau ʻia ana nā pōmaikaʻi o ka poʻe i nele i ka hana ma muli o ka maʻi ahulau, he $300 a ka pule mua o ka mahina ʻo Kepakemapa. A he mau mea hou aku e kōkua ana i nā kānaka me nā hui ʻoihana liʻiliʻi.

A ma muli o ia pila a Biden i pūlima ai, pōmaikaʻi ihola nā limahana o ke aupuni mokuʻāina. E lilo ana iā Hawaiʻi, he $1.6 biliona. A no laila, ʻōlelo aʻela ke Kiaʻāina David Ige, ʻaʻole e hoʻokuʻu ʻia ana nā limahana aupuni mokuʻāina ma muli o ka lawa ʻole o ke kālā e uku ʻia ai lākou. A ʻaʻole e hoʻēmi ʻia ana ko lākou mau lā hana a me ka uku pū. Akā, aia nō ke nānā ʻia akula ka moʻohelu kālā o ke aupuni mokuʻāina, he pono paha ke ʻoki ʻia kekahi mau mea, ʻaʻole paha.

Eia mai kā kākou ʻōlelo noʻeau,

Hoʻi hou i ka iwi kuamoʻo.

ʻO ia hoʻi ka hoʻi ʻana i ka ʻāina hānau a i ka ʻohana paha ma hope o kekahi wā ma kahi ʻē.

03-10-21

E piʻi ana paha ka ʻauhau o kekahi poʻe ma Hawaiʻi nei.

ʻO ia aʻela kekahi poʻo nūhou o kēia lā, ka lā 10 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma ka ʻAha Kenekoa o Hawaiʻi nei, ua ʻāpono ʻia aku nei kahi pila e piʻi ai ka ʻauhau ma luna o ka loaʻa a nā kānaka i ʻoi aku ka loaʻa makahiki i ka $200,000. E hiki aku ana ka ʻauhau a ka 16 pākeneka. I kēia manawa, he 11 pākeneka. Hoʻokahi wale nō kenekoa i hōʻole i ia pila, ʻo ia ʻo Kenekoa Gil Riviere. E lele ana ua pila lā i ka Hale o nā Lunamakaʻāinana. Ke ʻāpono ʻia, ʻo ia ana ka ʻauhau loaʻa kiʻekiʻe loa ma ʻAmelika Hui Pū ʻIa. ʻO Kaleponi ka mokuʻāina nona ka ʻauhau loaʻa kiʻekiʻe loa i kēia manawa, he 13.3 pākeneka. Akā, ma luna ia o ka loaʻa a ka poʻe i ʻoi aku ka loaʻa makahiki i ka $1 miliona.

Aia ana kahi kaikamahine Hawaiʻi ma ka Hoʻokūkū Puʻukani ʻo ka Leo i kēia kikina. ʻO Ciana Pelekai kona inoa. He iwakālua ona makahiki, a no Waiʻanae nō akā, aia ʻo ia ke noho akula ma Las Vegas i kēia manawa me kona ʻohana. ʻO John Legend kāna kumu aʻo ma ia hoʻokūkū. Ua ʻoki leo ʻo Pelekai i ʻelua mele ma mua, a aia nō ke kūʻai ʻia nei. ʻO Bluff ka inoa o ka mua i ka makahiki 2019 a ʻo What’s Wrong With Love ka lua i ka makahiki 2020.

Eia mai kā kākou ʻōlelo noʻeau,

Nāpelepele nā pali o Kalalau i ka wili a ka makani.

He ʻōlelo kēia no ke kanaka i piula.

03-08-21

He polokalamu paha ke hoʻokumu ʻia no ka pono o ka poʻe kuewa.

ʻO ia aʻela kekahi poʻo nūhou o kēia lā, ka lā 8 o Malaki, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

Ma Kenewa i Kololako, he polokalamu no ka pono o ka poʻe kuewa, ʻo ia hoʻi, ke kupu aʻe kahi pilikia weliweli ʻole e pili ana i ka poʻe kuewa, ʻaʻole ʻo ka mākaʻi ke hele i laila, ʻo ke kahu lapaʻau ulia a me ke kahu maʻi noʻonoʻo ke hele. A he manaʻo ko Anton Krucky, ke poʻo o ke Keʻena Hoʻonoho Wahi Noho o Honolulu, e hana i polokalamu like ma Oʻahu nei. He manaʻo ko Krucky e hoʻākoakoa i nā kānaka i nui ka ʻike no ia mea he kuewa a me ke kanaka kuewa nō hoʻi no ka hoʻolālā ʻana i polokalamu kūpono. Koho ihola ʻo Krucky, he ʻekolu mahina, a emi mai, e paʻa ai kahi papa hana a laila, ʻo ka mea koe, ʻo ka ʻimi ʻana i puʻu kālā e holo ai.

Pōmaikaʻi nā kānaka nona nā hale i pau i ka pele o Kīlauea i ka makahiki 2018. E hiki ana iā lākou ke kūʻai aku i ko lākou mau hale i ke Kalana ʻo Hawaiʻi ma muli o kahi puʻu kālā pekelala i loaʻa mai. Ua holo ka manaʻo o ka ʻAha Kūkā o ke Kalana ʻo Hawaiʻi, e hoʻokaʻawale he $84 miliona no nā papahana hoʻomōhala. A he $78 miliona o ia puʻu, ʻo ia ka nui i hoʻokaʻawale ʻia no ke kūʻai ʻana i nā hale i pau i ka pele. E hoʻolilo ʻia he $230,000 a emi mai paha ma ke kūʻai ʻana i ka hale hoʻokahi. E hoʻomaka ke noi ʻana i ka hopena o ka mahina ʻo ʻApelila.

Eia mai kā kākou ʻōlelo noʻeau,

Ua pau koʻu lihi hoihoi i ka nani o Poka ʻAilana.

ʻO ia hoʻi, ua pau ka hoihoi i kekahi mea.

03-05-21

Nei ana ke ōlaʻi ma kahi e kokoke ana i Aotearoa.

ʻO ia aʻela kekahi poʻo nūhou o kēia lā, ka lā 5 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

He inoa hou ko ka māwae 8 ma Pāhoa. He puʻu ʻākeke ia i kēia manawa nona nā kapuaʻi he 100. Ua kapa ʻia kona inoa ʻo Ahuʻailāʻau. Koho ʻia iho nei ua inoa lā mai loko mai o nā inoa i waiho ʻia e ke kaiāulu. Ua ʻae ʻia nā inoa no nā makahiki ʻelua a ʻoi a hiki i ka lā 30 o ka mahina ʻo Iune o ka makahiki 2019. ʻO ka inoa, ʻo Ahuʻailāʻau, na Kalani Makekau-Whittaker i waiho i ia inoa no ka pono o kekahi mau kamaʻāina o Puna, ʻo Piʻilani Kaʻawaloa, ʻo Keone Kalawe a me Lei Kaleimamahu.

Ua nei ikaika akula kekahi mau ōlaʻi ma nā ʻailana Kermadec. Aia ia mau ʻailana he 620 mile mai Aotearoa. ʻO ka ikaika o kekahi o ia mau ōlaʻi, he 8.1. A ʻo ia ke kumu i laha ai ke kūkala pōʻino kai hoʻēʻe ma nā wahi ma ka moana nui ākea. A he mau nalu kai hoʻēʻe kai ʻike ʻia, akā, ʻaʻohe wahi i pōʻino. ʻO Hawaiʻi kekahi i hoʻomaopopo ʻia no ke kai hoʻēʻe akā, ma hope o nā hola ʻekolu, ua kāpae ʻia.

Eia mai kā kākou ʻōlelo noʻeau,

ʻUʻuku ka ʻuiki, pipī nō ka ʻā ʻana.

ʻO ia hoʻi, ʻuʻuku ka hana, ʻuʻuku ka loaʻa.

03-03-21

Limanui ʻia kekahi mākaʻi o Honolulu nei.

ʻO ia aʻela kekahi poʻo nūhou o kēia lā, ka lā 3 o Malaki, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

I ka pō Pōʻakahi nei, ua limanui ʻia aku nei kekahi mākaʻi ma ka hale kūʻai ʻo 7-Eleven ma Waimānalo. Ua kāhea ʻia ka ʻoihana mākaʻi ma muli o kekahi kanaka e hōʻole ana, ʻaʻole ʻo ia e haʻalele i ia hale kūʻai. A i ka hiki ʻana aku o ka mākaʻi i laila, ʻo kona limanui ʻia ihola nō ia. Ma hope, ua kōkua mai kekahi mau kānaka i ka mākaʻi ma ka hopu ʻana i ke kolohe. Aia nō ka ʻoihana mākaʻi ke noi aʻela, inā he mau kānaka i ʻike maka i nā hana o ia pō, e kamaʻilio aku me nā mea e noiʻi ana. E kāhea aku iā Crimestoppers ma ka helu 955-8300, a i ʻole ia, e hoʻouna ʻia kahi ʻike me ka hōʻike ʻole ʻia aku o kou inoa ma www.honolulucrimestoppers.org.

He kūʻē ka ʻAhahui Kumu Kula Aupuni o Hawaiʻi i ka hana hou ʻana i ka palapala ʻaelike o ke Kahu Kula Nui Christina Kishimoto. A he manaʻo ko ia ʻahahui, e hōʻike aku i ke kūʻē ʻana i ka Papa Hoʻonaʻauao i kēia pule nei. He papa helu kumu hoʻopiʻi lōʻihi kā ka uniona o na kumu kula aupuni no ka hana a Kishimoto ma ka wā o ka maʻi ahulau e laha ana. ʻO kekahi, ua hōʻole ʻo ia i ka hoʻokō ʻana i ka hoʻohana ʻana i ke pale ihu a me ka hoʻokaʻawale ʻana he ʻeono kapuaʻi ma mua o ke kauoha ʻana o ka Papa Hoʻonaʻauao. ʻO kekahi, ua hoʻopau ʻo ia i ka uku keu o ka poʻe kumu hoʻonaʻauao haumāna kīnā, ka poʻe kumu kula kaiapuni a me ka poʻe kumu e hana ana ma nā wahi paʻakikī o ka loaʻa ʻana o ke kumu kula.

Eia mai kā kākou ʻōlelo noʻeau,

Waiho akāka ke kula o Kaiolohia.

ʻO ia hoʻi, ua ahuwale.