He hoa paio hou ko Max Holloway.
ʻO ia aʻela kekahi poʻo nūhou o kēia lā, ka lā 13 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Aia nō kahi poʻe e hoʻopiʻi nei i ke Keʻena ʻĀina Hoʻopulapula Hawaiʻi ma muli o ka lōʻihi loa o ko lākou kali ʻana ʻo ka lilo aku o ka ʻāina iā lākou, a me he mea lā, e lana ana ko lākou manaʻo no ka lanakila. Ma ka ʻōlelo hoʻoholo a ka Lunakānāwai Kaʻapuni Virginia Crandall, he pono ke ʻimi ke aupuni mokuʻāina a loaʻa nā palapala a nā mea noi i waiho ai ma ka lā 31 o Kēkēmapa o kēia makahiki nei a ma mua paha. A inā ʻaʻole e loaʻa, ʻaʻole hiki i ke aupuni ke kūpale aku. No laila, inā ʻaʻole e loaʻa mai nā palapala, ʻo ka hana koe, ʻo ia ka paio ʻana no ka uku pohō.
Paʻa ihola ka hoa paio hou o Max Holloway. ʻO Jose Aldo nō ia. ʻO Frankie Edgar ka hoa paio e hoʻāʻo ana e kāʻili i ka inoa moho mai nā lima wīkani mai o Holloway ma mua, akā, ma muli o ka ʻeha o kona maka, ʻaʻole ʻo ia e mokomoko. Ua hui pū ʻo Holloway lāua ʻo Aldo ma ka lina mokomoko i kēlā makahiki aku nei, a lilo aku nei ke eo iā Holloway. A ʻo ka wā a lāua o ka hui hou ʻana, ʻo ia ka lā 2 o Kēkēmapa ma ka UFC 218.
Aloha nō. Hāʻule ihola nā Koa Ānuenue o Hawaiʻi i nā ʻĪlio Pulu o Fresno Mokuʻāina ma ka helu ʻai he 31 i ka 21 i ka pō Pōʻaono nei. Paʻa ka ʻaiholo mua iā Hawaiʻi, akā, ma ia hope mai, ʻaʻole nō i paʻa hou kahi ʻai a ka hapahā hope. ʻAʻole nō e pāʻani ʻo Hawaiʻi ma ka Ipu Hawaiʻi. Aia a lanakila ʻo Hawaiʻi ma nā hoʻokūkū he ʻeono, a laila, komo wale i ka Ipu Hawaiʻi. Akā, i ka hāʻule ʻana iā Fresno, hāʻule pahū ihola ia manaʻo.
Eia mai kā kākou ʻōlelo noʻeau,
Makaʻala ke kanaka kāhea manu.
He pono ke makaʻala i mea e holo mua ai.
Ke Aolama 