09-21-17

Mai ʻaihue kanaka ʻia kahi keiki o ʻEwa.

ʻO ia aʻela kekahi poʻo nūhou o kēia lā, ka lā 21 o Kepakemapa, he Pōʻahā. Welina e nā hoa makamaka. ʻO Ke Aolama kēia a penei ka nūhou.

Pakele aku nei kekahi keiki mai ʻaihue kanaka ʻia i kona wā e hele aku ana i ke kula i ka Pōʻalua nei. He 10 makahiki o ua keiki nei, a e naue aku ana ʻo ia i ke Kula Haʻahaʻa o Keoneʻula i ke kakahiaka ma ke Alanui ʻo Kaipalaoa. A i ia manawa, hoʻāʻo ihola kekahi kāne e koi i ke keiki e kau aku i luna o kona kalaka. A lālau akula nō hoʻi ke kāne i ua keiki nei, a hoʻāʻo e huki iā ia ma luna o ke kalaka. Akā, pākele akula ua keiki nei ma ka ʻāpua.

He manaʻo ko Ilima-Lei MacFarlane e kāʻili aku i ka inoa moho māhele 125 paona o Bellator ma ka mokomoko. ʻO MacFarlane, mai ke Kula Kiʻekiʻe ʻo ka Punahou ʻo ia i puka mai ai. A e kūʻē aku ana ʻo ia iā Emily Ducote ma ka Bellator 186 i ka lā 3 o Nowemapa ma ke Kikowaena ʻo Bryce Jordan i Penekelevinia. ʻO MacFarlane, he ʻelima ona lanakila, a ʻaʻole ʻo ia i hāʻule iki ma Bellator. A he ʻekolu o ia mau lanakila, ma ka ʻae wale ʻana o ka hoa paio i ka hāʻule ma loko o ka lina mokomoko. ʻO Ducote, he ʻehā ona lanakila, a he hoʻokahi hāʻule ma Bellator. Ua hui pū lāua a ʻelua ma ka pahu hao ma mua i ka mahina ʻo Kēkēmapa o ka makahiki 2016, a ua hiki aku nō i ke kani ʻana o ka pele o ka puni hope loa. A lilo akula ke eo iā MacFarlane ma ka ʻōlelo hoʻoholo a nā luna loiloi. ʻO ka inoa moho māhele 125 paona, ʻakahi nō a hoʻokumu ʻia ma Bellator. A inā e lilo ka inoa moho iā MacFarlane, ʻo ia ana ka lua o ka wahine o Hawaiʻi nei e lilo i inoa moho mokomoko ma ka moʻolelo o Hawaiʻi nei. ʻO ka mua, ʻo ia ʻo Angela Lee. ʻO Lee, ka inoa moho ma ka māhele 115 paona ma ONE Championship.

Eia mai kā kākou ʻōlelo noʻeau,

Kukū ka pihapiha a piʻi ka lena.

He ʻōlelo kēia no ke kanaka i hele a huhū.

09-20-17

Ua pau loa ihola ke kikina pōpō pekupeku o ke Kula Kiʻekiʻe ʻo Kaiser.

ʻO ia aʻela kekahi poʻo nūhou o kēia lā, ka lā 20 o Kepakemapa, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.

He manaʻo ko ke Kulanui o Hawaiʻi e pau ka pōkole o nā kumu kula aupuni ma ka paipai ʻana aʻe i ko Hawaiʻi e lilo i kumu kula. I ka makahiki kula 2012, he 334 mākālua. A mai ia manawa mai, piʻi liʻiliʻi aʻela nā mākālua i kēlā me kēia makahiki, a i ka makahiki kula 2016, he 531 mākālua. Kapa ʻia aku ia papahana paipai, “E lilo i meʻe. E lilo hoʻi i kumu kula.” A e hoʻomaka nō hoʻi he polokalamu manuwahi no nā kumu pani hakahaka a me nā kumu kōkua, kahi e paʻa ai ke kekelē kumu aʻo ma ke Kulanui o Hawaiʻi ʻoiai lākou e hana ana ma ko lākou kūlana hana.

Holo ihola ka manaʻo o ke poʻo kumu Justin Mew o ke Kula Kiʻekiʻe ʻo Kaiser e hoʻopau ʻia ke kikina pōpō pekupeku o ka hui pae oʻo a me ka hui pae ʻōpio. ʻO ke kumu āna o ka hana ʻana pēlā, ʻo ka hoʻopaʻapaʻa a me ka hakakā ʻana o ke kumu aʻo pōpō pekupeku a me nā mākua o kekahi mau mea pāʻani pōpō pekupeku i ka Pōʻakahi nei. A ma muli o ia hana, kāhea ʻia akula ka mākaʻi, a hiki koke akula lākou. A ua noi ʻia ke Keʻena Mākaʻi o Honolulu i ke kiaʻi ʻana o nā mākaʻi he 8 a emi iki paha ma ke kahua kula i kēia pule. He kikina pilikia nō kēia no ka hui pae oʻo. Ua hāʻawi pio wale ma nā hoʻokūkū mua ʻehā ma muli o ka lawa ʻole o nā mea pāʻani. ʻO ka hoʻokūkū ʻelima, ua kūʻē aku iā Kamapela, a hāʻule ihola, he 71 ʻai a Kamapela, a he hua kakā kā Kaiser.

Eia mai kā kākou ʻōlelo noʻeau,

Ka lama kū o ka noʻeau.

He ʻōlelo mahalo kēia i ka ihupani.

09-19-17

Na ka Papa ʻĀina a Waiwai Pili ʻĀina e hoʻolohe i nā hōʻike o nā ʻaoʻao a pau ma ka hihia no ka ʻOhe Nānā Kanakolu Mika.

ʻO ia aʻela kekahi poʻo nūhou o kēia lā, ka lā 19 o Kepakemapa, he Pōʻalua. Aloha mai e nā hoa. ʻO Ke Aolama kēia a penei ka nūhou.

E hōʻike aʻe ana i mua o ka Papa ʻĀina a Waiwai Pili ʻĀina nā ʻaoʻao a pau i ko lākou mau manaʻo no ka pono a me ka pono ʻole o ke kūkulu ʻia ʻana aku o ka ʻOhe Nānā Kanakolu Mika ma Mauna Kea. He 23 mau ʻaoʻao a he 15 minuke o kēlā me kēia ʻaoʻao e hōʻike ai. I ka Pōʻakolu ana nō e mālama ʻia ai ka hihia ma ka Lumi Kalaunu o ka Hōkele Naniloa ma Hilo. Na ka Papa ʻĀina a Waiwai Pili ʻĀina ka ʻāpono a me ka ʻāpono ʻole paha i ka lilo aku o ka palapala kūkulu. A ʻaʻole paha e holo koke ka manaʻo o ka papa. A ke kuhi ʻia nei, ʻo ka ʻaoʻao hāʻule, e hoʻopiʻi hou i mua o ka ʻAha Hoʻokolokolo Kiʻekiʻe o Hawaiʻi nei. Wahi a Kealoha Pisciotta, ke alakaʻi o ka Hui Mauna Kea, lana kona manaʻo e hoʻokō ka papa i ko lākou kuleana. A inā ʻaʻole, ua mākaukau nō e kū i ka pono. He mau kānaka Kū Kiaʻi ʻĀina e ʻōlelo nei, ʻaʻole kūpono ka hana a ka Lunakānāwai Riki May Amano, ka lunakānāwai hoʻomalu o ka hihia. A ʻo nā loio o ka ʻOhe Nānā Kanakolu Mika, he ʻokoʻa ko lākou manaʻo me ka ʻī ʻana aʻe, he keu aku ka maikaʻi o ka hana a Amano a me ka Papa ʻĀina a Waiwai Pili ʻĀina, a ua hana lāua i nā hana like ʻole e pono ai nā ʻaoʻao a pau, a ua ʻoi aku i ke koina maʻa mau o nā hana kū i ke kaʻina kānāwai.

Lilo aku nei kahi puʻu kālā noiʻi i kekahi polopeka o ke Kula Lapaʻau ʻo John A. Burns o ke Kulanui o Hawaiʻi no ka noiʻi ʻana aku i ka mea hoʻomaʻi ʻo Zika. ʻO Mukesh Kumar ka inoa o ka polopeka, a he loea ʻo ia ma ka maʻi lele. A ʻo kekahi mea nui ma kona noiʻi ʻana, ʻo ia ka pilikia o ka wahine a me kāna keiki e kōkō ana. He manaʻo ko Kumar, e hana ʻo ia i mea e lele ʻole ai ka mea hoʻomaʻi Zika mai ka makuahine hāpai keiki a i kāna ʻaluʻalu e hānai ana. ʻAkahi nō a ʻike ʻo Kumar, he hiki nō ke loaʻa ka ʻiole puaʻa i kekahi ʻano maʻi Zika ʻAmelika, a no laila, he hiki ke noiʻi aku i ka ʻiole puaʻa no ka ʻike ʻana i ke ʻano e pilikia ai ke kanaka i ka mea hoʻomaʻi Zika. ʻO ka pēpē mua i loaʻa i ka mea hoʻomaʻi Zika i hānau ma ʻAmelika Hui Pū ʻIa, ua hoʻohānau ʻia mai ʻo ia ma ka haukapila ma Oʻahu nei i ka makahiki 2016. Ua loaʻa ka makuahine o ia pēpē i ka mea hoʻomaʻi Zika ʻoiai ʻo ia e noho ana ma Palakila. A lele akula i ka pēpē, ʻoiai ʻo ia ma ka pūʻao.

Eia mai kā kākou ʻōlelo noʻeau,

Paʻa ka moku i ka heleuma.

He ʻōlelo kēia no ke kanaka i male.

09-15-17

Pahū aʻela ka pōkā pahū ma Lākana,

ʻO ia aʻela kekahi poʻo nūhou o kēia lā, ka lā 15 o Kepakemapa, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.

Hoʻopiʻi aʻe nei ke Kuhina Nui Theresa May ke Aupuni Mōʻī Hui Pū ʻIa i ke kūlana hoʻoweliweli hoʻomake huna mai ke koʻikoʻi a i ke kūpilikiʻi ma hope o ka pahū ʻana o kekahi pōkā pahū ma kekahi kaʻa holo ala hao ma Lākana i ka Pōʻalima nei. A ʻo ke kumu i piʻi ai ke kūlana, he manaʻo ko ke aupuni, e hana koke ʻia kekahi hana hoʻoweliweli hoʻomake huna. ʻAʻohe ola i pōʻino, a he 29 wale nō mau kānaka i ʻeha. Ua ʻōlelo ʻia, ua pahū hapa wale nō, a ʻo ia ke kumu i liʻiliʻi ai nā kānaka i ʻeha. Hōʻike aʻela ka hui Mokuʻāina ʻIsalama, nāna nō i hoʻopahū. Ma kahi o ka hola 8:20 o ke kakahiaka i pahū aʻe ai ka pōkā pahū i ka wā i kū ai ke kaʻa ma kahi kau kaʻa ma ke komohana hema o ke kūlanakauhale. Ua lapaʻau ʻia he 29 mau kānaka no ka wela i ke ahi. Aia nō kēia hana hoʻoweliweli ke noiʻi ʻia akula.

Ua maikaʻi aʻela ke kūlana o ke Kulanui o Hawaiʻi ma Mānoa. Ua helu ʻia iho ua kulanui nei, ʻo ia ke kulanui maikaʻi helu 159 ma waena o nā kulanui he 311 o ʻAmelika Hui Pū ʻIa. A ʻo nā kulanui o ia papa helu, ʻo ia nā kulanui nona nā polokalamu lae pua, lae oʻo a lae ʻula nō hoʻi, a he mea nui ka noiʻi ʻana. A ma waena o nā kulanui aupuni he 132, ʻo Hawaiʻi ke kulanui aupuni helu 83. A ua maikaʻi nō hoʻi ke kūlana o kekahi mau kulanui o Hawaiʻi nei. Ma ka māhele Kulanui ʻĀpana Komohana, nā kulanui me nā polokalamu lae pua a lae oʻo hoʻi, ma waena o nā kulanui he 141, ʻo Chaminade ka helu 40, ʻo ke Kulanui Hawaiʻi Pākīpika ka helu 59 a ʻo ke Kulanui o Hawaiʻi ma Hilo ka helu 66. Ma ka māhele Koleke ʻĀpana Komohana, ma waena o nā kulanui he 65, ʻo Berigama Iana Hawaiʻi ka helu 18 a ʻo ke Kulanui o Hawaiʻi ma Oʻahu Komohana ka helu 25.

Eia mai kā kākou ʻōlelo noʻeau,

Pae maila ka waʻa i ka ʻāina.

ʻO ia hoʻi, ua māʻona ihola ka ʻōpū. A ʻo kekahi manaʻo, ua hiki mai kekahi,

09-13-17

He mau lāhui iʻa hou kai loaʻa mai nei.

ʻO ia aʻela kekahi poʻo nūhou o kēia lā, ka lā 13 o Kepakemapa, he Pōʻakolu. Aloha mai e nā makamaka. ʻO Ke Aolama kēia a penei ka nūhou.

Ua alu like aʻela he 100 mau kānaka akeakamai a ʻoi ma ka ʻimi ʻana a hoʻākoakoa i nā iʻa o ke Kai Kūʻono o Kāneʻohe mai ka lā 20 o ka mahina ʻo Mei a i ka lā ʻelua o Iune. A ma nā lā mua o kēia mahina nei, ʻakahi nō a hoʻokuʻu ʻia ka hōʻike. He 3,700 mau iʻa i ʻohiʻohi ʻia a ua loaʻa nō hoʻi he mau lāhui hou, he mau haneli ka nui. ʻO kekahi, he 150 lāhui huʻakai i ʻike ʻole ʻia ma Hawaiʻi nei ma mua. A he hapakolu o lākou, he mau lāhui hou loa. Ma mua, he 10 wale nō paha lāhui huʻakai i ʻike ʻia ma ke Kai Kūʻono o Kāneʻohe. ʻAʻole i maikaʻi nā mea a pau i loaʻa. ʻO kekahi mea i loaʻa ma kahi o Mokoliʻi, he limu uluwale a hewa i kapa ʻia ʻo ka nahele lepo ʻūkele ʻili pipi. A i neʻe paha i laila mai ke Kai Kūʻono o Maunalua a me kekahi mau wahi ʻē aku.

Ua ʻike ʻia aku nei ka ʻai a ka uʻi o kahi keiki o Hawaiʻi nei ma ka pāʻani pōpō pekupeku i ka Pōʻaono nei. ʻO Tua Tagovailoa nō ia o Alabama, a ʻo ka ʻalihikūlele helu ʻelua ia o Alabama. Pāʻani aku nei ʻo ia no kahi wā pōkole ma ka hapahā ʻelua, a laila no ka hapanui o ka hapahā ʻehā. He 64 āna ʻīā i nou ai, a ʻo kekahi o ia nou ʻana, hopu ʻia ihola e Henry Ruggs III a loaʻa ka ʻai holo. A he ʻewalu āna ʻīā i holo ai. I ka hapahā ʻelua, ua hoʻohina ʻia ʻo Tagovailoa a hoʻi hope. Akā, wahi a ke kumu aʻo o Alabama, ʻo Nick Saban, ua maikaʻi ka hana a Tagovailoa.

Eia mai kā kākou ʻōlelo noʻeau,

ʻAʻohe hana a Kauhikoa; ua kau ka waʻa i ke ʻaki.

ʻO ia hoʻi, ua pau pono kāna hana.

09-12-17

E nui auaneʻi paha ke kālā o ka māhele ʻālapa o ke Kulanui o Hawaiʻi.

ʻO ia aʻela kekahi poʻo nūhou o kēia lā, ka lā 12 o Kepakemapa, he Pōʻalua. Welina e nā makamaka. ʻO Ke Aolama kēia a penei ka nūhou.

Ua hala iho nei he ʻelua mahina a emi iki mai, mai ka lā i pōʻino ai ka hale papaʻi ʻo Marco Polo i ke ahi, ʻo ka lā 14 ia o Iulai, ʻaʻole naʻe i ʻike ʻia ke kumu i ʻā ʻia ai ke ahi. Ua paʻa ihola kahi i ʻā ʻia ai ke ahi, ʻo ke keʻena noho 2602. Ua make ihola he ʻekolu mau hoa noho o ka Marco Polo. A ʻo kekahi kanaka, ua hala he 20 mau lā ma hope mai. Na ke Keʻena Kinai Ahi ka noiʻi ʻana, a i kēia manawa, ua kāpae ʻia ka puhi kolohe, ke kuke ʻana a me ka hoʻohana ʻana i ka wai ʻā koke, ʻaʻole ke kumu ʻā ʻo ia mau mea. ʻO ka uku pohō, he $100,000,000 a ʻoi. Waha a Kāpena David Jenkins, ka waha ʻōlelo o ke Keʻena Kinai Ahi, e pau paha ka noiʻi ʻana i loko o kekahi mau pule.

Ma muli o kahi ʻaelike hou me ke Koleke IMG o Winston Salem, Kalolaina ʻĀkau, e lilo mai ana he $27.7 miliona a ʻoi aku i ke Kulanui o Hawaiʻi ma nā makahiki he 10 e hiki mai ana. Mai ka makahiki 2003, na ke Kulanui nō i lawelawe i ka hana hoʻolaha ma nā ʻano like ʻole ma hope o ke ʻoki ʻia ʻana o ka pilina me Leigh Steinberg. A i ia wā, ua holo mua nō, akā, ʻo ka mea nāna i alakaʻi i ia māhele, ʻo John McNamara, ua haʻalele i kona kūlana ma ke Kulanui o Hawaiʻi i ka mahina ʻo Nowemapa o ka makahiki 2017. Ma ka ʻaelike me IMG, e lilo i ke Kulanui o Hawaiʻi, he uku makana pūlima he hoʻokahi miliona kālā. A ʻo ka puʻu kālā makahiki e lilo i ke Kulanui o Hawaiʻi, he $2.2 miliona i kēia makahiki mua, a e piʻi liʻiliʻi nō i kēlā me kēia makahiki a ka $3 miliona ma ka makahiki hope loa o ka palapala ʻaelike.

Eia mai kā kākou ʻōlelo noʻeau,

Ua noi i ke ao ua ʻole.

ʻO ia hoʻi, ua noi aku ʻoe i kekahi kanaka ʻōpūkeʻemoa i kekahi mea, a ua hōʻole maila ʻo ia ala.

09-11-17

E kau ana nā mea waʻa o ka Hōkūleʻa i ka hano hāweo.

ʻO ia aʻela kekahi poʻo nūhou o kēia lā, ka lā 11 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

I kēia Pōʻaono, e kau aʻe ana ka poʻe hoʻokele o nā waʻa kaulua ʻo ka Hōkūleʻa i ka hano hāweo. E lilo aku ana ka makana Hoʻomaluhia Hanohano iā Nainoa Thompson a me nā mea waʻa o ka Hōkūleʻa ma muli o ko lākou mālama honua. ʻO ka Lā Maluhia ia o Hawaiʻi nei. E hoʻomaka ana ka ʻaha hāʻawi makana i ka hola 6:00 o ke ahiahi. A ma ke Kikowaena ʻIke a Hana ʻo Soka Gakkai e mālama ʻia ai.

E mālama ʻia ana ka ʻaha mele o Dionne Warwick ma Waimānalo i kēia Pōʻaono ma hope o ka Hoʻokūkū Polo e ulele ana ma ke Kahua Pāʻani Polo o Waimānalo. ʻO kekahi mau puʻukani e hīmeni ana i ia ahiahi, ʻo ke keiki a Warwick, ʻo Damon Elliot, ʻo kona inoa puʻukani, ʻo Nomad, a ʻo Mya ana kekahi ma laila. He $50 o ke kikiki. A ʻo ke kikiki Kiʻi Maka Nunui, he $250. ʻO ka hoʻokūkū polo, mai ka hola 3:00 a i ka hola 6:00. A ʻo ka ʻaha mele, e hoʻomaka ana i ka hola 6:00.

Ma Kalasona, Kaleponi, lilo aku nei ke eo iā Brian Viloria ma ka puni ʻelima ma ke kuʻikuʻi puʻupuʻu i ka Pōʻaono nei, ma muli o ka hiki ʻole i kona hoa paio, iā Miguel Cartagena, ke hoʻomau aku i ka hoʻolei puʻupuʻu. I kēia manawa, he 38 lanakila a Viloria, a he ʻelima āna hāʻule.

Eia mai kā kākou ʻōlelo noʻeau

Pae ka waʻa i Kaʻena.

He ʻōlelo kēia no ke kanaka i hele a inaina.