08-20-18

Nui ka ʻiʻini o nā keiki o Honolulu, e kāʻili i ka inoa moho pōpō hili o ka honua nei.

ʻO ia aʻela kekahi poʻo nū hou o kēia lā, ka lā 20 o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.

Lilo hou ke eo i nā keiki o Honolulu ma ka hoʻokūkū pōpō hili. He puni wae moho ia no ke Kahului Honua o ke Kuʻikahi Keiki. Lanakila aku nei ʻo Honolulu ma luna o Grosse Pointe Woods-Shores o Mikikana i ka lā i nehinei ma ka helu ʻai he 8 i ka 3. A no laila, e kūʻē ana ʻo Honolulu iā Mid-Island o Nū Ioka i ka hola 1:30 o ke awakea o ka Pōʻakolu. A ʻo ka lanakila o ia hoʻokūkū, e komo ana i ka puni inoa moho ʻAmelika Hui Pū ʻIa.

ʻO ke kiʻi ʻoniʻoni ʻo Nā ʻĀkia Waiwai Pupule ke kiʻi ʻoniʻoni helu ʻekahi ma nā hale kiʻi ʻoniʻoni o ʻAmelika ʻĀkau ma ka hopena pule nei. Ua kohokoho ihola ka hui ʻo nā Hoa Hānau Warner, ua loaʻa mai he $25.2 miliona i ia kiʻi ʻoniʻoni ma ka hopena pule nei. A he $34 miliona mai ka Pōʻakolu mai, kona lā mua hoʻi i hōʻikeʻike ʻia ai. ʻO ka nui o ke kālā i hoʻolilo ʻia ma ka hana ʻana i ia kiʻi ʻoniʻoni, he $30 miliona. Ua kuhi ʻē ʻia, e loaʻa he $18 miliona a ʻoi ma nā lā mua ʻelima o ka hōʻikeʻike ʻia ʻana. ʻAʻohe wahi kanaka i manaʻo, e ʻoi aku i ke 30 miliona kālā.

Eia mai kā kākou ʻōlelo noʻeau,

Kaha ka ʻio i ka mālie.

He ʻōlelo kēia no ke kanaka nohea.