Hoʻi mai nei kahi kiʻi o Kū.
ʻO ia aʻela kekahi poʻo nūhou o kēia lā, ka lā 29 o ka mahina ʻo Mei, he Pōʻalua. Welina e nā makamaka. ʻO Ke Aolama kēia a penei ka nūhou.
He manaʻo ko ke Keʻena ʻĀina a Waiwai Pili ʻĀina, e kaupalena ʻia ka nui o nā malihini mākaʻikaʻi o ka Pāka Mokuʻāina o Hāʻena. A ʻo ka nui o nā malihini mākaʻikaʻi o ka lā ke ʻāpono ʻia, he 900. ʻO ka makamua kēia o ka hoʻāʻo ʻana e hoʻēmi i nā kānaka kipa pāka mokuʻāina. ʻO ka poʻe wale nō e helu ʻia, ʻo ia ka poʻe hele wāwae mamao e hele ana no ke ala ʻo Kalalau. ʻAʻole e helu ʻia ka poʻe i ʻae ʻia ka hoʻomoana ana, ka poʻe hahai holoholona me ka palapala ʻae, ka poʻe kupa o nei ʻāina, ka poʻe kahu pā ilina, ka poʻe kōkua i kahi hanana ma laila, ka poʻe hana i ka hana o ke au kahiko a me ka poʻe nona ka pilina i ia ʻāina.
Ua hoʻihoʻi ʻia mai nei kahi kiʻi akua kahiko i Hawaiʻi nei. A ma muli ia o ka ʻoluʻolu o Marc Benioff a me kāna wahine, ʻo Lynne. ʻO ia kiʻi, ʻo Kū ia a he 200 makahiki o ia kiʻi a ʻoi aku paha. Ua uku nā Benioff he $7 miliona a ʻoi aku ma ke kū kālā i kapa ʻia ʻo Christies ma Palisa i ka mahina ʻo Nowemapa. A hāʻawi manawaleʻa maila lāua i ua kiʻi lā i ka Hale Hōʻikeʻike o Kamehameha. A he keu nā Benioff a ka lokomaikaʻi, na lāua nō hoʻi e uku i nā kālā a pau e hoʻolilo ʻia e ka Hui Keʻa ʻUlaʻula ma ke kōkua ʻana i ka poʻe i pilikia i ka pele ma ka mokupuni ʻo Hawaiʻi.
Eia mai kā kākou ʻōlelo noʻeau,
Hele nō ka wai, hele nō ka ʻalā.
He ʻōlelo kēia no kahi makana manawaleʻa nui.
Ke Aolama 