Ke Aolama

Kī ʻia aʻe nei kekahi mau kao lele hoʻoweliweli.

ʻO ia aʻela kekahi poʻo nūhou o kēia lā, ka lā 2 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Kī aʻe nei ʻo Kōlea ʻĀkau i nā kao lele he 23 a ʻoi aku paha i ka Pōʻakolu. A ʻo kekahi, e lele ana no Kōlea Hema a kuʻu ihola ma kahi e kokoke ana i ka palena kai o ia mau aupuni ʻelua. He 16 mile mai ka palena kai aku. A ʻo ia ka manawa mua loa i kuʻu ai ke kao lele ma kahi e kokoke loa ana i ka palena kai, mai ka makahiki 1948, ka wā hoʻi i kaʻawale ai ia mau aupuni. He mau hola ma mua aku o ia mau kī ʻana, hoʻoweliweli aʻe nei ʻo Kōlea ʻĀkau, e kī ʻia he mau kao lele nukelea i mea e kanono ai ka hoʻopaʻi o Kōlea Hema lāua ʻo ʻAmelika Hui Pū ʻIa, he kūʻē ia i ka hoʻomaʻamaʻa kaua ʻana o Kōlea Hema a me ʻAmelika Hui Pū ʻIa. ʻŌlelo aʻela ʻo Kōlea ʻĀkau, ʻo ia hoʻomaʻamaʻa ʻana, he hoʻomaʻamaʻa ia no ka hoʻouka kāua ʻana o ia mau aupuni me Kōlea ʻĀkau. Ma hope koke iho o ke kī ʻana o nā kao lele o Kōlea ʻĀkau, kī aku nei ʻo Kōlea Hema i kāna mau kao lele ma kahi like.

Ua holo iho nei kahi ʻaelike ma waena o ka Hōkele The Grand Wailea o Maui me kekahi mau hui hoʻomalu ʻāina, ʻo ia hoʻi, e hoʻēmi ʻia nā kukui ʻōlinolino o ka hōkele i ʻole e pōʻino ka ʻuaʻu. Ma ka ʻaelike, e kāpae ʻia nā kukui, e pale ʻia paha, a e hoʻēmi ʻia paha ka mālamalama ma kona wahi i ʻole e huikau ka ʻuaʻu ke lele aku i ke kai. A ʻo kekahi, he mau limahana ana ko ka hōkele, he mau kahu nānā hoʻi i ka holo pono o ka hana a me ka pono ʻole paha. ʻO ka hopena ia o kekahi hihia i hoʻopiʻi ʻia i kēia makahiki nei. Wahi a Leinaʻala Ley, ka loio o ka hui ʻo Earthjustice, ua alu like nā ʻaoʻao a pau ma ka helu ʻana i nā hana e emi ai ka huikau ʻana o nā manu kai i nā kukui.

Eia mai kā kākou ʻōlelo noʻeau,

He ʻaloʻalo kuāua no kuahiwi.

He ʻōlelo kēia no ke kanaka wiwo ʻole.

Ma ka hapanui o nā kula haʻahaʻa aupuni o Hawaiʻi nei, he kēpau ko ka wai inu.

ʻO ia aʻela kekahi poʻo nūhou o kēia lā, ka lā 31 o ʻOkakopa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

Ma ke ana ʻana i ke kēpau ma ka wai inu o nā kula haʻahaʻa aupuni o Hawaiʻi nei, he ʻekolu hapahā o lākou, he nui ke kēpau ma kekahi paipu wai o ke kinika a o ka puaʻi wai paha. He manaʻo ko nā luna aupuni e kuapo ʻia nā paipu o nā wahi a pau nona ke kēhau he ʻelima māhele a ʻoi aku o ka biliona. A ma hope, e nānā hou ʻia ka wai i mea e hōʻoia ai i ka pau o ke kumu kēpau a me ka pau ʻole paha.

I ka Pōʻaono nei, kāʻili aku nei ʻo Punahou i ka lanakila mai nā lima wīkani mai o nā keiki o Kāna Lui ma ka helu ʻai he 24 i ka 8. A lilo ai ka inoa moho o ka ʻAhahui Kulauku o Honolulu i nā keiki o Punahou. He 385 ʻīā nou a John-Keawe Sagapolutele o Punahou, a he ʻekolu āna ʻai holo i nou ai. E hoʻomaka ana ka hoʻokūkū inoa moho o nā kula kiʻekiʻe a pau o ka Māhele Hāmama i ka lā 18 o Nowemapa. He ʻehā kula kiʻekiʻe, ʻo ka Punahou kekahi, a me Kahuku, Mililani, a me Kamapela.

Ma ka Pōʻaono nei, na Hawaiʻi nā ʻai mua he 10 ma ke kūʻē ʻana aku iā Waiomina, akā, hiu aʻela nā Kaopoe a lilo aku nei ke eo iā lākou ma ka helu ʻai he 27 i ka 20. ʻO Da’Qualen James o Waiomina, he 179 āna ʻīā holo. Ma mua, ua hōʻike ʻo ia i ka paʻa o kona manaʻo, e pāʻani no Hawaiʻi. Akā, lilo aku nei ʻo ia iā Waiomina.

Eia mai kā kākou ʻōlelo noʻeau,

ʻAʻohe hua waiho i Kahiki.

He ʻōlelo kēia ke kono ʻia nā kānaka a pau, ʻo nā kama iki kekahi.

E luaʻi paha ka pele o Mauna Loa.

ʻO ia aʻela kekahi poʻo nūhou o kēia lā, ka lā 28 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Hōʻike aʻela nā luna o Hawaiʻi, e luaʻi paha ka pele o Mauna Loa ma muli o nā hōʻailona e ʻike ʻia nei. A no laila, ke paipai ʻia aʻe nei ko Hawaiʻi moku, e liuliu a e mākaukau i mea e hiki ai i ko laila poʻe ke haʻalele koke i ka hale ke hū aʻe ka pele. ʻO Mauna Loa ka lua pele ʻā nui loa o ka honua nei. ʻŌlelo ʻia, ke hoʻomaka ke kahe ʻana o ka pele, he mau hola helu wale nō a hiki aku ka pele i nā hale ma kahi kokoke i nā wahi e puka mai ai ka pele. I ka makahiki 1984 i luaʻi hope loa ai ka pele o Mauna Loa.

Ma Oʻahu nei, e hoʻomaka ana ka hana ma ke ala e holo ai ke kaʻa kau i ka lewa ma ke Alanui ʻo Dilinahama ma waena o Kalihi a me Iwilei. He ʻehā ala kaʻa o ia alanui, akā, e ʻākeʻakeʻa ʻia ana ʻelua o ia mau ala no ke kūkulu ʻana. E hoʻomaka ana ke kūkulu ʻana ma ka lā 28 o Nowemapa. ʻO ka mea ʻāpiki, he ʻekolu makahiki o ke kūkulu ʻana. A no laila, aia a hiki aku i ka makahiki 2026, a laila, e hemo hou nā ala kaʻa pau loa o ke Alanui Dilinahama.

Eia mai kā kākou ʻōlelo noʻeau,

Hanopilo ka leo o ka ʻalae.

He ʻōlelo kēia no ke kanaka i hele ka leo a haʻalele wale.

He kānāwai hou ko Maui i ʻole e make hewa ka manu kai a me ka honu.

ʻO ia aʻela kekahi poʻo nūhou o kēia lā, ka lā 26 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

He kānāwai hou ko Maui. ʻAkahi nō a pūlima ka Meia Michael Victorino i ka pila e koi ana i ke emi ʻana o ke kukui polū. Ke ikaika ka pā ʻana o ia ʻano kukui, ʻo ka hopena, ʻo ia ka ʻeha a me ka make paha o ka manu kai a me ka honu. ʻO Maui ka lua o ke kalana nāna i hana i kānāwai no ke kukui polū. ʻO Hawaiʻi ka mua ma muli o nā ʻohe nānā ma luna o Mauna Kea. E hoʻomaka ka hoʻokō ʻia ʻana o ia kānāwai hou o Maui ma ka makahiki 2026.

Hoʻāhewa ʻia aku nei he ʻekolu mau kānaka no ke kākoʻo kipi i ka ʻaihue kanaka ʻana i ke kiaʻāina o Mikikana, iā Gretchen Whitmer. ʻO ia mau kānaka ʻekolu, ʻo ia ʻo Joe Morrison, kona makuahūnōai kāne, ʻo Pete Musico a me Paul Bellar. He mau lālā lākou no ka hui ʻo Wolverine Watchmen. ʻŌlelo ihola nā loio hoʻopiʻi, he hui hana kalaima ua hui lā. E kau ana ka ʻōlelo hoʻopaʻi o Morrison mā i ka lā 15 o Kēkēmapa.

Eia mai kā kākou ʻōlelo noʻeau,

ʻAʻohe hana a Kauhikoa; ua kau ka waʻa i ke ʻaki.

ʻO ia hoʻi, ua pau pono ka hana.

Ua hala akula i kēlā ʻaoʻao kahi kanaka oli kaulana o Hawaiʻi nei.

ʻO ia aʻela kekahi poʻo nūhou o kēia lā, ka lā 24 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Moe aku nei ʻo Kaʻupena Wong i ka moe kapu o Niolopua ma kona hale ma Mākaha i ka lā 24 o ka mahina ʻo Kepakemapa. He loea ʻo ia ma ke oli ʻana. A he kanaka hoʻonaʻauao ʻo ia a he haku mele nō hoʻi. Ua hoʻomaka kona aʻo ʻana mai i ke oli ʻana i ka makahiki 1952 ma lalo o ka malu o Mary Kawena Pukui. He mau makana kai lilo aku iā Kaʻupena Wong, ʻo ka Makana Nā Hōkū Hanohano i ka makahiki 1993, ʻo ka Makana Kū I Ka Niʻo o ke Kula ʻOki Leo o Hawaiʻi i ka makahiki 2004 a hoʻohanohano ʻia ʻo ia kekahi ma ka Holo Mele Hawaiʻi Kaulana i ka makahiki 2008. Ua piha iā Kaʻupena Wong nā makahiki he 93, a haʻalele ihola i kāna kaikamahine hanauna, iā Haunani Denhart i hope nei.

Ua komo hou ʻo Tua Tagovailoa i ka pāʻani pōpō peku ʻana. I ka pō Lāpule nei, ʻo Tagovailoa ka ʻalihikūlele o Miami, a lanakila aku nei nā Naiʻa ma luna o Pitabuga ma ka helu ʻai he 16 i ka 10. He 261 ʻīā a Tagovailoa i nou ai. Ma nā hoʻokūkū ʻekolu i kaʻahope aku nei, a Tagovailoa i pāʻani ʻole ai, ua hāʻule ʻo Miami.

Eia mai kā kākou ʻōlelo noʻeau,

Hāʻale i ka wai a ka manu.

He ʻōlelo kēia no ke kanaka uʻi.

He pilina hou paha ko ka Lāhui Hawaiʻi me ʻAmelika Hui Pū ʻIa.

ʻO ia aʻela kekahi poʻo nūhou o kēia lā, ka lā 19 o ʻOkakop, he Pōʻakolu. Welina e nā makamaka. ʻO Ke Aolama kēia a penei ka nūhou.

Kūkala aʻe nei ke Keʻena Kālaiʻāina o ʻAmelika Hui Pū ʻIa, e koi ʻia kona kūkākūkā paʻalula ʻana me ke kaiāulu Kanaka Maoli no nā hana like ʻole e hāpai ʻia ana e ua keʻena lā no ia kaiāulu a me kahi mea e pili pono ana paha. Ma muli o ia hana a ke Keʻena Kālaiʻāina, e like ana ka Lāhui Hawaiʻi me nā Lāhui Kānaka ʻŌiwi o ʻAmelika. ʻŌlelo ihola ke Kuhina Kālaiʻāina Deb Haaland, paʻa ihola ka manaʻo o ia keʻena e hana pū me ka Lāhui Hawaiʻi ma ke ʻano he pilina aupuni i ke aupuni kūʻokoʻa no nā nīnau like ʻole e pili ana i ke Kanaka Hawaiʻi. E mālama ana ke Keʻena Pilina Hawaiʻi o ke Keʻena Kālaiʻāina i kekahi mau hālāwai ʻelua i mea e lohe ai i ka manaʻo o nā Kānaka Maoli no ia hana. ʻO ka mua, aia ma ka lā 10 o Nowemapa mai ka hola 9:00 a ka hola 11:00 o ke awakea. A ʻo ka lua, aia ma ka lā 5 o Kēkēmapa mai ka hola 6:00 a ka hola 8:00 o ke ahiahi.

E mālama ʻia ana ka ʻahamele o Earth, Wind & Fire i ka lā 10 o Kēkēmapa ma Oʻahu nei ma ke Kahua ʻo Blaisdell. ʻO ke kikiki emi loa, he $46. A ʻo ke kikiki pipiʻi loa, he $226. E hoʻomaka ana ke kūʻai ʻia ʻana aʻe o ke kikiki i ka hola 10:00 o ke kakahiaka o kēia Pōʻaono no ko Hawaiʻi. A kau palena ʻia ka nui o nā kikiki e kūʻai ʻia mai, he ʻewalu o ke kanaka pākahi. E kūʻai ʻia mai ke kikiki ma ke Keʻena Kikiki o Blaisdell, ma ticketmaster.com, a ma ka helu 800-745-3000.

Hoʻi aku nei ʻo Tua Tagovailoa i ka hoʻomaʻamaʻa ʻana i kēlā pule aku nei. A ke holo pono nā mea a pau, ʻo ia ana ka ʻalihikūlele e hoʻomaka ana ma ka hoʻokūkū kahi e kūʻē aku ana ʻo Miami iā Pitabuga i kēia Lāpule e hiki mai ana.

Eia mai kā kākou ʻōlelo noʻeau,

ʻAʻohe hua o ka maiʻa i ka lā hoʻokahi.

He pane kēia i ke kanaka ahonui ʻole.

ʻAlua lanakila o ka hui pōpō peku o Hawaiʻi.

ʻO ia aʻela kekahi poʻo nūhou o kēia lā, ka lā 17 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ke manaʻo nei ke Keʻena ʻĀina a Waiwai Pili ʻĀina o Hawaiʻi e hoʻopau i nā lula e koi ana i ka loaʻa ʻana o ka palapala ʻae i ke kumu aʻo heʻe nalu, ke kāpena waʻa a me ia kanaka aku ia kanaka aku e lawelawe ana i ka hana ma nā kahakai o Waikīkī. ʻO ia palapala ʻae, e hōʻoia ana i ka mākaukau a me ke aʻo ʻana mai o ke kanaka e pono ai ia mau hana. ʻO kekahi pilikia, ʻo ka lawa ʻole o nā kumu waiwai o ke aupuni e mālama ʻia ai nā hōʻike a me ka ʻāpono ʻana. ʻO ka hoʻopau ʻia ʻana o ia palapala ʻae, he mea ia e lilo ai i nā hui kālepa ka hoʻoholo ʻana i ka mākaukau e pono ai nā limahana me ke kuleana ʻole o ke aupuni mokuʻāina.

I ka Pōʻaono nei, lanakila aku nei ʻo Hawaiʻi ma luna o Nevada ma ka helu ʻai he 31 i ka 16 ma ke Kahua Pāʻani ʻo Ching. ʻO ka lua ia o ka lanakila o kēia kikina nei. He ʻekolu ʻai holo a Dedrick Parson a he 136 āna ʻīā holo. He ʻewalu kulaʻi a ka mahikua Penei Pavihi. A he ʻehiku kulaʻi a ka ʻāwaʻa Peter Manuma. ʻO Brayden Schager, ka ʻalihikūlele, he 173 āna ʻīā nou.

Aloha nō nā Wāhine Ānuenue. Ua eo iho nei lākou iā Cal Poly i ka Pōʻaono nei ma loko o nā pāʻani ʻehā. A ʻo ka hāʻule mua ia o Hawaiʻi ma loko o ka ʻAhahui Komohana Nui. A i kēia manawa, he ʻekolu mau hui ma ke kūlana ʻekahi o ia ʻahahui, ʻo Hawaiʻi, ʻo Cal Poly a me Kāna Palapala.

Eia mai kā kākou ʻōlelo noʻeau,

ʻAʻohe ʻai pani ʻia o ka ʻamo.

He pane kīkoʻolā ia i ke kanaka waha nina.

Loaʻa hou kekahi lāʻau ʻōiwi.

ʻO ia aʻela kekahi poʻo nūhou o kēia lā, ka lā 14 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ma ka mokupuni ʻo Hawaiʻi, ua loaʻa hou aku nei kekahi lāʻau ʻōiwi i kuhi ʻia, ua nalowale loa he 20 makahiki aku nei. I ka makahiki 1971, he ʻekolu wale nō lāʻau i koe ma kahi i loaʻa hou ai ma Kona. A i ka makahiki 1992, ua loaʻa kekahi ma Puʻu Waʻawaʻa, akā, ua make i ka makahiki 2002. A i ka mahina ʻo Malaki o ka makahiki 2021, ua loaʻa hou nō kekahi e ulu ana ma ka ʻāina o nā Kula ʻo Kamehameha ma Kona. ʻO Delissea argutidentata ka inoa o ua lāʻau lā. ʻAʻole naʻe ʻike ʻia ka inoa Hawaiʻi. Akā, ʻane like ia me ka hāhā.

Ua koho hou ʻia aku ʻo Kamaka Hepa lāua ʻo Samuta Avea, ʻo lāua nā kāpena o ka hui pōpō hīnaʻi o Hawaiʻi. ʻO lāua nō hoʻi nā kāpena o kēlā kikina aku nei. Ua hānau ʻo Hepa ma ʻĀlaka. Haʻalele aku nei ʻo ia i ke Kulanui o Tekeka i kēlā makahiki aku nei a lilo i haumāna no ke Kulanui o Hawaiʻi. I kēlā kikina aku nei, ʻo ka ʻawelika o kāna mau ʻai, he 9.4, a ʻo ke kāʻili, he 5.0. ʻO Avea, mai ke Kula Kiʻekiʻe o Kahuku ʻo ia i puka mai ai. ʻAʻole ʻo ia i pāʻani i kēlā kikina aku nei ma muli o ka ʻeha.

Eia mai kā kākou ʻōlelo noʻeau,

ʻAʻohe hana a Kauhikoa; ua kau ka waʻa i ke ʻaki.

ʻO ia hoʻi, ua pau pono ka hana.

He wahi maluhia ʻo Hawaiʻi no ka wahine e ʻōmilomilo.

ʻO ia aʻela kekahi poʻo nūhou o kēia lā, ka lā 12 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma ke kauoha hoʻokō a ke Kiaʻāina David Ige i hoʻopuka aʻe nei, ʻo ka ʻōmilomilo ʻana, he mea kū nō i ke kānāwai. A ʻo ka poʻe wāhine no waho o Hawaiʻi e hele mai i ʻaneʻi nei no ka ʻōmilo ʻana, e hoʻomalu ʻia iho nō ma muli o ia kauoha a Ige. A pēlā pū nō me nā mea nāna e kōkua i ka wahine ma ka ʻōmilo ʻana a me nā mea nāna e lawelawe  ka ʻōmilomilo ʻana a nāna paha e hāʻawi i ka hua ale ʻōmilomilo i nā wāhine no waho o Hawaiʻi nei. Ke hoʻāʻo ihola kekahi mau mokuʻāina e hana i kānāwai kahi e hoʻopaʻi ʻia ai nā wāhine nāna e hele i kekahi mokuʻāina no ka ʻōmilomilo ʻana me ka hoʻopaʻi pū ʻia nō hoʻi o ka mea nāna e hana.

E kū aku ana kekahi mau kānaka ʻelua i mua o ka ʻaha hoʻokolokolo i ka lā 25 o Nowemapa ma muli o ko lāua ʻō iʻa ʻana ma Waikīkī i ka pō. ʻO nā inoa o ua mau kānaka lā, ʻo Alvin Lucio lāua ʻo Rettios Rouk. He 32 a lāua iʻa. Pāpā ʻia, ʻaʻole e ʻō iʻa ma Waikīkī mai ka hola 6:00 o ke ahiahi a ka hola 6:00 o ke kakahiaka. A ʻo kekahi pilikia, ʻekolu o nā iʻa, he mau Kala ʻiʻi. Hoʻopiʻi ʻia nō hoʻi ʻo Lucio lāua ʻo Rouk no ka loaʻa o ke Kala ʻuʻuku, ʻaʻole i nui e like me ka mea i ʻae ʻia ma ke kānāwai.

Ma nā lā i kaʻa hope aku nei, make iho nei nā koholā pailaka he nui ma hope o ko lākou ili ʻana aʻe me kekahi mau kahakai o Aotearoa. I ka Pōʻalima nei, ili aku nei he 232 ma kahakai o Tupuangi a i ka Pōʻakahi nei, he 245 ma ke Kai Kūʻono o Waihere. Aia ia mau kahakai ma Wharekauri, he pae ʻāina he 500 mile ma ka hikina o nā mokupuni nui o Aotearoa. ʻO ka mea maʻa mau, hoʻolana ʻia nā koholā ma ke kai, akā, ma muli o ka manō e holo ana ma kahi e kokoke ana, ʻaʻole i hiki. He mea maʻa mau ka ili hewa ʻana o nā koholā pailaka he nui hewahewa ma Aotearoa, a ʻoi loa aku ma nā mahina kau wela.

Eia mai kā kākou ʻōlelo noʻeau,

Molale loa nō kumupali o Kalalau.

ʻO ia hoʻi, akāka ka lalau o kekahi, ʻaʻole paha maopopo ka mea e kamaʻilio ʻia ana.

Pehea lā e pau ai ka luku wale ʻia o nā pāka o Oʻahu nei?

ʻO ia aʻela kekahi poʻo nūhou o kēia lā, ka lā 10 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua māhuahua aʻela ka luku wale ʻia ʻana iho o nā pāka o Oʻahu nei. I kēia makahiki nei, hoʻolilo ʻia aku nei he $339,393 no ka hoʻoponopono ʻana, ka hoʻomaʻemaʻe ʻana a me ia hana aku, ia hana aku ma muli o ka luku wale ʻana. Manaʻo ihola ka Luna ʻAha Kūkā Augie Tulba, ka luna hoʻomalu o ke Kōmike Lawelawe Kaiāulu a Pāka, e hoʻonui ʻia nā hana like ʻole ma nā pāka, nā hana hoʻi e lana ai ka manaʻo o ka lehulehu, a ʻo ia ka mea e emi ai ka luku wale ʻana. Wahi a Nate Serota, ka waha ʻōlelo o ke Keʻena o nā Pāka a me nā Hana Hoʻonanea, he pono ke kōkua o ke kaiāulu ma ka makaʻala ʻana i nā pāka o kākou. No kākou a pau ia mau wahi, a ke pani ʻia aku kekahi ma muli o ka hoʻopōʻino ʻia, e hoka kākou a pau. ʻO kekahi mau hui i komo i ka hana, ʻo ia ʻo APB Skateshop lāua me ka Panakō American Savings. Na ia mau hui e mālama nei i ka Pāka ʻo ʻAʻala. ʻO ka mea nona ʻo APB Skateshop, ʻo Chad Hiyakumoto, ua hoʻomaka i ka makahiki 2002. Ua hele ʻo ia a ʻaikena i ke kahakaha kolohe ʻia o ka pāka holo papa huila a no laila, pena akula ʻo ia a uhi ʻia iho nā kahakaha. A pēlā hoʻi ma nā lumi hoʻopau pilikia o laila. I ka makahiki 2015, hoʻomaka akula ka Panakō American Savings i ka hoʻomaʻemaʻe ʻana i ia pāka. A mai ka makahiki 2019, mālama ʻia nā papa like ʻole ma laila, ʻo ka papa hoʻoikaika kino, ka papa hoʻomaʻamaʻa ʻīlio, a me ka papa aʻo hana ʻālapa. A hui pū aku nei me APB Skateshop no ka mālama papa holo papa huila kekahi.

Mai lanakila ʻo Hawaiʻi ma luna o Kāna Kieko Mokuʻāina i ka Pōʻaono nei. Ma hope o ka ʻai holo a Dedrick Parson, e ʻoi ana nā Koa Ānuenue ma ka helu ʻai he 14 i ka 13, a he hoʻokahi minuke koe me nā kekona he 19. Akā, hiu aʻela ʻo Kāna Kieko. He ʻehiku wale nō kekona i koe, a loaʻa ka ʻai peku, a hāʻule ihola ʻo Hawaiʻi ma ka helu ʻai he 16 i ka 14.

Eia mai kā kākou ʻōlelo noʻeau,

Aia nō ke ea i ka puka ihu.

He pane kolohe kēia ke nīnau mai kekahi, pehea kekahi hoa aloha a ʻohana paha.