Paʻa ihola ka mahuka i ka hopu ʻia.
ʻO ia aʻela kekahi poʻo nūhou o kēia lā, ka lā 16 o Nowemapa, he Pōʻahā. Welina e nā makamaka. ʻO Ke Aolama kēia a penei ka nūhou.
Ua paʻa ihola i ka hopu ʻia ʻo Randall Saito, ke kanaka i mahuka mai ka hale maʻi o ke aupuni mokuʻāina o Hawaiʻi. Ma Stockton i Kaleponi ʻo ia i hopu ʻia ai ma muli o ka ʻeleu o kahi limahana o ka hui kaʻa hai ma laila. Wahi a ka Loio Kuhina Doug Chin, e kū ana ʻo Saito i mua o ka ʻaha hoʻokolokolo o ke Kalana ʻo San Joaquin no ka hihia kahi e noi ʻia ai kona hoʻihoʻi ʻia ʻana i Hawaiʻi nei. A ma Hawaiʻi nei, hoʻokuʻu ʻia kekahi mau limahana ʻehiku o ka hale maʻi a Saito i mahuka ai i ka hoʻomaha ʻana he 30 lā me ka uku ʻole ʻia ʻoiai e noiʻi ʻia ana ko Saito mahuka ʻana. A ma ia noiʻi ʻana, he mau limahana hou paha ke hoʻomaha me ka uku ʻole ʻia. Ua ulukū ka noʻonoʻo o ke Kiaʻāina David Ige, he 10 hola i hala mai ka wā i mahuka ai ʻo Saito mai ka hale maʻi aku a i ka wā i hōʻike ʻia ai ia mahuka ʻana i ka mākaʻi. Ua hoʻokomo ʻia ʻo Saito i loko o ka hale maʻi i ka makahiki 1981 ma hope o kona hoʻokuʻu ʻia ʻana ma muli o ka hehena no ka pepehi i ka wahine a make ma ke Kikowaena Kūʻai ʻo Ala Moana i ka makahiki 1979. Ua nānā ʻia ʻo Saito a loaʻa ke ʻano o kona maʻi, he puni a leʻa a “heha Waipiʻo i ka noe” i ka hōʻeha ʻana aku i ka wahine a he puni nō hoʻi i ke ai ʻana i ke kino make.
Ma kēia pae ʻāina, ʻo nā kānaka i make i ka ulia kaʻa i kēia makahiki nei a i ka Pōʻakahi nei, ua emi iho i ko kēlā makahiki aku nei a i ka lā like. Ma ka wā like o kēia makahiki nei, he ʻelima mau kānaka e holo ana i ka paikikala i make. A i ia wā o kēlā makahiki aku nei, ʻaʻohe kanaka e holo paikikala ana i make. A ua emi loa mai ka make o ke koʻele wāwae, he ʻelima wale nō i kēia makahiki nei, akā, i ka wā like o kēlā makahiki aku nei, he 27. Ma Oʻahu nei, ua emi loa nā koʻele wāwae i make ma ia wā like, he 18 i kēlā makahiki aku nei a he 3 wale nō i kēia makahiki nei. Akā, ʻo ka mea holo kaʻa hehi wāwae i make, ʻaʻohe mea o ia wā like o kēlā makahiki aku nei akā, i kēia makahiki nei, he 3.
Eia mai kā kākou ʻōlelo noʻeau,
Moe lāpuʻu i ke anu o Puʻupā.
He ʻōlelo kēia no ke kanaka moe pupuʻu. A he ʻōlelo nō hoʻi kēia no ke kanaka puni hiamoe.
Ke Aolama 