Ke Aolama

Pau iho nei nā lā ʻelima o ka ʻolohani ʻana o nā kahu maʻi o Kaiser.

ʻO ia aʻela kekahi poʻo nūhou o kēia lā, ka lā 20 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua nui nā kānaka i ʻākoakoa aʻela, ʻelua mano a ʻoi, ma ke Alanui Pelekania i ka Pōʻaono nei, no ke kūʻē ʻana aku i ka pelekikena o ʻAmelika Hui Pū ʻIa. E kū ana lākou mai ke Alanui Bīhopa a ma ʻaneʻi mai o ka huina o ke Alanui Pūowaina. ʻO ka hālāwai hōʻeuʻeu maluhia ia i kapa ʻia ʻo “ʻAʻohe Poʻo Aupuni Nāna Ka Mana A Pau Loa”. Ua ʻōlelo ʻia, ʻo ka nui o nā kānaka i ʻākoakoa ma Hawaiʻi nei a puni, he 22,000. Aia nō hoʻi kekahi mau kānaka helu wale e kākoʻo ana iā Trump.

ʻO ka Pōʻaono nei ka lā ʻelima a nā kahu maʻi o Kaiser Permanente o ka ʻolohani ʻana, a no laila, ua pau ihola. Ma ia wā, hoʻokumu ʻia iho nei kekahi mau lula hou o ke Komikina Hui e hoʻonohonoho ana i ka lawa pono o nā limahana i koina no ka palekana o nā maʻi. E hoʻi ana nā ʻelele uniona i ke kūkākūkā ʻana me ko Kaiser i ka lā 28 me 29 o ʻOkakopa.

ʻĀhaʻi aku nei ʻo Hawaiʻi i ka lanakila ma ka hoʻokūkū kinipōpō pekupeku o ka Pōʻaono nei. ʻO Kololako Mokuʻāina ka hoa paio, a ʻo ka helu ʻai i ka hopena, he 31 i ka 19. Ma muli o ia lanakila ʻana, ua paʻa ihola ke komo ʻana o Hawaiʻi i loko o ka Hoʻokūkū Ipu. Maikaʻi wale ka hana a Micah Alejado, he 301 āna ʻīā i nou ai a he ʻekolu nō hoʻi ʻai holo. A he ʻai peku kā Kansei Matsuzawa ma ia hoʻokūkū, a ʻo ka iwakālua kumamākahi ia ma hope kekahi o kekahi. A ʻo ia ka nui loa ma ka moʻolelo o ke Kulanui o Hawaiʻi. Ma mua, ʻo Jason Elam ka ʻoi o ke Kulanui o Hawaiʻi ma ka ʻai peku, he 20 ma hope kekahi o kekahi i ka makahiki 1992.

Eia mai kā kākou ʻōlelo noʻeau,

Paʻa ka moku i ka heleuma.

He ʻōlelo kēia no ke kanaka i male.

He ʻolohani hou nō paha.

ʻO ia aʻela kekahi poʻo nūhou o kēia lā, ka lā 17 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻomaopopo aku nei ka hui uniona Local 996 i ke Kikowaena Lapaʻau ʻo Kapiʻolani, i ka hola 7:00 o kēia Pōʻalima nei, e hoʻomaka ka ʻolohani ʻana o nā limahana he 300 paha, ʻo ka mea ʻike loea, ka mea hoʻolālā ʻaina pono, ka mālama hale, a me kekahi mau kūlana lawelawe hana. E ʻolohani ana nō i nā hola a pau o ka lā, ma nā lā a pau o ka pule, a ʻaʻole i paʻa ka lā e pau ai ia kūʻē ʻana.

Ua ʻōmaʻimaʻi ihola he 15 mau haumāna o kekahi mau kula ʻehā o Oʻahu nei. I ʻōmaʻimaʻi paha i ka inu ʻana i ka waiū kokoleka a ka hui Meadow Gold. ʻO nā ʻōuli, ʻo ka ʻōpū ʻeha, ka naluea a me ka luaʻi. Ua kūkala aʻela ka hui Meadow Gold, e hoʻihoʻi ʻia i ia hui nā waiū kokoleka hapa paina, ʻo ka lā 16 o ʻOkakopa kona lā kau palena. Ma kekahi kula ma Oʻahu nei a ma kekahi ma Maui, hōʻike aʻe nei no ke ʻano kūpono ʻole o ia waiū kokoleka, ua kūpū, kohu pukini kokoleka. ʻAʻohe naʻe haumāna i hele a maʻi ma ia mau kula ʻelua.

Hui hou ihola nā kaikamāhine o Kamehameha a me nā kaikamāhine o ʻIolani no ka hoʻokūkū inoa moho pōpō paʻipaʻi o nā kula uku o Honolulu i ka pō Pōʻahā nei, a lilo aku nei ka inoa moho i ka inoa ʻelua ma loko o nā pāʻani ʻekolu wale nō. He 14 hoʻopio a Taimane Ainuʻu, a he 13 a Poema Kalama-Kingma. Aloha nō ʻo Kamehameha. He ʻelua pule ma mua aku nei, lanakila aku nei ʻo Kamehameha ma luna o ʻIolani i loko o nā pāʻani ʻelima. A i kēlā pule aku nei ma ka puni ʻelua o ka hoʻokūkū, na ʻIolani nō i kāʻili i ka lanakila.

Eia mai kā kākou ʻōlelo noʻeau,

Wela ke kai o Hoʻohila.

He ʻōlelo mahalo kēia i ke koa wiwoʻole. A ʻo kekahi manaʻo, e hōʻike ana ia, aia kahi mea hoʻopōʻino mai ma kahi kokoke.

Ke kū aʻela nā limahana o Kaiser i ka pono.

ʻO ia aʻela kekahi poʻonūhou o kēia lā, ka lā 15 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō nā limahana o Kaiser Permanente ke ʻolohani aku nei. I ka Pōʻalua nei nō i hoʻomaka ai ka hana ʻolohani. He 2,300 paha limahana Kaiser ma Hawaiʻi nei, a he 45,000 hou aku e ʻolohani ala a puni ʻo ʻAmelika Hui Pū ʻIa. ʻO ka mea e hoʻopaʻapaʻa ʻia nei, ʻo ia ka uku hana, ka mālama i ka pōmaikaʻi, a me ka pilikia i ka pōkole o nā limahana. Wahi a ka hui uniona Local 5, ʻoi aku ka uku o nā o nā limahana o Kaiser i ka ʻāina haole he 30% a emi mai, ma mua o ko Hawaiʻi poʻe limahana. He ʻelima lā o nei ʻolohani ʻana.

A ʻo kekahi hui paha e ʻolohani, ʻo ia ka poʻe kalaiwa kaʻa ʻōhua o ke Kūlanakauhale a me ke Kalana o Honolulu. He 130,000 mau kānaka kau kaʻa ʻōhua o ka lā, a ke paipai ʻia nei lākou e ʻimi aku i ala hou e hiki aku ai i ko lākou mau wahi e hele aku ai. Ua hoʻomaka iho nei ke kūkākūkā ʻana o Oʻahu Transit Services me ka hui uniona Local 996 ma ka mahina ʻo Iune, ʻaʻole naʻe i loaʻa mai kahi ʻaelike.

Kau aʻe nei kekahi mau mea pāʻani pōpō peku ʻekolu o ke Kulanui o Hawaiʻi i ka hano hāweo, ʻo lākou ka ʻoi o ka ʻAhahui Mauna Komohana ma muli o kā lākou hana ma ka Pōʻaono nei. ʻO ka mua, ʻo ia ʻo Jamih Otis, ka mahikua waena. ʻO ia ka Mea Pāʻani Kūpale ʻOi o ka Pule. Ma muli o Otis i pahemo ai ka pōpō a lilo maila iā Hawaiʻi. A ma hope mai, ma ke kiloi hope loa ʻana a Bryson Barnes, ka ʻalihikūlele o ʻUta Mokuʻāina, ʻapo lilo akula ʻo Otis i ka pōpō. ʻO ka lua o ke kanaka i kau i ka hano hāweo, ʻo Kansei Matsuzawa. Ua koho ʻia ʻo Matsuzawa, ʻo ia ka Mea Pāʻani ʻOi o ka Hui Kūikawā. A ʻo ke kolu, ʻo ia ʻo Micah Alejado, ka ʻalihikūlele o Hawaiʻi. ʻO ia ka Haumāna Komo Hou ʻOi o ka Pule. He 413 āna ʻīā i nou ai me nā ʻaiholo 3.

Eia mai kā kākou ʻōlelo noʻeau,

Hele kā hoʻi a hiki i Kealia, ua napoʻo ka lā.

He ʻōlelo kēia no ke kanaka hoʻopaneʻe pinepine i ka hana.

Hoʻopau ʻia ke kaua ma Gaza.

ʻO ia aʻela kekahi poʻo nūhou o kēia lā, ka lā 13 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ma hope o nā makahiki ʻelua o ke kaua ʻana o ʻIkelaʻela me Hamasa, ʻaelike ihola lāua ʻelua i ka hoʻopau kaua. Hoʻomaka aʻela ʻo Hamasa e hoʻokuʻu aku i kekahi o nā kānaka pānaʻi ʻIkelaʻela hope loa i ka Pōʻakahi. Ua ʻōlelo ʻia, e hoʻokuʻu ʻia aku ana he 20 mau kānaka pānaʻi e ola nei, a e hoʻihoʻi ʻia ana nā kino o nā kānaka pānaʻi make he 26. A e hoʻokuʻu ʻia ana nō hoʻi nā Palekekine he 2,000 a emi iho i hoʻopaʻahao ʻia. Ua paʻa ihola ia ʻaelike i kēlā pule aku nei ma ʻAikupika.

Hahana nō nā hapahā mua ʻelua o ka hoʻokūkū pōpō peku ʻana o Hawaiʻi me ʻUta Mokuʻāina i ka Pōʻaono nei. ʻO ka helu ʻai i ka hopena o ka hapahā ʻelua, he 24 ʻai a Hawaiʻi i ka 20 a ʻUta. Ma hope mai, ua hiu aʻela nā Koa Ānuenue a kāʻili akula i ke eo ma ka helu ʻai he 44 i ka 26. He 413 ʻīā a Micah Alejado i nou ai. ʻO ke kolu ia o ka hoʻokūkū i ʻoi ai kāna mau ʻīā nou i ka 400. A he ʻelua ʻāʻapo o Hawaiʻi na lāua nā ʻīā he 100 a ʻoi. ʻO Jackson Harris, he 117 āna ʻīā. A ʻo Pofele Ashlock, he 113 āna ʻīā. I kēia manawa, he 5 lanakila o Hawaiʻi a he 2 hāʻule. Inā e lanakila hou ʻo Hawaiʻi, he hiki nō ke lilo i moho no ka hoʻokūkū ipu.

Eia mai kā kākou ʻōlelo noʻeau,

Meʻe uʻi o Hanalei.

He ʻōlelo kēia no ke kanaka nohea.

Mākaukau ka māhele 2 o ke ala uila kau i ka lewa.

ʻO ia aʻela kekahi poʻo nūhou o kēia lā, ka lā 10 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka Pōʻahā nei, kau aku nei kekahi poʻe kākau nūhou ma luna o ke kaʻa uila kau i ka lewa, a holo akula ma ka māhele ʻelua. ʻO ia ka māhele e holo ana mai Hālawa a i Kahauiki. ʻAkahi nō a mākaukau. A e hoʻomaka ke kau ʻana o ka lehulehu i kēia pule aʻe. ʻO kekahi o nā wahi e kū ai ke kaʻa uila, aia ma Āhua. A ma laila e kau ai ke kanaka ma ke kaʻa ʻōhua e holo ana no ke kaona, no Waikīkī, a no ke Kulanui o Hawaiʻi ma Mānoa. E manuahi ana ke kau ʻana ma ke kaʻa uila i nā lā 17 me 18 o ʻOkakopa nei. Ke lana nei ka manaʻo o nā luna aupuni, e māhuahua loa ana nā kānaka kau kaʻa uila.

Ua māhuahua aʻela nā kānaka i limanui aku i nā mākaʻi i kēia makahiki nei. Mai ka hoʻomaka ʻana o kēia makahiki nei a hiki i ka Pōʻalua nei, he 35 mau mākaʻi i limanui ʻia. Ma ia wā like o ka makahiki 2024, he 29 wale nō mākaʻi i limanui ʻia. Ua piʻi he 21 pākeneka. A no ka makahiki 2024 piha, he 43 hihia hōʻeha mākaʻi.

Ma muli o ke pani ʻia ʻana o ke aupuni pekelala, hoʻomaka iho nei ka poʻe kamahele e kāpae aku i nā huakaʻi. A aia a hemo hou ke aupuni pekelala a laila, hoʻi hou i ka lele ʻana ma ka mokulele. He manaʻo ko kekahi poʻe, he mau lā hou aku paha ka lōʻihi, a he mau pule paha.

Eia mai kā kākou ʻōlelo noʻeau,

Ua laʻi ka nohona i ke alo pali.

ʻO ia hoʻi, ua maluhia loa.

Hoʻi aku nei kekahi Kumu Hula aloha o Kauaʻi i ke ala hoʻi ʻole mai.

ʻO ia aʻela kekahi poʻo nūhou o kēia lā, ka lā 8 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Aloha nō. I ka hopena pule nei, ua moe ihola ke Kumu Hula Leināʻala Pavao Jardin i ka moe kapu a Niolopua. ʻO Pavao Jardin ke kumu hula o Hālau Ka Lei Mokihana o Leināʻala ma Kauaʻi. A he kaikamahine ʻo ia i hānau a hānai ʻia ma Kauaʻi. Ua hoʻomaopopo ʻia ʻo ia i ke kau wela o ka makahiki 2024, ua loaʻa ʻo ia i ka maʻi ʻaʻai. A i loko nō o kona ʻāʻumeʻume ʻana me ua maʻi lā, ua komo akula kāna mau wāhine a me nā kāne i ka hoʻokūkū hula ʻo ka Merrie Monarch, a lilo akula kāna moho, ʻo ia ka Miki Aloha Hula o ka makahiki 2025. I ka makahiki 2022, lilo aku nei i nā wāhine o Hālau Ka Lei Mokihana o Leināʻala ka makana helu ʻekahi o ka māhele hula ʻauana a me ka māhele hula kahiko. He haumāna ʻo Pavao Jardin na Kumu Hula Rae Fonseca i hala.

Aia nō ka ʻAha ʻŌiwi Hawaiʻi ke mālama ʻia aku nei ma Tulalip i Wakinekona a hiki i ka Pōʻahā. ʻO ka nui o nā kānaka e hele nei i ua ʻaha lā, he 1,300 a ʻoi aku mai nā mokuʻāina a me nā ʻāina ʻē he 37. ʻO ka hapanui o lākou, mai Hawaiʻi aku, a he hapahā, ma Wakinekona e noho nei. Ma kekahi pānela o ka Pōʻalua nei, e kamaʻilio ana no ka ʻike ʻia o ka lāhui Hawaiʻi he aupuni ia i mua o nā maka o ke aupuni pekelala. Ma ia pānela, aia ʻo Breann Nuʻuhiwa, he aʻoaʻo a kū i ka pono no nā aupuni ʻōiwi a me nā hui ʻoihana, ʻo Summer Sylva, ke kahu hoʻoponopono kūikawā o ke Keʻena Kuleana Hawaiʻi, a me Esther Kiaʻāina, he lālā no ka ʻAha Kūkā o Honolulu nei.

Eia mai kā kākou ʻōlelo noʻeau,

ʻAwapuhi lau pala wale.

He ʻōlelo kēia no ke kanaka nāwaliwali, a no kekahi mea paha e pau koke ai ka pono.

Ua māhuahua nā haumāna o ke Kulanui o Hawaiʻi.

ʻO ia aʻela kekahi poʻo nūhou o kēia lā, ka lā 6 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Aia kekahi pila ma ka ʻAha Kūkā o Honolulu e ʻae ana i ka hoʻolālā ʻana i ka hoʻolōʻihi ʻana i ke ala o ke kaʻa uila kau i ka lewa a i ke Kulanui o Hawaiʻi ma Mānoa. Ua mahae lua ka ʻAha Kūkā i ke koho pāloka ʻana i kēlā Pōʻakolu aku nei. I kēia manawa, ʻo ka pahu hopu, ʻo ka huina o ke alanui ʻo Halekauwila a me ke alanui ʻo South. A i ka makahiki 2030 paha e pau ai ia māhele i ke kūkulu ʻia.

Māhuahua aʻela nā haumāna o ke Kulanui o Hawaiʻi i kēia kau hāʻule lau nei a ke 51,411. ʻO ia ka helu nui loa ma nā makahiki ʻewalu i kaʻa hope aku nei. ʻO ke kolu ia o ka makahiki ma hope kekahi o kekahi, i piʻi ai nā haumāna.

I ka Lapule nei, hōʻike aʻela ka Pelekikena Donald Trump, e mālama ʻia ana he hoʻokūkū mokomoko o ka UFC ma ka pā mauʻu o ka Hale Keʻokeʻo i ka makahiki 2026. I ka lā 14 o Iune e mālama ʻia ai, a ʻo ka lā hānau nō hoʻi ia o ka pelekikena. Haʻi aku nei ʻo Dana White, ka pelekikena o ka UFC, i ka Sports Business Journal, e hoʻolilo aku ka UFC he $700,000 no ke kanu hou ʻana i ka mauʻu ma ka Hale Keʻokeʻo ma hope aku o ka hoʻokūkū.

Eia mai kā kākou ʻōlelo noʻeau,

Lana ka ʻauwae i kahi hāiki.

ʻO ia hoʻi, ua pakele māhunehune i ka pilikia.

E mālama ʻia paha ka hoʻokūkū mokomoko UFC ma Hawaiʻi nei ma kēia hope aku.

ʻO ia aʻela kekahi poʻo nūhou o kēia lā, ka lā 3 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

He manaʻo ko ke Kiaʻāina Josh Green e alu like me ka UFC, ʻoiai, ke pau ke Kahua Pāʻani Hou ʻo Aloha i ke kūkulu ʻia, he wahi maikaʻi ana ia e mālama ʻia ai nā hoʻokūkū mokomoko. I kēlā pule aku nei ma Maui, hālāwai aku nei ʻo Green me Dana White, ka pelekikena o ka UFC a me ka inoa moho BMF o ka UFC, ʻo Max Holloway no Waiʻanae no ka hāʻawi manawaleʻa ʻana i puʻu kālā no nā mea ola o nā ahi ʻāhiu o Lāhainā. A ua lilo nō hoʻi ia wā ma Maui i wā e kūkākūkā ai no ka mālama ʻia ʻana o ka hoʻokūkū mokomoko UFC ma Hawaiʻi nei. ʻO ka makamua ana ia. A he manaʻo nō hoʻi ko Green, e kūkulu ʻia he wahi hale hoʻomaʻamaʻa UFC ma kahi o ke kahua pāʻani hou.

Hōʻike aʻe nei ʻo Patricia Johnson i mua o ka ʻaha hoʻokolokolo pekelala, ʻaʻole ʻo ia pili i ka hewa ʻāpuka. No Kona ʻo Johnson a hoʻopiʻi ʻia ʻo ia no ka lilo ʻana iā ia he $5.2 miliona no ke kūʻai ʻana aku i ke kope Kona, he 100%. ʻO ka mea ʻāpiki, ʻaʻole ia kope he kope no Kona. He kope ia mai nā ʻāina ʻē a kūʻai ʻia ma Kaleponi a me Wakinekona. He mau hewa kona e hoʻopiʻi ʻia nei, ʻo ka ʻāpuka uea, ka lawelawe ʻana i ka hana kālā no ka waiwai i loaʻa ma o ka hana kūʻē kānāwai, a me ka ʻākeʻakeʻa ʻana i ka lawelawe hihia. Ua hoʻokuʻu ʻia aku ʻo Johnson ma ka pela he $50,000 a hiki i kona hoʻokolokolo ʻia i ka lā mua o Kēkēmapa.

Eia mai kā kākou ʻōlelo noʻeau,

Hāʻule i ka hope waʻa.

He ʻōlelo kēia no ke kanaka i hiki lohi mai a i hiki hope loa mai paha.

Piha hauʻoli paha nā mākaʻi ko Hawaiʻi nei.

ʻO ia aʻela kekahi poʻo nūhou o kēia lā, ka lā 30 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

E piʻi loa ana ka uku makahiki o nā mākaʻi o ka ʻAhahui Mākaʻi o Hawaiʻi. He 2,600 a ʻoi mākaʻi o ia ʻahahui. A e piʻi ana ka uku o ka hapanui o lākou he 27.5 pā keneka. Ua piʻi he 5 pā keneka i ka lā mua o Iulai, a e piʻi hou he 5 pā keneka i kēlā me kēia makahiki a i ka makahiki 2028. Mai ka makahiki 2011 a i ka makahiki 2020, ua piʻi wale nō ka uku makahiki he 2.43 pā keneka i kēlā me kēia makahiki. I ka mahina ʻo Iulai o kēia makahiki nei, ʻo ka wā nui loa ia o nā hakahaka o ka ʻOihana Mākaʻi o Honolulu. He 465 kūlana mākaʻi hakahaka, a he 189 kūlana kīwila. A ʻo kekahi pilikia, he 228 mau mākaʻi kūpono i ka hoʻomaha loa.

ʻAʻole i loaʻa mai ka ʻaelike o ka ʻAha ʻŌlelo Lāhui a me ka Pelekikena, a no laila, e pani ʻia ana nā keʻena pekelala. ʻO ka ʻumi kumamālima ia o ka manawa i paʻa ai ke aupuni pekelala mai ka makahiki 1981 mai. ʻO ka wā lōʻihi loa i pani ʻia ai ke aupuni pekelala ma ka moʻolelo o ʻAmelika Hui Pū ʻIa, he 35 lā, mai ka mahina ʻo Kēkēmapa o ka makahiki 2018 a i Ianuali o ka makahiki 2019. Hopohopo ana kekahi poʻe o kaiehu ʻia nā limahana pekelala he nui.

Eia mai kā kākou ʻōlelo noʻeau,

Ua nahā ka houpo.

ʻO ia hoʻi, ua pōloli.

ʻĀhaʻi ʻo Hawaiʻi i ka lanakila ma ka hoʻokūkū pōpō pekupeku.

ʻO ia aʻela kekahi poʻo nūhou o kēia lā, ka lā 29 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

E paʻa hou ana ke Kula Haʻahaʻa o Pāʻia ma Maui. ʻO ka hā ia o ka lā i paʻa ai ua kula haʻahaʻa lā mai ka lā i ʻā ai ke ahi. Ua pau ke kahua kula i ka hoʻomaʻemaʻe ʻia i ka hopena pule nei, akā, ua nui hou ka paʻu ahi a no laila, aia nō ke lawelawe ʻia akula ka hana i mea e palekana ai nā kumu, nā limahana, a me nā keiki ke hoʻi aku i ke kula.

Aloha nō. Ua kāpae ʻia aku nei nā ʻaha mele o Teddy Swims, he puʻukani nāna ke mele kaulana i laha, ʻo Lose Control. I ka Pōʻalima nei, hoʻomaka ihola ka ʻaha mele, akā, ma hope o kona hīmeni ʻana he ʻelua mele, ua hā ihola kona leo. A ʻo ia ke kumu i kāpae ʻia ai nā ʻaha mele. Inā ma o ka Ticketmaster i kūʻai ʻia mai ai ka likiki, e hoʻihoʻi wale ʻia aku ke kālā. A ʻo ka likiki i kūʻai ʻia ma ka hale kūʻai kikiki o ka Blaisdell, ʻo ka hoʻi aku i laila me ke kikiki ka mea e pono ai ka hoʻihoʻi kālā. A e hana ʻia ke hiki aku i ka hola 4:00 o ka ʻauinalā o kēia Pōʻakolu.

Kāʻili aku nei ʻo Hawaiʻi i ka lanakila ma ke kūʻē ʻana aku i ka Māhele Kaua Lewa ma ka helu ʻai he 44 i ke 35. Hōʻike hou aʻela ʻo Micah Alejado, ka ʻalihikūlele o Hawaiʻi, i ka ikaika o kona lima, he 457 āna ʻīā i nou ai. A he ʻekolu āna ʻai holo i nou ai. A ua piha hauʻoli ka naʻau, ʻoiai, i kēlā pule aku nei, ua eo ʻo Hawaiʻi iā Fresno Mokuʻāina ma ka helu ʻai he 23 i ka 21.

Eia mai kā kākou ʻōlelo noʻeau,

Ua pae ka waʻa i Nānāwale.

He ʻōlelo kēia no ka hoka o kekahi kanaka.