08-21-18

E pilikia paha kākou i ka makani pāhili ʻo Lane.

ʻO ia aʻela kekahi poʻo nūhou o kēia lā, ka lā 21 o ʻAukake, he Pōʻalua. Welina e nā makamaka. ʻO Ke Aolama kēia a penei ka nūhou.

ʻAʻole i emi mai ka ikaika o ka makani pāhili ʻo Lane. I ka hola 5:00 o ke kakahiaka nui nei, ʻo ka ikaika o Lane, he 150 mile o ka hola. A no laila, kūkala ʻia aʻela ka makaʻala makani pāhili i ko Maui a Kama a me ko Hawaiʻi nui a Keawe. ʻO ke kūkala makaʻala, he hoʻopuka ʻia he 48 hola ma mua o ka wā e pāhola mai ai ka makani he 73 mile o ka hola a emi iki mai. A i ka hola 6:45 o ke kakahiaka nei, kūkala ʻia aʻela ka makaʻala wai hālana i nā mokupuni a pau o kēia pae ʻāina. I ka Pōʻakolu e hoʻomaka ai ka wā makaʻala wai hālana.

E mālama ana ke Kulanui o Hawaiʻi i mau hālāwai kahi e lohe ʻia ai nā lula hou i manaʻo ʻia no ka hana ʻimi kālā a me ka hana a ka lehulehu ma Mauna Kea. ʻO ka hālāwai mua, aia ana ma Oʻahu nei, mai ka hola 5:00 o ka ʻauinalā a i ka hola 7:00 o ka lā 24 o Kepakemapa. Aia ana ma ka Hale Noiʻi Maʻi ʻAʻai o ke Kulanui o Hawaiʻi ma ke alanui ʻo Ilalo (701 Ilalo) ma Honolulu. ʻO ka lua o ka hālāwai, aia ana ma Hilo ma ka lā 25 o Kepakemapa. ʻO ke kolu, aia ana ma Waikōloa ma ka lā 26 o Kepakemapa. A ʻo ka hālāwai hope, aia ana ma Maui i ka lā 28 o Kepakemapa.

Eia mai kā kākou ʻōlelo noʻeau,

Mōhala maikaʻi ke oho o ke kupukupu.

He ʻōlelo kēia no ke kanka nohea.