11-09-17

Hoʻopiʻi aku nei ke Keʻena Kuleana Hawaiʻi i ke Kulanui o Hawaiʻi.

ʻO ia aʻela kekahi poʻo nūhou o kēia lā, ka lā 9 o Nowemapa, he Pōʻahā. Welina e nā makamaka. ʻO Ke Aolama kēia a penei ka nūhou.

Waiho aku nei ke Keʻena Kuleana Hawaiʻi i hoʻopiʻi i mua o ka ʻaha hoʻokolokolo kaʻapuni o Oʻahu nei no ka pono ʻole o ke Kulanui o Hawaiʻi ma ka hoʻokele ʻana a me ka lawelawe ʻana i ka hana ma luna o Mauna Kea ma ka ʻī ʻana, he mīʻoi loa ke kūkulu ʻia ʻana o luna o Mauna Kea no ka pono o ke kilo hōkū me ka nānā pono ʻole i ke ʻano o ka nohona a me nā mea e hoʻopuni ana a me kona ʻano he mea nui ia ma nā ʻike a me nā hana a ka poʻe Hawaiʻi. A ke noi nei ke Keʻena Kuleana Hawaiʻi i ke aupuni mokuʻāina i ka hoʻopau aku i ka palapala hoʻolimalima a ke Kulanui o Hawaiʻi ma muli o ka hoʻokō ʻole ʻia o kona kuleana. E hoʻāʻo ana ke Keʻena Kuleana Hawaiʻi e kāʻili i kahi māhele o ke kuleana mai ke kulanui a lilo no ia keʻena e hoʻokō ai i mea e hoʻomaikaʻi ʻia ai ka mālama ʻana i ia mauna aloha. Akā, wahi a nā kahu waiwai o ke Keʻena Kuleana Hawaiʻi, he naua ka hana a ke aupuni, kohu mea lā, ʻaʻole i makemake e komo ma ka ʻuao ʻana. Ma ka palapala hoʻopiʻi, hōʻike ʻia nā mea like ʻole i kō ʻole a i holo pono ʻole ma ka hoʻokele ʻana o ke Kulanui o Hawaiʻi. ʻO kekahi, ʻaʻole i ʻohi ʻia ka uku hoʻolimalima mai kekahi mau ʻohe nānā he 11, a ʻaʻole i kūkulu ʻia he wahi e mālama ana i ke ʻano nui o Mauna Kea ma nā ʻike a me nā hana a ka poʻe Hawaiʻi. ʻAʻole nō hoʻi i hoʻokō pono i ka Papahana Hoʻokele 2009. Wahi a ka waha ʻōlelo o ke Kulanui o Hawaiʻi, ua pilikia ma mua, akā, i kēia manawa, ua paʻa ihola ke kahua, a paʻa nō hoʻi ka manaʻo o ke kulanui e hoʻokele pono me ke alu like ʻana me nā kānaka a pau e pono ai, a ʻo ka ʻoi loa aku, ʻo ko Hawaiʻi nui o Keawe.

Ua hana aku nei ka hui ʻo Walt Disney i ke kiʻi ʻoniʻoni ʻo Moana ma ka ʻōlelo Kahiki a me ka ʻōlelo Maori. A i kēia manawa, e hana ʻia ana ka mana ʻōlelo Hawaiʻi, a no laila, ke ʻimi ʻia nei nā kānaka ʻōlelo Hawaiʻi i mau mea hana keaka leo. E hoʻomaka ka ʻimi ʻana i loko o kekahi mau pule e hiki koke mai ana. A no laila, inā he ulu ka hoi, e hoʻouna aku i kou kiʻi, kou helu kelepona a me kahi lou e kuhikuhi ana i ka Vimeo a i ka wikiō paha ma YouTube e hōʻike ana i ka hīmeni ʻana a me ke oli ʻana paha i ka hua leka uila, acms@hawaii.edu. ʻO ka lā kau palena, ʻo ka lā 17 o Nowemapa.

Eia mai kā kākou ʻōlelo noʻeau,

Hohonu nō ke kawa.

He mea e nalu ai ke kanaka.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s