Ke Aolama

Ua hala akula kahi puʻukani kaulana i ke ao polohiwa a Kāne

ʻO ia aʻela kekahi poʻo nūhou o kēia lā, ka lā 5 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou

Hala akula i kēlā ʻaoʻao kahi kāhuli leo leʻa o ka nahele o Kahakuloa i ke kulu ʻana o ke aumoe o ka Pōʻaono nei. ʻO Richard Hoʻopiʻi nō ia a he 76 ona makahiki. Ua manaʻo ʻia e kaha ʻia ʻo ia no ke kuapo ʻia ʻana o ka pepeiao o kona puʻuwai, akā, loaʻa akula ʻo ia i ka maʻi a hele akula i ka haukapila e noho ai. ʻAkahi nō ʻo ia a hoʻi i kona hale i kēlā mahina aku nei. Kaulana ʻo Richard lāua me kona kaikuaʻana, me Solomon, i ka leo kiʻekiʻe. ʻO Solomon, ua moe ihola i ka moe kapu o Niolopua i ka makahiki 2006. I ka makahiki 1997, lilo aku nei ka Makana Nā Hōkū Hanohano iā lāua ma ka māhele hui o ka makahiki no kā lāua pāleo hope loa ʻo “Hoʻomau: To Perpetuate.” Ma hope iki mai o kēlā, hoʻomaha ihola ʻo Solomon mai ka hana aku, akā, hoʻomau akula ʻo Richard, a i ka makahiki 2003, kōkua akula ʻo ia i ka hoʻokumu ʻana i ka Hoʻokūkū Leo Kiʻekiʻe ʻo Richard Hoʻopiʻi a i loko o ia makahiki hoʻokahi nō, hoʻopuka akula ʻo ia i ka pāleo ʻo “Ululani.”

ʻAkahi nō a holo mua kahi pila hou o ka Hale o nā Lunamakaʻāinana a he pila ia e manuahi ai ka hele ʻana o nā limahana aupuni mokuʻāina o Hawaiʻi i ke Kulanui o Hawaiʻi. ʻO ka Pila Hale 2113 ia, a he mau koina ko ia pila. Ke hoʻohana ka limahana i ia pōmaikaʻi a paʻa mai ke kekelē lae pua, ke kekelē lae oʻo a lae ʻula paha a me ke kekelē ʻoihana paha, e hana ʻo ia ma lalo o ke aupuni mokuʻāina he 10 makahiki. Inā ʻaʻole e paʻa mai kahi kekelē a inā e haʻalele ʻē i ke aupuni mokuʻāina ma mua o ka manawa kūpono, e uku ka limahana i kahi māhele o ka puʻu kālā i lilo aku. I kēia manawa e koho ana ka Hale piha i ka pono a me ka pono ʻole o nei pila.

Eia mai kā kākou ʻōlelo noʻeau,

He ʻale kua loloa no ka moana.

He ʻōlelo kēia no ke kanaka ikaika.

E lilo ana he $4 miliona kālā a emi iki mai iā Ellen Harris, he kahu maʻi ma mua no kahi hale maʻi o Honolulu nei.

ʻO ia aʻela kekahi poʻo nūhou o kēia lā, ka lā mua o Malaki, he Pōʻahā. Welina e nā makamaka. ʻO Ke Aolama kēia a penei ka nūhou.

Kau aʻela ka ʻōlelo hoʻoholo a ke kiule no ka pono o Ellen Harris, he kahu maʻi ʻo ia ma mua no ka Hale Maʻi ʻo ka Mōʻīwahine. E uku ʻia ana ʻo Harris he $4 miliona a emi iki mai e ua hale maʻi lā ma muli o kona hoʻouluhua ʻia a me kona hoʻokae ʻili ʻia no ka hōʻike ʻana i kahi hana kūpono ʻole e lawelawe ʻia ana ma ka haukapila i ka makahiki 2011. He Pāʻele ʻo Harris a ma kona wahi hana ma ka Hale Maʻi ʻo ka Mōʻīwahine, loaʻa akula kahi kiʻi o ka pahele lī kanaka i leki ʻia i kāna waihona pāiki a me kahi leka hoʻokae ʻili ma kāna pahu leka. Hōʻike mai ka hale maʻi, e hoʻopiʻi hou ana. A aia kekahi hihia i mua o ka ʻaha hoʻokolokolo no ka hoʻokae ʻili i kēia manawa. ʻO Timothy Degrate ka inoa o ke kanaka hoʻopiʻi, a he limahana ʻo ia no ka hui mokulele ʻo Hawaiian, a wahi āna, he wahi ʻāniha kona wahi hana ma ia hui mokulele, a ua hoʻouluhua ʻia ʻo ia no ke ʻano o kona ʻili. A i kekahi lā, loaʻa akula iā ia kahi pahele lī kanaka e lewalewa ana ma kahi waihona pāiki e pili pono ana i kāna waihona ponoʻī.

ʻĀpono ʻia aku nei ka Pila Hale 2739 e ke Kōmike Lawelawe Ola Kino a me ke Kōmike Hoʻokolokolo i ka Pōʻakolu nei. A no laila, holo mua akula i mua o ka Hale piha no ke koho ʻana, a e koho pāloka ana i ka Pōʻakolu. ʻO nei pila, e ʻae ana i ke kanaka i loaʻa i ka maʻi make e noi i ka lāʻau kuhikuhi ʻia no ka hoʻomake ʻana iā ia iho. He mau mea naʻe kai hoʻololi ʻia iho nei. ʻO kekahi, he koina ke kūkākūkā ʻana me ke kauka hoʻoponopono noʻonoʻo ma hope o ka hōʻoia ʻana o kekahi mau kauka ʻelua i ka loaʻa o ke kanaka i ka maʻi make, i ka hopena o ia maʻi a me ka maikaʻi o ka noʻonoʻo o ia kanaka. E nui paha ka hoʻopaʻapaʻa ma ka Hale no nei pila, akā, kohu mea lā, ke hiki aku i mua o ka ʻAha Kenekoa, e ʻāpono koke ʻia.

Eia mai kā kākou ʻōlelo noʻeau

Pipī ka wahie, hoʻonui ka pulupulu.

ʻO ia hoʻi, mai hāʻawi pio. E noke aku i ka hana a kō ka makemake.

He pila lawe ola.

ʻO ia aʻela kekahi poʻo nūhou o kēia lā, ka lā 28 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

He nui nā kānaka i hōʻike i ko lākou mau manaʻo no ka Pila Hale 2739 i ka Pōʻalua nei. ʻO kekahi, he kūʻē, a ʻo kekahi, he kākoʻo. Ma ua pila nei, e hiki ana i ke kanaka i loaʻa i ka maʻi make ke noi aku i ka lāʻau kuhikuhi ʻia, ʻo ka nui e lawa ai ka make ʻana. No ka ʻāpono ʻia ʻana o ia noi, he mau koina, ʻo kekahi mau mea e pono ai, ʻo ka ʻōlelo a ke kauka he make mai koe ma loko o nā mahina he ʻeono a emi mai, ʻo ka waiho ʻana he ʻelua noi ma ka waha i ke kauka i ka lāʻau hoʻopio mauli, a he ʻumi kumamālima lā a ʻoi ma waena o ke noi mua a me ke noi hope, a hoʻokahi noi kākau ʻia. A ʻo ke noi i kākau ʻia, e pūlima ʻia me ka hōʻike pū i ka lā o ka pūlima ʻia ʻana me ka ʻike maka o kekahi mau kānaka i hiki ke hōʻoia i ka noʻonoʻo maikaʻi o ia kanaka, a no ia kanaka hoʻokahi ia manaʻo, a ʻaole ʻo ia i ʻonou ʻia e hana pēlā. A he hiki i ia kanaka ke kāpae aku i ke noi e like me kona manaʻo he pono. Ma muli o ka nui o nā manaʻo o nā kānaka, hoʻopaneʻe ʻia aku nei ke koho ʻana o kekahi mau kōmike Hale Lunamakaʻāinana a i ka hola 12:00 o kēia lā.

Holo ihola ka manaʻo o Clayton Hee e alualu aku i ke kūlana kiaʻāina o Hawaiʻi nei. He kahu waiwai ʻo ia no ke Keʻena Kuleana Hawaiʻi ma mua no nā makahiki he 12, a he kenekoa mokuʻāina nō hoʻi ʻo ia ma mua no nā makahiki he14. ʻAʻole i alualu ʻo Hee i ke kūlana kiaʻāina ma mua, akā, ua alualu akula ʻo ia i ke kūlana hope kiaʻāina i ka makahiki 2002 a me ka makahiki 2014. A alualu nō hoʻi ʻo ia i ke kūlana Lunamakaʻāinana ʻAmelika Hui Pū i ka makahiki 2006. Manaʻo ihola kekahi, ʻo ia alualu ʻana o Hee i ke kūlana kiaʻāina, he mea ia e pōmaikaʻi ai ke kiaʻāina e kū nei i ka moku, no ka mea, e mahae lua ana nā pāloka, ʻoiai he Kemokalaka ʻo Hee, a ʻo Colleen Hanabusa kekahi Kemokalaka e alualu nei i ia kūlana hoʻokahi nō.

Eia mai kā kākou ʻōlelo noʻeau,

Kū ka pūʻali.

ʻO ia hoʻi, ua mākaukau no ka hana.

 

 

E pilikia auaneʻi paha ka poʻe mahi kope o Kona.

ʻO ia aʻela kekahi poʻo nūhou o kēia lā, ka lā 26 o Pepeluali, he Pōʻakahi. Welina e nā makamaka. ʻO Ke Aolama kēia a penei ka nūhou.

Kono ʻia iho nei ka lehulehu e mākaʻikaʻi i kahi noho o nā kānaka kuewa i kapa ʻia ʻo Puʻuhonua o Waiʻanae. He 200 lākou a emi iki mai. A ʻo ka nui o nā kānaka i hele aku e mākaʻikaʻi i ia wahi noho i ka Lāpule nei, he 550. ʻO ke kumu i kono ʻia ai ka lehulehu i laila, i mea e hōʻike ai i ke aupuni, he ʻoi aku ka maikaʻi o ia wahi ma mua o ke kipaku ʻia ʻana o ka poʻe kuewa e like me ka mea maʻa mau. He manaʻo ko ka Lunamakaʻāinana John Mizuno, e hoʻolimalima ʻia ka ʻāina e waiho nei ʻo Puʻuhonua o Waiʻanae e like me ka ʻaelike me Dennis “Bumpy” Kanahele ma Waimānalo, ʻo ia hoʻi ʻo Puʻuhonua o Waimānalo.

Aia nō ka poʻe kanu kope o Kona ke hopohopo ihola i ka hana a ka hui ʻo Kona Hills. He manaʻo ko ia hui e hoʻokomo mai i nā ʻele ʻanoʻano kope he 1.5 miliona mai Costa Rica mai no ka hoʻokumu ʻana i ka mahi kope nui loa o Kona. ʻO kekahi pilikia, ua laha loa nō ka maʻi i kapa ʻia ʻo ke kūkaehao kope ma Costa Rica. Akā, wahi a Kona Hills, e hana ʻo ia i wahi e komo ʻole ai ia maʻi i Hawaiʻi. ʻO kekahi pilikia, ʻo nā ʻano o ke kope e hoʻokomo ʻia mai, ʻaʻole ia ʻo ke ʻano e mahi ʻia nei e ka hapa nui o nā mahi kope ma Kona i kēia manawa, ʻo ia hoʻi ke ʻano i kapa ʻia ʻo ka typica. He makemake ka hui ʻo Kona Hills i nā ʻano kope he ʻeono, a he ʻelima o lākou, ʻaʻole e mahi ʻia akula ma Kona.

Eia mai kā kākou ʻōlelo noʻeau,

Huleilua i nā nalu o Launiupoko.

He ʻōlelo kēia no ke kanaka i kānalua no kāna hana iho.

ʻO Loretta Sheehan ka luna hoʻomalu hou o ke Komikina Mākaʻi o Honolulu.

ʻO ia aʻela kekahi poʻo nūhou o kēia lā, ka lā 22 o Pepeluali, he Pōʻahā. Welina e nā makamaka. ʻO Ke Aolama kēia a penei ka nūhou.

He luna hoʻomalu hou ko ke Komikina Mākaʻi o Honolulu. ʻO Loretta Sheehan kai koho ʻia ʻo ia ka luna hoʻomalu hou. A ʻo kona makemake, e ʻeleu ke komikina ma ka hana, a e akāka ka hana a ke komikina i mua o ka lehulehu. A ʻo kekahi manaʻo ona, e lilo nā komikina ʻehiku i mau alakaʻi no ke komikina ma kā lākou mau māhele mākaukau. ʻO Max Sword, he maikaʻi loa kāna hana hoʻopaipai; ʻo Jerry Gibson, he loea ʻo ia ma ka ʻoihana malihini mākaʻikaʻi; a ʻo Dick Grimm, he nui kona mau makahiki e hana ana ma loko o ka ʻoihana kūkala ma Hawaiʻi nei. He mau mea hou aku kā Sheehan e makemake nei i mea e ʻoi aku ai ka ʻOihana Mākaʻi o Honolulu.

Loli iki ihola ka manaʻo o ka Pelekikena Donald Trump ma nā kānāwai e pili ana i ka pū kī. Ma muli paha ia o kona kūkākūkā ʻana me nā haumāna a me nā mākua no nā mea i ʻike ʻia ma ke Kula Kiʻekiʻe ʻo Marjory Stoneman Douglas ma Pololika. Noi ana ia mau haumāna a me nā mākua i ka pelekikena i ka hōʻoʻoleʻa ʻana i nā kānāwai pū kī. ʻO kekahi mea a Trump i hōʻike ai, he kākoʻo ʻo ia i ka piʻi ʻana o nā makahiki e kūʻai ai ke kanaka i kekahi mau ʻano pū a piha nā makahiki he 21 i ke kanaka. I kēia manawa, ke piha nā makahiki he 18 i ke kanaka, he hiki iā ia ke kūʻai i ka pū laipela. He hōʻole naʻe ka ʻAhahui Laipela Aupuni i ia piʻi ʻana o nā makahiki. A wahi a Trump, e koi ana ʻo ia i ka noiʻi pono ʻia ʻana o ka moʻolelo o ke kanaka kūʻai pū ma mua o kona kūʻai ʻana mai i ka pū, me ke kālele ʻana i ka nānā i ka maikaʻi a me ka ʻole paha o kona noʻonoʻo kanaka.

Eia mai kā kākou ʻōlelo noʻeau,

Hāʻawe i ke kua; hiʻi i ke alo.

He ʻōlelo kēia no ka wahine e hana ana ma kahi ʻoihana a me ka mālama pū ʻana aku i ke kama.

E pāpā ʻia ana ka moe ʻana ma kahi kau kaʻa lawe ʻōhua.

ʻO ia aʻela kekahi poʻo nūhou o kēia lā, ka lā 21 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻAkahi nō a pūlima ʻia aku nei ka Pila 99 (2017) e ka Meia Kirk Caldwell a lilo ihola i kānāwai. E pāpā ana ia pila, ʻaʻole e moe ke kanaka ma kahi kau kaʻa ʻōhua o Oʻahu nei a me kahi e pili ana mai ka hola 4:00 o ka wanaʻao a i ke kulu ʻana o ke aumoe, i ka hola 1:00 hoʻi, ʻo ia hoʻi nā hola e holo ai nā kaʻa lawe ʻōhua. E kū ia kānāwai hou i ka lā 12 o Iune e lawa ai ka wā e aʻo ai ka ʻOihana Mākaʻi a me ke Keʻena Halihali i ka lehulehu no ke kānāwai hou. ʻO ka hoʻopaʻi, he $50. A he pono ke aʻo mua ʻia ke kanaka e moe ana ma kahi kau kaʻa ʻōhua ma mua o kona hoʻopaʻi ʻia ʻana aku.

Pōmaikaʻi kekahi mau Kānaka Maoli ʻelima o Hawaiʻi nei i ka lilo ʻana aku o kahi puʻu kālā e hoʻomōhala a e hoʻāʻo ai e haku i nā mea like ʻole ma kā lākou hana noʻeau. ʻO lākou ʻelima, he mau puʻukani a hoʻokani pila paha, ʻo ia ʻo Jeff Peterson lāua ʻo Kalani Peʻa, a he mau kānaka hana noʻeau, ʻo ia ʻo Marques Hanalei Marzan lāua ʻo Pōhaku Kahoʻohanohano. A ʻo Ciara Leinaʻala Lacy ka lima a ʻo kāna māhele, ʻo ka hana kiʻi ʻoniʻoni. ʻO ka nui o ke kālā i lilo iā lākou, he $20,000. He makana ia e lilo aku i ka ʻIlikini ʻAmelika, ke Kanaka Maoli o ʻĀlaka a me ke Kanaka Maoli o Hawaiʻi a puni ʻo ʻAmelika Hui Pū ʻIa i loea ma ka hana noʻeau o ke au kahiko a me ka hana noʻeau paha o ke au hou.

Eia mai kā kākou ʻōlelo noʻeau,

I kai nō ka iʻa, mali ʻē ka makau.

ʻO ia hoʻi, e hoʻomākaukau ʻoe i mākaukau.

Make iho nei kekahi mau kānaka ʻelua i ka hoʻokuʻi ʻia e ke kaʻa.

ʻO ia aʻela kekahi poʻo nūhou o kēia lā, ka lā 20 o Pepeluali, he Pōʻalua. Welina e nā makamaka. ʻO Ke Aolama kēia a penei ka nūhou.

He ulia kaʻa aku nei ko Mākaha ma kahi o ka hola 7:40 o ka pō Pōʻakahi nei. E hoʻoponopno ana kekahi mau kānaka ʻelua i ko lāua kaʻa ma kaʻe o ke Alaloa ʻo Farinatona. I ia manawa, hoʻokuʻi ʻia akula lāua e kekahi kaʻa. ʻO ka pilikia, ua holo wale aku nō ia kaʻa me ke kōkua ʻole i nā kānaka i hoʻokuʻi ʻia. ʻO kekahi o lāua, he kanaka no Māʻili, ua make nō i kahi o ka ulia. A ʻo ka lua, he kanaka no Nānākuli, ua make ihola ma ka haukapila. Wahi a ka ʻoihana mākaʻi, ʻaʻohe kanaka i hopu ʻia, akā, he 30 minuke ma hope mai o ka ulia, ua loaʻa ke kaʻa i hoʻokuʻi i ia mau kānaka ma ke Alanui ʻo Lahilahi, ʻaʻole naʻe i loaʻa ka mea nāna e kalaiwa ana. Aia nō ka mākaʻi ke noiʻi akula.

Aia nō ke Komikina Mākaʻi o Honolulu ke kūkākūkā ihola no ka pono a me ka pono ʻole paha o ke koho ʻana i luna hoʻomalu hou. ʻO Max Sword ka luna hoʻomalu e kū nei i kēia manawa. Ua lōkahi ka manaʻo o nā lālā o ke komikina ma ke koho ʻana iā ia i luna hoʻomalu i ka mahina ʻo Kēkēmapa o ka makahiki 2016, he hoʻokahi mahina ma hope o ka haʻalele ʻana o Ron Taketa i ia kūlana. I ka wā e noho ana ʻo Sword, ʻo ia ka luna hoʻomalu, hoʻohalahala ʻia ihola kekahi mau hana a ke komikina. ʻO kekahi, ʻo ia ka ʻāpono ʻana i ka uku ʻana iā Louis Kealoha, ka luna mākaʻi ma mua, he $250,000 i kona wā i waiho ai i ka hana. A ʻo kekahi mea i hoʻohalahala ʻia, ʻo ia ka ʻūlōlohi o ke koho ʻana i luna mākaʻi hou.

Eia mai kā kākou ʻōlelo noʻeau,

Ua hoʻi ka ʻōpua i Awalua.

ʻO ia hoʻi, ua hoʻi aku kekahi i kona hale.

 

 

Hiki akula ma kahi ʻaelike nā Kula ʻo Kamehameha a me nā mea hoʻopiʻi.

ʻO ia aʻela kekahi poʻo nūhou o kēia lā, ka lā 16 o Pepeluali, he Pōʻalima. Welina e nā hoa makamaka. ʻO Ke Aolama kēia a penei ka nūhou.

E uku ana nā Kula ʻo Kamehameha he $80 miliona i ka poʻe hoʻopiʻi, he 30 a ʻoi. ʻO ia poʻe hoʻopiʻi, ʻo ia kekahi o nā kānaka i lolokukui ʻia e Kauka Robert Browne i ko lākou wā e haumāna ana ma ke Kula ʻo Kamehameha. He mau mea kā nā Kula ʻo Kamehameha i ʻae ai, ʻo kekahi, ʻo ia ka mālama ʻana i helu kelepona na ke kanaka a me ka haumāna paha e hōʻike ai no ka lolokukui a me nā pilikia like ʻole paha. A ʻo kekahi hana i ʻae ʻia, ʻo ia ka hoʻokumu ʻana i waihona kālā e kōkua ʻia ai nā haumāna ʻē aʻe i lolokukui ʻia e Browne, i komo ʻole naʻe i ka hoʻopiʻi ʻana. Wahi a Mark Davis, kekahi o nā loio o nā mea hoʻopiʻi, ʻo kekahi mea nui o ka ʻaelike, ʻo ia ka loaʻa o kahi maluhia loa no ka hoʻomalu ʻana i nā haumāna o kēia hope aku.

 

Ma ka Hoʻokūkū Inoa Moho Mokuʻāina, e kūʻē aku ana ʻo Punahou iā Kahuku no ka inoa moho ma ka Māhele I. Lanakila aku nei ʻo Punahou ma luna o Moanalua ma ka helu ʻai he 75 i ke 69 i ka pō nei. A ʻo Kahuku, lanakila aku nei ma luna o Maryknoll ma ka helu ʻai he 49 i ke 43. ʻO Kahuku ka inoa moho o kēlā makahiki aku nei a ʻo Punahou ko lākou hoa paio ma ka puni inoa moho o ia makahiki.

A ma ka Māhelele II, e kūʻē aku ana ʻo Damien iā Kāna Palakika no ka inoa moho. ʻO Damien, lanakila aku nei ma luna o Kalani. A ʻo Kāna Palakika, pepehi aku nei iā Kauaʻi.

A i ka lā ʻapōpō ka ʻAhamele ʻo Hoʻomau Oʻahu ma ka Hale Hōʻikeʻike ʻo Bīhopa. Ma laila e lohe ʻia ai nā leo nani o nā keiki o nā Pūnana Leo like ʻole a me kekahi mau kula kaiapuni paha. A aia ana nō hoʻi kekahi mau kāhuli leo leʻa o ka nahele. E hoʻomaka ana i ka hola 5:00 o ka ʻauinalā. He $20 o ke kikiki ke kūʻai ʻia ma ka pūnaewele, www.honoluluboxoffice.com a he $25 ke kūʻai ʻia ma ka ʻīpuka.

Eia mai kā kākou ʻōlelo noʻeau,

Loaʻa ke ola i Hālauaola.

ʻO ia hoʻi, ua maikaʻi a maluhia a ola ma hope o kahi wā pilikia.

Ke ʻimi ʻia akula i wahi e pau ai ka heihei kaʻa ʻana ma ke Alanui ʻo Puʻuʻōhiʻa.

ʻO ia aʻela kekahi poʻo nūhou o kēia lā, ka lā 15 o Pepeluali, he Pōʻahā. Welina e nā makamaka. ʻO Ke Aolama kēia a penei ka nūhou.

Aia nō ko Makiki ke ʻimi akula i wahi e pau ai ka heihei kaʻa ʻana ma ke Alanui ʻo Puʻuʻōhiʻa. I ka lā 25 o ka mahina ʻo Ianuali, hoʻokuʻi aku nei kahi kaʻa e heihei ana i kekahi wahine e holo paikikala ana ma ia alanui. Lawe koke ʻia akula ua wahine lā i ka haukapila ma ke kūlana kūpilikiʻi. Ua lilo ka heihei kaʻa i mea maʻa mau ma ia alanui, a i kēia mau lā, e heihei ana nō i ke kakahiaka, mai ka hola 6:00 a i ka hola 7:00, a pēlā pū me ka ʻauinalā, ma kahi o ka hola 5:00. A ʻo ia mau hola nā hola e hele wāwae ai a e holo paikikala ai paha nā kānaka hoʻoikaika kino ma kaʻe alanui. E mālama ʻia ana kahi hālāwai o ka Papa Kaiāulu o Makiki, Pūowaina Lalo, me Puʻuʻōhiʻa i kēia ahiahi ma ka Pāka ʻĀpana o Makiki, mai ka hola 6:30 a i ka hola 8:30, no ka hōʻike manaʻo ʻana o ka lehulehu.

I kēia Pōʻaono, e mālama ʻia ana ʻo Hoʻomau Oʻahu. E hoʻomaka ana i ka hola 5:00 o ka ʻauinalā. A aia ana ma ka Hale Hōʻikeʻike ʻo Bīhopa. E nui ana nā puʻukani o ia ahiahi, ʻo ʻAnakala Jerry Santos me Kamuela Kimokeo, ʻo Hoʻopono Wong me kona mau hoa, ʻo Pōmaikaʻi Lyman me kona ʻohana a me Sudden Rush. E kūʻai i ke kikiki ma www.honoluluboxoffice.com. He $20 o ke kikiki. A hiki nō hoʻi ke kūʻai ʻia ke kikiki ma ka ʻīpuka ma ka Pōʻaono, akā, he $25 o ke kikiki ma laila. ʻO ka poʻe kūpuna he 65 makahiki a ʻoi a me nā keiki he 12 a emi mai, he manuahi ke komo ʻana.

Eia mai kā kākou ʻōlelo noʻeau,

Hili hewa ka manaʻo ke ʻole ke kūkākūkā.

He mea nui ke kūkākūkā ʻana i mea e holo pono ai ka hana.

 

 

E ola paha nā iʻa o ke kai ma muli o kahi pila hou.

ʻO ia aʻela kekahi poʻo nūhou o kēia lā, ka lā 14 o Pepeluali, he Pōʻakolu. A ʻo ka Lā hoʻi kēia o Lonoikeaweawealoha. Welina e nā makamaka aloha. ʻO Ke Aolama kēia a penei ka nūhou.

Holomua akula ka pila e pāpā ana, ʻaʻole e kūʻai ʻia ka ʻaila pale lā nona ke kemika “oxybenzone” a me ka “octinoxate” paha. ʻO ka Pila Kenekoa 2571 ia, a ʻōlelo ʻia ma ia pila, ʻo ia mau kemika ʻelua, he mea hoʻopōʻino ia i ka ʻākoʻakoʻa, he hoʻokīnā hoʻi i kekahi mau iʻa o ke kai, a no ke kanaka, he hoʻonui i ka maʻi hoʻohānau a hoʻohua paha. ʻO ia mau kemika ʻelua, ua ʻāpono ʻia e ka Papa Luna Hoʻokele Mea ʻAi me Lāʻau Lapaʻau, akā, ma ka Pila Kenekoa 2571, e pāpā ʻia ke kūʻai ʻia ʻana o ka ʻaila pale lā ma nā kino like ʻole nona ka “oxybenzone” a me ka “octinoxate” paha ke ʻole e loaʻa ke kuhikuhi lāʻau.

Maikaʻi wale ka hana a Glenn Lee ma ke Kula Kiʻekiʻe ʻo Waialua ma kona kūkulu ʻana i ka polokalamu lopako ma laila. A ma muli o ia hana, ʻo ia kekahi o nā moho hope loa he 10 ma ka hoʻokūkū e ʻimi ana i ke kumu ʻoi loa ma ka honua nei. A ʻo Lee wale nō ka moho o ʻAmelika Hui Pū ʻIa, ʻo nā moho hope loa ʻē aʻe, no Tureke, no ʻApelika Hema, no Kolomebia, no ka ʻĀina Pilipino, no Berazila, no Belegiuma, no ʻAukekulelia, no ke Aupuni Mōʻī Hui Pū ʻIa a no Nolewai. ʻO ka nui o nā moho i komo i nei hoʻokūkū, he 30,000. ʻO ka makana e lilo ana i ke kumu ʻoi loa o ka honua, he $1 miliona. E kūkala ʻia ana ka lanakila i ka lā 18 o Malaki.

Eia mai kā kākou ʻōlelo noʻeau,

Pulelo ke ahi haʻaheo i nā pali.

He ʻōlelo kēia no ka lanakila ʻana.