Ke Aolama

He manaʻo ko kekahi e hoʻonui i nā mea ma Hawaiʻi nei e pale aku ai i ke kaua.

ʻO ia aʻela kekahi poʻo nūhou o kēia lā, ka lā 18 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

He manaʻo ko Lukānela Kenelala Dan “Fig” Leaf o ka Māhele Kaua Lewa i hoʻomaha loa, he pono ke hoʻomaikaʻi aʻe i nā mea pale kao lele ma Hawaiʻi nei i ʻike ai ʻo Kim Jong Un, ʻaʻole e noho wale ʻo ʻAmelika Hui Pū ʻoiai ʻo Kōlea ʻĀkau e hoʻoweliweli mai ana. ʻO Leaf, he hope luna kaua ʻo ia no ka Pūʻali Koa Pākīpika o ʻAmelika Hui Pū ʻIa. Hōʻike mai kekahi, ma Hawaiʻi nei, e hoʻāʻo ʻia ana kahi kao lele pale i mea e ʻike ai i ka maikaʻi a me ka maikaʻi ʻole paha i ke kau kupu lau a ma hope iki aku paha.

Aloha nō! Pau ihola ka pāʻani pōpō peku ʻana o John Ursua i kēia kikina nei. He ʻāʻapo ʻo Ursua no ke Kulanui o Hawaiʻi a i ka Pōʻaono i hala aku nei, ʻeha ihola kona kuli ma ka hapalua ʻelua o ka hoʻokūkū. A i ka nānā ʻana aku o ke kauka, ʻike ʻia ihola ka nahae o ke aʻa puʻupuʻu o ke kuli ʻākau o Ursua. ʻAʻole i paʻa ka lā e kaha ʻia ai kona kuli, akā, ʻo ka wā hoʻopolapola, he ʻeono paha mahina a ʻoi. ʻO ka makahiki ʻekolu kēia o Ursua o ka pāʻani ʻana. Ma nā ʻīā ʻapo, ʻo ka helu ʻeono ʻo Ursua a puni ʻo ʻAmelika Hui Pū ʻIa, he 111.2 ʻīā o ka hoʻokūkū. A ma ka ʻapo ʻana, ʻo ka helu ʻehiku ia. He 7.8 o ka hoʻokūkū. He hiki nō i kekahi mau mea pāʻani ke pani i ka mākālua e waiho wale ana, ʻo Kumoku Noa, ʻo Davine Tullis ʻo Kalakaua Timoteo III a me Isaiah Bernard.

Eia mai kā kākou ʻōlelo noʻeau,

Pēpē i ka ua hoʻopoponi ʻili.

He ʻōlelo kēia no ke kanaka i ʻeha ka naʻau i ka ʻōlelo a i ka hana paha a kekahi.

He mau lula hou ma ka ʻinikua ʻAhahui Lawelawe Lapaʻau Hawaiʻi no ka maʻi ʻaʻai.

ʻO ia aʻela kekahi poʻo nūhou o kēia lā, ka lā 16 o ʻOkakopa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.

Ma ka lula ʻinikua o ka ʻAhahui Lawelawe Lapaʻau Hawaiʻi, ua hoʻēmi ʻia ihola ka ʻimi ʻana i ka maʻi ʻaʻai o ka poʻe wāhine. Ma mua, ʻimi ʻia aku ka maʻi ʻaʻai ma ka hapa lalo o ka pūʻao i kēlā me kēia makahiki no nā wāhine i piha nā makahiki he 21 a i ka piha ʻana o nā makahiki he 65. Akā, i kēia manawa, ua emi ihola, he hoʻokahi manawa o nā makahiki ʻekolu. A ʻo ka ʻimi ʻana i ka maʻi ʻaʻai ma ka waiū, i kēia manawa, no nā wāhine wale nō i piha nā makahiki he 40 a ʻoi. Ma mua, inā ua piha nā makahiki he 35 i ka wahine, ua hiki ke ʻimi ʻia ka maʻi ʻaʻai o ka waiū. ʻO ke kumu i emi ai ka manawa o ka ʻimi ʻia ʻana aku o ka maʻi ʻaʻai, ua ʻōlelo ʻia, ʻaʻole pono ka ʻimi pinepine ʻana, a e lilo paha ia ʻimi pinepine ʻana i mea e pōʻino ai ke kino o ka wahine. Akā, kau ihola ka weli o kekahi mau wāhine no ka manaʻo, inā e kali a hala ʻelua makahiki, a laila, e ʻimi ʻia a loaʻa ka maʻi ʻaʻai, ua hala paha ka Puʻulena, ua laha loa. Wahi a ka hui ʻinikua, no ka poʻe wāhine welo maʻi ʻaʻai, ʻaʻole nō e pili nā lula hou iā lākou.

ʻAkahi nō a lanakila ʻo Hawaiʻi ma luna o ka hoa paio o ka ʻAhahui Mauna Komohana i ka hopena pule nei. ʻO San Jose State ka hoa paio, a hāʻule pahū ihola lākou ma ka helu ʻai he 37 i ka 26. I lanakila nā Koa Ānuenue ma muli o ka holo ʻana o Diocemy Saint Juste. He 202 āna ʻīā i holo ai a he ʻekolu āna ʻai holo, ʻo kekahi o lākou ʻai holo, he ʻapona. ʻO ka nui o nā manawa a Saint Juste i holo ai me ka pōpō, he 39, a ʻo ka nui loa ia ma ka moʻolelo o ke Kulanui o Hawaiʻi. ʻO ke kolu kēia o ka hoʻokūkū a Juste i holo ai he 200 a ʻoi i kēia kikina nei. ʻO ka mea e kaumaha ai ka naʻau, ʻo ia ka ʻeha ʻana o ke kuli o John Ursua ma ka hapahā ʻelua. A e ʻike ʻia auaneʻi ka hopena o kona kuli i kēia pule.

Eia mai kā kākou ʻōlelo noʻeau,

Malu ke kula, ʻaʻohe keʻu pueo.

ʻO ia hoʻi, ua maluhia.

Hoʻihoʻi ʻia aku nei kekahi mau lei keu a ka pipiʻi.

ʻO ia aʻela kekahi poʻo nūhou o kēia lā, ka lā 13 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka lā 17 o ka mahina ʻo Iulai, wāwahi ʻia kahi hale kūʻai ʻo Maui Hands a komo hewa akula kekahi a ʻaihue akula he 25 mau lei pūpū Niʻihau, a ʻo ka waiwai ʻiʻo o ia mau lei, he $100,000. ʻO ka mea pōmaikaʻi, ua loaʻa maila i ka mākaʻi he 12 mau lei, a hoʻihoʻi akula i ka mea nona ka hale kūʻai. ʻO Panna Cappelli ka mea nona ia hale kūʻai, a piha hauʻoli ihola kona naʻau. Aia nō nā mākaʻi ke noiʻi akula no nā lei ʻē aʻe. A ʻo nā ʻano o ia mau lei, he mau lei poepoe a he mau lei Kahelelani. Ma hope mai o ka lā i wāwahi ʻia ai kona hale kūʻai, hoʻonui aʻela ʻo Cappelli i ka mea pale piko pau ʻiole i ʻole ai e maʻalahi ke komo ʻana o ke kolohe.

A ma ka puni wae moho a koe ʻehā, lanakila aku nei ʻo Waiʻanae ma luna o Kākela ma loko o nā pāʻani he ʻehā i ka pō Pōʻahā nei a holo mua akula i ka puni wae moho a koe ʻelua ma ka Hoʻokūkū Inoa Moho o ka ʻAhahui Kula Aupuni o Oʻahu nei, Māhele I o nā kaikamāhine. A ʻo nā hui ʻē aʻe i komo i ka puni wae moho a koe ʻelua, ʻo ia ʻo Kapolei, ʻo Moanalua, a me Mililani.

Eia mai kā kākou ʻōlelo noʻeau,

Liʻiliʻi manu ʻai laiki, akamai i ka hana pūnana.

ʻO ia hoʻi, he mea ʻano ʻole paha kekahi kanaka, akā, he huli ka lima i lalo, ʻo ia hoʻi, hana ka lima.

He pila kai ʻāpono ʻia no ka puhi paka ma luna o ke kaʻa ʻokomopila.

ʻO ia aʻela kekahi poʻo nūhou o kēia lā, ka lā 12 o ʻOkakopa, he Pōʻahā. Welina e nā makamaka. ʻO Ke Aolama kēia a penei ka nūhou.

ʻAkahi a ʻāpono ʻia aku nei ka ʻAha Kūkā o Honolulu nei i ka Pila 70. He pila ia e pāpā ana ʻaʻole e puhi paka ma luna o nā kaʻa ʻokomopila ke kau pū ke keiki. A ʻaʻole wale nō ʻo ka paka, ʻo ke kikaliki uila, a me nā mea puhi uila like ʻole. Ma ke koho pāloka, he ʻewalu luna i ʻāpono, a ʻaʻohe lālā kūʻē. He ʻeiwa lālā o ka ʻAha Kūkā, akā, aia ka Luna ʻAha Kūkā Joey Manahan ma ka ʻāina ʻē. Ua kuhi ʻia, e pūlima nō ka Meia Kirk Caldwell i ia pila. Na Brandon Elefante lāua ʻo Ron Menor i hāpai i ka pila, a ʻo kekahi kumu o ka pila, ʻo ka mea maʻa mau, ʻaʻohe koho a ke keiki i emi iho kona mau makahiki i ka 18 ma ke kau a me ke kau ʻole paha i ke kaʻa e kalaiwa ʻia e ke kanaka makua. ʻŌlelo kekahi poʻe, he pākela kau kānāwai kēia. A ʻo kekahi nīnau i hāpai ʻia aʻe, pehea lā e hoʻokō ʻia ai ua kānāwai nei. Akā, nui ka poʻe i kākoʻo i ka Pila 70. ʻŌlelo kekahi, ʻaʻole maikaʻi iki ka hanu ʻana i ka uahi a ka mea puhi paka. A ʻaʻohe wahi mea a maliu o ke kanaka makua i ka ʻōlelo paipai, ʻaʻole e puhi paka ma luna o ke kaʻa ke kau pū ke keiki. Ma ke Kalana ʻo Hawaiʻi, aia nō kahi kānāwai like e kū ana mai ka makahiki 2010. A ma Kauaʻi, mai ka mahina ʻo Iulai o ka makahiki 2016, e kū ana kahi kānāwai e pāpā ana ʻaʻole e puhi paka ma luna o ke kaʻa ke kau pū ke keiki, he 12 a emi mai. Ua hoʻāʻo aku nei ka ʻAha ʻŌlelo o Hawaiʻi e hana i kānāwai no kēia pae ʻāina a puni, ʻaʻole naʻe i holo. Ma ʻAmelika Hui Pū ʻIa a puni, ma nā mokuʻāina he ʻewalu a me Poko Liko, he kānāwai nō, akā, ʻokoʻa ka makahiki o ke keiki o kekahi, a ʻokoʻa hoʻi kekahi.

Ua pani ʻia ka mākālua e waiho wale ana i ka haʻalele ʻana iho o Chris Naeole i kona kūlana kumu aʻo laina kūlele. ʻO ka mea nāna i pani aku, ʻo ia ʻo John Estes. A i kēlā makahiki aku nei, hoʻomaka ihola kāna hana me ka hui pōpō peku o ke Kulanui o Hawaiʻi, a he kumu kōkua ʻo ia ma lalo o Naeole.

Eia mai kā kākou ʻōlelo noʻeau,

ʻO Muku ka lā, mumuku ka hana.

He ʻōlelo aʻo, ʻaʻole e hoʻomaka i kahi papahana i ka pō i o Muku, o kō ʻole ia papahana.

Pāleoleo ana ʻo Eminem i nā hana kūpono ʻole a ka Pelekikena o ʻAmelika Hui Pū ʻIa.

ʻO ia aʻela kekahi poʻo nūhou o kēia lā, ka lā

ʻAinemanema aku nei ʻo Eminem i ka Pelekikena Donald Trump ma ka pāleoleo ʻana no nā hana like ʻole āna. ʻO ia mele pāleoleo, ua kapa ʻia ʻo “Ka ʻIno,” a he pāleoleo ulu wale ke ʻano, a i hoʻolele ʻia aku ma ke kīwī ma ka polokalamu Makana Hip Hop ma ke kānela BET o ka Pōʻalua nei. Hoʻohalahala ihola ʻo Eminem i nā hana like ʻole a Trump, e laʻa ka hana ʻino i nā mea pāʻani pōpō peku loea e kū ana i ka pono. ʻAʻohe pane i lohe ʻia mai ka Hale Keʻokeʻo a maiā Trump mai paha. He pane mai paha koe.

ʻAʻole paha ʻo Kōlea ʻĀkau e kī mai i ke kao lele nukelea i Hawaiʻi nei, akā, ua kau ka weli o kekahi mau kānaka o Hawaiʻi nei, a no laila, hoʻolaha aʻe nei kekahi mau kula a me kekahi mau haukapila i kahi pepa e wehewehe ana i nā mea like ʻole inā pilikia ʻo Hawaiʻi i ke kao lele nukelea. Makaʻu paha ia mau kānaka ma muli o ka hana a Kōlea ʻĀkau a me ka hana naʻaupō a ka Pelekikena o ʻAmelika Hui Pū ʻIa. A e hoʻolele ʻia ana ma ka lekiō a me ke kīwī ma kēia hope iho, he mau hoʻolaha i ka hana e pono ai ka lehulehu ke hiki mai ia lā ʻino.

Eia mai kā kākou ʻōlelo noʻeau,

I aliʻi nō ke aliʻi i ke kanaka.

He mea nui ka mālama i ke kanaka, ʻo ia ka mea i aliʻi ai ke aliʻi. Pēia nō hoʻi paha me ka pelekikena o ʻAmelika Hui Pū ʻIa.

Ke māhuahua aʻela ka poʻe holo kaʻa hehi wāwae o Honolulu nei.

ʻO ia aʻela kekahi poʻo nūhou o kēia lā, ka lā 10 o Kepakemapa, he Pōʻalua. Welina e na makamaka heluhelu. ʻO Ke Aolama kēia a penei ka nūhou.

Mālama ʻia aku nei kekahi mau papa seminā i kapa ʻia “E Nui Ke Kālā Me Airbnb” ma Oʻahu nei. A ʻākoakoa ihola kekahi mau kānaka ma waho o ka papa o ka Pōʻalima nei ma Lāʻie no ke kūʻē ʻana aku. ʻO ia mau kānaka kūʻē, no loko mai lākou o ka hui kūʻē Airbnb ʻo nā Hoa Kūʻē i ka Hoʻolimalima Kū ʻOle i ke Kānāwai a me ka ʻuniona Hui Pū Ma ʻAneʻi Kūloko 5, he ʻuniona hoʻi no nā limahana hōkele o Hawaiʻi nei. ʻO ka papa seminā, e aʻo ana i ka hana e nui ai ke kālā ma o ka Airbnb, ʻo ia hoʻi, ka hoʻolilo ʻana i kahi noho i wahi hoʻolimalima ʻia e ka poʻe malihini mākaʻikaʻi. Wahi a Mike Biechler, ka luna hoʻokō o nā Hoa Kūʻē i ka Hoʻolimalima Kū ʻOle i ke Kānāwai, e hoʻomau ana ka seminā i ka manaʻo, ʻo ka hoʻolilo ʻana i kahi noho i wahi hoʻolimalima ʻia e ka poʻe malihini mākaʻikaʻi, he mea kū ia i ke kānāwai, a he waiwai maikaʻi ia no ka hoʻopukapuka ʻana. He kuhihewa naʻe ia.

Nui hewahewa nā manawa i holo ʻia ai nā Paikikala Piki ma nā mahina ʻekolu o ka polokalamu holo kaʻa hehi wāwae o Honolulu nei, he 180,272 manawa. A māhuahua aʻela nā manawa holo o ka lā i kēlā me kēia mahina mai Iulai a i Kepakemapa. Ma Iulai, he 1,375 holo ʻana o ka lā. Ma ʻAukake, he 1,918. A ma Kepakemapa, 2,101. He mau ʻano e uku ai no ka holo ʻana. A ʻo ka mea nui loa o ke kūʻai ʻia ʻana, he $20 o nā minuke he 300.

Eia mai kā kākou ʻōlelo noʻeau,

Pili ka hanu o Wailuku.

He ʻōlelo kēia no ke kanaka i mumule ihola ma muli o ka makaʻu loa a o ka make anu paha.

ʻAʻole paha e mālama ʻia ka hoʻokūkū heʻe nalu nui ʻo ka Eddie i kēia makahiki nei.

ʻO ia aʻela kekahi poʻo nūhou o kēia lā, ka lā 9 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Kūkala aʻela ka hui ʻo Quicksilver, ʻaʻole ia e kākoʻo ana i ka hoʻokūkū heʻe nalu kaulana i kapa ʻia ʻo Ka Eddie i kēia makahiki nei. ʻO ka Eddie, aia wale nō a poʻi halehale nā nalu, he 30 kapuaʻi ke kiʻekiʻe, a laila, mālama ʻia. Ke mālama ʻia ka hoʻokūkū, ʻo ka lā mua o Kēkēmapa, ʻo ia ka lā mua, a ʻo ka lā 28 o Pepeluali ka lā hope. A mai ka makahiki 1984, he ʻeiwa wale nō manawa i mālama ʻia ai ka Eddie. Kohu mea lā, he ʻaelike nō kai paʻa ʻē, akā, i ka Pōʻaono nei, hoʻololi ʻia ihola kekahi mau mea, ʻaʻole naʻe i ʻaelike ʻia e nā ʻaoʻao a pau, a ʻo ia ka mea i hoʻopau iho ai ʻo Quicksilver i ke kākoʻo ʻana. E ʻimi ana ka ʻOhana ʻAikau i mau hui hou nāna e kākoʻo i ka hoʻokūkū i kēia makahiki nei. Wahi a ka hui ʻo Quicksilver, e kākoʻo paha ʻo ia i ka hoʻokūkū o kēia makahiki aʻe a ma ia hope aku nō hoʻi paha. Aia nō i ke kūkākūkā ʻana.

Holo ihola ka manaʻo o Chris Naeole e waiho iho i kona kūlana hana ma ka hui pōpō peku o ke Kulanui o Hawaiʻi. ʻO Naeole ke kumu aʻo laina kūlele. Hōʻike aʻe nei ʻo ia, ʻo kona kumu i haʻalele ai, ʻokoʻa kona manaʻo ma ke aʻo ʻoʻoleʻa ʻana i nā mea pāʻani, a ʻokoʻa hoʻi ka mea e hana ʻia nei. ʻAʻole i hele ʻo Naeole i ka hoʻomaʻamaʻa he elua lā o kēlā pule aku nei, a ʻaʻole ʻo ia i hele aku me ka hui pōpō peku i Nevada no ka hoʻokūkū o ka Pōʻaono nei. Ua hōʻike mai ʻo David Matlin, ka luna ʻālapa, a me ke poʻo kumu aʻo Nick Rolovich i ko lāua mahalo iā Naeole a me kāna hana me nā mea pāʻani pōpō peku.

Eia mai kā kākou ʻōlelo noʻeau,

I wai noʻu.

He wahi ʻōlelo kēia, ke makemake e hoʻokūkū paha me kekahi ma ka pāʻani a ma kekahi hana ʻālapa paha.

He ulia kaʻa ma Mākaha kahi i make ai kekahi kanaka o Waiʻanae.

ʻO ia aʻela kekahi poʻo nūhou o kēia lā, ka lā 6 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Aloha nō. Make ihola kekahi kanaka ma ka ulia kaʻa o ka wanaʻao o ka Pōʻahā nei ma kahi o ka Pāka Kahakai o Keaʻau ma Mākaha. ʻO Troy Kahooilihala ʻōpio ka inoa o ua kanaka lā, a he 21 wale nō ona makahiki. ʻO ka mea nāna e kalaiwa ana i ke kaʻa e kau ana ʻo Kahooilihala, ua ʻona, a e holo nui ana nō hoʻi. A ʻaʻole i hoʻopaʻa ʻo Kahooilihala i ka ʻili kuapo. Aia ʻo ia ma ka noho o hope a lele akula ʻo ia i waho o ke kaʻa. ʻO ka mea kalaiwa a me ka ʻōhua e noho ana ma ka noho ʻōhua o mua, ua paʻa nō ka ʻili kuapo. Ua lawe ʻia lāua i ka haukapila ma ke kūlana kūkonukonu. Wahi a ka mākaʻi, ʻo ke kolu kēia o ka make ulia kaʻa i pili i ka holo nui a me ka wai ʻona ma Oʻahu nei i kēia makahiki nei. A he wahi ʻōlelo aʻo kā ka makuakāne o Kahooilihala ʻōpio, ʻo ia hoʻi, mai kalaiwa ma lalo o ka malu o ka wai ʻona. E kāhea aku i kekahi. He mea ʻole ka hola o ka lā a me ka pō paha.

ʻAʻole i hele pū aku ʻo Chris Naeole me nā Koa Ānuenue i Nevada no ka hoʻokūkū pōpō peku i kēia hopena pule. ʻO Naeole, ʻo ia ke kumu aʻo laina kūlele. A ʻaʻole nō hoʻi ʻo ia i hele i ka hoʻomaʻamaʻa i ka Pōʻakolu a me ka Pōʻahā. Nīnau ʻia ke poʻo kumu aʻo Nick Rolovich no Naeole, akā, ʻaʻole ʻo ia i pane mai. ʻO ka lima kēia o ke kikina a Naeole e hana ana ma ke ʻano he kumu aʻo no ke Kulanui o Hawaiʻi. A he keu kāna hana a ka maikaʻi. Lana ka manaʻo, e hoʻi hou ʻo ia i ka hana.

Eia mai kā kākou ʻōlelo noʻeau,

Ma Koʻolau e ʻōlelo ai, he lohe ma Kona.

He ʻōlelo kēia no kahi ʻōlelo i laha koke ma ka ʻāina.

E hiki ana ke lele aku i Sinapoa mai Hawaiʻi aku.

ʻO ia aʻela kekahi poʻo nūhou o kēia lā, ka lā 4 o ʻOkakopa, he Pōʻakolu. Welina e nā hoa. ʻO Ke Aolama kēia a penei ka nūhou.

He manaʻo ko ka Hui Mokulele ʻo Hawaiian e hoʻonui aku i nā wahi o ka Moananuiākea a me ʻAmelika ʻĀkau e lele aku ai kona mau mokulele. ʻO Hono Kaona kekahi wahi e manaʻo ʻia nei. A wahi a ka Luna Nui Hoʻokō, ʻo Mark Dunkerley, he makemake ko ka hui e lele aku nā mokulele i ʻEulopa. A he mea maikaʻi ia no ia hui, ʻoiai, ʻakahi nō a puka ua hui mokulele nei mai ka panakalupa i ka mahina ʻo Iune o ka makahiki 2005. A i kēia manawa, ʻo ka Hui Mokulele ʻo Hawaiian kekahi o nā hui mokulele nui loa o ka waiwai a puni ʻo ʻAmelika Hui Pū ʻIa, a pēlā nō hoʻi paha a puni ke ao nei.

A e hoʻomaka ana kekahi hui mokulele o Sinapoa e lele mai i Hawaiʻi nei. ʻAʻohe hui mokulele i lele kona mokulele i Hawaiʻi nei mai Sinapoa mai, mai ka makahiki 1992. ʻO Scoot ka hui mokulele nona ka mokulele e lele mai ana i Honolulu nei. E haʻalele aku ana ka mokulele o Scoot iā Sinapoa i ka Pōʻakahi, ka Pōʻalua, ka Pōʻalima a me ka Pōʻaono. A e lele mua ana i Osaka, Iāpana. A mai kēia lā aku a i ka lā 29 o ʻOkakopa, he emi loa ka huakaʻi lele puni, mai Honolulu aku a i Osaka, he $280 a ʻoi, a mai Honolulu aku a i Sinapoa, he $480 (Ma o Osaka nō e lele ai.). E hoʻomaka ka huakaʻi lele puni ʻana i ka lā 19 o Kēkēmapa.

Eia mai kā kākou ʻōlelo noʻeau,

Nā kōhi kelekele a Kapuʻukolu.

He ʻōlelo kēia ke nui loa ka mea ʻai ʻono ma ka ʻaha ʻaina a me ka pāʻina paha.

ʻAkahi nō a male ke Kamaliʻiwahine Abigail Kawananakoa me kāna ipo.

ʻO ia aʻela kekahi poʻo nūhou o kēia lā, ka lā 3 o ʻOkakopa, he Pōʻalua. Welina e nā makamaka heluhelu. ʻO Ke Aolama kēia a penei ka nūhou.

He mau hale papaʻi ʻalokio hou kai ke kūkulu ʻia, a ʻo ke kumu kūʻai o ke keʻena noho o ia mau hale papaʻi ʻalokio hou, he $1 miliona a ʻoi. ʻO ia ʻo Park Lane Ala Moana a me Waiea. A i ka Pōʻalima nei, kūʻai ʻia mai nei kekahi keʻena noho o ia hale papaʻi ʻalokio no ke kālā he $22 miliona. A ʻo ia ke keʻena noho ʻalokio pipiʻi loa i kūʻai ʻia ma ka moʻolelo o Hawaiʻi nei. I ka makahiki 2014, ʻo ke kumu kūʻai kiʻekiʻe loa, he $10 miliona, akā, ma Park Lane i ka mahina ʻo ʻAukake, kūʻai ʻia kekahi no $18.8 miliona. A ʻo kekahi, he $29 miliona, ʻaʻole naʻe ia i kūʻai ʻia. A ma Waiea, i kēlā makahiki aku nei, he $35 miliona o kekahi keʻena noho, a he $36 miliona o kekahi, ʻaʻole naʻe i kūʻai ʻia. ʻO ka nui o nā keʻena noho ma Park Lane, he 219, a pau ihola i ke kūʻai ʻia he 95 pākeneka, ʻo ia hoʻi, he 208 keʻena noho. A ʻo ka huina pau, he $900 miliona. ʻO wai lā ka poʻe kānaka i kūʻai i ia mau keʻena noho? He pipiʻi hoʻi kau a koe aku.

I ka Lāpule nei, male aku nei ke Kamaliʻiwahine Abigail Kawananakoa me kāna ipo, me Veronica Gail Worth. Wahi a lāua, e mālama ʻia ana kahi pāʻina liʻiliʻi a e kono ʻia ana nā ʻohana a me nā hoa. ʻO Kawananakoa, he 91 ona makahiki, a i ka lā 18 o Iune, loaʻa aku nei ʻo ia i ke kūhewa. A i ia manawa, hoʻāʻo ihola kona loio e lilo ke kuleana o ka waiwai noho kahu nāna e lawelawe ma muli o ka manaʻo, ʻaʻole hiki iā Kawananakoa ke hana no kona pono iho. Akā, kūʻē ʻo Worth me ke kūpaʻa, he hiki nō iā Kawananakoa ke lawelawe i kona mau kuleana. He makemake ko Worth, e hoʻi ke kuleana ma lalo o Kawananakoa. A lilo ihola ia i mea hoʻopaʻapaʻa nui ʻia ma ke kānāwai.

Eia mai kā kākou ʻōlelo noʻeau,

E! Loaʻa akula ke kalo, ʻo ka ʻapowale.

ʻO ia hoʻi, he hoʻopau manawa kāu hana.