Ke Aolama

Hoʻololi ʻia ihola ka hana a ke Keʻena ʻĀina Hoʻopulapula Hawaiʻi me ka puʻu kālā nui i loaʻa mai.

ʻO ia aʻela kekahi poʻo nūhou o kēia lā, ka lā 14 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻĀpono iho nei ke Komikina ʻĀina Hoʻopulapula Hawaiʻi i ka hana e hoʻolilo pono ai i ka haʻawina kālā i hoʻokaʻawale ʻia e ka ʻAha ʻŌlelo. He mea nui ka hoʻolālā pono ʻana i ka hana ʻoiai, he ʻekolu wale nō makahiki e hoʻolilo ʻia ai he $600 miliona, a ʻo ke kālā e hoʻolilo ʻole ʻia ke hiki aku i ka lā 30 o Iune o ka makahiki 2025, e hoʻihoʻi ʻia ana i ke aupuni mokuʻāina. He manaʻo ko ke Keʻena ʻĀina Hoʻopulapula, he hiki nō ke hana ʻia he 3,163 pā hale a ʻo ka nui o ke kālā e hoʻolilo ʻia, he $540. A ma mua, manaʻo ʻia, e hoʻokaʻawale ʻia aku he $112 miliona i puʻu kālā kōkua mea hoʻokahu ʻia. I kēia manawa, he $60 miliona, ʻo ia wale nō.

Pahū aʻela kekahi pūʻolo ma ke kahua o ke Kulanui o Northeastern ma Pokekona i ke ahiahi Pōʻalua nei. E wehe ʻia ana ua pūʻolo lā i ka wā i pahū ai ma kahi o ka Hale ʻo Holmes o ia kulanui. Ua ʻōlelo ʻia, ʻo ka mea nāna e wehe ana, he kāne nona nā makahiki he 45 a ʻeha ihola kona lima. He pūʻolo hou, aia ma kahi o ka Hale Hōʻikeʻike Hana Noʻeau, ʻaʻole naʻe i pahū ma muli o ka ʻeleu o ka hui pōkā pahū o ke Keʻena Mākaʻi o Pokekona.

Eia mai kā kākou ʻōlelo noʻeau,

Nanā ka leo o ke kai o Hoʻohila.

He ʻōlelo kēia no ke kanaka nāna e ʻōlelo kalaʻea.

Lilo ke eo i nā Wāhine Ānuenue ma ka pāʻani pōpō paʻipaʻi.

ʻO ia aʻela kekahi poʻo nūhou o kēia lā, ka lā 12 o Kepakemapa, he Pōʻakahi. Welina e nā makamaka, ʻo Ke Aolama kēia a penei ka nūhou.

Ua māhuahua loa aʻela nā loaʻa o ka ʻoihana mahi iʻa o kēlā makahiki aku nei. I ka makahiki 2021, ʻo ka nui o ke kālā i loaʻa mai ma ke kūʻai ʻana, he $79.7 miliona. I ka makahiki 2020. he $66.6 miliona. ʻO ka hapanui o ka puʻu kālā i loaʻa mai i ka makahiki 2021, mai ka limu ia, he he $36.7 miliona, ʻo ia hoʻi, he 46% o ka huina pau. ʻO ka mahi iʻa, he māhele nui ia no ka ʻoihana mahi ʻai o Hawaiʻi nei. A ʻo ka limu, ʻo kekahi ia o nā hua kūʻai nui loa. ʻEkolu wale nō hua kūʻai ʻoi aku, ʻo ka ʻanoʻano, ʻo ke kope a me ka hua makekemia. Wahi a ka ʻAhahui Mahi ʻai a Mea ʻAi o nā Lāhui Hui Pū, manaʻo ʻia, e pālua ana ka makemake ʻia o ka iʻa ke hiki aku i ka makahiki 2050, ʻoiai, e māhuahua ana ka nui o nā kānaka o ka honua nei.

I ka Pōʻaono nei, kūʻē aku nei ʻo Hawaiʻi iā Mikikana, ka hui helu ʻehā o ke ao nei, ma ka pāʻani pōpō peku. Ma muli o ka ʻōlapa ʻana o ka uila, hoʻopaneʻe ʻia akula ka ulele ʻana aʻe he hoʻokahi hola. Akā, mai ka wā i ulele ai a pau ka hoʻokūkū, luku mai nei ʻo Mikikana. I ka hopena o ka hapahā ʻelua, he 42 ʻai a Mikikana i ka hua nēnē a Hawaiʻi. A ʻo ka helu ʻai i ke kani ʻana o ka pū, he 56 i ka 10.

Ma ka pāʻani pōpō paʻipaʻi o ka Pōʻalima nei, hāʻule iho nei nā Wāhine Ānuenue iā Kaleponi Hema ma loko o nā pāʻani ʻehā. A i ka Pōʻaono nei, hui hou ia mau hui ma ke kahua pāʻani, a kohu mea lā, e hāʻule hou ana ʻo Hawaiʻi, ʻoiai, ua lilo nā pāʻani mua ʻelua i nā Wāhine o Troy, akā, hiu aʻela ko Hawaiʻi, a lanakila ma nā pāʻani ʻekolu ma ia hope mai. He 17 hoʻopio a Riley Wagoner. A ʻo Amber Igiede, he 15 āna hoʻopio, he ʻewalu ʻali a he ʻelua ʻeki. A ʻo Kate Lang, 41 āna hānai.

Eia mai kā kākou ʻōlelo noʻeau,

He kumu lehua muimuia i ka manu.

He ʻōlelo kēia no ke kanaka uʻi.

Hala iho nei ka Mōʻīwahine o Pelekane i ke ala hoʻi ʻole mai.

ʻO ia aʻela kekahi poʻo nūhou o kēia lā, ka lā 9 o Kepakemapa, he Pōʻalima.

Ua moe ihola ka Mōʻīwahine ʻElikapeka II i ka moe kapu o Niolopua i ka Pōʻahā nei. Aia ʻo ia ma ke Kākela ʻo Balmoral ma Kekokia i kona wā i hala ai i kēlā ʻaoʻao. Ma ka ʻaoʻao pōmaikaʻi, aia nō kona ʻohana me ia i ia manawa. Ua piha nā makahiki he 96 i ua Mōʻīwahine lā. A he 70 ona makahiki i kū ai i ka moku, a ʻo ia ka wā lōʻihi loa ma ka moʻolelo o Pelekane. Lilo iho nei ke Kamāliʻi Kāne Charles, ʻo ia ka Mōʻī, a e kapa ʻia ʻo ia ma ka inoa ʻo ka Mōʻī Charles III.

E kāpae ana ka Hui Mokulele ʻo Hawaiian i ke ʻō ʻia o nā limahana i ka lāʻau koʻokoʻo maʻi kolona, ʻaʻole ana ia he koina, ke hiki aku i ka lā mua o ʻOkakopa. A ʻo nā limahana i koho i wā hoʻomaha pōkole ma ia wā koina lula maʻi kolona, he hiki iā lākou ke hoʻi aku i ka hana. Akā, ʻo nā kānaka i ʻoki i ka piko, ʻaʻole hiki ke hoʻi wale, he pono ke noi hou i kūlana hana.

E lilo paha ka inoa moho honua ma ka heʻe nalu ʻana iā Carissa Moore i kēia makahiki. A inā pēlā, ʻo ia ana ke ono o kona inoa moho honua. He ʻelima mau wāhine i koe ma ia hoʻokūkū, a ʻo Moore wale nō ka mea no Hawaiʻi. ʻO Moore ka helu ʻekahi, a no laila, ʻo nā wāhine ʻē aʻe, e kūʻē ana, a kū ana ka moho nāna e hoʻokūkū me Moore no ka inoa moho.

Eia mai kā kākou ʻōlelo noʻeau,

Nā keiki a Kalaihaohia.

He ʻōlelo kēia no ke kanaka ʻānunu.

E hoʻihoʻi ʻia ana kahi puʻu kālā ʻauhau i ko Hawaiʻi.

ʻO ia aʻela kekahi poʻo nūhou o kēia lā, ka lā ʻehiku o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

I ka Pōʻalua nei, hoʻomaka iho nei kahi polokalamu e kāhaʻu ai ke kalaima ma Waikīkī. ʻO ka inoa o ua polokalamu lā, ʻo ia hoʻi, ʻo Waikīkī, he Wahi Palekana a Maluhia. ʻO ia ke koi a ka kaiāulu o laila ma hope mai o kekahi mau kalaima ʻino loa. Na ke kūlanakauhale o Honolulu i hoʻokaʻawale he $250,000 a ʻoi aku a emi mai paha. A he $90,000 mai ke Kahua ʻo Paul Kosasa. ʻO nā palena o ia polokalamu, mai ke Awa Kū Moku Liʻiliʻi o ke Ala Wai a i ke Alanui ʻo Kaimana Hila a pili aku i ke Alanui ʻo Ala Wai. A aia nō hoʻi ma loko o ia mau palena ke Kia Hoʻomanaʻo Mokuʻāina ʻo Lēʻahi, ke Kahua Hōʻikeʻike Holoholona Laka ʻOle o Honolulu a me ka Pāka ʻo Kapiʻolani.

E hoʻihoʻi ʻia ana kahi ʻauhau i ko Hawaiʻi nei. A e hoʻomaka ana i kēia Pōʻakahi aʻe. ʻO ka nui o ke kālā e hoʻihoʻi ʻia ana, he $300, inā ʻo kou uku hana makahiki, he $100,000 a emi mai. A no ka paʻa male, he $200,000, a e lilo he $300 pākahi. A e lilo nō hoʻi he $300 i kēlā me kēia ʻaiʻai. A inā ʻoi aku kou uku hana makahiki i ka $100,000, he $100 ka mea e hoʻihoʻi ʻia. A he $200,000 no ka paʻa male.

Eia mai kā kākou ʻōlelo noʻeau,

Ua laʻi ka nohona i ke alo pali.

ʻO ia hoʻi, ua maluhia loa.

Hoʻopiʻi ʻia aku nei kekahi kanaka no ka ʻaihue kanaka.

ʻO ia aʻela kekahi poʻo nūhou o kēia lā, ka lā 31 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

Hopu ʻia aku nei kekahi kanaka ma Hōnaunau i ka lā 24 o ʻAukake no ka hoʻohuoi i ka hoʻopaʻahao kūʻē kānāwai. ʻO Christopher Estoy kona inoa, no Kailua-Kona. ʻAkahi nō ʻo ia a hoʻopiʻi ʻia aku nei i ka Pōʻakahi nei no ka ʻaihue kanaka, ka ʻākeʻakeʻa i ka mālama ʻana, ka hoʻoweliweli ʻana ma ke kēkelē ʻekahi a me ka hoʻopaʻahao kūʻe kānāwai ma ke kēkelē ʻelua. Ma kekahi hihia ma mua, i ka makahiki 2013, ua hoʻāhewa ʻia aku ʻo Estoy no ka hoʻāʻo ʻaihue kanaka ma ke Kiko Waena Kūʻai ʻo Ala Moana. ʻO ka hoʻopaʻi, he 10 makahiki o ka noho paʻahao ʻana. Ua kō nō iā Estoy ia hoʻopaʻi, a ʻakahi nō a hoʻokuʻu ʻia mai he ʻekolu mahina aku nei.

ʻŌlelo aʻela ʻo Josh Green lāua ʻo James “Duke” Aiona, inā e lilo ʻo ia ke kiaʻāina, e lilo ʻo Kapūkakī, ʻo ia kekahi o nā mea nui loa, a e koi hoʻohune i ka ʻOihana Moku e wikiwiki ma ke pani ʻana i nā hana ma laila. Akā, ʻokoʻa ka manaʻo o Green a ʻokoʻa hoʻi ka manaʻo o Aiona ma ka hoʻomau ʻana i nā palapala ʻaelike e pau ana i nā makahki e hiki mai ana. Wahi a Green, he pono i ka pūʻalikoa ke hoʻomaikaʻi hou i ka pilina i mea e hilinaʻi ʻia ai lākou e ke kaiāulu, a aia wale nō a hilinaʻi hou ʻia lākou, a laila, e hoʻomau ʻia nā palapala ʻaelike. Wahi a Aiona, ina ʻo ia ke kiaʻāina, e hoʻomau ʻia ka pilina maikaʻi o ka mokuʻāina me ka pūʻalikoa. ‘Ōlelo nō hoʻi ʻo Aiona, ma ko lāua wā me Linda Lingle e kū ana i ka moku, he keu ka maikaʻi o ka pilina me ka pūʻalikoa. A ua ʻoi loa aku ia pilina i kēia manawa, a ʻoi loa aku me ka ʻŌiwi Hawaiʻi. A makemake ʻo Aiona e mālama i ia pilina maikaʻi.

Hōʻike aʻela ʻo Timmy Chang, ke kumu o ka hui pōpō peku o Hawaiʻi, he ʻekolu mau mea pāʻani e hoʻokūkū ana no ke kūlana ʻalihi kūlele mua. ʻO ia ʻo Brayden Schager, ʻo Joey Yellen, a me Cammon Cooper. ʻO Schager lāua ʻo Yellen wale nō nā ʻalihi kūlele i pāʻani ma ka Pōʻaono nei ma ke kūʻē ʻana aku iā Wanapila. E kūʻē aku ana ʻo Hawaʻi iā Kenetuke Komohana i kēia Pōʻaono ma ke Kahua Pāʻani ʻo Ching.

Eia mai kā kākou ʻōlelo noʻeau,

Mōhala maikaʻi ke oho o ke kupukupu.

He ʻōlelo kēia no ke kanaka uʻi.

Hoʻopaneʻe ʻia ka hihia o kekahi mau kānaka o Maui i hoʻopiʻi ʻia no ke kalaima makawela.

ʻO ia aʻela kekahi poʻo nūhou o kēia lā, ka lā 29 o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua hoʻopaneʻe ʻia aku nei ka hihia o kekahi mau kānaka Hawaiʻi a ka lā 7 o Nowemapa. ʻO ko lāua mea i hoʻopiʻi ʻia ai, he kalaima makawela pekelala. Ua hoʻopiʻi ʻē ka mokuʻāina iā Kaulana Alo-Kaonohi lāua ʻo Levi Aki ‘Ōpio no ka limanui ma ke ʻano he peloni, a he ʻehiku makahiki ma hope mai o ka limanui ʻana i ka makahiki 2021, aia nō ke Keʻena Loio o ʻAmelika Hui Pū ʻIa e hoʻopiʻi aku ana iā lāua no ke kalaima makawela me ka ʻōlelo ʻana, he hoʻokae ʻili ke kumu o ko lāua pepehi ʻana iā Chris Kunzelman a pau ka ʻike a pau hoʻi ka lohe. Ma ka palapala hoʻopōkole ʻia no ka hihia i waiho ʻia e Salina Kanai, ka loio o Alo-Kaonohi, ʻaʻole pili iki ka ʻili a me ke koko paha o Kunzelman. Akā, ʻo ka hana hōʻino a Kunzelman a me kona mahalua, ʻo ia ke kumu i kū ai ʻo Alo-Kaonohi mā i ke alo o ua kanaka lā. Ua kupu aʻe ia hana i ka mahina ʻo Pepeluali o ka makahiki 2014 ma Kahakuloa. Ua kūʻai ʻo Kunzelman i hale ma laila a i kona hiki ʻana aku, ʻākeʻakeʻa ʻia ke ala e moe ana i kona hale hou. Ua paʻa ka ʻīpuka i ka laka, no laila, ua ʻoki wale aku ʻo Kunzelman i ka laka, a kalaiwa akula i ke ala, āna i manaʻo ai he kū nō kona hele ʻana i ke kānāwai. Manaʻo ihola ʻo Alo-Kaonohi lāua ʻo Aki, he komo hewa kā Kunzelman i kā lāua ala i hoʻomalu ʻia.

Aloha nō. Hāʻule ihola ʻo Hawaiʻi iā Vanderbilt ma ka pōpō pekupeku o ka Pōʻaono nei. Na nā Koa Ānuenue nō nā ʻai mua ma ka holo ʻana o Dedrick Parson a loaʻa ka ʻai holo. Akā, ma hope o kēlā, hiu aʻela nā Komakoa a lilo ke eo iā lākou ma ka helu ʻai he 63 i ka 10 a Hawaiʻi. I kēia pule, e kūʻē aku ana ʻo Hawaiʻi iā Kenetuke Komohana.

Kāʻili aku nei nā keiki o Honolulu i ka lanakila ma ka puni inoa moho o ka Hoʻokūkū Inoa Moho Pōpō Hili o ka Honua o ke Kuʻikahi Liʻiliʻi. Ua eo ʻo Curacao iā Honolulu, ma ka helu ʻai he 13 a Honolulu i ka 3 a Curacao.

Eia mai kā kākou ʻōlelo noʻeau,

He nani wale nō ʻo Puna mai ʻō a ʻō.

ʻO ia hoʻi, ʻaʻohe mea e namunamu ai.

Piha hauʻoli ka naʻau o kekahi paʻahao i hoʻokuʻu laʻelaʻe ʻia.

ʻO ia aʻela kekahi poʻo nūhou o kēia lā, ka lā 26 o ʻAukake, he Pōʻalima. Welina e nā makamaka. ʻO Ke Aolama kēia a penei ka nūhou.

Ua hoʻokuʻu laʻelaʻe ʻia kekahi kanaka e noho paʻahao ana no nā makahiki he 36 a ʻoi. ʻO Sullivan Walter ka inoa o ua kanaka lā, a he 53 ona makahiki i kēia manawa. He 17 ona makahiki i kona wā i hoʻāhewa hewa ʻia ai no ka puʻe ʻana i ka wahine ma Nū ʻOlina. He mau pilikia ko ka hihia. ʻO kekahi mea nui loa, ʻaʻole i hōʻike ʻia i mua o ka ʻaha ka like ʻole o ke ʻano o ke koko o Walter me ke keakea i loaʻa ma ka wahine ma hope o ka puʻe ʻana. Wahi a Richard Davis, kekahi Luna o ka Papahana Hewa ʻOle o Nū ʻOlina, ʻo nā loio a me nā mākaʻi i pili i ia hihia, ua hana lākou me he mea lā, ua hilinaʻi lākou, hiki iā lākou ke hana e like me ko lākou makemake i ka ʻōpio Pāʻele no loko mai o ka ʻohana puhikole a ʻaʻole e loi ʻia kā lākou hana.

Aia nō ke noiʻi ʻia akula kahi kaʻa lawe maʻi i ā ʻia i ke ahi ma ka Haukapila ʻo Kākela ma Kailua. E lawe ʻia ana kahi maʻi i ka haukapila a i ka wā i hiki aku ai i ke ala kalaiwa o ia haukapila, ʻā ʻia aʻela ke ahi, a e hōlapu ana. ʻEkolu mau kānaka o luna o ke kaʻa lawe maʻi i ia manawa, ʻo ke kahu lapaʻau ulia e kalaiwa ana, ua pakele akula, ʻaʻohe wahi ʻeha. A ʻo ke kahu lapaʻau ulia ma kahi o hope o ke kaʻa, ua pakele nō ma ka puka ʻana i waho, ua ʻeha kūpilikiʻi naʻe. A ʻo ka maʻi, ʻaʻole i puka mai i waho, a ʻo kona make ihola nō ia. Hoʻopūhili ʻia ka noʻonoʻo o nā luna kahu lapaʻau ulia, ma ka nui o ko lākou mau makahiki e hana ana ma ka ʻoihana kahu lapaʻau ulia, ʻaʻole lākou i ʻike iki i ka ʻā ʻia o ke kaʻa lawe maʻi i ke ahi.

E kūʻē aku ana ʻo Hawaiʻi iā Vanderbilt ma ka pōpō pekupeku i ka lā ʻapōpō, ka lā 27 hoʻi o ʻAukake. A ua pau loa nā likiki i ke kūʻai ʻia. E mālama ʻia ana ka hoʻokūkū ma ke Kahua Pāʻani ʻo Clarence T.C. Ching, a he 9,346 mau noho o ia wahi. E ulele ana ka hana ma ka hola 4:30 o ka ʻauinalā. E hoʻolele ʻia ana nō hoʻi ma luna o ke kīwī i ia wā nō ma ke kānela CBS Sports.

Eia mai kā kākou ʻōlelo noʻeau,

Pihaʻā moe wai uka.

He ʻōlelo kēia no nā kāʻeʻaʻeʻa ma nā hana ʻālapa.

E kāpae ʻia paha kahi ʻaiʻē haumāna.

ʻO ia aʻela kekahi poʻo nūhou o kēia lā, ka lā 24 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

Kūkala aʻela ka Pelekikena Joe Biden i kona manaʻo, e hoʻokō ʻia kāna ʻōlelo hoʻohiki e kāpae ʻia aku kahi ʻaiʻē haumāna. ʻO ka nui o ko ke kanaka ʻaiʻē e kāpae ʻia, he $10,000. ʻO nā kānaka ʻaiʻē nona ka uku hana makahiki he $125,000 a emi mai, ʻo ia nā kānaka hiki ke noi i ke kāpae ʻia o ka ʻaiʻē haumāna. A ʻo ka uku hana makahiki o ka ʻohana, e emi mai i ka $250,000.

Make ihola kekahi mau kānaka ʻelua ma ka ulia kaʻa ma Mālaekahana i ke awakea Pōʻakahi nei. E kalaiwa pupule ana kekahi kanaka ma ke kalaka a i kekahi manawa āna i ʻaʻe hewa ai i kekahi ʻaoʻao o ke alanui, hoʻokuʻi akula kona kalaka i kekahi kaʻa e holo mai ana. ʻO ka wahine e kalaiwa ana i ke kaʻa, lawe ʻia akula ʻo ia i ka haukapila kahi ona i make ai ma hope mai ma muli o nā ʻeha. A ʻo ka ʻōhua ma ka noho o hope o ia kaʻa, ua make nō ma kahi o ka ulia kaʻa. ʻO ka ʻōhua ma ka noho o mua, aia nō ma ke kūlana kūpilikiʻi ma ka haukapila. A ʻo ke kanaka e kalawa ana i ke kalaka, aia nō ma ka haukapila ma ke kūlana kūkonukonu. Aia nō ka mākaʻi ke noiʻi akula.

ʻAneʻane e hiki aku nā keiki pōpō hili o Honolulu i ka puni inoa moho o ka Hoʻokūkū Kuʻikahi Liʻiliʻi o ʻAmelika. ʻO Nolensville, Tenesī ko lākou hoa paio i kēia lā, a ʻo ka lanakila o ka hoʻokūkū o kēia lā, ʻo ia ke komo aku i ka puni inoa moho. E ulele ana i ka hola 9:00 o ke kakahiaka.

Eia mai kā kākou ʻōlelo noʻeau,

Ka lawaiʻa nui i ʻeaʻea nā kuʻemaka, a i ʻehuʻehu nā lihilihi.

He ʻōlelo mahalo kēia i ka loea lawaiʻa.

Lilo aku nei kahi makana iā Kealohapauʻole Wong.

ʻO ia aʻela kekahi poʻo nūhou o kēia lā, ka lā iwakālua kūmālua o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua lilo mai nei he haʻawina kālā iā Kealohapauʻole Wong no kona ʻano he haku mele kau i ka hano no ka mokuʻāina ʻo Hawaiʻi. He $50,000. A he puʻu kālā ia mai ka ʻAhahui Haku Mele ʻAmelika mai. ʻO Wong, ʻo ia ka haku mele kau i ka hano mua o Hawaiʻi nei. A ke paʻa mai ia puʻu kālā iā ia, e paʻi kiʻi ʻoniʻoni ʻia kekahi mau papa haku mele me ka lana o kona manaʻo, e hoʻoulu ʻia nā kānaka a e kaʻana like i ko lākou mau moʻolelo ma o ka haku mele. E mālama ʻia ana ia mau papa haku mele no nā haumāna o ka papa ʻehiku o ke Kula Hoʻāmana ʻo Ka Waihona o ka Naʻauao ma Waiʻanae. A ke pau i ke paʻi ʻia, e hoʻokumu ʻo ia i kahua pūnaewele, kahi e ʻike ai ka lehulehu i nā haʻawina, nā mele, a me ia mau papa. Ma ke kau ʻahaʻōlelo o Hawaiʻi i hala iho nei, paʻa ihola kahi ʻōlelo hoʻoholo, e wae ʻia he haku mele hanohano hou i kēlā me kēia makahiki ʻekolu. A e hoʻomaka ana i ka mahina ʻo Ianuali o ka makahiki 2023.

ʻO OBRL Kado Hawaiʻi nō ka ʻoi! ʻĀhaʻi aku nei nā keiki o OBRL Kado Hawaiʻi i ka inoa moho o ka Hoʻokūkū Inoa Moho ʻo Babe Ruth no nā keiki he 13 makahiki a emi mai. Ma ke komo ʻana ʻekahi, e ʻoi ana ʻo Pittsfield, Makakukeka, he ʻakahi i ka hua kakā. Akā, hiu aʻela nā keiki o Hawaiʻi, a lanakila ai lākou ma ka helu ʻai he ʻalima i ka ʻakahi.

Eia mai kā kākou ʻōlelo noʻeau,

He iʻa kokoke kā ka lawaiʻa.

He ʻōlelo kēia no ke kanaka hiki ke hoʻokō koke i kona makemake ma muli o kona akamai.

Hoʻopakele ʻia kekahi mau keiki i kūʻai ʻia ma Hawaiʻi nei.

ʻO ia aʻela kekahi poʻo nūhou o kēia lā, ka lā ʻumi kūmāhiku o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻAkahi a hoʻomaka ka ʻOihana Mākaʻi o Maui i ka noiʻi ʻana i ka pepehi ʻana iā John Picanco a make. Ua loaʻa ke kino kupapaʻu o Picanco i ke kakahiaka o ka lā 10 o ʻAukake ma ke kahua pāʻani pōpō paʻipaʻi o ka Pāka Kahakai o Kamaʻole. A ma muli o ka noiʻi a me ke kālai kupapaʻu ʻana, holo ihola ka manaʻo, ua pepehi kanaka ʻia ʻo Picanco. Inā he wahi ʻike paha kāu no ia make ʻana o Picanco, e kāhea aku i ka Mākaʻikiu Kamuela Mawae ma ka helu 808-875-5411. A inā ʻaʻole makemake e hōʻike ʻia kou inoa, e kāhea aku i ka helu 808-242-6966.

Huliāmahi nā mākaʻi like ʻole a me nā keʻena like ʻole ma ka ʻimi ʻana a loaʻa nā kānaka i kūʻai ʻia no ka hoʻokamakama ʻana. A ma Hawaiʻi nei, alu like ihola ka Pulo Mākaʻi Pekelala me

ka ʻOihana Kiu o ʻAmelika Hui Pū ʻIa, ke Keʻena Loio Hoʻopiʻi o Honolulu, ke Keʻena Mākaʻi o Honolulu, ke Kikowaena Keiki Nalowale o Hawaiʻi, ke Keʻena Lawelawe Pono Keiki o ka Mokuʻāina ʻo Hawaiʻi, a me ke Keʻena Kaiāulu ʻo Susanna Wesley, a loaʻa ai iā lākou he ʻehiku mau keiki i kūʻai ʻia no ka hoʻokamakama i kēlā Pōʻalima aku nei. A hopu ʻia nō hoʻi, he ʻelua mau kānaka nāna i kūʻai i ia mau keiki ʻehiku. A ma ʻAmelika Hui Pū ʻIa nō hoʻi i hana pū ai ka Pulo Mākaʻi Pekelala me nā keʻena like ʻole i mea e ʻimi ai a loaʻa nā kānaka i kūʻai ʻia.

Eia mai kā kākou ʻōlelo noʻeau,

He lani ke keiki, he milimili na ka makua.

ʻO ia hoʻi, he mea nui ka mālama pono ʻana i ke keiki, e like hoʻi me ka mālama ʻana i ke aliʻi.