E ʻō ʻia aku paha i ka lāʻau koʻokoʻo maʻi pēheu.
ʻO ia aʻela kekahi poʻo nūhou o kēia lā, ka lā 15 o ka mahina ʻo Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
Ke koi aku nei nā luna aupuni e ʻō aku nā kauka i nā mea maʻi i ka lāʻau koʻokoʻo maʻi pēheu (ʻauwaepahāha) ma mua o ke kikina hoʻokahakaha e hiki koke mai ana. I ka hopena o ka mahina ʻo Kepakemapa, he 384 mau kānaka i loaʻa i ka maʻi pēheu. A hiki akula ia helu a i ka 557. A manaʻo ʻia, ua ʻoi aku ka nui o nā kānaka i loaʻa i ua maʻi lā, ʻaʻole naʻe i ʻike ʻia e nā kauka. Inā he kuhi paha kou, ua loaʻa ʻoe i ka maʻi ʻauwaepahāha, mai hele aku i ke kula, i ka hana a i nā wahi nui paha o nā kānaka, a e kau paha kahi uhi waha a mai hele a kokoke i nā kānaka ʻē aʻe.
Ua mahuka aʻe nei kahi maʻi o ka Hale Maʻi o ke Aupuni Mokuʻāina ʻo Hawaiʻi i ka hola 10:00 o ke awakea o ka Lāpule nei. ʻO ka mea ʻāpiki, ʻaʻole i hōʻike ʻia aku ia mahuka ʻana i ka lehulehu a i ka hola 8:40 o ke ahiahi. A i ia manawa, aia akula ʻo ia i San Jose i Kaleponi. ʻO Randall Saito ka inoa o ua maʻi lā, a i kona haʻalele ʻana i ka hale maʻi, kau aku nei ʻo ia i luna o ke kaʻa hai, a holo akula no ke Kahua Hoʻolulu Mokulele ʻo Daniel K. Inouye, hoʻolimalima akula i ka mokulele a lele akula no Maui. A ma laila ʻo ia i kau ai i ka mokulele no San Jose. I ka hola 5:30 kona hiki ʻana aku i laila. A i ka hola 7:30 ke kāhea ʻana o ka hale maʻi i ka mākaʻi.
Lilo aku nei kahi makana aupuni i ke Kulanui o Hawaiʻi ma Mānoa no ka māhuahua ʻana o nā haumāna i puka i loko o nā makahiki ʻehā. ʻO ka Makana Hoʻokō Kekelē ia o ka makahiki 2017. Mai ka makahiki 2010 a i ka makahiki 2016, ua piʻi aʻela ka nui o nā haumāna manawa piha, ʻakahi a komo i ke kulanui, i puka i loko o nā makahiki he ʻehā, he 83 pākeneka. I ka makahiki 2010, he 17.5 wale nō pākeneka o nā haumāna. A i ka makahiki 2016, ua hiki akula i ke 32 pākeneka. Ua nui nā polokalamu e kākoʻo ana i nā haumāna i hoʻomau lākou i ka hele kula ʻana a puka.
Eia mai kā kākou ʻōlelo noʻeau,
He hoʻokele waʻa no ka lā ʻino.
He ʻōlelo kēia no ke kanaka wiwo ʻole.
Ke Aolama 