Ke Aolama

E haʻalele paha kekahi mau lālā o ke Komikina Mākaʻi  i ko lākou kūlana?

ʻO ia aʻela kekahi poʻo nūhou o kēia lā, ka lā 24 o ʻOkakopa, he Pōʻalua. Aloha e nā makamaka heluhelu. ʻO Ke Aolama kēia a penei ka nūhou.

He manaʻo ko Alexander Silvert, he loio kūpale pekelala, e waiho kekahi mau lālā ʻekolu o ke Komikina Mākaʻi i ko lākou kūlana komikina. ʻO ia mau lālā, ʻo ia ka Luna Hoʻomalu Komikina Max Sword, ka Hope Luna Hoʻomalu Cha Thompson a me ke Komikina Eddie Flores. ʻO lākou ʻekolu nā komikina lōʻihi loa o ka noho ʻana ma ke ʻano he komikina. A ʻo ke kumu o Silvert e koi nei i ka haʻalele loa o lākou i ke kūlana komikina, ʻo ia ko lākou kākoʻo ʻana i ka Luna Mākaʻi Louis Kealoha i hoʻomaha loa i kona wā i hoʻopiʻi ʻia ai no ka hana ʻapakeʻe a me ka ʻōhumu. A ua holo ko lākou manaʻo e hāʻawi aku i palapala ʻaelike hou na Kealoha ma mua o ka hopena o kona kau mua, a ma ka loiloi ʻana aku iā Kealoha, he mau kaha kiʻekiʻe wale nō kā lākou e hāʻawi aku ai a koho ihola lākou e uku aku iā ia no ka hoʻomaha loa ʻana, ma kahi o ka ʻimi ʻana i wahi e kaiehu aku ai iā ia no ke kumu kūpono. A no laila, ke ʻōlelo nei ʻo Silvert, ʻaʻole maikaʻi ke komo ia mau komikina ʻekolu ma ka wae ʻana i luna mākaʻi hou.

Kūkala ʻia aʻe nei ka makaʻala wai hālana no Oʻahu, ke Kalana ʻo Maui a me ka mokupuni ʻo Hawaiʻi a hiki i kēia ʻauinalā. I ka Pōʻakahi nei ma Oʻahu, ʻeha ihola kekahi kaikamahine ʻōpiopio i kahi kumu lāʻau i hina i kona wā e kali ana ma kahi kau kaʻa ʻōhua ma kahi o ka huina o nā alanui Ala Moana a me Atkinson. A ma muli o ka nui o ka ua o ka Pōʻakahi nei, pio ihola ka uila o Haleʻiwa, ke kahakai o Waialua, ʻo Camp Erdman, ke kahua mokulele ʻo Dilinahama, a ma ke alaloa ʻo Falinatona a me kekahi mau wahi ʻē aku. I ka hola 3:41 o ka ʻauinalā ka pio ʻana o ka uila, a holo hou ana ka uila i loko nō o nā hola ʻelua.

Pōmaikaʻi kākou i kahi makana a Robert Uluwehi Cazimero. He ʻaha mele ana kona. A ma Blue Note Hawaiʻi e mālama ʻia ai ma ka lā 13 o Kēkēmapa. He ʻaha mele Kalikimaka ke ʻano. ʻElua ʻaha mele, aia ka mua i ka hola 6:30 o ke ahiahi, a ʻo ka lua, aia i ka hola 9:00.

Eia mai kā kākou ʻōlelo noʻeau,

Lī ka ʻili i ke anu o Hauaʻiliki.

ʻO ia hoʻi, he anuanu hoʻi kau a koe aku.

He wahi makana maiā Kuana Torres mai.

ʻO ia aʻela kekahi poʻo nūhou o kēia lā, ka lā 23 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻO ka pule hope loa kēia o ka hana keaka ʻo Massie/Kahahawai. He hana keaka ia i haku ʻia e Dennis Carroll i ka makahiki 1973. He polopeka ʻo Carroll ma ke Kulanui o Hawaiʻi ma Mānoa i ia manawa. ʻO ka mea ʻāpiki, e ola ana ʻo Thomas Massie a aʻo ʻia ke Kulanui o Hawaiʻi, e waiho ʻo Massie i hoʻopiʻi i mua o ka ʻaha hoʻokolokolo ke hana keaka ʻia ka moʻolelo o Massie/Kahahawai. A no laila, ʻaʻole i hana keaka ʻia. I ka makahiki 2004 i hana keaka ʻia ai ma Kumu Kahua, he 16 makahiki ma hope mai o ka make ʻana o Massie. A ʻo ka hana keaka e mālama ʻia iho nei, ʻo Taurie Kinoshita ka luna kuhikuhi, a hōʻike mai nei ʻo ia, he mau mea hou kai hoʻokomo ʻia i loko o ka hana keaka a Carroll i haku ai. A ʻo ka hapanui o lākou, no loko mai o ka puke a David Stannard o ka makahiki 2005, ʻo ia hoʻi, ʻo “Honor Killing: How the Infamous ‘Massie Affair’ Transformed Hawaiʻi.” Ma ka Hale Hana Keaka ʻo Palikū o ke Kulanui Kaiāulu o nā Koʻolau e mālama ʻia nei. I kēia Pōʻakolu, e hoʻomaka i ka hola 4:00 o ka ʻauinalā. A i ka Pōʻahā, ka Pōʻalima a me ka Pōʻaono, e hoʻomaka i ka hola 7:30. ʻO nā likiki, mai ka ʻelima kālā a ka ʻumi.

A he ʻelua ʻaha mele ke hiki mai ana ma ka mahina ʻo Kēkēmapa. ʻO ka mua, mai ka lā 8 a ka lā 10. ʻO ka ʻaha mele ia o Kuana Torres Kahele a e mālama ʻia ana ma ka Hale Hana Keaka ʻo Hawaiʻi. Ma ka lā 8 a me ka lā 9, e hoʻomaka i ka hola 7:30 o ke ahiahi. A i ka lā 10, i ka hola 2:00 o ka ʻauinalā e hoʻomaka ai. A he mau puʻukani a me kekahi mau hālau hula ke komo ana i nei ʻaha mele. A pēlā pū nō me kekahi mau Miki Aloha Hula ʻehiku a me ka Miki Keiki Hula a me ka Mika Keiki Hula o kēia makahiki nei. ʻO kekahi mea e pōmaikaʻi ai nā kānaka a pau o ke anaina, e makana ʻia ana ka CD a Kahele i ka wā e komo ai i ka hale hana keaka. A i kēlā me kēia lā o ka ʻaha mele, e koho ʻia ana he ʻehā kikiki, a ʻo nā mea nāna ia mau kikiki, e lilo ana iā lākou pākahi he lei pūpū Niʻihau. ʻO nā kikiki, he $35 a ke $75. A ʻo ka poʻe i liʻiliʻi loa ka loaʻa makahiki i hōʻoia ʻia, he ʻelua wale nō kālā o ka likiki.

Eia mai kā kākou ʻōlelo noʻeau,

Ka hāʻawi a ka mea hale, koe koena ʻole ma kūʻono.

He ʻōlelo kēia no ke kanaka kahiau.

He mau haumāna kulanui kai loaʻa i ka ʻauwaepahāha.

ʻO ia aʻela kekahi poʻo nūhou o kēia lā, ka lā 20 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka Pōʻahā nei, hoʻomaopopo aʻela ke Kulanui o Hawaiʻi i nā haumāna, nā kumu a me nā limahana no nā haumāna ʻekolu o ke Kulanui o Hawaiʻi ma Mānoa i loaʻa aku nei i ka ʻauwaepahāha. ʻO ia nā mea mua o ia kahua i loaʻa aku i ka ʻauwaepahāha. I kēia manawa a puni ka mokuʻāina ʻo Hawaiʻi, ua māhuahua nā kānaka i loaʻa i ua maʻi lā, he 500 ka nui i kēia makahiki nei. Ke paipai nei ke Keʻena Ola i nā kānaka e hana nei ma kahi nui o nā kānaka, e ʻō ʻia aku i ka lāʻau koʻokoʻo. A pēlā pū me nā kānaka i ʻō ʻia i ka lāʻau koʻokoʻo he ʻelua manawa, ua hala naʻe nā makahiki he 10 a ʻoi, a i ʻole ia, he hoʻokahi wale nō manawa i ʻō ʻia ai he ʻelima makahiki i hala, a ʻoi aku paha. A e ʻō ʻia nō hoʻi, inā ʻaʻole i maopopo ke ʻō ʻia ʻana a me ka ʻole paha, a inā ʻaʻole maopopo ka loaʻa aku i ka ʻauwaepahāha a me ka ʻole paha. He maʻi lele nō ka ʻauwaepahāha, a he lele aku nō ma ke kunu ʻana, ke kihe ʻana a me ka hoʻopā ʻana i nā mea i lele ʻia e ka mea hoʻomaʻi. ʻO ka ʻōuli o ka ʻauwaepahāha, ua like loa me ka ʻōuli palū.

Aia nō ke kūkulu ʻia nei kekahi mau pā e pale aku ana i ke komo wale mai o nā kānaka o nā ʻāina ʻē i loko o ʻAmelika Hui Pū ʻIa. Aia nō ua mau pā lā ma Kāna Kieko, ma kahi kokoke loa hoʻi i kekahi mau hale o Tijuana i Mekiko. ʻO ia mau pā, ʻo ia nā pā a ka Pelekikena Donald Trump i hoʻohiki ai e kūkulu. Ua pau kekahi mau pā i ke kūkulu ʻia. A ʻo ka lā 26 ka lā palena pau no ke kūkulu ʻana i ia mau pā a paʻa. He ʻewalu pā e kūkulu ʻia ana, a ʻo ka mea ʻoi loa, ʻo ia ke koho ʻia. ʻO ke kālā i hoʻolilo ʻia no ia mau pā, he $500,000 a emi iho o ka pā hoʻokahi.

Eia mai kā kākou ʻōlelo noʻeau,

He pōhaku hekau waʻa.

He ʻōlelo kēia no ke kanaka moloā.

ʻAʻole i loaʻa nā kāne ʻelua i nalowale aku nei ma ka ʻaoʻao komohana ʻākau o Molokaʻi.

ʻO ia aʻela kekahi poʻo nūhou o kēia lā, ka lā 19 o ʻOkakopa, he Pōʻahā. Welina e nā makamaka. ʻO Ke Aolama kēia a penei ka nūhou.

Ua nalowale ihola kekahi mau kāne ʻelua i ka pō Pōʻakahi nei i ka wā i kuʻu ʻino ai ka mokulele pinao a lāua e hoʻokele ana ma ka ʻaoʻao komohana ʻākau o Molokaʻi. ʻO Jeremy Dossetter lāua ʻo Oliver Kirsch ko lāua mau inoa, a he mau limahana lāua no ka hui ʻo Mauna Loa Helicopters. Ua ʻike aku kekahi kanaka o Molokaʻi, ʻo Tim Emmanuel, i kukui ʻulaʻula e ʻimo ana ma ka lewa, a e iho wikiwiki ana no ke kai, a i loko nō o kekahi mau kekona ʻelua, nalowale ihola. E kuhi ana ʻo Emmanuel, he mokulele pailaka ʻole ia. I ke ao ʻana aʻe i ke kakahiaka o ka Pōʻalua, ʻike ihola ʻo ia no nā kānaka ʻelua i nalowale, a nalowale pū me ka mokulele pinao. No laila, hele akula ʻo ia i ka Hale Kinai Ahi o Hoʻolehua no ka hōʻike ʻana aku i kāna mea o ka ʻike ʻana. E hoʻomau ana ke Kiaʻi Kai, ka ʻOihana Moku a me ke Keʻena Kinai Ahi o Maui i ka ʻimi ʻana aku iā Dossetter lāua ʻo Kirsch. A e komo pū i ka hana kekahi mau mokulele pinao o Mauna Loa Helicopters. ʻO ka lā ʻehā kēia o ka ʻimi ʻana aku i ua mau kānaka lā.

Ua mālama ʻia aku nei he ʻaha hoʻolaʻa hale no kahi hale papaʻi ʻalokio hou o ke Kūlanakauhale ʻo Ward. ʻO Anaha ka inoa o ua hale lā. A hoʻomaka iho nei nā kānaka e komo i loko o ko lākou mau keʻena noho i laila i ka Pōʻakahi nei. ʻO ka nui o nā keʻena noho o ia hale papaʻi ʻalokio, he 317. A pau aku nei he 307 i ke kūʻai ʻia. ʻO ke kumu kūʻai ʻawelika o ke keʻena noho, he $1.2 miliona. No ka Hui ʻo Howard Hughes ia hale a e kūkulu ʻia ana he 16 mau hale papaʻi ʻalokio hou ma ke Kūlanakauhale ʻo Ward.

Eia mai kā kākou ʻōlelo noʻeau,

Nā keiki a Kālaihaohia.

He ʻōlelo kēia no ka poʻe ʻālunu.

He manaʻo ko kekahi e hoʻonui i nā mea ma Hawaiʻi nei e pale aku ai i ke kaua.

ʻO ia aʻela kekahi poʻo nūhou o kēia lā, ka lā 18 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

He manaʻo ko Lukānela Kenelala Dan “Fig” Leaf o ka Māhele Kaua Lewa i hoʻomaha loa, he pono ke hoʻomaikaʻi aʻe i nā mea pale kao lele ma Hawaiʻi nei i ʻike ai ʻo Kim Jong Un, ʻaʻole e noho wale ʻo ʻAmelika Hui Pū ʻoiai ʻo Kōlea ʻĀkau e hoʻoweliweli mai ana. ʻO Leaf, he hope luna kaua ʻo ia no ka Pūʻali Koa Pākīpika o ʻAmelika Hui Pū ʻIa. Hōʻike mai kekahi, ma Hawaiʻi nei, e hoʻāʻo ʻia ana kahi kao lele pale i mea e ʻike ai i ka maikaʻi a me ka maikaʻi ʻole paha i ke kau kupu lau a ma hope iki aku paha.

Aloha nō! Pau ihola ka pāʻani pōpō peku ʻana o John Ursua i kēia kikina nei. He ʻāʻapo ʻo Ursua no ke Kulanui o Hawaiʻi a i ka Pōʻaono i hala aku nei, ʻeha ihola kona kuli ma ka hapalua ʻelua o ka hoʻokūkū. A i ka nānā ʻana aku o ke kauka, ʻike ʻia ihola ka nahae o ke aʻa puʻupuʻu o ke kuli ʻākau o Ursua. ʻAʻole i paʻa ka lā e kaha ʻia ai kona kuli, akā, ʻo ka wā hoʻopolapola, he ʻeono paha mahina a ʻoi. ʻO ka makahiki ʻekolu kēia o Ursua o ka pāʻani ʻana. Ma nā ʻīā ʻapo, ʻo ka helu ʻeono ʻo Ursua a puni ʻo ʻAmelika Hui Pū ʻIa, he 111.2 ʻīā o ka hoʻokūkū. A ma ka ʻapo ʻana, ʻo ka helu ʻehiku ia. He 7.8 o ka hoʻokūkū. He hiki nō i kekahi mau mea pāʻani ke pani i ka mākālua e waiho wale ana, ʻo Kumoku Noa, ʻo Davine Tullis ʻo Kalakaua Timoteo III a me Isaiah Bernard.

Eia mai kā kākou ʻōlelo noʻeau,

Pēpē i ka ua hoʻopoponi ʻili.

He ʻōlelo kēia no ke kanaka i ʻeha ka naʻau i ka ʻōlelo a i ka hana paha a kekahi.

He mau lula hou ma ka ʻinikua ʻAhahui Lawelawe Lapaʻau Hawaiʻi no ka maʻi ʻaʻai.

ʻO ia aʻela kekahi poʻo nūhou o kēia lā, ka lā 16 o ʻOkakopa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

Ma ka lula ʻinikua o ka ʻAhahui Lawelawe Lapaʻau Hawaiʻi, ua hoʻēmi ʻia ihola ka ʻimi ʻana i ka maʻi ʻaʻai o ka poʻe wāhine. Ma mua, ʻimi ʻia aku ka maʻi ʻaʻai ma ka hapa lalo o ka pūʻao i kēlā me kēia makahiki no nā wāhine i piha nā makahiki he 21 a i ka piha ʻana o nā makahiki he 65. Akā, i kēia manawa, ua emi ihola, he hoʻokahi manawa o nā makahiki ʻekolu. A ʻo ka ʻimi ʻana i ka maʻi ʻaʻai ma ka waiū, i kēia manawa, no nā wāhine wale nō i piha nā makahiki he 40 a ʻoi. Ma mua, inā ua piha nā makahiki he 35 i ka wahine, ua hiki ke ʻimi ʻia ka maʻi ʻaʻai o ka waiū. ʻO ke kumu i emi ai ka manawa o ka ʻimi ʻia ʻana aku o ka maʻi ʻaʻai, ua ʻōlelo ʻia, ʻaʻole pono ka ʻimi pinepine ʻana, a e lilo paha ia ʻimi pinepine ʻana i mea e pōʻino ai ke kino o ka wahine. Akā, kau ihola ka weli o kekahi mau wāhine no ka manaʻo, inā e kali a hala ʻelua makahiki, a laila, e ʻimi ʻia a loaʻa ka maʻi ʻaʻai, ua hala paha ka Puʻulena, ua laha loa. Wahi a ka hui ʻinikua, no ka poʻe wāhine welo maʻi ʻaʻai, ʻaʻole nō e pili nā lula hou iā lākou.

ʻAkahi nō a lanakila ʻo Hawaiʻi ma luna o ka hoa paio o ka ʻAhahui Mauna Komohana i ka hopena pule nei. ʻO San Jose State ka hoa paio, a hāʻule pahū ihola lākou ma ka helu ʻai he 37 i ka 26. I lanakila nā Koa Ānuenue ma muli o ka holo ʻana o Diocemy Saint Juste. He 202 āna ʻīā i holo ai a he ʻekolu āna ʻai holo, ʻo kekahi o lākou ʻai holo, he ʻapona. ʻO ka nui o nā manawa a Saint Juste i holo ai me ka pōpō, he 39, a ʻo ka nui loa ia ma ka moʻolelo o ke Kulanui o Hawaiʻi. ʻO ke kolu kēia o ka hoʻokūkū a Juste i holo ai he 200 a ʻoi i kēia kikina nei. ʻO ka mea e kaumaha ai ka naʻau, ʻo ia ka ʻeha ʻana o ke kuli o John Ursua ma ka hapahā ʻelua. A e ʻike ʻia auaneʻi ka hopena o kona kuli i kēia pule.

Eia mai kā kākou ʻōlelo noʻeau,

Malu ke kula, ʻaʻohe keʻu pueo.

ʻO ia hoʻi, ua maluhia.

Hoʻihoʻi ʻia aku nei kekahi mau lei keu a ka pipiʻi.

ʻO ia aʻela kekahi poʻo nūhou o kēia lā, ka lā 13 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka lā 17 o ka mahina ʻo Iulai, wāwahi ʻia kahi hale kūʻai ʻo Maui Hands a komo hewa akula kekahi a ʻaihue akula he 25 mau lei pūpū Niʻihau, a ʻo ka waiwai ʻiʻo o ia mau lei, he $100,000. ʻO ka mea pōmaikaʻi, ua loaʻa maila i ka mākaʻi he 12 mau lei, a hoʻihoʻi akula i ka mea nona ka hale kūʻai. ʻO Panna Cappelli ka mea nona ia hale kūʻai, a piha hauʻoli ihola kona naʻau. Aia nō nā mākaʻi ke noiʻi akula no nā lei ʻē aʻe. A ʻo nā ʻano o ia mau lei, he mau lei poepoe a he mau lei Kahelelani. Ma hope mai o ka lā i wāwahi ʻia ai kona hale kūʻai, hoʻonui aʻela ʻo Cappelli i ka mea pale piko pau ʻiole i ʻole ai e maʻalahi ke komo ʻana o ke kolohe.

A ma ka puni wae moho a koe ʻehā, lanakila aku nei ʻo Waiʻanae ma luna o Kākela ma loko o nā pāʻani he ʻehā i ka pō Pōʻahā nei a holo mua akula i ka puni wae moho a koe ʻelua ma ka Hoʻokūkū Inoa Moho o ka ʻAhahui Kula Aupuni o Oʻahu nei, Māhele I o nā kaikamāhine. A ʻo nā hui ʻē aʻe i komo i ka puni wae moho a koe ʻelua, ʻo ia ʻo Kapolei, ʻo Moanalua, a me Mililani.

Eia mai kā kākou ʻōlelo noʻeau,

Liʻiliʻi manu ʻai laiki, akamai i ka hana pūnana.

ʻO ia hoʻi, he mea ʻano ʻole paha kekahi kanaka, akā, he huli ka lima i lalo, ʻo ia hoʻi, hana ka lima.

He pila kai ʻāpono ʻia no ka puhi paka ma luna o ke kaʻa ʻokomopila.

ʻO ia aʻela kekahi poʻo nūhou o kēia lā, ka lā 12 o ʻOkakopa, he Pōʻahā. Welina e nā makamaka. ʻO Ke Aolama kēia a penei ka nūhou.

ʻAkahi a ʻāpono ʻia aku nei ka ʻAha Kūkā o Honolulu nei i ka Pila 70. He pila ia e pāpā ana ʻaʻole e puhi paka ma luna o nā kaʻa ʻokomopila ke kau pū ke keiki. A ʻaʻole wale nō ʻo ka paka, ʻo ke kikaliki uila, a me nā mea puhi uila like ʻole. Ma ke koho pāloka, he ʻewalu luna i ʻāpono, a ʻaʻohe lālā kūʻē. He ʻeiwa lālā o ka ʻAha Kūkā, akā, aia ka Luna ʻAha Kūkā Joey Manahan ma ka ʻāina ʻē. Ua kuhi ʻia, e pūlima nō ka Meia Kirk Caldwell i ia pila. Na Brandon Elefante lāua ʻo Ron Menor i hāpai i ka pila, a ʻo kekahi kumu o ka pila, ʻo ka mea maʻa mau, ʻaʻohe koho a ke keiki i emi iho kona mau makahiki i ka 18 ma ke kau a me ke kau ʻole paha i ke kaʻa e kalaiwa ʻia e ke kanaka makua. ʻŌlelo kekahi poʻe, he pākela kau kānāwai kēia. A ʻo kekahi nīnau i hāpai ʻia aʻe, pehea lā e hoʻokō ʻia ai ua kānāwai nei. Akā, nui ka poʻe i kākoʻo i ka Pila 70. ʻŌlelo kekahi, ʻaʻole maikaʻi iki ka hanu ʻana i ka uahi a ka mea puhi paka. A ʻaʻohe wahi mea a maliu o ke kanaka makua i ka ʻōlelo paipai, ʻaʻole e puhi paka ma luna o ke kaʻa ke kau pū ke keiki. Ma ke Kalana ʻo Hawaiʻi, aia nō kahi kānāwai like e kū ana mai ka makahiki 2010. A ma Kauaʻi, mai ka mahina ʻo Iulai o ka makahiki 2016, e kū ana kahi kānāwai e pāpā ana ʻaʻole e puhi paka ma luna o ke kaʻa ke kau pū ke keiki, he 12 a emi mai. Ua hoʻāʻo aku nei ka ʻAha ʻŌlelo o Hawaiʻi e hana i kānāwai no kēia pae ʻāina a puni, ʻaʻole naʻe i holo. Ma ʻAmelika Hui Pū ʻIa a puni, ma nā mokuʻāina he ʻewalu a me Poko Liko, he kānāwai nō, akā, ʻokoʻa ka makahiki o ke keiki o kekahi, a ʻokoʻa hoʻi kekahi.

Ua pani ʻia ka mākālua e waiho wale ana i ka haʻalele ʻana iho o Chris Naeole i kona kūlana kumu aʻo laina kūlele. ʻO ka mea nāna i pani aku, ʻo ia ʻo John Estes. A i kēlā makahiki aku nei, hoʻomaka ihola kāna hana me ka hui pōpō peku o ke Kulanui o Hawaiʻi, a he kumu kōkua ʻo ia ma lalo o Naeole.

Eia mai kā kākou ʻōlelo noʻeau,

ʻO Muku ka lā, mumuku ka hana.

He ʻōlelo aʻo, ʻaʻole e hoʻomaka i kahi papahana i ka pō i o Muku, o kō ʻole ia papahana.

Pāleoleo ana ʻo Eminem i nā hana kūpono ʻole a ka Pelekikena o ʻAmelika Hui Pū ʻIa.

ʻO ia aʻela kekahi poʻo nūhou o kēia lā, ka lā

ʻAinemanema aku nei ʻo Eminem i ka Pelekikena Donald Trump ma ka pāleoleo ʻana no nā hana like ʻole āna. ʻO ia mele pāleoleo, ua kapa ʻia ʻo “Ka ʻIno,” a he pāleoleo ulu wale ke ʻano, a i hoʻolele ʻia aku ma ke kīwī ma ka polokalamu Makana Hip Hop ma ke kānela BET o ka Pōʻalua nei. Hoʻohalahala ihola ʻo Eminem i nā hana like ʻole a Trump, e laʻa ka hana ʻino i nā mea pāʻani pōpō peku loea e kū ana i ka pono. ʻAʻohe pane i lohe ʻia mai ka Hale Keʻokeʻo a maiā Trump mai paha. He pane mai paha koe.

ʻAʻole paha ʻo Kōlea ʻĀkau e kī mai i ke kao lele nukelea i Hawaiʻi nei, akā, ua kau ka weli o kekahi mau kānaka o Hawaiʻi nei, a no laila, hoʻolaha aʻe nei kekahi mau kula a me kekahi mau haukapila i kahi pepa e wehewehe ana i nā mea like ʻole inā pilikia ʻo Hawaiʻi i ke kao lele nukelea. Makaʻu paha ia mau kānaka ma muli o ka hana a Kōlea ʻĀkau a me ka hana naʻaupō a ka Pelekikena o ʻAmelika Hui Pū ʻIa. A e hoʻolele ʻia ana ma ka lekiō a me ke kīwī ma kēia hope iho, he mau hoʻolaha i ka hana e pono ai ka lehulehu ke hiki mai ia lā ʻino.

Eia mai kā kākou ʻōlelo noʻeau,

I aliʻi nō ke aliʻi i ke kanaka.

He mea nui ka mālama i ke kanaka, ʻo ia ka mea i aliʻi ai ke aliʻi. Pēia nō hoʻi paha me ka pelekikena o ʻAmelika Hui Pū ʻIa.

Ke māhuahua aʻela ka poʻe holo kaʻa hehi wāwae o Honolulu nei.

ʻO ia aʻela kekahi poʻo nūhou o kēia lā, ka lā 10 o Kepakemapa, he Pōʻalua. Welina e na makamaka heluhelu. ʻO Ke Aolama kēia a penei ka nūhou.

Mālama ʻia aku nei kekahi mau papa seminā i kapa ʻia “E Nui Ke Kālā Me Airbnb” ma Oʻahu nei. A ʻākoakoa ihola kekahi mau kānaka ma waho o ka papa o ka Pōʻalima nei ma Lāʻie no ke kūʻē ʻana aku. ʻO ia mau kānaka kūʻē, no loko mai lākou o ka hui kūʻē Airbnb ʻo nā Hoa Kūʻē i ka Hoʻolimalima Kū ʻOle i ke Kānāwai a me ka ʻuniona Hui Pū Ma ʻAneʻi Kūloko 5, he ʻuniona hoʻi no nā limahana hōkele o Hawaiʻi nei. ʻO ka papa seminā, e aʻo ana i ka hana e nui ai ke kālā ma o ka Airbnb, ʻo ia hoʻi, ka hoʻolilo ʻana i kahi noho i wahi hoʻolimalima ʻia e ka poʻe malihini mākaʻikaʻi. Wahi a Mike Biechler, ka luna hoʻokō o nā Hoa Kūʻē i ka Hoʻolimalima Kū ʻOle i ke Kānāwai, e hoʻomau ana ka seminā i ka manaʻo, ʻo ka hoʻolilo ʻana i kahi noho i wahi hoʻolimalima ʻia e ka poʻe malihini mākaʻikaʻi, he mea kū ia i ke kānāwai, a he waiwai maikaʻi ia no ka hoʻopukapuka ʻana. He kuhihewa naʻe ia.

Nui hewahewa nā manawa i holo ʻia ai nā Paikikala Piki ma nā mahina ʻekolu o ka polokalamu holo kaʻa hehi wāwae o Honolulu nei, he 180,272 manawa. A māhuahua aʻela nā manawa holo o ka lā i kēlā me kēia mahina mai Iulai a i Kepakemapa. Ma Iulai, he 1,375 holo ʻana o ka lā. Ma ʻAukake, he 1,918. A ma Kepakemapa, 2,101. He mau ʻano e uku ai no ka holo ʻana. A ʻo ka mea nui loa o ke kūʻai ʻia ʻana, he $20 o nā minuke he 300.

Eia mai kā kākou ʻōlelo noʻeau,

Pili ka hanu o Wailuku.

He ʻōlelo kēia no ke kanaka i mumule ihola ma muli o ka makaʻu loa a o ka make anu paha.